AKYƐDZE asorɔtow a Jehovah dze ama hɛn no, hɛn enyi gye ne nyinara ho paa. Dɛm akyɛdze no mu bi nye dɛ ewɔ hokwan dɛ edze dza Jehovah dze ama hɛn no mu biara dzi dwuma ama w’enyi agye. Bible no ma yehu dɛ nsa yɛ akyɛdze a ofi Nyankopɔn hɔ, na ɔka mpo dɛ: “Asereserew ntsi na wɔto pon, na nsa ma ɔbra mu enyigye.” (Ɔsɛnk. 10:19; Ndw. 104:15) Naaso, bi a ehu dɛ nyimpa binom wɔ hɔ a, nsa ntsi woehyia ɔhaw ahorow wɔ hɔn asetsena mu. Afei so, ɔsor adwen a nyimpa a wofifi mbea ahorow no mu biara so wɔ wɔ nsa ho. Dɛm dze a, ebɛnadze na ɔbɔboa Christianfo ma woeesisi gyinae pa wɔ nsa ho?

Ɔmmfa ho beebi a yɛtse anaa beebi a yenyinii no, sɛ yɛdze Nyankopɔn n’akwankyerɛ bɔ hɛn bra a, ɔbɛma yeesisi gyinae pa a ɔbɔboa hɛn ndɛ nye afebɔɔ.

Bi a ebohu dɛ, ndɛ nkorɔfo pii taa we nsa na wɔbow nsa so. Bi a binom nom nsa osiandɛ wosusu dɛ sɛ wɔyɛ dɛm a, ɔma hɔn ahom ka hɔnho. Binom so susu dɛ sɛ wɔnom nsa a, ɔma hɔn werɛ fir hɔn haw. Mbea ahorow bi so, binom ka dɛ, sɛ obi nom nsa pii a, ɔkyerɛ dɛ ɔyɛ banyin.

Naaso Christianfo dze, hɛn Bɔfo no dɔ hɛn na ɔama hɛn afotu pa afa nsa ho. Dɛ nhwɛdo no, ɔama yeehu dɛ sɛ obi nom nsa pii a, ɔhaw fi mu ba. Bi a akenkan asɛm a ɔwɔ Mbɛbusɛm 23:​29-35 no, na ehu mbrɛ obi a ɔnom nsa no yɛ n’adze nye ɔhaw a ɔkɛfa ba no do. a Daniel yɛ asafo mu panyin a ɔwɔ Europe. Ɔreka mbrɛ nna n’asetsena tse aber a ɔmmbɛyɛɛ nokwar Christiannyi ho asɛm no, ɔkaa dɛ: “Nna mowe nsa paa, na iyi maa misisii gyinae a nna ɔnnyɛ papa, na ɔmaa mefaa ɔhaw pii mu. Ndɛ na ndɛ nyina, sɛ mekaa a, nna mo werɛ ahow.”

Christianfo wɔ hokwan dɛ wosisi dza wɔpɛ ho gyinae. Naaso wobesi dɛn dze dɛm hokwan no esisi gyinae pa aber a wɔronom nsa no, na woeekwetsir ɔhaw a nsanom beberebe dze ba no? Dza ɔbɔboa hɛn paa nye dɛ yɛbɛma adwen a Nyankopɔn wɔ wɔ nsa ho no aboa hɛn ma yeesisi gyinae pa, na yaannyɛ biribi a ɔbɛhaw hɛn.

Ma yɛnhwɛ asɛm a Bible no ka fa nsa ho, nye siantsir a binom nom nsa.

Sɛ obi nom nsa kakra a, Nyankopɔn n’Asɛm no nnkasa nntsia. Mbrɛ ɔtse nye dɛ, Bible no ma yehu dɛ, sɛ obi nom nsa a, otum ma n’enyi gye. Ɔka dɛ: “Fa enyigye dzi w’edziban, na fa enyigye akoma nom wo nsa.” (Ɔsɛnk. 9:7) Nna ɔtɔ da a, Jesus nye Jehovah n’asomfo anokwafo binom mpo nom nsa.—Matt. 26:​27-29; Luke 7:34; 1 Tim. 5:23.

