1. Ebɛnadze na ɔmaa Babylonfo no hun dɛ nkɔnhyɛnyi Daniel yɛ soronko?

 ABER a Babylonfo no kɛfaa nkɔnhyɛnyi Daniel dɛ akowaa fii no kurow mu Jerusalem tɔnn kɔr Babylon no, nna ɔyɛ ɔbabun. Naaso Babylonfo no hyɛɛ no nsew dɛ Daniel yɛ soronko fi hɔn a wɔaka no ho. Wɔhwɛɛ ‘dza otua enyiwa,’ na wohun dɛ Daniel yɛ ‘aberantsɛba a onndzii dzɛm, na noho yɛ fɛw.’ Afei so, nna ofi ebusua tsitsir bi mu. (1 Sam. 16:7) Dɛm ndzɛmba a Babylonfo no hunii wɔ Daniel ho ntsi, wɔmaa no ntsetsee a nna ɔbɛma oetum asom wɔ ahemfie hɔ.​—Dan. 1:3, 4, 6.

2. Nna Jehovah tse nka dɛn wɔ Daniel ho? (Ezekiel 14:14)

² Nna Jehovah dɔ Daniel, naaso nna ɔnnyɛ n’ahoɔfɛw anaa ebusua a ofi mu ntsi na ɔdɔ no, mbom osian gyinae a osii dɛ ɔbɛyɛ dza Jehovah pɛ ntsi a. Nokwasɛm nye dɛ, aber a Jehovah reka Noah na Job, mbarimba a nna wɔdze mfe pii asom no no ho asɛm no, ɔdze Daniel kaa ho. Ɔbɛyɛ dɛ dɛm aber no nna wɔaka kakra ma Daniel edzi mfe 20, anaaso dɛ nna oedzi mfe 20 na kakra. (Gen. 5:32; 6:9, 10; Job 42:16, 17; kenkan Ezekiel 14:14.) Daniel no nkwa nda nyina Jehovah dɔɔ no, osiandɛ nna n’abrabɔ da nsew.​—Dan. 10:11, 19.

3. Ebɛnadze na yebosusu ho wɔ adzesua yi mu?

³ Nna Daniel wɔ suban pii a ɔyɛ fɛw. Adzesua yi mu no, yɛbɔhwɛ no mu ebien a ɔmaa Jehovah dɔɔ no. Yebedzi kan esusu suban no mu biara ho na yaahwɛ mber a ɔdaa no edzi. Afei, yɛbɔhwɛ dza ɔboaa Daniel ma onyaa dɛm suban ahorow yi. Yewie a, yɛbɔhwɛ dza yɛbɛyɛ dze esuasua no. Adzesua yi kɔ ma mbabun dze, naaso hɛn nyina botum esua ndzɛmba pii efi dza ɔyɛe no mu.

