1. Ebɛnadze na wɔkyerɛkyerɛɛ wo faa Jehovah ho?

SƐ WƆTSETSEE wo dɛ Jehovah Adasefo no mu kor a, ɔda edzi dɛ ofi wo mbofrase na esũa Jehovah ho adze. Wɔkyerɛkyerɛɛ wo dɛ ɔno nye Ɔbɔadze no, ɔwɔ su ahorow a ɔyɛ ahomka, na ɔwɔ tsirmpɔw a ɔdɔ wɔ mu ma adasamba.—Gen. 1:1; Andw. 17:24-27.

2. Nyimpa binom bu hɔn a wɔgye dzi dɛ Ɔbɔadze bi wɔ ho no dɛn?

² Naaso awerɛhosɛm nye dɛ, nyimpa pii nngye Nyankopɔn nndzi na akantam wɔaagye edzi dɛ ɔno nye Ɔbɔadze no. Mbom no, wɔgye dzi dɛ nkwa baa ara kwa. Wɔkã dɛ, abɔdze nketsenketse a nkwa wɔ mu na wɔdandaan nkakrankakra bɛyɛɛ abɔdze akɛse asorɔtow a nkwa wɔ mu no. Hɔn a wɔkã dɛm no, hɔn mu binom yɛ nkorɔfo a wɔakɔ skuul akɔ ekyir paa. Wɔkã dɛ abɔdzenyansahu ama ada edzi dɛ Bible no nnyɛ nokwar. Ntsi, hɔn a wonnyim hwee na wɔnnkɔr skuul nnkɔr ekyir no na wɔgye dzi dɛ Ɔbɔadze bi wɔ hɔ.

3. Ebɛnadze ntsi na no ho hia dɛ yɛhyɛ hɛnankasa hɛn gyedzi mu dzen?

³ Nsɛm a ɔtsetse dɛm a hɔn a wɔakɔ skuul akɔ ekyir kekã no, aso ɔbɛma hɛn gyedzi a yɛwɔ dɛ Jehovah nye Ɔbɔadze a ɔwɔ ɔdɔ no abrɛ adze? Dɛ hɛn gyedzi bɛbrɛ adze anaa ɔnnkɛbrɛ adze no, ogyina siantsir a yɛgye dzi dɛ Jehovah nye Ɔbɔadze no do. Ana wɔkãa kyerɛɛ hɛn dɛ Jehovah nye Ɔbɔadze no ntsi na yɛgyee dzii anaa hɛnankasa na yɛgyee ber susuu adanse a ɔkyerɛ dɛ ɔno nye Ɔbɔadze no ho? (1 Cor. 3:12-15) Ɔwɔ dɛ hɛn nyina yɛkɔ do hyɛ gyedzi a yɛwɔ wɔ Ɔbɔadze no mu dzen, ɔmmfa ho ber tsentsen a yɛasom dɛ Jehovah Adasefo no. Sɛ yɛyɛ dɛm a, yɛremma hɔn a wɔnngye Nyankopɔn n’Asɛm nndzi no mmfa hɔn “nyansapɛ nye ndaadaa hun” a wɔkyerɛkyerɛ no nnto hɛn brada. (Col. 2:8; Heb. 11:6) Adzesua asɛm yi bɔboa  hɛn ma yeehu (1) siantsir a nyimpa pii nngye Ɔbɔadze no nndzi, (2) dza ɔbɔboa wo ma aagye edzi dɛ Jehovah nye wo Bɔfo no, na afei (3) mbrɛ ibesi akɔ do ahyɛ dɛm gyedzi no mu dzen.