Ɔwɔ mu, Nyankopɔn n’Asɛm no nnkasa nntsia nsa a obi bɔnom mbom ɔkasa tsia asabow. Ɔka no pen dɛ: ‘Mma hom mmbow nsa.’ (Eph. 5:18) Ɔsan so ma yehu dɛ ‘asabokwafo rinnya Nyankopɔn Ahenman no.’ (1 Cor. 6:10) Nokwasɛm nye dɛ, Jehovah kasa tsia nsanom beberebe nye asabow dzendzenndzen. Dɛ nkyɛ yebenya adwen a nkorɔfo wɔ wɔ nsa ho no bi, yɛbɔ mbɔdzen yɛ dza ɔbɛma Nyankopɔn n’enyi agye mbom.

Binom wɔ adwen dɛ sɛ wɔnom nsa pii mpo a, orunntum mmbow hɔn. Naaso adwen a ɔtse dɛm no yɛ hu paa. Kyerɛwnsɛm no ma no mu da hɔ pefee dɛ, sɛ ɔbanyin anaa ɔbaa bi ‘nom nsa pii’ a, ɔbɛma n’abrabɔ asɛɛ na ɔnye Jehovah ntamu ebusuabɔ no so bɛsɛɛ. (Titus 2:3; Mbɛ. 20:1) Jesus bɔɔ kɔkɔ mpo dɛ, sɛ obi ‘bow nsa’ a, orunntum nnkɔ Nyankopɔn no wiadze fofor no mu. (Luke 21:​34-36) Sɛ dɛm dze a, ebɛnadze na ɔbɔboa Christiannyi bi ma ɔatwe noho efi ɔhaw a nsanom dze ba no ho?

Sɛ adwen a nkorɔfo wɔ wɔ nsa ho wɔ beebi a inyinii no ntsi na enom nsa a, ɔyɛ hu paa. Sɛ Christianfo sisi gyinae pa fa nsa na edziban ho a, ɔma Jehovah n’enyi gye. Bible no tu hɛn fo dɛ ɔsɛ dɛ yɛma dɛm asɛm yi tsena hɛn adwen mu. Ɔka dɛ: “Sɛ hom ridzidzi o, hom ronom o, hom reyɛ biribi o, hom nyɛ ne nyina [nhyɛ] Nyankopɔn enyimnyam.” (1 Cor. 10:31) Hom mma yensusu nsɛmbisa nye Bible mu afotusɛm a odzidzi do yi ho:

Memmpɛ dɛ nkorɔfo bɛserew me ntsi na monom nsa anaa? Exodus 23:2 ka dɛ: “Mma nndzi ɔdodow ekyir.” Ha yi nna Jehovah robɔ Israelfo no kɔkɔ dɛ mma wonnsuasua hɔn a wonndzi n’akwankyerɛ ekyir no. Ndɛ so, ɔsɛ dɛ Christianfo dze dɛm afotu yi yɛ edwuma. Sɛ yɛma hɛn etsipɛmfo piapia hɛn ma yɛkɔwe nsa a, obowie ase no, ɔbɛsɛɛ yɛnye Jehovah ntamu anyɛnkofa no.—Rom. 12:2.

Monom nsa dze kyerɛ dɛ meyɛ banyin anaa? Mbea ahorow bi wɔ hɔ a, sɛ obi taa nom nsa anaa ɔbow nsa mpo a, wobu no dɛ mfom biara nnyi ho. (1 Pet. 4:3) Naaso hwɛ dza 1 Corinthfo 16:13 no hyɛ hɛn nkuran dɛ yɛnyɛ. Hɔ ka dɛ: “Hom nweɔn, hom ngyina gyedzi no mu pintsinn, hom nyɛ dɛ mbarimba, hom mma homho nyɛ dzen.” Ehwɛ paa a, nsa na obotum ama obi noho ayɛ dzen? Ɔnnyɛ nokwar. Ɔnnyɛ dzen koraa dɛ nsa bɛma obi n’adwen ada. Sɛ ɔba no dɛm so a, onntum nndwen ndzɛmba ho yie nnsisi gyinae pa. Sɛ obi nom nsa pii a, ɔnnkyerɛ dɛ noho yɛ dzen anaa ɔyɛ banyin. Mbom no, ɔma nkorɔfo hu no dɛ ɔnnyɛ banyin koraa. Isaiah 28:7 no ka obi a nsa ma ɔfom kwan noho asɛm dɛ ɔdze ne tsir pempem na ofintsiw.