4. Ebɛnadze na Daniel yɛe dze kyerɛɛ dɛ ɔwɔ akokodur?

⁴ Hɔn a wɔwɔ akokodur mpo no, ɔtɔ da a wobotum abɔ hu,  naaso wɔmma ɔno nnsiw hɔn kwan dɛ wɔbɛyɛ dza ɔtsen. Nna Daniel yɛ aberantsɛ a ɔwɔ akokodur paa. Yɛbɔhwɛ dza ɔyɛe wɔ tsebea ebien bi mu a nna ɔkyerɛ dɛ ɔwɔ akokodur. Aber a Babylonfo no sɛɛ Jerusalem bɛyɛ mfe ebien ekyir no, ɔbɛyɛ dɛ dɛm aber no na Daniel dzii kan daa akokodur edzi. Babylonhen Nebuchadnezzar soo daa huhuuhu bi, na ohun ohonyi kɛse bi. Ɔhen Nebuchadnezzar kaa dɛ sɛ n’enyansafo no enntum annka daa a ɔaso no annkyerɛ no na wɔannkyerɛ no ase a, obokuku hɔn nyina; nna Daniel so ka ho. (Dan. 2:3-5) Dɛm ntsi nna ɔsɛ dɛ ɔyɛ biribi fa asɛm no ho ntsɛmara, annyɛ dɛm a nyimpa pii na wobokuku hɔn. Daniel “kɛserɛɛ ɔhen no dɛ ɔmma no ber, na ɔbɛkyerɛ daa no ase akyerɛ no.” (Dan. 2:16) Nna iyi gye akokodur na gyedzi paa. Osiandɛ nna adanse biara nnyi hɔ a ɔkyerɛ dɛ Daniel akyerɛ daa ase pɛn. Naaso ɔkaa kyerɛɛ n’anyɛnkofo baasa a nna Babylonfo no ato hɔn dzin Shadrach, Meshach, nye Abednego no dɛ wɔmbɔ mpaa na “wɔnserɛ ɔsor Nyankopɔn hɔ mbɔbɔrhu wɔ esumasɛm yi ho.” (Dan. 2:18) Jehovah so tsiee hɔn mpaa no. Nyankopɔn boaa Daniel ma otumii kyerɛɛ Nebuchadnezzar ne daa no ase. Dɛm ntsi woennku Daniel na n’anyɛnkofo no.

5. Ebɛn aber bio na no ho behiaa dɛ Daniel da akokodur edzi?

⁵ Aber a Daniel kyerɛɛ Nebuchadnezzar ne daa no ase ekyir no, biribi fofor so sii a nna obehia dɛ ɔda akokodur edzi. Nebuchadnezzar sanee soo daa fofor a ɔyɛ hu. Dɛm daa no mu no, ohun dua kɛse tsentsenntsen bi. Daniel dze akokodur kyerɛɛ ɔhen no ne daa no ase. Ɔkaa kyerɛɛ ɔhen no mpo dɛ ɔbɔbɔ dam na n’ahendzi befi ne nsa ekesi ber bi. (Dan. 4:25) Asɛm a Daniel kae no, nna nkyɛ ɔhen no botum enya adwen dɛ Daniel yɛ ne tamfo anaa ɔpɛ dɛ ɔsoɛr tsia no. Nna nkyɛ obotum ama woeeku no mpo. Naaso iyi ammbɔ Daniel hu, ɔdze akokodur kyerɛɛ daa no ase.

6. Ɔbɛyɛ dɛ ebɛnadze na ɔboaa Daniel ma onyaa akokodur?

⁶ Sɛ ehwɛ a, ɔbɛyɛ dɛ ebɛnadze na ɔboaa Daniel ma ɔdaa akokodur edzi no nkwa nda nyina no? Aber a Daniel yɛ ɔbabun no, ekyingye biara nnyi ho dɛ osuaa ndzɛmba pii fii n’awofo hɔ. Jehovah dze ahyɛdze maa Israelfo awofo dɛ wɔmfa ne Mbra nkyerɛkyerɛ hɔn mba. Na ɔda edzi pefee dɛ dɛm na Daniel n’awofo yɛe. (Deut. 6:6-9) Iyi ntsi nna Daniel nyim Mbra no yie. Mbra no bi nye Mbra Du no. Ɔnnyɛ ɔno nko, nna Mbra no mu nsɛm a ɔfa dza Israelfo  botum edzi nye dza worunntum nndzi ho no, nna onyim ho nsɛm pii. b (Lev. 11:4-8; Dan. 1:8, 11-13) Afei so, Daniel suaa Nyankopɔn no nkorɔfo ho abakɔsɛm, na ohun dɛ sɛ Jehovah no nkorɔfo ammfa ne mbra ammbɔ hɔn bra a, wohyia ɔhaw. (Dan. 9:10, 11) Nsɛm a osisii wɔ Daniel n’asetsena mu nyina no maa onyaa ahotodo paa dɛ Jehovah nye n’abɔfoe a wɔwɔ tum no na wɔboaa no.​—Dan. 2:19-24; 10:12, 18, 19.

