1. Ebɛnadze ntsi na Abraham kɔr do nyaa enyidado dɛ ɔbɔwo ba?

 JEHOVAH hyɛɛ ne nyɛnko Abraham bɔ dɛ ɔbɔwo babanyin na ɔnam no do behyira asaase do amanaman nyina. (Gen. 15:5; 22:18) Osiandɛ nna Abraham wɔ gyedzi a no mu yɛ dzen wɔ Nyankopɔn mu ntsi, nna onyim paa dɛ bɔ a Nyankopɔn dze ahyɛ no no bɛba mu. Ɔwɔ mu dɛ nna Jehovah ahyɛ Abraham bɔ dze, naaso aber a Abraham dzii mfe 100 na ne yer so dzii mfe 90 no, nna dɛm awarfo anokwafo yi nnwoo ba a wɔahyɛ no ho bɔ no. (Gen. 21:​1-7) Iyi nyina mu no, Bible no ka dɛ: ‘Abraham gyee dzii enyidado mu, ma ɔaayɛ aman pii egya, dɛ mbrɛ wɔaka no.’ (Rom. 4:18) Yenyim dɛ dza nna Abraham rohwɛ kwan no baa mu. Ampaara ɔwoo ba a nna ɔdze ber tsentsen ahwɛ no kwan no, na ɔtoo ne dzin Isaac. Ebɛnadze na ɔmaa Abraham nyaa ahotodo dɛ Nyankopɔn no bɔhyɛ no bɛba mu?

2. Ebɛnadze ntsi na Abraham gyee dzii dɛ bɔ a Jehovah dze ahyɛ no no bɛba mu?

² Nna Abraham nye Jehovah wɔ ebusuabɔ a no mu yɛ dzen. Dɛm ntsi ‘ohun ampa dɛ anohoba a Nyankopɔn abɔ no’ bɛba mu. (Rom. 4:21) Osian gyedzi a Abraham daa no edzi ntsi, Jehovah gyee no too mu na obuu no dɛ ɔyɛ ɔtseneneenyi. (Jas. 2:23) Sɛ yɛhwɛ Romefo 4:18 a, ɔma yehu dɛ nna Abraham wɔ gyedzi nye enyidado. Hom mma yɛnhwɛ dza ɔsomafo Paul kae faa enyidado ho wɔ Romefo tsir 5 no.

3. Ebɛn asɛm na Paul kae faa enyidado ho?

³ Siantsir a yebotum enya awerɛhyɛmu dɛ ‘enyidado a yɛwɔ no nnhyɛ enyito anaa onndzi hweambɔ’ no, Paul kyerɛkyerɛɛ mu.  (Rom. 5:5) Ɔsanee boaa hɛn ma yehun dza ɔsɛ dɛ yɛyɛ ama enyidado a yɛwɔ no mu ayɛ dzen. Paul kaa iyi ho asɛm wɔ Romefo 5:​1-5. Aber a yerususu dza Paul kae yi ho no, fa toto dza woara so ehu no ho. Sɛ eyɛ dɛm a, ibohu dɛ daakye ho enyidado a ewɔ no seseiara no, no mu ayɛ dzen akyɛn ber a ibohun nokwar no. Afei so, adzesua yi bɔboa hɛn ma yeehu mbrɛ yebesi ahyɛ enyidado a yɛwɔ no seseiara mpo no mu dzen. Hom mma yendzi kan nhwɛ enyidado papabi a Christianfo wɔ a Paul kaa ho asɛm dɛ onndzi hweambɔ no.

