1. Sɛ yɛdwendwen ndzɛmba a Jehovah abɔ nyinara ho a, bi a ebɛn nsɛm na yebebisa?

SƐ YƐDWENDWEN amansan kɛse a Jehovah abɔ no ho a, bi a yɛbɛtse nka dɛ mbrɛ ɔdwontofo David tsee nka no. Obisaa Jehovah wɔ mpaabɔ mu dɛ: “Sɛ mohwɛ wo sor, wo nsatseaba ano edwuma, bosoom na nworaba a ahyehyɛ a; dasanyi nye woana, na ɔwo ekaa no? Na nyimpa ba, na w’enyi kuku no ho?” (Ndw. 8:3, 4) Tse dɛ David no, bi a sɛ yɛdwendwen amansan kɛse a Jehovah abɔ no ho na yɛdze hɛnho toto ho a ɔbɛyɛ hɛn nwanwa dɛ Jehovah kaa hɛn koraa mpo. Naaso dɛ mbrɛ yebohu wɔ adzesua yi mu no, nna Jehovah dwen nyimpa a wodzi kan, Adam na Eve ho; nnyɛ ɔno nko, ɔdze hɔn kaa n’ebusua no ho.

2. Nna ebɛn tsirmpɔw na Jehovah wɔ ma Adam na Eve?

² Nna Adam na Eve yɛ Jehovah ne mba a wodzi kan wɔ asaase do; nna Jehovah yɛ hɔn sor Egya a ɔdɔ hɔn. Nna ɔhwɛ kwan dɛ ne mba yi bɛyɛ setsie ama no na wɔnye no aabɔ mu ayɛ edwuma. Nyankopɔn kãa kyerɛɛ hɔn dɛ: “Hom nwo, na wɔndɔr, na wɔnhyɛ asaase mã, na wɔnhom do.” (Gen. 1:28) Nna ɔpɛ dɛ wɔwo mba na wɔhwɛ asaase no do. Sɛ Adam na Eve yɛɛ setsie maa Jehovah na wɔbɔɔ hɔn bra ma ɔnye tsirmpɔw a ɔwɔ ma hɔn no hyiae a, nkyɛ wɔnye hɔn mba bɛyɛ Nyankopɔn n’ebusua no mufo afebɔɔ.

3. Ebɛnadze ntsi na yebotum akã dɛ Jehovah maa Adam na Eve gyinabew a enyidzi wɔ mu wɔ n’ebusua no mu?

³ Nna Adam na Eve wɔ gyinabew a enyidzi wɔ mu wɔ Jehovah n’ebusua no mu. Dɛ mbrɛ wɔayɛ ho kyerɛwtohɔ wɔ Ndwom 8:5 no, David kãa dɛm asɛm yi faa nyimpa a Jehovah bɔɔ hɔn no ho. Ɔkãa dɛ: “Ɔwo ama aka no kuma ma ɔnye  [abɔfo] asɛ, na edze enyimnyam na enyidzi abɔ no abɔtsir.” Nokwasɛm nye dɛ dza abɔfo tum yɛ, tum nye nyansa a wɔwɔ no, nnyɛ dɛm na Jehovah dze maa nyimpa. (Ndw. 103:20) Naaso nna nyimpa ba famu kakraabi kyɛn sunsum abɔdze a wɔwɔ tum yi. Asɛm yi yɛ enyika! Ɔda edzi dɛ Jehovah maa hɛn awofo a wodzi kan no ahyɛse pa a ɔyɛ enyigye.