Ahoɔdzen ankasa dze, Jehovah na ɔdze ma, na dɛm ahoɔdzen no na ɔboa hɛn ma yɛkɔ do weɔn na yegyina gyedzi no mu pintsinn. (Ndw. 18:32) Sɛ Christiannyi bi botum ayɛ dɛm a, ɔsɛ dɛ ɔma n’enyi da hɔ na ɔhwɛ dɛ obokwetsir biribiara a obotum asɛɛ ɔnye Jehovah ntamu no. Aber a Jesus wɔ asaase do no, nna ɔnye Jehovah wɔ ebusuabɔ papa. Afei so, nna nkorɔfo pii pɛ n’asɛm osiandɛ nna ɔwɔ akokodur na osii no bo dɛ ɔbɛyɛ dza ɔtsen.

Monom nsa mbrɛ ɔbɛyɛ a mo werɛ befir me haw anaa? Ɔdwontofo bi kyerɛɛw dɛ: “Aber a dadwen hyɛɛ mo do no, [ɔwo Jehovah] ekyekyee  mo werɛ na ekaa m’akoma too me yamu.” (Ndw. 94:​19, NWT) Sɛ dadwen hyɛ wo do a, serɛ Jehovah ma ɔmboa wo, na mma mmfa nnyɛ nsawe. Kwan pa a ibotum afa do atsew w’adwendwen do nye dɛ, ebɛtaa abɔ Jehovah mpaa. Bio so, nyimpa pii ehu dɛ, sɛ wɔkɔhwehwɛ afotu fi hɔn nyɛnko bi a noho akokwaa a ɔwɔ asafo no mu hɔ a, ɔboa hɔn paa. Nokwasɛm nye dɛ, sɛ dadwen hyɛ obi do na ɔdze yɛ nsawe a, obotum ayɛ dzen ama no dɛ ɔbɛyɛ dza ɔtsen. (Hos. 4:11) Daniel a yeedzi kan aka noho asɛm no kaa dɛ: “Nna dadwen hyɛ mo do na nna me tsibowa so bu me fɔ. Monoom nsa dɛ nkyɛ medze ridzi me haw no ho dwuma, naaso yɛ ara na me haw no yɛɛ kɛse. Menye m’anyɛnkofo ntamu sɛɛe na nna mummbu moho mpo bio.” Ewiei koraa no, ebɛnadze na ɔboaa Daniel? Ɔkaa dɛ: “Mubohun dɛ mihia Jehovah no mboa na nnyɛ nsa. Owiee ase no, mubohun dɛ, Jehovah a medze moho too no do no boaa me ma mutumii dzii me haw no nyinara do.” Ntsi, sɛ ɔyɛ na yɛtse nka dɛ enyidado nyinara asa mpo a, ɔsɛ dɛ yɛkaa dɛ Jehovah wɔ hɔ aber nyina na ɔayɛ krado dɛ ɔbɔboa hɛn.—Phil. 4:​6, 7; 1 Pet. 5:7.

Sɛ enom nsa a, ibotum ebisa woho nsɛmbisa a odzidzi do yi: ‘Mbrɛ misi nom nsa no, mo busuanyi bi anaa me nyɛnko a ɔbɛn me aka ho asɛm akyerɛ me anaa?’ Sɛ dɛm dze a, bi a ɔreyɛ abɛyɛ wo suban anaa ɔreyɛ akɛfa haw bi aba a innhunii. ‘Ndaansa yi monom nsa pii kyɛn mber bi a abɛsen kɔ anaa?’ Bi a iyi botum akyerɛ dɛ nyimpa no ntaa nnom nsa, naaso ndaansa yi, ɔreyɛ ayɛ ɔwee. ‘Sɛ nsa annka m’ano nda kakra a, munntum nntsena anaa?’ Sɛ dɛm dze a, nna ɔkyerɛ dɛ bi a nsanom abɛyɛ wo suban anaa wɔaka wo hɔ. Sɛ ɔba no dɛm a, bi a obehia dɛ ikohu dɔkta ma ɔboa wo.

