1. Ɔdze fa ewiei mber ho no, ebɛn asɛm na Jesus kaa kyerɛɛ n’esuafo no, na ebɛn kɔkɔbɔ na ɔdze maa hɔn?

 AKA nda kakra ma Jesus ewu no, n’esuafo no mu baanan kɔr ne nkyɛn kebisaa no dɛ: “Wiadze ewiei ho asɛnkyerɛdze bɛyɛ dɛn?” (Matt. 24:3) Ɔbɛyɛ dɛ nna esuafo no pɛ dɛ wohu dza ɔbɔboa hɔn ma woehu aber a wɔbɛsɛɛ Jerusalem nye n’asɔrfi no. Jesus rema hɔn mbuae no, ɔnnyɛ Jerusalem nye n’asɔrfi no ne sɛɛ nkotsee ho asɛm na ɔkae. Mbom ɔkaa ‘wiadze yi ewiei’ so ho asɛm. Jesus reka ber a ewiei no bɛba ho asɛm no, ɔkaa dɛ: “Na da no nye dɔn no dze obiara nnyim: abɔfo a wɔwɔ sor no nnyim, Ɔba no so nnyim, gyedɛ Egya no.” Dɛm ntsi Jesus bɔɔ n’esuafo no kɔkɔ dɛ wɔmma hɔn enyi nda hɔ na ‘wɔnweɔn.’​—Mark 13:32-37.

2. Nna ebɛnadze ntsi na no ho hia dɛ tsetse Christianfo no kɔ do weɔn?

² Sɛ nna tsetse Christianfo a wɔyɛ Jewfo no benya nkwa a, nna ɔsɛ dɛ wɔkɔ do weɔn. Jesus maa n’ekyirdzifo no hun dza ɔbɔboa hɔn ma woehu aber a wɔbɛsɛɛ Jerusalem nye n’asɔrfi no. Ɔkaa dɛ: “Sɛ hom hu Jerusalem dɛ dɔm etwa ho ehyia a, nna hom nhu dɛ ne nsɛɛe abɛn.” Ntsi, sɛ wohu asɛnkyerɛdze a ɔtse dɛm a, nna ɔsɛ dɛ wotsie Jesus no kɔkɔbɔ no na ‘woguan kɔ nkokwaa do.’ (Luke 21:20, 21) Enyigyesɛm nye dɛ, hɔn a wotsiee Jesus n’asɛm no nyaa nkwa aber a Romefo no sɛɛ Jerusalem no.

3. Ebɛnadze na yebosusu ho wɔ adzesua yi mu?

³ Ndɛ so yɛtse wiadze bɔn yi n’ewiei mber mu. Ne dɛm ntsi ɔsɛ dɛ hɛn so yɛma hɛn enyi da hɔ na yɛkɔ do weɔn. Adzesua  yi mu no, yebohu dɛ sɛ yɛdze hɛn enyi ridzi nsɛm a orisisi wɔ wiadze mu no ekyir a, ɔnnsɛ dɛ yɛyɛ adze ma ɔtra do. Afei so, yɛbɔhwɛ mbrɛ yebesi ahwɛ hɛnho yie nye kwan a yebotum afa do dze mber kakra a wɔaka yi edzi dwuma yie.

