1. Ebɛnadze na Jehovah dze ama n’asomfo anokwafo mu biara?

JEHOVAH efi ɔdɔ mu ama n’asomfo anokwafo mu biara dwuma a odzi wɔ n’asafo no mu. Ɔwɔ mu dɛ dwuma a yedzi wɔ asafo no mu no yɛ soronko dze, naaso hɛn mu biara som bo na hɛn mu biara ho hia ma no nua. Ɔsomafo Paul boa hɛn ma yɛtse dɛm esuadze tsitsir yi ase. Ebɛn kwan do?

2. Dɛ mbrɛ Ephesusfo 4:16 kyerɛ no, ebɛnadze ntsi na ɔsɛ dɛ yebu hɛn mu biara dɛ ɔsom bo na yɛnye hɛnho bɔ mu yɛ edwuma?

² Sɛ yɛhwɛ kyerɛwnsɛm a adzesua yi gyina do no a, Paul ma yehu kofee dɛ hɛn mu biara runntum nnhwɛ no nua a ɔyɛ Jehovah no somfo, na ɔnnkã nnkyerɛ no dɛ: “Minnyi wo ho hia” anaadɛ minnhia wo. (1 Cor. 12:21) Sɛ asomdwee botum atsena asafo no mu a, ɔsɛ dɛ yebu hɛn mu biara dɛ noho hia, na yɛnye hɛnho bɔ mu yɛ edwuma. (Kenkan Ephesusfo 4:16.) Sɛ yɛnye hɛnho bɔ mu yɛ edwuma wɔ koryɛ mu a, ɔdɔ bɛtsena asafo no mu, na asafo no bɛyɛ dzen.

3. Ebɛnadze na yebosusu ho wɔ adzesua yi mu?

³ Akwan a yebotum afa do ada obu edzi akyerɛ hɛn nuanom a wɔwɔ asafo no mu no, bi nye dɛn? Adzesua yi mu no, yɛbɔhwɛ mbrɛ asafo mu mpanyimfo botum ada obu edzi akyerɛ hɔnho. Afei so, yɛbɔhwɛ mbrɛ hɛn nyina yebesi ada no edzi dɛ, yebu hɛn nuanom mbarimba na mbaa a wɔnnwaree no dɛ wɔsom bo ma hɛn. Dza otwa tun no, yɛbɔhwɛ mbrɛ yebesi ada obu edzi akyerɛ hɔn a wɔnntse hɛn kasaa papa no.

4. Ebɛn afotu na Paul dze mae a wɔayɛ ho kyerɛwtohɔ wɔ Romefo 12:10 a ɔwɔ dɛ asafo mu mpanyimfo dze yɛ edwuma?

⁴ Jehovah no sunsum krɔnkrɔn na wɔdze apaw asafo mu mpanyimfo nyina. Naaso hɔn mu biara wɔ n’adomakyɛdze nye dza otum yɛ. (1 Cor. 12:17, 18) Hɔn mu binom wɔ hɔ a, bi a wɔpaaw hɔn nnkyɛree, ntsi wonnyi suahu pii. Binom so dze, bi a osian mpanyinyɛ anaa hɔn apɔwmudzen ntsi wonntum nnyɛ pii. Naaso ɔnnsɛ dɛ asafo mu panyin bi hwɛ no nua a ɔyɛ asafo mu panyin na ɔkã dɛ, ‘minnhia wo.’ Mbom ɔwɔ dɛ ɔpanyin biara dze afotu a Paul dze mae wɔ Romefo 12:10 no yɛ edwuma.​—Kenkan.

5. Ebɛnadze na asafo mu mpanyimfo yɛ dze kyerɛ dɛ wɔwɔ obu ma hɔn mfɛfo asafo mu mpanyimfo, na ebɛnadze ntsi na no ho hia dɛ wɔbɛyɛ dɛm?

