1-2. Dɛ mbrɛ Ndwom 34:8 kyerɛ no, yebesi dɛn esũa Jehovah ne papayɛ ho adze?

FA NO dɛ obi ama wo edziban bi a inndzii bi da dɛ dzi. Sɛ ehwɛ edziban no, etse no hua, ihu ndzɛmba a wɔdze yɛe nye kwan a wɔfaa do yɛe, anaa ibisa afofor dza wonyim fa edziban no ho a, ibotum esũa biribi afa ho. Naaso, ɔkwan kortsee a ibotum afa do ehu dɛ edziban no yɛ dɛw nye dɛ wankasa bɛka ahwɛ.

² Sɛ yɛkenkan Bible no nye hɛn nwoma ahorow no, na yɛtse dɛ afofor rekã nhyira a Jehovah ama woenya ho asɛm a, obotum aboa hɛn ma yeesũa Jehovah ne papayɛ ho adze. Naaso, sɛ hɛnankasa ‘yɛsɔ’ Jehovah ne papayɛ hwɛ a, yebohu mbrɛ Jehovah ne papayɛ si tse ankasa. (Kenkan Ndwom 34:8.) Dɛ nhwɛdo no, hom mma yɛnhwɛ kwan kor a yebotum afa do ayɛ dɛm. Fa no dɛ yɛpɛ dɛ yɛdze hɛnho hyɛ ber nyina som edwuma n’afã ahorow bi mu. Naaso, sɛ yebotum ayɛ dɛm a, gyedɛ yɛma hɛn asetsena ba famu. Bi a, anohoba a Jesus bɔɔ dɛ, sɛ yɛdze Ahendzi no ho ndzɛmba dzi kan wɔ hɛn asetsena mu a, Jehovah dze hɛn ehiadze ankasa bɛma hɛn no, yɛakenkan ho nsɛm mpɛn pii. Naaso, bi a hɛndze, yennhun dɛm anohoba no ne mbamu wɔ hɛn asetsena mu da. (Matt. 6:33) Naaso, osiandɛ yɛwɔ gyedzi wɔ anohoba a Jesus bɔe no mu ntsi, yɛma hɛn asetsena ba famu, yɛtsew ber a yɛdze yɛ hɛn honam afamu edwuma no do, na yɛdze hɛn adwen si asɛnka edwuma no do. Aber a yɛyɛ dɛm no, yebohu dɛ Jehovah ma hɛn nsa ka dza yehia no. Iyi ma hɛnankasa ‘yɛsɔ’ Jehovah ne papayɛ hwɛ.

3. Dɛ mbrɛ Ndwom 16:1, 2 kyerɛ no, woananom na Jehovah da ne papayɛ edzi kyerɛ hɔn?

³ Jehovah “ye ma nyimpa nyinara.” Oye ma hɔn a wonnyim no no mpo. (Ndw. 145:9; Matt. 5:45) Naaso, ne tsitsir no, hɔn a  wɔdɔ Jehovah na wofi hɔn akoma nyina mu som no no na wonya nhyira pii fi no hɔ. (Kenkan Ndwom 16:1, 2.) Ndzepa a Jehovah ama hɛn nsa aka no, hom mma yensusu no mu bi ho nhwɛ.

4. Ebɛn kwan na Jehovah fa do da ne papayɛ edzi kyerɛ hɔn a wɔtwe bɛn no no?

⁴ Aber biara a yɛdze dza Jehovah kyerɛkyerɛ hɛn no yɛ edwuma no, yenya do mfaso wɔ hɛn asetsena mu. Dɛ nhwɛdo no, aber a yesũaa noho adze, na yenyaa ɔdɔ maa no no, ɔboaa hɛn ma yekwetsiir nsusui nye ndzeyɛɛ ahorow bi a nna ɔtwe hɛn fi noho no. (Col. 1:21) Na ber a yehyiraa hɛnho do maa Jehovah na wonumaa hɛn no, ɔmaa yenyaa tsibowa pa, na yɛnye no nyaa ebusuabɔ a no mu yɛ dzen. Iyi yɛ kwan soronko a ɔfaa do daa ne papayɛ edzi kyerɛɛ hɛn.—1 Pet. 3:21.

