1. Ebɛnadze ntsi na Jesus serɛɛ Jehovah dɛ ɔmbɔ n’esuafo no hɔnho ban?

 ANAFUA a adze rebɛkye ma Jesus ewu no, ɔdze ebisadze soronko bi too no sor Egya no enyim. Ɔserɛɛ Jehovah dɛ ɔmbɔ n’esuafo no hɔnho ban. (John 17:15, 20) Ɔyɛ ampa dɛ, dabaa Jehovah hwɛ n’asomfo na ɔbɔ hɔnho ban. Naaso nna Jesus nyim dɛ Satan bɔsoɛr etsia n’esuafo no dzendzenndzen. Afei so, nna Jesus nyim dɛ n’esuafo no behia Jehovah no mboa ama woeetum ako etsia ɔhaw a Abɔnsam dze bɛba hɔn do no.

2. Dɛ mbrɛ Ndwom 33:18-20 ma yehu no, ebɛnadze ntsi na ɔnnsɛ dɛ yesuro ɔhaw biara?

² Ndɛ, Satan no wiadze bɔn yi dze ɔhaw pii ba nokwar Christianfo do. Ɔhaw a yehyia no ndɛ no tum bu hɛn abaw mu, na otum ma ɔyɛ dzen ma hɛn dɛ yɛbɔkɔ do dze nokwardzi asom Jehovah. Naaso, adzesua yi bɔboa hɛn ma yeehu dɛ ɔnnsɛ dɛ yesuro hwee. Jehovah n’enyi wɔ hɛn do, kyerɛ dɛ, ohu ɔhaw ahorow a yerihyia no na ɔayɛ krado dɛ ɔbɔboa hɛn ma yeetum egyina ano. Ma yɛnhwɛ Bible mu nhwɛdo ebien a ɔma yehu dɛ Jehovah ‘n’enyiwa wɔ hɔn a wosuro no do.’​—Kenkan Ndwom 33:18-20.

3. Ebɛnadze na obotum ama yaatse nka dɛ yɛayɛ ankonam?

³ Nokwasɛm nye dɛ yɛwɔ enuanom pii wɔ asafo no mu, naaso ɔtɔ da a yebotum atse nka dɛ yɛayɛ ankonam. Dɛ nhwɛdo no, sɛ mbabun rekyerɛkyerɛ hɔn gyedzi mu akyerɛ hɔn skuulfo anaa wɔkɔ asafo fofor bi mu a, wobotum atse nka dɛ obiara nnyi hɔ a ɔbɔboa hɔn. Hɛn mu bi wɔ hɔ a, sɛ ɔkɛba dɛ ɔhaw a yerihyia no, hɛn nkotsee na ɔwɔ dɛ yegyina ano a, otum ma yedzi awerɛhow anaa hɛn abaw mu bu. Bi so a nna yɛmmpɛ dɛ yɛka hɛn haw no  ho asɛm kyerɛ afofor osiandɛ yesusu dɛ sɛ yɛka kyerɛ hɔn a, wɔrenntse hɛn ase. Ɔtɔfabi a yebotum enya adwen dɛ obiara nnyi hɔ a ɔdwen hɛnho. Tsebea biara a yɛkɔ mu a ɔma yɛtse nka dɛ yɛayɛ ankonam no, obotum so ama yaatse nka dɛ yerunntum nnyɛ ɔhaw a yɛwɔ mu no ho hwee. Afei so, obotum egyaa hɛn adwendwen. Naaso Jehovah mmpɛ dɛ yɛtse nka dɛm koraa. Ebɛnadze ntsi na yɛreka no dɛm?

