1. Dɛ mbrɛ 1 Thessalonicafo 5:11 ma yehu no, ebɛn edwuma na hɛn nyina reyɛ?

 ANA woesi Ahendzi Asa ama hom anaa woesiesie dza hom wɔ no pɛn? Sɛ dɛm a, bi a eda ho ara kaa da a odzi kan a ekɔr asafo nhyiamu wɔ dɛm Ahendzi Asa no do no. Ekyingye biara nnyi ho dɛ edaa Jehovah ase paa. Bi a w’enyi gyee araa ma w’enyi tsetsɛwee ma nna ɔyɛ dzen ma wo mpo dɛ ebɔtow ndwom a wɔdze rehyɛ adzesua no ase no. Hɛn Ahendzi Asa ahorow a ɔyɛ fɛw no hyɛ Jehovah enyimnyam. Naaso, edwuma fofor bi wɔ hɔ, sɛ yɛdze hɛnho hyɛ mu a, ɔhyɛ Jehovah enyimnyam kɛse. Dɛm edwuma no som bo koraa kyɛn adansi edwuma. Ɔyɛ ebɛn edwuma a? Ɔnye dɛ yɛbɔtow hɛn nuanom a yɛnye hɔn hyiamu som no hɔn gyedzi do. Nna dɛm edwuma yi na ɔwɔ ɔsomafo Paul n’adwen mu aber a ɔkaa asɛm a ɔwɔ 1 Thessalonicafo 5:11 no. (Kenkan.) Dɛm kyerɛwsɛm yi ara so na adzesua yi gyina do.

2. Ebɛnadze na yebosusu ho wɔ adzesua yi mu?

² Nokwasɛm nye dɛ, nna ɔsomafo Paul yɛ obi a otum hyɛ enuanom nkuran na ɔtow hɔn gyedzi do paa. Nna ɔwɔ ayamuhyehye ma enuanom. Adzesua yi mu no, yɛbɔhwɛ ndzɛmba ahorow a ɔyɛe dze boaa no nuanom ma (1) wogyinaa nsɔhwɛ ano, (2) wɔnye hɔnho tsenaa asomdwee mu, na (3) wɔhyɛɛ gyedzi a wɔwɔ wɔ Jehovah mu no dzen. Hom mma yɛnhwɛ mbrɛ yebesi esuasua no na hɛn so yaatow hɛn nuanom hɔn gyedzi do ndɛ.​—1 Cor. 11:1.

3. Nna ebɛn adwen na Paul wɔ wɔ edwuma nye Nyankopɔn no som ho?

³ Nna Paul dɔ enuanom no papaapa. Nna ɔafa tsebea a no mu yɛ dzen mu pɛn. Dɛm ntsi sɛ nna enuanom no rihyia nsɔhwɛ a,  nna obotum ada ayamuhyehye nye tsema edzi akyerɛ hɔn. Ber bi, Paul noho sika nyina sae, dɛm ntsi nna ɔsɛ dɛ ɔyɛ edwuma dze hwɛ noho nye hɔn a wɔka noho no. (Andw. 20:34) Nna ɔyɛ ntamadan ama oeenya biribi dze ahwɛ noho. Aber a ɔkɔr Corinth no, odzii kan nye Aquila na Priscilla bɔɔ mu yɛɛ ntamadan edwuma. Naaso, nna odu “ahomgyeda” biara a, ɔka asɛm no kyerɛ Jewfo na Greekfo. Ber a Silas na Timothy baa Paul ne nkyɛn no, ɔhyɛɛ ase dze ne ber nyina kaa asɛm no. (Andw. 18:2-5) Paul amma no werɛ eemmfir botae a nna osi n’enyi do wɔ n’asetsena mu no. Ɔno nye dɛ ɔbɔsom Jehovah. Paul yeer noho wɔ asɛnka edwuma no mu na ɔyɛɛ edwuma so dze hwɛɛ noho. Dɛm ntsi ɔhyɛɛ enuanom no nkuran dɛ hɔn so wɔnyɛ dɛmara. Ɔkaa kyerɛɛ hɔn dɛ, ɔnnsɛ dɛ wɔma asetsena mu dadwen nye hɔn ebusua a wɔbɔhwɛ hɔn no hyɛ hɔn do ma wogyaa ndzɛmba a no ho hia no yɛ. Dɛm ndzɛmba yi nye biribiara a ɔfa Jehovah no som ho.​—Phil. 1:10.

