1. Wɔaka kakraabi ma Jesus ewu no, ebɛn asɛm na ɔkaa kyerɛɛ nsɛmbɔndzinyi a nna ɔsɛn ne nkyɛn no? (Luke 23:39-43)

 WƆBƆƆ Jesus nye nsɛmbɔndzifo beenu bi asɛndua mu. Nokwasɛm nye dɛ wɔberɛɛ paa ana woruwu. (Luke 23:32, 33) Nsɛmbɔndzifo beenu no nyina dzii Jesus no ho fɛw. Ntsi ɔda edzi dɛ nna wɔnnyɛ n’esuafo. (Matt. 27:44; Mark 15:32) Naaso, enyigyesɛm nye dɛ nsɛmbɔndzifo no mu kor sesaa n’adwen. Ɔkaa dɛ: “Jesus sɛ eba w’ahendzi mu a, kaa me.” Jesus so kaa kyerɛɛ no dɛ: “Nokwar mese wo ndɛ dɛ, ebɛka mo ho wɔ Paradise.” (Kenkan Luke 23:39-43.) Biribiara nnyi Bible no mu a ɔma yehu dɛ, nna dɛm nsɛmbɔndzinyi no abɛgye nsɛm a ɔfa “ɔsor ahenman no” ho a Jesus kae wɔ no som edwuma mu no ato mu. Na Jesus so annka dɛ dɛm ɔbarimba no benya ɔsor Ahendzi no. (Matt. 4:17) Mbom nna Jesus reka Paradise a ɔbɛba asaase yi do no ho asɛm. Ebɛnadze ntsi na yɛreka dɛm?

2. Ebɛnadze na ɔkyerɛ dɛ nna nsɛmbɔndzinyi a oenu noho no yɛ Jewnyi?

² Obotum aba dɛ nna nsɛmbɔndzinyi a oenu noho no yɛ Jewnyi. Ebɛnadze ntsi na yɛreka dɛm? Ɔkaa kyerɛɛ nsɛmbɔndzinyi kor a ɔka noho no dɛ: ‘Ana innsuro Nyankopɔn koraa? Asotwe a wɔdze ama no no, nnyɛ ɔno ara bi na wɔdze ama wo yi?’ (Luke 23:40) Jewfo no dze, nna Nyankopɔn nkotsee na wɔsom no, naaso nna amanamamfo no som enyame pii. (Ex. 20:2, 3; 1 Cor. 8:5, 6) Sɛ mbarimba beenu no yɛ amanamamfo a, nkyɛ bi a asɛm a kor no bebisa nye dɛ, “Ana innsuro enyame no koraa?” Iyi da nkyɛn a, wɔannsoma Jesus wɔ amanamamfo no nkyɛn, mbom wɔsomaa no wɔ “Israel fie nguan a wɔayew no” nkyɛn. (Matt. 15:24) Israelfo no so, nna Nyankopɔn ama woehu dɛ obenyan ewufo. Ɔbɛyɛ dɛ nna ɔbarimba a oenu noho no  nyim dɛm asɛm yi. Asɛm a ɔkae no kyerɛ dɛ nna ɔwɔ enyidado dɛ Jehovah benyan Jesus ma ɔaabɛyɛ Nyankopɔn n’Ahendzi no do hen. Obotum aba dɛ nna ɔhwɛ kwan dɛ Nyankopɔn benyan no so.

3. Aber a Jesus kaa Paradise ho asɛm no, ɔbɛyɛ dɛ ebɛn adwen na ɔbarimba a oenu noho no nyae? Kyerɛkyerɛ mu. (Genesis 2:15)

³ Sɛ nna ɔbarimba a oenu no ho no yɛ Jewnyi dze a, obotum aba dɛ nna ɔatse Adam na Eve, nye Paradise a Jehovah dze hɔn kɛtsenae no ho asɛm. Dɛm ntsi ɔbɛyɛ dɛ nna ɔbarimba no gye dzi dɛ Paradise a Jesus kaa ho asɛm no bɛyɛ ture fɛɛfɛw bi a ɔbɔwɔ asaase do.​—Kenkan Genesis 2:15.

