1. Mpɛn pii no, ebɛn kwan na Jehovah fa do bua n’asomfo hɔn mpaabɔ?

 ANA inyim dɛ Jehovah botum afa wo do ebua mpaa a no somfo bi fi n’akoma mu bɔ no? Nokwasɛm nye dɛ, sɛ eyɛ asafo mu panyin o, asafo mu somfo o, kwampaafo anaa ɔdawurbɔfo o, Jehovah botum afa wo do ebua no somfo bi ne mpaabɔ. Dɛ eyɛ abofra anaa panyin, onuabanyin anaa akyerɛbaa no, Jehovah botum afa wo do ebua obi ne mpaabɔ. Sɛ obi a ɔdɔ Jehovah su frɛ no dɛ ɔmboa no a, mpɛn pii no Jehovah fa asafo mu mpanyimfo nye n’asomfo anokwafo afofor do kyekye dɛm nyimpa no werɛ. (Col. 4:11) Ɔyɛ hɛn dɛw paa dɛ yɛrosom Jehovah na yɛroboa hɛn nuanom wɔ dɛm kwan no do! Sɛ yarba bi tsew si beebi a yɛwɔ no, atoyerɛnkyɛm bi si anaa wɔsoɛr tsia hɛn a, yebotum akyekye hɛn nuanom no hɔn werɛ na yaaboa hɔn.

2. Sɛ yarba bi tsew si beebi a yɛwɔ no a, ebɛnadze ntsi na obotum ayɛ dzen dɛ yɛbɔboa afofor?

² Sɛ yarba bi retserɛw a, obotum ayɛ dzen dɛ yɛbɔboa afofor. Dɛ nhwɛdo no, bi a na yɛpɛ dɛ yɛkɛsera hɛn nuanom no, naaso ɔrennyɛ papa dɛ yɛbɛyɛ dɛm osian yarba no ntsi. Afei so bi a nna yɛpɛ dɛ yɛto nsa frɛ hɔn a hɔn sikasɛm nnyɛ no na yɛnye hɔn bɔ mu dzidzi, naaso yerunntum nnyɛ biribi a ɔtse dɛm so. Bio so, sɛ hɛn ebusuafo rihyia ɔhaw a, obotum ayɛ dzen ama hɛn dɛ yɛbɔboa afofor. Naaso, iyi nyina mu no, yɛpɛ dɛ yɛboa hɛn nuanom no. Sɛ yɛyɛ dza yebotum biara boa hɛn nuanom no a, ɔma Jehovah n’enyi gye paa. (Mbɛ. 3:27; 19:17) Ebɛn ndzɛmba na yebotum ayɛ dze aboa?

3. Ebɛnadze na yebotum esua efi dza Desi n’asafo mu mpanyimfo no yɛe no mu? (Jeremiah 23:4)

³ Dza asafo mu mpanyimfo botum ayɛ. Sɛ eyɛ asafo mu panyin a, ɔsɛ dɛ ehu enuanom no yie. (Kenkan Jeremiah 23:4.) Hɛn akyerɛbaa Desi a yɛkaa noho asɛm wɔ adzesua a odzi iyi enyim mu no kaa dɛ, “Ansaana yarba no reba no, nna asafo mu mpanyimfo a wɔwɔ m’asɛnka kuw mu no nye emi na enuanom afofor bɔ mu kɔ  asɛnka. b Afei so nna wɔnye hɛn bɔ mu kɛgye hɛn enyi.” Osian dza nna asafo mu mpanyimfo no yɛ ntsi, aber a COVID-19 yarba no kunkum Desi n’ebusuafo binom no, annyɛ dzen koraa dɛ wɔbɔboa no.