4. Ebɛn kwan do na Paul na Timothy boaa enuanom no ma wogyinaa ɔsoɛrtsia ano?

⁴ Aber a wɔtseew Thessalonica asafo no, annkyɛr na enuanom no hyiaa ɔsoɛrtsia a no mu yɛ dzen. Nna nyimpakuw bi a hɔn enyi aber kɔɔ rohwehwɛ Paul na Silas akyer hɔn. Na hɔn nsa annka hɔn no, wotwuuw “enuanom no bi adze kɛmaa kurow no mu etsitsir no.” Wɔdze hɔn dur hɔ no, wɔtseatseaa mu kaa dɛ, dɛm mbarimba yi “yɛ dza otsia Caesar mbransɛm no.” (Andw. 17:6, 7) Aber a enuanom a wɔaba asafo no mu fofor no hun dɛ kurow no mufo rosoɛr etsia hɔn no, ɔwodze hwɛ mbrɛ nna hɔn akoma botu afa. Nkyɛ iyi botum ama hɔn gyedzi abrɛ adze, naaso nna Paul mmpɛ dɛ biribi a ɔtse dɛm to hɔn. Nna ɔsɛ dɛ Paul na Silas fi kurow no mu, dɛm ntsi wɔyɛɛ nhyehyɛɛ a ɔbɛma asafo fofor no akɔ do ayɛ dzen. Paul kaa kyerɛɛ Thessalonicafo no dɛ: “Yɛsomaa Timothy a ɔyɛ hɛn nua . . . dɛ ɔmbɛhyɛ hom dzen, na ɔnkyekye hom werɛ wɔ gyedzi no ho; amma amandzehu yi eennhihim obiara.” (1 Thess. 3:2, 3) Ɔda edzi dɛ nna Timothy nyim ɔsoɛrtsia n’adzeban, osiandɛ aber a ɔwɔ no kurow mu Lystra no, ohyiaa tsebea a ɔtse dɛm. Ohun mbrɛ Paul sii hyɛɛ enuanom no nkuran. Nna Timothy ehu mbrɛ Jehovah esi aboa enuanom a wɔwɔ Lystra no, ntsi nna obotum ahyɛ enuanom a wɔwɔ Thessalonica no so nkuran dɛ Jehovah bɔboa hɔn.​—Andw. 14:8, 19-22; Heb. 12:2.

5. Ebɛnadze na asafo mu panyin bi yɛe dze boaa onua bi a wɔfrɛ no Bryant?

⁵ Ebɛnadze bio na Paul yɛe dze hyɛɛ enuanom no nkuran? Aber a Paul na Barnabas sanee kɔr Lystra, Iconium, nye Antioch no, ‘wɔhyehyɛɛ mpanyimfo wɔ asafo biara mu.’ (Andw. 14:21-23) Ɔda edzi dɛ dɛm mpanyimfo no hyɛɛ enuanom no nkuran dɛ mbrɛ asafo mu mpanyimfo yɛ no ndɛ no. Hom mma yɛnhwɛ asɛm bi a onua bi a wɔfrɛ no Bryant kae. Ɔkaa dɛ: “Aber a midzii mfe 15 no, me papa gyaa hɛn hɔ, na wotuu me maame so fii asafo no mu. Iyi maa m’abaw mu bui, na metsee nka dɛ aka mankotsee.” Ebɛnadze na ɔboaa Bryant ma ogyinaa tsebea a no mu yɛ dzen yi ano? Ɔkaa dɛ: “Sɛ mokɔ asafo nhyiamu a, nna asafo mu panyin bi a wɔfrɛ Tony nye me bɔ nkɔmbɔ. Nna ɔnnyɛ asafo nhyiamu ase nkotsee na ɔnye me bɔ nkɔmbɔ. Ɔkaa Jehovah n’asomfo binom a wohyiaa nsɔhwɛ naaso nna wɔda ho ara wɔ enyigye ho asɛm kyerɛɛ me. Ɔnye me kenkaan Ndwom 27:10. Afei so, nna ɔtaa ka Hezekiah ho asɛm kyerɛ me. Ne papa annyɛ nhwɛdo pa amma no dze, naaso ɔkɔr do soom Jehovah.” Dza asafo mu panyin no yɛe no boaa Bryant dɛn? Bryant toaa do dɛ: “Tony hyɛɛ me nkuran, na iyi boaa me ma owiee ase no, medze moho hyɛɛ ber nyina som edwuma no mu.” Asafo mu mpanyimfo, ɔsɛ dɛ hom yɛ krado aber nyina dɛ hom bɔboa enuanom a wɔtse dɛ Bryant no. Bi a  wobehia “asɛmpa” a obotum ahyɛ hɔn nkuran.​—Mbɛ. 12:25.

