1. Sɛ Christiannyi bi ho botum akokwaa a, ebɛnadze na ɔsɛ dɛ ɔyɛ?

 WƆWO abofra bi a ɔnnkyɛr koraa na ɔayɛ panyin, na iyi yɛ nwanwa paa. Ɔyɛ mpo a yennhu mbrɛ wosi nyin, hɛn enyi bɛba hɛnho do no na wɔayɛ mpanyimfo. Naaso sɛ obi botum enyin abɛyɛ Christiannyi a noho akokwaa a, ɔno dze ɔmmba ara kɛkɛ ɔgye edwumadzen. b (1 Cor. 13:11; Heb. 6:1) Sɛ obi noho botum akokwaa a, ɔsɛ dɛ ɔnye Jehovah ntamu ebusuabɔ no mu yɛ dzen. Afei so, yehia no sunsum krɔnkrɔn no ama yeetum enya suban a n’enyi gye ho, suban afofor a ɔbɔboa hɛn wɔ asetsena mu, na yeesiesie hɛnho ama asodzi a ɔda hɛn enyim daakye no.—Mbɛ. 1:5.

2. Ebɛnadze na yesua fi Genesis 1:27 no mu, na ebɛnadze na yebosusu ho wɔ adzesua yi mu?

² Jehovah robɔ nyimpa no, ɔbɔɔ ɔbanyin na ɔbaa. (Kenkan Genesis 1:27.) Sɛ yehu nyimpa bi na ɔyɛ ɔbanyin a yehu, ɔyɛ ɔbaa so a yehu. Naaso ɔsor dza hɔn mu biara botum ayɛ. Ɔsor dza mbaa botum ayɛ nna ɔsor dza mbanyin so botum ayɛ; dɛm na Jehovah bɔɔ hɔn. Dɛm ntsi hɔn mu biara hia suban na ntsetsee a obotum aboa hɔn ma wɔaayɛ dza ɔhyɛ hɔn nsa no. (Gen. 2:18) Yebosusu ndzɛmba a enuanom mbabaa botum ayɛ ama woeenyin abɛyɛ Christianfo a hɔnho akokwaa no ho wɔ adzesua yi mu. Adzesua a odzi hɔ no mu no, yebosusu ndzɛmba a enuanom mberantsɛ so botum ayɛ no ho.

3-4. Woananom hɔn nhwɛdo pa na enuanom mbabaa botum esuasua? (Hwɛ mfonyin no so.)

³ Bible no ka mbaa anokwafo pii a nna wɔdɔ Jehovah na wɔsoom no no ho asɛm. (Kɔ jw.org na hwɛ asɛm a wɔato dzin “Mbaa A Hɔnho Nsɛm Wɔ Bible Mu No—Ebɛnadze Na Yebotum Esua Efi Hɔn Hɔ?”) Dɛ mbrɛ kyerɛwsɛm a adzesua yi gyina do no ma yehu no, nna dɛm mbaa yi ‘enyi da hɔ na wodzi nokwar wɔ adze nyina mu.’ Mbaa a Bible no aka hɔnho asɛm no da nkyɛn a, enuanom mbabaa botum esuasua Christianfo mbaa a hɔnho akokwaa na wɔyɛ nhwɛdo pa wɔ hɔn asafo mu no.

⁴ Enuanom mbabaa, hom mfa hom enyi nto famu nhwehwɛ Christianfo mbaa a hɔnho akokwaa a hom botum esuasua hɔn. Hom nhyɛ suban pa a wɔwɔ no nsew na hom nhwɛ kwan a hom botum afa do esuasua hɔn. Hom mma yɛnhwɛ suban etsitsir ebiasa bi a Christianfo mbaa hia ama hɔnho akokwaa no.