4. Ebɛnadze ntsi na nkɔnhyɛnyi Elijah kaa dɛ: “Emi ara nko na maka”?

⁴ Hom mma yensusu dza ɔbarimba nokwafo Elijah yɛe no ho. Jezebel kaa ntam dɛ oboku no, dɛm ntsi ɔdze noho kaa nwura bɔbor ndafua 40. (1 Ahe. 19:1-9) Ekyir yi nankotsee kɛhyɛɛ ɔbo-tu bi mu na ɔkaa kyerɛɛ Jehovah dɛ: ‘Emi ara nko nye nkɔnhyɛnyi a maka.’ (1 Ahe. 19:10) Naaso, nna nkɔnhyɛfo afofor wɔ hɔ. Hɔn mu kor nye Obadiah. Dɛm ɔbarimba yi dze nkɔnhyɛfo 100 kosumae amma Jezebel ennkuku hɔn. (1 Ahe. 18:7, 13) Sɛ dɛm dze a, ebɛnadze ntsi na Elijah tsee nka dɛ wɔaka nankotsee? Aso nna n’adwen yɛ no dɛ nkɔnhyɛfo a Obadiah dze hɔn kosumae no, hɔn nyina ewuwu anaa? Aber a Jehovah daa noho edzi wɔ Bepɔw Carmel do dɛ ɔno nye nokwar Nyankopɔn no, ɔno ekyir no obiara ammbɛka Elijah ho annsom Jehovah. Aso iyi na ɔmaa Elijah tsee nka dɛ ɔayɛ ankonam? Aso nna ɔtse nka dɛ obiara nnyim ɔhaw a orihyia anaa nna ɔtse nka dɛ obiara nndwen noho? Bible no nnka siantsir a nna Elijah tse nka dɛ ɔayɛ ankonam no ho asɛm pii. Naaso, dza yenyim nye dɛ nna Jehovah tse siantsir a Elijah tse nka dɛm no ase. Afei so, nna Jehovah nyim kwan pɔtsee a ɔbɛfa do aboa no.

5. Ebɛn ndzɛmba na Jehovah yɛe dze boaa Elijah ma onyaa awerɛhyɛmu dɛ ɔnnkaa nankotsee?

⁵ Jehovah yɛɛ ndzɛmba pii dze boaa Elijah. Ɔhyɛɛ Elijah nkuran dɛ omfi n’akoma mu nkasa. Obisaa Elijah mpɛn ebien dɛ: “Ereyɛ dɛn wɔ ha?” (1 Ahe. 19:9, 13) Mpɛn ebien a Elijah fii n’akoma mu kasae no, Jehovah tsiee no. Jehovah maa Elijah hun dɛ ɔwɔ tum, na ɔsaan so maa ohun dɛ ɔka noho. Afei so ɔmaa Elijah hun dɛ nyimpa pii so wɔ hɔ a wɔsom ɔno Jehovah na nnyɛ nankotsee. (1 Ahe. 19:11, 12, 18) Ɔda edzi dɛ, aber a Elijah kaa n’akoma mu asɛm  kyerɛɛ Jehovah na ohun dɛ oetsie no no, noho dwee no fɔmm. Jehovah dze dwumadzi a no ho hia hyehyɛɛ Elijah ne nsa. Dwumadzi no bi nye dɛ ɔkaa kyerɛɛ no dɛ ɔnsera Hazael ngo ma ɔmbɛyɛ Syriahen. Ɔsaan so kaa kyerɛɛ no dɛ ɔnsera Jehu ma ɔmbɛyɛ Israelhen na ɔnsera Elisha so ma ɔmbɛyɛ nkɔnhyɛnyi. (1 Ahe. 19:15, 16) Jehovah dze dwumadzi ahorow yi hyehyɛɛ ne nsa. Ɔyɛɛ dɛm dze boaa Elijah ma ɔdze n’adwen sii ndzɛmba pa do. Afei so, Jehovah maa Elijah nyɛnko berɛbo bi; ɔno nye Elisha. Sɛ yɛtse nka dɛ yɛayɛ ankonam a, Jehovah besi dɛn aboa hɛn?

