1-2. Ebɛnadze na yebosusu ho wɔ Adzesua yi mu?

SƐ EROHWƐ kwan dɛ wo nsa bɛka amonadze bi a ohia wo papaapa wɔ ber pɔtsee bi mu na wɔammba no dɛm a, ebɛtse nka dɛn? Ana wo werɛ bɔhow? Mbɛbusɛm 13:12 kã ma no mu da hɔ dɛ: “Enyidado kyɛr a, ɔma akoma yar.” Naaso sɛ ekyir yi ihu dɛ saana siantsir papabi ntsi na amonadze no enntum ammbɛka wo nsa wɔ ber a nna erohwɛ kwan no a, ebɛtse nka dɛn? Sɛ inya hu no dɛm a, ibenya abotar na aatweɔn kesi dɛ wo nsa bɛka.

² Adzesua yi mu no, yɛbɔhwɛ Bible mu ngyinadonsɛm a ɔbɔboa hɛn ma yaakɔ do ‘atweɔn hɛn nkwagye Nyankopɔn no.’ (Mic. 7:7) Afei so, yɛbɔhwɛ tsebea ebien bi a sɛ yɛkɔ mu a ɔsɛ dɛ yenya abotar tweɔn dɛ Jehovah bɛyɛ ho biribi. Nkyii so yɛbɔhwɛ nhyira a hɔn a wonya ɔpɛ dɛ wɔbɔtweɔn Jehovah no benya.

3. Ebɛn esuadze na Mbɛbusɛm 13:11 twe adwen si do?

³ Sɛ yɛhwɛ asɛm a ɔwɔ Mbɛbusɛm 13:11 no a, yebohu hia a no ho hia dɛ yenya abotar. Hɔ kã dɛ: “Hwimhwim adze kɔ sorɔsorɔw, na nyia ɔdze berɛ boaboa [ano nkakrankakra] no, obenya ngumu.” Ebɛn esuadze na ɔwɔ mu? Ɔno nye dɛ nyansa wɔ mu dɛ yɛdze abotar bɛyɛ adze na yaayɛ no nkakrankakra.

4. Ebɛn esuadze na Mbɛbusɛm 4:18 twe adwen si do?

⁴ Mbɛbusɛm 4:18 ma yehu dɛ “atseneneefo kwan dze, ɔtse dɛ kan hyɛnhyɛn a ɔhyerɛn mbordo araa kodu ewia ketee.”  Kyerɛwsɛm yi ma yehu kwan a Jehovah fa do da ne tsirmpɔw edzi kyerɛ n’asomfo. Ɔno nye dɛ ɔyɛ no nkakrankakra. Naaso dɛm kyerɛwsɛm yi so botum akyerɛ nsesa a Christianyi bi yɛ wɔ n’asetsena mu mbrɛ ɔbɛyɛ a obotum atwe abɛn Jehovah. Sɛ yebotum nye Jehovah enya ebusuabɔ a, ɔyɛ nkakrankakra. Sɛ yɛdze abotar sũa adze, na yɛdze afotu a yenya fi Nyankopɔn n’asɛm mu no nye n’ahyehyɛdze no hɔ yɛ edwuma a, nkakrankakra yɛbɛda Christ no su no bi edzi. Afei so ɔbɔboa hɛn ma yeehu Nyankopɔn yie. Hom mma yensusu kwan a Jesus dze mfatoho kyerɛkyerɛɛ asɛm yi mu ho.

5. Ebɛn mfatoho na Jesus yɛe dze kyerɛɛ dɛ ɔgye mber ana obi eetum ayɛ nsesa?

⁵ Jesus yɛɛ mfatoho dze kyerɛɛ dɛ Ahendzi asɛm a yɛkã no tse dɛ aba kakraba bi a onyin nkakrankakra wɔ nyimpa akomapafo hɔn akoma mu. Ɔkãa dɛ: “Aba no befir na oenyin, na [oduafo no dze] onnyim mbrɛ ɔyɛe. Na asaase nankasa na ɔsow aba, ahaban no dzi kan, na nkyii ɔayɛ bɛtsem, na nkyii ɔayɛ eburow wɔ bɛtsem no mu.” (Mark 4:27, 28) Nna Jesus pɛ dɛ ɔkyerɛ dɛn? Nna ɔrepɛ akyerɛ dɛ, dɛ mbrɛ eduadzewa nyin nkakrankakra no, dɛmara na obi a ɔgye Ahendzi asɛm no to mu no so yɛ nsesa nkakrankakra. Dɛ nhwɛdo no, sɛ hɛn Bible esuafo twe bɛn Jehovah a, yehu nsesa ahorow a wɔayɛ no wɔ hɔn abrabɔ mu. (Eph. 4:22-24) Naaso ɔsɛ dɛ yɛkaa dɛ Jehovah na ɔma dɛm aba ketseaba a yedua no nyin.—1 Cor. 3:7.

