1. Ebɛn asɛm na banyimba bi kae dze kyerɛɛ dɛ ɔgye owusoɛr no dzi paa?

 YARBA bi a no mu yɛ dzen bɔɔ banyimba bi a wɔfrɛ no Matthew. Nna iyi hwehwɛ dɛ wɔyɛ no oprehyɛn ahorow pii. Da kor bi nna ɔnye n’awofo rohwɛ JW Broadcasting^® dwumadzi bi. Dɛm aber no nna oedzi mfe esuon. Dwumadzi no rokɔ n’ewiei no, woyii ndwom ho video bi a ɔfa hɔn a wɔrema hɔn adɔfo a woenyan hɔn efi owu mu no akɔaba. b Aber a dwumadzi no baa n’ewiei no, Matthew kosuoo n’awofo hɔn nsamu na ɔkaa kyerɛɛ hɔn dɛ: “Mama na Dada, hom ehu a? Sɛ muwu mpo a, wobenyan me wɔ owusoɛr no mu. Ntsi ɔyɛ a, hom ntweɔn me na yebehyia atse.” Ɔwodze, hwɛ dɛ mbrɛ awofo no enyi besi agye afa. Wohun dɛ hɔn ba no gye owusoɛr no dzi paa.

2-3. Ebɛnadze ntsi na ɔyɛ papa dɛ yɛdwendwen owusoɛr ho enyidado no ho?

² Ɔwɔ mu ara, ɔbɛyɛ papa dɛ yɛdwendwen owusoɛr ho enyidado a Bible no ka ho asɛm no ho. (John 5:28, 29) Ebɛnadze ntsi na yɛreka dɛm? Osiandɛ yennyim ber a yarba bi a no mu yɛ dzen bɔbɔ hɛn, anaadɛ hɛn dɔfo bi botum ewu awerɛfirmu. (Ɔsɛnk. 9:11; Jas. 4:13, 14) Owusoɛr ho enyidado a yɛwɔ no botum aboa hɛn ma yeegyina ɔhaw ahorow a ɔtsetse dɛm no ano. (1 Thess. 4:13) Kyerɛwnsɛm no ma yehu dɛ hɛn sor Egya no nyim hɛn yie, na ɔdɔ hɛn paa so. (Luke 12:7) Sɛ Jehovah nyan hɛn a, hɛn suban nye mbrɛ nna yɛtse no rennsesa, na biribiara a yenyim no so, yɛbɛkaa. Sɛ dɛm na ɔtse dze a, nna ɔno ɔkyerɛ dɛ Jehovah nyim hɛn paa, osiandɛ obi a onyim hɛn paa na obotum ayɛ biribi a ɔtse dɛm. Jehovah dɔ hɛn paa, ntsi ɔayɛ nhyehyɛɛ a ɔbɛma yeetum atsena ase daa! Sɛ yewu na sɛ Jehovah pɛ dɛ onyan hɛn a, obenyan hɛn.

³ Adzesua yi mu no, yebedzi kan ahwɛ siantsir a yebotum agye owusoɛr no edzi. Bio so, yɛbɔhwɛ Bible mu asɛm bi a ɔhyɛ gyedzi dzen. Asɛm bi wɔ dɛm kyerɛwtohɔ no mu, na ɔno na adzesua yi gyina do. Ɔka dɛ: ‘Wo nuabanyin no bɔsoɛr.’  (John 11:23) Afei, yɛbɔhwɛ ndzɛmba a ɔsɛ dɛ yɛyɛ ama yaagye edzi paa dɛ owusoɛr no bɛba ampa.