6. Sɛ etse nka dɛ ayɛ ankonam a, ebɛnadze na ibotum abɔ ho mpaa? (Ndwom 62:8)

⁶ Jehovah pɛ dɛ ebɔ no mpaa. N’enyi tua dza erefa mu nyina na ɔpɛ dɛ inya awerɛhyɛmu dɛ aber biara a ebɔbɔ no mpaa no, obetsie. (1 Thess. 5:17) Jehovah n’enyi gye ho dɛ obetsie n’asomfo hɔn mpaabɔ. (Mbɛ. 15:8) Sɛ etse nka dɛ ayɛ ankonam a, ebɛnadze na ibotum abɔ ho mpaa? Fi w’akoma mu bɔ Jehovah mpaa dɛ mbrɛ Elijah yɛe no. (Kenkan Ndwom 62:8.) Ka ɔhaw a erefa mu nyina nye mbrɛ isi tse nka no ho asɛm kyerɛ no. Serɛ Jehovah dɛ ɔmboa wo ma gyina ɔhaw a ɔtse dɛm no ano. Dɛ nhwɛdo no, bi a epɛ dɛ idzi dase wɔ skuul naaso isuro na etse nka dɛ obiara nnyi hɔ a ɔbɔboa wo. Sɛ ɔba dɛm a, serɛ Jehovah dɛ ɔmboa wo ma nya akokodur a ibotum dze akasa. Ibotum aserɛ no dɛ ɔmma wo nyansa a ibotum dze akyerɛkyerɛ wo gyedzi mu. (Luke 21:14, 15) Afei so, sɛ nsɛm hyɛ wo do na innhu dza enyɛ a, serɛ Jehovah dɛ ɔmboa wo ma nya akokodur na ka ho asɛm kyerɛ Christiannyi bi a ɔdze nokwardzi asom Jehovah mfe pii. Ibotum so aserɛ Jehovah dɛ ɔmboa nyia erekɛka w’asɛm akyerɛ no no ma ɔntse wo ase. Ka w’akoma mu nsɛm kyerɛ Jehovah na hwɛ kwan a ɔbɛfa do ebua wo mpaabɔ no. Afei, gye mboa a afofor dze bɛma wo no to mu. Sɛ eyɛ dɛm a, erenntse nka dɛ ayɛ ankonam.

7. Ebɛnadze na isua fi Mauricio n’asɛm no mu?

⁷ Jehovah ama hɛn nyina edwuma a no ho hia. Nya awerɛhyɛmu dɛ, mbɔdzen biara a erobɔ wɔ asafo no mu nye asɛnka edwuma no mu no, ohu na n’enyi sɔ so. (Ndw. 110:3) Sɛ etse nka dɛ ayɛ ankonam a, ebɛn kwan do na edwuma yi a edze w’adwen nyina besi do no bɔboa wo? Hom mma yensusu onua bi a wɔfrɛ no Mauricio n’asɛm no ho. * Aber a ɔbɔɔ esu no, annkyɛr koraa na ne nyɛnko bi a ɔbɛn no paa hyɛɛ ase dɛ ɔrotwe noho nkakrankakra efi nokwar no ho. Mauricio kaa dɛ: “Aber a muhun dɛ ɔatwe no ho efi nokwar no ho no, meyɛɛ basaa. Ntsi ɔyɛ a nna modwen ho dɛ, bɔ a mahyɛ Jehovah dɛ mobɔsom no no, ana mubotum edzi do na maakɔ do ara atsena asafo no mu? Iyi maa metsee nka dɛ mayɛ ankonam. Nkyii so, nna metse nka dɛ obiara nnyi hɔ a ɔtse mbrɛ misi tse nka no ase.” Ebɛnadze na ɔboaa Mauricio?  Ɔtoaa do dɛ: “Meyɛɛ pii wɔ asɛnka edwuma no mu. Dɛm a meyɛe no boaa me ma mammfa m’adwen ennsi ɔhaw no nye mbrɛ misi tse nka no do. Sɛ nna menye enuanom nam asɛnka mu a, m’enyi gye na metse nka dɛ mennyɛ ankonam.” Sɛ yenntum nye hɛn nuanom nnhyia mu nnyɛ asɛnka edwuma no mpo a, yɛnam krataakyerɛw na tɛlefon do nye hɔn dzi nkorɔfo dase, na iyi hyɛ hɛn nkuran paa. Ebɛnadze bio na ɔboaa Mauricio? Ɔkaa dɛ: “Adze kor so a ɔboaa me nye dɛ meyɛɛ pii wɔ asafo no mu. Sɛ minya esuafo dwumadzi a, nna misiesie moho yie na meyɛ no kama. Dwumadzi a ɔtsetse dɛm no maa metsee nka dɛ moho hia Jehovah nye mo nuanom.”

8. Sɛ yehyia nsɔhwɛ a no mu yɛ dzen a, obotum aka hɛn dɛn?

⁸ Yɛtse nda a odzi ekyir no mu, ntsi yenyim dɛ yebehyia nsɔhwɛ. (2 Tim. 3:1) Naaso, nsɔhwɛ no bi wɔ hɔ a, yɛnnhwɛ kwan dɛ ɔno na yebehyia na otum so to hɛn ber a yɛnnhwɛ kwan. Obotum aba dɛ awerɛfir mu ara yebehyia sikasɛm mu ahokyer, yarba bi a ɔyɛ hu bɔbɔ hɛn anaa mpo hɛnho nyimpa bi bowu. Sɛ ɔba no dɛm a, adwendwen botum ahyɛ hɛn do ma yaayɛ basaa. Sɛ ɔkɛba dɛ ɔhaw no kɔree ara na fofor aba, anaa mpo sɛ yehyia ɔhaw a ɔtsetse dɛm wɔ ber kor mu a, ɔnodze nna asɛm no asɛɛ koraa. Naaso, ɔsɛ dɛ yɛkaa dɛ dza yɛrefa mu nyina Jehovah n’enyi tua, na ɔbɔboa hɛn ma yɛdze akokodur eegyina dza yerihyia no ano.