4. Ebɛnadze ntsi na Desi n’asafo mu mpanyimfo no tumii boaa no, na ebɛnadze na asafo mu mpanyimfo botum esua efi mu?

⁴ Desi kaa dɛ, “Nna asafo mu mpanyimfo no yɛ m’anyɛnkofo, ntsi annyɛ dzen amma me koraa dɛ mebɛka mbrɛ nna metse nka nye dza ɔhaw me no ho asɛm akyerɛ hɔn.” Ebɛnadze na asafo mu mpanyimfo botum esua efi asɛm yi mu? Ɔsɛ dɛ hom boa enuanom no na hom hyɛ hɔn nkuran ansaana ɔhaw bi aba. Ɔsɛ dɛ hom fa enuanom no nyɛnko. Sɛ yarba bi tsew si beebi a hom wɔ no, na ɔma ɔyɛ dzen ma hom dɛ hom bɔkɔ akɛsera hom nuanom no a, hom mfa akwan afofor do nye hɔn ndzi nkitaho. Desi kaa dɛ, “Da bi wɔ hɔ a, nna asafo mu mpanyimfo no mu pii frɛ me anaa wɔsɛnd me mɛsegye. Ɔwɔ mu, kyerɛwnsɛm a wɔnye me susuu ho no, nna minyim no yie, naaso ɔkaa m’akoma paa.”

5. Asafo mu mpanyimfo besi dɛn ehu dza enuanom hia na wɔaboa hɔn?

⁵ Kwan kor a hom botum afa do ehu dza enuanom no hia nye dɛ ibebisa hɔn nsɛm ahorow. Naaso ɔsɛ dɛ hom yɛ ahwɛyie na hom eemmbisa hɔn nsɛm a ɔbɛma hɔn enyi ewu. (Mbɛ. 20:5) Aso edziban a wɔwɔ no bɔso hɔn? Ana wɔwɔ ndur anaa ndzɛmba afofor a wobehia? Ana hɔn edwuma botum efi hɔn nsa? Ana wɔwɔ sika a wobotum dze etua hɔn dan kaw? Sɛ aban no ayɛ nhyehyɛɛ a wɔdze bɔboa hɔn a wohia mboa no a, ana hɔn enyi bɛgye ho dɛ yɛbɔboa hɔn ma hɔn nsa aaka mboa a ɔtse dɛm? Enuanom no boaa Desi ma ne nsa kaa asetsena mu ndzɛmba a nna ohia no. Naaso adze a ɔboaa no paa nye dɛ, asafo mu mpanyimfo no maa ohun dɛ wɔdɔ no paa, na wɔdze Bible no hyɛɛ no nkuran. Ɔkaa dɛ: “Asafo mu mpanyimfo no nye me bɔɔ mpaa. Nokwasɛm nye dɛ, mennkaa nsɛm a wɔkae wɔ mpaabɔ no mu no. Naaso hɔn mpaabɔ no kaa m’akoma paa, na mo werɛ rimmfir da. Nna ɔyɛ kwan a Jehovah refa do aka akyerɛ me dɛ, ‘Ɔnnkaa w’ankotsee.’”​—Isa. 41:10, 13.