4. Ɔsɛ dɛ asɛm a Jesus kaa kyerɛɛ nsɛmbɔndzifo no mu kor no kenyan hɛn ma yesusu ebɛnadze ho?

⁴ Ɔsɛ dɛ asɛm a Jesus kaa kyerɛɛ ɔbarimba no kenyan hɛn ma yesusu mbrɛ Paradise asetsena besi ayɛ no ho. Sɛ yɛhwɛ mbrɛ Ɔhen Solomon n’ahendzi no maa Israelman no hɔn asomu dwee hɔn no a, ɔbɛma yeehu mbrɛ Paradise asetsena bɛyɛ. Dɛmara so na Jesus a ɔsen Solomon no nye hɔn a wɔnye no bɔbɔ mu edzi adze no bɛma asaase no ayɛ krabɔhwɛ. (Matt. 12:42) Ɔda edzi dɛ, ɔsɛ dɛ ‘nguan fofor no’ so ma dza wɔyɛ a obotum ama wɔaatsena ase daa wɔ Paradise no ho hia hɔn.​—John 10:16.

5. Sɛ ehwɛ a, Paradise asetsena bɛyɛ dɛn?

⁵ Sɛ ehwɛ a, Paradise asetsena bɛyɛ dɛn? Bi a dza itwa ho mfonyin nye bea bi a hɔ yɛ fɛw tse dɛ Eden ture no. (Gen. 2:7-9) Bi a nkɔm a Micah hyɛe faa Nyankopɔn no nkorɔfo ho dɛ ‘nyimpa biara bɛtsena ne wenyindua na n’adɔmbadua ase’ no na ɔba w’adwen mu. (Mic. 4:3, 4) Anaadɛ bi a kyerɛwnsɛm a ɔma yehu dɛ daakye edziban bobu do no na ɔba w’adwen mu. (Ndw. 72:16; Isa. 65:21, 22) Ɔwodze twa ho mfonyin hwɛ dɛ ewɔ ture fɛɛfɛw bi mu, na wɔato wo pon kamakama na edziban a ɔyɛ akɔndɔ ahorow pii sisi w’enyim. Ɔwodze hwɛ dɛ ndua na nhyiren a ɔwɔ hɔ no ama hɔ ayɛ huahuannhuam na mframa pa so robɔ fa woho. Sɛ itwa w’enyi a, ihu dɛ w’ebusuafo na w’anyɛnkofo etwa woho ehyia. Hɔn mu binom mpo wɔ hɔ a, wowui na woenyan hɔn. Hɔn nyina enyi agye na wɔresereserew. Dza yɛreka yi nnyɛ adaaso bi kɛkɛ o! Yebotum agye edzi paa dɛ dza yɛaka ho asɛm yi bɛba mu wɔ asaase yi do. Naaso, nnyɛ iyi nkotsee o, sɛ yɛkɔ Paradise a, yɛbɛyɛ edwuma a ɔbɛma hɛn akoma atɔ hɛn yamu.

6. Ebɛn edwuma na yɛbɛyɛ wɔ Paradise? (Hwɛ mfonyin no.)

⁶ Jehovah bɔɔ hɛn wɔ kwan bi do a ɔma yenya enyigye wɔ hɛn nsa ano edwuma mu. (Ɔsɛnk. 2:24) Christ ne Mfrenhyia Apem Tumdzi no mu no, yebenya edwuma pii ayɛ. Hɔn a wobotwa ahohiahia kɛse no nye nyimpa ɔpepem pii a wobenyan hɔn no, wobehia ntar, edziban nye beebi a wɔbɛtsena. Mbrɛ  ɔbɛyɛ a hɛn nsa bɛka dɛm ndzɛmba yi no, no ho behia dɛ yɛyɛ ndwuma pii. Naaso ɔbɛyɛ ndwuma a ɔbɛma hɛn enyi agye. Yɛbɛsan enya hokwan esiesie asaase no ma aabɛyɛ Paradise tse dɛ mbrɛ nna ɔsɛ dɛ Adam na Eve siesie Eden ture mu hɔ no. Afei so, yebenya hokwan akyerɛkyerɛ nyimpa ɔpepem pii a wobenyan hɔn a wonnyi Jehovah nye adwen a ɔwɔ ma adasamba ho nyimdzee pii no. Bio so, Jehovah n’asomfo a wɔtsenaa ase ansaana Jesus reba no, yɛbɔboa hɔn ma woeehu dza osii wɔ hɔn wu ekyir. Ɔwodze, hwɛ enyigye ara iyi bɛma yeenya!