5. Ebɛnadze ntsi na ahobrɛadze ho hia ama Christiannyi baa bi ho akokwaa?

⁵ Ahobrɛadze yɛ suban a Christiannyi biara hia ama noho akokwaa. Sɛ ɔbaa bi brɛ noho adze a, ɔma ɔnye Jehovah nye afofor ntamu yɛ papa. (Jas. 4:6) Dɛ mfatoho no, sɛ ɔbaa bi dɔ Jehovah a, ɔbɛbrɛ noho adze edzi tsiryɛ ho mbra a Jehovah ahyehyɛ no do. (1 Cor. 11:3) Dɛm mbra yi yɛ edwuma wɔ asafo no nye ebusua no nyina mu. c

6. Enuanom mbabaa besi dɛn esuasua Rebekah n’ahobrɛadze no?

⁶ Ma yensusu dza Rebekah yɛe no ho kakra. No nkwa nda nyina mu no, ɔkyerɛɛ dɛ ɔyɛ ɔbaa a n’adwen mu da hɔ na otum dze akokodur sisi gyinae. Afei so, nna onyim mber a ɔfata a ɔsɛ dɛ ɔyɛ dɛm. (Gen. 24:58; 27:​5-17) Naaso ɔmmfa ho dɛ nna otum yɛ iyinom nyina no, nna obu adze na ɔbrɛ noho adze so. (Gen. 24:​17, 18, 65) Ntsi ɔwo so, sɛ ifi ahobrɛadze mu taa Jehovah ne nhyehyɛɛ ekyir dɛ mbrɛ Rebekah  yɛe no a, afofor bɔhwɛ wo nhwɛdo pa no esuasua wɔ w’ebusua mu nye asafo no mu.

7. Nna Esther nyim dɛ ɔnnyɛ biribiara na ɔwɔ hokwan dɛ ɔyɛ. Enuanom mbabaa besi dɛn esuasua no?

⁷ Ɔsɛ dɛ Christianfo a hɔnho akokwaa no nyina hu dɛ ɔnnyɛ biribiara na wɔwɔ hokwan dɛ wɔyɛ. Bible no ka dɛ: ‘Hɔn a wonyim dɛ ɔnnyɛ biribiara na wɔwɔ hokwan dɛ wɔyɛ no, nyansa nye hɔn tse.’ (Mbɛ. 11:2) Nna Esther yɛ ɔbaa nyamesuronyi. Aber mpo a ɔbɛyɛɛ ɔhembaa no, nna onyim dɛ ɔnnyɛ biribiara na ɔwɔ hokwan dɛ ɔyɛ, ntsi ɔammema noho do. Osiandɛ nna ɔwɔ dɛm suban yi ntsi, aber mpo a no nua panyin Mordecai tuu no fo no, otsiei na ɔdze yɛɛ edwuma. (Esther 2:​10, 20, 22) Dɛ mbrɛ Esther yɛe no, sɛ ehwehwɛ afotu pa fi nkorɔfo hɔ na edze yɛ edwuma a, nna woara so rekyerɛ dɛ egye to mu dɛ ɔnnyɛ biribiara na ewɔ hokwan dɛ eyɛ.—Titus 2:​3-5.

8. Dɛ mbrɛ 1 Timothy 2:​9, 10 ma yehu no, onuabaa bi besi dɛn dze ne ntarhyɛ na n’ahosiesie akyerɛ dɛ obu adze na ɔdwen afofor ho?

⁸ Adze fofor a Esther yɛe dze daa dɛm suban yi edzi nye dɛ nna ɔdwen afofor ho. Ɔmmfa ho dɛ nna “no bɔbea yɛ fɛw na n’enyim wɔ nyam” no ɔanntwetwe adwen ammba noho do, anaa ɔannka dɛ, ɔbaa hoɔfɛwfo no na maba no obiara nhwɛ me. (Esther 2:​7, 15) Christiannyi ɔbaa bi besi dɛn esuasua Esther? Kwan kor nye dza wɔaka ho asɛm wɔ 1 Timothy 2:​9, 10 no. Hɔ kenkan wɔ Wiadze Fofor Nkyerɛase no mu dɛ: “Dɛmara na ɔsɛ dɛ mbaa hyɛ ntar a ɔfata, na wɔdze ahobrɛadze nye adwen a no mu da hɔ siesie hɔnho. Ɔnnyɛ dza ohia nye dɛ wɔbɔbɔ hɔn tsir kuntann, na wɔdze sika kɔkɔɔ anaa ahondze pa anaa ntar a no bo yɛ dzen besiesie hɔnho, na mbom dza ohia nye dɛ wɔbɛyɛ ndwuma pa a ɔfata mbaa a wɔkyerɛ dɛ wɔsom Nyankopɔn.” Ɔsomafo Paul kaa kyerɛɛ Christianfo mbaa dɛ wɔnhyɛ ntar a ɔfata na ɔkyerɛ dɛ hɔn adwen mu da hɔ mfa nsiesie hɔnho. Greek nkasafua a wɔdze dzii dwuma wɔ ha no kyerɛ dɛ, ɔsɛ dɛ Christianfo mbaa dze hɔn ntarhyɛ kyerɛ dɛ wobu adze na wɔdwen afofor so ho. Enuanom mbaa a hom yɛ dɛm, hɛn enyi sɔ hom!