4. Dɛ mbrɛ Hebrewfo 11:1 kyerɛ no, gyedzi mapa gyina ebɛnadze do?

⁴ Sɛ wɔkã gyedzi a, nyimpa binom susu dɛ ɔkyerɛ dɛ, ebɛgye biribi edzi a onngyina adanse biara do. Naaso, Bible no ma yehu dɛ gyedzi a ɔtse dɛm no nnyɛ gyedzi papa. (Kenkan Hebrewfo 11:1.) Bible no ma yehu dɛ gyedzi yɛ biribi a ogyina adanse do. Ntsi, ɔwɔ mu dɛ yɛmmfa hɛn enyi nnhu Jehovah, Jesus, nye Ahendzi no dze, naaso, yɛwɔ adanse a odzi mũ a ɔkyerɛ dɛ wɔwɔ hɔ ankasa. (Heb. 11:3) Ɔdasefo bi a ɔyɛ abɔdzenyansahufo kã iyi ho asɛm dɛ: “Gyedzi a yɛwɔ no wɔ ngyinado, na yemmbu hɛn enyi nngu abɔdzenyansahu do.”

5. Ebɛnadze ntsi na nyimpa pii nngye nndzi dɛ Ɔbɔadze bi wɔ hɔ?

⁵ Bi a yebebisa dɛ, ‘Sɛ adanse a odzi mũ wɔ hɔ a ɔkyerɛ dɛ Ɔbɔadze bi wɔ hɔ a, ebɛnadze ntsi na nyimpa pii nngye nndzi dɛ Nyankopɔn na ɔyɛ nkwa farbaa?’ Nyimpa binom wɔ hɔ a, adanse a odzi mũ a ɔkyerɛ dɛ Ɔbɔadze bi wɔ hɔ no, hɔnankasa nngyee ber nnsusuu ho da. Robert a seseiara ɔyɛ Jehovah Adasefo no mu kor no kãa dɛ: “Aber a nna mokɔ skuul no, wɔannkyerɛ hɛn adzebɔ ho adze, ntsi nna menngye nndzi dɛ Ɔbɔadze bi wɔ hɔ. Ber a mudur me mfe 20 mu no ansaana Jehovah Adasefo nye me robɔ nkɔmbɔ. Wɔboaa me ma muhun adanse a odzi mũ na ntseasee wɔ mu a Bible no dze ma fa adzebɔ ho.” *—Hwɛ  adakaba a wɔato dzin “ Asɛnhia A Ɔwɔ Dɛ Awofo Hyɛ No Nsew.”

6. Ebɛnadze ntsi na nyimpa binom nngye nndzi dɛ Ɔbɔadze bi wɔ hɔ?

⁶ Nyimpa binom so nngye nndzi dɛ Ɔbɔadze bi wɔ hɔ, osiandɛ wɔkã dɛ adze a wohu nko na wobotum agye edzi dɛ ɔwɔ hɔ. Naaso, ndzɛmba bi wɔ hɔ a, wɔmmfa hɔn enyi nnhu, eso wɔgye dzi dɛ ɔwɔ hɔ. Dɛ nhwɛdo no, wɔgye dzi dɛ tum a ɔtwe adze ba famu wɔ hɔ. Wɔmmfa hɔn enyi nnhu dze, naaso wohu adanse a ɔkyerɛ dɛ dɛm tum yi wɔ hɔ ankasa. Gyedzi a Bible no kã ho asɛm no so yɛ gyedzi a “ogyina adze a enyi nntua” do. (Heb. 11:1) Ɔgye mber na mbɔdzembɔ ana yeetum ahwehwɛ adanse a odzi mũ yi mu. Naaso, nyimpa piinara mmpɛ dɛ wɔbɛyɛ dɛm. Obi a ɔmmpɛ dɛ ɔyɛ adanse yi mu nhwehwɛmu no, dza ɔbɛkã ara nye dɛ Nyankopɔn nnyi hɔ.