4. Ebɛn asɛm baa ho kwan a nna Adam na Eve wɔ wɔ Jehovah n’ebusua mu no ho? Ebɛnadze na yebosusu ho wɔ adzesua yi mu?

 ⁴ Awerɛhosɛm nye dɛ Adam na Eve hweer ho kwan a nna wɔwɔ wɔ Jehovah n’ebusua mu no. Na dɛ mbrɛ yebohu wɔ adzesua yi mu no, iyi dze nsunsuando bɔn aba hɔn asefo do. Naaso tsirmpɔw a Jehovah wɔ ma adasamba no nnsesae. Ɔpɛ dɛ adasamba a wɔyɛ setsie ma no no bɛyɛ ne mba daa. Hom mma yendzi kan nsusu kwan a Jehovah edzi hɛn nyi no ho. Afei, yɛbɔhwɛ dza yebotum ayɛ no ndɛ dze akyerɛ dɛ yɛpɛ dɛ yɛbɛka Nyankopɔn n’ebusua no ho. Ewiei koraa no, yɛbɔhwɛ nhyira a Jehovah ne mba a wɔwɔ asaase do no nsa bɛka no afebɔɔ.

5. Bɔ a Nyankopɔn bɔɔ hɛn wɔ no su do no, yebesi dɛn akyerɛ dɛ hɛn enyi sɔ?

⁵ Jehovah bɔɔ hɛn wɔ no su do dze dzii hɛn nyi. (Gen. 1:26, 27) Osiandɛ Nyankopɔn bɔɔ hɛn wɔ no su do ntsi, yebotum ada no su ahorow a ɔyɛ ahomka no bi edzi. No su no bi nye ɔdɔ, ayamuhyehye, no nokwardzi nye ne tsenenee. (Ndw. 86:15; 145:17) Sɛ yɛda dɛm su yi edzi a, yɛdze hyɛ Jehovah enyimnyam na yɛkyerɛ dɛ hɛn enyi sɔ dza ɔayɛ ama hɛn no. (1 Pet. 1:14-16) Sɛ yɛbɔ hɛn bra ma ɔsɔ hɛn sor Egya no enyi a, hɛn enyiwa gye na yenya akomatɔyamu. Osiandɛ yɛwɔ Jehovah no su no bi ntsi, yebotum abɛyɛ nyimpa a Nyankopɔn hwehwɛ wɔ n’ebusua mu no.

6. Aber a Jehovah risiesie asaase no, ebɛnadze na ɔyɛe dze kyerɛɛ dɛ odzi nyimpa nyi?

⁶ Jehovah siesiee fie fɛɛfɛw maa hɛn. Jehovah siesiee asaase no maa adasamba ber tsentsen koraa ansaana ɔrobɔ nyimpa. (Job 38:4-6; Jer. 10:12) Osiandɛ Jehovah dwen hɛnho na ne yamu ye ntsi, ɔbɔɔ ndzɛmba pii a ɔbɛma hɛn enyi agye. (Ndw. 104:14, 15, 24) Nyankopɔn gyee ber dwendween ndzɛmba a ɔbɔe no ho na ‘ohun dɛ oye.’ (Gen. 1:10, 12, 31) Ɔmaa nyimpa “tum” wɔ n’abɔdze fɛɛfɛw a ɔwɔ asaase do nyinara do. Ɔyɛɛ dɛm dze kyerɛɛ dɛ odzi nyimpa nyi. (Ndw. 8:6) Nyankopɔn ne tsirmpɔw nye dɛ nyimpa a wodzi mũ bɔhwɛ ndzɛmba fɛɛfɛw a ɔabɔ no do afebɔɔ. Ana eda Jehovah ase dabaa wɔ asɛm a ɔtse dɛm ho?

7. Ebɛn kwan do na Joshua 24:15 da no edzi dɛ yɛwɔ ho kwan a yetum dze paw dza yɛpɛ?

⁷ Jehovah ama hɛn ho kwan a yetum dze paw dza yɛpɛ. Yebotum apaw dza yɛdze hɛn asetsena bɛyɛ. (Kenkan Joshua 24:15.) Sɛ yesi gyinae dɛ yɛbɔsom hɛn Nyankopɔn a ɔwɔ ɔdɔ no a, n’enyi gye. (Ndw. 84:11; Mbɛ. 27:11) Yebotum dze ho kwan a ɔtse dɛm no edzi dwuma yie wɔ akwan pii do. Hom mma yɛnhwɛ nhwɛdo a Jesus yɛe wɔ iyi ho.