9. Ebɛnadze na yebotum esua efi dza Abigail yɛe no mu?

⁹ Nhumu yɛ suban fofor a ɔsɛ dɛ Christianfo mbaa a hɔnho akokwaa nyina da no edzi. Sɛ wɔka dɛ obi wɔ nhumu a, ɔkyerɛ dɛn? Sɛ obi tum hu nsonsonee a ɔwɔ dza ɔtsen nye dza ɔnntsen mu na ɔyɛ dza ɔtsen a, ɔkyerɛ dɛ ɔwɔ nhumu. Dɛm na Abigail yɛe, na ma yensusu dza ɔyɛe no ho. No kun sii gyinae bɔn bi a nna ɔbɔkɔ akɛfa ɔhaw kɛse bi abrɛ ne fiefo nyina, naaso aber a Abigail tsee gyinae a no kun esi no, otuu ho anamɔn ntsɛmara. Osiandɛ ohun anamɔn pa a ɔsɛ dɛ otu na otui ntsi ɔgyee ne fiefo nkwa. (1 Sam. 25:​14-23, 32-35) Sɛ yɛwɔ nhumu a, ɔbɔboa hɛn ma yeehu ber a ɔsɛ dɛ yɛkasa nye ber a ɔsɛ dɛ yɛyɛ komm. Afei so sɛ yɛroboa afofor a, dɛm suban yi bɔboa hɛn ma yaannyɛ biribi a ɔbɛhaw hɔn.—1 Thess. 4:11.

10-11. Sɛ isua akenkan na akyerɛw yie a, obesi dɛn aboa wo nye afofor? (Hwɛ mfonyin no so.)

¹⁰ Ɔsɛ dɛ enuanom mbaa nya suban afofor bi so a obotum aboa hɔn. Ndzɛmba bi wɔ hɔ a, sɛ ɔbaa bi hu yɛ wɔ ne mbofraber mu a, ɔbɔboa no no nkwa nda nyina. Ma yensusu dɛm ndzɛmba ahorow no bi ho.

¹¹ Sua mbrɛ wosi kenkan na wɔkyerɛw adze yie. Aman bi do no, wobu no dɛ no ho nnhia dɛ mbaa sua akenkan na akyerɛw. Naaso ɔsɛ dɛ akenkan na akyerɛw ho hia Christiannyi biara. d (1 Tim. 4:13) Ntsi, sɛ ɔyɛ dzen ma wo dɛ dɛn ara mpo a, mia w’enyi sua mbrɛ wosi kenkan na wɔkyerɛw adze yie. Sɛ eyɛ dɛm a, ebɛn mfaso na ibenya efi mu? Daakye bi, obotum aboa wo ma eenya edwuma bi ayɛ. Afei so, obotum aboa wo ma eesua Nyankopɔn n’Asɛm no yie na edze akyerɛkyerɛ nkorɔfo. Dza ɔkyɛn ne nyina no, ɔbɛma abɛn Jehovah kɛse aber a isua n’Asɛm no na edwendwen ho no.—Josh. 1:8; 1 Tim. 4:15.

