Ɔweɔn-Aban a ɔbae wɔ afe yi mu no, agye ber akenkan ne nyinara anaa? Ɔnodze, hwɛ dɛ ibotum eyiyi nsɛmbisa a odzidzi do yi ano a:

Sɛ wɔka dɛ ‘hom nsesa hom adwen’ a, ɔkyerɛ dɛn? (Rom. 12:2)

Iyi nnkyerɛ dɛ, sɛ yɛyɛ papa kor anaa ebien bi a nna yeewie. Mbom ɔsɛ dɛ yɛyɛ hɛnho mu nhwehwɛmu hu nyimpa kor a yɛyɛ ankasa, na yɛyɛ nsesa biara a ohia dɛ yɛyɛ no mbrɛ ɔbɛyɛ a yɛbɔbɔ hɛn bra dɛ mbrɛ Jehovah pɛ.—w23.01, nkr. 8-9.

Sɛ yɛdze hɛn enyi ridzi nsɛm a orisisi wɔ wiadze no mu ekyir a, yɛbɛyɛ dɛn amma yaannyɛ adze ma anntra do?

Nsɛm a orisisi wɔ wiadze yi mu a ɔma Bible nkɔnhyɛ ba mu no hia hɛn paa. Sɛ yɛbɔ hɛn tsirmu keka nsɛm bi a, obotum dze mpaapaamu aba hɛn mu. Dɛm ntsi, yɛbɔ mbɔdzen dze dza yɛka no gyina nsɛm a ɔwɔ hɛn nwoma nye video ahorow a Jehovah n’ahyehyɛdze no ayɛ no mu no do. (1 Cor. 1:10)—w23.02, kr. 16.

Ebɛn kwan do na Jesus n’enuma no yɛ soronko fi n’ekyirdzifo dze no ho?

Wɔwoo Jesus wɔ ɔman a nna woehyira hɔnho do ama Nyankopɔn mu, ntsi nna no ho nnhia dɛ Jesus hyira noho do ma Jehovah dɛ mbrɛ hɛn yɛyɛ no. Nna Jesus yɛ nyimpa a odzi mu na bɔn biara nnyi noho. Afei so, nna no ho nnhia dɛ Jesus nu noho wɔ no bɔn ho.—w23.03, kr. 5.

Yebesi dɛn aboa enuanom ma wɔaama mbuae wɔ asafo nhyiamu ase?

Yebotum ama hɛn mbuae ayɛ tsiabaa. Sɛ yɛyɛ dɛm a, ɔbɛma hɛn nuanom so enya kwan ama mbuae. Afei so, sɛ yɛrema mbuae a, onnyi dɛ yɛka nsɛntsitsir a ɔwɔ nkyekyɛmu no mu no nyina. Sɛ ɔba no dɛm a, enuanom nkaa no so benya bi aka.—w23.04, kr. 23.

‘Kwan Krɔnkrɔn’ a wɔaka ho asɛm wɔ Isaiah 35:8 no gyina hɔ ma ebɛnadze?

Ahyɛse no, wɔdze gyinaa hɔ maa asɛnkyerɛdze kwan do kwantsempɔn a Jewfo a wofii Babylon no faa do kɔr hɔn kurow mu no. Na wɔ hɛn aber yi do so ɛ, ogyina hɔ ma ebɛnadze? Mfe ɔhaha pii ansaana 1919 reba no, mbarimba anokwafo bi hyɛɛ ase siesiee dɛm kwan yi mu. Dza wɔyɛe dze siesie kwan yi mu no bi nye dɛ, wɔkyerɛɛ Bible no ase kɔr kasa ahorow mu, na wotsintsiim Bible pii so. Nyankopɔn no nkorɔfo kɔ do nantsew dɛm ‘Kwan Krɔnkrɔn’ yi do, na sɛ wɔyɛ dɛm a ɔbɔboa hɔn ma wɔaakɔ do asom Nyankopɔn ndɛ ekesi daakye aber a Nyankopɔn n’Ahendzi dze nhyira pii aba asaase yi do no.—w23.05, nkr. 15-19.

Ebɛn afotu na Mbɛbusɛm tsir 9 no dze ma fa mbaa beenu bi ho?

