1. Sɛ Christiannyi banyin bi noho botum akokwaa a, ebɛnadze na ɔsɛ dɛ ɔyɛ?

 ƆHEN David kaa kyerɛɛ ne ba Solomon dɛ: “Hyɛ dzen na yɛ woho ɔbarimba.” (1 Ahe. 2:​1-3) Ndɛ so, ɔsɛ dɛ Christianfo mbarimba nyina tsie dɛm afotu no. Sɛ wobotum ayɛ dɛm a, ɔsɛ dɛ wodzi Nyankopɔn ne mbra do, na wɔdze Bible mu afotusɛm bɔ hɔn bra wɔ biribiara mu. (Luke 2:52) Ebɛnadze ntsi na ohia paa dɛ enuanom mberantsɛ yer hɔnho bɛyɛ Christianfo a hɔnho akokwaa?

2-3. Ebɛnadze ntsi na no ho hia paa dɛ enuanom mberantsɛ nyin bɛyɛ mbarimba a hɔnho akokwaa?

² Christiannyi banyin dzi dwuma ahorow a no ho hia wɔ n’ebusua nye asafo no mu. Enuanom mberantsɛ, asodzi a bi a hom bedzi ho dwuma daakye no, yɛgye dzi paa dɛ ɔyɛ a hom dwendwen ho. Bi a epɛ dɛ eyɛ ɔkwampaafo, asafo mu asomfo, na ekyir yi ebɛyɛ asafo mu panyin. Bi so a epɛ dɛ ewar na ewo mba. (Eph. 6:4; 1 Tim. 3:1) Sɛ ibotum ayɛ dza yɛaka ho asɛm yi na woesi wo yie a, ɔsɛ dɛ woho kokwaa. b

³ Ebɛnadze na obotum aboa wo ma woho akokwaa? Ndzɛmba ahorow bi wɔ hɔ a ɔsɛ dɛ isua na ihu yɛ. Asodzi biara a bi a ibedzi ho dwuma daakye no, ebɛnadze na ibotum ayɛ no sesei dze esiesie woho ama eetum edzi ho dwuma yie?

4. Woananom hɔn nhwɛdo pa na enuanom mberantsɛ botum esuasua? (Hwɛ mfonyin no so.)

⁴ Suasua hɔn a wɔyɛ nhwɛdo pa no. Mbarimba a wɔyɛɛ nhwɛdo pa a mberantsɛ botum esuasua hɔn no, hɔn mu pii ho asɛm  wɔ Bible mu. Nna dɛm mbarimba no dɔ Nyankopɔn, na wɔyɛɛ edwuma biara a nna ɔhyɛ hɔn nsa no yie dze boaa Nyankopɔn no nkorɔfo. Sɛ yɛdze hɔn a hɔnho asɛm wɔ Bible mu to nkyɛn a, ibotum esuasua enuanom mbarimba a hɔnho akokwaa na wɔyɛ nhwɛdo pa wɔ w’ebusua mu nye w’asafo mu. (Heb. 13:7) Afei, Jesus Christ no nhwɛdo a asɛm biara nnyi ho no so, ibotum esuasua. (1 Pet. 2:21) Tɔ wo bo ara sua dɛm mbarimba yi ho adze yie. Aber a ereyɛ dɛm no, ɔyɛ a dwendwen suban pa a wɔdaa no edzi no ho. (Heb. 12:​1, 2) Afei, hwehwɛ akwan a ibotum afa do esuasua hɔn.