8. Ho kwan a nna Jesus wɔ dɛ ɔpɛpaw dza ɔbɛyɛ no, ɔdze dzii dwuma dɛn?

⁸ Sɛ yesi gyinae dɛ yɛdze afofor hɔn ehiadze bedzi kan a, nna yerusũasua Jesus. Da bi, nna Jesus nye n’asomafo no aberɛ papaapa ma ntsi wɔkɛhyɛɛ beebi dɛ wɔrekɛgye hɔn ahom kakra. Naaso woenntum anngye hɔn ahom. Nyimpakuw bi hun hɔn; nna wɔpɛ paa dɛ Jesus kyerɛkyerɛ hɔn. Jesus no bo emmfuw hɔn, na mbom ne yamu hyehyee no maa hɔn. Ɔbaa no dɛm no ebɛnadze na ɔyɛe? “Ɔhyɛɛ ase kyerɛkyerɛɛ hɔn ndzɛmba pii.” (Mark 6:30-34) Sɛ yesũasua Jesus na yɛdze hɛn ber nye hɛn ahoɔdzen boa afofor a, nna yɛrehyɛ  hɛn sor Egya no enyimnyam. (Matt. 5:14-16) Afei so, yɛma Jehovah hu dɛ yɛpɛ dɛ yɛbɛka n’ebusua no ho.

9. Ebɛnadze na ɔsɛ dɛ awofo ma ɔtsena hɔn adwen mu?

⁹ Jehovah dze ho kwan ama nyimpa dɛ wɔnwo mba, na ɔama hɔn asodzi so dɛ wɔnkyerɛkyerɛ hɔn ma wɔndɔ no na wɔnsom no. Sɛ eyɛ ɔwofo a, ana w’enyi sɔ dɛm ho kwan soronko yi? Ɔwɔ mu dɛ Jehovah ama abɔfo ho kwan ma wotum yɛ ndzɛmba pii dze, naaso ɔamma hɔn ho kwan a wɔdze bɔwo. Dɛm ntsi sɛ eyɛ ɔwofo a, ma w’enyiwa nsɔ ho kwan a ewɔ dɛ ebɛtsetse wo mba no. Wɔdze ho kwan bi a ɔsom bo ahyɛ awofo nsa dɛ wɔntsetse hɔn mba wɔ “[Jehovah] setsie nye kasakyerɛ mu.” (Eph. 6:4; Deut. 6:5-7; Ndw. 127:3) Nyankopɔn n’ahyehyɛdze no nam akwan ahorow do roboa awofo ma woeetum atsetse hɔn mba. Ɔnam hɛn nwoma, video, ndwom nye wɛbsaet no do na ɔyɛ dɛm. Ɔda edzi kofee dɛ hɛn sor Egya no nye ne Ba no nyinara dɔ mbofra. (Luke 18:15-17) Sɛ awofo dze hɔnho to Jehovah do, na wɔyɛ dza wobotum biara tsetse hɔn mba a wɔsom bo no a, wɔma Jehovah n’enyi gye. Nkyii so, nna wɔroboa hɔn mba no ma woeenya enyidado dɛ wobotum abɛka Jehovah n’ebusua no ho afebɔɔ!

10-11. Ebɛnadze na Jehovah nam werdam no do ama yeenya?

¹⁰ Jehovah dze ne Ba a ɔsom no bo no mae mbrɛ ɔbɛyɛ a yebotum abɛka Nyankopɔn n’ebusua no ho bio. Dɛ mbrɛ yehunii wɔ  nkyekyɛmu 4 no mu no, Adam na Eve hweer ho kwan a nna wɔwɔ wɔ Jehovah n’ebusua mu no, na iyi maa ho kwan a nna hɔn mba so benya no bɔɔ hɔn. (Rom. 5:12) Adam na Eve hyɛɛ da ara yɛɛ Nyankopɔn do asoɔdzen, ntsi nna wɔfata dɛ oyi hɔn fi n’ebusua no mu. Na hɔn mba no so ɛ? Jehovah fii ɔdɔ mu yɛɛ nhyehyɛɛ mbrɛ ɔbɛyɛ a ɔbɛgye Adam na Eve hɔn asefo a wɔbɛyɛ setsie ama no no aka n’ebusua no ho. Ɔnam ne Ba a ɔwoo no kor, Jesus Christ, n’afɔrbɔ no do na ɔyɛɛ iyi. (John 3:16; Rom. 5:19) Osian Jesus n’afɔrbɔ no ntsi, Nyankopɔn afa nyimpa 144,000 a wokura hɔn emudzi mu no dɛ ne mba.—Rom. 8:15-17; Nyi. 14:1.