6-7. Ebɛnadze na yesũa fi kwan a Jehovah faa do bɔɔ asaase no mu?

⁶ Biribiara a Jehovah bɛhyɛ ase dɛ ɔreyɛ no, osie abotar dɛ obowie ɔmmfa ho mber dodow a obedzi no. Ɔyɛ dɛm dze hyɛ ne dzin enyimnyam na afofor eenya do mfaso. Dɛ nhwɛdo no, hom mma yɛnhwɛ kwan a Jehovah faa do bɔɔ asaase no nkakrankakra dɛ nyimpa ntsena do no.

⁷ Aber a Bible no rekã kwan a Jehovah faa do bɔɔ asaase ho asɛm no, ɔkãa dɛ ɔdze “no nsusui” too hɔ, ɔdze “ne fapem tsintsimii” na nkyii so, ɔdze no “kutuwdo-bo no toe.” (Job  38:5, 6) Ɔgyee mber mpo hwɛɛ dza ɔabɔ no. (Gen. 1:10, 12) Dwen ho hwɛ o: Ehwɛ a abɔfo no tsee nka dɛn aber a wohun dɛ Jehovah robɔ ndzɛmba nkakrankakra no? Hwɛ mbrɛ osi ma hɔn enyi gyee fae! Iyi maa ‘wɔbɔɔ ose wɔ enyigye ntsi.’ (Job 38:7) Ebɛnadze na yesũa fi mu? Ɔgyee Jehovah mfe mpempem pii ana oruwie ne nsaano ndwuma a ɔyɛ nwanwa no. Naaso aber a Jehovah yɛɛ dzinn hwɛɛ ndzɛmba a oesie abotar abɔ no, ohun dɛ “oye papa.”—Gen. 1:31.

8. Ebɛnadze na yerubosusu ho?

⁸ Nhwɛdo a yeesusu ho yi ma yehu dɛ esuadze pii wɔ Nyankopɔn n’Asɛm mu a ɔma yehu siantsir a no ho hia dɛ yesie abotar. Hom mma yɛnhwɛ tsebea pɔtsee ebien bi a sɛ yɛkɔ mu a no ho behia dɛ yesie abotar tweɔn Jehovah.

9. Ebɛn tsebea na sɛ yɛkɔ mu a no ho behia dɛ yesie abotar tweɔn Jehovah?

⁹ No ho hia dɛ yɛtweɔn kesi dɛ Jehovah bobua hɛn mpaabɔ. Sɛ yɛbɔ mpaa serɛ Jehovah dɛ ɔmma hɛn ahoɔdzen a yɛdze begyina nsɔhwɛ ano anaa yɛserɛ no dɛ ɔmboa hɛn ma yentum ndzi hɛn mberɛwyɛ bi do a, bi a yɛbɛtse nka dɛ mpaabɔ no ho mbuae a yɛrohwɛ kwan no akyɛr dodow. Ebɛnadze ntsi na nnyɛ hɛn mpaabɔ nyina na Jehovah bua amonmu hɔ ara?

