1. Ebɛn kwan do na enuanom pii reyer hɔnho wɔ Jehovah no som mu?

 YƐWƆ edwuma pii yɛ aber a wiadze yi n’ewiei rebɛn no. (Matt. 24:14; Luke 10:2; 1 Pet. 5:2) Hɛn nyina pɛ dɛ yɛyɛ dza yebotum biara som Jehovah. Enuanom pii retserɛw hɔn som mu. Binom pɛ dɛ wɔsom dɛ akwampaaefo. Binom so pɛ dɛ wɔkɔsom wɔ Bethel anaa wɔkɔboa ma wosisi asafo adan. Iyi da nkyɛn a, enuanom mbarimba pii robɔ mbɔdzen dɛ wɔbɛfata ama wɔaapaw hɔn dɛ asafo mu asomfo anaadɛ mpanyimfo. (1 Tim. 3:1, 8) Sɛ Jehovah hu mbrɛ no nkorɔfo dze hɔnho rema wɔ ɔpɛ do yi a, ɔma n’enyi gye papaapa!—Ndw. 110:3; Isa. 6:8.

2. Sɛ yeenntum enndu Nyankopɔn no som mu botae ahorow bi a yɛdze esisi hɛn enyi do no ho a, bi a yɛbɛyɛ hɛn adze dɛn?

² Sɛ mber pii twa mu na yenntumii nndur Nyankopɔn no som mu botae ahorow bi a yɛdze esisi hɛn enyi do no ho a, hɛn abaw mu botum ebu. Anaadɛ, osian mfe a yeedzi anaa hɛn nsɛm tsebea bi ntsi, hɛn nsa rennka ɔsom ho kwan ahorow bi, na iyi so botum ama hɛn abaw mu eebu. (Mbɛ. 13:12) Dɛm asɛm yi na ɔtoo Melissa. * Nna ɔpɛ dɛ ɔkɔsom wɔ Bethel anaa ɔkɔ Ahendzi Asɛmpakafo Skuul no bi. Naaso, ɔkãa dɛ: “Medzi abor mfe a wɔhwehwɛ no do. Seseiara dze, muhu dɛ murunntum nndu botae a ɔtse dɛm ho da. Ɔtɔ da a, iyi tum ma m’abaw mu bu.”

3. Ebɛnadze na ɔwɔ dɛ binom yɛ ama woeetum afata ama ɔsom ho kwan ahorow bi?

³ Hɛn nuanom a wɔwɔ apɔwmudzen na wonnyiin pii no bi wɔ hɔ a, no ho behia dɛ wonya suban ahorow bi ansaana wɔaafata ama ɔsom ho kwan ahorow bi. Dɛ nhwɛdo no, bi a nna hɔn adwen mu da hɔ, wotum si biribi ho gyinae ntsɛm na wɔwɔ ɔpɛ dɛ wɔbɛyɛ edwuma. Naaso, bi a ɔba no abotar, enyidahɔ na obu a, wɔaka hɔn kakra ntsi ɔwɔ dɛ wɔbɔ iyi ho mbɔdzen. Sɛ  wɔdze hɔn adwen si su ahorow a no ho hia yi do a, obotum aba dɛ hɔn nsa bɛka ɔsom ho kwan wɔ ber a hɔn enyi nnda. Hom mma yensusu Nick n’asɛm no ho nhwɛ. Aber a odzii mfe 20 no nna ɔhwɛ kwan dɛ wɔbɛpaw no dɛ asafo mu somfo naaso wɔammba no dɛm, na iyi maa n’abaw mu bui. Ɔkãa dɛ, “Metsee nka dɛ gyama memmfata.” Naaso Nick ammpa abaw. Ɔyeer noho yɛɛ dza obotum biara wɔ asɛnka edwuma no mu, na dɛmara na ɔyɛe wɔ asafo no mu. Ndɛ ɔsom dɛ Nkorbata Egyinatukuw bi munyi.