12. Ebɛnadze na ibotum esua efi Mbɛbusɛm 31:26 mu?

¹² Sua mbrɛ enye nkorɔfo bɛkasa yie, na sɛ obi so rekasa a tsie no yie. Iyi yɛ suban bi a ɔsɛ dɛ Christianfo nyina sua. Ɔsomafo James kyerɛɛ hɛn mbrɛ yebotum ayɛ iyi. Ɔkaa dɛ: “Nyimpa biara nyɛ ntsɛm ntsie, nyɛ nyaa nkasa.” (Jas. 1:19) Sɛ obi rekasa na eyɛ aso tsie a, ɔkyerɛ dɛ edwen noho anaa ewɔ ‘tsema.’ (1 Pet. 3:8) Sɛ obi reka asɛm bi na enntse ase, anaa enntse mbrɛ osi tse nka ase mpo a, bisa no nsɛm bi a ɔbɛma atse no ase. Afei, dwen dza ɔaka no ho ansaana akasa. (Mbɛ. 15:28.) Bisa woho dɛ: ‘Asɛm a merebɛka yi yɛ nokwar na ɔhyɛ nkuran anaa? Dza merebɛka yi kyerɛ dɛ mubu adze na modwen afofor ho?’ Sua mbrɛ enuanom mbaa a hɔnho akokwaa no si kasa na wotsie nkorɔfo no. (Kenkan Mbɛbusɛm 31:26.) Sɛ wɔrekasa a, ɔyɛ a kyɛn w’aso tsie no yie. Sɛ isua mbrɛ wosi yɛ dɛm a, ɔbɛma enye afofor ntamu ayɛ kama.

13. Ibesi dɛn esua mbrɛ wosi hwɛ fie? (Hwɛ mfonyin no so.)

¹³ Sua mbrɛ wosi hwɛ fie. Mbea pii no, mbaa na wɔtaa yɛ fie ndwuma. Wo maame anaa onuabaa fofor bi botum aboa wo ma eesua iyi yɛ. Akyerɛbaa bi a wɔfrɛ no Cindy kaa dɛ: “Ndzɛmba pa a me maame dze kyerɛɛ me no mu kor nye dɛ, ɔmaa muhun dɛ sɛ meyɛ edwumadzen a m’enyi bɛgye. Ndzɛmba bi tse dɛ edzibanyɛ, fie esiesie, adzepam nye mbrɛ wosi dzi gua a musuae no aboa me paa na wɔama mutum yɛ pii wɔ Jehovah no som mu. Me maame kyerɛɛ me mbrɛ wosi gye ahɔho so. Iyi ama mehyia enuanom pii, na mesua ndzɛmba pii efi hɔn hɔ.” (Mbɛ. 31:​15, 21, 22) Ɔbaa a ɔpɛ edwuma, ɔda ahɔhoyɛ su edzi, na onyim mbrɛ wosi hwɛ fie no boa ma ndzɛmba kɔ yie paa wɔ n’ebusua mu nye asafo no mu.—Mbɛ. 31:​13, 17, 27; Andw. 16:15.

14. Ebɛnadze na isua fi Crystal n’asɛm no mu, na ebɛnadze na ɔsɛ dɛ ema ɔtsena w’adwen mu?

 ¹⁴ Sua biribi a wankasa botum dze ahwɛ woho. Ɔsɛ dɛ Christianfo nyina sua mbrɛ hɔnankasa botum ayɛ biribi dze ahwɛ hɔnho. (2 Thess. 3:​7, 8.) Onuabaa bi a wɔfrɛ no Crystal kaa dɛ: “Aber a morobɔkɔ ntoado skuul no, m’awofo hyɛɛ me nkuran dɛ menyɛ course bi a obotum aboa me daakye. Me papa tuu mo fo dɛ, munsua mbrɛ wosi bu sika ho nkontaa na wɔyɛ ho kyerɛwtohɔ, na iyi boaa me paa.” Sɛ yɛdze dza ɔsɛ dɛ isua ama eenya edwuma bi ayɛ no to nkyɛn a, bɔ mbɔdzen dɛ ibosua mbrɛ wosi hwɛ sika do na kakraabi ba wo nsamu a, annsɛɛ no. (Mbɛ. 31:​16, 18) Sɛ annkɛfa kaw biara annsɛn wo kɔn mu, na kakra a ibenya no ema w’enyi sɔ a, ɔbɔboa wo ma eetum ayɛ dza osi w’enyi do wɔ wo nyamesom mu.—1 Tim. 6:8.