6. Ebɛn kwan do na Paul dze Jehovah n’asomfo binom hɔn nhwɛdo hyɛɛ no nuanom nkuran?

⁶ Paul kaa kyerɛɛ ne mfɛfo agyedzifo no dɛ, Jehovah maa n’asomfo a wɔyɛ “adasefo mununkum” no ahoɔdzen ma wotumii gyinaa ɔhaw a wohyiae no ano. (Heb. 12:1) Paul hun dɛ Jehovah n’asomfo a wotumii gyinaa nsɔhwɛ ahorow ano mber bi a etwa mu no, hɔn nhwɛdo botum ahyɛ enuanom no nkuran na aboa hɔn ma wɔdze hɔn adwen eesi “Nyankopɔn tseasefo kurow no” do. (Heb. 12:22) Ndɛ so dɛmara na ɔtse. Sɛ yɛkenkan mbrɛ Jehovah sii boaa Gideon, Barak, David, Samuel, nye afofor ho asɛm wɔ Bible mu a, ɔhyɛ hɛn nkuran paa. (Heb. 11:32-35) Sɛ yɛkenkan mbrɛ Jehovah si boa n’asomfo ndɛ no ho asɛm a, ɔhyɛ hɛn nkuran paa. Mpɛn pii no, enuanom kyerɛw nkrataa kɔ hɛn wiadze nyina edwumayɛbea tsir. Dza dɛm enuanom yi ka nye dɛ Jehovah n’asomfo binom hɔn asetsena mu nsɛm a wɔkenkanee no ahyɛ hɔn gyedzi dzen paa.

7. Paul n’afotu a ɔwɔ Romefo 14:19-21 no, ebɛnadze na isua fi mu?

⁷ Sɛ yɛyɛ ndzɛmba a ɔdze asomdwee ba asafo no mu a, nna yɛrehyɛ hɛn nuanom dzen. Yɛyɛ nyimpa yi ara dze, ɔsor mbrɛ obiara si yɛ n’adze, naaso onnyi dɛ iyi sɛɛ koryɛ a ɔwɔ hɛn ntamu no. Sɛ obi reyɛ biribi na onntsia Bible mu akwankyerɛ a, onnyi dɛ yɛhyɛ no dɛ ɔnyɛ dza yɛpɛ. Mfatoho bi nye yi. Nna Jewfo nye Amanamamfo na wɔwɔ Rome asafo no mu. Nna Moses Mbra no bra edziban ahorow bi, naaso ber a Mbra no baa ewiei no, nna ahyɛdze a ɔtse dɛm no nnyɛ edwuma bio. (Mark 7:19) Ofi dɛm aber no rokɔ no, nna Jewfo a wɔabɛyɛ Christianfo no botum edzi edziban biara a wɔpɛ. Naaso, nna hɔn mu binom wɔ hɔ a, ɔyɛ dzen ma hɔn dɛ wɔbɛyɛ dɛm. Dɛm asɛm yi maa mpaapaamu baa asafo no mu. Paul maa wohun hia a ohia dɛ wɔma asomdwee tsena asafo no mu. Ɔkaa dɛ: ‘Oye dɛ inndzi edziban anaa ennom wenyin anaa ennyɛ dza ɔbɛma wo nua efintsiw.’ (Kenkan Romefo 14:19-21.) Paul nam asɛm a ɔkaa yi do boaa ne mfɛfo agyedzifo ma wohun dɛ, dɛm asɛm yi botum asɛɛ koryɛ a ɔwɔ enuanom ntamu nye asafo no mu. Iyi da nkyɛn a, nna ɔayɛ krado dɛ ɔbɛyɛ nsesa ahorow bi mbrɛ ɔbɛyɛ a ɔronnto obiara fintsidua. (1 Cor. 9:19-22) Hɛn so, sɛ yebotum ahyɛ hɛn nuanom nkuran na yaama asomdwee atsena asafo no mu a, ber a onua bi esi gyinae a onntsia Bible akwankyerɛ no, onnyi dɛ yɛkasa tsia no.

