NNA nkataasia beenu bi nam wɔ kurow bi a adagyer nnyi mu a wɔfrɛ no Baguio City a ɔwɔ Philippines. Wɔnam no, wohun trɔk a wɔhyehyɛ nwoma wɔ do dze dzi dase naaso wɔammbɛn ho. Akyerɛbaa Helen a nna ogyina trɔk no ho no serewee kyerɛɛ hɔn. Nkataasia beenu no kɔr hɔn kwan, naaso wɔrokɔ nyinara no nna wɔkaa serew a Helen serewee kyerɛɛ hɔn no.

Ekyir yi, ber a nkataasia beenu no tsena bɔɔs mu rokɔ fie no, wohun dɛ wɔakyerɛw jw.org asɛnkyerɛdze kɛse bi abɔ Ahendzi Asa bi ho. Hɔ no ara na wɔkaa dɛ dɛm nkyerɛwee no ara na wohun dɛ wɔakyerɛw wɔ trɔk a wɔhyehyɛ nwoma wɔ do dze dzi dase no ho no. Hɔn beenu no nyina sianee fii bɔɔs no mu, na wɔkɔhwɛɛ nhyehyɛɛ a ɔbɔ Ahendzi Asa no n’abowano hwɛɛ dɛ, ebɛn da nye ber na asafo ahorow no dze hyia mu wɔ Ahendzi Asa no do hɔ.

Asafo nhyiamu a odzi hɔ no nkataasia beenu no kɔree. Na aber a wowuraa Ahendzi Asa no do no, inyim obi a wohun no a? Ɔyɛ Helen a! Hɔ no ara na nkataasia beenu no kaa dɛ ɔyɛ ɔno na ɔserewee kyerɛɛ hɔn wɔ trɔk no ho no. Helen kãa dɛ: “Aber a wɔbaa me nkyɛn no, me yamu hyee me. Nna m’adwen yɛ me dɛ gyama mayɛ biribi.” Nkataasia no kãa kyerɛɛ Helen dɛ woehu no pɛn dɛ ogyina trɔk ho ridzi dase.

Nkataasia beenu no enyi gyee fɛkuwbɔ nye dza wɔtsee wɔ nhyiamu no ase no ho. Nna ihu dɛ hɔn ahom aka hɔnho papaapa. Aber a wɔponee a wohun dɛ enuanom risiesie asa no do no, hɔn so wɔkãa dɛ wɔpɛ dɛ wɔyɛ bi. Nkataasia no mu kor tui fii ɔman no mu, naaso kor a ɔka ho no toaa do kɔr asafo nhyiamu na ɔhyɛɛ ase sũaa Bible no. Hwɛ dza serew kɛkɛ etum ayɛ!