7. Aso hɔn a wɔakɔ skuul akɔ ekyir nyina na wɔkã dɛ ɔnnyɛ Nyankopɔn na ɔbɔɔ amansan yi? Kyerɛkyerɛ mu.

⁷ Abɔdzenyansahufo binom ayɛ nhwehwɛmu  a ɔfa adanse a ɔkyerɛ dɛ Ɔbɔadze bi wɔ hɔ no ho, na wɔabɛgye ato mu dɛ Nyankopɔn na ɔbɔɔ amansan yi. * Tse dɛ Robert a yɛakã noho asɛm no, nna hɔn mu binom nngye nndzi dɛ Ɔbɔadze bi wɔ hɔ, osiandɛ wɔannkyerɛ hɔn adzebɔ ho adze da wɔ skuulpɔn mu. Naaso, abɔdzenyansahufo pii ebohu Jehovah, na woenya noho dɔ. Ɔmmfa ho mbrɛ hɛn nwomasua tse biara no, ɔwɔ dɛ hɛn nyina yɛhyɛ gyedzi a yɛwɔ wɔ Nyankopɔn mu no dzen, dɛ mbrɛ dɛm abɔdzenyansahufo yi yɛe no. Obiara runntum nnyɛ dɛm mma hɛn. Hɛnankasa na ɔwɔ dɛ yɛyɛ.

8-9. (a) Ebɛn asɛmbisa na yerubosusu ho? (b) Sɛ isũa abɔdze ho adze a, ɔbɔboa wo dɛn?

⁸ Ebɛnadze na ɔbɔboa wo ma aagye Ɔbɔadze no edzi? Ma yɛnhwɛ ndzɛmba anan a ibotum ayɛ.

⁹ Sũa abɔdze ho adze. Sɛ isũa mbrɛ mbowa si yɛ hɔn adze, mbrɛ ndua nye nworaba tse a, ɔbɔboa ma aagye Ɔbɔadze no edzi. (Ndw. 19:1; Isa. 40:26) Sɛ isũa dɛm ndzɛmba yi ho adze kɔ ekyir a, gyedzi a ewɔ dɛ Jehovah nye Ɔbɔadze no bɛyɛ kɛse. Hɛn nwoma ahorow no bi taa kyerɛkyerɛ abɔdze ho adze kɔ ekyir. Sɛ ɔyɛ dzen ma wo dɛ ebɛtse dɛm nsɛm yi ase mpo a, mma nnkwetsir dɛ ebɛkenkan. Sũa dza w’ahoɔdzen botum. Ndaansa yi woyi video ahorow a ɔfa abɔdze ho wɔ hɛn ɔmantɔw ehyiadzi ase. Wɔdze dɛm video yi egu hɛn wɛbsaet, jw.org hɔ. Bɔ mbɔdzen dɛ ebɔhwɛ dɛm video ahorow yi.

10. Abɔdze ma yehu dɛ Ɔbɔadze bi wɔ hɔ. Ma nhwɛdo a ɔkyerɛ dɛm. (Romefo 1:20)

¹⁰ Sɛ irusũa abɔdze ho adze a, dza ɔma ihu fa Ɔbɔadze no ho no, fa w’adwen si do. (Kenkan Romefo 1:20.) Dɛ nhwɛdo no, ewia no ma hɛn ɔhyew na kan a yehia no ama yeetum atsena asaase do. Naaso ewia no ne hyew no bi wɔ hɔ a, osiandɛ n’ano yɛ dzen ntsi obotum epira hɛn. Dɛm ntsi yehia biribi a obotum abɔ hɛnho ban efi ewia no ne hyew a n’ano yɛ dzen yi ho. Na yenya biribi a ɔtse dɛm so! Ebɛn kwan do? Mframa bi wɔ wimu a ɔtse dɛ mununkum a ɔbɔ hɛnho ban fi ewia no ne hyew a obotum epira hɛn no ho. Aber a ewia no ne hyew n’ano reyɛ dzen no, nna dɛm mframa yi so reyɛ kɛse. Aso enngye nndzi dɛ Ɔbɔadze bi a ɔwɔ ɔdɔ na onyim nyansa na ɔyɛɛ adze a ɔtse dɛm?

11. Sɛ epɛ abɔdze ho nokwasɛm a ɔhyɛ gyedzi dzen a, ibenya bi wɔ hen? (Hwɛ adakaba a wɔato dzin “ Nsɛm A Ɔbɔboa Wo Ma Aagye Edzi Dɛ Ɔbɔadze Bi Wɔ Hɔ.”)