4. Ebɛnadze na yebosusu ho wɔ adzesua yi mu?

⁴ Aso botae bi a inndur ho wɔ Jehovah no som mu ntsi, w’abaw mu ebu? Sɛ dɛm na ɔtse wɔ w’afamu a, kã ho asɛm kyerɛ Jehovah. (Ndw. 37:5-7) Afei so, ibotum aserɛ enuanom a hɔnho akokwaa no ma wɔaama wo nyansahyɛ a ɔbɔboa wo ma eetu mpon wɔ Nyankopɔn no som mu. Nyansahyɛ a wɔdze bɛma wo no, bɔ mbɔdzen dɛ edze bɛyɛ edwuma. Sɛ eyɛ dɛm a, bi a wo nsa bɛka ɔsom ho kwan a erohwehwɛ no anaa ibotum edu wo botae no ho. Naaso, bi a wo tsebea no tse dɛ Melissa a yeedzi kan akã noho asɛm no nedze no. Sɛ dɛm a, ɔsom ho kwan a erohwehwɛ no seseiara no, bi a wo nsa runntum nnka. Sɛ dɛm mpo a, ibesi dɛn akɔ do enya enyigye wɔ Jehovah no som mu? Yebenya asɛmbisa yi ho mbuae wɔ adzesua asɛm yi mu. Adzesua yi bɛma ehu (1) dza ɔbɛma enya enyigye, (2) mbrɛ ibesi ama w’enyigye aayɛ kɛse, na afei (3) botae a sɛ edze sisi w’enyi do a ɔbɛma w’enyigye akɔ do ayɛ kɛse.

5. Sɛ yebenya enyigye a, ebɛnadze na ɔwɔ dɛ yɛdze hɛn adwen si do? (Ɔsɛnkafo 6:9)

⁵ Ɔsɛnkafo 6:9 ma yehu dza obotum aboa hɛn ma yeenya enyigye. (Kenkan.) Obiara a n’enyi gye dza ‘n’enyiwa hu ho’ no, n’enyi sɔ dza ɔwɔ no; bi nye ho kwan a ɔwɔ no seseiara. Naaso, obi a okyin hwehwɛ n’akɔndɔdze no, n’enyi nnsɔ dza ɔwɔ no. Ntsi, ebɛn esuadze na ɔwɔ mu ma hɛn? Sɛ yebenya enyigye a, ɔsɛ dɛ yɛdze hɛn adwen si dza yɛwɔ nye dza yenyim dɛ hɛn nsa botum aka no do.

6. Ebɛn mfatoho na yerubosusu ho, na ebɛnadze na ɔbɛma yehu?

⁶ Aso obotum ayɛ yie dɛ yɛbɛma hɛn enyi asɔ dza yɛwɔ no dada no? Nyimpa pii susu dɛ onnkotum ayɛ yie. Siantsir nye dɛ, aber biara no, yɛpɛ dɛ yesũa anaa hɛn nsa ka biribi fofor. Naaso, nokwasɛm nye dɛ, obotum ayɛ yie dɛ yɛbɛma hɛn enyi asɔ dza yɛwɔ no dada no. Ntsi, ɔwɔ dɛ yɛma hɛn enyi gye ho kwan a yɛwɔ no seseiara no ho. Yebesi dɛn ayɛ dɛm? Hom mma yɛnhwɛ Jesus ne mfatoho a ɔfa talent ho a wɔayɛ ho kyerɛwtohɔ wɔ Matthew 25:14-30 no. Mfatoho yi bɛma yehu mbrɛ yebesi enya enyigye wɔ tsebea a yɛwɔ mu seseiara no mu, na mpo yaama hɛn enyigye no aayɛ kɛse.