4. Sɛ obi hyɛ hɛn bɔ a, ebɛnadze na yebotum egyina do agye edzi? Fa mfatoho kyerɛkyerɛ mu.

⁴ Sɛ obi hyɛ hɛn bɔ na yebotum agye bɔ a ɔdze ahyɛ hɛn no edzi a, ɔsɛ dɛ ɔyɛ obi a ɔwɔ ɔpɛ nye tum a ɔdze bɛyɛ dza ɔaka no. Hom mma yɛnyɛ dɛm mfatoho yi: Fa no dɛ ehum kɛse bi tui ma ɔsɛɛ wo dan. Ɔno ekyir no, wo nyɛnko bi baa wo nkyɛn na ɔhyɛɛ wo bɔ dɛ, ‘Mobɔboa wo ma eesiesie wo dan no.’ Inyim dɛ wo nyɛnko no ka nokwar, na ewɔ no mu awerɛhyɛmu dɛ ɔpɛ dɛ ɔboa wo ampa. Sɛ ɔwɔ adansi ho nyimdzee, na ɔwɔ edwindadze a ɔdze bɛyɛ edwuma no a, nna ɔno obotum ayɛ dza ɔaka no. Ntsi ibotum agye dza ɔaka no edzi. Bɔ a Nyankopɔn ahyɛ dɛ daakye obenyan ewufo no so ɛ? Ehwɛ a, ɔpɛ paa dɛ onyan ewufo, na ɔwɔ tum so a ɔdze bɛyɛ dɛm anaa?

5-6. Ebɛnadze ntsi na yebotum agye edzi dɛ Jehovah wɔ ɔpɛ dɛ obenyan hɔn a woewuwu no?

⁵ Ana Jehovah wɔ ɔpɛ dɛ obenyan hɔn a woewuwu no? Ekyingye biara nnyi ho dɛ ɔpɛ dɛ ɔyɛ biribi a ɔtse dɛm. Siantsir a yɛreka dɛm nye dɛ, ɔmaa Bible akyerɛwfo binom kaa owusoɛr a ɔbɛba daakye no ho asɛm. (Isa. 26:19; Hos. 13:14; Nyi. 20:11-13) Jehovah so dze, yenyim dɛ sɛ ɔhyɛ bɔ a odzi do aber nyina. (Josh. 23:14) Nokwasɛm nye dɛ, Jehovah n’enyi gye ho paa dɛ obenyan ewufo. Ebɛnadze ntsi na yɛreka dɛm?

⁶ Ɔwodze, ma yensusu asɛm bi a egyapanyin Job kae no ho nhwɛ. Nna ɔgye dzi dɛ sɛ owu mpo a, Jehovah wɔ ɔpɛ dɛ obenyan no aba nkwa mu bio. (Job 14:14, 15) Dɛmara so na Jehovah pɛ dɛ onyan n’asomfo a woewuwu no nyina. Ɔpɛ dɛ onyan hɔn ba nkwa mu a wɔwɔ apɔwmudzen papa nye enyigye. Nyimpa ɔpepepem pii a woennya hokwan ennsua Jehovah noho nokwasɛm ana woruwu no so ɛ? Hɛn Nyankopɔn a ɔwɔ ɔdɔ no pɛ dɛ onyan hɔn so. (Andw. 24:15) Ɔpɛ dɛ wonya hokwan bɛyɛ n’anyɛnkofo na wɔtsena ase daa wɔ asaase do. (John 3:16) Ɔda edzi pefee dɛ Jehovah pɛ dɛ onyan hɔn a woewuwu no.

7-8. Ebɛnadze ntsi na yebotum agye edzi dɛ Jehovah wɔ tum a ɔdze benyan hɔn a woewuwu no?

⁷ Ana Jehovah wɔ tum so a ɔdze benyan hɔn a woewuwu no? Nyew, ɔwɔ tum a ɔdze bɛyɛ dodo! Adze yi, ɔno nye “adze nyina do Tumfo no.” (Nyi. 1:8) Ntsi ɔwɔ tum a ɔdze bedzi ɔtamfo biara do konyim a owu so ka ho. (1 Cor. 15:26) Iyi hyɛ hɛn nkuran na ɔkyekye hɛn werɛ so. Hom mma yensusu akyerɛbaa bi a wɔfrɛ no Emma Arnold n’asɛm no ho. Wiadze Ko II no mu no, ɔnye n’ebusua hyiaa hɔn gyedzi ho nsɔhwɛ a no mu yɛ dzen. Hɔn adɔfo a nna wɔwɔ Nazi ndaduadan mu no wuwui. Aber a Emma rekyekye ne babaa no werɛ no, ɔkaa dɛ: “Sɛ yewu na worinnyan hɛn dze a, nna ɔno ɔkyerɛ dɛ owu no ho yɛ dzen kyɛn Nyankopɔn. Naaso yenyim dɛ dɛm asɛm yi nnyɛ nokwar.” Ampa, biribiara nnyi hɔ a no ho yɛ dzen kyɛn Jehovah! Adze nyina do Tumfo Nyankopɔn a ɔbɔɔ nkwa no botum dze hɔn a woewuwu no aba nkwa mu bio.