7. Ebɛn awerɛhyɛmu na yebotum enya, na ebɛnadze ntsi a?

⁷ Yebotum enya awerɛhyɛmu dɛ, sɛ yɛkɔ Paradise a, hɛn asomu bɔdwe hɛn, hɛn nsa bɛka biribiara a yehia na biribiara so bɔkɔ do kamakama. Ebɛnadze ntsi na yɛreka dɛm? Osiandɛ Jehovah ama yeehu mbrɛ asetsena bɛyɛ wɔ no Ba no tumdzi ase no ho mpopoe kakra. Mbrɛ nna asetsena tse wɔ Ɔhen Solomon n’ahendzi mu no ma yehu mbrɛ asetsena bɛyɛ wɔ Jesus no tumdzi ase.

8. Ebɛn kwan do na asɛm a Ɔhen David kae wɔ Ndwom 37:10, 11, 29 no baa mu? (Hwɛ “Nsɛm A Akenkamfo Bisa” a ɔwɔ Ɔweɔn-Aban yi mu no.)

⁸ Jehovah maa Ɔhen David kyerɛɛw mbrɛ asetsena bɛyɛ ber a ɔhen a onyim nyansa na odzi Jehovah nokwar ridzi adze no ho asɛm. (Kenkan Ndwom 37:10, 11, 29.) Sɛ yɛreka mbrɛ asetsena bɛyɛ wɔ Paradise ho asɛm akyerɛ afofor a, mpɛn pii no, yɛnye hɔn kenkan Ndwom 37:11. Sɛ yɛyɛ dɛm a, ntseasee wɔ mu, osiandɛ Jesus faa dɛm asɛm no kae wɔ no Bepɔw Do Asɛnka no mu. Ɔmaa yehun dɛ dɛm asɛm no bɛba mu daakye. (Matt. 5:5) Naaso asɛm a David kae yi so ma yehu mbrɛ nna asetsena bɛyɛ aber a Ɔhen Solomon ridzi adze no. Aber a Solomon dzi Israel do tum no, Nyankopɔn no nkorɔfo nyaa asomdwee pii na wodzii yie wɔ “asaase a numfonsu nye ewo pem wɔ do” no do. Nyankopɔn kaa dɛ: ‘Sɛ hom nantsew m’ahyɛdze mu a, mebɛma asomdwee aba asaase no do, na hom ada a obiara rinnyi hom hu.’ (Lev. 20:24; 26:3, 6) Dɛm bɔhyɛ ahorow yi baa mu aber a nna Solomon dzi adze no.  (1 Mber. 22:9; 29:26-28) Afei so, Jehovah kaa dɛ obeyi nyimpa bɔn nyina efi hɔ koraa. (Ndw. 37:10) Iyi ma yehu dɛ asɛm a ɔwɔ Ndwom 37:10, 11, 29 no baa mu wɔ tsetse mber mu na ɔbɛba mu so daakye.

9. Ebɛn asɛm na Sheba hembaa no kae faa Ɔhen Solomon n’ahendzi no ho?

⁹ Sheba hembaa no tsee asomdwee na yiedzi a Israelfo no nyae wɔ Solomon no tumdzi no ase ho asɛm. Dɛm ɔhembaa no twaa kwan tsentsen dze n’enyiwa bɔhwɛɛ dza nna ɔatse ho asɛm no. (1 Ahe. 10:1) Aber a ɔbɔhwɛɛ ndzɛmba a Solomon nam n’ahendzi no do ayɛ no, ɔkaa Solomon ne nyansaa na no ndwuma ho asɛm dɛ: ‘Wɔannka ne fa mpo annkyerɛ me. Enyigye nye wo nkorɔfo, na enyigye nye wo nkowaa yi a wogyinagyina w’enyim daa, na wotsie wo nyansaa no’! (1 Ahe. 10:6-8) Naaso dza Jehovah nam ne Ba Jesus do bɛyɛ ama adasamba no dze, wɔnnka. Ɔbɛkyɛn dza Solomon nam n’ahendzi no do yɛe maa ne mamfo no koraa.

