1. Sɛ yɛdwendwen onnyiewiei nkwa a Jehovah dze ahyɛ hɛn bɔ no ho a, ɔka hɛn dɛn?

 JEHOVAH ahyɛ bɔ dɛ, hɔn a wotsie no no, ɔbɛma hɔn “onnyiewiei nkwa.” (Rom. 6:23) Sɛ yɛdwendwen bɔ a Jehovah dze ahyɛ hɛn no ho a, ɔbɛma yɛadɔ no paa. Ɔwodze dwen ho hwɛ: Hɛn sor Egya no dɔ hɛn paa, dɛm ntsi na ɔahyɛ hɛn dɛm bɔ yi mbrɛ ɔbɛyɛ a yɛronntwe hɛnho mmfi noho da.

2. Onnyiewiei nkwa a Jehovah dze ahyɛ hɛn bɔ no boa hɛn dɛn?

² Onnyiewiei nkwa a Nyankopɔn dze ahyɛ hɛn bɔ no boa hɛn ma yegyina ɔhaw a yehyia no ano. Sɛ hɛn atamfo hunahuna hɛn dɛ woboku hɛn mpo a, yɛbɔkɔ do asom Jehovah. Ebɛnadze ntsi a? Siantsir kor nye dɛ, yenyim dɛ sɛ yedzi Jehovah nokwar na yewu mpo a, obenyan hɛn, na dɛm aber no dze yerunnwu da. (John 5:28, 29; 1 Cor. 15:55-58; Heb. 2:15) Ebɛnadze na ntsi yebotum dze hɛn nsa esi hɛn bo aka dɛ yebotum atsena ase daa? Hom mma yɛnhwɛ siantsir a yɛreka dɛm.

3. Ebɛnadze ntsi na yebotum agye edzi paa dɛ Jehovah botum ama yaatsena ase daa? (Ndwom 102:12, 24, 27)

³ Jehovah na ɔmaa hɛn nkwa na ɔwɔ hɔ daa, dɛm ntsi yenyim dɛ obotum ama yaatsena ase daa. (Ndw. 36:9) Ɔwodze ma yɛnhwɛ kyerɛwnsɛm kakraabi na ɔbɛma yeehu dɛ Jehovah wɔ hɔ fi tsetseetse na ɔbɛtsena hɔ aber nyina. Ndwom 90:2 ka Jehovah noho asɛm dɛ ‘ofi tsetseetse kesi mfesantsen.’ Ndwom 102 so ka asɛm bi a ɔtse dɛm. (Kenkan Ndwom 102:12, 24, 27.) Nkɔnhyɛnyi Habakkuk so kaa hɛn sor Egya no ho asɛm dɛ: ‘Ao Jehovah, me Nyankopɔn, mo Krɔnkrɔnnyi, ana nnyɛ ɔwo na ifi tsetseetse no? Ɔwo innwu da.’​—Hab. 1:12.

4. Sɛ ɔyɛ dzen ma wo dɛ ebɛgye ato mu dɛ Jehovah wɔ hɔ fi tsetseetse a, aso ɔsɛ dɛ ema iyi ho asɛm haw wo? Kyerɛkyerɛ mu.

 ⁴ Ana ɔyɛ dzen ma wo dɛ ebɛgye ato mu dɛ Jehovah wɔ hɔ fi tsetseetse? (Isa. 40:28) Ɔyɛ dzen ma nyimpa pii so dɛ wɔbɛgye ato mu. Elihu kaa Nyankopɔn ho asɛm dɛ: ‘Ne mfe no dodow no yerunntum mmfa hɛn adwen mmbu.’ (Job 36:26) Sɛ ɔyɛ dzen ma hɛn dɛ yɛbɛtse biribi ase a, ɔno nnkyerɛ dɛ dɛm adze kor no nnyɛ nokwar. Dɛ nhwɛdo no, bi a ɔyɛ dzen ma hɛn dɛ yɛbɛtse mbrɛ enyinam ahoɔdzen si yɛ edwuma no ase yie. Aso ɔno kyerɛ dɛ enyinam ahoɔdzen biara nnyi hɔ? Ɔnntse dɛm koraa! Dɛmara so na ɔtse wɔ Jehovah n’afamu. Nokwasɛm nye dɛ, ɔwɔ hɔ fi tsetseetse na orunnwu so da. Yɛyɛ nyimpa ntsi, bi a yɛrenntse dɛm asɛm yi ase yie da. Naaso ɔno nnkyerɛ dɛ Nyankopɔn runntum nntsena ase daa. Ɔbɔadze no dze, ndzɛmba a yɛtse ase nye dza yɛnntse ase no, ɔtse ne nyina ase ma ɔbor do. (Rom. 11:33-36) Ansaana wɔrobɔ hɛn amansan yi nye biribiara a ɔwɔ mu tse dɛ ewia na nworaba mpo no, nna Jehovah wɔ hɔ. Yɛgye dzi paa dɛ Jehovah “na ɔdze no tum ayɛ asaase” no. Nokwasɛm nye dɛ ɔwo hɔ ansaana ‘ɔretserɛw ɔsorsor mu.’ (Jer. 51:15; Andw. 17:24) Adze fofor bi so wɔ hɔ a ɔma yɛgye dzi dɛ yebotum atsena ase daa. Ɔno nye dɛn?