15-16. Ebɛnadze ntsi na enuanom mbaa a wɔyɛ esigyafo no som bo? (Mark 10:​29, 30)

¹⁵ Sɛ inya suban a Jehovah n’enyi gye ho, na isua ndzɛmba afofor bi so a no ho hia a, ɔbɔboa wo ma aayɛ dza ɔda w’enyim daakye no. Ndzɛmba a ibotum ayɛ no daakye no, ma yensusu no mu bi ho nhwɛ.

¹⁶ Ibotum edzi sigya kakra. Mbea bi wɔ hɔ a, wɔnnka sigyadzi ho asɛmpa. Naaso mbaa a wɔwɔ hɔ no mu bi pɛ dɛ wɔdze asɛm a Jesus kae no yɛ edwuma, ntsi woesi gyinae dɛ wɔnnkɔwar. (Matt. 19:​10-12) Binom so wɔ hɔ a, siantsir bi ntsi na woesi gyinae dɛ wɔronnwar. Nya awerɛhyɛmu dɛ, Jehovah na Jesus mmbu Christianfo esigyafo dɛ mfaso biara nnyi hɔn do. Beebiara a ebɔkɔ no, ihu dɛ enuanom mbaa a wɔyɛ esigyafo no robɔ edwuma paa wɔ asafo no mu. Osiandɛ dɛm Christianfo mbaa yi dɔ afofor na wɔdwen hɔnho ntsi, enuanom pii afa hɔn dɛ hɔn nuanom mbaa na hɔn nanom wɔ asafo no mu.—Kenkan Mark 10:​29, 30; 1 Tim. 5:2.

17. Ebɛnadze na akyerɛbaa bi botum ayɛ no sesei ama oeetum dze noho ahyɛ ber nyina som edwuma no mu?

¹⁷ Ibotum abɛyɛ ber nyina somfo. Asɛnka edwuma a yɛyɛ wɔ wiadze nyina no, Christianfo mbaa na wɔyɛ no kɛse. (Ndw. 68:11) Ibotum atoto wo ndzɛmba yie na edze woho ahyɛ ber nyina som edwuma no mu. Ibotum asom dɛ daa kwampaafo, etu woho ama akɔboa asafo adansi edwuma, anaa akɔsom wɔ Bethel. Sɛ edze biribi dɛm si w’enyi do a, bɔ ho mpaa. Afei hɔn a wɔyɛ ber nyina som edwuma no, ibotum nye hɔn abɔ nkɔmbɔ na ehu dza ɔsɛ dɛ eyɛ ama eetum abɛyɛ bi. Ɔno ekyir no, ibotum ayɛ nhyehyɛɛ  a ɔbɔboa wo ma eedu wo botae no ho. Sɛ ebɛyɛ ber nyina somfo a, ɔbɛma enya hokwan pii a ibotum dze asom Jehovah.