6. Ebɛnadze na enuanom a wɔwɔ asafo no mu no botum ayɛ dze aboa afofor? (Hwɛ mfonyin no.)

⁶ Dza enuanom afofor so botum ayɛ. Ɔyɛ asafo mu mpanyimfo no hɔn asodzii dɛ wɔbɔhwɛ enuanom a wɔwɔ asafo no mu no. Naaso Jehovah hwɛ kwan dɛ hɛn nyina yɛbɛhyehyɛ hɛnho nkuran. (Gal. 6:10) Sɛ yɛyɛ biribi kakraabi mpo dze boa obi a ɔyar a, obotum ahyɛ no nkuran paa. Hɛn mbofra no mpo botum adorɔw biribi anaa wɔdze  kaad akɛma onua bi dze ahyɛ no nkuran. Ɔbabun bi so botum ekedzi gua ama akyerɛbaa bi anaa ɔayɛ ndzɛmba afofor bi aboa no. Enuanom afofor so botum ayɛ edziban akɛma onua bi a ɔyar wɔ ne fie. Nokwasɛm nye dɛ, sɛ yarba bi tserɛw wɔ beebi a yɛwɔ no a, obiara a ɔwɔ asafo no mu no behia nkuranhyɛ. Sɛ yehyia mu enyim na enyim yɛ asafo nhyiamu anaa yɛyɛ no wɔ video kɔnferɛns do na yɛpon a, bi a yebotum atweɔn kakra na yɛnye enuanom no aabɔ nkɔmbɔ. Ɔsɛ dɛ yɛkaa dɛ asafo mu mpanyimfo so hia nkuranhyɛ. Sɛ yarba bi retserɛw a, asafo mu mpanyimfo yɛ edwumadzen dze boa enuanom no. Dɛm ntsi enuanom binom kyerɛw nkrataa dze kɛda asafo mu mpanyimfo no ase wɔ mbɔdzen a wɔbɔ no ho. Sɛ yɛyɛ dza yebotum biara dze afotu a ɔnye dɛ “hom nhyɛ homho nkuran nkorkor, na hom mboa homho nkorkor” no yɛ edwuma a, ɔboa paa!​—1 Thess. 5:11.

7. Sɛ atoyerɛnkyɛm bi si a, ebɛn ɔhaw na ɔdze ba?

⁷ Sɛ atoyerɛnkyɛm bi si a, obotum asesa obi n’asetsena mpofirmu. N’egyapadze anaa ne fie botum asɛɛ, na n’adɔfo mpo botum ewu. Dɛm awerɛhosɛm yi botum ato hɛn nuanom so. Sɛ ɔba no dɛm a, ebɛnadze na yebotum ayɛ dze aboa hɔn?

8. Ebɛnadze na asafo mu mpanyimfo nye mbusua tsir botum ayɛ ansaana atoyerɛnkyɛm bi esi?

⁸ Dza asafo mu mpanyimfo botum ayɛ. Asafo mu mpanyimfo, hom mboa enuanom no ma wonhu dza wɔbɛyɛ ansaana atoyerɛnkyɛm bi esi. Hom nhwɛ nhu dɛ obiara a ɔwɔ asafo no mu nyim dza ɔbɛyɛ dze abɔ noho ban. Afei so hom mboa hɔn ma wonhu mbrɛ wobesi nye asafo mu mpanyimfo no edzi nkitaho. Hɛn akyerɛbaa Margaret a yɛkaa noho asɛm wɔ adzesua a odzi iyi enyim mu no kaa dɛ: “Aber a hɛn asafo mu mpanyimfo nye hɛn rususu hɛn asafo no n’ehiadze ho no, wɔbɔɔ hɛn kɔkɔ dɛ ogya a ɔrehyehyew no botum atɔ beebi a yɛwɔ no. Wɔkaa kyerɛɛ hɛn dɛ, sɛ etumfo no ka dɛ yentu mfi beebi a yɛwɔ no, anaa sɛ yehu dɛ gya botum ama hɛn nkwa abɛda esian mu a, yentu mfi hɔ ntsɛmara.” Asɛm a mpanyimfo no nye enuanom no susuu ho no, nna ɔyɛ ne ber mu dze paa, osiandɛ adapɛn enum ekyir no, ogya a n’ano yɛ dzen tɔɔ beebi a wɔwɔ no. Mbusua tsir, sɛ hom reyɛ hom ebusua som a, hom botum ama hom ebusua no munyi biara ehu dza ɔsɛ dɛ ɔyɛ ber a atoyerɛnkyɛm bi esi no. Sɛ hom nye hom mba no nyim dza hom bɛyɛ ansaana atoyerɛnkyɛm bi esi a, bi a ɔremma hom akoma nntu pii ber a atoyerɛnkyɛm bi esi no.