5. Nna ebɛn enyidado na hɛn awofo a wodzi kan no wɔ?

⁵ Sɛ yeyi nyimpa si nkyɛn a, Jehovah ammbɔ abɔdze a nkwa wɔ mu a aka no dɛ wɔntsena ase daa. Jehovah maa nyimpa enyidado soronko bi. Ɔno nye dɛ wɔbɛtsena ase daa a worunnwu da. Naaso Jehovah bɔɔ Adam kɔkɔ dɛ: “Papa nye bɔn ho nyimdzee dua no dze, mma nndzi bi: na da a ibedzi bi no, ampaara dɛ ibowu.” (Gen. 2:17) Sɛ Adam na Eve tsiee Jehovah a, nkyɛ worunnwu da. Ntseasee wɔ mu dɛ yɛbɛka dɛ, sɛ wotsiee Jehovah a, bi a nkyɛ mber bi ekyir no ɔbɛma hɔn kwan ma woeedzi “nkwadua no” bi. Nkyɛ iyi bɛma woenya awerɛhyɛmu dɛ wobotum ‘atsena ase daa.’ b​—Gen. 3:22.

6-7. (a) Ebɛnadze bio na ɔma yehu dɛ Jehovah ammbɔ hɛn dɛ yenwu? (b) Ebɛn ndzɛmba na w’enyi gye ho a erohwɛ kwan dɛ ebɛyɛ no daakye? (Hwɛ mfonyin ahorow no.)

⁶ Abɔdzenyansahufo binom ayɛ nhwehwɛmu ebohu dɛ yebotum akora nsɛm pii do wɔ hɛn adwen mu akyɛn dza sesei yetum kora do wɔ hɛn adwen mu no. Iyi yɛ nwanwa paa. Afe 2010 mu no, magazine bi a wɔfrɛ no Scientific American Mind dze asɛm bi too gua. Ɔdze too gua dɛ nsɛm a hɛn adwen botum akora do no,  sɛ ɔyɛ TV do dwumadzi bi na yɛrohwɛ a, nkyɛ ɔbɛgye hɛn bɛyɛ ndɔnhwer ɔpepem ebiasa (bɔbor mfe 300) ansaana yeetum ahwɛ ewie. Naaso obotum aba dɛ hɛn adwen no botum akora nsɛm pii do mpo akyɛn dɛm koraa. Iyi ma yehu dɛ Jehovah siesiee hɛn adwen no wɔ kwan bi do a obotum akora nsɛm pii do akyɛn dza yetum kora do wɔ mfe 70 anaa 80 mu no koraa.​—Ndw. 90:10.