⁸ Adze fofor a ɔma yehu dɛ Nyankopɔn botum enyan hɔn a woewuwu no nye dɛ, no werɛ mmfir adze da. Nworaba a ɔwɔ sor mpo ɔbɔ obiara ne dzin frɛ no. (Isa. 40:26) Dɛmara so na ɔkaa hɔn a woewuwu no. (Job 14:13; Luke 20:37, 38) Iyi ntsi, ɔrennyɛ dzen mma no koraa dɛ ɔbɛkaa biribiara a ɔfa hɔn a obenyan hɔn no ho. Hɔn suban, mbrɛ wɔtse, dza wonyim, nye nsɛm ahorow a osisii wɔ hɔn asetsena mu no, Jehovah kaa ne nyinara.

9. Jehovah no bɔhyɛ a ɔnye dɛ obenyan ewufo no, ebɛnadze ntsi na egye dzi?

⁹ Ampa, yebotum agye Jehovah no bɔhyɛ a ɔnye dɛ daakye obenyan hɔn a woewuwu no  edzi, osiandɛ ɔpɛ dɛ ɔyɛ biribi a ɔtse dɛm na ɔwɔ tum so a ɔdze bɛyɛ. Adze fofor so a ɔma yehu dɛ yebotum agye owusoɛr no edzi nye dɛ Jehovah ayɛ bi da. Sɛ yɛhwɛ Bible mu a, yehu dɛ Jehovah maa Jesus nye mbarimba anokwafo kakraabi tum ma wɔdze nyaan nyimpa binom a wowuwui no. Nyimpa a Jesus nyaan hɔn no, hom mma yensusu hɔn mu kor ho wɔ John tsir 11.

10. Aber a nna Jesus reyɛ asɛnka edwuma wɔ Jordan n’egya no, ebɛn asɛm sii wɔ Bethany, na ebɛnadze na ɔyɛe wɔ ho? (John 11:1-3)

¹⁰ Kenkan John 11:1-3. Ma yɛnhwɛ asɛm bi a osii wɔ Bethany wɔ afe 32 H.B. n’ewiei hɔ beebi. Nna Jesus n’anyɛnkofo a ɔpɛ hɔn asɛm, Lazarus na ne nkyerɛbaa beenu, Mary na Martha wɔ dɛm kurow no mu. (Luke 10:38-42) Naaso Lazarus yaree, na iyi maa ne nkyerɛbaa no yɛɛ basaa. Ɔbaa no dɛm no wɔtoo Jesus nkra. Dɛm aber no nna Jesus wɔ Jordan Esutsen no n’egya. Sɛ nna obi renantsew efi Bethany akɔ hɔ a, nna ɔbɛgye no nda ebien. (John 10:40) Awerɛhosɛm nye dɛ, aber a obi a wɔsomaa no no kodur beebi a Jesus wɔ no, nna Lazarus ewu. Nna Jesus nyim dɛ ne nyɛnko no ewu, naaso ɔtweɔnee ma nda ebien twaa mu ansaana ɔrokɔ Bethany. Ntsi aber a Jesus kodur Bethany no, nna Lazarus ewu ma edzi ndaanan. Nna Jesus pɛ dɛ ɔyɛ biribi a ɔbɔboa n’anyɛnkofo no na ɔbɛhyɛ Nyankopɔn enyimnyam.​—John 11:4, 6, 11, 17.

11. Ebɛnadze na kyerɛwtohɔ yi ma yehu fa anyɛnkofa ho?

¹¹ Dɛm kyerɛwtohɔ yi ma yesua biribi fa anyɛnkofa ho. Ma yensusu iyi ho nhwɛ: Aber a Mary na Martha too Jesus nkra no, wɔannka annkyerɛ no dɛ ɔmbra Bethany. Mbom dza wɔkaa kyerɛɛ no ara nye dɛ ne nyɛnko no yar. (John 11:3) Aber a Lazarus wui no, nna nkyɛ Jesus botum enyan no aber a nna onnyi hɔ mpo. Naaso Jesus sii gyinae dɛ ɔbɔkɔ n’anyɛnkofo, Mary na Martha nkyɛn wɔ Bethany. Ana ewɔ nyɛnko bi a ɔayɛ krado dɛ ɔbɔboa wo aber mpo a immbisaa no hɔ mboa? Sɛ dɛm dze a, ɔno inyim dɛ sɛ ekɔ ‘ahohia ber’ mu a, ɔbɔboa wo. (Mbɛ. 17:17) Hom mma yensuasua Jesus na yɛnyɛ anyɛnkofo a yefi hɛn pɛ mu yɛ adze boa afofor! Ma yɛnsan nkɔhwɛ dza osii bio wɔ kyerɛwtohɔ no mu.