9. Ansaana atoyerɛnkyɛm bi besi nye ber a atoyerɛnkyɛm bi esi no, ebɛnadze na asafo mu mpanyimfo botum ayɛ?

⁹ Sɛ eyɛ asɛnka kuw do hwɛfo a, hwɛ hu dɛ ewɔ enuanom a wɔwɔ wo kuw no mu nyina hɔn tɛlefon nɔmba na hɔn adrɛɛse. Ɔsɛ dɛ eyɛ iyi ansaana atoyerɛnkyɛm bi esi. Kyerɛw enuanom no hɔn nɔmba no to hɔ, na ofi ber to ber no hwɛ dɛ wɔda ho ara dze dzi dwuma a. Sɛ eyɛ dɛm a, ɔrennyɛ dzen koraa dɛ enye ɔdawurbɔfo biara a ɔwɔ wo kuw no mu no bedzi nkitaho na eehu dza ohia aber a atoyerɛnkyɛm bi esi no. Sɛ ihu dza enuanom no hia a, ka ho asɛm kyerɛ mpanyimfo ntamu nkitahodzifo no ntsɛmara, na ɔno so bɛka ho asɛm akyerɛ ɔmansin do hwɛfo no. Sɛ asɛnka kuw do hwɛfo, mpanyimfo ntamu nkitahodzifo nye ɔmansin do hwɛfo no bɔ mu yɛ edwuma a, ɔma wotum boa enuanom a wohia mboa no paa. Aber a ogya tɔɔ beebi a nna Margaret wɔ no, hɔn mansin do hwɛfo no annda. Ogyinaa ne nan do ndɔnhwer 36 yɛɛ edwumadzen dze boaa enuanom no. Aber a nna asafo mu mpanyimfo nye enuanom bɛyɛ 450 a nna wonnyi beebi da no ridzi nkitaho no, nna ɔno so nye mpanyimfo no ridzi nkitaho ahwɛ dza wobotum ayɛ aboa enuanom no. (2 Cor. 11:27) Dza wɔyɛe no maa wotumii boaa dɛm enuanom yi ma wonyaa beebi dae.

10. Ɔsɛ dɛ asafo mu mpanyimfo fa asodzi a wɔwɔ dɛ wɔdze Bible no bɛhyɛ enuanom nkuran na wɔaaboa hɔn no enyibersɛm. Ebɛnadze ntsi a? (John 21:15)

¹⁰ Ɔyɛ asafo mu mpanyimfo hɔn asodzii dɛ wɔdze Bible no bɛhyɛ enuanom nkuran na wɔaaboa hɔn a dadwen ahyɛ hɔn do no. (1 Pet. 5:2) Sɛ atoyerɛnkyɛm  bi si a, ɔsɛ dɛ asafo mu mpanyimfo dzi kan hwɛ hu dɛ onua biara ho yie. Afei so, ɔsɛ dɛ wɔhwɛ hu dɛ enuanom no wɔ dza wobedzi, dza wɔbɛhyɛ nye beebi a wɔbɛda. Naaso sɛ atoyerɛnkyɛm bi si ma abosoom pii twa mu mpo a, no ho behia dɛ wɔkɔ do ara hyɛ enuanom no nkuran na wɔkyekye hɔn werɛ. (Kenkan John 21:15.) Harold som dɛ Nkorbata Egyinatukuw bi munyi na ɔnye enuanom pii a atoyerɛnkyɛm ato hɔn no abɔ nkɔmbɔ. Ɔkaa dɛ: “Sɛ atoyerɛnkyɛm bi si a, ɔgye mber kakra ana ndzɛmba aasan ayɛ yie. Ndzɛmba bi wɔ hɔ a, hɔn werɛ botum efir. Naaso sɛ atoyerɛnkyɛm no maa hɔn dɔfo bi wui, hɔn egyapadze bi a ɔsom bo sɛɛe anaa nkyɛ atoyerɛnkyɛm no rema woewu a, ɔno dze hɔn werɛ rimmfir. Sɛ wɔkaa nsɛm a ɔtse dɛm a, obotum ama hɔn werɛ ahow. Sɛ wodzi awerɛhow a, ɔyɛ no kwan do, naaso ɔno nnkyerɛ dɛ wonnyi gyedzi.”