7. Kã talent ho mfatoho a Jesus yɛe no ho asɛm tsiabaa.

⁷ Jesus ne mfatoho no mu no, nna owura bi rubotu kwan. Ansaana ɔbɔkɔ no, ɔfrɛɛ no nkowaa, na ɔmaa hɔn mu biara talent dɛ ɔmfa nyɛ edwuma. * Owura no susuu dza nkowaa no mu biara botum ayɛ ho. Ɔmaa akowaa a odzi kan no talent enum, dza otsĩa ebien no talent ebien, na dza otsĩa ebiasa no talent kor. Nkowaa beenu a wodzi kan no yeer hɔnho dze hɔn talent no yɛɛ edwuma. Naaso akowaa a otsĩa ebiasa no dze, ɔammfa nedze no aannyɛ edwuma biara. Dɛm ntsi, owura no yii no edzi.

8. Nna ebɛnadze na obotum ama akowaa a odzi kan wɔ mfatoho no mu no n’enyi aagye?

⁸ Obotum aba dɛ akowaa a odzi kan no enyi gyee dɛ no wura no maa no talent enum. Nna  ɔnnyɛ sika kakraba. Iyi ma yehu dɛ nna owura no wɔ no mu ahotodo papaapa! Na akowaa a otsĩa ebien no so ɛ? Nkyɛ n’abaw mu botum ebu, osiandɛ ɔamma no talent enum dɛ mbrɛ wɔdze maa akowaa a odzi kan no. Naaso, ɔyɛɛ n’adze dɛn?

9. Ebɛnadze na Jesus annkã dɛ akowaa a otsĩa ebien no yɛe? (Matthew 25:22, 23)

⁹ Kenkan Matthew 25:22, 23. Jesus annkã dɛ akowaa a otsĩa ebien no no bo fuwii anaa no werɛ hoow dɛ onyaa talent ebien pɛ. Afei so, Jesus annkã dɛ akowaa no hwinhwinii kãa dɛ: ‘Ebɛnadze ntsi na mo wura maa me talent ebien pɛ? Mara so mobɔ moho mbɔdzen dɛ akowaa a onyaa talent enum no ara! Sɛ mo wura susu dɛ meyɛ obi a mommbɔ moho mbɔdzen a, ɔnodze medze talent ebien no bɔkɔ ekosuma beebi, na mara so maakɛyɛ m’edwuma.’

10. Ebɛnadze na akowaa a otsĩa ebien no dze ne talent no yɛe?

¹⁰ Dɛ mbrɛ akowaa a odzi kan no yɛe no, akowaa a otsĩa ebien no so hun dɛ edwuma a no wura no dze ahyɛ ne nsa no ho hia. Ntsi, ɔyeer noho yɛɛ edwuma maa no wura no. Iyi ntsi, onyaa talent ebien kaa ebien a no wura dze maa no no ho. Owura no tuaa akowaa no kaw wɔ edwumadzen a ɔyɛe no ho. Owura no dzii ehurusi na obuu akowaa no dɛ ɔfata dɛ wɔdze pii ka no ho!

11. Yebesi dɛn ama hɛn enyigye aakɔ do ayɛ kɛse?

¹¹ Dɛmara so na hɛn so, sɛ yɛyer hɛnho yɛ edwuma biara a wɔdze hyɛ nsa wɔ Jehovah no som mu a, hɛn enyigye bɛyɛ kɛse. Fa woho ‘hyɛ’ asɛnka edwuma no mu dzendzenndzen. Afei so, enye asafo no mbɔ mu nyɛ edwuma. (Andw. 18:5; Heb. 10:24, 25) Siesie woho ma asafo nhyiamu biara a ebɔkɔ mbrɛ ɔbɛyɛ a  ibotum ama mbuae a ɔhyɛ nkuran. Esuafo dwumadzi biara a wɔdze bɛma wo wɔ dapɛn finimfin nhyiamu ase no, bu no dɛ no ho hia. Sɛ wɔdze edwuma bi hyɛ wo nsa wɔ asafo no mu a, dzi ho dwuma wɔ ber ano, na yɛ obi a wobotum enya no mu ahotodo. Sɛ wɔdze dwumadzi bi ma wo a, mma nnya adwen dɛ no ho nnhia, ntsi erennsɛɛ wo ber wɔ ho. Bɔ mbɔdzen dɛ ibotu mpon wɔ dza itum yɛ no mu. (Mbɛ. 22:29) Sɛ eyer woho yɛ edwuma biara a wɔdze bɛma wo wɔ Jehovah no som mu a, ibenya nkɔenyim ntsɛntsɛm, na w’enyigye so bɛyɛ kɛse. (Gal. 6:4) Afei so, ɔbɛyɛ mberɛw ama wo dɛ enye hɔn a wonya ɔsom ho kwan a erohwehwɛ no bɔbɔ mu edzi dɛw.—Rom. 12:15; Gal. 5:26.