5. Ebɛn kwan do na Jehovah ada ne papayɛ edzi akyerɛ hɛn wɔ asɛnka edwuma no mu?

⁵ Jehovah kɔ do da ne papayɛ edzi kyerɛ hɛn ber a yɛdze hɛnho hyɛ asɛnka edwuma no mu no. Ana eyɛ obi a efɛr adze? Jehovah n’asomfo pii so fɛr adze. Bi a ansaana erebɛyɛ Jehovah Adasefo no mu kor no, annso ho daa da dɛ ibotum akɔbɔ obi a innyim no koraa n’abow mu na aakã Bible mu asɛm akyerɛ no. Naaso, ndɛ dze, etaa bɔ nkorɔfo a innyim hɔn no hɔn abow mu, na ekã Bible mu asɛm kyerɛ hɔn. Afei so, Jehovah aboa wo mpo ma enya enyigye wɔ asɛnka edwuma no mu! Nkyii so, Jehovah aboa wo wɔ akwan afofor do. Dɛ nhwɛdo no, bi a aber bi a nna enam asɛnka mu na obi kasae tsiaa wo no, Jehovah boaa wo ma edaa ɔdwe edzi. Afei so, aber bi a ihyiaa fiewura bi a n’enyi gye asɛm no ho no, Jehovah boaa wo ma ekaa kyerɛwsɛm bi a ɔfata, na enye no susuu ho. Bio so, ɔmmfa ho dɛ nna nyimpa bi a wɔwɔ w’asaasesin mu no mmpɛ dɛ wotsie asɛmpa no, Jehovah ahyɛ wo dzen ma akɔ do akã asɛm no.—Jer. 20:7-9.

6. Ebɛn kwan do na ntsetsee a Jehovah dze ma hɛn no da ne papayɛ edzi?

⁶ Jehovah atsetse hɛn ama asɛnka edwuma no, na iyi so ma yehu ne papayɛ a ɔada no edzi akyerɛ hɛn no. (John 6:45) Hɛn dapɛn finimfin asafo nhyiamu ase no, yenya nsɛm a otu mpon a ɔfa mbrɛ yebotum abɔ nkɔmbɔ ho, na wɔhyɛ hɛn nkuran dɛ yɛmfa nyɛ edwuma wɔ asɛnka mu. Sɛ wɔma hɛn nyansahyɛ fofor bi dɛ yɛmfa nyɛ edwuma wɔ asɛnka mu a, bi a ahyɛse no, ɔbɛyɛ dzen ama hɛn. Naaso, sɛ yɛdze yɛ edwuma a, mfaso pii fi mu ba. Afei so, wɔhyɛ hɛn nkuran wɔ asafo nhyiamu nye ehyiadzi ase dɛ, asɛnka edwuma no n’afã ahorow a yɛmmfaa hɛnho nnhyɛɛ mu da no, yɛnsɔ nhwɛ. Bi a iyi so bɛyɛ dzen ama hɛn dɛ yɛbɛyɛ. Naaso, sɛ yɛyɛ dɛm a, Jehovah behyira hɛn. Ɔmmfa ho tsebea a yɛwɔ mu no, sɛ yɛfa akwan afofor do yɛ dza yebotum biara wɔ Jehovah no som mu a, obehyira hɛn. Hom mma yensusu nhyira no bi ho nhwɛ. Ɔno ekyir no, yɛbɔhwɛ akwan ahorow a yebotum afa do atserɛw hɛn som mu.