⁵ Sɛ asafo mu mpanyimfo yɛ aso tsie hɔnho a, ɔkyerɛ dɛ wɔwɔ obu ma hɔn mfɛfo asafo mu mpanyimfo. Iyi ho hia nkanka ber a asafo mu mpanyimfo ehyia mu rususu nsɛm a no ho hia ho no. Ebɛnadze ntsi a? Hyɛ asɛm a Ɔweɔn-Aban October 1, 1988 Borɔfo dze no kãe no nsew: “Ɔsɛ dɛ asafo mu mpanyimfo hu dɛ, Christ nam sunsum krɔnkrɔn do botum aboa asafo mu panyin biara ma ɔdze Bible mu ngyinadosɛm bi aba a ɔbɔboa asafo mu mpanyimfo ma woeehu dza ɔwɔ dɛ wɔyɛ wɔ tsebea biara mu anaa woeehu gyinae pa a ɔwɔ dɛ wosi. (Andw. 15:6-15) Sunsum krɔnkrɔn mmboa asafo mu panyin kortsee, mbom ɔboa hɔn nyinara.”

6. Ebɛnadze na ɔbɔboa asafo mu mpanyimfo ma wɔaabɔ mu ayɛ edwuma wɔ koryɛ mu? Sɛ wɔyɛ dɛm a, ebɛn mfaso na asafo no nya fi mu?

⁶ Asafo mu panyin a ɔwɔ obu ma ne mfɛfo asafo mu mpanyimfo no, sɛ asafo mu mpanyimfo hyia mu a, nnyɛ aber nyina na ɔpɛ dɛ odzi kan kasa. Afei so, ɔnngye nhyiamu a wɔreyɛ no mmbɔ do, na onnsusu dɛ n’adwenkyerɛ na ɔyɛ papa aber nyina. Mbom, ofi ahobrɛadze mu kyerɛ n’adwen. Ɔyɛ aso tsie dza ne mfɛfo asafo mu mpanyimfo so wɔ kã. Dza ɔsen dɛm no, ɔwɔ ɔpɛ dɛ ɔnye afofor susu Bible mu ngyinadonsɛm ho, na otsie akwankyerɛ biara a “akowaa nokwafo nye nyansafo” no dze ma no. (Matt. 24:45-47) Sɛ asafo mu  mpanyimfo da ɔdɔ na obu edzi kyerɛ hɔnho ber a worususu nsɛm ho a, Nyankopɔn no sunsum krɔnkrɔn bɛtaa hɔn ekyir, na ɔaaboa hɔn ma woeesisi gyinae a ɔbɛhyɛ asafo no dzen.​—Jas. 3:17, 18.

7. Nna Jesus bu esigyafo dɛn?

⁷ Sɛ yɛhwɛ Christianfo asafo no mu ndɛ a, yebohu awarfo nye mbusua. Naaso, mbarimba na mbaa pii a wɔnnwaree so wɔ mu. Ebɛn adwen na ɔwɔ dɛ yenya wɔ enuanom a wɔyɛ esigyafo yi ho? Ɔsɛ dɛ yenya adwen a nna Jesus wɔ wɔ esigyafo ho no bi. Aber a Jesus bae bɛyɛɛ no som edwuma wɔ asaase do no, ɔannwar. Odzii sigya na ɔdze ne ber nye n’adwen nyina sii edwuma a nna ɔhyɛ ne nsa no do. Jesus annkã da dɛ, ɔyɛ ahwehwɛdze dɛ obi bɔwar anaa obedzi sigya. Naaso, ɔkãa dɛ Christianfo binom besi gyinae dɛ wɔnnkɔwar. (Matt. 19:11, 12) Jesus daa obu edzi kyerɛɛ hɔn a nna wɔnnwaree no. Oemmbu esigyafo dɛ wɔmmfata anaadɛ wɔahwer biribi wɔ hɔn asetsena mu.