12. Ebɛnadze na ɔboaa Melissa na Nick ma hɔn enyigye kɔr do yɛɛ kɛse?

¹² Aso ekaa hɛn akyerɛbaa Melissa a nna ɔpɛ dɛ ɔkɔsom wɔ Bethel anaa ɔkɔ Ahendzi Asɛmpakafo Skuul no bi no? Ɔwɔ mu dɛ ne nsa annka dɛm ho kwan a nna ɔrohwehwɛ no dze, naaso ɔkãa dɛ: “Medze moho hyɛɛ akwampaae edwuma no mu fee na medze moho hyɛɛ asɛnka edwuma no n’afã ahorow nyinara mu. Iyi ama m’enyi agye papaapa.” Nick so, aber a wɔammpaw no dɛ asafo mu somfo no, n’abaw mu bui. Naaso, ebɛnadze na ɔboaa no ma otumii gyinaa ano? Ɔkãa dɛ: “Medze m’adwen sii ɔsom ho kwan ahorow a nna ɔwɔ hɔ ma me dɛm aber no do, tse dɛ asɛnka edwuma no a medze moho bɛhyɛ mu na maama mbuae a otu mpon so wɔ asafo nhyiamu ase. Afei so, mehyehyɛɛ Bethel akwambisa krataa, na afe a odzi hɔ no ara no, wɔtoo nsa frɛɛ me.”

13. Sɛ eyer woho wɔ dwumadzi a ɔhyɛ wo nsa seseiara no mu a, ebɛnadze na obefi mu aba? (Ɔsɛnkafo 2:24)

¹³ Sɛ eyer woho wɔ dwumadzi a ɔhyɛ wo nsa seseiara no mu a, ana wɔdze asodzi a no mu yɛ dur bɛhyehyɛ wo nsa daakye? Obotum aba no dɛm, dɛ mbrɛ osii wɔ Nick n’afamu no. Naaso, sɛ ammba no dɛm, dɛ mbrɛ osii wɔ Melissa n’afamu no so a, w’enyi botum akɔ do ara agye kɛse, na eenya akomatɔyamu wɔ dza itum yɛ ma Jehovah no mu. (Kenkan Ɔsɛnkafo 2:24.) Bio so, w’enyi bɛgye kɛse osiandɛ inyim dɛ dza ereyɛ no sɔ hɛn Wura Jesus Christ n’enyi.

14. Ebɛnadze na ɔsɛ dɛ yɛma ɔtsena hɛn adwen mu wɔ Nyankopɔn no som mu botae a yɛdze besisi hɛn enyi do no ho?

¹⁴ Sɛ yɛdze hɛn adwen si dwumadzi a ɔhyɛ hɛn nsa seseiara no do a, aso ɔno kyerɛ dɛ ɔnnsɛ dɛ yɛhwehwɛ ho kwan no dze tserɛw hɛn som mu anaa? Ɔnntse dɛm koraa! Ɔsɛ dɛ yɛdze botae ahorow a ɔbɛma yeetu mpon wɔ asɛnka nye esuafoyɛ edwuma no mu, na ɔbɛma yeetum aboa hɛn nuanom mbarimba na mbaa sisi hɛn enyi do. Sɛ yebotum edu botae a ɔtse dɛm ho a, ɔsɛ dɛ yefi ahobrɛadze mu dze hɛn adwen si afofor a yɛbɔsom hɔn no do sen dɛ yɛdze hɛn adwen besi hɛnankasa hɛnho do.—Mbɛ. 11:2; Andw. 20:35.