12. Ebɛn asɛm na Jesus kaa kyerɛɛ Martha dze hyɛɛ no bɔ, na ebɛnadze ntsi na yebotum aka dɛ nna Martha botum agye dɛm bɔhyɛ no edzi? (John 11:23-26)

¹² Kenkan John 11:23-26. Martha tsee dɛ Jesus abɛn Bethany no, ɔdze mbirika kehyiaa no na ɔkaa dɛ: “Ewuradze, sɛ ewɔ ha a, nkyɛ mo nuabanyin ennwu.” (John 11:21) Ɔyɛ nokwar, sɛ Jesus wɔ hɔ a, nkyɛ ɔbɛsa Lazarus yarba. Naaso, nna Jesus pɛ dɛ ɔyɛ biribi a ɔkyɛn dɛm koraa. Jesus hyɛɛ no bɔ dɛ: ‘Wo nuabanyin no bɔsoɛr.’ Ɔsanee kaa biribi fofor a nna ɔbɛma Martha agye no bɔhyɛ no edzi. Ɔkaa dɛ: ‘Emi nye owusoɛr no nye nkwa no.’ Ampa, nna Nyankopɔn ama Jesus tum a obotum dze enyan ewufo. Nna Jesus edzi kan enyan basiaba bi. Aber a owui no, annkyɛr na Jesus nyaan no. Ɔnnyɛ no nko, nna oenyan aberantsɛ bi so. Ɔbɛyɛ dɛ, da a aberantsɛ no wui no ara na onyaan no. (Luke 7:11-15; 8:49-55) Naaso, aso  nna Jesus botum enyan obi a oewu ma edzi ndaanan, na no fun no ahyɛ ase resɛɛ no?

13. Dɛ mbrɛ asɛm a ɔwɔ John 11:32-35 ma yehu no, ebɛnadze na Jesus yɛe aber a ohun dɛ Mary nye nyimpa binom rusu no? (Hwɛ mfonyin no so.)

¹³ Kenkan John 11:32-35. Hom mma yɛnhwɛ dza osii bio. Mary so kehyiaa Jesus, na aber a odur ne nkyɛn no, asɛm a no nua Martha kae no ara na ɔno so kae. Ɔkaa dɛ: “Ewuradze, sɛ ewɔ ha a, nkyɛ mo nuabanyin ennwu.” Nna Mary nye hɔn a wɔka noho no ridzi awerɛhow paa. Aber a Jesus hun dɛ worusu no, noara so no werɛ howee paa. Awerɛhow a nna Jesus n’anyɛnkofo no ridzi no yɛɛ no mbɔbɔr ma osui. Nna Jesus nyim dɛ, sɛ obi no dɔfo bi wu a ɔyɛ yaw paa. Nokwasɛm nye dɛ, nna ɔpɛ dɛ onyan Lazarus ma hɔn enyi gye!

14. Dza Jesus yɛe aber a ohun dɛ Mary rusu no, ebɛnadze na ɔma yehu fa Jehovah ho?

¹⁴ Dza Jesus yɛe aber a ohun dɛ Mary rusu no ma yehu dɛ, Jehovah yɛ Nyankopɔn a ɔwɔ ayamuhyehye. Ebɛnadze ntsi na yebotum aka dɛm? Adzesua a odzi iyi enyim mu no, yehun dɛ mbrɛ Jehovah si susu ndzɛmba ho nye mbrɛ osi tse nka no, dɛm pɛpɛɛpɛ na Jesus so tse. (John 12:45) Jesus sui osiandɛ nna n’anyɛnkofo a woridzi awerɛhow no ho yɛ no mbɔbɔr. Iyi ma yehu dɛ, sɛ Jehovah hu dɛ yeridzi awerɛhow a, ɔyɛ no yaw paa. (Ndw. 56:8) Ekyingye biara nnyi ho dɛ, iyi ma w’enyi gye ho paa dɛ ebɛbɛn hɛn Nyankopɔn a ɔwɔ ayamuhyehye no.