18. Ebɛnadze ntsi na ɔsɛ dɛ enuanom mbaa dze hɔn enyi to famu ansaana wɔawar ɔbarimba bi? (Hwɛ mfonyin no so.)

¹⁸ Ibotum esi gyinae dɛ ebɔwar. Suban ahorow a yeesusu ho wɔ adzesua yi mu no bɔboa wo ma aayɛ ɔyer pa. Naaso sɛ epɛ dɛ ewar a, ɔsɛ dɛ eto wo bo ase na edze w’enyi to famu hwehwɛ obi a ɔbɛyɛ wo hokafo no yie. Iyi yɛ ndzɛmba a no ho hia paa a ɔsɛ dɛ esi ho gyinae wɔ w’asetsena mu no mu kor. Naaso kaa dɛ, sɛ ewar a, banyin no na ɔbɛyɛ ebusua no tsir. (Rom. 7:2; Eph. 5:​23, 33) Ntsi bisa woho dɛ: ‘Banyin a mepɛ dɛ mowar no no, ɔyɛ Christiannyi a noho akokwaa anaa? Ɔdze Jehovah dzi kan wɔ n’asetsena mu anaa? Osisi gyinae pa anaa? Ɔgye no mfom to mu a? Obu mbaa anaa? Ɔyɛ obi a obotum aboa me ma maasom Jehovah yie, ɔaahwɛ me na ɔama m’enyi agye anaa? Sɛ wɔdze dwumadzi bi hyɛ ne nsa a, ɔyɛ no yie anaa? Dɛ mfatoho no, ebɛn dwumadzi na ɔhyɛ ne nsa wɔ asafo no mu, na ɔyɛ no dɛn?’ (Luke 16:10; 1 Tim. 5:8) Naaso ne nyina mu no, kaa dɛ sɛ epɛ kun pa a, ɔsɛ dɛ woara so yɛ obi a ibotum ayɛ ɔyer pa.

19. Ebɛnadze ntsi na dwuma a ɔyer dzi dɛ “boafo” no hyɛ no enyimnyam?

¹⁹ Bible no ka dɛ, ɔyer pa yɛ no kun no “boafo” nye hokafo a “ɔfata no.” (Gen. 2:18) Iyi kyerɛ dɛ mfaso biara nnyi yernom do anaa? Ɔnntse dɛm koraa! Dwuma a ɔyer dzi dɛ ɔboafo no hyɛ no enyimnyam. Bible mu koraa no, wɔtaa ka Jehovah noho asɛm dɛ ɔyɛ “boafo.” (Ndw. 54:4; Heb. 13:6) Ɔbaa a ɔyɛ ɔyer pa no, sɛ no kun sisi gyinae wɔ ebusua no mu a, ɔtaa n’ekyir na ɔhwɛ ma gyinaesi no yɛ edwuma. Afei so, osiandɛ ɔdɔ Jehovah ntsi onngu no kun n’enyim ase, mbom ɔma obiara hu suban pa a no kun wɔ no. (Mbɛ. 31:​11, 12; 1 Tim. 3:11) Daakye sɛ ibotum ayɛ dɛm edwuma yi dɛ ɔyer a, nna ɔno nnwaree yi, yer woho bɛn Jehovah kɛse na boa afofor wɔ fie nye asafo no mu.

20. Baatan bi besi dɛn ama ne fie ayɛ dɛw?

²⁰ Ibotum abɛyɛ baatan. Sɛ ewar a, bi a enye wo kun bɔwo mba. (Ndw. 127:3) Dɛm ntsi, ndzɛmba a obotum aboa wo ma aahwɛ wo mba yie no, ɔsɛ dɛ idzi kan dwendwen ho. Suban ahorow a yɛaka ho asɛm wɔ adzesua yi mu no bɔboa wo ma aayɛ ɔyer pa na ahwɛ wo mba yie. Ɔdɔ, ayamuyie, na abotar a ebɛda no edzi no bɛma wo fie ayɛ dɛw, na iyi bɛma wo mba no hɔn akoma atɔ hɔn yamu na wɔaatse nka dɛ edɔ hɔn.—Mbɛ. 24:3.

21. Yɛtse nka dɛn wɔ hɛn nkyerɛbaa no ho, na ebɛnadze ntsi a? (Hwɛ mfonyin a ɔwɔ Ɔweɔn-Aban yi enyim no.)

²¹ Enuanom mbabaa, dza hom yɛ ma Jehovah nye afofor nyina no, hɛn enyi sɔ, na yɛdɔ hom. (Heb. 6:10) Hom yɛ dza hom botum biara da suban pa edzi, hom da suban a ɔbɔboa hom wɔ asetsena mu na ɔbɛma afofor so hɔn enyi agye edzi. Afei so, hom siesie homho yie ma dza ɔda hom enyim daakye. Enuanom mbabaa, sɛ Jehovah ennya hom wɔ n’ahyehyɛdze no mu a, nkyɛ ɔnnyɛ!