7. Sɛ yɛbɔ mbɔdzen tserɛw hɛn som mu a, ebɛn nhyira na yebenya?

⁷ Yɛtwe bɛn Jehovah yie. Samuel * yɛ asafo mu panyin a ɔnye ne yer som wɔ Colombia. Hom mma yensusu nhwɛdo a wɔyɛe no ho nhwɛ. Nna dɛm awarfo yi dze enyigye som dɛ akwampaaefo wɔ hɔn asafo mu. Naaso, nna wɔpɛ dɛ wɔtserɛw hɔn som mu na wɔkɔboa asafo bi a wohia mboa kɛse. Nna ɔsɛ dɛ wɔdze ndzɛmba ahorow bi bɔ afɔr ansaana woeetum ayɛ dɛm. Samuel kãa dɛ: “Yɛdze asɛm a ɔwɔ Matthew 6:33 no yɛɛ edwuma, na yegyaa ndzɛmba a yennhia totɔ. Naaso, dza nna ɔyɛ dzen ma hɛn papaapa nye dɛ yebotu efi fie a  nna yɛtse mu no mu. Ɔkwan a wɔfaa do sii dan no, nna dɛm pɛpɛɛpɛr na yɛpɛ no. Afei so, nna yɛnndze kaw biara wɔ ho.” Aber a awarfo no kɔr asaasesin fofor mu no, wobohun dɛ nna sika kakraabi na wobehia dze etwitwa hɔnho. Samuel toaa do dɛ: “Yehu mbrɛ Jehovah si kyerɛ hɛn kwan na obua hɛn mpaabɔ. Jehovah n’enyi gye dza yɛreyɛ no ho, na ɔada ɔdɔ edzi akyerɛ hɛn wɔ akwan ahorow bi do a yennhun bi da.” Ana etum afa akwan bi do atserɛw wo som mu? Sɛ dɛm a, ibotum enya awerɛhyɛmu dɛ ebɔtwe abɛn Jehovah, na ɔbɛma wo nsa aka dza ihia.—Ndw. 18:25.

8. Ebɛnadze na isũa fi asɛm a Ivan na Viktoria kãe no mu?

⁸ Yenya enyigye wɔ ɔsom edwuma no mu. Ivan na ne yer Viktoria yɛ akwampaaefo a wɔsom wɔ Kyrgyzstan. Wɔmaa hɔn asetsena baa famu mbrɛ ɔbɛyɛ a wobotum etu hɔnho ama ayɛ asafo edwuma biara, tse dɛ asafo adansi edwuma. Hom mma yɛnhyɛ asɛm a wɔkãe no nsew. Ivan kãa dɛ: “Yɛyeer hɛnho dze hɛnho hyɛɛ asafo edwuma biara mu. Ɔwɔ mu dɛ, da biara a yɛbɔpon no, nna yɛaberɛ dze, naaso nna yɛtse nka dɛ yɛwɔ asomdwee na akomatɔyamu, osiandɛ yenyim dɛ yɛdze hɛn ahoɔdzen ayɛ Ahendzi edwuma. Afei so, hɛn enyi gyee, osiandɛ yenyaa anyɛnkofo pii nye suahu ahorow a ɔhyɛ nkuran.”—Mark 10:29, 30.

9. Ebɛnadze na akyerɛbaa bi a orihyia nsɛndzendzen wɔ n’asetsena mu no ayɛ dze atserɛw no som mu, na ebɛnadze na efi mu aba?

⁹ Ɔmmfa ho mpo dɛ yehyia nsɛndzendzen no, yenya enyigye wɔ Jehovah no som mu. Dɛ nhwɛdo no, Mirreh yɛ kunafo a ne mfe akɔ enyim a ɔwɔ Africa Anee mantɔw mu. Nna ɔyɛ dɔkta, na aber a ɔbaa ahomgye mu no, ɔdze noho hyɛɛ akwampaae edwuma no mu. Nna Mirreh yar nwewee a no mu yɛ dzen, ntsi nna dɔnhwer kor pɛ na otum dze yɛ efiefi asɛnka edwuma no. Naaso, nna otum dze ber pii yɛ bagua mu adasedzi. Nkyii so, nna otum yɛ sankɔhwɛ nye Bible adzesua pii. Hɔn mu binom wɔ a, nna ɔfrɛ hɔn wɔ tɛlefon do. Ebɛnadze na ɔkaa no ma onyaa ɔpɛ dɛ ɔbɛyɛ pii ama Jehovah? Ɔkãa dɛ: “Ɔdɔ a mowɔ ma Jehovah nye Christ Jesus no ebu do wɔ m’akoma mu. Bio so, metaa bɔ Jehovah mpaa serɛ no dɛ ɔmboa me ma muntum nyɛ pii wɔ no som mu.”—Matt. 22:36, 37.

