Sɛ yɛhwɛ asɛm a ɔwɔ Deuteronomy 22:25-27 no a, ɔnnyɛ mbrɛana wɔrobɔhwehwɛ mu ehu dɛ ɔbarimba no dzi fɔ, osiandɛ asɛm no ma ɔda edzi dɛ odzi fɔ dada. Dɛm mbra yi kyerɛ dza wɔbɛyɛ dze ehu dɛ ɔbaa no dzi bem. Ma yensusu asɛm no ho nhwɛ.

Nna Deuteronomy 22:23, 24 edzi kan akã ɔbaa a ɔbarimba bi ne nsa da no do na ɔbarimba fofor nye no ada “wɔ kurow mu” ho asɛm. Ɔbarimba a ɔnye ɔbaa no ada no atõ awar, osiandɛ sɛ ɔbarimba bi ne nsa da ɔbaa bi do dɛ ɔbɔwar no a, wobu no dɛ ɔyɛ ne yer. Na ɔbaa a ɔbarimba fofor nye no ada no so ɛ? Adzeyɛ no kɔr do wɔ “kurow mu” naaso “ɔannkeka mu.” Sɛ ɔkekaa mu a, nkyɛ afofor bɛtse ne nka ma wɔaagye no efi tsebea a ɔtse dɛm mu. Naaso, ɔannyɛ dɛm. Ntsi, nna ɔfoa bɔn a ɔtse dɛm do, kyerɛ dɛ, ɔatõ awar. Dɛm ntsi, hɔn beenu nyina dzi fɔ.

Afei, Mbra no kã tsebea fofor ho asɛm: “Na sɛ ɔbanyin [no] hu akataasia a wɔagye no yer no wɔ haban mu, na ɔbanyin no kyer no, na ɔnye no da a; ɔno ɔbanyin a ɔnye no dae no nko na onwu: na akataasia no dze mma nnyɛ no hwee; bɔn a ɔsɛ owu nnyi akataasia no do: na dɛ mbrɛ nyimpa soɛr ne nyɛnko do, na oku no no, mekyerɛ dɛmara so na asɛm yi tse: na haban mu na ohun no; na akataasia a wɔagye no yer no kekaa mu, na obi nnyi hɔ a ɔbɛgye no.”​—Deut. 22:25-27.

Tsebea a ɔtse dɛm mu no, atsɛmbuafo no fa no dɛ ɔbaa no noho nnyi asɛm. Ebɛnadze ntsi a? Wɔfa no dɛ ɔbaa no ‘kekaa mu, naaso nna obi nnyi hɔ a ɔbɛgye no.’ Ntsi, nna ɔmmfoa bɔn a ɔtse dɛm do, kyerɛ dɛ, ɔnntõo awar. Naaso, ɔbarimba no dze odzi fɔ; ɔato mbɔndar, nna ɔatõ awar so, osiandɛ ‘ɔakyer’ ɔbaa a ɔbarimba fofor ne nsa da no do na ‘ɔnye no ada.’

Ntsi mbra yi no botae nye dɛ, ɔrekyerɛ siantsir a ɔbaa no dzi bem. Ɔbarimba no dze, mbra no kyerɛ mu kofee dɛ odzi fɔ, osiandɛ ɔato mbɔndar, na ɔatõ awar so. Yebotum enya awerɛhyɛmu dɛ nsɛm a ɔtse dɛm mu no, nna atsɛmbuafo no ‘bɔhwehwɛ mu, na woeebisabisa mu yie.’ Iyi ekyir no, wobobu atsɛn ma ɔnye gyinapɛn a Nyankopɔn akã ho asɛm mpɛn pii no ehyia.​—Deut. 13:14; 17:4; Ex. 20:14.