7. Ebɛnadze bio na ɔboaa Daniel ma onyaa akokodur? (Hwɛ mfonyin no so.)

⁷ Daniel suaa nkɔm a Nyankopɔn no nkɔnhyɛfo hyɛe no ho adze. Nna Jeremiah nedze no ka ho bi. Dza Daniel suae no maa ekyir yi obohun dɛ ɔrennkyɛr na Jewfo a wɔdze mfe pii ayɛ nkowaa wɔ Babylon no asan akɔ hɔn kurow mu. (Dan. 9:2) Ekyingye biara nnyi ho dɛ aber a Daniel hun mbrɛ Jehovah ama no nkɔnhyɛ ahorow bi aba mu no, ɔmaa awerɛhyɛmu a ɔwɔ wɔ Jehovah mu no yɛɛ kɛse, na hɔn a wɔwɔ Jehovah mu awerɛhyɛmu no so, wotum da akokodur kɛse edzi. (Fa toto Romefo 8:31, 32, 37-39 ho.) Dza ɔboaa Daniel paa nye dɛ nna ɔtaa bɔ no sor Egya no mpaa. (Dan. 6:10) Ɔkaa no bɔn nye mbrɛ nna osi tse nka ho asɛm kyerɛɛ Jehovah. Afei ɔserɛɛ Jehovah dɛ ɔmboa no. (Dan. 9:4, 5, 19) Nna Daniel yɛ nyimpa tse dɛ hɛnara ntsi wɔammfa akokodur annwo no. Adze a ɔboaa no ma onyaa akokodur nye dɛ osuaa adze, ɔbɔɔ mpaa na ɔdze noho too Jehovah do.

8. Sɛ yebotum enya akokodur a, ebɛnadze na ɔsɛ dɛ yɛyɛ?

⁸ Sɛ yebotum enya akokodur a, ebɛnadze na ɔsɛ dɛ yɛyɛ? Hɛn awofo botum ahyɛ hɛn nkuran dɛ yennya akokodur, naaso worunntum mmfa mma hɛn tse dɛ mbrɛ ɔyɛ ebusua egyapadze bi a wobotum dze egya hɛn. Naaso wobotum ahyɛ hɛn nkuran dɛ yennya su a ɔtse dɛm. Akokodur a obi benya no tse dɛ biribi fofor a orusua efi obi hɔ. Adze kor a obotum aboa no ma oesua adze no yie nye dɛ, ɔbɛgyen n’enyi ahwɛ obi a ɔrekyerɛ no adze no yie, na oesuasua dza ɔreyɛ no. Hɛn so, sɛ yebotum ada akokodur edzi a, ɔsɛ dɛ yɛhwɛ mbrɛ afofor si da dɛm su yi edzi no na yesuasua hɔn. Dze besi ha yi, ebɛnadze na yeesua efi Daniel hɔ? Ɔsɛ dɛ yesua Nyankopɔn n’Asɛm no yie dɛ mbrɛ Daniel yɛe no. Afei so, ɔsɛ dɛ yɛnye Jehovah nya ebusuabɔ a no mu yɛ dzen. Sɛ yebotum ayɛ dɛm a ɔsɛ dɛ yɛtaa bɔ no mpaa na yefi hɛn akoma mu ka mbrɛ yesi tse nka kyerɛ no. Nkyii so, ɔsɛ dɛ yenya no mu ahotodo na yɛgye dzi dɛ ɔbɔboa hɛn. Sɛ yɛyɛ dɛm a, aber biara a wɔbɔsɔ hɛn gyedzi ahwɛ no, yɛdze akokodur begyina pintsinn.