9. Ka nsɔhwɛ a Job hyiae no bi ho asɛm.

⁹ Hom mma yɛnhwɛ dza Jehovah yɛe dze boaa ɔnokwafo Job. Mber kakraabi ntamu no, Job hyiaa nsɔhwɛ a no mu yɛ dzen paa. Da kortsee n’anyɛmbowa nyina fii ne nsa, na no nkowaa so wuwui. Dza otwaa no nson mu paa nye ne mba a ɔdɔ hɔn a hɔn nyinara so wuwui no. (Job 1:13-19) Ɔno ekyir ber tsiabaa bi aber a ɔda ho ara ridzi awerɛhow no, yarba bi a ɔyɛ hu paa so bɔɔ no. (Job 2:7) Nna ɔhaw a Job rihyia no mu yɛ dzen paa, dɛm ntsi ɔkaa dɛ: “Mo nkwa afon me; memmpɛ dɛ metsena ase daa.”​—Job 7:16.

10. Ebɛn kwan do na Jehovah boaa Job ma ogyinaa nsɔhwɛ a nna orihyia no ano? (Hwɛ mfonyin a ɔwɔ Ɔweɔn-Aban yi enyim no.)

¹⁰ Nna Jehovah n’enyiwa tua dza ɔrokɔ do wɔ Job n’asetsena mu nyina. Nna Jehovah dɔ Job ntsi ɔboaa no ma ɔdze nokwardzi gyinaa nsɔhwɛ a nna orihyia no ano. Jehovah nye Job kasae. Aber a Jehovah nye Job rekasa no, ɔmaa Job hun dɛ ne nyansaa nnyi ano na ɔdwen n’abɔdze so ho paa. Jehovah kaa mbowa pii a hɔn ho yɛ nwanwa ho asɛm. (Job 38:1, 2; 39:9, 13, 19, 27; 40:15; 41:1, 2) Afei so, Jehovah nam ɔbarimba nokwafo bi a wɔfrɛ no Elihu do hyɛɛ Job dzen na ɔkyekyee no werɛ. Elihu maa Job hun dɛ aber nyina Jehovah hyira n’asomfo a wɔkɔ do dze enyimia gyina nsɔhwɛ ano no. Jehovah maa Elihu fii ɔdɔ mu tseen Job n’adwen. Elihu kaa nsɛm bi dze kaa Job dɛ Jehovah nye amansan Bɔfo no na sɛ yɛdze hɛnho toto noho a, yenndu beebiara koraa. Dɛm a ɔyɛe no boaa Job ma ɔdze n’adwen sii Jehovah do kyɛn dɛ ɔdze besi noho do. (Job 37:14) Afei Jehovah dze dwumadzi bi hyɛɛ Job ne nsa. Ɔkaa kyerɛɛ no dɛ ɔmbɔ mpaa mma n’anyɛnkofo baasa a wɔayɛ bɔn no. (Job 42:8-10) Ndɛ so sɛ yehyia nsɔhwɛ a no mu yɛ dzen a, ebɛnadze na Jehovah yɛ dze boa hɛn?