10. Ebɛn ndzɛmba na ɔma yehu dɛ Jesus sen Solomon koraa?

¹⁰ Jesus sen Solomon koraa. Nna bɔn wɔ Solomon no ho, dɛm ntsi ɔtɔ da a nna osisi gyinae ma Nyankopɔn no nkorɔfo hu amandze. Naaso Jesus dze, bɔn biara nnyi noho na onndzi mfom so. (Luke 1:32; Heb. 4:14, 15) Dɛ nhwɛdo no, otumii gyina nsɔhwɛ a no mu yɛ dzen a Satan dze baa no do ano. Christ ada no edzi dɛ ɔrennyɛ bɔn da, anaa ɔrennyɛ biribiara a ɔbɛhaw ne mamfo a wodzi nokwar no. Ampa, Jesus yɛ ɔhen a ɔkyɛn ɔhen biara!

11. Woananom na wɔbɔboa Jesus ma oeedzi adze?

¹¹ Jesus nye nyimpa 144,000 a wɔnye no bɔbɔ mu edzi adze no bɛyɛ edwuma dze ahwɛ adasamba do na wɔaama adwen a Jehovah wɔ ma asaase no aaba mu. (Nyi. 14:1-3) Dɛm nyimpa a wɔnye Jesus bɔbɔ mu edzi adze no bɛtse hɛn ase, osiandɛ nsɔhwɛ na amandzehu a adasamba hyia no, hɔn so woehyia bi da. Naaso, ebɛn edwuma pɔtsee na hɔn a wɔnye Jesus bedzi adze no bɛyɛ?

12. Ebɛn edwuma na Jehovah bɛma 144,000 no ayɛ?

¹² Edwuma a Jesus nye hɔn a wɔnye no bedzi adze no bɛyɛ no, ɔso sen dza Solomon yɛe no. Nna ɔsɛ dɛ Ɔhen Solomon hwɛ nyimpa mpempem do wɔ ɔman kortsee mu. Naaso, Jesus nye hɔn a wɔnye no bedzi adze wɔ Nyankopɔn n’Ahendzi no mu no dze, wɔbɔhwɛ nyimpa ɔpepem pii do wɔ wiadze nyinara. Hwɛ hokwan kɛse a Jehovah dze ama 144,000 no!

13. Ebɛn edwuma tsitsir na hɔn a wɔnye Jesus bɔbɔ mu edzi adze no bɛyɛ?

¹³ Tse dɛ Jesus no, 144,000 no so bɔsom dɛ ahemfo na asɔfo. (Nyi. 5:10) Moses Mbra no mu no, nna asɔfo no tsitsir na wɔwɔ asodzi dɛ wɔboa amamfo no ma wonya apɔwmudzen papa, na wɔboa hɔn ma wɔnye Jehovah ne ntamu ebusuabɔ no mu yɛ dzen. Nna Mbra no yɛ “ndzepa a ɔbɛba no no sunsuma”; ntsi yebotum aka dɛ hɔn a wɔnye Jesus bɔbɔ mu edzi adze no bɛyɛ edwuma tsitsir bi dze aboa Nyankopɔn n’asomfo ma woeenya apɔwmudzen papa na wɔnye Jehovah ne ntamu so ayɛ kama. (Heb. 10:1) Seseiara dze, yennyim kwan a dɛm ahemfo na asɔfo yi nye ahendzi no ne mamfo a wɔwɔ asaase do no bedzi nkitaho. Ntsi ɔwɔ dɛ yɛtweɔn kesi dɛm aber no. Naaso ɔmmfa ho nhyehyɛɛ biara a Jehovah bɛyɛ no, yɛwɔ awerɛhyɛmu dɛ hɔn a wɔbɛtsena asaase no do wɔ Paradise no nsa bɛka akwankyerɛ a ɔbɔboa hɔn.​—Nyi. 21:3, 4.