4. Ebɛnadze ntsi na ɔsɛ dɛ nsɛm a orisisi wɔ wiadze mu a ɔma Bible nkɔnhyɛ ba mu no ho hia hɛn?

⁴ Osian nsɛm bi a Kyerɛwnsɛm no aka ntsi, ɔyɛ a yɛpɛ paa dɛ yehu mbrɛ nsɛm a orisisi wɔ wiadze yi mu no ma Bible nkɔnhyɛ ba mu. Dɛ nhwɛdo no, Jesus kaa nsɛm pɔtsee bi a sɛ osisi a, ɔbɛma yeehu dɛ Satan no wiadze no reba n’ewiei. (Matt. 24:3-14) Ɔsomafo Peter so tuu hɛn fo dɛ, yɛmma hɛn enyi nda hɔ wɔ Bible nkɔnhyɛ a orinya ne mbamu ho mbrɛ ɔbɛyɛ a hɛn gyedzi bɔkɔ do ayɛ dzen. (2 Pet. 1:19-21) Afei so, nsɛm a odzi kan wɔ Nyikyerɛ nwoma no mu no ka dɛ: ‘Jesus Christ ne nyikyerɛ a Nyankopɔn dze maa no dɛ ɔnkyerɛ no nkowaa dza otwar dɛ ɔba ntsɛm.’ (Nyi. 1:1) Ne dɛm ntsi, nsɛm a ogu do risisi wɔ wiadze yi mu no ho hia hɛn paa. Nnyɛ ɔno nko, mbrɛ dɛm nsɛm yi bi ma Bible nkɔnhyɛ nya ne mbamu no so ho hia hɛn. Na yɛpɛ paa dɛ yɛnye afofor bɔ ho nkɔmbɔ.

5. Ebɛnadze na ɔnnsɛ dɛ yɛyɛ, na ebɛnadze na ɔsɛ dɛ yɛyɛ? (Hwɛ mfonyin ahorow no so.)

⁵ Naaso, sɛ yɛnye afofor robɔ Bible nkɔnhyɛ ho nkɔmbɔ a, ɔsɛ dɛ yɛhwɛ yie na yaannka nsɛm bi a ɔnnyɛ nokwar. Ebɛnadze ntsi a? Osiandɛ yɛmmpɛ dɛ yɛkeka nsɛm bi a obotum asɛɛ asomdwee a ɔwɔ asafo no mu no. Sɛ yɛbɛyɛ nhwɛdo a, bi a ɔwɔ mu ara a yɛbɛtse dɛ wiadze etumfo no reka kwan a wobotum afa do ama basabasayɛ bi a ɔrokɔ do no egyaa ama asomdwee nye ahotɔ aba ho asɛm. Sɛ yɛtse nsɛm a ɔtsetse dɛm a, ɔnnsɛ dɛ yɛper hɛnho ka dɛ nkɔnhyɛ a ɔwɔ 1 Thessalonicafo 5:3 no na wɔaba mu no. Mbom ɔsɛ dɛ yehu dza Jehovah n’ahyehyɛdze no aka afa asɛm a ɔtse dɛm ho ndaansa yi no. Sɛ yɛdze dza yɛka no gyina nsɛm a ɔwɔ hɛn nwoma nye video ahorow mu no do a, yɛboa ma asafo no kɔ do yɛ kor wɔ “tsirmsɛm kor mu.”​—1 Cor. 1:10; 4:6.

6. Ebɛnadze na yebotum esua efi 2 Peter 3:11-13 no mu?

⁶ Kenkan 2 Peter 3:11-13. Asɛm a ɔsomafo Peter kae yi boa hɛn ma yehu adwen a ɔsɛ dɛ yenya aber a yɛrodwendwen Bible mu nkɔnhyɛ ahorow ho no. Otuu hɛn fo dɛ, ‘yɛnhwɛ kwan na yɛmma Nyankopɔn ne da a ɔreba no nyɛ ntsɛm wɔ hɛn adwen mu.’ Ebɛnadze ntsi a? Osiandɛ, yɛpɛ dɛ yɛbɔ ‘ɔbra krɔnkrɔn’ na yɛda “nyamesompa” edzi wɔ ber kakra a aka yi mu. Mbom ɔnnyɛ dɛ yɛpɛ dɛ yehu “da na dɔn” no a Jehovah dze Har-Magedon bɛba no. (Matt. 24:36; Luke 12:40) Dza iyi kyerɛ nye dɛ, yɛpɛ dɛ yɛyɛ dza ɔtsen na yɛhwɛ hu dɛ mbɔdzen a yɛbɔ wɔ Jehovah no som mu no kyerɛ dɛ yɛdɔ no paa. Sɛ yebotum ayɛ dɛm a, ɔsɛ dɛ yɛhwɛ hɛnho yie paa.