⁷ Adze fofor so nye dɛ nyimpa biara mmpɛ dɛ owu. Iyi nnyɛ nwanwa koraa, osiandɛ Jehovah ammbɔ hɛn dɛ yɛmbra asaase do na yembowu. Bible no ka adasamba ho asɛm dɛ Nyankopɔn dze ‘mber a onnyi ewiei ahyɛ hɔn akoma mu.’ (Ɔsɛnk. 3:11) Iyi ntsi na yehu owu dɛ ɔyɛ hɛn tamfo no. (1 Cor. 15:26) Sɛ yarba bi a no mu yɛ dzen bɔ hɛn a, ana yɛtow hɛn adwen mu na yɛka dɛ dza obesi biara nsi muwu a nna mokɔ? Oho. Mpɛn pii no yɛkɔ ayarsabea na yɛgye ndur a yɛdze bɛsa hɛnho yarba. Nokwasɛm nye dɛ yɛyɛ dza yebotum biara mbrɛ ɔbɛyɛ a yerunnwu. Afei so sɛ hɛn dɔfo bi wu a, dɛ ɔyɛ abofra anaa panyin no, yedzi awerɛhow mfe pii. (John 11:32, 33) Mbrɛ ɔtse nye dɛ yɛpɛ dɛ yɛtsena ase daa osiandɛ hɛn Bɔfo a ɔdɔ hɛn no bɔɔ hɛn dɛ yɛntsena ase daa. Naaso yɛwɔ adanse afofor pii so a yebotum egyina do aka dɛ yebotum atsena ase daa. Hom mma yɛnhwɛ ndzɛmba a Jehovah yɛe mber bi a etwa mu nye dza ɔreyɛ no seseiara a ɔma yehu dɛ siantsir a ɔbɔɔ nyimpa a ɔno nye dɛ wɔbɛtsena ase daa no nnsesae.

8. Ebɛn kwan do na Isaiah 55:11 ma yenya awerɛhyɛmu dɛ adwen a Jehovah dze bɔɔ nyimpa no bɛba mu?

⁸ Bɔn a Adam na Eve yɛɛ ntsi, hɔn mba nyina nyinyin na wowuwu. Nna nnyɛ iyi nye adwen a Nyankopɔn wɔ ma nyimpa, na dɛmara na dza  osii no annsesa siantsir a ɔbɔɔ nyimpa no. (Kenkan Isaiah 55:11.) Jehovah da ho ara pɛ dɛ adasamba a wodzi no no nokwar no tsena ase daa. Dɛm adwen no nnsesae. Ebɛnadze ntsi na yɛreka no dɛm? Sɛ yɛhwɛ dza Jehovah aka nye dza ɔayɛ a, ɔma yehu ampaara dɛ, ɔpɛ dɛ nyimpa tsena ase daa.

9. Ebɛn bɔ na Nyankopɔn dze ahyɛ hɛn? (Daniel 12:2, 13)

⁹ Jehovah ahyɛ bɔ dɛ obenyan hɔn a woewuwu no aba nkwa mu, na ɔaama wɔatsena ase daa. (Andw. 24:15; Titus 1:1, 2) Nna ɔbarimba nokwafo Job gye dzi paa dɛ Jehovah pɛ dɛ onyan hɔn a woewuwu no. (Job 14:14, 15) Nkɔnhyɛnyi Daniel so, nna onyim paa dɛ Jehovah benyan hɔn a woewuwu no, na ɔama wɔatsena ase daa. (Ndw. 37:29; kenkan Daniel 12:2, 13.) Nna Jewfo a wɔwɔ Jesus n’aber do no nyim dɛ Jehovah botum ama no nokwar asomfo “onnyiewiei nkwa.” (Luke 10:25; 18:18) Jesus kaa owusoɛr no ho asɛm mpɛn pii, na aber a nankasa so wui no n’Egya nyaan no.​—Matt. 19:29; 22:31, 32; Luke 18:30; John 11:25.

10. Ebɛnadze na owusoɛr a ɔkɔr do wɔ Bible mber mu no ma yehu? (Hwɛ mfonyin no.)

¹⁰ Jehovah nye hɛn Nkwamafo na ɔwɔ tum so a ɔdze benyan hɔn a woewuwu no aba nkwa mu. Jehovah maa nkɔnhyɛnyi Elijah tum ma ɔdze nyaan kunafo a nna ɔwɔ Zarephath no ne ba. (1 Ahe. 17:21-23) Ekyir yi Jehovah boaa nkɔnhyɛnyi Elisha so ma otumii nyaan Shunamnyi ɔbaa bi ne ba. (2 Ahe. 4:18-20, 34-37) Dɛm owusoɛr ahorow a yɛaka ho asɛm yi nye afofor a osisii no ma yehu dɛ Jehovah wɔ tum a ɔdze benyan hɔn a woewuwu no aba nkwa mu. Aber a Jesus wɔ asaase do no, ɔdaa no edzi dɛ n’Egya ama no dɛm tum no. (John 11:23-25, 43, 44) Seseiara Jesus wɔ sor na wɔdze “sor nye asaase do tum nyina” ama no. Iyi ntsi Jesus wɔ tum a ɔdze benyan ‘hɔn a wɔwɔ nkaa nda mu nyina’ aba nkwa mu na wobenya enyidado dɛ wobotum atsena ase daa, na ɔbɛyɛ so.​—Matt. 28:18; John 5:25-29.