9. Sɛ yɛda akokodur edzi a, ebɛnadze na otum fi mu ba?

⁹ Sɛ yɛda akokodur edzi a ɔboa hɛn wɔ akwan pii do. Hom mma yɛnhwɛ dza Ben yɛe. Ɔkɔr skuul wɔ Germany. Nna hɔn a wɔwɔ skuul hɔ no nyina gye adandandzi nkyerɛkyerɛ no dzi, na wɔka dɛ nsɛm a Bible no ka fa abɔdze ho no yɛ anansesɛm. Da kor bi, Ben ne kyerɛkyerɛnyi maa no hokwan dɛ ɔnkyerɛkyerɛ siantsir a ɔgye dzi dɛ obi na ɔbɔɔ nkwa no mu nkyerɛ no skuulfo no. Ɔdze akokodur kyerɛkyerɛɛ ne gyedzi mu kyerɛɛ hɔn. Ebɛnadze na ofii dza ɔyɛe no mu bae? Ben kaa dɛ: “Me kyerɛkyerɛnyi no yɛɛ dzinn tsiee dza nna mereka no. Afei, otsintsiim nsɛm a migyinaa do kyerɛkyerɛɛ me gyedzi mu no, na ɔkyekyɛe maa skuulfo no mu biara.” Ben no skuulfo no yɛɛ hɔn adze dɛn? Ben toaa do dɛ: “Skuulfo no mu pii tsiee dza mekae no, na wɔkaa dɛ woenya obu ama me paa.” Ben n’asɛm no ma yehu dɛ, sɛ obi wɔ akokodur a, mpɛn pii no afofor bu no. Afei so, obotum aboa nyimpa akomapafo ma wɔaabɔsom Jehovah. Iyi ma yehu dɛ no ho hia paa dɛ yɛda akokodur edzi.

10. Sɛ wɔka nokwardzi a, ɔkyerɛ dɛn?

¹⁰ Bible mu no, Hebrew kasafua a wɔkyerɛ ase “nokwardzi” anaa “nokwar dɔ” no, dza ɔkyerɛ nye dɛ obi dze noho bɛtakyer obi ho dzendzenndzen osian ɔdɔ a ɔwɔ ma no ntsi. Mpɛn pii no, sɛ wɔdze kasafua a ɔtse dɛm dzi dwuma a, nna ɔyɛ ɔdɔ a Nyankopɔn wɔ ma n’asomfo no ho asɛm na wɔreka. Wotum so dze dzi dwuma aber a wɔreka ɔdɔ a Nyankopɔn n’asomfo da no edzi kyerɛ hɔnho no. (2 Sam. 9:6, 7) Afei so, Jehovah hwɛ kwan dɛ hɛn so yɛbɔdɔ no na yeedzi no nokwar. Ber rokɔ do no, ɔpɛ a yɛwɔ dɛ yɛbɔkɔ do edzi Jehovah nokwar no mu bɛyɛ dzen. Hom mma yɛnhwɛ dza Daniel yɛe a ɔma yehu dɛ iyi nokwar.

11. Aber a nna Daniel abɔ akɔkora no, ebɛn nokwardzi ho nsɔhwɛ na ohyiae? (Hwɛ mfonyin a ɔwɔ Ɔweɔn-Aban yi enyim no.)

¹¹ Daniel no nkwa nda nyina, ohyiaa nsɔhwɛ ahorow a nna ɔbɛma wɔayɛ dzen ama no dɛ obedzi Jehovah nokwar. Nsɔhwɛ akɛse akɛse a ohyiae no, no mu kor nye dza ohyiae aber a nna ɔwɔ ne mfe 90 mu no. Dɛm aber no, nna Mediafo na Persiafo edzi Babylonfo do konyim, ma Ɔhen Darius na odzi adze. Nna hɔn a wɔsom wɔ ahemfie hɔ no mmpɛ Daniel n’asɛm koraa na wommbu Nyankopɔn a ɔsom no no so. Ntsi wɔbɔɔ pɔw bi a nna ɔbɛma woeku Daniel. Wɔmaa ɔhen no dze ne nsa hyɛɛ mbra bi ase. Nna wɔdze rosɔ Daniel ahwɛ dɛ ɔbɔkɔ do edzi nokwar ama ne Nyankopɔn anaa obetsie ɔhen no. Dza nna Daniel botum ayɛ dze akyerɛ dɛ otsie ɔhen no na ɔyɛ n’adze tse dɛ hɔn a wɔaka no ara nye dɛ, ɔrommbɔ Jehovah mpaa ndafua 30. Naaso Daniel kɔr do dzii Jehovah nokwar. No nokwardzi ntsi, wɔdze no kɔtoo ngyata bɔn mu. Naaso Jehovah tuaa Daniel kaw wɔ no nokwardzi no ho, na ɔgyee no fii ngyata no anomu. (Dan. 6:12-15, 20-22) Yebesi dɛn akɔ do edzi Jehovah nokwar daa dɛ mbrɛ Daniel yɛe no?