10. Ebɛnadze ntsi na ohia dɛ yenya abotar kesi dɛ Jehovah bobua hɛn mpaabɔ?

¹⁰ Sɛ yɛbɔ mpaa a Jehovah sie abotar tsie. (Ndw. 65:2) Sɛ yefi hɛn akoma mu bɔɔ no mpaa a ohu dɛ yɛwɔ no mu gyedzi. (Heb. 11:6) Nkyii so, sɛ Jehovah hu dɛ yɛreyɛ hɛn mpaabɔ ho edwuma dze nam n’apɛdze a yɛbɛyɛ no do a n’enyi gye. (1 John 3:22) Ntsi, sɛ yɛbɔ mpaa serɛ Jehovah dɛ ɔmboa hɛn ma yendzi hɛn mberɛwyɛ do anaadɛ yengyaa suban bɔn bi a, ɔsɛ dɛ yenya abotar na yɛbɔ mbɔdzen yɛ nsesa. Jesus ama yɛatse hɛnho ase dɛ ɔnnyɛ hɛn mpaabɔ nyina na yebenya ho mbuae ntsɛmara. Otuu hɛn fo dɛ: ‘Hom nkɔ do mbisa na wɔbɛma hom; hom nkɔ do nhwehwɛ na hom bohu; hom nkɔ do mbɔ mu na wobobue hom: na obiara a obisa no onya; na nyia ɔhwehwɛ no ohu; na nyia ɔbɔ mu no wobobue no.’ (Matt. 7:7, 8) Sɛ yetsie dɛm afotu yi na ‘yekura asɔryɛ mu dzendzenndzen’ a, yebotum enya ahotodo dɛ hɛn sor Egya no tsie hɛn na obobua hɛn mpaabɔ.—Col. 4:2.

11. Ebɛn kwan do na Hebrewfo 4:16 boa hɛn aber a yɛtse nka dɛ hɛn mpaabɔ ho mbuae akyɛr no?

¹¹ Ɔwɔ mu, bi a ɔbɛkyɛr ana yeenya hɛn mpaabɔ bi ho mbuae dze, naaso Jehovah bɔ anohoba dɛ obobua hɛn mpaabɔ wɔ “ber a ohia mu.” (Kenkan Hebrewfo 4:16.) Ntsi ɔnnsɛ dɛ yɛbɔ Jehovah sombo dɛ ommbua hɛn mpaabɔ ntsɛm. Dɛ nhwɛdo no, nyimpa pii dze mfe beberee abɔ mpaa dɛ Nyankopɔn mfa n’Ahendzi no mbra mbeyi wiadze bɔn yi mfi hɔ. Jesus kãe mpo dɛ yɛmbɔ mpaa dɛ Nyankopɔn n’Ahendzi mbra. (Matt. 6:10) Ntsi nyansa nnyi mu dɛ yɛbɛma hɛn gyedzi abrɛ adze ɔnam dɛ Nyankopɔn n’Ahendzi ammba wɔ ber a nna nyimpa hwɛ kwan no! (Hab. 2:3; Matt. 24:44) Mbom no nyansa wɔ mu dɛ yɛdze abotar bɔtweɔn dɛ Jehovah bobua mpaabɔ a yɛdze gyedzi bɔ no. Ewiei no bɛba wɔ ber a ɔsɛ mu pɛpɛɛpɛr, osiandɛ Jehovah ahyɛ “da no nye dɔn no” a ewiei no bɛba no ato hɔ. Na ɔbɛda edzi dɛ ɔyɛ ber pa ma obiara.—Matt. 24:36; 2 Pet. 3:15.

12. Ebɛn tsebea paa na obotum ayɛ dzen ama hɛn dɛ yebenya abotar?

¹² No ho hia dɛ yɛtweɔn kesi dɛ Jehovah dze  yie bɔto yie. Nyimpa a wɔwɔ wiadze mu ndɛ no nye hɔn a ɔsor hɔn bɔbea, hɔn honamenyi hwɛbea, ebusua anaa ɔman a wofi mu no nndzi no yie. Binom so wɔ hɔ a, osiandɛ woedzi dzɛm anaa wɔwɔ adwenmuhaw ntsi, wɔnnye hɔn nndzi no yie. Jehovah n’asomfo pii na osian hɔn gyedzi ntsi woebu hɔn atsɛnkyew. Sɛ yehyia ɔhaw a ɔtse dɛm a, ɔsɛ dɛ yɛma asɛm a Jesus kãe yi tsena hɛn adwen mu. Ɔkãa dɛ: “Nyia obetsim ekodu ewiei no, ɔno na wɔbɛgye no nkwa.” (Matt. 24:13) Naaso, sɛ etse anaa ihu dɛ obi ayɛ bɔn a no mu yɛ dur wɔ asafo no mu a, ebɛnadze na ɔwɔ dɛ eyɛ? Sɛ asɛm no du asafo mu mpanyimfo hɔn enyim a, ana ibegyaa mu ama hɔn, na edze abotar aatweɔn dɛ wobedzi ho dwuma dɛ mbrɛ Jehovah hwɛ kwan? Sɛ obi yɛ bɔn a no mu yɛ dur a, ebɛnadze na asafo mu mpanyimfo yɛ wɔ ho?