10. Dɛ mbrɛ wɔada no edzi wɔ 1 Peter 5:10 no, ebɛnadze na hɔn a wɔpɛ dɛ wɔtserɛw hɔn som mu no nya fi Jehovah hɔ?

¹⁰ Yenya ntsetsee afofor fi Jehovah hɔ. Kenny yɛ ɔkwampaaefo a ɔsom wɔ Mauritius. Ohun dɛ dɛm asɛm yi yɛ nokwar. Aber a ohun nokwar no, nna ɔkɔ skuulpɔn, naaso ogyaa skuul no. Ekyir yi wonumaa no na ɔdze noho hyɛɛ ber nyina som edwuma no mu. Ɔkãa dɛ: “Mobɔ mbɔdzen dɛ medze asɛm a nkɔnhyɛnyi Isaiah kãe no bɛyɛ edwuma. Isaiah kãa dɛ: ‘Emi nye yi; soma me ɛ.’” (Isa. 6:8) Kenny aboa ma woesisi asafo adan ahorow pii. Nkyii so, ɔaboa ma wɔakyerɛ Bible ho nwoma ahorow ase akɔ no kurow mu kasa mu. Kenny kãa dɛ: “Wɔmaa me ntsetsee a nna mihia no ma mutumii dzii dwuma biara a wɔdze hyɛɛ me nsa no.” Naaso, nnyɛ mbrɛ obesi ayɛ edwuma no ho ntsetsee nkotsee na onyae. Kenny toaa do dɛ: “Mubohun dɛ nnyɛ ndzɛmba nyina na mubotum ayɛ. Nkyii so, mubohun suban ahorow a ɔsɛ dɛ meda no edzi ama meetum ayɛ Jehovah no somfo pa.” (Kenkan 1 Peter 5:10.) Sɛ wo nsɛm tsebea bɛma wo kwan ma eenya ntsetsee afofor efi Jehovah hɔ a, ebɛnadze ntsi na ennyɛ iyi ho nhyehyɛɛ?

11. Mbrɛ ɔbɛyɛ a nkyerɛbaa binom a wɔwɔ South Korea dze hɔnho bɛhyɛ asɛnka edwuma no mu no, ebɛn mbɔdzen na wɔbɔe, na ebɛnadze na ofii mu bae? (Hwɛ mfonyin a ɔwɔ Ɔweɔn-Aban yi enyim no.)

¹¹ Adasefo a hɔnho akokwaa mpo no, wohia ntsetsee ama woeetum dze hɔnho ahyɛ ɔsom edwuma no n’afã fofor bi mu. Aber a  COVID-19 yarba bɔn no yii ne tsir no, asafo mu mpanyimfo a wɔwɔ asafo bi mu wɔ South Korea no kãa dɛ: “Hɔn a nna wosusu dɛ wonnyi apɔwmudzen papa ntsi worunntum nnyɛ asɛnka edwuma no, ndɛ wɔnam video do dzi dase. Hɛn nkyerɛbaa baasa bi a wɔwɔ hɔn mfe 80 mu no esũa ɔkwan fofor a wɔfa do dzi dase yi, na ɔtse dɛ mbrɛ wɔdze hɔnho hyɛ asɛnka edwuma no mu da biara.” (Ndw. 92:14, 15) Ana epɛ dɛ etserɛw wo som mu na ihu Jehovah ne papayɛ wɔ akwan pii do? Ndzɛmba bi wɔ hɔ a eyɛ a ɔbɔboa wo ma eedu botae a ɔtse dɛm ho. Hom mma yensusu no mu bi ho.