12. Ebɛnadze na ɔboaa Daniel ma ɔkɔr do dzii Jehovah nokwar?

¹² Dɛ mbrɛ yeedzi kan aka no, sɛ yebotum akɔ do edzi Jehovah nokwar a, ɔsɛ dɛ yɛma ɔdɔ a yɛwɔ ma no no yɛ kɛse. Daniel kɔr do dzii Jehovah nokwar osiandɛ nna ɔdɔ no sor Egya no paa. Ekyingye biara nnyi ho dɛ, Daniel nyaa ɔdɔ a ɔtse dɛm maa Jehovah osiandɛ ɔdwendween no su ahorow nye mbrɛ osi da no edzi no ho. (Dan. 9:4) Daniel sanee dwendween ndzɛmba pa a Jehovah ayɛ ama n’asomfo nye ɔno Daniel no ho na ɔkyerɛɛ ho enyisɔ.​—Dan. 2:20-23; 9:15, 16.

13. (a) Ebɛn ɔhaw na mbabun a wɔsom Jehovah no hyia? Ma ho nhwɛdo. (Hwɛ mfonyin no so.) (b) Ehwɛɛ video no, ihun dɛ sɛ obi bisa wo dɛ, ebɛnadze ntsi na Jehovah Adasefo nngye mbarimba na mbarimba a wɔnye hɔnho da nye mbaa na mbaa a wɔnye hɔnho da no nnto mu a, ebɛka dɛn?

 ¹³ Ndɛ so, hɔn a wonnyi obu biara ma Jehovah na wɔmmfa ne mbra nnyɛ hwee no etwa mbabun a wɔsom Jehovah no ho ehyia dɛ mbrɛ nna ɔtse wɔ Daniel n’afamu no. Obotum aba dɛ nyimpa a wɔtse dɛm no mmpɛ hɔn a wɔka dɛ wɔdɔ Nyankopɔn no asɛm koraa. Dɛm nkorɔfo yi mu binom mpo hyɛ hɛn nuanom mbabun yi dɛ wombu Jehovah ne mbra do. Ɔwodze, ma yɛnhwɛ dza ɔtoo hɛn nua bi a wɔfrɛ no Graeme a ɔwɔ Australia no. Ohyiaa tsebea bi a no mu yɛ dzen paa aber a ɔwɔ ntoado skuul no. Hɔn kyerɛkyerɛnyi no bisaa skuulfo no dɛ sɛ hɔn nyɛnko bi ka kyerɛ hɔn dɛ ɔno ɔyɛ banyin a ɔnye banyin da anaa ɔyɛ basia a ɔnye basia da a, wɔbɛyɛ hɔn adze dɛn? Kyerɛkyerɛnyi no kaa dɛ obiara a ɔgye to mu dɛ mfom biara nnyi ho dɛ obi bɛyɛ dɛm no ngyina afa, na hɔn a wɔnngye nnto mu no so ngyina afa. Graeme kaa dɛ: “Skuulfo no nyina kegyinaa fakor dze kyerɛɛ dɛ wɔgye to mu dɛ mfom biara nnyi ho. Emi na onua kor pɛ na yekegyinaa nkyɛn dze kyerɛɛ dɛ yɛnngye dɛm abrabɔ no nnto mu koraa.” Dza osii wɔ asɛm yi ekyir no maa ɔyɛɛ dzen maa Graeme dɛ ɔbɔkɔ do edzi Jehovah nokwar. Graeme toaa n’asɛm no do dɛ, “Nna dɔnhwer kor na yɛdze rusua adze no, naaso aber a dɛm asɛm no sii no, hɛn kyerɛkyerɛnyi no nye skuulfo nkaa no nyina dze mber a aka no guu hɛn enyim ase na wɔhyehyɛɛ hɛn ahorba pɔtɔɔ. Ntsi, meyɛɛ dɛ mobɔto mo bo ase akyerɛkyerɛ me gyedzi mu akyerɛ hɔn ma wɔaatse ase, naaso dza mekae no mu kor mpo nnyi hɔ a wotsiei.” Graeme tsee nka dɛn wɔ ɔhaw a ohyiae no ho? Ɔkaa dɛ, “Wɔannyɛ me dɛw dɛ wɔhyehyɛɛ me ahorba, naaso m’enyi gyee paa dɛ midzii Jehovah nokwar na mekyerɛkyerɛɛ me gyedzi mu.” c