5. Yebesi dɛn ada enyidahɔ edzi, na ebɛnadze ntsi na iyi ho hia? (Ndwom 119:9)

⁵ Da “adwenmutsewee” anaa enyidahɔ edzi. (Mbɛ. 3:21) Obi a n’enyi da hɔ no, ɔtɔ no bo ara susu ndzɛmba ho kɔ ekyir ansaana woesi gyinae. Ntsi, bɔ mbɔdzen na nya suban a ɔtse dɛm. Ebɛnadze ntsi a? Siantsir no nye dɛ, ndɛ mberantsɛ a wɔaba no, hɔn mu pii wɔ hɔ a dza ɔbɛba hɔn mu biara no, ɔno na wɔyɛ. (Mbɛ. 7:7; 29:11) Afei so, dza ɔkɔ do wɔ TV, sene, intanɛt na sohyial media do no, ɔnnyɛ dzen koraa dɛ yebosuasua. Ntsi, ibesi dɛn ama w’enyi ada hɔ? Odzi kan, sua Bible mu afotusɛm na dwendwen ho hu siantsir a mfaso wɔ do. Afei, fa dza esua no sisi gyinae a Jehovah pɛ. (Kenkan Ndwom 119:9.) Enyidahɔ ho hia paa, ntsi sɛ eda no edzi a, ɔkyerɛ dɛ etu anamɔn tsitsir a ɔbɛma abɛyɛ Christiannyi a noho akokwaa. (Mbɛ. 2:​11, 12; Heb. 5:14) Ma yɛnhwɛ mbrɛ enyidahɔ botum aboa wo wɔ akwan ebien yi do: (1) mbrɛ enye enuanom mbaa bɔ nye (2) mbrɛ ibesi esiesie woho.

6. Sɛ onua aberantsɛ bi n’enyi da hɔ a, obesi dɛn aboa no ma oeebu mbaa?

⁶ Sɛ w’enyi da hɔ a, ɔbɔboa wo ma eebu mbaa. Ɔnnyɛ bɔn koraa dɛ onua aberantsɛ bi bɛfa akyerɛbaa bi nyɛnko. Naaso onua aberantsɛ a n’adwen mu da hɔ no, sɛ ɔnnyɛɛ n’adwen dɛ ɔbɔwar akyerɛbaa bi a, ɔrennka asɛm bi, ɔrennkyerɛw biribi, anaa ɔrennyɛ biribiara a ɔbɛma akyerɛbaa bi enya adwen dɛ gyama n’enyi gye no ho, na ɔpɛ dɛ ɔwar no. (1 Tim. 5:​1, 2) Afei so, sɛ ɔnye akyerɛbaa bi ayɛ awar nhyehyɛɛ a, ɔnye no rennkɛhyɛ beebi a obiara nnka hɔnho. Sɛ ɔyɛ dɛm a, ɔremma wɔmmbɔ akyerɛbaa no dzin bɔn.—1 Cor. 6:18.

7. Enyidahɔ besi dɛn aboa onua aberantsɛ bi wɔ ne ntarhyɛ nye n’ahosiesie mu?

 ⁷ Adze fofor so a ɔbɛma yeehu dɛ onua aberantsɛ bi n’adwen mu da hɔ nye dɛ ɔbɔhwɛ ne ntarhyɛ na n’ahosiesie yie. Mpɛn pii no, hɔn a wɔyɛ ntar a wɔaba do na wɔbɔ ho dawur no, wommbu Jehovah hwee na hɔn abrabɔ so asɛɛ. Iyi ntsi sɛ obi hyɛ ntar a wɔyɛ no a, otum kyekyer no pampee anaa ɔma mbarimba sɛ mbaa. Sɛ onua aberantsɛ a ɔpɛ dɛ ɔbɛyɛ Christiannyi a noho akokwaa no rebɛhyɛ atar bi a, ɔdze dza oesua efi Bible mu no bɛyɛ edwuma na oeesuasua hɔn a wosiesie hɔnho yie wɔ asafo no mu no. Obotum ebisa noho dɛ: ‘Sɛ nkorɔfo hwɛ m’ahosiesie a, ɔma wohu dɛ meyɛ obi a m’adwen mu da hɔ na modwen afofor ho anaa? Mbrɛ misi siesie moho no, ɔma nkorɔfo hu dɛ meyɛ nyamesomnyi papa anaa?’ (1 Cor. 10:​31-33; Titus 2:6) Sɛ onua aberantsɛ bi ma n’enyi da hɔ a, enuanom bobu no na no sor Egya no so bɛpɛ n’asɛm.