12. Ebɛn anohoba na Jehovah dze abɔ hɔn a wɔdze hɔnho to no do no?

¹² Fa woho to Jehovah do. Jehovah abɔ anohoba dɛ, sɛ yɛdze hɛnho to no do na yɛyɛ dza yebotum biara ma no a, obehyira hɛn. (Mal. 3:10) Akyerɛbaa bi a wɔfrɛ no Fabiola a ɔwɔ Colombia hun dɛ Jehovah ama n’anohoba yi aba mu wɔ n’afamu. Aber a wonumaa no no, annkyɛr koraa na onyaa ɔpɛ dɛ ɔbɛyɛ daa kwampaaefo. Naaso, nna ɔwɔ dɛ ɔyɛ edwuma dze hwɛ no kun nye ne mba baasa. Aber a nna ɔreba ahomgye mu no, ɔbɔɔ mpaa dzendzenndzen serɛɛ Jehovah dɛ ɔmboa no. Ɔkãa dɛ: “Mpɛn pii no, ɔkyɛr papaapa ana obi ne nsa aaka ne pɛnhyɛn akatua. Naaso medze no dze, aber a mekyerɛɛw krataa kɔree no, bosoom kor pɛpɛɛpɛr na wɔgyee too mu. Nna ɔyɛ nwanwa papaapa!” Abosoom ebien ekyir no, ɔdze noho hyɛɛ akwampaae edwuma no mu. Seseiara ɔwɔ ne mfe 70 mu, na ɔayɛ akwampaae edwuma no bɔbor mfe 20. Ofitsi ber a ɔhyɛɛ akwampaae edwuma no ase no, ɔaboa nyimpa baawɔtwe ma woenuma hɔn. Ɔkãa dɛ: “Ɔwɔ  mu dɛ ɔtɔ da a metse nka dɛ mayɛ mberɛw wɔ honam mu dze, naaso Jehovah boa me da biara ma mokɔ do yɛ akwampaae edwuma no.”

13-14. Woananom hɔn nhwɛdo na obotum aboa hɛn ma yɛdze hɛnho aato Jehovah do na yaatserɛw hɛn so mu?

¹³ Sũasua hɔn a wɔdze hɔnho too Jehovah do no. Sɛ yɛhwɛ Bible no mu a, yebohu nyimpa pii a wɔyeer hɔnho wɔ Jehovah no som mu. Mpɛn pii no, dɛm nkorɔfo yi dzii kan yɛɛ biribi ansaana worinya nhyira soronko efi Jehovah hɔ. Dɛ nhwɛdo no, Abraham tsiee Jehovah na otui fii ne fie sii mu a ‘nna onnyim beebi a ɔrokɔ.’ Ɔno ekyir ana Jehovah rihyira no. (Heb. 11:8) Afei so, Jacob nye ɔbɔfo bi kõe. Ɔno ekyir ana orinya nhyira soronko. (Gen. 32:24-30) Nkyii so, aber a aka kakra ma Israelfo aahɛn Anohoba Asaase no do no, asɔfo no dze hɔn anan kesii Jordan Esutsen a nna eyir no mu. Ɔno ekyir ana ɔman no rutum etwa esutsen no.—Josh. 3:14-16.

¹⁴ Iyi da nkyɛn a, Jehovah n’asomfo a wɔwɔ hɛn aber yi do a wɔdze hɔnho ato no do na wɔatserɛw hɔn som mu no, yebotum esũasua hɔn. Dɛ nhwɛdo no, nna onua bi a wɔfrɛ no Payton nye ne yer Diana enyi gye ho dɛ wɔbɛkenkan enuanom binom a wɔatserɛw hɔn som mu no hɔnho nsɛm. Bi nye dza wɔakã ho asɛm wɔ asɛm a ɔba ndzidzido ndzidzido a wɔato dzin “Wotuu Hɔnho Maa Koraa.” * Payton kãa dɛ: “Aber a yɛkenkaan hɔnho nsɛm no, yɛtsee nka tse dɛ mbrɛ yɛrohwɛ obi a ɔdze enyigye ridzi edziban bi a ɔyɛ dɛw. Mpɛn dodow a yɛkenkanee no, dodow no ara na yenyaa ɔpɛ dɛ ‘yɛbɔsɔ ahwɛ na yeehu dɛ Jehovah ye.’” Ana akenkan nsɛm a ɔba ndzidzido ndzidzido yi? Anaa ahwɛ video a wɔato dzin Yeridzi Dase Wɔ Nsaasesin A Wɔatsew No Ho Mu—Australia nye Yeridzi Dase Wɔ Nsaasesin A Wɔatsew No Ho Mu—Ireland a ɔwɔ jw.org do no? Bi a nsɛm a ɔtse dɛm botum aboa wo ma eehu akwan ahorow a ibotum afa do atserɛw wo som mu.