7. Ebɛnadze na yɛyɛ a ɔkyerɛ dɛ yɛrohwɛ hɛnho yie? (Luke 21:34)

⁷ Nnyɛ nsɛm a orisisi wɔ wiadze yi mu no nkotsee na Jesus kaa kyerɛɛ n’esuafo no dɛ wɔmfa hɔn adwen nkɔ do. Mbom ɔsanee kaa dɛ hɔnankasa so nhwɛ hɔnho yie. Jesus maa dɛm asɛm yi mu daa hɔ pefee wɔ kɔkɔbɔ a ɔwɔ Luke 21:34 no. (Kenkan.) Hyɛ asɛm a Jesus kae no nsew. Ɔkaa dɛ: “Hom nhwɛ homho yie.” Obi a ɔhwɛ noho yie no ma n’enyi da hɔ wɔ biribiara a obotum asɛɛ ɔnye Jehovah ntamu ebusuabɔ no ho, na ɔyɛ dza obotum biara  dɛ ɔbɔtwe noho efi esian a ɔtse dɛm ho. Sɛ ɔyɛ dɛm a, ɔkyerɛ dɛ ɔdze noho risie Nyankopɔn no dɔ mu.​—Mbɛ. 22:3; Jude 20, 21.

8. Ɔsomafo Paul tuu Christianfo fo dɛ wɔnyɛ dɛn?

⁸ Ɔsomafo Paul tuu Christianfo fo dɛ, wɔnhwɛ hɔnho yie. Dɛ nhwɛdo no, ɔkaa kyerɛɛ Christianfo a nna wɔwɔ Ephesus no dɛ: “Hom nhwɛ yie mbrɛ hom si nantsew, nnyɛ dɛ nkwasea na mbom dɛ enyansafo.” (Eph. 5:15, 16) Satan dze, aber biara ɔpɛ dɛ ɔsɛɛ yɛnye Jehovah ntamu ebusuabɔ no. Ne dɛm ntsi Bible no tu hɛn fo dɛ, yɛnkɔ do ‘nhu dza Jehovah pɛ,’ ama yeetum abɔ hɛnho ban efi dza Satan bɛyɛ biara ho.​—Eph. 5:17.

9. Yebesi dɛn ehu dza Jehovah pɛ dɛ yɛyɛ?

⁹ Ndzɛmba a obotum asɛɛ yɛnye Jehovah ntamu ebusuabɔ no, nnyɛ ne nyinara na Bible no ka ho asɛm. Mpɛn pii no, ɔsɛ dɛ yesisi ndzɛmba ahorow bi a Bible no nnka ho asɛm pɔtsee ho gyinae. Sɛ yebotum esisi gyinae pa a, nna ɔno ɔsɛ dɛ yetum hu ‘dza Jehovah pɛ.’ Sɛ yebotum ayɛ dɛm a, gyedɛ yɛtaa sua Nyankopɔn n’Asɛm no na yɛdwendwen ho. Sɛ yehu dza Jehovah pɛ, na yenya ‘Christ n’adwen’ no bi a, ɔbɛma yɛanantsew “dɛ enyansafo” aber mpo a yennyi mbra pɔtsee bi a ɔbɛkyerɛ hɛn dza ɔsɛ dɛ yɛyɛ no. (1 Cor. 2:14-16) Ndzɛmba a obotum asɛɛ yɛnye Jehovah ntamu ebusuabɔ no, bi wɔ hɔ a ɔnnyɛ dzen dɛ yebohu, bi so wɔ hɔ a ɔyɛ dzen dɛ yebohu.