15. Ebɛn botae ahorow na obotum aboa wo ma w’enyigye aayɛ kɛse?

¹⁵ Ebɛn botae na ibotum dze esisi w’enyi do? Serɛ Jehovah ma ɔmboa ma hu botae a sɛ edze sisi w’enyi do a ibotum edu ho. (Mbɛ. 16:3; Jas. 1:5) Botae ahorow a yɛkãa ho asɛm wɔ  nkyekyɛmu kor no mu no, ana ibotum dze esi w’enyi do dɛ annyɛ yie koraa no ibodu no mu kor ho? Botae a yɛkãa ho asɛm no nye dɛ ebɔsom dɛ akwampaae boafo anaa daa kwampaaefo, ebɔsom wɔ Bethel anaa ebɔboa ma woeesisi asafo adan. Anaa bi a ibotum esũa kasa fofor mbrɛ ɔbɛyɛ a ebɛtserɛw asɛmpa no mu anaa mpo akɔboa wɔ beebi a wɔkã kasa fofor. Ibotum esũa dza ɔwɔ dɛ eyɛ no ho adze wɔ Nhyehyɛe a Wɔayɛ Ma Yɛde Ayɛ Yehowa Apɛde nwoma no ne tsir 10. Afei so, ibotum nye  w’asafo mu mpanyimfo abɔ ho nkɔmbɔ. * Sɛ eyer woho dɛ ibodu botae a ɔtsetse dɛm ho a, wo nkɔenyim bɛda edzi na w’enyigye so bɛyɛ kɛse.

16. Sɛ seseiara inntum nndu botae pɔtsee bi a edze esi w’enyi do ho a, ebɛnadze na ibotum ayɛ?

¹⁶ Naaso, seseiara sɛ ɔnnyɛ adze a ibotum edu botae ahorow a yɛakã ho asɛm yi mu bi ho so ɛ? Dza obotum aboa wo paa nye dɛ edze botae a ibotum edu ho besi w’enyi do. Hom mma yɛnhwɛ botae ahorow yi mu bi.

17. Dɛ mbrɛ 1 Timothy 4:13, 15 kyerɛ no, onua barimba bi besi dɛn ayer noho dɛ ɔbɛyɛ ɔkyerɛkyerɛfo pa?

¹⁷ Kenkan 1 Timothy 4:13, 15. Sɛ eyɛ onua barimba a woenuma wo a, ibotum etu mpon wɔ mbrɛ isi ma ɔkasa na ekyerɛkyerɛ no mu. Ebɛnadze ntsi a? Osiandɛ sɛ ‘ebɔ mbɔdzen’ wɔ akenkan, ɔkasa nye nkyerɛkyerɛ mu a, w’etsiefo benya do mfaso kɛse. Fa yɛ wo botae dɛ ibosũa ahwehwɛdze biara a wɔakã ho asɛm wɔ Ma W’enyi Nku Akenkan Na Nkyerɛkyerɛ Ho nwomaba no mu no, na fa yɛ edwuma. Sɛ efa ahwehwɛdze kor a gye ber sũa ho adze yie na bɔ mbɔdzen fa yɛ edwuma ber a erema ɔkasa no. Iwie a nna akɔ ahwehwɛdze fofor do. Hwehwɛ nyansahyɛ fi ɔfotufo boafo no hɔ anaa asafo mu mpanyimfo a “wɔyɛ edwuma wɔ asɛm no nye nkyerɛkyerɛ mu no” hɔ. * (1 Tim. 5:17) Mma mmfa w’adwen nnsi mbrɛ ibesi dze esuadze a ɔwɔ nwoma no mu ayɛ edwuma no nkotsee do. Mbom fa si mbrɛ ibesi ahyɛ w’etsiefo hɔn gyedzi dzen na eekenyan hɔn ma wɔdze dza wɔtse no aayɛ edwuma no do. Sɛ eyɛ dɛm a, ibenya enyigye kɛse na hɔn so hɔn enyi bɛgye.