Osian ɔhaw a nsanom botum akɛfa aba ntsi, Christianfo binom esi gyinae dɛ wɔronnom nsa koraa. Afofor so si gyinae dɛ wɔronnom nsa osiandɛ ɔnnyɛ hɔn dɛw. Sɛ wo nyɛnko bi ka dɛ ɔronnom nsa a, ɔnnsɛ dɛ ekasa tsia no, na mbom tse no ase.

Bi a ɔwoara so ebohu dɛ, sɛ obi hu nsa dodow a obotum anom a ɔbɔboa no paa. Christiannyi bi botum ehu nsa dodow a obotum anom na ɔannom  ma wɔammbor do. Anaa obesi gyinae dɛ dapɛn biara ɔbɔnom pɛnkor, anaa oribedzidzi biara a ɔbɔnom kakra. Binom so wɔ hɔ a, sɛ ɔba no nsa a, woesi gyinae dɛ wɔbɔnom wine anaa beer kakra, naaso nsadzen dze wɔronnkɔ ho koraa. Dɛmara so na sɛ wɔdze nsadzen fra nsa afofor so a, wɔronnom. Sɛ obi hu nsa dodow a obotum anom a, ɔrennyɛ dzen mma no koraa dɛ ɔbɔboa no ma ɔronnom nntra dza n’ahoɔdzen botum. Ntsi, sɛ Christiannyi bi a noho akokwaa si gyinae a ɔtse dɛm na ɔdze yɛ edwuma a, ɔmmfa ho dza nkorɔfo bɛka biara no, ɔremma ɔnnhaw no.

Sɛ yesi gyinae dɛ yɛbɔnom nsa a, ɔsɛ dɛ yɛdwen mbrɛ obesi aka afofor no so ho. Romefo 14:21 ka dɛ: ‘Oye dɛ ennkɔwe nam anaa ennkɔnom nsa anaa ennkɛyɛ dza ɔbɔto wo nua biara fintsidua.’ Ibesi dɛn dze dɛm afotu yi ayɛ edwuma? Dza ɔbɔboa wo nye dɛ ebɔdɔ wo nuanom. Sɛ ɔkɛba no dɛ nsa a ebɔnom no botum ahaw obi a, ɔdɔ a ewɔ ma no no bɛma eronnom koraa. Sɛ eyɛ dɛm a, ɔno bɛkyerɛ dɛ nndwen wankotsee woho, na mbom edwen afofor ho, edɔ hɔn na ibu hɔn so.—1 Cor. 10:24.

Afei so, obotum aba dɛ aban no bɛhyehyɛ mbra afa nsanom ho, na ɔsɛ dɛ Christiannyi dzi mbra a ɔtse dɛm no do. Dɛm mbra no bi botum akyerɛ mfe a ɔsɛ dɛ obi dzi ansaana ɔanom nsa. Anaadɛ sɛ obi reka kaar anaa ɔdze efir ahorow bi reyɛ edwuma a, ɔnnsɛ dɛ ɔdze nsa ka n’ano.—Rom. 13:​1-5.

Jehovah edzi hɛn nyi paa, osiandɛ ɔama hɛn hokwan dɛ yɛmfa ndzɛmba ahorow a ɔdze akyɛ hɛn no ngyegye hɛn enyi. Dɛm akyɛdze no bi nye hokwan a yɛwɔ dɛ hɛnankasa tum si gyinae wɔ dza yebedzi nye dza yɛbɔnom ho no. Ɔmbra dɛ gyinae a yebesisi no bɛhyɛ hɛn sor Egya no enyimnyam dze akyerɛ dɛ hɛn enyi sɔ hokwan a ɔdze ama hɛn no!