¹¹ Sɛ eyɛ nhwehwɛmu wɔ Watch Tower Publications Index mu anaa jw.org do a, ibotum enya abɔdze ho nokwasɛm pii a ɔhyɛ gyedzi dzen. Ibotum dze nsɛm nye video ahorow a ɔwɔ ɔfã a wɔato dzin “Aso Wɔbɔe?” no ahyɛ ase. Dɛm ɔfã yi yɛ nsɛm a ɔba ndzidzido ndzidzido. Nsɛm na video ahorow a ɔwɔ dɛm ɔfã yi yɛ ntsiantsia. Ɔkã mbowa nye abɔdze afofor ho nokwasɛm a ɔyɛ ahomka. Afei so, ɔma yehu mbɔdzen a abɔdzenyansahufo robɔ dɛ wɔdze dza wosũa wɔ abɔdze mu no bɛyɛ ndzɛmba ahorow.

12. Sɛ irusũa Bible no a, ebɛn nsɛm na ɔwɔ dɛ ehyɛ no nsew?

¹² Sũa Bible no. Abɔdzenyansahufo a yɛkãa noho asɛm wɔ nkyekyɛmu anan no, ahyɛse no nna ɔnngye nndzi dɛ Ɔbɔadze bi wɔ hɔ. Naaso ber kɔr do no, ɔbɛgyee dzii dɛ Ɔbɔadze bi wɔ hɔ. Ɔkãa dɛ: “Nnyɛ abɔdzenyansahu ho adze a musũae no nko na ɔmaa mebɛgyee dzii dɛ Ɔbɔadze bi wɔ hɔ. Mbom, Bible no a musũaa  no yie no so boaa me papaapa.” Bi a ewɔ Bible mu nokwar nyimdzee a odzi mũ dada. Sɛ ɔtse dɛm mpo a, ɔwɔ dɛ ekɔ do sũa Nyankopɔn n’Asɛm no ama aahyɛ gyedzi a ewɔ wɔ Ɔbɔadze no mu no dzen. (Josh. 1:8; Ndw. 119:97) Dɛ nhwɛdo no, ibotum adwendwen abakɔsɛm a Bible no kã ho asɛm pɛpɛɛpɛr no ho. Nkyii so, ibotum adwendwen mbrɛ Bible no mu nkɔnhyɛ si ba mu no ho. Afei so, ibotum adwendwen mbrɛ akyerɛwfo no hɔn nsɛm si hyia no ho. Sɛ eyɛ dɛm a, ibotum ahyɛ wo gyedzi mu dzen dɛ Ɔbɔadze bi a ɔwɔ ɔdɔ na onyim nyansa na ɔbɔɔ hɛn, na ɔnoara so na ɔmaa wɔkyerɛɛw Bible no. *—2 Tim. 3:14; 2 Pet. 1:21.

13. Nhwɛdo kor a ɔma yehu afotu pa a ɔwɔ Nyankopɔn n’Asɛm mu nye dɛn?

¹³ Sɛ irusũa Nyankopɔn n’Asɛm no a, fa w’adwen si mbrɛ no mu afotu besi aboa wo no do. Dɛ nhwɛdo no, ofi ber tsentsen na Bible no abɔ kɔkɔ dɛ, sikanyiber dze ɔhaw nye “yaw pii” ba. (1 Tim. 6:9, 10; Mbɛ. 28:20; Matt. 6:24) Aso dɛm kɔkɔbɔ yi yɛ nokwar ndɛ? Nwoma bi a ɔkã suban a nkorɔfo da no edzi wɔ hɛn ber yi do ho asɛm no kã dɛ: “Sɛ yɛhwɛ mu paa a, hɔn a wɔgye dzi dɛ sika nye adze tsitsir wɔ hɔn asetsena mu no nnyi enyigye, na adwendwen taa hyɛ hɔn do. Dɛmara so na nyimpa a wɔpɛ dɛ wonya sika pii no nnya enyigye, na wohyia apɔwmudzen ho haw.” Ntsi, afotu a Bible no dze ama dɛ yenkwetsir sikanyiber no, mfaso wɔ do papaapa! Aso ewɔ Bible mu ngyinadonsɛm afofor a aboa wo? Sɛ yɛdwendwen afotu pa a ɔwɔ Bible no mu no ho a, yebohu dɛ hɛn Bɔfo a ɔwɔ ɔdɔ no nyim dza oye ma hɛn, na iyi bɔboa hɛn ma yɛdze hɛnho aato no do aber nyina. (Jas. 1:5) Iyi bɛma yeenya enyigye pii wɔ hɛn asetsena mu.—Isa. 48:17, 18.