¹¹ Bio so, nyimpa anokwafo ɔpepem pii reyɛ Nyankopɔn n’apɛdze. Na wɔwɔ enyidado dɛ sɛ wodzi nokwar wɔ nsɔhwɛ a otwa tun no mu wɔ Mfrenhyia Apem no n’ewiei a, wɔbɛba abɛka Nyankopɔn n’ebusua no ho afebɔɔ. (Ndw. 25:14; Rom. 8:20, 21) Osiandɛ wɔwɔ dɛm enyidado no ntsi, seseiara mpo wɔahyɛ ase refrɛ Jehovah, hɔn Bɔfo no dɛ hɔn “Egya.” (Matt. 6:9) Hɔn a wobenyan hɔn no so benya ho kwan esũa Jehovah n’apɛdze ho adze. Hɔn a wɔbɛyɛ setsie ama no no, ewiei koraa no ɔdze hɔn so bɛka n’ebusua no ho.

12. Ebɛn asɛmbisa na yerubosusu ho?

¹² Dɛ mbrɛ yeehu no, Jehovah ayɛ ndzɛmba pii dze akyerɛ dɛ odzi adasamba nyi. Oedzi kan afa hɔn a wɔasera hɔn no dɛ ne mba na ɔama “nyimpadodow kɛse” no so ho kwan a wobotum abɛyɛ ne mba korakora wɔ wiadze fofor no mu. (Nyi. 7:9) Ndɛ, ebɛnadze na yebotum ayɛ dze akyerɛ Jehovah dɛ yɛpɛ dɛ yɛbɛka n’ebusua no ho afebɔɔ?

13. Sɛ yebotum abɛka Jehovah n’ebusua no ho a, ebɛnadze na ɔsɛ dɛ yɛyɛ? (Mark 12:30)

¹³ Fi w’akoma nyinara mu som Jehovah fa kyerɛ dɛ edɔ no. (Kenkan Mark 12:30.) Nyankopɔn efi ayamuyie mu ama hɛn akyɛdze pii. Akyɛdze akɛse a ɔdze ama hɛn no, no mu kor nye ho kwan a yɛwɔ dɛ yɛbɔsom no. Dza yɛbɛyɛ dze akyerɛ dɛ yɛdɔ Jehovah nye dɛ “yebedzi n’ahyɛdze do.” (1 John 5:3) N’ahyɛdze no mu kor a ɔpɛ dɛ yedzi do nye dza  ne Ba Jesus dze mae dɛ yɛnyɛ nkorɔfo esuafo na yennuma hɔn no. (Matt. 28:19) Afei so, ɔhyɛɛ hɛn dɛ yɛndodɔ hɛnho. (John 13:35) Jehovah bɛgye hɔn a wɔyɛ setsie ma no no aka n’ebusua no ho.—Ndw. 15:1, 2.