10. Ndzɛmba ahorow a obotum asɛɛ yɛnye Jehovah ntamu ebusuabɔ no a ɔsɛ dɛ yɛtwe hɛnho fi ho no, bi nye dɛn?

¹⁰ Ndzɛmba ahorow bi botum asɛɛ yɛnye Jehovah ntamu ebusuabɔ no, na ɔsɛ dɛ yɛtwe hɛnho fi ho. Bi nye dɛ yɛdze hɛnho bɛhyehyɛ obi a ɔnnyɛ hɛn kun anaa hɛn yer, yɛbɔnom nsa atra do, yebedzidzi ma wɔaabor do, yɛbɛka nsɛm a ɔyɛ yaw akyerɛ afofor, yɛbɔhwɛ enyigyedze a basabasayɛ wɔ mu, ponografi nye ndzɛmba a ɔtsetse dɛm. (Ndw. 101:3) Hɛn tamfo Abɔnsam dze, aber biara ɔrohwehwɛ kwan a obotum afa do asɛɛ yɛnye Jehovah ntamu ebusuabɔ no. (1 Pet. 5:8) Ɔsɛ dɛ yɛma hɛn enyi da hɔ osiandɛ Satan pɛ dɛ ɔdze enyitan, akɔhwi, enyiber, ɔtan, ahomemado nye ebufuw hyɛ hɛn akoma mu. (Gal. 5:19-21) Sɛ dɛm su yi ba hɛn mu a, annhwɛ a ahyɛse no yebenya adwen dɛ ɔnnyɛ hwee. Ɔno na sɛ yaannyɛ ntsɛm enntutu emmfi hɛn mu a, obenyin asow aba bɔn na ɔdze ɔhaw pii abrɛ hɛn.​—Jas. 1:14, 15.

11. Ndzɛmba a obotum asɛɛ yɛnye Jehovah ntamu ebusuabɔ a ɔyɛ dzen dɛ yebohu no, no mu kor nye dɛn? Ebɛnadze ntsi na ɔsɛ dɛ yɛtwe hɛnho fi ho?

¹¹ Ndzɛmba a obotum asɛɛ yɛnye Jehovah ntamu ebusuabɔ a ɔyɛ dzen dɛ yebohu no, no mu kor nye fɛkuw bɔn. Hom mma yɛnhwɛ dɛm mfatoho yi. Fa no dɛ enye obi a ɔnnyɛ Jehovah Dasefo yɛ edwuma. Osiandɛ epɛ dɛ onya Jehovah Adasefo ho adwen pa ntsi, ɔyɛ a eda ayamuyie edzi kyerɛ no na eboa no so. Ɔtɔ da a, enye no kedzidzi mpo. Afei dze, da biara enye no kedzidzi. Ɔwɔ mu araa a na ɔdze ɔbrasɛɛ ho nkɔmbɔ aba, naaso sɛ ɔdze ba a, ennsosɔw do koraa. Ber rokɔ do no, ibohu dɛ ɔnye wo honam agye ma ntsi sɛ ɔka ho asɛm mpo a, ɔnnhaw wo bio. Da bi dze, egye to mu dɛ, sɛ hom pon edwuma a enye no bɔkɔ akɔnom biribi kakra. Obowie ase no, nna enye w’edwumamunyi no yɛ adwen wɔ ndzɛmba ho. Ɔrennkyɛr koraa ibohu dɛ eyɛ w’adze dɛ w’edwumamunyi no ara. Ɔwɔ mu, yɛda obu na ayamuyie edzi kyerɛ obiara, naaso ɔsɛ dɛ yɛkaa dɛ, hɔn a yɛnye hɔn bɔ no, yebotum esuasua hɔn suban. (1 Cor. 15:33) Sɛ yɛhwɛ hɛnho yie dɛ mbrɛ Jesus tuu hɛn fo no a, yɛrennye hɔn a wɔmmfa Jehovah ne mbra mmbɔ hɔn bra no mmbɔ. (2 Cor. 6:15)  Sɛ yɛyɛ dɛm a, yebohu ndzɛmba a obotum asɛɛ yɛnye Jehovah ntamu ebusuabɔ no, na yaatwe hɛnho efi ho.