15. Ebɛn kwan do na anyɛnkofo pa bɔboa hɛn?

¹⁵ Paw anyɛnkofo pa. Sɛ inndzii edziban bi da na etaa nye hɔn a wodzi dɛm edziban no bɔ a, ɔrennyɛ dzen mma wo dɛ ibosũa dzi. Dɛm pɛpɛɛpɛr na sɛ yɛnye hɔn a wɔdze Jehovah dzi kan wɔ hɔn asetsena mu no bɔ a, yɛbɔhwehwɛ akwan a yebotum afa do atserɛw ɔsom a yɛdze ma Nyankopɔn no mu. Kent na ne yer Veronica hun dɛ dɛm asɛm yi yɛ nokwar. Kent kãa dɛ: “Hɛn ebusuafo nye hɛn anyɛnkofo hyɛɛ hɛn nkuran dɛ yɛnsɔ ɔsom edwuma no n’afã ahorow bi nhwɛ. Yebohun dɛ aber a yɛnye hɔn a wɔdze Ahendzi no dzi kan wɔ hɔn asetsena mu bɔe no, yenyaa ahotodo dɛ yebotum asɔ ɔsom edwuma no n’afã fofor bi ahwɛ.” Seseiara Kent na Veronica som dɛ akwampaaefo etsitsir wɔ Serbia.

16. Dɛ mbrɛ Jesus ne mfatoho a ɔwɔ Luke 12:16-21 ma yehu no, ebɛnadze ntsi na ɔwɔ dɛ yenya ɔpɛ dɛ yɛdze ndzɛmba bɔbɔ afɔr?

¹⁶ Fa ndzɛmba bɔ afɔr ma Jehovah. No ho nnhia dɛ yɛdze ndzɛmba a ɔma hɛn enyi gye nyina bɔ afɔr ansaana yeetum asɔ Jehovah n’enyi. (Ɔsɛnk. 5:19, 20) Naaso, osian ndzɛmba bi a ɔda hɛn akoma do ntsi, sɛ yɛmmpɛ dɛ yɛdze ndzɛmba bɔbɔ afɔr na yaatserɛw hɛn som mu a, yebotum edzi mfom a ɔbarimba a ɔwɔ Jesus ne mfatoho no mu no dzii no. Dɛm ɔbarimba no yeer noho yɛɛ edwuma nyaa ndzɛmba pa pii, naaso ɔannhwehwɛ Nyankopɔn n’ekyir kwan. (Kenkan Luke 12:16-21.) Onua bi a wɔfrɛ no Christian a ɔwɔ France kãa dɛ, “Nna minnya mber pii mma Jehovah nye m’ebusua.” Ɔnye ne yer sii gyinae dɛ wɔdze hɔnho bɛhyɛ akwampaae edwuma no mu. Naaso, sɛ nna wobotum ayɛ dɛm a, nna ɔwɔ dɛ wogyaa edwuma a wɔyɛ no. Mbrɛ ɔbɛyɛ a wobenya  sika ahwɛ hɔnho no, wɔyɛɛ dɛ wobesiesie nkorɔfo hɔn efie nye hɔn ɔfese, na wɔmaa hɔn enyi sɔɔ sika kakra a nna wonya no. Ana gyinae a wosii no ama hɔn enyi agye? Christian kãa dɛ, “Seseiara, yenya enyigye kɛse wɔ asɛnka edwuma no mu, na sɛ yehu dɛ hɛn Bible esuafo nye hɔn a yɛkɛyɛ hɔn hɔ sankɔhwɛ no rusũa Jehovah ho adze a, ɔma hɛn enyi gye.”