8. Aber a asɛnhia bi soɛree a nna obotum asɛɛ asomdwee a ɔwɔ asafo no mu no, ebɛnadze na Paul yɛe?

⁸ Paul yɛɛ nhwɛdo pa a yebotum esuasua. Nyimpa binom a ɔnye hɔn annyɛ adwen wɔ nsɛm bi a no ho hia ho no, ɔnye hɔn tsenaa asomdwee mu. Dɛ nhwɛdo no, nna tsetse Christianfo binom awe ataado dɛ Amanamamfo a wɔabɛyɛ Christianfo no, ɔwɔ dɛ wotwa hɔn twatsia. Nna hɔn adwen nye dɛ wɔmmpɛ dɛ Jewfo no kasa tsia Amanamamfo no. (Gal. 6:12) Paul nye hɔn annyɛ adwen koraa. Naaso dɛ nkyɛ ɔbɛhyɛ hɔn dzendzenndzen dɛ wɔngye dza ɔreka no nto mu no, ɔdze asɛm no kɛdaan asomafo no nye mpanyimfo a wɔwɔ Jerusalem no. (Andw. 15:1, 2) Dza Paul yɛɛ no boaa enuanom no ma wɔdze asomdwee na enyigye tsenaa asafo no mu.​—Andw. 15:30, 31.

9. Yebesi dɛn esuasua nhwɛdo a Paul yɛe no?

⁹ Sɛ asɛm bi soɛr a obotum asɛɛ asomdwee a ɔwɔ asafo no mu a, ɔwɔ dɛ yɛhwehwɛ akwankyerɛ fi enuanom a Jehovah apaw hɔn dɛ wondzi ndzɛmba enyim wɔ asafo no mu no hɔ. Sɛ yɛyɛ dɛm a, nna yɛpɛ dɛ asomdwee tsena asafo no mu. Iyi da nkyɛn a, yebotum enya asɛm a  esi no ho akwankyerɛ efi asafo nwoma mu anaa akwankyerɛ afofor a ahyehyɛdze no dze ama mu. Sɛ yedzi akwankyerɛ ahorow a ɔtse dɛm do, na yenndzi hɛn nsusui ekyir a, yɛbɛma asomdwee atsena asafo no mu.

10. Ebɛnadze fofor na Paul yɛe a ɔmaa asomdwee tsenaa asafo no mu?

¹⁰ Paul yɛɛ ndzɛmba a ɔdze asomdwee ba. Ɔkaa su pa ahorow a enuanom no wɔ no ho asɛm, na nnyɛ mfom a wodzi no. Nhwɛdo bi nye yi. Aber a Paul dze krataa a ɔkyerɛwee kɛmaa Rome asafo no reba ewiei no, ɔbobɔɔ enuanom pii hɔn edzin. Ɔkaa su pa ahorow a wɔwɔ no ho asɛm na ɔkamfoo hɔn. Sɛ yɛkamfo hɛn nuanom wɔ su pa ahorow a wɔda no edzi no ho a, nna yerusuasua Paul. Sɛ yɛyɛ dɛm a, ɔbɛyɛ mberɛw ama hɛn dɛ yɛnye hɛnho bɔbɔ. Iyi ma ɔdɔ kɔ do tsena asafo no mu.