11. Sɛ yerihyia nsɔhwɛ a, ebɛn kwan do na Bible no botum aboa hɛn ma yeegyina ano?

¹¹ Ndɛ Jehovah nam n’Asɛm Bible no do na ɔnye hɛn kasa, na ɔnye hɛn nnkasa tsenn dɛ mbrɛ ɔnye Job kasae no. (Rom. 15:4) Jehovah nam enyidado a ɔdze ama hɛn no do kyekye hɛn werɛ. Hom mma yɛnhwɛ Bible mu nsɛm bi a obotum akyekye hɛn werɛ aber a yerihyia nsɔhwɛ no. Jehovah ma hɛn awerɛhyɛmu  wɔ n’Asɛm Bible no mu dɛ biribiara ‘runntum nntsew hɛn mmfi no dɔ no ho.’ Nsɔhwɛ a no mu yɛ dzen so ka ho bi. (Rom. 8:38, 39) Afei so, ɔma hɛn awerɛhyɛmu dɛ ‘ɔbɛn hɔn a wɔfrɛ no nyinara.’ (Ndw. 145:18) Jehovah ka kyerɛ hɛn dɛ sɛ yɛdze hɛnho to no do a, ɔbɔboa hɛn ma yeetum egyina nsɔhwɛ biara a yebehyia no ano, na mpo yɛdze enyigye na yɛdze bɛyɛ dɛm. (1 Cor. 10:13; Jas. 1:2, 12) Bible no san ma hɛn awerɛhyɛmu dɛ, sɛ yehyia nsɔhwɛ a, ɔbɛyɛ ber tsiabaa bi mu adzeyɛ na ɔrennkyɛr na etwa mu. Naaso nhyira a Jehovah dze bɛma hɛn no dze ɔbɛtsena hɔ afebɔɔ. (2 Cor. 4:16-18) Jehovah ahyɛ hɛn bɔ dɛ, obeyi hɔn a wɔma yehu amandze nyina efi hɔ, kyerɛ dɛ, obeyi Satan Abɔnsam nye hɔn a wosuasua no suban bɔn nyina no efi hɔ koraa. (Ndw. 37:10) Sɛ daakye ihyia nsɔhwɛ a, ana etwuw Bible mu nsɛm bi egu wo tsirmu a ɔbɛkyekye wo werɛ ama eetum egyina ano?

12. Sɛ yebenya Jehovah n’Asɛm do mfaso kɛse a, ebɛnadze na ɔhwɛ kwan dɛ yɛbɛyɛ?

¹² Jehovah pɛ dɛ yeyi ber si hɔ dze kenkan Bible no da biara na yɛdwendwen ho yie. Sɛ yɛdze dza yesua no yɛ edwuma a, ɔbɛma hɛn gyedzi ayɛ dzen na yɛbɔtwe abɛn hɛn sor Egya no paa. Iyi bɔboa hɛn ma yeetum egyina nsɔhwɛ a yehyia no ano. Afei so Jehovah dze no sunsum krɔnkrɔn ma hɔn a wɔdze n’Asɛm bɔ hɔn bra no. Nyankopɔn no sunsum yi botum ama yeenya ‘tum a ɔbor nyimpa dze do’ dze egyina nsɔhwɛ biara a yebehyia no ano.​—2 Cor. 4:7-10.

13. Ebɛn kwan do na ndzɛmba a “akowaa nokwafo nye nyansafo” no dze ma hɛn no boa hɛn ma yegyina nsɔhwɛ ano?

¹³ Jehovah boa “akowaa nokwafo nye nyansafo” no ma ɔma hɛn nsɛm, video nye ndwom pii a ogyina Bible do. Dɛm ndzɛmba yi nyina boa hɛn ma hɛn gyedzi yɛ dzen na yɛkɔ do bɛn Jehovah. (Matt. 24:45) Ndzɛmba a Jehovah dze ma hɛn no, ɔsɛ dɛ yɛbɔ mbɔdzen dze ne nyina dzi dwuma yie. Ndaansa yi ara akyerɛbaa bi a ɔwɔ United States kyerɛɛ dɛ n’enyi sɔ ndzɛmba a Jehovah dze ma hɛn no. Ɔkaa dɛ: “Mfe 40 a medze asom Jehovah yi, ndzɛmba pii na wɔasɔ me gyedzi ahwɛ.” Akyerɛbaa yi hyiaa nsɔhwɛ a no mu yɛ dzen paa. Driver bi a nna ɔabow sramm dze ne kaar kɔbɔɔ ne nanabanyin ne kaar mu ma owui. Afei so, yarba bi a no mu yɛ dzen bɔɔ ne maame na ne papa ma hɔn so wuwui, na noara so nyaa cancer mpɛn ebien. Ebɛnadze na ɔboaa no ma otumii gyinaa ɔhaw ahorow yi ano? Ɔkaa dɛ: “Jehovah nngyaa me hwɛ da. Ndzɛmba a ɔnam  akowaa nokwafo nye nyansafo no do dze ma hɛn no aboa me paa ma metum egyina me haw no ano. Iyi ntsi mara so mubotum aka asɛm a Job kae no bi dɛ: ‘Mirinnyi m’emudzi mmfi mo ho araa ma ekodu dɛ mubowu.’”​—Job 27:5.