14. Adze kor a obotum aboa hɛn ma yaakɔ do edzi Jehovah nokwar nye dɛn?

¹⁴ Sɛ yenya ɔdɔ a no mu yɛ dzen ma Jehovah dɛ mbrɛ Daniel yɛe no a, yebotum akɔ do edzi Jehovah nokwar. Sɛ yebenya ɔdɔ a ɔtse dɛm a, gyedɛ yesua Jehovah no su ahorow ho adze. Dɛ nhwɛdo no, yebotum esua ndzɛmba a ɔabɔ no ho adze. (Rom. 1:20) Sɛ epɛ dɛ ɔdɔ na obu a ewɔ ma Jehovah no yɛ kɛse a, ɔyɛ a kenkan nsɛm a ɔba a wɔato dzin “Aso Wɔbɔe?” anaa hwɛ no ho video ahorow no. Afei so, ibotum akenkan Was Life Created? nye The Origin of Life​—Five Questions Worth Asking nwomaba no. Ɔwodze, hwɛ dza akyerɛbaa bi a wɔfrɛ no Esther a ofi Denmark kae faa dɛm nwomaba no ho. Ɔkaa dɛ: “Nkyerɛkyerɛmu no tɔ asomu. Mbrɛ woesi akyerɛkyerɛ nsɛm mu wɔ nwomaba no mu no ma wankasa hu nokwasɛm a ɔfa abɔdze ho, na nnyɛ dɛ wɔrehyɛ wo ma agye dza nwoma no ka no ato mu kɛkɛ.” Ben a yeedzi kan aka noho asɛm no so kaa dɛ: “Nsɛm a mekenkanee no hyɛɛ me gyedzi dzen paa. Ɔmaa muhun dɛ Nyankopɔn na ɔbɔɔ adze nyina.” Sɛ isua dɛm nsɛm yi wie a, ibohu dɛ dza Bible no ka no yɛ nokwar. Ɔka dɛ: ‘Jehovah hɛn Nyankopɔn, ɔwo efata dɛ egye enyimnyam nye enyidzi nye tum: na ɔwo na ebɔɔ adze nyina, na wo pɛ ntsi na wɔwowɔ hɔ, na wɔbɔe.’​—Nyi. 4:11. d