14. Ebɛn kwan do na ‘nguan fofor’ no na ‘nguankuw ketseaba’ no aka abɔ mu reyɛ edwuma?

¹⁴ Jesus kaa hɔn a wɔnye no bedzi adze no ho asɛm dɛ wɔyɛ ‘nguankuw ketseaba.’ (Luke 12:32)  Ɔsanee kaa kuw a otsia ebien bi so ho asɛm dɛ wɔnyɛ ‘nguan fofor.’ Dɛm ekuw ebien yi aka abɔ mu ayɛ kuw kor. (John 10:16) Ndɛ, ekuw ebien yi reyɛ edwuma abɔ mu. Sɛ asaase no dan Paradise mpo a, wɔbɔkɔ do abɔ mu ayɛ edwuma. Dɛm aber no nna ‘nguankuw ketseaba’ no wɔ sor na ‘nguan fofor’ no so bɔhwɛ kwan dɛ wɔdze enyigye bɛtsena asaase no do daa. Naaso, ɔsɛ dɛ ‘nguan fofor’ no yɛ ndzɛmba ahorow bi ansaana woenya hokwan atsena Paradise asaase no do.

15. (a) Ebɛn kwan do na ‘nguan fofor’ no boa Christ no nuanom? (b) Ibesi dɛn esuasua onua panyin no a ɔrotɔ adze no? (Hwɛ mfonyin no.)

¹⁵ Nsɛmbɔndzinyi a onuu noho no, oennya hokwan ammfa annkyerɛ dɛ n’enyi sɔ dza Christ yɛe maa no no ansaana oruwu. Naaso ndɛ hɛn a yɛyɛ ‘nguan fofor’ no mufo no wɔ hokwan pii a yebotum dze akyerɛ dɛ hɛn enyi sɔ dza Jesus yɛ ma hɛn no. Dɛ nhwɛdo no, yɛnye hɔn a wɔnye Christ bɔbɔ mu edzi adze no dzi no yie. Yɛyɛ dɛm dze kyerɛ dɛ yɛdɔ Jesus. Jesus kaa dɛ mbrɛ yɛnye no nuanom a wɔasera hɔn no bedzi no ndɛ no na obegyina do ebu hɛn atsɛn. (Matt. 25:31-40) Yebotum aboa hɔn dze nam nsi a yɛdze bɛyɛ asɛnka nye esuafoyɛ edwuma no do. (Matt. 28:18-20) Dɛm ntsi yɛpɛ dɛ yɛdze nwoma ahorow a ɔboa nkorɔfo ma wosua Bible no dzi dwuma yie. Dɛm nwoma no bi nye Ibotum Enya Enyigye Daa! buukuu no. Sɛ innyi obi a enye no sua Bible no mpo a, fa yɛ wo botae dɛ ebɔhwehwɛ nkorɔfo na enye hɔn eesua Bible no.

16. Sɛ yebotum ayɛ Nyankopɔn n’Ahendzi no ne mamfo a, ebɛnadze na ɔsɛ dɛ yɛyɛ no ndɛ?

¹⁶ Ɔnnsɛ dɛ yɛtweɔn ara dɛ yebodu Paradise ansaana yɛabɔ hɛn bra wɔ kwan a Jehovah pɛ do. Seseiara mpo, ɔsɛ dɛ yedzi nokwar wɔ hɛn kasaa na hɛn ndzeyɛɛ mu na yɛma hɛn enyi da hɔ wɔ hɛn asetsena mu. Afei so, ɔsɛ dɛ yedzi Jehovah, hɛn awar mu hokafo nye hɛn nuanom Christianfo nokwar. Sɛ yɛdze Nyankopɔn ne mbra bɔ hɛn bra wɔ dɛm wiadze bɔn yi mu a, ɔrennyɛ dzen mma hɛn koraa dɛ yɛbɛyɛ dɛm wɔ Paradise. Ɔsɛ dɛ yɛbɔ mbɔdzen sua ndzɛmba ahorow bi yɛ, na yenya suban pa so ndɛ dze kyerɛ dɛ yɛpɛ dɛ yɛkɔ wiadze fofor no mu. Hwɛ asɛm a wɔato dzin “Ana Ayɛ Krado Dɛ Ebɛtsena Asaase No Do?” a ɔwɔ Ɔweɔn-Aban yi mu no.