8. Dɛ mbrɛ 1 Corinthfo 7:7-9 ma yehu no, ebɛnadze na Paul hyɛɛ Christianfo nkuran dɛ wonsusu ho?

⁸ Dɛ mbrɛ Jesus yɛe no, ɔsomafo Paul so dzii sigya wɔ no som edwuma no mu. Paul annkã da dɛ ɔbɛyɛ bɔn dɛ Christiannyi bi bɔwar. Nna onyim dɛ ɔyɛ biribi a ɔwɔ dɛ obiara si ne gyinae wɔ ho. Naaso, ɔhyɛɛ Christianfo nkuran dɛ wonsusu ho nhwɛ dɛ wobotum asom Jehovah dɛ esigyafo a. (Kenkan 1 Corinthfo 7:7-9.) Ɔda edzi dɛ Paul emmbu Christianfo a wɔyɛ esigyafo no dɛ wɔnnsɛ hwee. Ɔpaaw Timothy mpo a nna ɔyɛ sigyanyi no, na ɔdze dwumadzi a no mu yɛ dur hyɛɛ ne nsa. * (Phil. 2:19-22) Dɛ onua bi awar anaa ɔnnwaree no, ɔda edzi dɛ ɔnnkɛyɛ papa dɛ yebegyina ɔno do akã dɛ ɔfata anaadɛ ɔmmfata dɛ wɔma no ɔsom mu dwumadzi bi.​—1 Cor. 7:32-35, 38.

9. Ebɛn asɛm na yebotum akã afa awar na sigyadzi ho?

⁹ Jesus o, Paul o, hɔn mu biara annkã dɛ ɔsɛ dɛ Christianfo war anaadɛ wodzi sigya. Sɛ dɛm a, ebɛn asɛm na yebotum akã afa awar na sigyadzi ho? Ɔweɔn-Aban October 1, 2012 Twi dze no, ma dɛm asɛmbisa yi ho mbuae. Ɔkã dɛ: “Nokwasɛm nye dɛ, yebotum akã dɛ awar na sigyadzi nyinara yɛ akyɛdze a ofi Nyankopɔn hɔ. . . . Jehovah mmbu [sigyadzi] dɛ ɔdze enyiwu anaa awerɛhow ba.” Dɛm asɛm yi wɔ hɛn adwen mu no, enuanom mbarimba na mbaa a wɔwɔ asafo no mu a wɔyɛ esigyafo no, ɔsɛ dɛ yɛda obu edzi kyerɛ hɔn.

10. Hɛn nuanom mbarimba na mbaa a wɔnnwaree no, yebesi dɛn ada obu edzi akyerɛ hɔn?

 ¹⁰ Hɛn nuanom mbarimba na mbaa a wɔyɛ esigyafo no, mbrɛ wosi tse nka nye tsebea a wɔwɔ mu no, yebesi dɛn akyerɛ dɛ yɛtse hɔn ase? Ɔsɛ dɛ yɛma ɔtsena hɛn adwen mu dɛ, hɛn nuanom a wɔyɛ esigyafo no, binom wɔ hɔ a, hɔnankasa na woesi gyinae dɛ wɔnnkɔwar. Afofor so dze, wonya a nkyɛ wɔbɔwar, naaso wonnyaa hokafo a ɔfata. Binom so wɔ hɔ a, wɔahwer hɔn ahokafo wɔ owu mu. Ɔmmfa ho mbrɛ ɔtse biara no, aso ɔbɛyɛ papa dɛ enuanom a wɔwɔ asafo no mu no bebisa esigyafo no siantsir a wɔnnwaree? Aso ɔbɛyɛ papa dɛ wɔbɛkã akyerɛ hɔn dɛ wobotum aboa hɔn ma woeenya ahokafo? Bi a esigyafo binom botum ahwehwɛ mboa a ɔtse dɛm. Naaso sɛ wɔannkã dɛ yɛmboa hɔn wɔ dɛm kwan no do, na hɛnankasa yɛpɛ dɛ yɛboa hɔn ma wonya ahokafo a, wɔbɛtse nka dɛn? (1 Thess. 4:11; 1 Tim. 5:13) Hom mma yɛnhwɛ nsɛm a esigyafo anokwafo binom akã.

11-12. Ebɛn kwan do na annhwɛ a yebotum ebu esigyafo no hɔn abaw mu?