Mbɛbusɛm nwoma no ka “ɔbaa kwasea” bi ho asɛm, na hɔn a ɔto nsa frɛ hɔn no kowie ‘adakamaa’ mu. Ɔsan so ka ɔbaa bi ho asɛm dɛ wɔfrɛ no “nyansa,” na hɔn a ɔto nsa frɛ hɔn no nya ‘ntseasee’ na nkwa. (Mbɛ. 9:​1, 6, 13, 18)—w23.06, nkr. 22-24.

Ebɛnadze na Nyankopɔn yɛe dze kyerɛɛ dɛ ɔbrɛ noho adze na ɔda ntseasee edzi aber a nna ɔnye Lot ridzi no?

Jehovah kaa kyerɛɛ ɔtseneneenyi Lot dɛ onguan mfi Sodom nkɔ bepɔw bi do. Naaso aber a Lot serɛɛ Nyankopɔn dɛ ɔmma ɔnkɔ Zoar no, Nyankopɔn tsiee no na ɔyɛɛ n’ebisadze no maa no.—w23.07, kr. 21.

Sɛ ɔbaa warfo bi no kun hwɛ ponografi a, ebɛnadze na obotum ayɛ?

Ɔsɛ dɛ ɔkaa dɛ ɔnnyɛ ɔno na ɔama wɔaba no dɛm. Ɔsɛ dɛ ɔdze n’adwen si ebusuabɔ a ɔnye Nyankopɔn wɔ no do. Bio so, obotum adwendwen Bible mu nsɛm bi a ɔfa mbrɛ Nyankopɔn kyekyee mbaa bi a nna wɔahaw no hɔn werɛ. Afei so, obotum aboa no kun no ma oeehu tsebea ahorow bi a obotum atwetwe no akɔ ɔhaw mu na ɔatwe noho efi ho.—w23.08, nkr. 14-17.

Sɛ obi kasa tsia hɛn gyedzi a, ebɛn kwan do na nhumu botum aboa hɛn ma yaada ɔdwe edzi?

Sɛ obi bisa hɛn asɛm bi anaa ɔkasa tsia hɛn gyedzi a, yebotum ebu no dɛ hokwan a ɔbɛma yeehu nyimpa no n’adwen. Sɛ ɔba no dɛm a, ɔbɛma yɛatse nyimpa no ase yie na yeefi ɔdwe mu nye no akasa bɔkɔɔ.—w23.09, kr. 17.

Kwan a Mary faa do nyaa dzenhyɛ no, ebɛnadze na yebotum esua efi mu?

Aber a wɔkaa kyerɛɛ Mary dɛ ɔno na ɔbɔwo Messiah no, nna obehia dzenhyɛ, ntsi ɔmaa afofor hyɛɛ no dzen. Ɔbɔfo Gabriel na Elizabeth dze Kyerɛwnsɛm no hyɛɛ no dzen. Dɛmara na hɛn so yebotum ama hɛn nuanom Christianfo ahyɛ hɛn dzen.—w23.10, kr. 15.

Ebɛn kwan na Jehovah fa do tsie hɛn mpaabɔ?

Jehovah ahyɛ hɛn bɔ dɛ obetsie hɛn mpaabɔ na sɛ ɔreyɛ hɛn mpaabɔ no ho biribi a, ɔhwɛ dɛ ɔnye no botae hyia anaa. (Jer. 29:12) Bi a ɔbɔsor kwan a ɔbɛfa do ebua ebisadze ahorow bi a ɔreyɛ ayɛ dɛ odzi nsɛ no. Naaso ne nyina mu no, Jehovah dze mboa a yehia no bɛma hɛn aber biara.—w23.11, nkr. 21-22.

Ɔsomafo Paul kaa “enyidado” ho asɛm wɔ Romefo 5:2 no. Ebɛnadze ntsi na ɔsanee kaa ho asɛm wɔ nyiyimu 4 no?

Sɛ obi tsie asɛmpa no a, obotum enya enyidado dɛ ɔbɛtsena ase daa wɔ Paradise. Naaso sɛ ohyia ɔsoɛrtsia, otum gyina mu na obohu dɛ Nyankopɔn agye no ato mu a, enyidado a onyae dɛ ɔbɛtsena ase daa wɔ Paradise no mu yɛ dzen, na ɔbɛgye dzi dɛ ɔyɛ paara.—w23.12, nkr. 12-13.