8. Ebɛnadze na onua aberantsɛ bi botum ayɛ ama nkorɔfo eetum dze hɔnho ato no do?

⁸ Yɛ obi a nkorɔfo botum dze hɔnho ato wo do. Sɛ wɔdze edwuma ma onua aberantsɛ bi, na sɛ ɔyer noho yɛ no yie a, ɔma afofor tum dze hɔnho to no do. (Luke 16:10) Jesus yɛɛ iyi ho nhwɛdo kamakama bi. Dwumadzi ahorow a Jehovah dze hyɛɛ ne nsa no, ɔammfa enndzi agor anaa ɔannyɛ no biarabiara. Mbom, sɛ nna ɔyɛ dzen mpo a, ɔyer noho yɛ ne nyinara. Nna ɔdɔ nyimpa, nkanka n’esuafo no, na ofii ne pɛ mu dze no nkwa bɔɔ afɔr maa hɔn. (John 13:1) Ntsi ɔwo so, suasua Jesus na dwumadzi biara a wɔdze bɛhyɛ wo nsa no, yer woho yɛ no yie. Sɛ wɔma wo edwuma bi na sɛ innhu n’enyi do yie a, brɛ woho adze na bisa enuanom a wonyim yɛ no ma wɔmboa wo. Mma nnyɛ enyihaw edwuma. (Rom. 12:11) Mbom no, sɛ wɔma wo edwuma bi a, tsen woho na yɛ no dɛ mbrɛ ‘ereyɛ ama Jehovah, na nnyɛ nyimpa.’ (Col. 3:23) Naaso mma wo werɛ mmfir dɛ eyɛ nyimpa, ntsi nnyɛ biribiara na ibotum ayɛ, na sɛ idzi mfom so a, gye to mu.—Mbɛ. 11:2.

9. Ebɛnadze ntsi na ɔsɛ dɛ onua aberantsɛ bi sua ndzɛmba bi a obotum aboa no wɔ asetsena mu?

⁹ Sɛ woho botum akokwaa a, ɔsɛ dɛ isua ndzɛmba afofor a obotum aboa wo wɔ asetsena mu. Ɔno bɔboa wo ma eetum edzi ndwuma ahorow a wɔdze bɛhyɛ wo nsa wɔ asafo no mu no ho dwuma. Afei so, obotum ama eenya edwuma a ibotum dze ahwɛ woho anaa w’ebusua, na ɔbɔboa wo so ma enye afofor ntamu ayɛ papa. Ma yɛnhwɛ ndzɛmba a ibotum esua no bi.

10-11. Sɛ onua aberantsɛ bi sua mbrɛ wosi kenkan na wɔkyerɛw adze yie a, obesi dɛn aboa nankasa nye enuanom a wɔwɔ asafo no mu no? (Ndwom 1:​1-3) (Hwɛ mfonyin no so.)

¹⁰ Sua mbrɛ wosi kenkan na wɔkyerɛw adze yie. Bible no ka dɛ sɛ obi kenkan Nyankopɔn n’Asɛm no da biara na ɔdwendwen ho a, obesi no yie na n’enyi agye. (Kenkan Ndwom 1:​1-3.) Sɛ ɔkenkan Bible no da biara a, obohu mbrɛ Jehovah si dwen ndzɛmba ho, na iyi bɔboa  no ma oeesusu ndzɛmba ho yie. (Mbɛ. 1:​3, 4) Mbarimba a wɔtse dɛm na yehia hɔn wɔ asafo no mu. Ebɛnadze ntsi a?