14. Sɛ isũa Bible no a, ebɛnadze na ɔbɛma ehu afa Jehovah ho?

¹⁴ Sɛ irusũa Bible no a, fa yɛ wo botae dɛ ibohu Jehovah yie. (John 17:3) Aber a irusũa Kyerɛwnsɛm no, ibohu mbrɛ Jehovah tse ankasa nye no su ahorow no. Dɛm su yi ara na ihunii aber a isũaa abɔdze ho adze no. Sɛ isũa Jehovah ho adze a, ibohu dɛ Jehovah yɛ Obi a ɔwɔ hɔ ankasa. (Ex. 34:6, 7; Ndw. 145:8, 9) Aber a ihu Jehovah yie no, ɔdɔ a ewɔ ma no no mu bɛyɛ dzen, gyedzi a ewɔ wɔ no mu no bɛyɛ kɛse, na enye no ntamu anyɛnkofa no mu so bɛyɛ dzen.

15. Sɛ ekã wo gyedzi ho asɛm kyerɛ afofor a, ɔbɔboa wo dɛn?

¹⁵ Kã gyedzi a ewɔ wɔ Nyankopɔn mu no ho asɛm kyerɛ afofor. Aber a eyɛ dɛm no, gyedzi a ewɔ wɔ no mu no bɛyɛ kɛse. Naaso, sɛ obi kã kyerɛ wo dɛ ɔnngye nndzi dɛ Nyankopɔn wɔ hɔ, na innyim dza ebɛkã a, ebɛnadze na ɔwɔ dɛ eyɛ? Bɔ mbɔdzen hwehwɛ Kyerɛwsɛm bi a ɔfa asɛm no ho a wɔakyerɛkyerɛ mu wɔ hɛn nwoma ahorow mu, na enye nyimpa no nsusu ho. (1 Pet. 3:15) Ibotum aserɛ onua bi a noho akokwaa ma ɔaaboa wo. Sɛ nyimpa no gye to mu o, ɔanngye annto mu o, nhwehwɛmu a ayɛ no bɔboa wankasa. Ɔbɛma gyedzi a ewɔ wɔ Nyankopɔn mu no ayɛ kɛse. Iyi ntsi, ɔremma hɔn a wɔyɛ enyansafo wɔ hɔnankasa hɔn enyi do na wɔkã dɛ Ɔbɔadze bi nnyi hɔ no nndaadaa wo.

16. Sɛ yɛannkɔ do annhyɛ hɛn gyedzi mu dzen a, ebɛn asɛm botum ato hɛn?

¹⁶ Ɔmmfa ho ber tsentsen a yɛdze asom Jehovah no, ɔwɔ dɛ yɛkɔ do hyɛ gyedzi a yɛwɔ wɔ no mu no dzen. Ebɛnadze ntsi a? Osiandɛ, sɛ yaannyɛ ahwɛyie a, hɛn gyedzi botum abrɛ adze. Yɛmma ɔntsena hɛn adwen mu dɛ, gyedzi gyina ndzɛmba a yennhu naaso yɛgye dzi dɛ ɔwɔ hɔ no do. Ndzɛmba a yenntum mmfa  hɛn enyi nnhu no, ɔnnyɛ dzen dɛ hɛn werɛ botum efir. Ntsi, Paul kãa gyedzi a obi nnyi ho asɛm dɛ ɔyɛ “bɔn a ɔnnkyɛr na ɔatõto hɛn ananmu.” (Heb. 12:1) Yebesi dɛn ama hɛn gyedzi aakɔ do ayɛ dzen?—2 Thess. 1:3.