11. Sɛ akasakasa bi si yɛnye hɛn nuanom ntamu a, yebesi dɛn ama asomdwee aaba?

¹¹ Ɔtɔ da a, enuanom a wɔdze nokwardzi asom Jehovah mfe pii mpo no, akasakasa botum asoɛr wɔ hɔn ntamu. Asɛm a ɔtse dɛm sii wɔ Paul nye ne nyɛnko berɛbo Barnabas hɔn ntamu. Dza ɔkɛfaa akasakasa no bae nye dɛ, nna hɔn adwen nnhyia dɛ wɔdze Mark bɛka hɔnho wɔ hɔn asɛmpatserɛw akwantu a odzi hɔ no mu. Bible no ka dɛ, “akasakasa a ɔyɛ dzen” soɛree wɔ hɔn ntamu, na iyi maa hɔn mu paapaae. (Andw. 15:37-39) Naaso Paul, Barnabas, na Mark siesiee hɔn ntamu akasakasa no. Wɔyɛɛ dɛm dze kyerɛɛ dɛ asomdwee na koryɛ a ɔbɛtsena asafo no mu no ho hia hɔn papaapa. Mber bi ekyir no, Paul kaa Barnabas na Mark hɔnho asɛmpa. (1 Cor. 9:6; Col. 4:10) Hɛn so, sɛ yɛnye obi nya akasakasa wɔ asafo no mu a, ɔwɔ dɛ yesiesie hɛn ntamu, na yɛkɔ do dze hɛn adwen si su pa ahorow a ɔwɔ no do. Sɛ yɛyɛ dɛm a, nna yɛrema asomdwee na koryɛ atsena yɛnye hɛn nuanom ntamu.​—Eph. 4:3.

12. Ebɛn ɔhaw ahorow na hɛn nuanom binom rihyia?

¹² Sɛ yɛhyɛ hɛn nuanom a yɛnye hɔn som Jehovah no nkuran a, nna yɛrotow hɔn gyedzi do. Hɛn nuanom binom wɔ hɔ a, hɔn ebusuafo a wɔnnyɛ Adasefo, hɔn edwumamufo, anaa hɔn skuulfo dzi hɔnho fɛw. Binom so wɔ hɔ a, yarba a no mu yɛ dzen retseetsee hɔn anaa obi ayɛ hɔn adze ma ayɛ hɔn yaw, naaso wɔrobɔ mbɔdzen dɛ wobegyina ano. Afofor so dze, wɔbaa nokwar no mu akyɛr na wɔatweɔn araa dɛ ewiei no bɛba, naaso ɔmmbae. Tsebea ahorow a ɔtsetse dɛm botum asɔ Christianfo a wɔwɔ hɔ ndɛ no hɔn gyedzi ahwɛ. Tsetse Christianfo no so hyiaa ɔhaw a ɔtse dɛm. Ebɛnadze na Paul yɛe dze hyɛɛ hɔn gyedzi dzen?