¹¹ Hɛn nuanom no hia mbarimba a wobotum dze Bible no akyerɛkyerɛ hɔn na wɔdze etu hɔn fo. (Titus 1:9) Sɛ itum kenkan na ekyerɛw adze yie a, obotum aboa wo ma eesiesie ɔkasa na mbuae a obotum ahyɛ afofor hɔn gyedzi dzen. Afei so, sɛ irusua adze, anaa wɔrema ɔkasa wɔ asafo nhyiamu anaa ɔmansin na ɔmantɔw ehyiadzi ase a, ibotum akyerɛw nsɛm bi a ɔbɔboa wo. Dza ebɛkyerɛw no botum ahyɛ wo gyedzi dzen na ibotum so dze ahyɛ afofor nkuran.

12. Ebɛnadze na ɔbɔboa wo ma enye nkorɔfo aabɔ nkɔmbɔ yie?

¹² Sua mbrɛ ibesi nye nkorɔfo akasa, na sɛ obi so rekasa a tsie no yie. Ɔsɛ dɛ Christiannyi banyin sua mbrɛ wosi nye obi bɔ nkɔmbɔ yie. Banyin a otum bɔ nkɔmbɔ yie no, sɛ ɔnye afofor rekasa a, ɔyɛ aso tsie hɔn na ɔma wohu dɛ ɔtse hɔn ase. (Mbɛ. 20:5) Sɛ ɔnye obi robɔ nkɔmbɔ a, ɔdze n’enyi to famu hwɛ ndze a nyimpa no dze rekasa, mbrɛ osi yɛ n’enyim, nye mbrɛ osi yɛ noho no, ama oeehu dza nyimpa no repɛ akyerɛ. Sɛ ibotum ayɛ iyi a, ɔsɛ dɛ etaa nye afofor bɔ. Sɛ etaa fa email na tɛst mɛsegye do nye afofor dzi nkitaho a, annhwɛ a irunntum nnye nkorɔfo mmbɔ nkɔmbɔ yie enyim na enyim. Dɛm ntsi, bɔ mbɔdzen hwehwɛ akwan a ɔbɛma enye afofor ehyia mu na enye hɔn abɔ nkɔmbɔ.—2 John 12.

13. Ebɛnadze bio na onua aberantsɛ bi botum esua? (1 Timothy 5:8) (Hwɛ mfonyin no so.)

¹³ Sua edwuma bi a ibotum dze ahwɛ woho. Ɔsɛ dɛ Christiannyi banyin a noho akokwaa no tum hwɛ noho na n’ebusua. (Kenkan 1 Timothy 5:8.) Sɛ ekɔ aman bi do a, enuanom mberantsɛ sua nsaanodwuma fi hɔn egyanom anaa hɔn busuanyi bi hɔ. Ekɔ mbea afofor so a, mberantsɛ tum sua nsaanodwuma anaa ndwuma afofor bi wɔ ntoado skuul. Ne nyina mu no, ohia paa dɛ ibosua biribi a ɔbɛma enya edwuma ayɛ. (Andw. 18:​2, 3; 20:34; Eph. 4:28) Bɔ mbɔdzen ma obiara nhu dɛ epɛ edwuma, na sɛ wɔdze edwuma bi hyɛ wo nsa a, yer woho yɛ no yie kesi dɛ ibeyi wo nsa efi ho. Sɛ eyɛ dɛm a, ɔrennyɛ dzen dɛ ibenya edwuma ayɛ. Suban na nsaanodwuma a yɛaka ho asɛm yi, no ho hia paa dɛ Christiannyi banyin nya bi ama oeetum esiesie noho ama asodzi biara a ɔda n’enyim daakye no. Ma yɛnhwɛ dza ibotum ayɛ no daakye no bi.

