Da kor bi, akyerɛbaa bi a ɔwɔ New Zealand hwɛɛ video bi a wɔato dzin “Have . . . Concern for One Another” (‘Hom Ndwen Homho Nkorkor’). Dɛm video no ma yehu mbrɛ Jehovah si da ayamuhyehye edzi kyerɛ nkorɔfo, nye dza yebotum ayɛ dze esuasua no. (Isa. 63:​7-9) Akyerɛbaa no hwɛɛ video no wiei no, ɔyɛɛ dɛ ɔdze dza oesua no bɛyɛ edwuma. Dɛm da no, aber a ɔkɔr store bi mu dɛ ɔrokɔtɔ adze no, ohyiaa maame bi a nna onnyi beebi da, na ɔkaa kyerɛɛ no dɛ ɔpɛ dɛ ɔtɔ edziban ma no. Maame no gyee too mu. Ntsi aber a akyerɛbaa no dze edziban no brɛɛ maame no, ɔdze hokwan no dzii no dase na ɔmaa no Ana Amandzehu Bɛba Ewiei Dabi? krataaba no bi.

Hɔ ara na maame no hyɛɛ ase dɛ orusu. Ɔkaa kyerɛɛ akyerɛbaa no dɛ, nna n’awofo yɛ Adasefo ntsi wɔtsetsee no wɔ nokwar no mu, naaso ɔammfa nokwar no ammbɔ ne bra. Ofii nokwar no mu no, mfe pii nye yi, naaso ndaansa yi, ɔbɔ Jehovah mpaa dɛ ɔmboa no ma ɔnsan mbra ne nkyɛn. Akyerɛbaa no maa maame no Bible na ɔnye no yɛɛ nhyehyɛɛ dɛ ɔnye no bosua adze. a

Hɛn so, yebotum esuasua Jehovah, na yaada ayamuhyehye edzi akyerɛ hɛn ebusuafo, hɛn nuanom Christianfo, na nyimpa nyina. Afei so, yɛbɔhwehwɛ hokwan a yebotum afa do edzi nkorɔfo dase dze akyerɛ dɛ yɛwɔ ayamuhyehye.