4. Ebɛnadze na wɔaka ho asɛm wɔ Romefo 5:​1, 2?

⁴ Kenkan Romefo 5:​1, 2. Paul kyerɛɛw dɛm nsɛm yi kɛmaa Rome asafo no. Nna enuanom a wɔwɔ hɔ no ebosua Jehovah na Jesus ho adze, woebenya hɔn mu gyedzi, na wɔabɛyɛ Christianfo. Ntsi nna Nyankopɔn ‘nam gyedzi do ebu hɔn atseneneefo’ na ɔdze sunsum krɔnkrɔn asera hɔn. Nokwasɛm nye dɛ, nna wɔrohwɛ enyidado papabi kwan na wobotum enya awerɛhyɛmu dɛ dɛm enyidado no bɛba mu.

5. Ebɛn enyidado na Christianfo a wɔasera hɔn no wɔ?

⁵ Ekyir yi, Paul kyerɛɛw krataa kɛmaa Christianfo a nna wɔasera hɔn a wɔwɔ Ephesus no, na ɔkaa enyidado a Nyankopɔn dze ama hɔn no ho asɛm. Ɔkaa dɛ hɔn nsa bɛka ‘egyapadze a wɔdze ahyɛ ahotsewfo bɔ no.’ (Eph. 1:18) Afei so, wɔ krataa a Paul kyerɛwee kɛmaa Colossaefo no mu no, ɔkyerɛɛ hɔn beebi a nna hɔn nsa bɛka dɛm enyidado yi. Ɔkaa iyi ho asɛm dɛ ɔyɛ “enyidado a ɔda hɔ ma hom wɔ sor.” (Col. 1:​4, 5) Ntsi, enyidado a Christianfo a wɔasera hɔn no wɔ nye dɛ wobenyan hɔn ma wɔaakɛtsena sor afebɔɔ, na wɔnye Christ abɔ mu edzi adze.—1 Thess. 4:​13-17; Nyi. 20:6.

6. Ebɛn asɛm na onua bi a wɔasera no kae faa enyidado a ɔwɔ no ho?

⁶ Enyidado a Christianfo a wɔasera hɔn no wɔ no da hɔn akoma do paa. Nna Onua Frederick Franz ka hɔn a wɔasera hɔn no ho. Mbrɛ nna osi tse nka wɔ dɛm enyidado yi ho no, ɔkaa ho asɛm. Ɔkaa dɛ: “Hɛn enyidado no yɛ nokwar, na ɔbɛba mu koraa wɔ kuw ketseaba 144,000 no munyi biara a otwa tun no do ma ekodu beebi a  ɔtra dza yesusu no mpo do.” Onua Franz dze nokwardzi soom Nyankopɔn mfe pii na afe 1991 mu no osii mbrɛ nna osi tse nka wɔ dɛm enyidado no ho no do dua. Ɔkaa dɛ: “Yɛda ho ara nyim dɛ dɛm enyidado no som bo. . . . Yɛbɔkɔ do akyerɛ ho enyisɔ kɛse ber tsentsen a ɔsɛ dɛ yɛtweɔn no. Ɔyɛ adze a ɔfata dɛ yɛtweɔn, sɛ ɔbɛgye mfrenhyia ɔpepem kor mpo a. Sesei, mubu hɛn enyidado no dɛ ɔsom bo kɛse kyɛn ber biara a etwa mu.”

7-8. Ebɛn enyidado na hɛn mu piinara wɔ? (Romefo 8:​20, 21)

⁷ Jehovah n’asomfo a wɔwɔ hɔ ndɛ no mu pii wɔ enyidado a nna Abraham so wɔ no bi. Ɔno nye dɛ, wɔbɛtsena asaase yi do daa wɔ Nyankopɔn n’Ahendzi no tumdzi ase. (Heb. 11:​8-10, 13) Paul kyerɛɛw nhyira ahorow a hɔn a wɔrohwɛ dɛm enyidado no kwan no benya no ho asɛm. (Kenkan Romefo 8:​20, 21.) Aber a odzi kan a ibohun bɔ a Nyankopɔn dze ahyɛ hɛn afa daakye ho no, nna ebɛnadze na erohwɛ kwan paa? Nna erohwɛ kwan dɛ daakye ebɛyɛ nyimpa a idzi mu na bɔn biara nnyi wo ho? Anaadɛ ibohun dɛ w’adɔfo a woewuwu no botum asan atsena ase bio wɔ Paradise asaase do no w’enyi gyee? Osian enyidado a Nyankopɔn dze ama hɛn no ntsi, yebotum ahwɛ ndzɛmba papa kwan daakye.