14. Yebesi dɛn ada ɔdɔ edzi akyerɛ afofor? (Matthew 9:36-38; Romefo 12:10)

¹⁴ Da ɔdɔ edzi kyerɛ afofor. Jehovah no su tsitsir nye ɔdɔ. (1 John 4:8) Ansaana yerubohu Jehovah mpo no, nna ɔdɔ hɛn dada. (1 John 4:9, 10) Sɛ yɛda ɔdɔ edzi kyerɛ afofor a, nna yerusũasua no. (Eph. 5:1) Akwan pa a yebotum afa do ada ɔdɔ edzi akyerɛ afofor no mu kor nye dɛ yɛbɔboa hɔn ma woeesũa Jehovah ho adze ansaana aka ekyir dodow. (Kenkan Matthew 9:36-38.) Sɛ yɛyɛ dɛm a, yebotum aboa hɔn ma woeehu dza ɔsɛ dɛ wɔyɛ mbrɛ ɔbɛyɛ a Nyankopɔn bɛgye hɔn aka n’ebusua no ho. Ɔsɛ dɛ yɛkɔ do da ɔdɔ na obu edzi kyerɛ osuanyi bi wɔ n’enuma ekyir. (1 John 4:20, 21) Iyi hwehwɛ dɛ yɛyɛ dɛn? Adze kor nye dɛ ɔsɛ dɛ yɛgye no dzi dɛ ɔwɔ adwen pa. Dɛ nhwɛdo no, sɛ ɔyɛ biribi na yɛanntse ase a, ɔnnsɛ dɛ yenya adwen dɛ adwembɔn anaa pɛsɛankonya ntsi na ɔyɛɛ dɛm. Mbom ɔsɛ dɛ yedzi no nyi, na yebu no dɛ ɔkyɛn hɛn.—Kenkan Romefo 12:10; Phil. 2:3.

15. Woananom na ɔsɛ dɛ yɛda ehumbɔbɔr nye ayamuyie edzi kyerɛ hɔn?

¹⁵ Da ehumbɔbɔr na ayamuyie edzi kyerɛ nyimpa nyina. Sɛ yebotum abɛka hɔn a wobotum afrɛ Jehovah dɛ hɔn Egya no ho afebɔɔ a, ɔsɛ dɛ yɛdze Nyankopɔn n’Asɛm no bɔ hɛn bra. Dɛ nhwɛdo no, Jesus kyerɛkyerɛɛ dɛ yɛnda ehumbɔbɔr na ayamuyie edzi nkyerɛ nyimpa nyina a hɛn atamfo mpo ka ho. (Luke 6:32-36) Ɔtɔ da a, obotum ayɛ dzen ama hɛn dɛ yɛbɛyɛ dɛm. Sɛ dɛm a, ɔsɛ dɛ yɛbɔ mbɔdzen dɛ yebosũasua Jesus. Sɛ yɛyɛ dza yebotum biara yɛ setsie ma Jehovah na yesũasua Jesus a, yɛma hɛn sor Egya no hu dɛ yɛpɛ dɛ yɛbɛka n’ebusua no ho afebɔɔ.

16. Yɛbɛyɛ dɛn abɔ dzin pa a Jehovah n’ebusua no wɔ no ho ban?

¹⁶ Bɔ dzin pa a Jehovah n’ebusua no wɔ no ho ban. Wɔ ebusua mu no ɔnnyɛ dzen koraa dɛ abofra bi bosũasua dza no nua panyin bɛyɛ no. Sɛ no nua panyin no dze Bible mu ngyinadonsɛm bɔ ne bra a, ɔbɛyɛ nhwɛdo pa ama no. Naaso sɛ ɔyɛ ndzɛmba bɔn a, annhwɛ a kakraba no so bedzi n’ekyir. Dɛmara na ɔtse wɔ Jehovah n’ebusua no so mu. Sɛ Christiannyi nokwafo bi bɛyɛ ɔwaafo anaa ɔbɔ ɔbrakyew na ɔyɛ ndzɛmba a ɔmmfata a, annhwɛ a afofor bosũasua ne ndzeyɛɛbɔn no. Hɔn a wɔyɛ dɛm no sɛɛ dzin pa a Jehovah n’ebusua no wɔ no. (1 Thess. 4:3-8) Ɔnnsɛ dɛ yesũasua hɔn a wɔyɛ nhwɛdo bɔn no, anaa yɛyɛ biribiara a ɔbɔtwe hɛn efi hɛn sor Egya a ɔdɔ hɛn no ho.