11. Ebɛn mboa na ɔsɛ dɛ asafo mu mpanyimfo kɔ do ara dze ma mbusua?

¹¹ Asafo mu mpanyimfo dze afotu a ɔka dɛ “hom nye hɔn a wosu no nnsu” no yɛ edwuma. (Rom. 12:15) Ɔsɛ dɛ asafo mu mpanyimfo hyɛ hɔn a atoyerɛnkyɛm ato hɔn no nkuran na wɔma wohu dɛ Jehovah na enuanom no da ho ara dɔ hɔn. No ho behia dɛ wɔboa mbusua ahorow no ma wɔkɔ do bɔ mpaa, wosua adze, wɔkɔ asafo nhyiamu na wɔyɛ asɛnka edwuma no. Afei so, asafo mu mpanyimfo botum ahyɛ awofo nkuran dɛ wɔmboa hɔn mba no ma wɔmfa hɔn adwen nsi ndzɛmba a atoyerɛnkyɛm biara nnkotum asɛɛ no no do. Awofo, hom mboa hom mba no ma wonhu dɛ, Jehovah dze, sɛ wɔfa no Nyɛnko a, orinnyi hɔn baako nnhyɛ hɔn nsa da, na ɔbɔboa hɔn aber biara. Afei so, hom mma wonhu dɛ hɔn nuanom Christianfo a wɔwɔ wiadze nyina no taa hɔn ekyir na wɔayɛ krado dɛ wɔbɔboa hɔn aber nyina.​—1 Pet. 2:17.

12. Sɛ atoyerɛnkyɛm si a, ebɛnadze na afofor botum ayɛ dze aboa? (Hwɛ mfonyin no.)

¹² Dza enuanom afofor so botum ayɛ. Sɛ atoyerɛnkyɛm si wɔ beebi a ɔbɛn wo a, bisa asafo mu mpanyimfo no dza ibotum ayɛ dze aboa. Bi a ibotum ama hɔn a wonnyi beebi da anaa hɔn a woetu hɔnho ama roboa wɔ atoyerɛnkyɛm ber mu no abɛtsena wo fie mber kakra. Ibotum dze edziban anaa ndzɛmba ahorow bi akɛma enuanom a wohia mboa no. Sɛ atoyerɛnkyɛm si wɔ beebi a ɔmmbɛn wo mpo a, ibotum aboa. Ebɛnadze na ibotum ayɛ? Bɔ mpaa ma hɔn a atoyerɛnkyɛm ato hɔn no. (2 Cor. 1:8-11) Afei so, ibotum eyi ntoboa dze aboa wiadze nyina som edwuma no, mbrɛ ɔbɛyɛ a sɛ atoyerɛnkyɛm bi si a, wobenya sika dze aboa hɔn a hɔnho akyer hɔn no. (2 Cor. 8:2-5) Sɛ ibotum akɔ beebi a atoyerɛnkyɛm esi no akɔboa a, bisa asafo mu mpanyimfo no dza ibotum ayɛ. Sɛ wɔpen do dɛ ibotum akɔboa a, bi a wɔbɛma wo ntsetsee mbrɛ ɔbɛyɛ a wobotum dze wo edzi dwuma yie.