15. Adze fofor so a obotum aboa hɛn ma yeenya ɔdɔ kɛse ama Jehovah nye dɛn?

¹⁵ Adze fofor so a obotum aboa hɛn ma yeenya ɔdɔ kɛse ama Jehovah nye dɛ yebosua ne Ba Jesus n’asetsena ho adze yie. Dɛm na akyerɛbaa bi a wɔfrɛ no Samira a ɔwɔ Germany no yɛe. Ɔkaa dɛ: “Musuaa Jesus ho adze no, ɔboaa me ma muhun Jehovah yie.” Aber a nna Samira yɛ abofra no, sɛ nna ɔtse dɛ wɔreka dɛ Jehovah dɔ no na obotum afa no nyɛnko a, nna ɔnntse ase.  Naaso sɛ wɔka dɛm fa Jesus ho dze a, nna ɔtse ase. Samira dze kaa ho dɛ: “Mepɛ Jesus n’asɛm osiandɛ nna ɔpɛ nyimpa asɛm na ɔdɔ mbofra so.” Aber a osuaa Jesus ho adze kɔr ekyir no, ohun Jehovah yie na ɔdɔɔ no kɛse. Ebɛnadze ntsi a? Ɔkaa dɛ: “Nkakrankakra, mubohun dɛ Jesus tse dɛ n’Egya pɛpɛɛpɛ. Hɔn suban yɛ pɛ. Mubohun dɛ, siantsir a Jehovah somaa Jesus baa asaase do no, no mu kor nye dɛ ɔbɛma adasamba ehu ɔno Jehovah yie.” (John 14:9) Sɛ epɛ dɛ enye Jehovah ntamu anyɛnkofa no mu yɛ dzen a, gye ber sua Jesus ho adze kɔ ekyir. Sɛ eyɛ dɛm a, ibotum akɔ do edzi Jehovah nokwar na ɔdɔ a ewɔ ma no no so mu bɛyɛ dzen paa.

16. Sɛ yedzi nokwar a, ebɛn nhyira na yebenya? (Ndwom 18:25; Micah 6:8)

¹⁶ Hɔn a wodzi nokwar no, ɔnnyɛ nwanwa dɛ wɔtaa nya anyɛnkofo a hɔn so wodzi nokwar, na hɔn anyɛnkofa no tum tsena hɔ daa. (Ruth 1:14-17) Ɔno da nkyɛn a, hɔn a wodzi Jehovah nokwar no so, wɔwɔ asomdwee nye akomatɔyamu. Ebɛnadze ntsi a? Osiandɛ Jehovah ahyɛ bɔ dɛ mbɔbɔrhufo anaa hɔn a wodzi no nokwar no, ɔno so bedzi hɔn nokwar. (Kenkan Ndwom 18:25; Micah 6:8.) Ɔwodze dwen ho hwɛ: Ɔbɔadze no a ɔyɛ adze nyina do Tumfo no ayɛ krado dɛ ɔbɔdɔ hɛn aber nyina! Dɛm ntsi, ɔhaw, hɛn atamfo anaa owu mpo runntum nntsew hɛn mmfi ɔdɔ a Nyankopɔn wɔ ma hɛn no ho. (Dan. 12:13; Luke 20:37, 38; Rom. 8:38, 39) Innhu dɛ no ho hia paa dɛ yesuasua Daniel na yɛkɔ do dzi Jehovah nokwar a?

17-18. Ebɛnadze bio na yebotum esua efi Daniel hɔ?

¹⁷ Adzesua yi mu no, yeesusu su ahorow a nna Daniel wɔ no mu ebien pɛ ho. Naaso ndzɛmba pii na yebotum esua efi no hɔ. Dɛ nhwɛdo no, Jehovah maa Daniel sosoo adaa na onyaa enyido-adzehu ahorow bi. Afei so, Jehovah boaa Daniel maa otumii kyerɛɛ nkɔnhyɛ ahorow ase. Dɛm nkɔnhyɛ ahorow no mu bi aba mu dada. Nkɔnhyɛ no mu bi so ma yehu dza obesisi daakye; ɔnodze ɔbɛka obiara a ɔwɔ asaase do no.

¹⁸ Adzesua a odzi hɔ mu no, yebosusu Daniel no nkɔnhyɛ no mu ebien ho. Sɛ yɛtse dɛm nkɔnhyɛ ahorow no ase ndɛ a, ɔbɔboa hɛn nyina ma yeesisi gyinae pa. Afei so, ɔbɔboa hɛn ma yeenya akokodur na yeetum dze nokwardzi egyina nsɔhwɛ a ɔrennkyɛr yebehyia no ano.