15. Dɛ mbrɛ John 11:41-44 ka no, ebɛn asɛm na osii wɔ beebi a wosiee Lazarus no? (Hwɛ mfonyin no so.)

¹⁵ Kenkan John 11:41-44. Aber a Jesus dur ɔbodan a nna woesie Lazarus wɔ mu no ho no, ɔkaa dɛ wonyi ɔbo a ɔtwer ano no. Martha nye Jesus annyɛ adwen osiandɛ nna osusu dɛ dɛm aber no dze, Lazarus no fun no abɔn. Jesus kaa kyerɛɛ no dɛ: “Ana mannse wo dɛ, sɛ egye dzi a, ibohu Nyankopɔn enyimnyam?” (John 11:39, 40) Jesus kaa dɛm wiei no, ɔmaa n’enyiwa do hwɛɛ sor, na ɔbɔɔ mpaa ma hɔn a wɔwɔ hɔ no tsee. Ɔyɛɛ dɛm osiandɛ nna ɔpɛ dɛ ɔdze dza oribesi no ho enyimnyam nyina ma Jehovah. Afei, ɔdze ndze kɛse tseaa mu dɛ: “Lazarus, pue bra!” Hɔ no ara na ofiir ɔbodan no mu puei! Jesus yɛɛ biribi a nna nkorɔfo binom susu dɛ obiara runntum nnyɛ.​—Hwɛ study note a ɔwɔ John 11:17 ho no.

16. Ebɛn kwan do na asɛm a ɔwɔ John tsir 11 no ma gyedzi a yɛwɔ wɔ owusoɛr no mu no yɛ kɛse?

 ¹⁶ Asɛm a ɔwɔ John tsir 11 no ma gyedzi a yɛwɔ wɔ owusoɛr no mu no yɛ kɛse. Ebɛnadze ntsi na yɛreka no dɛm? Kaa dɛ Jesus hyɛɛ Martha bɔ dɛ: ‘Wo nuabanyin no bɔsoɛr.’ (John 11:23) Jesus wɔ ɔpɛ nye tum a ɔbɛma dɛm bɔhyɛ no aba mu, tse dɛ n’Egya pɛpɛɛpɛ. Osu a Jesus sui no ma yehu dɛ ɔpɛ paa dɛ oyi awerɛhow a owu dze ba nye owu ankasa mpo fi hɔ koraa. Bio so, Lazarus a Jesus nyaan no no ma yɛsan hu dɛ ɔwɔ tum a ɔdze benyan ewufo. Afei so, susu asɛm a Jesus sanee kaa kyerɛɛ Martha no ho. Ɔkaa dɛ: “Ana mannse wo dɛ, sɛ egye dzi a, ibohu Nyankopɔn enyimnyam?” (John 11:40) Yɛwɔ adanse a odzi mu a yebotum egyina do aka dɛ Nyankopɔn no bɔhyɛ a ɔfa owusoɛr ho no bɛba mu ampa. Naaso, ebɛnadze na yebotum ayɛ ama gyedzi a yɛwɔ wɔ owusoɛr no mu no aayɛ kɛse?

17. Sɛ yerusua Bible mu kyerɛwtohɔ ahorow a ɔfa owusoɛr no ho a, ebɛnadze na ɔsɛ dɛ yɛma ɔtsena hɛn adwen mu?

¹⁷ Owusoɛr ahorow a Bible no ka ho asɛm no, sua ho adze na dwendwen ho. Bible no ka nyimpa baawɔtwe bi a wonyaan hɔn baa asaase do ho asɛm. c Ibotum agye ber na esua dɛm owusoɛr yi mu biara ho adze. Aber a ereyɛ dɛm no, kaa dɛ dɛm nkorɔfo yi tsenaa ase ankasa. Nna binom yɛ mbanyin, mbaa nye mbofra. Fa w’adwen si dza ibotum esua efi hɔn asɛm no mu no do. Afei so, mbrɛ owusoɛr no mu biara ma yehu dɛ Nyankopɔn wɔ ɔpɛ nye tum a ɔdze benyan ewufo no, ɔyɛ a dwendwen ho. Sɛ yɛdze owusoɛr a yɛaka ho asɛm no to nkyɛn a, ɔyɛ so a dwendwen Jesus no wusoɛr no ho. Ɔno nye owusoɛr a ɔkyɛn biara a woesi pɛn. Kaa dɛ nyimpa pii dze hɔn enyi hun Jesus aber a wonyaan no no, na iyi ma gyedzi a yɛwɔ wɔ owusoɛr no mu no dzi mu.​—1 Cor. 15:3-6, 20-22.