13. Hɛn nuanom a wɔwɔ nsaase a wɔabra hɛn som edwuma do no, ebɛn ɔhaw ahorow no wohyia?

¹³ Nsaase a wɔabra hɛn som edwuma wɔ do no, wɔsoɛr tsia hɛn nuanom a wɔwɔ hɔ no, na iyi ma asetsena mu yɛ dzen ma hɔn. Afei so, hɛn nuanom a wɔwɔ nsaase a ɔtsetse dɛm do no ho kyer hɔn osian sikasɛm ntsi. Ɔno da nkyɛn a, yarba tum bɔ hɔn na hɔn adɔfo so tum wu. Naaso, osiandɛ wɔabra hɛn som edwuma no wɔ hɔ ntsi, bi a asafo mu mpanyimfo no runntum nnkɔ enuanom no hɔn nkyɛn nnkɛsera hɔn nnhyɛ hɔn nkuran. Andrei a yɛkaa noho asɛm wɔ adzesua a odzi iyi enyim mu no hyiaa biribi a ɔtse dɛm. Nna akyerɛbaa bi a ɔwɔ n’asɛnka kuw mu no ho akyer no wɔ sikasɛm mu. Awerɛhosɛm nye dɛ, akyerɛbaa no nyaa kaar akwanhyia. Ntsi nna ohia dɛ wɔyɛ no oprehyɛn ahorow bi. Afei so, nna orunntum nnyɛ edwuma. Ɔwɔ mu, nna wɔabra hɛn som edwuma no wɔ ɔman no mu, na COVID-19 yarba no so wɔ hɔ, naaso nna Jehovah n’enyi tua dza ɔrokɔ do wɔ akyerɛbaa no n’asetsena mu no, ntsi ɔkaa enuanom hɔn akoma ma wɔboaa no.

14. Ebɛnadze na asafo mu mpanyimfo botum ayɛ dze akyerɛ dɛ wɔdze hɔnho to Jehovah do?

¹⁴ Dza asafo mu mpanyimfo botum ayɛ. Andrei bɔɔ Jehovah mpaa na ɔyɛɛ dza obotum. Ebɛnadze na Jehovah yɛe dze buaa ne mpaabɔ no? Enuanom a nna hɔn tsebea botum ama wɔaayɛ pii aboa akyerɛbaa no, Jehovah kaa hɔn akoma ma wɔyɛɛ dɛm. Binom nye akyerɛbaa no kɔr ayarsabea, na binom so maa no sika a ɔdze botwitwa noho. Jehovah kaa hɔn akoma ma wɔyɛɛ dza wobotum dze boaa akyerɛbaa no na ohyiraa mbɔdzen a enuanom no bɔe no do. (Heb. 13:16) Asafo mu mpanyimfo, sɛ wɔbra hɛn som edwuma no a, hom mma afofor mboa hom. (Jer. 36:5, 6) Naaso, dza no ho hia paa nye dɛ hom dze homho bɔto Jehovah do. Obotum aboa hom ma hom dze dza enuanom no hia ama hɔn.

15. Sɛ wɔrosoɛr etsia hɛn mpo a, yebesi dɛn ama koryɛ akɔ do atsena hɛn ntamu?

¹⁵ Dza enuanom afofor so botum ayɛ. Sɛ wɔbra hɛn som edwuma no a, bi a no ho behia dɛ yehyia mu ekuw ekuw. Ntsi, dɛm aber yi na no ho hia paa dɛ yɛnye hɛn nuanom tsena asomdwee mu. Ɔsɛ dɛ yɛkaa dɛ, Satan na yɛnye no roko na nnyɛ hɛn nuanom no a. Bɔ mbɔdzen bu w’enyi gu enuanom no hɔn mfom do. Sɛ akasakasa bi ba hom ntamu a, hom nsiesie no ntsɛmara. (Mbɛ. 19:11; Eph. 4:26) Afei so, yɛ krado aber biara dɛ ebɔboa wo nuanom no. (Titus 3:14) Dza enuanom no yɛe maa akyerɛbaa a yɛaka noho asɛm no boaa enuanom afofor a wɔwɔ n’asɛnka kuw mu no paa. Ɔmaa anyɛnkofa a ɔda hɔn ntamu no mu yɛɛ dzen paa.​—Ndw. 133:1.

