Ɔweɔn-Aban a ɔbae wɔ afe yi mu no, ana agye ber akenkan ne nyinara? Ɔnodze, hwɛ dɛ ibotum eyiyi nsɛmbisa a odzidzi do yi ano a:

Ebɛn awerɛhyɛmu na asɛm a ɔwɔ Joel 2:13 a ɔkã dɛ Jehovah yɛ “mbɔbɔrhufo” na “n’adɔyɛ sõ” no ma yenya?

Yenyim dɛ Jehovah hu hɛn mbɔbɔr na ɔdze hɛn mfom kyɛ hɛn. Joel 2:13 ma hɛn awerɛhyɛmu dɛ ofi ɔdɔ mu boa hɛn. Ɔwɔ dɛ yesũasua no.​—w21.01, kr. 21.

Ebɛnadze ntsi na Jehovah yɛɛ tsiryɛ ho nhyehyɛɛ no?

Ɔdɔ a ɔwɔ no na ɔmaa ɔyɛɛ dɛm. Dɛm nhyehyɛɛ yi ma asomdwee tsena n’ebusua no mu, na ɔma biribiara kɔ do pɛpɛɛpɛ. Osian nhyehyɛɛ yi ntsi, Jehovah n’ebusua no mufo nyim obi a ɔsɛ dɛ osisi gyinae nye obi a ɔsɛ dɛ ɔhwɛ ma wɔdze gyinaesi no yɛ edwuma.​—w21.02, kr. 3.

Ebɛnadze ntsi na ɔsɛ dɛ Christianfo yɛ ahwɛyie wɔ intanɛt do dwumadzi a wɔdze dzi nkitaho no ho?

Sɛ obi si gyinae dɛ ɔnam dwumadzi a ɔtsetse dɛm do nye afofor bedzi nkitaho a, ɔsɛ dɛ ɔyɛ ahwɛyie wɔ hɔn a ɔnye hɔn bɔbɔ no ho. Ɔbɛyɛ dzen dɛ obi bɛyɛ ahwɛyie a ɔtse dɛm aber a ɔwɔ kuw bi a no mufo dɔɔ sõ mu no. (1 Tim. 5:13) Sɛ obi nam dwumadzi a ɔtse dɛm do tserɛw nsɛm a onnyi ngyinado biara mu a, ɔyɛ hũ paa. Dɛmara so na sɛ ɔdze pɛ enuanom ho mfaso a, ɔyɛ hũ.​—w21.03, kr. 31.

Ebɛnadze ntsi na Nyankopɔn maa kwan ma Jesus hun amandze na owui?

Siantsir kor nye dɛ wɔsɛɛn Jesus wɔ dua do mbrɛ ɔbɛyɛ a ɔbɛgye Jewfo no efi ndom bi ase. (Gal. 3:10, 13) Siantsir a otsĩa ebien nye dɛ nna Jehovah retsetse Jesus ama dwuma a nna obedzi dɛ Sɔfopanyin no. Siantsir a otsĩa ebiasa nye dɛ nokwar a Jesus dzii kesii owu mu no maa ɔdaa edzi dɛ, ɔmmfa ho nsɔhwɛ a no mu yɛ dzen a nyimpa behyia no, wobotum edzi nokwar ekesi ase. (Job 1:9-11)​—w21.04, nkr. 16-17.

Sɛ ekɔ asɛnka na ɔyɛ dzen dɛ ebɔto nkorɔfo wɔ fie a, ebɛnadze na ibotum ayɛ?

Ibotum asesa ber a edze kɔ hɔ no mu, na akɔ hɔ wɔ ber a wɔwɔ fie. Ibotum so asesa beebi a ekã asɛm no. Afei ibotum asesa kwan a efa do kã asɛm no; ibotum afa krataakyerɛw do edzi dase.​—w21.05, nkr. 15-16.

Aber a ɔsomafo Paul kãa dɛ: “Ɔnam mbra do muwui maa mbra” no, nna ɔrepɛ akyerɛ dɛn? (Gal. 2:19)

Moses Mbra no maa ɔdaa edzi dɛ adasamba nndzi mũ, na ɔboaa Israelfo no ma wohun Christ no. (Gal. 3:19, 24) Iyi na ɔboaa Paul ma ɔgyee Jesus Christ dzii. Dɛm a Paul yɛe no maa ‘owui maa mbra’ no; nna Mbra no nnyi no do tum bio.​—w21.06, kr. 31.

Ebɛn kwan do na Jehovah ayɛ abotar a wɔdze tsim ho nhwɛdo ama hɛn?

Jehovah dze abotar egyina ndzɛmba a odzidzi do yi ano: Ahorohoraa a wɔdze abɔ ne dzin, no tumdzi a wɔasoɛr etsia, etũa a ne mba binom atsew etsia no, atorsɛm a Satan kã fa noho, amandze a n’asomfo hu, n’anyɛnkofo a woewuwu a ɔafe hɔn, ndzebɔnyɛfo a wɔhyɛ afofor do, nye n’abɔdze a wɔresɛɛ no.​—w21.07, nkr. 9-12.

Ebɛnadze na yesũa fi abotar a Joseph daa no edzi no mu?

Noara no nuanom nye no enndzi no yie. Iyi maa ɔkɛyɛɛ akowaa wɔ Egypt. Ɔwɔ hɔ no, wotwaa asɛm too no do, na ɔkɛdaa efiadze mfe pii.​—w21.08, kr. 12.

Ebɛn asɛnkyerɛdze kwan do ɔwosow na Haggai 2:6-9, 20-22 kã ho asɛm no?

Amanaman no enyi nngye asɛmpa a yɛkã no ho, naaso nyimpa pii so abɛgye nokwar no. Ɔwosow a ɔrennkyɛr ɔbɛba no yɛ ɔsɛɛ pasaa a Jehovah dze bɛba n’atamfo do.​—w21.09, nkr. 15-19.

Ebɛnadze ntsi na ɔnnsɛ dɛ yɛpa abaw wɔ asɛnka edwuma a yɛreyɛ no ho?

Jehovah hu hɛn mbɔdzembɔ no, na ɔgye dza yɛyɛ ma no no to mu. Sɛ yɛammpa abaw a, yebenya onnyiewiei nkwa.​—w21.10, nkr. 25-26.

Ebɛn kwan do na Leviticus tsir 19 boa hɛn ma yɛdze asɛm a ɔnye dɛ: “Homankasa so nyɛ krɔnkrɔn wɔ [hom] asetsena nyina mu” no yɛ edwuma? (1 Pet. 1:15)

Obotum aba dɛ asɛm a ɔwɔ Leviticus 19:2 no na Peter fae kãe. Leviticus tsir 19 no ma yehu akwan a yebotum afa do dze 1 Peter 1:15 no ayɛ edwuma wɔ hɛn asetsena mu.​—w21.12, nkr. 3-4.