Ɔweɔn-Aban a ɔbae wɔ afe yi mu no, ana agye ber akenkan ne nyinara? Ɔnodze, hwɛ dɛ ibotum eyiyi nsɛmbisa a odzidzi do yi ano a:

Sɛ yɛgye ber nye Jehovah kasa, yetsie no na yɛdwendwen noho a, ebɛn mfaso na yenya?

Yebotum esisi gyinae pa, yɛbɛyɛ akyerɛkyerɛfo pa, hɛn gyedzi bɛyɛ dzen, na ɔdɔ a yɛwɔ ma Jehovah no so bɛyɛ kɛse.​—w22.01, nkr. 30-31.

Sɛ yenya Jehovah nye hɔn a wodzi ndzɛmba enyim no mu awerɛhyɛmu ndɛ a, ɔbɔboa hɛn dɛn?

Dɛm aber yi na ɔsɛ dɛ yɛgye to mu dɛ Nyankopɔn yɛ dza ɔtsen aber nyina. Ɔnnsɛ dɛ hɛn adwen mu yɛ hɛn konsee wɔ akwankyerɛ a mpanyimfo no dze ma hɛn no ho. Dɛm no, aber a ahohiahia kɛse no ahyɛ ase no, ɔrennyɛ dzen mma hɛn dɛ yebetsie akwankyerɛ a bi a ɔtse dɛ mbrɛ nyansa anaa ntseasee nnyi mu no.​—w22.02, nkr. 4-6.

Aber a ɔbɔfo no kaa kyerɛɛ Zechariah dɛ wobohu “promo no wɔ [Ambrado] Zerubbabel nsamu” no, nna ɔrepɛ akyerɛ dɛn? (Zech. 4:8-10)

Enyido-adzehu no maa Nyankopɔn no nkorɔfo awerɛhyɛmu dɛ, mbrɛ ɔtse biara nna wobesi asɔrfi no ewie, na ɔbɛyɛ tse dɛ mbrɛ Nyankopɔn hwɛ kwan no.​—w22.03, nkr. 16-17.

Yebesi dɛn dze hɛn kasaa ayɛ nhwɛdo? (1 Tim. 4:12)

Ɔnye dɛ yɛnye nkorɔfo bɛkasa enyidzi mu wɔ asɛnka mu, yebefi hɛn akoma nyinara mu atow ndwom na yaama mbuae wɔ asafo nhyiamu ase. Afei so, yɛbɛka nokwar, yɛdze hɛn kasaa bɛhyɛ nkorɔfo dzen na yɛrennkasa nntsia obiara.​—w22.04, nkr. 6-9.

Mbowa anan (aban ahorow) a Daniel tsir 7 ka hɔn ho asɛm no, Nyikyerɛ 13:1, 2 ka hɔn su ahorow no bɔ mu yɛ no abowa kor nedze. Ebɛnadze ntsi a?

Abowa a Nyikyerɛ 13 ka no ho asɛm no nngyina hɔ mma aban kor tse dɛ Rome. Mbom ogyina hɔ ma aban ahorow nyina a woedzi nyimpa do fi tsetse dze besi ndɛ.​—w22.05, kr. 9.

Ebɛnadze tsitsir na yɛyɛ a ɔkyerɛ dɛ yɛwɔ ahotodo dɛ Nyankopɔn bu atsɛntsenenee?

Sɛ obi hyehyɛ hɛn ahorba, ɔyɛ adze ma ɔyɛ hɛn yaw anaa ɔyɛ hɛn bɔn a, ɔnnsɛ dɛ yɛdze nyimpa no ho ebufuw hyɛ hɛn mu. Mbom ɔsɛ dɛ yegyaa asɛm no mu ma Jehovah. Obesiesie ɔhaw biara a bɔn dze aba no.​—w22.06, nkr. 10-11.

Sɛ onua bi rigyina enuanom ananmu abɔ mpaa wɔ asafo nhyiamu ase a, ebɛnadze na ɔsɛ dɛ ɔma ɔtsena n’adwen mu?

Ɔnnsɛ dɛ ɔma ne mpaabɔ yɛ tse dɛ orutu enuanom fo anaa ɔrema nkaabɔ. Ɔnnsɛ dɛ ‘ɔkasa dodow’ anaa ɔma ne nsɛm yɛ pii nkanka aber a ɔrobɔ mpaa ma wɔdze ahyɛ adzesua ase no. (Matt. 6:7)​—w22.07, nkr. 24-25.

‘Hɔn a wɔyɛɛ dza omuo’ no, ebɛn kwan do na wɔbɔkɔ ‘atsɛmbu wusoɛr mu’? (John 5:29)

Worinngyina hɔn nkan abrabɔ do mmbu hɔn atsɛn. Sɛ wonyan hɔn a, Jesus dze n’enyi bedzi hɔn ekyir na ɔaahwɛ dɛ wɔbɛyɛ dza ɔtsen anaa.​—w22.09, kr. 18.

Ebɛn asɛm a ɔhyɛ nkuran na ɔyɛ enyigye na J. F. Rutherford dze too gua wɔ September 1922 ehyiadzi no ase?

Ehyiadzi a wɔyɛe wɔ Cedar Point, Ohio, U.S.A. no, ɔdze too gua dɛ: “Ɔhen no ridzi tum! Na hom nye n’adawurbɔfo. Ntsi hom mbɔ, hom mbɔ, hom mbɔ Ɔhen no nye n’Ahendzi no ho dawur!”​—w22.10, nkr. 3-5.

Isaiah tsir 30 no ma yehu ndzɛmba ebiasa a Jehovah yɛ dze boa hɛn ma yegyina ɔhaw ano. Ɔno nye dɛn?

Isaiah tsir 30 no ma yehu dɛ (1) ɔkyɛn n’aso tsie hɛn mpaabɔ na ɔma ho mbuae, (2) ɔma hɛn akwankyerɛ, na (3) ɔma hɛn ndzɛmba pa ndɛ na daakye so ɔbɛyɛ dɛmara ama hɛn.​—w22.11, kr. 9.

Ebɛn kwan do na asɛm a ɔwɔ Ndwom 37:10, 11, 29 no baa mu wɔ tsetse mber mu na ɔbɛba mu so daakye?

Asɛm a David kae yi ma yehu nhyira a Israelfo no nyae, tse dɛ nhyira a wonyae aber a nna Solomon dzi adze no. Jesus faa asɛm a ɔwɔ nyiyimu 11 no kae aber a ɔreka Paradise a ɔbɛba ho asɛm no. (Matt. 5:5; Luke 23:43)​—w22.12, nkr. 8-10, 14.