18. Yebesi dɛn enya asafo ndwom a ɔka owusoɛr ho asɛm no do mfaso? (Hwɛ ase hɔ asɛm no so.)

 ¹⁸ “Sunsum mu ndwom,” kyerɛ, asafo ndwom a ɔka owusoɛr no ho asɛm no, ɔyɛ a tsie bi, tow bi na dwendwen no mu nsɛm no ho. d (Eph. 5:19) Ndwom a ɔtsetse dɛm no ma yehu dɛ owusoɛr no bɛba ampa, na ɔma gyedzi a yɛwɔ wɔ owusoɛr no mu no so yɛ kɛse. Ntsi ɔyɛ a, yentsie bi. Afei so, yensua mbrɛ wosi tow dɛm ndwom no yie na yensusu no mu nsɛm no ho aber a yɛreyɛ hɛn ebusua som no. Hom mma yɛmbɔ mbɔdzen ntwuw ndwom no mu nsɛm no ngu hɛn tsirmu na yɛndwendwen ho. Sɛ yɛyɛ dɛm a, ndwom no bɛka hɛn akoma na ɔbɛhyɛ hɛn gyedzi dzen. Afei, sɛ ɔba no dɛ yehyia ɔhaw bi a obotum ama yeewu, anaa hɛn dɔfo bi mpo wu a, Jehovah no sunsum no bɔboa hɛn ma yaakaa ndwom no mu nsɛm no. Iyi bɛkyekye hɛn werɛ na wɔaahyɛ hɛn gyedzi dzen.

19. Nsɛm a ɔfa owusoɛr no ho bɛn na yebotum etwa ho mfonyin wɔ hɛn adwen mu? (Hwɛ adakaba a wɔato dzin “ Ebɛn Nsɛm Na Ibebisa Hɔn?”)

¹⁹ Twa mbrɛ asetsena bɛyɛ wɔ wiadze fofor no mu no ho mfonyin wɔ w’adwen mu. Jehovah bɔɔ hɛn wɔ kwan bi do a ɔma yetum twa mbrɛ asetsena bɛyɛ wɔ wiadze fofor no mu no ho mfonyin wɔ hɛn adwen mu. Ɔwodze hwɛ asɛm bi a akyerɛbaa bi kae. Ɔkaa dɛ: “Mbrɛ asetsena bɛyɛ wɔ wiadze fofor no mu no, madwendwen ho araa ma sɛ mowɔ hɔ a, ɔyɛ me dɛ mbrɛ mowɔ Paradise ma nhyiren bi ne nka huanhuam refa mo do.” Fa no dɛ ehyia mbarimba na mbaa a wodzii Jehovah nokwar a Bible no ka hɔnho asɛm no mu bi wɔ wiadze fofor no mu. Hɔn mu woana paa na erohwɛ kwan dɛ ibehyia no? Sɛ ihu no a, ebɛn nsɛm na ebɛpɛ dɛ ibisa no? Anaadɛ twa ho mfonyin hwɛ dɛ ehu w’adɔfo a woewuwu no bio. Sɛ ihyia hɔn a, ebɛn asɛm mpo na ibedzi kan aka akyerɛ hɔn? Ɔwodze fa no dɛ ereyɛ w’adɔfo a woenyan hɔn no awaa awaa etuu. Innhu dɛ sɛ ihyia hɔn bio a w’enyi bɛgye paa?

20. Ɔsɛ dɛ yesi hɛn bo dɛ yɛbɛyɛ dɛn?

²⁰ Yɛda Jehovah ase paa dɛ, ɔahyɛ hɛn bɔ dɛ obenyan hɛn adɔfo a woewuwu no! Yebotum agye edzi paa dɛ dɛm bɔhyɛ yi bɛba mu ampa. Osiandɛ Jehovah pɛ dɛ onyan hɔn a woewuwu no na ɔwɔ tum so a ɔdze bɛyɛ dɛm. Owusoɛr ho enyidado no da hɛn akoma do paa. Ntsi gyedzi a yɛwɔ wɔ mu no, hom mma yɛnkɔ do nhyɛ mu dzen. Sɛ yɛyɛ dɛm a, ɔbɛma yɛabɛn hɛn Nyankopɔn a ɔahyɛ hɛn bɔ dɛ, ‘W’adɔfo bɔsoɛr no’ paa!