¹¹ Ɔmansin do hwɛfo bi a ɔnnwaree, na ɔbɔ noho mbɔdzen papaapa wɔ no dwumadzi mu tse nka dɛ mfaso pii wɔ do dɛ obedzi sigya. Naaso ɔkãa dɛ, enuanom a wɔdwen moho no bisa me asɛm bi tse dɛ, “Ebɛnadze ntsi na ennwaree?” Ɔba no dɛm a, otum ma m’abaw mu bu. Onua bi so a ɔnnwaree na ɔsom wɔ Bethel kãa dɛ: “Ɔtɔ da a, enuanom mbarimba na mbaa binom ma metse nka dɛ esigyafo hɔnho yɛ awerɛhow. Iyi ma obi tum nya adwen dɛ sigyadzi yɛ adzesoa, na ɔnnyɛ akyɛdze a ofi Nyankopɔn hɔ.”

¹² Hɛn akyerɛbaa bi a ɔsom wɔ Bethel na ɔnnwaree so kãa dɛ: “Enuanom binom adwen nye dɛ, esigyafo nyina rohwehwɛ ahokafo anaadɛ sɛ wɔnye enuanom hyia mu a, ɔyɛ ho kwan a wobotum dze ahwehwɛ ahokafo. Ber bi, Bethel somaa me kɔr ɔman a mowɔ mu no ne fã beebi. Mukodur hɔ ewimbir. Nna wɔbɔkɔ asafo nhyiamu dɛm ewimbir no. Akyerɛbaa a mokɔsoɛe no kãa kyerɛɛ me dɛ enuanom mbanyin beenu wɔ hɔn asafo no mu a wɔnye me bɔ tsipɛn. Ɔkãa kyerɛɛ me dɛ, nnyɛ dɛ ɔpɛ dɛ ɔka obi ma me. Naaso aber a yekodur Ahendzi Asa do hɔ ara pɛr na ɔtwee me kɔr enuanom beenu no hɔn nkyɛn. Nokwasɛm nye dɛ, menye enuanom beenu no nyina enyi wuu pɔtɔɔ.”

13. Ebɛnadze na ɔhyɛɛ hɛn akyerɛbaa bi a ɔyɛ sigyanyi nkuran?

¹³ Hɛn akyerɛbaa bi a ɔno so som wɔ Bethel kãa dɛ: “Minyim akwampaaefo binom a hɔn enyi efir a wɔnnwaree. Hɔn adwen mu da hɔ, wɔdze botae papa esisi hɔn enyi do, wɔwɔ ɔpɛ dɛ wɔbɔboa afofor, na wɔwɔ enyigye so. Wɔsom bo papaapa ma asafo no. Wɔwɔ adwen pa wɔ sigya a woridzi no ho. Wɔnntse nka dɛ wɔsom bo kyɛn afofor osian esigyafo a wɔyɛ ntsi. Dɛmara so na wɔnntse nka dɛ wɔahwer biribi osian ahokafo anaa ebusua a wonnyi ntsi.” Dɛm ntsi, asafo a ewɔ mu no, sɛ no mufo wɔ obu ma hɔnho na wobu obiara dɛ noho hia a, ɔyɛ enyigye papaapa. Erenntse nka dɛ enuanom bu wo dɛ woho yɛ awerɛhow anaa hɔn enyi ber wo. Dɛmara so na erenntse nka dɛ woeyi wo tokyen anaadɛ esom bo kyɛn hɔn. Ibohu dɛ wɔdɔ wo papaapa.

14. Ebɛnadze na yebotum ayɛ dze akyerɛ dɛ yebu esigyafo a wɔwɔ hɛn asafo mu no?

¹⁴ Hɛn nuanom mbarimba na mbaa a wɔyɛ esigyafo no, sɛ yemmbu hɔn dɛ hɔnho yɛ awerɛhow osiandɛ wɔnnwaree ntsi, na mbom yebu hɔn dɛ hɔnho hia osian suban pa a wɔwɔ a, hɔn enyi bɛgye papaapa. Dɛ nkyɛ yebobu hɔn dɛ hɔn asɛm yɛ mbɔbɔr no, mbom ɔsɛ dɛ yɛkyerɛ hɔn nokwardzi ho enyisɔ. Sɛ yɛyɛ dɛm a hɛn nuanom mbarimba na mbaa a wɔyɛ esigyafo no nnkɛtse nka da dɛ yɛrekã akyerɛ hɔn dɛ ‘Minnhia wo.’ (1 Cor. 12:21) Mbom no wobohu dɛ  yɛwɔ obu ma hɔn na yebu dwuma a wodzi wɔ asafo no mu no dɛ ɔsom bo.