17. Ebɛn adwen na ɔnnsɛ dɛ yenya, na ebɛnadze ntsi a?

¹⁷ Fa woho to Jehovah do na nnyɛ honam afamu ndzɛmba do. Jehovah abɔ hɛn anohoba dɛ sɛ yɛdze n’Ahendzi no dzi kan na yɛdze ne tsenenee gyinapɛn bɔ hɛn bra a, ɔbɛma hɛn nsa aka dza yebedzi, dza yɛbɛhyɛ nye beebi a yɛbɛda. (Ndw. 55:22; Matt. 6:33) Sɛ yɛwɔ dɛm anohoba yi mu gyedzi a, yerinnya adwen da dɛ ahonyadze a wiadze no hyɛ ho nkuran no na ɔbɛma yenya bambɔ nye enyigye a ɔtsena hɔ daa. Yenyim dɛ sɛ yɛyɛ Jehovah n’apɛdze nkotsee a na yebenya asomdwee mapa. (Phil. 4:6, 7) Sɛ yɛwɔ sika a yebotum dze atotɔ ndzɛmba pii mpo a, ɔsɛ dɛ yesusu ho hwɛ, sɛ yɛwɔ mber nye ahoɔdzen a yɛdze dɛm ndzɛmba no bedzi dwuma na yaahwɛ do yie a. Ana obotum aba dɛ yɛdze hɛn werɛ nyinara bɛhyɛ honam afamu ndzɛmba a yɛwɔ no mu? Ɔsɛ dɛ yɛkaa dɛ Jehovah hwɛ kwan dɛ yɛbɛyɛ edwuma a ɔdze ama hɛn wɔ n’ebusua  mu no. Dɛm ntsi ɔnnsɛ dɛ yɛma kwan ma biribiara twetwe hɛn adwen koraa. Yɛmmpɛ dɛ yɛyɛ hɛn adze tse dɛ aberantsɛ no a ɔpoow ho kwan a onyae dɛ nkyɛ obotum asom Jehovah na ɔdze no aka n’ebusua no ho no. Aberantsɛ no poow dɛm ho kwan no osiandɛ nna ɔdze no werɛ nyina ahyɛ ndzɛmba a ɔwɔ no mu!—Mark 10:17-22.

18. Ebɛn enyidzi kɛse nye nhyira na hɔn a wɔyɛ setsie no benya no afebɔɔ?

¹⁸ Jehovah bɛma nyimpa a wɔyɛ setsie no enyidzi a ɔkyɛn biara. Ɔnye dɛ wobenya ho kwan adɔ no na wɔaasom no afebɔɔ! Hɔn a wɔwɔ enyidado dɛ wɔbɛtsena asaase yi do no benya ho kwan ahwɛ asaase fɛɛfɛw a Jehovah siesiee no yie maa hɔn no do. Ɔnnkɛkyɛr, Nyankopɔn n’Ahendzi no besiesie asaase no nye biribiara a ɔwɔ do no ma wɔaayɛ kama. Gyinae a Adam na Eve sii dɛ wobefi Jehovah n’ebusua no mu no dze ɔhaw pii aba; Jesus beyi dɛm ɔhaw no nyinara efi hɔ koraa. Jehovah benyan nyimpa ɔpepem pii ma wɔaabɛtsena ase daa wɔ Paradise asaase do; dɛm aber no wobenya apɔwmudzen a odzi mũ. (Luke 23:42, 43) Aber a Jehovah n’asomfo a wobenya asaase no edzi no abɛyɛ nyimpa a wodzi mũ no, hɔn mu biara benya “enyimnyam na enyidzi” a David kãa ho asɛm no.—Ndw. 8:5.

19. Ebɛnadze na ɔsɛ dɛ yɛma ɔtsena hɛn adwen mu?

¹⁹ Sɛ eka “nyimpadodow kɛse” no ho a, ewɔ enyidado papabi. Nyankopɔn dɔ wo, na ɔpɛ dɛ ebɛka n’ebusua no ho. Dɛm ntsi yɛ dza ibotum biara dɛ ebɔsɔ n’enyi. Ma Nyankopɔn n’anohoba ahorow no ntsena w’adwen na w’akoma mu da biara da. Ma ho kwan a enya dɛ erosom hɛn sor Egya a ɔwɔ ɔdɔ no nsom bo mma wo na ma w’enyiwa nsɔ ho kwan a ibenya dze eyi no ayɛw daa no!