17. Aso ɔsɛ dɛ yɛma bɔn a yɛayɛ etwa mu no ho asɛm haw hɛn a? Kyerɛkyerɛ mu.

 ¹⁷ Afei so, ɔsɛ dɛ yɛbɔ mbɔdzen dɛ yɛremma bɔn akɛse bi a yɛayɛ etwa mu no ho asɛm nnhaw hɛn. Ɔwɔ mu, ɔnnsɛ dɛ Jesus no werdam afɔrbɔ no ntsi ‘yɛhyɛ da ara yɛ bɔn.’ (Heb. 10:26-31) Naaso, sɛ yeenu hɛnho wɔ hɛn akoma mu, yɛaserɛ Jehovah hɔ bɔnfakyɛ, yɛahwehwɛ mboa efi asafo mu mpanyimfo hɔ, na sɛ yɛasesa hɛn suban a, yebotum enya awerɛhyɛmu dɛ Jehovah so dze bɔn kɛse a yɛayɛ no akyɛ hɛn koraa. (Isa. 55:7; Andw. 3:19) Ɔsɛ dɛ yɛkaa asɛm a Jesus kaa kyerɛɛ Phariseefo no. Ɔkaa dɛ: “Mammbɛfrɛ atseneneefo, na mbom ndzebɔnyɛfo a.” (Matt. 9:13) Nokwasɛm nye dɛ, Jehovah botum egyina werdam afɔrbɔ no do dze hɛn bɔn nyina akyɛ hɛn koraa.

18. Ebɛn nsɛm na ebɛpɛ dɛ enye nsɛmbɔndzinyi no a Jesus hyɛɛ no bɔ ana oruwu no bɔbɔ ho nkɔmbɔ?

¹⁸ Ɔwodze fa no dɛ ewɔ Paradise na enye nsɛmbɔndzinyi no a Jesus hyɛɛ no bɔ ana oruwu no robɔ nkɔmbɔ. Ekyingye biara nnyi ho dɛ hom bɛka nsɛm bi dze akyerɛ dɛ hom enyi sɔ dza Jesus ayɛ ama hom no. Ibotum aka akyerɛ no dɛ ɔnka dza osii aber a nna Jesus ruwu wɔ dua no do no ho asɛm kakra nkyerɛ wo. Afei so, ibotum ama ɔaaka mbrɛ osii tsee nka aber a Jesus hyɛɛ no bɔ dɛ ɔbɔkɔ Paradise no ho asɛm akyerɛ wo. Bi a ɔno so bebisa wo mbrɛ nna asetsena tse aber a Satan no wiadze bɔn no reba n’ewiei no. Innhu dɛ sɛ inya hokwan nye nkorɔfo bi tse dɛ nsɛmbɔndzinyi no sua Bible no a, ɔbɛyɛ enyika paa?​—Eph. 4:22-24.

19. Ebɛnadze ntsi na yebotum aka dɛ, sɛ yɛkɔ Paradise a, asetsena rommfon hɛn da? (Hwɛ mfonyin a ɔwɔ Ɔweɔn-Aban yi enyim no.)

¹⁹ Sɛ yɛkɔ Paradise a, asetsena rommfon hɛn da. Aber biara yebehyia nyimpa afofor na yɛbɛyɛ edwuma a ɔbɛma hɛn akoma atɔ hɛn yamu. Dza ɔkyɛn ne nyina no, yebohu hɛn sor Egya no yie da biara, na ndzɛmba pa so a ɔdze bɛma hɛn no bɛma hɛn enyi agye paa. Yerunnsua Jehovah ho adze nnwie da. Afei so, yebosua ndzɛmba pii afa n’abɔdze ho. Adze rekye na adze resa nyina nna ɔdɔ a yɛwɔ ma Nyankopɔn no so reyɛ kɛse. Yɛda Jehovah na Jesus ase paa dɛ wɔahyɛ hɛn bɔ dɛ yebotum atsena ase daa wɔ Paradise!