11. Ebɛn kwan do na werdam no botum ama yeenya onnyiewiei nkwa?

¹¹ Ebɛnadze ntsi na Jehovah maa no Dɔba no wuu owu a ɔyɛ yaw dɛm? Jesus kaa siantsir a Jehovah yɛɛ dɛm no. Ɔkaa dɛ: ‘Mbrɛ Nyankopɔn dɔɔ wiadze nye yi, dɛ ɔdze ne Ba a ɔwoo no kor no mae, ama obiara a ɔgye no dzi no ɔaannsɛɛ na mbom oeenya onnyiewiei nkwa.’ (John 3:16) Nyankopɔn maa ne Ba no baa asaase do bowui dze yɛɛ werdam maa hɛn. Osian iyi ntsi Jehovah botum dze hɛn bɔn akyɛ hɛn na ɔama yeenya onnyiewiei nkwa. (Matt. 20:28) Iyi yɛ adze a no ho hia Nyankopɔn paa. Ɔsomafo Paul kaa ho asɛm dɛ: ‘Mbrɛ owu nam nyimpa do bae no, dɛmara so na owusoɛr nam nyimpa do bɛba. Na dɛ mbrɛ hɔn nyina wu wɔ Adam mu no, dɛmara so na hɔn nyina benya nkwa wɔ Christ mu.’​—1 Cor. 15:21, 22.

12. Ebɛn kwan do na Nyankopɔn n’Ahendzi no bɛma siantsir a Jehovah bɔɔ hɛn no aaba mu?

¹² Jesus kaa kyerɛɛ n’ekyirdzifo no dɛ wɔmbɔ mpaa dɛ Nyankopɔn n’Ahendzi mbra na Nyankopɔn n’apɛdze nyɛ hɔ wɔ asaase do. (Matt. 6:9, 10) Siantsir a Nyankopɔn bɔɔ nyimpa no, bi nye dɛ yɛbɛtsena ase daa wɔ asaase do. Mbrɛ ɔbɛyɛ a iyi bɛba mu no, Jehovah eyi no Ba no dɛ ɔnyɛ Messiah Ahendzi no do Hen. Nyankopɔn roboaboa nyimpa 144,000 ano efi asaase do. Dɛm nkorɔfo yi nye Jesus bɔbɔ mu ayɛ edwuma ma Nyankopɔn ne pɛ aaba mu.​—Nyi. 5:9, 10.

13. Ndɛ, ebɛnadze na Jehovah reyɛ, na ebɛnadze na ɔsɛ dɛ hɛn so yɛyɛ?

¹³ Ndɛ, Jehovah roboaboa “nyimpadodow kɛse” bi ano na ɔretsetse hɔn ma wɔaayɛ n’Ahendzi no ne mamfo. (Nyi. 7:9, 10; Jas. 2:8) Ndɛ, nyimpa pii na hɔn mu apaapaa osian  ɔko na enyitan ntsi. Naaso nyimpadodow kɛse no dze, ɔmmfa ho ɔman na ebusua a wofi mu no, wɔyɛ dza wobotum biara mbrɛ ɔbɛyɛ a wɔnye obiara bɛtsena asomdwee mu. Wɔdze hɔn ndzeyɛɛ rekyerɛ dɛ wɔdze hɔn mfona reyɛ nsɔw. (Mic. 4:3) Wonndzi ako nnkuku hɔn nyɛnko nyimpa, mbom wɔka nokwar Nyankopɔn no nye dza ɔbɛyɛ ama adasamba no ho asɛm kyerɛ hɔn. Dɛm a wɔyɛ no boa nkorɔfo ma wohu dza wɔyɛ a ɔbɛma woeenya “nokwar nkwa” no. (1 Tim. 6:19) Osiandɛ nyimpadodow kɛse no taa Nyankopɔn n’Ahendzi no ekyir ntsi, hɔn ebusuafo botum asoɛr etsia hɔn, anaa mpo dɛ bi a hɔnho botum akyer hɔn wɔ sikasɛm mu. Naaso Jehovah nngyaa hɔn dɛmara, ɔma hɔn nsa ka dza wohia no. (Matt. 6:25, 30-33; Luke 18:29, 30) Dza yɛaka ho asɛm yi nyinara ma yehu paa dɛ Nyankopɔn n’Ahendzi no ridzi tum na ɔbɔkɔ do ara ama dza Jehovah aka no nyinara aaba mu.