14. Sɛ yerihyia ɔhaw a, ebɛn kwan do na Jehovah fa hɛn nuanom do boa hɛn? (1 Thessalonicafo 4:9)

¹⁴ Jehovah akyerɛkyerɛ n’asomfo dɛ wɔndodɔ hɔnho na wɔnkyekye hɔnho werɛ aber a worihyia ɔhaw no. (2 Cor. 1:3, 4; kenkan 1 Thessalonicafo 4:9.) Sɛ yehyia nsɛndzendzen a, hɛn nuanom no yɛ hɔn adze dɛ Elihu na wɔboa hɛn ma yɛkɔ do dzi Jehovah nokwar. (Andw. 14:22) Dɛ nhwɛdo no, yarba bi a no mu yɛ dzen bɔɔ Diane no kun. Hom mma yɛnhwɛ mbrɛ enuanom a wɔnye hɔn wɔ asafo mu no boaa Diane ma ɔkɔr do bɛɛn Jehovah. Ɔkaa dɛ: “Dɛm abosoom no mu dze, nna ɔnnda famu mma hɛn koraa. Naaso yɛtsee nka dɛ Jehovah dɔ hɛn na ɔdze n’abasa a no mu yɛ dzen no roboa hɛn. Enuanom a yɛnye hɔn wɔ asafo mu no yɛɛ ndzɛmba pii boaa hɛn. Binom refrɛ hɛn wɔ fon do no, nna binom rebɛsera hɛn, nna wɔreyɛ hɛn etuu. Iyinom nyina boaa hɛn ma yegyinaa hɛn tsebea no ano. Minnyim kaar ka, ntsi enuanom no ara na wɔbɛfa me kɔ asafo nhyiamu. Afei so, sɛ minya hokwan dɛ mobɔkɔ asɛnka a, hɔn ara na wɔbɛfa me kɔ.” Asafo no mu no, yɛdodɔ hɛnho, na iyi ma hɛn enyi gye paa!

15. Ebɛnadze ntsi na yɛgye dzi paa dɛ yebotum egyina ɔhaw ahorow a yehyia no ano?

¹⁵ Jehovah n’asomfo nyina behyia ɔhaw bi. Naaso, adzesua yi aboa hɛn ma yeehu dɛ, sɛ yerihyia ɔhaw a, ɔnnkaa hɛn nko. Jehovah yɛ egya a ɔwɔ ɔdɔ, na aber nyina ɔhwɛ hɛn na ɔbɔ hɛnho ban. Ɔka hɛnho, na ɔayɛ krado dɛ obetsie hɛn mpaabɔ na ɔaaboa hɛn. (Isa. 43:2) Yɛgye dzi paa dɛ yebotum egyina ɔhaw a yebehyia no ano, osiandɛ Jehovah dze biribiara a ɔbɔboa hɛn ma yaayɛ dɛm no ama hɛn. Ɔdze hokwan ama hɛn dɛ yɛmbɔ no mpaa, ɔama hɛn Bible no, ɔma hɛn nsa ka ndzɛmba ahorow a ɔma hɛn gyedzi yɛ dzen. Afei so, ɔama hɛn enuanom a wɔdɔ hɛn. Sɛ yerihyia ɔhaw a, Jehovah dze iyinom nyina ama hɛn dɛ ɔmboa hɛn ma yengyina ano.

16. Sɛ Nyankopɔn bɔkɔ do ahwɛ hɛn na ɔaabɔ hɛnho ban a, ebɛnadze na ɔsɛ dɛ yɛyɛ?

¹⁶ Hɛn sor Egya no hwɛ hɛn na ɔbɔ hɛnho ban, na iyi ma hɛn enyi gye paa! Kyerɛwnsɛm no ka dɛ: “Hɛn akoma bɔtɔ hɛn yamu wɔ no mu.” (Ndw. 33:21) Sɛ yɛdze ndzɛmba a Jehovah dze ama hɛn nyina dzi dwuma yie a, nna yɛrekyerɛ dɛ hɛn enyi sɔ mboa a ofi ɔdɔ mu dze ma hɛn no. Ɔwɔ dɛ hɛn so yɛyɛ hɛn afamudze ama Nyankopɔn aakɔ do ahwɛ hɛn na ɔaabɔ hɛnho ban. Kwan fofor do no, sɛ yɛkɔ do tsie Jehovah na yɛyɛ dza ɔtsen wɔ n’enyi do a, ɔbɔhwɛ hɛn na ɔaabɔ hɛnho ban daa!​—1 Pet. 3:12.