15. Ebɛn nsakyer na enuanom binom ayɛ mbrɛ ɔbɛyɛ a wɔbɛtserɛw hɔn som mu?

¹⁵ Ndaansa yi, adawurbɔfo pii dze ayɛ hɔn botae dɛ wobosũa kasa fofor ama woeetum atserɛw hɔn som mu. Iyi hwehwɛ dɛ wɔyɛ nsakyer pii wɔ hɔn asetsena mu. Dɛm enuanom mbarimba na mbaa yi efi asafo a wɔkã hɔn kasaa mu mbrɛ ɔbɛyɛ a wobotum akɔsom wɔ asafo fofor a wɔkã kasa fofor na wohia Ahendzi adawurbɔfo pii. (Andw. 16:9) Iyi yɛ gyinae a dɛm enuanom yi esi mbrɛ ɔbɛyɛ a wɔbɛtserɛw Ahendzi edwuma no mu. Ɔwɔ mu dɛ obotum agye hɔn mfe pii ana woeetum atse kasa fofor no yie dze, naaso wotum boa asafo a wɔakɔ mu no wɔ akwan pii do. Hɔn suban pa nye hɔn suahu hyɛ enuanom a wɔwɔ asafo no mu no dzen. Yebu dɛm enuanom mbarimba na mbaa yi a wɔdze ndzɛmba abɔ afɔr no papaapa!

16. Ebɛnadze na asafo mu mpanyimfo gyina do paw obi dɛ asafo mu panyin anaa ɔsomfo?

¹⁶ Sɛ onua bi nntum nnkã kasa a wɔdze yɛ asafo nhyiamu no yie a, asafo mu mpanyimfo rinngyina ɔno do kɛkɛ nnkã dɛ wɔremmpaw no dɛ asafo mu panyin anaa ɔsomfo. Mbom, wobegyina Kyerɛwnsɛm mu ahwehwɛdze ma asafo mu mpanyimfo nye asomfo do esusu onua noho na nnyɛ mbrɛ osi kã kasa a wɔdze yɛ asafo nhyiamu no.​—1 Tim. 3:1-10, 12, 13; Titus 1:5-9.

17. Sɛ ebusua bi tu kɔ ɔman fofor mu a, ebɛn gyinae ahorow na ɔsɛ dɛ awofo no sisi?

¹⁷ Osian bambɔ anaa edwuma a mbusua bi rohwehwɛ ntsi, woetu efi hɔn man mu akɔ ɔman fofor mu. Tsebea a ɔtse dɛm mu no, bi a kasa tsitsir a wɔkã wɔ ɔman no mu no na wɔdze bɛkyerɛ hɔn mba no adze wɔ skuul. Mbrɛ ɔbɛyɛ a awofo no benya edwuma ayɛ no, ɔsɛ dɛ hɔn so wosũa kasa tsitsir a wɔkã wɔ ɔman no mu no. Na sɛ asafo bi anaa kuw bi wɔ ɔman no mu a wɔdze hɔn kurow mu kasa yɛ asafo nhyiamu ɛ? Ebɛn asafo mu na ɔsɛ dɛ ebusua no kɔ? Asafo a wɔkã ɔman no ne kasaa anaa asafo a wɔkã ebusua no hɔn kurow mu kasa?

18. Dɛ mbrɛ Galatiafo 6:5 kyerɛ no, yebesi dɛn akyerɛ obu ama gyinae a ebusua tsir bi besi no?

¹⁸ Ebusua tsir no na ɔsɛ dɛ ɔkyerɛ asafo a n’ebusua no bɔkɔ mu. Osiandɛ iyi yɛ ankorankor biara ne gyinaesi ntsi, ɔsɛ dɛ ɔhwɛ dza obotum aboa nankasa n’ebusua no. (Kenkan Galatiafo 6:5.) Ɔsɛ dɛ yɛkyerɛ obu ma gyinae a ebusua tsir no besi no. Gyinae biara a obesi no, ɔsɛ dɛ yɛgye to mu na yɛgye ebusua no fɛw do, na yɛda ɔdɔ edzi kyerɛ hɔn wɔ asafo no mu.​—Rom. 15:7.