⁸ Dɛ yɛbɛtsena ase daa wɔ sor o, dɛ yɛbɛtsena asaase do o, yɛwɔ enyidado papabi a ɔma yedzi dɛw. Dɛm ntsi, awerɛhyɛmu a yɛwɔ wɔ enyidado no mu no, ɔsɛ dɛ yɛhyɛ mu dzen. Asɛm a odzi hɔ a Paul kyerɛwee no ma yehu mbrɛ iyi besi ayɛ yie. Hom mma yɛnhwɛ dza ɔkae faa enyidado a yɛwɔ no ho. Nsɛm a Paul kyerɛwee no botum aboa hɛn ma yeenya awerɛhyɛmu dɛ enyidado a yɛwɔ no bɛba mu ɔkwan biara do.

9-10. Sɛ yɛhwɛ ɔhaw a Paul hyiae no a, ebɛn ɔhaw ahorow na Christianfo so botum ahwɛ kwan? (Romefo 5:3) (Hwɛ mfonyin ahorow no so.)

⁹ Kenkan Romefo 5:3. Paul kaa dɛ sɛ yɛfa ahohia mu a, obotum ama awerɛhyɛmu a yɛwɔ dɛ enyidado a yɛwɔ no bɛba mu no no mu ayɛ dzen. Naaso bi a yebenya adwen dɛ, na iyi besi dɛn ayɛ yie? Mbrɛ ɔtse nye dɛ, Christ n’ekyirdzifo nyina botum ahwɛ kwan dɛ wɔbɛfa ahohia mu. Hom mma yɛnhwɛ ɔhaw a Paul hyiae no.  Ɔkaa kyerɛɛ enuanom a wɔwɔ Thessalonica no dɛ: “Yɛwɔ hom nkyɛn no yɛkaa kyerɛɛ hom siee dɛ yebohu amandze; dɛ mbrɛ ɔbaa mu, na hom nyim no.” (1 Thess. 3:4) Afei so, ɔkaa kyerɛɛ enuanom a wɔwɔ Corinth no dɛ: ‘Enuanom, yɛmmpɛ dɛ yɛdze ahohia a ɔbaa hɛn do no sie hom. Nna yenyim dɛ hɛn nkwa mpo befi hɛn nsa.’—2 Cor. 1:8; 11:​23-27.

¹⁰ Ndɛ so, Christianfo botum ahwɛ kwan dɛ wobehyia ɔhaw. (2 Tim. 3:12) Ɔwo so, ebɛn ɔhaw na irihyia? Ofi aber a ebɛgyee Jesus dzii na ibedzii n’ekyir no, ebɛn ɔhaw na ehyia? Bi a w’anyɛnkofo na w’ebusuafo ridzi wo ho fɛw. Bi mpo a, nna wɔnye wo ridzi no wenwennwen na wɔmmpɛ w’enyim mpo ahwɛ. Anaaso dɛ osian nokwar a epɛ dɛ idzi wɔ edwuma mu ntsi, w’edwumawura anaa w’edwumamufo retan w’enyi? (Heb. 13:18) Anaa w’enyidado ho asɛm a eka kyerɛ afofor no ama aban mpanyimfo retseetsee wo? Ɔmmfa ho ɔhaw biara a yerihyia no, Paul kaa dɛ ɔsɛ dɛ yɛma hɛn enyi gye. Ebɛnadze ntsi a?