13. Sɛ obi yɛ bɔn a no mu yɛ dur a, ebɛnadze na Jehovah hwɛ kwan dɛ asafo mu mpanyimfo bɛyɛ?

¹³ Sɛ asafo mu mpanyimfo hu anaa wɔtse dɛ obi ayɛ bɔn a no mu yɛ dur wɔ asafo no mu a, wɔbɔ mpaa hwehwɛ “nyansa a ofi sor” mbrɛ ɔbɛyɛ a wobohu asɛm no enyi do yie dɛ mbrɛ Jehovah hu asɛm no. (Jas. 3:17) Hɔn botae nye dɛ, sɛ ɔbɛyɛ yie a wɔbɔboa nyia ɔayɛ bɔn no ma ɔaadan ‘efi no mfom kwan do.’ (Jas. 5:19, 20) Afei so, wɔpɛ dɛ wɔyɛ dza wobotum nyina dze bɔ asafo no ho ban, na wɔkyekye hɔn a asɛm no ahaw hɔn no werɛ. (2 Cor. 1:3, 4) Sɛ asafo mu mpanyimfo tse dɛ obi ayɛ bɔn a no mu yɛ dur a, wɔhwehwɛ asɛm no mu kɔ ekyir. Iyi tum gye mber kakra. Ɔno ekyir no wɔbɔ mpaa na wɔdze Kyerɛwnsɛm no dzi dwuma yie dze ntsẽa a ɔfata ma nyia ɔayɛ bɔn no. (Jer. 30:11) Asafo mu mpanyimfo nnyɛ mbɔtohɔ, ber kor no ara so, wɔmmper hɔnho mmbu atsɛn. Sɛ wodzi asɛm no ho dwuma yie a, asafo mũ no nyina nya do mfaso. Naaso, sɛ asafo mu mpanyimfo fa ɔkwan pa a ɔtse dɛm do dzi asɛm no mpo a, bi a nyia asɛm nnyi no ho no bɔkɔ do ara edzi yaw. Sɛ asɛm a ɔtse dɛm to wo a, ebɛnadze na ibotum ayɛ amma asɛm no aannhaw wo kɛse?

14. Sɛ wo nua Christiannyi bi ayɛ adze ma ayɛ wo yaw paa a, ebɛn Bible mu nhwɛdo na ɔbɔboa wo ma eegyina ano?

¹⁴ Ana obi anaa mpo onua bi ayɛ adze ma ayɛ wo yaw paa? Sɛ dɛm a, ɔnodze nhwɛdo pa pii wɔ Nyankopɔn n’Asɛm mu a ɔma yehu  mbrɛ yebesi atweɔn Jehovah ma ɔdze yie ato yie. Dɛ nhwɛdo no, ɔwɔ mu dɛ Joseph no nuanom no nye no enndzi no yie dze, naaso ɔammfa hɔnho ebufuw aannhyɛ no mu. Mbom, ɔkɔr do dze n’adwen sii ɔsom a ɔdze ma Jehovah no do, na Jehovah so hyiraa no wɔ abotar a ɔdaa no edzi no ho. (Gen. 39:21) Ewiei koraa no, Joseph dze hɔn a wɔnye no enndzi no yie no hɔn bɔn kyɛɛ hɔn. Afei so, ohun Jehovah ne hyira wɔ n’asetsena mu. (Gen. 45:5) Dɛ mbrɛ Joseph yɛe no, sɛ yɛtwe bɛn Jehovah, na yegyaa biribiara mu ma no kesi dɛ ɔdze yie bɔto yie a, yenya awerɛkyekyer.—Ndw. 7:17; 73:28.