16. Dɛ mbrɛ Colossaefo 4:3, 18 ma yehu no, ebɛnadze na yebotum ayɛ dze aboa hɛn nuanom a wɔrosoɛr etsia hɔn no?

 ¹⁶ Hɛn nuanom pii wɔ hɔ a, nsaase a wɔwɔ do no, aban no dze ne nsa ato hɛn dwumadzi do, naaso wɔkɔ do som Jehovah. Binom wɔ hɔ a, osian hɔn gyedzi ntsi wɔdze hɔn egu efiadze. Yebotum abɔ mpaa ama dɛm enuanom yi nye hɔn mbusua. Yebotum so abɔ mpaa ama enuanom a wɔda akokodur edzi na wɔkɔboa hɛn nuanom a wɔdze hɔn egu efiadze no ɔmmfa ho mpo dɛ hɔnara so wobotum akyer hɔn no. Dɛm enuanom yi hyɛ hɔn a wɔdze hɔn egu efiadze no nkuran dɛ wɔnkɔ do ara mfa hɔnho nto Jehovah do. Afei so, wɔma hɔn nsa ka dza wohia, na wɔkɔboa hɔn aber a wɔdze hɔn akɔ kɔɔt no. c (Kenkan Colossaefo 4:3, 18.) Mma wo werɛ mmfir da dɛ, sɛ ebɔ mpaa ma dɛm enuanom no a, ɔboa paa!​—2 Thess. 3:1, 2; 1 Tim. 2:1, 2.

17. Ibesi dɛn esiesie woho ndɛ, ama sɛ ɔsoɛrtsia bi ba a, eetum egyina ano?

¹⁷ Enye w’ebusua nsiesie homho ndɛ, ama sɛ ɔsoɛrtsia bi ba a, hom eetum egyina ano. (Andw. 14:22) Mma nndwendwen ɔhaw a hom botum ehyia nyina ho. Mbom, hyɛ ebusuabɔ a enye Jehovah wɔ no mu dzen, na boa wo mba so ma wɔnyɛ dɛmara. Ɔtɔ da na sɛ adwendwen hyɛ wo do a, fi w’akoma mu ka ho asɛm kyerɛ Nyankopɔn. (Ndw. 62:7, 8) Siantsir a ɔsɛ dɛ hom dze homho to Jehovah do no, enye w’ebusua no mbɔ mu nsusu ne nyina ho. d Sɛ ihu dza ebɛyɛ ansaana atoyerɛnkyɛm esi a, ɔbɔboa wo mba no. Dɛmara na sɛ eboa hɔn ma wosiesie hɔnho ma ɔsoɛrtsia a wobotum ehyia a, ɔbɔboa hɔn paa. Ɔbɛma wɔaada akokodur edzi na hɔn akoma enntu pii, osiandɛ edzi kan ama woehu dɛ ɔsɛ dɛ wɔdze hɔnho to Jehovah do.

18. Ebɛnadze na yɛrohwɛ kwan daakye?

¹⁸ Nyankopɔn n’asomdwee no ma yɛtse nka dɛ yɛwɔ bambɔ. (Phil. 4:6, 7) Sɛ yarba bi tsew si beebi a yɛwɔ no, atoyerɛnkyɛm bi si anaa wɔrosoɛr etsia hɛn mpo a, Jehovah nam n’asomdwee no do ma hɛn akoma tɔ hɛn yamu. Ɔnam asafo mu mpanyimfo a wɔyɛ edwumadzen no do boa hɛn na wɔhyɛ hɛn nkuran. Afei so, ɔma yetum fi hɛn pɛ mu boa hɛnho. Aber a yɛwɔ asomdwee yi na ɔsɛ dɛ yesiesie hɛnho ma ɔhaw akɛse a yebehyia no daakye no. Dɛm ɔhaw yi mu kor nye “ahohiahia kɛse” no. (Matt. 24:21) Sɛ ahohiahia kɛse no paa gu a, ɔnnsɛ dɛ yɛma hɛn akoma tu koraa. Na ɔsɛ dɛ yɛboa afofor so ma wɔyɛ dɛmara. Sɛ ahohiahia kɛse no ba ewiei a, yerinnhyia ɔhaw akɛse a ɔbɛma dadwen ahyɛ hɛn do no bio. Dɛm aber no, yebenya dza ofi tsetseetse Jehovah pɛ dɛ hɛn nsa ka no. Ɔno nye asomdwee mapa, na ɔbɛtsena hɔ daa.​—Isa. 26:3, 4.