14-15. Jehovah no bɔhyɛ a ɔnye dɛ obeyi owu efi hɔ koraa no, ebɛn kwan do na ewiei koraa no ɔbɛba mu?

¹⁴ Yɛrekasa yi, Jesus na ɔyɛ Nyankopɔn n’Ahendzi no do Hen, na ɔwɔ tum a ɔbɛma Jehovah no bɔhyɛ ahorow nyina aba mu. (2 Cor. 1:20) Ofi afe 1914 reba no Jesus akɔ do edzi n’atamfo do konyim. (Ndw. 110:1, 2) Ɔrennkyɛr koraa, ɔnye hɔn a wɔnye no bɔbɔ mu edzi  adze no bedzi konyim koraa na wɔaasɛɛ nyimpa bɔn nyinara.​—Nyi. 6:2.

¹⁵ Mfrenhyia Apem Tumdzi no mu no, Jesus benyan ewufo. Afei so, ɔbɛma hɔn a wɔyɛ setsie ma Jehovah no abɛyɛ nyimpa a bɔn biara nnyi hɔn ho. Sɛ nsɔhwɛ a otwa tun no ba ewiei a, hɔn a Jehovah bobu hɔn dɛ wɔyɛ atseneneefo no “benya asaase no edzi na wɔatsena mu daa.” (Ndw. 37:10, 11, 29) Enyigyesɛm nye dɛ ‘ɔtamfo a odzi ekyir a ɔno nye owu no,’ Bible no ka dɛ wobeyi no efi hɔ.​—1 Cor. 15:26.

16. Ebɛnadze tsitsir na ɔsɛ dɛ okenyan hɛn ma yɛsom Jehovah?

¹⁶ Adzesua yi ama yeehu dɛ, enyidado a yɛwɔ dɛ yebotum atsena ase daa no gyina Nyankopɔn n’Asɛm no do pintsinn. Dɛm enyidado no botum aboa hɛn ma yeetum edzi Jehovah nokwar wɔ wiadze a no mu tsena ayɛ dzen yi mu. Sɛ yɛpɛ dɛ yɛma Jehovah n’enyi gye a, ɔno ɔnnsɛ dɛ ɔba no dɛ yɛpɛ dɛ yɛtsena ase daa ntsi na yɛsom no. Adze tsitsir a okenyan hɛn ma yɛkɔ do dzi Jehovah na Jesus nokwar nye dɛ yɛdɔ hɔn paa. (2 Cor. 5:14, 15) Ɔdɔ a ɔtse dɛm no ka hɛn ma yesuasua hɔn na yɛka enyidado a yɛwɔ no ho asɛm kyerɛ nkorɔfo. (Rom. 10:13-15) Ɔsɛ dɛ yɛdwen afofor ho na yefi hɛn akoma mu yɛ adze boa hɔn. Sɛ yɛyɛ dɛm a yɛbɛyɛ Jehovah n’anyɛnkofo afebɔɔ.​—Heb. 13:16.

17. Ebɛnadze na ɔsɛ dɛ hɛn mu biara yɛ? (Matthew 7:13, 14)

¹⁷ Ana yɛbɛka hɔn a wobenya onnyiewiei nkwa no ho? Jehovah ama ayɛ yie dɛ yebotum enya hokwan a ɔtse dɛm. Dza wɔaka ara nye dɛ yɛbɔkɔ do anantsew nkwa kwan no do. (Kenkan Matthew 7:13, 14.) Sɛ yenya onnyiewiei nkwa a, dɛm aber no asetsena bɛyɛ dɛn? Yebenya dɛm asɛmbisa yi ho mbuae wɔ adzesua a odzi hɔ no mu.