15. Ebɛnadze na ɔboaa hɛn akyerɛbaa bi ma obuu n’enyi guu ɔhaw bi a ohyiae no do?

¹⁵ Ɔwɔ mu, nnyɛ adzebɔn a wɔdze yɛ hɛn nyina na ɔyɛ yaw tse dɛ mbrɛ wɔdze yɛɛ Joseph no dze, naaso sɛ wɔnye hɛn enndzi no yie wɔ kwan bi do a, obotum ayɛ hɛn yaw. Sɛ yɛnye hɛn nua anaa obi a ɔnnsom Jehovah nya asɛm, na yɛdze Bible mu ngyinadosɛm yɛ edwuma a, ɔbɔboa hɛn. (Phil. 2:3, 4) Hom mma yensusu asɛm yi ho. Hɛn akyerɛbaa bi tsee dɛ n’edwumamunyi bi kekã noho nsɛmbɔn kyerɛ afofor. Asɛm yi haaw no papaapa. Naaso, ɔamma no bo eemmmfuw, mbom ɔgyee ber dwendween nhwɛdo a Jesus yɛe no ho. Aber a wɔyaaw Jesus no, ɔannyaw bi. (1 Pet. 2:21, 23) Aber a hɛn akyerɛbaa no dwendween iyi ho no, ɔyɛɛ dɛ obobu n’enyi egu dza esi no do. Ekyir yi, onyaa no ntsee dɛ saana yarba bi retseetsee n’edwumamunyi no ma ɔrefa ahoyeraw mu. Hɛn akyerɛbaa no bohun dɛ yarba no na ɔma ɔkekã nsɛm a ɔtsetse dɛm. N’enyi gyee papaapa dɛ onyaa abotar wɔ asɛm no ho, na n’akoma tɔɔ nye yamu.

16. Sɛ adzebɔn bi ama iridzi yaw a, ibesi dɛn enya awerɛkyekyer? (1 Peter 3:12)

¹⁶ Sɛ adzebɔn bi anaa biribi fofor bi ama iridzi yaw a, kaa dɛ Jehovah bɛn “hɔn a hɔn akoma abobɔ” no. (Ndw. 34:18) Osiandɛ enya abotar na edze wo haw nyina egu no do ntsi, ɔdɔ wo. (Ndw. 55:22) Ɔno nye asaase nyinara Ɔtsɛmbuafo no. N’enyi tua biribiara. (Kenkan 1 Peter 3:12.) Sɛ irihyia nsɛndzendzen a innkotum ayɛ ho hwee a, ana ibenya abotar atweɔn ekesi dɛ Jehovah bedzi ho dwuma?

17. Dɛ mbrɛ wɔakã wɔ Isaiah 30:18 no, ebɛn awerɛhyɛmu na Jehovah ma yenya?

¹⁷ Ɔnnkɛkyɛr, hɛn sor Egya no nam n’Ahendzi no do bɛma yenya nhyira pii. Isaiah 30:18 kã dɛ: “[Jehovah] bɔtweɔn, ama ɔaayɛ adom ama hom, dɛm ntsi na wɔbɛma no do, ama oeehu hom mbɔbor: na [Jehovah] yɛ atsɛmbu Nyankopɔn; esiarfo nye hɔn a wɔtweɔn no nyinara.” Hɔn a wɔtweɔn Jehovah no benya nhyira pii ndɛ na wobenya nhyira pii so wɔ wiadze fofor a ɔbɛba no mu.

18. Ebɛn nhyira na yebenya no daakye?

¹⁸ Sɛ Nyankopɔn no nkorɔfo hɛn wiadze fofor no mu a, wonnkehyia dadwen na nsɛndzendzen ahorow a ebu do wɔ ndɛ wiadze yi mu no. Ndzebɔnyɛ na yaw nyina so befi hɔ. (Nyi. 21:4) Dza yebehia ho dadwen nnkɛhyɛ hɛn do, osiandɛ obiara benya dza ɔpɛ ma eebu no do. (Ndw. 72:16; Isa. 54:13) Hwɛ nhyira ara a yebenya no dɛm aber no!

19. Jehovah dze nkakrankakra risiesie hɛn ndɛ ama ebɛnadze?

¹⁹ Kesi dɛ dɛm aber no bɛba no, sɛ yɛbɔ mbɔdzen gyaa suban bɔn bi na yɛda suban pa edzi a, ɔkyerɛ dɛ Jehovah risiesie hɛn ama yeetum atsena n’Ahendzi no tumdzi no ase. Mma w’abaw mu mmbu, kɔ do ara som Jehovah, na kɛse wɔ kan! Aber a yɛrohwɛ kwan dɛ iyi bɛba mu no, ɔmbra dɛ yebefi hɛn akoma mu atweɔn Jehovah kesi dɛ ɔbɛyɛ dza ɔakã dɛ ɔbɛyɛ no!