17. Ebɛnadze ntsi na obotum ayɛ dzen ama hɛn dɛ yɛbɔsɔ asɛnka edwuma no n’afa afofor bi ahwɛ?

¹⁷ Nya ɔpɛ dɛ ebɔsɔ ɔsom edwuma no n’afã afofor ahwɛ. (Andw. 17:16, 17; 20:20, 21) Shirley yɛ hɛn akyerɛbaa kwampaaefo a ɔwɔ United States. Aber a COVID-19 yarba bɔn no yii ne tsir no, nna ɔsɛ dɛ ɔyɛ nsesa wɔ n’asɛnka edwuma no mu. Ahyɛse no, nna osusu dɛ orunntum nnyɛ tɛlefon do adasedzi. Naaso aber a ɔmansin do hwɛfo bɔsoom asafo a ɔwɔ mu no, ɔmaa hɔn ntsetsee wɔ mbrɛ wobesi ayɛ tɛlefon do adasedzi. Ɔno ekyir no, nna ɔtaa yɛ tɛlefon do adasedzi. Ɔkãa dɛ: “Ahyɛse no, mobɔɔ hũ kakra, naaso seseiara dze, m’enyi abɛgye ho papaapa. Hɛn nsa ka nyimpa pii kyɛn aber a nna yɛkɔ efiefi mu no!”

18. Sɛ yɛpɛ dɛ yɛtserɛw hɛn som mu na yehyia nsɛndzendzen a, ebɛnadze na ɔbɔboa hɛn ma yeegyina ano?

¹⁸ Yɛ nhyehyɛɛ na dzi do. Sɛ yehyia nsɛndzendzen a, ɔsɛ dɛ yɛbɔ mpaa hwehwɛ mboa na yesusu dza yebotum ayɛ afa ɔhaw no ho yie ho. (Mbɛ. 3:21) Sonia yɛ daa kwampaaefo a ɔsom wɔ Europe. Ɔwɔ kuw bi a wɔkã Romany kasa mu. Ɔkãa dɛ: “Ɔyɛ a mekyerɛw nhyehyɛɛ a mayɛ no wɔ krataa do na medze to beebi a mubohu no ntsɛm. Madorɔw akwan ebien a ɔsor beebi a no mu biara kɔ ato mo pon do. Dɛm ntsi, sɛ ɔwɔ dɛ misi gyinae bi a, mususu ho na mohwɛ beebi a me gyinaesi no dze me bɔkɔ.” Sonia bɔ mbɔdzen dɛ obenya adwen pa wɔ nsɛndzendzen a ohyia no ho. Ɔtoaa do dɛ, “Tsebea fofor biara a mibehyia no, dza mebɛyɛ wɔ ho no na ɔbɛkyerɛ dɛ mubu tsebea no dɛ fasu a osiw me kwan dɛ mubodu mo botae ho anaadɛ bregye a mubotum afa do edu mo botae ho.”

19. Ebɛnadze na ɔwɔ dɛ yesi hɛn bo dɛ yɛbɛyɛ?

¹⁹ Jehovah hyira hɛn wɔ akwan pii do. Sɛ yɛyɛ dza yebotum nyina hyɛ no enyimnyam a, nna yɛreda no edzi dɛ hɛn enyi sɔ nhyira a ɔtse dɛm. (Heb. 13:15) Dza yebotum ayɛ no, no mu bi nye dɛ yɛbɔhwehwɛ akwan afofor a yebotum afa do atserɛw hɛn som mu. Sɛ yɛyɛ dɛm a, Jehovah behyira hɛn pii. Ɔmbra dɛ da biara, yɛbɔhwehwɛ akwan a yebotum afa do ‘asɔ ahwɛ na yeehu dɛ Jehovah ye.’ Sɛ yɛyɛ dɛm a, yɛbɛyɛ tse dɛ Jesus na yaakã asɛm a ɔkãe no bi. Ɔkãa dɛ: “M’edziban nye dɛ meyɛ nyia ɔsomaa me no pɛ na muwie n’edwuma.”