13. Ebɛnadze na Paul yɛe dze boaa Christianfo a hɔn gyedzi ntsi nna wodzi hɔnho fɛw no?

¹³ Paul dze Kyerɛwnsɛm no hyɛɛ no nuanom no hɔn gyedzi dzen. Dɛ nhwɛdo no, obotum aba dɛ nna Jewfo a wɔabɛyɛ Christianfo no nnhu nkyerɛkyerɛmu a wɔdze bɛma hɔn ebusuafo a wɔka dɛ Judahfo hɔn som yɛ papa kyɛn Christianfo hɔn som no. Ɔda edzi dɛ Paul ne krataa a ɔkyerɛwee kɛmaa Hebrewfo no hyɛɛ dɛm Christianfo yi nkuran paa. (Heb. 1:5, 6; 2:2, 3; 9:24, 25) Nna nsɛm a otu mpon a Paul nye hɔn susuu ho no botum aboa hɔn ma wɔakyerɛkyerɛ hɔn gyedzi mu akyerɛ hɔn ebusuafo a wɔnnyɛ agyedzifo no. Ndɛ so yebotum aboa hɛn nuanom a afofor dzi hɔnho fɛw no ma wɔaayɛ nhwehwɛmu wɔ hɛn Bible ho nwoma ahorow no mu ama woeetum akyerɛkyerɛ hɔn gyedzi mu akyerɛ hɔn a wɔtse dɛm no. Hɛn nuanom a wɔyɛ mbabun no so, sɛ gyedzi a wɔwɔ wɔ adzebɔ mu ntsi, hɔn anyɛnkofo dzi hɔnho fɛw a, yebotum aboa hɔn ma wɔaayɛ nhwehwɛmu wɔ nwomaba ebien yi mu: Was Life Created? nye The Origin of Life​—Five Questions Worth Asking. Iyi bɔboa hɔn ma woeehu adanse a ɔkyerɛ dɛ nkwa ammba ara kwa.

14. Nna Paul dze ne ber nyina reyɛ asɛnka na nkyerɛkyerɛ edwuma no, naaso ebɛnadze na ɔyɛe?

 ¹⁴ Paul hyɛɛ no nuanom nkuran dɛ wɔnyɛ “ndwuma pa” mfa nda ɔdɔ edzi. (Heb. 10:24) Paul annhyɛ no enuanom no nkuran kɛkɛ. Mbom no, ɔyɛɛ biribi so dze boaa hɔn. Dɛ nhwɛdo no, ber a ɔkɔm sii Judea no, Paul boaa Christianfo a wɔwɔ hɔ no ma wonyaa ndzɛmba a wohia. (Andw. 11:27-30) Nokwasɛm nye dɛ, nna Paul dze ne ber nyina reka asɛmpa no na ɔrekyerɛkyerɛ, naaso ɔhwehwɛɛ hokwan dze boaa no nuanom no ma wonyaa asetsena mu ehiadze. (Gal. 2:10) Dɛm a Paul yɛe no hyɛɛ no nuanom no nkuran dɛ Jehovah bɔhwɛ ma hɔn nsa aka dza wohia. Ndɛ, sɛ yɛdze hɛn mber, hɛn ahoɔdzen nye hɛn nyimdzee boa wɔ atoyerɛnkyɛm mber mu a, nna yɛrotow hɛn nuanom hɔn gyedzi do. Afei so, sɛ yeyi ntoboa dabaa dze boa wiadze nyina som edwuma no a, ɔno so kyerɛ dɛ yɛrotow hɛn nuanom hɔn gyedzi do. Dza yɛaka ho asɛm yi nye ndzɛmba afofor a ɔtsetse dɛm a yɛbɛyɛ no bɔboa hɛn nuanom ma wɔaagye edzi dɛ Jehovah rinngyaa hɔn da.

15-16. Yebesi dɛn aboa hɔn a hɔn gyedzi ayɛ mberɛw no?

¹⁵ Paul kɔr do boaa hɔn a hɔn gyedzi ayɛ mberɛw no. Ɔdaa ayamuhyehye edzi kyerɛɛ hɔn na ɔkɔr do hyɛɛ hɔn nkuran. (Heb. 6:9; 10:39) Dɛ nhwɛdo no, ehwɛ krataa a ɔkyerɛwee kɛmaa Hebrewfo asafo no a, ɔdze nkasafua bi tse dɛ “yɛhwɛ” na “hɛn” dzii dwuma wɔ mu. Ɔyɛɛ dɛm dze kyerɛɛ dɛ ɔsɛ dɛ noara so dze afotu a ɔdze ama hɔn no yɛ edwuma. (Heb. 2:1, 3) Ɔwɔ dɛ yesuasua Paul na yɛkɔ do boa enuanom a hɔn gyedzi ayɛ mberɛw no. Onnyi dɛ yɛpa abaw wɔ hɔnho, mbom ɔwɔ dɛ yɛtow hɔn gyedzi do na yɛma wohu dɛ yɛdwen hɔnho. Sɛ yɛyɛ dɛm a, nna yɛreda no edzi dɛ yɛdɔ hɔn. Ɔkwan a yɛbɛfa do nye hɔn akasa no botum ama nsɛm a yɛbɛka no atow hɔn gyedzi do.