11. Ebɛnadze ntsi na ɔsɛ dɛ yesi hɛn bo dɛ ɔhaw biara a yebehyia no, yɛdze enyimia begyina ano?

¹¹ Sɛ yerihyia ɔhaw a ɔsɛ dɛ yɛma hɛn enyi gye osiandɛ ɔhaw a ɔtse dɛm no botum aboa hɛn ma yeenya suban bi a no ho hia. Dɛ mbrɛ Romefo 5:3 ka no, “ahohia dze abotar [anaa enyimia] ba.” Christianfo nyina bɛfa ahohia mu, dɛm ntsi ɔsɛ dɛ hɔn nyinara mia hɔn enyi gyina ano. Dɛ Christianfo no, ɔsɛ dɛ yɛwe taa do dɛ ɔhaw biara a yebehyia no, yebemia hɛn enyi egyina ano. Sɛ yɛyɛ dɛm a, enyidado a yɛwɔ no bɛba mu ma yɛdze hɛn enyi ehu. Yɛmmpɛ dɛ yɛyɛ hɛn adze tse dɛ hɔn a Jesus kaa hɔnho asɛm dɛ wɔtse dɛ aba a okoguu ɔbotan do no. Ahyɛse no dze, wɔdze enyigye gyee asɛm no naaso aber a wohyiaa “abɛbrɛsɛ anaa ahohia” no, ɔtoo hɔn fintsidua. (Matt. 13:​5, 6, 20, 21) Nokwasɛm nye dɛ, hɛn mu biara nnyi hɔ a sɛ wɔretan n’enyi anaa orihyia ɔhaw a, ɔyɛ no dɛw. Naaso sɛ yemia hɛn enyi gyina ano a, yenya do mfaso kɛse. Ebɛnadze ntsi na yɛreka dɛm?

12. Sɛ yemia hɛn enyi gyina ɔhaw ano a, ebɛn mfaso na yenya?

¹² Ɔsomafo James kaa mfaso a yebenya aber a yeemia hɛn enyi egyina ɔhaw bi ano ho asɛm. Ɔkaa dɛ: “Hom mma abotar nwie n’edwuma yɛ pɛ, na hom eedzi mu pirim a ɔnnka hom hweeara.” (Jas. 1:​2-4) James kaa enyimia ho asɛm tse dɛ mbrɛ ɔwɔ edwuma bi a ɔsɛ dɛ ɔyɛ. Ebɛn edwuma na ɔsɛ dɛ enyimia yɛ? Enyimia botum aboa wo ma eenya su ahorow bi tse dɛ abotar, gyedzi, nye Nyankopɔn mu ahotodo kɛse. Naaso mbrɛ ɔtse nye dɛ, sɛ yemia hɛn enyi gyina ɔhaw ano a, ɔboa hɛn ma yenya biribi fofor so a no ho hia.

13-14. Ebɛnadze na enyimia dze ba, na ɔno fa enyidado ho dɛn? (Romefo 5:4)

¹³ Kenkan Romefo 5:4. Ɔsomafo Paul kaa enyimia ho asɛm dɛ ɔma ‘wɔpen hɛn do,’ kyerɛ dɛ ɔma Jehovah gye hɛn to mu. Naaso, gye a Jehovah gye wo to mu no nnkyerɛ dɛ n’enyi gye ho dɛ erefa ɔhaw mu. Mbom ɔwo na Nyankopɔn gye wo to mu na nnyɛ ɔhaw no bi a. Kaa dɛ sɛ imia w’enyi gyina ɔhaw biara a irihyia no ano a, ɔma Jehovah n’enyi gye na ɔgye wo to mu. Sɛ yehu no dɛm a, ɔhyɛ hɛn nkuran paa!—Ndw. 5:12.