12. Aber a nna Jesus n’esuafo no rohwɛ kwan dɛ wɔbɛsɛɛ Jerusalem nye n’asɔrfi no, nna ebɛnadze na ɔsɛ dɛ wɔyɛ?

¹² Nna Jesus pɛ dɛ n’esuafo no yer hɔnho wɔ Jehovah no som mu aber a wɔrohwɛ kwan dɛ wɔbɛsɛɛ Jerusalem nye n’asɔrfi no. Jesus dze edwuma bi hyɛɛ hɔn nsa dɛ wɔnyɛ. Ɔhyɛɛ hɔn dɛ wɔnka asɛmpa no wɔ ‘Jerusalem, nye Judea nyina nye Samaria mfa nkodu asaase ano noho.’ (Andw. 1:6-8) Edwuma a Jesus dze hyɛɛ hɔn nsa yi dze, nna ɔnnda famu koraa! Sɛ nna esuafo no yer hɔnho yɛ edwuma a ɔtse dɛm a, nna ɔkyerɛ dɛ wɔdze hɔn mber ridzi dwuma yie.

13. Ebɛnadze ntsi na ɔsɛ dɛ yɛdze hɛn ber dzi dwuma yie? (Colossaefo 4:5)

¹³ Kenkan Colossaefo 4:5. Sɛ yebotum ahwɛ hɛnho yie a, nna ɔno ɔsɛ dɛ yɛhwɛ mbrɛ yɛdze hɛn ber dzi dwuma no. “Esian” botum ato hɛn mu biara. (Ɔsɛnk. 9:11) Yebotum ewu aber biara.

14-15. Yebesi dɛn dze hɛn ber edzi dwuma yie? (Hebrewfo 6:11, 12) (Hwɛ mfonyin no so.)

¹⁴ Sɛ yɛyɛ dza Jehovah pɛ, na yɛyɛ ndzɛmba a ɔbɛma yɛnye no ntamu ebusuabɔ no  ayɛ papa a, ɔno kyerɛ dɛ yɛdze hɛn ber ridzi dwuma yie. (John 14:21) Bible no tu hɛn fo dɛ, ɔnnsɛ dɛ yehinhim, mbom ɔsɛ dɛ yetsintsim na yɛyɛ pii wɔ Ewuradze edwuma no mu. (1 Cor. 15:58) Sɛ yɛyɛ dɛm a, ansaana hɛn nkwa bɛba ewiei anaa wiadze yi n’ewiei bɛba no, yɛrennka dɛ yehunii a nkyɛ.​—Matt. 24:13; Rom. 14:8.

¹⁵ Ndɛ, Jesus da ho ara rekyerɛ n’esuafo kwan wɔ Nyankopɔn n’Ahendzi no ho asɛmpaka edwuma a wɔreyɛ wɔ wiadze nyina no. Nokwasɛm nye dɛ, Jesus edzi no bɔhyɛ do. Jesus tsetse hɛn mbrɛ ɔbɛyɛ a yebotum aka asɛmpa no, na ɔma hɛn edwindadze a yɛdze bɛyɛ edwuma no so. Ɔnam Jehovah n’ahyehyɛdze no do na ɔyɛ dɛm. (Matt. 28:18-20) Dɛm ntsi ɔsɛ dɛ hɛn so yɛyer hɛnho wɔ asɛnka nye nkyerɛkyerɛ edwuma no mu, na yɛma hɛn enyi da hɔ aber a yɛrotweɔn dɛ Jehovah bɛsɛɛ dɛm wiadze yi no. Sɛ yɛdze afotu a ɔwɔ Hebrewfo 6:11, 12 no yɛ edwuma a, yebosuo hɛn enyidado no mu dzen “dze ekodu ewiei.”​—Kenkan.

16. Ebɛnadze na yeesi hɛn bo dɛ yɛbɛyɛ?

¹⁶ Jehovah ahyɛ ber a ɔdze bɛsɛɛ Satan no wiadze bɔn yi. Sɛ ber no so a, asɛm biara a Jehovah aka wɔ n’Asɛm no mu no, ɔbɛma ɔaba mu. Bi a ɔtɔ da a, yebenya adwen dɛ dɛm ber no rekyɛr. Naaso Jehovah ne da no rennka ekyir! (Hab. 2:3) Kesi dɛ dɛm aber no bɛba no, hom mma yensi hɛn bo dɛ ‘yɛbɔhwɛ Jehovah kwan, na yaatweɔn hɛn nkwagye Nyankopɔn no.’​—Mic. 7:7.