14. Onua aberantsɛ bi besi dɛn abɛyɛ akwampaa edwuma no bi?

¹⁴ Ɔkwampaafo. Christianfo mbarimba a hɔnho akokwaa no pii wɔ hɔ a, wɔhyɛɛ akwampaa  edwuma no ase no, nna wosusuar. Sɛ eyɛ aberantsɛ na edze woho hyɛ akwampaa edwuma no mu a, ɔbɔboa wo ma eesua mbrɛ ibesi nye nyimpa ahorow abɔ mu ayɛ edwuma. Afei so, ɔbɔboa wo ma aahwɛ wo sika do yie na annyɛ atotɔatotɔ. (Phil. 4:​11-13) Dza ɔbɔboa wo ma eetum ayɛ ber nyina som edwuma no bi nye dɛ edze woho bɛhyɛ akwampaa boafo edwuma no mu. Enuanom mberantsɛ pii dzi kan yɛ akwampaa boafo edwuma no kakra, na ɔno boa hɔn ma wɔtoto hɔn ndzɛmba yie ama woeetum dze hɔnho ahyɛ daa akwampaa edwuma no mu. Sɛ obi yɛ akwampaa edwuma no a, obotum ebue hokwan ama no ma ɔaayɛ ber nyina som edwuma no n’afa afofor. Bi nye dɛ obotum akɔboa asafo adansi edwuma no anaa ɔaakɔsom wɔ Bethel.

15-16. Ebɛnadze na ɔsɛ dɛ onua aberantsɛ bi yɛ ama oeetum abɛyɛ asafo mu somfo anaa ɔpanyin?

¹⁵ Asafo mu somfo anaa ɔpanyin. Ɔsɛ dɛ Christianfo mbarimba dze si hɔn enyi do dɛ wɔbɛyer hɔnho abɛyɛ asafo mu mpanyimfo na wɔaboa hɔn nuanom. Bible no ka dɛ mbarimba a wɔyer hɔnho hwehwɛ hokwan a ɔtse dɛm no, ‘wɔapɛ edwuma pa.’ (1 Tim. 3:1) Sɛ onua bi botum abɛyɛ asafo mu panyin a, ɔsɛ dɛ odzi kan yɛ asafo mu somfo. Asafo mu asomfo yɛ ndzɛmba pii dze boa asafo mu mpanyimfo. Asafo mu mpanyimfo na asomfo nyina brɛ hɔnho adze som hɔn nuanom na wɔdze nsi na ahokeka yɛ asɛnka edwuma no. Enuanom mberantsɛ a woeedzi mfe 17 kesi 19 no mpo botum asom dɛ asafo mu asomfo. Afei so, sɛ asafo mu somfo bi edzi mfe 20 mpo na ɔbɔ noho mbɔdzen a, obotum abɛyɛ asafo mu panyin.

¹⁶ Ebɛnadze na ibotum ayɛ ama aafata dɛ asafo mu somfo anaa ɔpanyin? Bible no ma yehu dɛ ihia suban ahorow bi. Dɛm suban no bɛma adɔ Jehovah, w’ebusuafo, nye enuanom a wɔwɔ asafo no mu no. (1 Tim. 3:​1-13; Titus 1:​6-9; 1 Pet. 5:​2, 3) Bɔ mbɔdzen sua dɛm suban no mu biara ho adze. Afei, bɔ mpaa serɛ Jehovah dɛ ɔmboa wo ma nya dɛm suban no mu biara bi. c

17. Ebɛnadze na onua aberantsɛ bi yɛ a ɔbɛma ɔabɛyɛ okun pa nye ebusua tsir? (Hwɛ mfonyin no so.)

¹⁷ Okun na ebusua tsir. Dɛ mbrɛ Jesus kae no, mbarimba bi a hɔnho akokwaa no botum esi gyinae dɛ wɔnnkɔwar. (Matt. 19:12) Naaso sɛ isi gyinae dɛ ebɔwar a, ɔwo na ebɛyɛ okun na ebusua no ne tsir. (1 Cor. 11:3) Jehovah pɛ dɛ okun dɔ ne yer, ɔhwɛ no, ɔma n’enyi gye na ɔboa no ma ɔsom Jehovah yie. (Eph. 5:​28, 29) Dɛ mbrɛ yeedzi kan aka ho asɛm wɔ adzesua yi mu no, sɛ inya suban bi tse dɛ enyidahɔ, ibu mbaa, ema afofor tum dze hɔnho to wo do, na isua ndzɛmba bi a obotum aboa wo wɔ asetsena  mu a, ɔbɔboa wo ma aayɛ okun pa. Iyi bɔboa wo ma eedzi w’asodzii dɛ okun na ebusua tsir no ho dwuma yie.

