Ɔweɔn-Aban a ɔbae wɔ afe yi mu no, ana agye ber akenkan ne nyinara? Ɔnodze, hwɛ dɛ ibotum eyiyi nsɛmbisa a odzidzi do yi ano a:

Christianfo a wɔasera hɔn no, ɔsɛ dɛ yebu hɔn dɛn?

Hɛn enyi sɔ gyedzi a wɔda no edzi no; naaso, yɛmmfa enyidzi mbordo mma hɔn. Yekwetsir dɛ yɛbɛhyɛ hɔn enyimnyam. (Jude 16) Ɔnnsɛ dɛ yebisabisa hɔn enyidado a wɔwɔ no ho nsɛm.​—w20.01, kr. 29.

Ebɛnadze ntsi na ɔsɛ dɛ egye dzi dɛ Jehovah nyim wo na ɔdwen woho?

Bible no da no edzi dɛ, ehyɛ yafun mu no, nna Jehovah nyim wo. Afei otsie wo mpaabɔ. Onyim dza ɔwɔ w’akoma mu, na onyim wo nsusui nye mbrɛ etse nka, afei wo ndzeyɛɛ ka no. (1 Mber. 28:9; Mbɛ. 27:11) Bio so, ɔatwe wo aba ne nkyɛn.​—w20.02, kr. 12.

Ebɛn aber na ɔsɛ dɛ yɛkasa, na ebɛn aber na ɔwɔ dɛ yɛyɛ komm?

Yɛdze enyigye kã Jehovah ho asɛm. Sɛ yehu dɛ obi reyɛ biribi a ɔbɛma ɔayɛ bɔn a no mu yɛ dur a, yɛkã ho asɛm. Sɛ no ho ba hia dɛ asafo mu mpanyimfo dze afotu ma a, wɔkasa. Ɔnnsɛ dɛ yebisa anaa yɛkã mbrɛ yesi yɛ hɛn som edwuma no wɔ aman a wɔabra hɛn som wɔ mu no ho asɛm. Yɛnnkã kukua mu nsɛm nnkyerɛ afofor.​—w20.03, nkr. 20-21.

Ebɛn kwan do na mbɛbɛw a wɔakã hɔnho asɛm wɔ Joel tsir 2 no yɛ soronko fi dza ɔwɔ Nyikyerɛ tsir 9 no ho?

Joel 2:20-29 kã dɛ Nyankopɔn paam mbɛbɛw no kɔree na ɔhyɛɛ bɔ dɛ, dza wɔsɛɛ no no, ɔbɛhyɛ ananmu. Ɔno ekyir no, Nyankopɔn huee no sunsum guu n’asomfo do. Nkɔnhyɛ no n’afã ahorow yi baa mu ber a Babylon nsordaafo towee hyɛɛ Israel asaase do no, nye dza osii mber bi ekyir no. Wɔ Nyikyerɛ 9:1-11 no, mbɛbɛw a wɔwɔ hɔ no gyina hɔ ma hɔn a wɔasera hɔn a wɔwɔ hɛn aber yi do a wɔdze ndam kã Nyankopɔn n’atsɛmbu a otsia wiadze bɔn yi ho asɛm. Atsɛmbunsɛm a wɔkã no ma hɔn a wɔtaa wiadze no ekyir no tse nka dɛ wɔretseetsee.​—w20.04, nkr. 3-6.

Ndɛ, woana nye etsifi afamu hen no?

Russia nye aman a wɔka noho. Wɔatow ahyɛ Nyankopɔn no nkorɔfo do, kyerɛ dɛ, wɔdze hɔn nsa ato asɛnka edwuma no do, na wɔda no edzi dɛ wɔtan Adasefo no. Etsifi afamu hen no bɔ mbɔdzen dɛ ɔnye anaafo afamu hen no bedzi esi.​—w20.05, kr. 13.

Aso su ahorow akron a wɔakã ho asɛm wɔ Galatiafo 5:22, 23 no nye “sunsum no aba” no nyinara?

Dabi. Sunsum krɔnkrɔn boa hɛn ma yɛda su pa ahorow pii a bi nye tsenenee edzi. (Eph. 5:8, 9)​—w20.06, kr. 17.

Ebɛn esian na ɔwɔ ndzɛmba a ɔfa woho a edze gu sohyial media do no mu?

Dza edze gu sohyial media do no bɛma nkorɔfo enya adwen dɛ ituw woho, na emmbrɛ woho adze.​—w20.07, nkr. 6-7.

Ebɛnadze na Christianfo asomfo botum esũa efi afarfo a hɔnho akokwaa no hɔ?

Wɔyɛ edwuma wɔ ber nye bea a wobenya nam. Wonyim mbrɛ wobesi dze edwindadze a ɔfata ayɛ edwuma. Na wɔdze akokodur yɛ edwuma wɔ tsebea a no mu yɛ dzen mu. Hɛn so, yebotum ayɛ dɛmara wɔ hɛn asɛnka edwuma no mu.​—w20.09, kr. 5.

Ebɛn akwan ahorow na yebotum afa do aboa hɛn Bible esuafo ma woeenya ɔdɔ kɛse ama Jehovah?

Yebotum ahyɛ hɔn nkuran ma wɔaakenkan Bible no da biara na wɔaadwendwen dza wɔkenkan no ho. Bio so, ɔsɛ dɛ yɛkyerɛ hɔn mbrɛ wobesi abɔ mpaa.​—w20.11, kr. 4.

Asɛm a ɔnye dɛ: “Hɔn nyina benya nkwa wɔ Christ mu” no, woananom na wɔka ho?—1 Cor. 15:22.

Nna nnyɛ dza ɔsomafo Paul rekã nye dɛ wobenyan nyimpa biara. Mbom no, nna ɔrekã Christianfo a wɔasera hɔn a “wɔasan hɔn ho wɔ Christ Jesus mu” no ho asɛm. (1 Cor. 1:2; 15:18)​—w20.12, nkr. 5-6.

Hɔn a wɔasera hɔn no, sɛ wɔsesa hɔn wɔ ‘enyibu mu, wɔ ekyir abɛntoa no mu’ a, ebɛnadze na wɔbɛyɛ?​—1 Cor. 15:51-53.

Wɔnye Christ bɔbɔ mu dze dadze poma ahwɛ amanaman no, kyerɛ dɛ, wɔbɛsɛɛ amanaman no koraa. (Nyi. 2:26, 27)​—w20.12, nkr. 12-13.