19. Ebɛnadze na ɔwɔ dɛ mbusua tsir dze mpaabɔ susu ho?

¹⁹ Mbusua binom so wɔ asafo a wɔkã hɔn kurow mu kasa mu, naaso bi a hɔn mba nntum nnkã dɛm kasa no yie. Sɛ asafo a ebusua no wɔ mu no wɔ beebi a wɔkã ɔman no ne kasaa a, obotum ayɛ dzen ama mbofra no dɛ wɔbɛtse  dza ɔkɔ do wɔ asafo nhyiamu ase no, na annhwɛ a, wonnkotum atwe abɛn Jehovah yie. Ebɛnadze ntsi a? Osiandɛ, bi a ɔman no ne kasaa na wɔdze kyerɛ mbofra no adze wɔ skuul mu, na nnyɛ hɔn kurow mu kasa. Tsebea a ɔtse dɛm mu no, ɔsɛ dɛ mbusua tsir dze mpaabɔ susu dza ɔwɔ dɛ wɔyɛ ho ama wɔaaboa hɔn mba ma wɔaabɛn Jehovah nye no nkorɔfo. Ɔsɛ dɛ awofo no kyerɛ hɔn mba hɔn kurow mu kasa no yie anaadɛ wosi gyinae dɛ wɔbɔkɔ asafo a wɔkã kasa a hɔn mba no tse ase yie mu. Gyinae biara a ebusua tsir no besi no, asafo a obesi gyinae dɛ wɔbɔkɔ mu no, ɔsɛ dɛ enuanom no gye hɔn fɛw do na wɔda ɔdɔ na obu edzi kyerɛ hɔn.

20. Ebɛnadze na yɛbɛyɛ dze akyerɛ dɛ yebu hɛn nuanom mbarimba na mbaa a worusũa kasa fofor no?

²⁰ Dza yeesusu ho yi ma yehu dɛ, yɛkɔ asafo ahorow mu a yebohu enuanom mbarimba na mbaa a wɔrobɔ mbɔdzen dɛ wobosũa kasa fofor. Obotum ayɛ dzen ama hɔn dɛ wobefi hɔn pɛ mu akasa. Naaso, sɛ yɛammfa hɛn adwen ennsi kasa a wonntum nnkã no yie no do a, yebohu ɔdɔ a wɔwɔ ma Jehovah nye ɔpɛ a wɔwɔ dɛ wɔbɔsom no no. Sɛ yehu su pa a ɔtse dɛm a hɛn nuanom yi wɔ a, yebenya ɔdɔ na obu kɛse ama hɔn. Yɛrennkã nnkyerɛ hɔn dɛ ‘minnhia wo’ osiandɛ wonntum nnkã hɛn kasaa yie ntsi.

21-22. Ebɛn ho kwan soronko na yɛwɔ?

²¹ Jehovah ama hɛn ho kwan soronko; ɔnye dɛ hɛn mu biara wɔ dwuma bi dzi wɔ n’asafo no mu. Dɛ yɛyɛ mbanyin anaa mbasiafo, yɛawar anaa yɛnnwaree, yɛyɛ mpanyimfo anaa mbofra, yɛkã kasa bi yie anaa yenntum nnkã no yie no, yɛsom bo ma Jehovah na hɛnho hia ma hɛn nuanom so.​—Rom. 12:4, 5; Col. 3:10, 11.

²² Ɔmbra dɛ yɛbɔkɔ do dze esuadze a ɔsom bo a yeenya efi Paul ne mfatoho a ɔfa nyimpadua ho mu no bɛyɛ edwuma. Dɛm kwan no do no, yɛbɔhwehwɛ akwan pii mpo a yebotum afa do akyerɛ dɛ ho kwan a yɛnye afofor wɔ wɔ Jehovah n’asafo no mu no som bo ma hɛn.