¹⁴ Kaa dɛ Abraham miaa n’enyi gyinaa ɔhaw a ohyiae no ano na iyi maa Nyankopɔn gyee no too mu. Dɛm ntsi Jehovah frɛɛ no dɛ ne nyɛnko na obuu no dɛ ɔyɛ ɔtseneneenyi. (Gen. 15:6; Rom. 4:​13, 22) Dɛ mbrɛ Jehovah hun Abraham no, hɛn so sɛ yemia hɛn enyi a, obohu hɛn dɛmara. Ɔnnyɛ edwuma pii a yɛyɛ wɔ Nyankopɔn no som mu anaa hokwan ahorow a yɛwɔ no na ɔma ɔgye hɛn to mu. Dza ɔma ɔgye hɛn to mu nye dɛ yɛdze enyimia begyina ɔhaw biara a yebehyia no ano na yaakɔ do edzi no nokwar. Ntsi ɔmmfa ho mfe a yeedzi, dza yɛrefa mu wɔ asetsena mu anaa dza a yetum yɛ no, hɛn nyina botum dze enyimia egyina ɔhaw a yerihyia no ano.  Edze nokwardzi rigyina ɔhaw a irihyia no ano anaa? Sɛ dɛm a, ka w’akoma to wo yamu na nya awerɛhyɛmu dɛ Nyankopɔn gye wo to mu. Sɛ yehu dɛ Nyankopɔn gye hɛn to mu a, ɔbɔboa hɛn ma awerɛhyɛmu a yɛwɔ wɔ hɛn enyidado no mu no aayɛ dzen.

15. Ebɛn asɛm fofor na Paul sanee kae, na ebɛnadze ntsi na bi a ɔbɛyɛ dzen ama binom dɛ wɔbɛtse ase?

¹⁵ Paul kyerɛkyerɛɛ mu dɛ sɛ yemia hɛn enyi gyina ɔhaw ano a, ɔma Jehovah gye hɛn to mu. Ma yɛnhwɛ dza Paul sanee kae. Ɔkaa dɛ: ‘Sɛ Nyankopɔn pen hɛn do a, ɔdze enyidado ba, na enyidado nnhyɛ enyito anaa onndzi hweambɔ.’ (Rom. 5:​4, 5) Bi a iyi bɛyɛ dzen ama binom dɛ wɔbɛtse ase. Ebɛnadze ntsi a? Siantsir nye dɛ wɔ Romefo 5:2 no, nna Paul edzi kan aka wɔ hɔ dɛ, Christianfo a wɔwɔ Rome no wɔ enyidado dada. Nna dɛm enyidado no nye “Nyankopɔn enyimnyam ho enyidado” no. Bi a iyi bɛma obi ebisa dɛ, ‘Sɛ nna dɛm Christianfo no wɔ enyidado dada dze a, nna ɔno ebɛnadze ntsi na Paul sanee kaa enyidado ho asɛm?’

16. Ebɛnadze na obotum ama enyidado a obi wɔ no no mu ayɛ dzen? (Hwɛ mfonyin ahorow no so.)

¹⁶ Sɛ yɛma ɔtsena hɛn adwen mu dɛ enyidado yɛ biribi a onyin a, ɔbɛma yɛatse dza Paul kae no ase yie. Ɔwodze ma yɛnyɛ dɛm mfatoho yi: Ekaa ber a odzi kan a etsee enyidado papabi a Nyankopɔn n’Asɛm no ka ho asɛm no anaa? Bi a dɛm aber no, inyaa adwen dɛ bɔhyɛ a ɔno nye dɛ yɛbɛtsena ase daa wɔ Paradise asaase do no yɛ adaaso ara kwa. Naaso aber a isuaa Jehovah ho adze kɔr ekyir, na ebɛtsee Bible mu bɔhyɛ ahorow ase yie no, ebɛgyee dzii paa dɛ dɛm enyidado no bɛba mu ɔkwan biara do.