17. Ebɛnadze na obotum aboa hɛn ma hɛn gyedzi aakɔ do ayɛ dzen?

¹⁷ Odzi kan, kɔ do serɛ Jehovah dɛ ɔmma wo no sunsum krɔnkrɔn. Ebɛnadze ntsi a? Osiandɛ gyedzi yɛ sunsum aba ne fã. (Gal. 5:22, 23) Gyedzi a yɛwɔ wɔ hɛn Bɔfo no mu no, sɛ ɔammfa no sunsum krɔnkrɔn no aammboa hɛn a, yerunntum nnhyɛ mu dzen. Sɛ yɛkɔ do serɛ Jehovah dɛ ɔmma hɛn no sunsum krɔnkrɔn no a, ɔdze bɛma hɛn. (Luke 11:13) Yebotum mpo abɔ mpaa dɛ, “To hɛn gyedzi mu.”—Luke 17:5.

18. Dɛ mbrɛ Ndwom 1:2, 3 kyerɛ no, ebɛn ho kwan na yeenya?

¹⁸ Afei so, kɔ do sũa Nyankopɔn n’Asɛm no. (Kenkan Ndwom 1:2, 3.) Aber a wɔkyerɛɛw dɛm ndwom yi, nna Israelfo a wɔwɔ Nyankopɔn ne Mbra a wɔakyerɛw no bi no nndɔɔ sõ. Naaso, ahemfo no na asɔfo no dze, nna wɔwɔ Nyankopɔn ne Mbra a wɔakyerɛw no bi. Nna mfe esuon biara wɔyɛ nhyehyɛɛ ma wɔkenkan Nyankopɔn ne Mbra no kyerɛ “mbanyin nye mbaa nye mbofraba” nye ahɔho. (Deut. 31:10-12) Jesus n’aber do no, nna nyimpa kakraabi na wɔwɔ nwoma mbobɔwee no bi. Nna nwoma mbobɔwee no mu dodow no ara wɔ nhyiamudan a ɔwowɔ hɔ no mu. Naaso ndɛ, nyimpa dodow no ara wɔ Bible no bi. Iyi yɛ ho kwan kɛse a yeenya. Yebesi dɛn akyerɛ dɛ hɛn enyi sɔ ho kwan kɛse a ɔtse dɛm?

19. Sɛ hɛn gyedzi bɔkɔ do ayɛ dzen a, ebɛnadze na ohia dɛ yɛyɛ?

¹⁹ Nyankopɔn n’Asɛm a hɛn nsa aka no, sɛ yebotum akyerɛ ho enyisɔ a, ɔwɔ dɛ yɛkenkan no dabaa. Dɛm ntsi, ɔwɔ dɛ yɛyɛ ber nhyehyɛɛ dze kenkan Bible no na yesũa. Onnyi dɛ yɛtse nka dɛ, sɛ yenya ber a nna yɛbɛkenkan. Sɛ yedzi nhyehyɛɛ a yɛayɛ dze sũa Bible no do a, yebotum akɔ do ahyɛ hɛn gyedzi dzen.

20. Ebɛnadze na ɔsɛ dɛ yesi hɛn bo dɛ yɛbɛyɛ?

²⁰ Hɛndze yɛnntse dɛ wiadze yi mu “enyansafo nye abadwembafo” no; yɛwɔ gyedzi a odzi mũ a ogyina Nyankopɔn n’Asɛm no do pintsinn. (Matt. 11:25, 26) Osian Bible no a yesũa ntsi, yenyim siantsir a wiadze nsɛm tsebea resɛɛ nye dza Jehovah bɛyɛ wɔ ho. Dɛm ntsi, hom mma yensi hɛn bo dɛ yɛbɛhyɛ hɛn gyedzi dzen na yaaboa nyimpa dodow biara a yebotum ma hɔn so woeebenya gyedzi wɔ hɛn Bɔfo no mu. (1 Tim. 2:3, 4) Hom mma yɛnkɔ do nhwɛ aber a atseasefo nyina bɛpaa mu akã asɛm a ɔwɔ Nyikyerɛ 4:11 no kwan. Hɔ kã dɛ: “[Jehovah] Nyankopɔn, ɔwo efata dɛ egye enyimnyam . . . na ɔwo na ebɔɔ adze nyina.”