18. Ebɛnadze na onua aberantsɛ bi yɛ a ɔbɛma ɔabɛyɛ egya pa?

¹⁸ Egya. Sɛ ewar a, bi a ebɔwo. Ntsi, ebɛnadze na ibotum esua efi Jehovah hɔ ama aayɛ egya pa? Ɔno dze, pii kwa. (Eph. 6:4) Jehovah kae ma obiara tsee dɛ ɔdɔ ne Ba Jesus na ɔpɛ n’asɛm. (Matt. 3:17) Sɛ ebɛyɛ egya a, ɔyɛ a taa ka kyerɛ wo mba dɛ edɔ hɔn. Sɛ wɔyɛ adze pa bi a, ɔyɛ a fa ho nkamfo ma hɔn aber biara. Egyanom a wosuasua Jehovah no boa hɔn mba ma wonyin bɛyɛ Christianfo a hɔnho akokwaa. Ntsi seseiara a ennwaree yi, fa hokwan a ewɔ no boa w’ebusuafo na enuanom a wɔwɔ asafo no mu no ma wonhu dɛ edɔ hɔn. Afei so, ɔyɛ a ka kyerɛ hɔn dɛ edɔ hɔn na wɔsom bo ma wo. (John 15:9) Iyi bɔboa wo ma aabɛyɛ okun pa na egya pa daakye. Seseiara a ennwaree yi mpo, sɛ edze dza yɛaka ho asɛm yi yɛ edwuma a, Jehovah dze wo bedzi dwuma, na ebɔboa w’ebusuafo na w’asafo no mufo paa.

19-20. Ebɛnadze na ɔbɔboa enuanom mberantsɛ ma wɔaabɛyɛ Christianfo a hɔnho akokwaa? (Hwɛ mfonyin a ɔwɔ Ɔweɔn-Aban yi enyim no.)

¹⁹ Enuanom mberantsɛ, hom nkaa dɛ sɛ hom botum abɛyɛ Christianfo a homho akokwaa a, ɔno dze ɔmmba ara kwa. Mbom ɔsɛ dɛ hom hwehwɛ hɔn a wɔyɛ nhwɛdo pa, na hom suasua hɔn. Afei so, ɔsɛ dɛ hom ma hom enyi da hɔ, hom yɛ ndzɛmba a ɔbɛma afofor etum dze hɔnho ato hom do, hom sua ndzɛmba bi a obotum aboa hom wɔ asetsena mu, na hom siesie homho ma dza ɔda hom enyim daakye no.

²⁰ Ɔtɔ da na edwendwen dza ɔda w’enyim dɛ aberantsɛ no ho a, ibotum enya adwen dɛ ɔnnda famu. Naaso ibotum ayɛ. Kaa dɛ, Jehovah ayɛ krado paa dɛ ɔbɔboa wo. (Isa. 41:​10, 13) Enuanom a wɔwɔ asafo no mu so ayɛ krado paa dɛ wɔbɔboa wo. Sɛ eyer woho bɛyɛ Christiannyi a noho akokwaa a, w’enyi bɛgye wɔ abrabɔ mu, na w’akoma so bɔtɔ wo yamu. Enuanom mberantsɛ, yɛdɔ hom paa! Yɛserɛ dɛ Jehovah nhyira hom kɛsenara dɛ hom robɔ mbɔdzen abɛyɛ Christianfo mbarimba a homho akokwaa.—Mbɛ. 22:4.