¹⁶ Paul maa enuanom no hun dɛ Jehovah hu  ndwuma pa a wɔyɛ no. (Heb. 10:32-34) Yebotum ayɛ dɛm ber a yɛroboa onua bi a ne gyedzi ayɛ mberɛw no. Yebotum aka akyerɛ no dɛ ɔnka mbrɛ osii baa nokwar no mu no ho asɛm nkyerɛ hɛn anaa yebotum aka akyerɛ no dɛ ɔnkaakaa mber ahorow bi a Jehovah boaa no no. Yebotum dze dɛm hokwan no aboa no ma woeehu dɛ Jehovah no werɛ mmfiir ɔdɔ a ɔdaa no edzi nye mbɔdzen a ɔbɔe mber bi a etwa mu no. Dɛm ntsi, Jehovah rinnyi no tokyen da. (Heb. 6:10; 13:5, 6) Nkɔmbɔ a ɔtse dɛm no botum ahyɛ dɛm enuanom yi nkuran ma wɔaakɔ do ara asom Jehovah.

17. Ebɛnadze na ɔwɔ dɛ yɛkɔ do yer hɛnho dɛ yɛbɛyɛ?

¹⁷ Obi a osi dan bɔ mbɔdzen dɛ ofi ber to ber no obenya nyimdzee pii wɔ adansi edwuma no mu. Dɛmara na ɔsɛ dɛ hɛn so yɛyer hɛnho dɛ yebohu kwan a otu mpon a yɛbɛfa do atow hɛn nuanom hɔn gyedzi do. Yebotum aka Jehovah n’asomfo anokwafo a wogyinaa nsɔhwɛ ahorow ano wɔ tsetse mber mu no ho asɛm akyerɛ hɔn. Sɛ yɛyɛ dɛm a, yebotum ahyɛ hɛn nuanom a worihyia nsɔhwɛ no hɔn gyedzi dzen ma woeegyina ano. Ɔsɛ dɛ yɛkamfo hɛn nuanom wɔ suban pa a wɔda no edzi no ho. Afei so, sɛ ɔkɛba dɛ yɛnye hɔn adwen nnhyia wɔ nsɛm bi ho, anaa akasakasa bi soɛr wɔ hɛn ntamu a, ɔsɛ dɛ yesiesie. Sɛ yɛyɛ iyinom a nna yɛrema asomdwee atsena hɛn ntamu. Nkyii so, sɛ yɛnye hɛn nuanom susu Bible mu nokwasɛm ahorow ho, yɛyɛ ndzɛmba ahorow bi boa hɔn, na yɛboa hɔn a hɔn gyedzi ayɛ mberɛw no ma wɔnye Jehovah nya ebusuabɔ a no mu yɛ dzen a, nna yɛrotow hɔn gyedzi do.

18. Ebɛnadze na esi wo bo dɛ ebɛyɛ?

¹⁸ Enuanom a wosisi asafo adan no, sɛ wosi dan bi wie a, hɔn enyi gye na hɔn akoma so tɔ hɔn yamu. Sɛ yɛtow hɛn nuanom hɔn gyedzi do a, yebenya enyigye na akomatɔyamu. Sɛ wosi dan ma ɔkyɛr dɛn mpo a, ewiei koraa no obobu. Naaso, sɛ yɛhyɛ hɛn nuanom hɔn gyedzi dzen a, nhyira a obefi mu aba no bɛtsena hɔ afebɔɔ! Hom mma hɛn nyina yɛnkɔ do ‘nhyehyɛ hɛnho nkuran, na yɛntotow hɛnho do nkorkor.’​—1 Thess. 5:11.