18. Ebɛnadze na ɔbɔboa hɛn ma yeetu mpon dɛ akyerɛkyerɛfo wɔ asɛnka mu?

 ¹⁸ Hɛn nyina wɔ asodzi dɛ yɛkã asɛmpa no na yɛyɛ nkorɔfo esuafo. (Matt. 28:19, 20; Rom. 10:14) Ana ebɛpɛ dɛ itu mpon wɔ dɛm edwumason yi mu? Sɛ irusũa Nkyerɛkyerɛ nwomaba no a, fa botae ahorow pɔtsee bi a ɔbɔboa wo ma edze dza irusũa no ayɛ edwuma sisi w’enyi do. Ibotum so enya nyansahyɛ pii a ɔbɔboa wo wɔ Hɛn Asɛnka Nye Christianfo Asetsena—Nhyiamu Dwumadzi Nwoma no mu. Afei so, ibotum enya bi wɔ mbrɛ yebotum abɔ nkɔmbɔ ho video ahorow a woyi wɔ dapɛn finimfin nhyiamu ase no mu. Sɔ nyansahyɛ ahorow a wɔdze ma no hwɛ na hwɛ dza ibotum dze ayɛ edwuma paa no. Sɛ edze dɛm nyansahyɛ ahorow yi yɛ edwuma a, ebɛyɛ Christiannyi a noho akokwaa na ibenya enyigye kɛse.—2 Tim. 4:5.

19. Ibesi dɛn ada suban ahorow a ɔsɔ Nyankopɔn n’enyi edzi?

¹⁹ Ma ɔntsena w’adwen mu dɛ botae ahorow a no ho hia paa a ibotum dze esisi w’enyi do no, no mu kor nye dɛ ebɛda suban ahorow a ɔsɔ Nyankopɔn n’enyi edzi. (Gal. 5:22, 23; Col. 3:12; 2 Pet. 1:5-8) Ibesi dɛn edu botae a ɔtse dɛm ho? Dɛ nhwɛdo no, yɛmfa no dɛ epɛ dɛ ehyɛ wo gyedzi dzen. Sɛ dɛm a, ibotum akenkan nsɛm a ɔwɔ hɛn nwoma ahorow mu a ɔbɔboa wo ma eehu dza ibotum ayɛ dze ahyɛ wo gyedzi dzen no. Sɛ ehwɛ JW Broadcasting^® dwumadzi no n’afã ahorow bi a ɔma yehu hɛn nuanom binom a wɔdaa gyedzi soronko edzi ber a wohyiaa nsɔhwɛ ahorow no a, ɔbɔboa wo papaapa. Afei hwehwɛ akwan a ibotum afa do esũasua hɔn gyedzi no wɔ wankasa w’asetsena mu.

20. Ebɛnadze na yɛbɛyɛ ama hɛn enyigye aayɛ kɛse na yaanntse nka dɛ hɛn nsa esi famu?

²⁰ Ekyingye biara nnyi ho dɛ hɛn nyinara yenyae a, nkyɛ yɛbɛyɛ pii wɔ Jehovah no som mu akyɛn dza yɛreyɛ no seseiara no. Naaso, Nyankopɔn no wiadze fofor no mu no, yebenya ho kwan ayɛ dza yebotum nyinara asom no. Kesi dɛm aber no, ɔwɔ dɛ yɛma hɛn enyi sɔ ho kwan biara a yɛwɔ no. Sɛ yɛyɛ dɛm a, hɛn enyigye bɛyɛ kɛse na yɛnnkɛtse nka dɛ hɛn nsa esi famu. Dza ɔkyɛn ne nyinara no, yɛdze ayɛyi nye enyimnyamhyɛ bɛbrɛ Jehovah, hɛn enyigye Nyankopɔn no. (1 Tim. 1:11) Dɛm ntsi hom mma hɛn enyi ngye wɔ ho kwan ahorow a yɛwɔ no ho!