17. Sɛ ihyira woho do ma Jehovah na wonuma wo a, ebɛn kwan do na enyidado a ewɔ no bɔkɔ do ayɛ kɛse?

¹⁷ Ofitsi aber a ihyiraa woho do na wonumaa wo, akɔ do esua Jehovah ho adze na wɔama abɛn no kɛse. Afei so, wɔama ahotodo a ewɔ wɔ w’enyidado no mu no akɔ do ayɛ dzen. (Heb. 5:13–6:1) Bi a ehu dɛ asɛm a ɔwɔ Romefo 5:​2-4 no yɛ nokwar. Ihyiaa ɔhaw ahorow, naaso imiaa w’enyi gyinaa ano, na ihun dɛ Nyankopɔn agye wo ato mu. Osiandɛ inyim dɛ Nyankopɔn dɔ wo  na ɔgye wo to mu ntsi, ɔno ama egye dzi paa dɛ bɔhyɛ ahorow a ɔaka ho asɛm no bɛba mu. Afei so, enyidado a ewɔ no sesei no mu ayɛ dzen akyɛn ber a ibohun nokwar no. Wankasa ehu dɛ mber rokɔ do no, no mu yɛ ara na ɔreyɛ dzen. Iyi asesa w’asetsena kwan koraa. Dɛm enyidado yi asesa mbrɛ isi yɛ w’adze, mbrɛ enye w’ebusuafo dzi nsɛm, mbrɛ isisi gyinae, nye mbrɛ edze wo ber dzi dwuma no mpo.

18. Ebɛn awerɛhyɛmu na Jehovah dze ama hɛn?

¹⁸ Ɔsomafo Paul ama yeebohu dɛ sɛ Nyankopɔn gye hɛn to mu a, ɔma hɛn enyidado. Ɔsanee kaa asɛm bi a no ho hia paa faa dɛm enyidado yi ho. Ɔma inya awerɛhyɛmu dɛ w’enyidado no bɛba mu. Ebɛnadze ntsi na ibotum agye iyi edzi paa? Nyankopɔn nam Paul do kaa asɛm bi kyerɛɛ Christianfo nyina a ɔma yenya dɛm awerɛhyɛmu no. Ɔkaa dɛ: ‘Enyidado nnhyɛ enyito anaa onndzi hweambɔ, osiandɛ wɔnam sunsum krɔnkrɔn a wɔdze ama hɛn no do ehue Nyankopɔn dɔ egu hɛn akoma mu.’ (Rom. 5:5) Ntsi ewɔ siantsir a ibotum enya awerɛhyɛmu dɛ enyidado a Nyankopɔn dze ama wo no bɛba mu kwan biara do.

19. Ebɛn awerɛhyɛmu na enyidado a ewɔ no botum ama enya?

¹⁹ Dwendwen bɔ a Jehovah dze hyɛɛ Abraham, nye mbrɛ ɔgyee no too mu na obuu no dɛ ne nyɛnko no ho hwɛ. Enyidado a nna Abraham no annyɛ gyan mbom ɔbaa mu. Bible no ka dɛ: ‘Abraham tɔɔ no bo ase tweɔnee no, ne nsa kaa anohoba no.’ (Heb. 6:15; 11:​9, 18; Rom. 4:​20-22) Ampaara Abraham ne nsa ennsi famu. Woara so botum enya awerɛhyɛmu dɛ sɛ ekɔ do som Nyankopɔn nokwar mu a, wo nsa bɛka enyidado a Nyankopɔn dze ahyɛ wo bɔ no. Dɛm ntsi, ma w’enyi ngye, osiandɛ inyim dɛ enyidado a ewɔ no bɛba mu ɔkwan biara do. Orinndzi wo hweambɔ na ɔremma wo nsa nnsi famu da! (Rom. 12:12) Paul kyerɛɛw dɛ: “Enyidado Nyankopɔn mfa gyedzi mu dɛw nye asomdwee nyina nhyɛ hom ma, ma hom aabor do wɔ enyidado mu, wɔ sunsum krɔnkrɔn ahoɔdzen mu.”—Rom. 15:13.