SƐ YƐHWƐ Bible mu a, ɔyɛ a nkasafua anaa nsɛmfua pɔtsee bi a Bible akyerɛwfo no dze dzii dwuma no, ebɔhwɛ no nna wɔasan dze nkasafua anaa nsɛmfua kor no ara edzi dwuma bio. Hom mma yɛnhwɛ siantsir ebiasa bi ntsi a ɔbɛyɛ dɛ nna wɔyɛ dɛm no:

Aber a wɔkyerɛɛw asɛm no. Israelfo hɔn aber do no, nna ɔnnyɛ hɔn nyina na wɔwɔ Mbra nwoma no bi. Ntsi sɛ nna hɔn a wɔtse dɛm no bɛtse Mbra no mu nsɛm a, gyedɛ woekehyia mu wɔ beebi a ntamadan no wɔ no ansaana wɔakenkan akyerɛ hɔn ma woeetsie. (Deut. 31:​10-12) Nna ɔsɛ dɛ nyimpadɔm a woekehyia mu no dze ndɔnhwer pii gyina tsentsen na wotsie dza wɔrekenkan no, na obotum so aba dɛ nna ndzɛmba bi twetwe hɔn adwen. (Neh. 8:​2, 3, 7) Mber a ɔtsetse dɛm mu no, sɛ nna wɔka nsɛntsitsir a ɔwɔ mu no mpɛn pii a, nna ɔrennyɛ dzen mma nkorɔfo no dɛ wɔbɛkaa kyerɛwnsɛm no, na wɔdze no mu nsɛm no abɔ hɔn bra. Afei so, nna nsɛm ahorow bi a wɔsan si do bio no bɔboa hɔn paa ma woeetum akaa nsɛm bi a no ho hia tse dɛ Nyankopɔn ne mbra nye n’atsɛmbusɛm.—Lev. 18:​4-22; Deut. 5:1.

Mbrɛ wosii kyerɛɛw asɛm no. Bible mu nwoma no bi wɔ hɔ a, wɔkyerɛɛw no dɛ ndwom. Iyi ho nhwɛdo nye Ndwom, Ndwom Mu Ndwom, nye Kwadwom nwoma no. Ndwom a nna wɔtow no, ɔtɔfabi a nna ngyedo ka ho. Nna ngyedo no si asɛntsir no do dua, na ɔboa hɔn a woritsie no ma wɔkyer no mu nsɛm no gu hɔn tsirmu. Dɛ nhwɛdo no, hom mma yɛnhwɛ nsɛm a ɔwɔ Ndwom 115:​9-11 no. Hɔ ka dɛ: ‘Israel, ɔwodze, twer Jehovah; Ɔnoara nye hɔn mboa na hɔn kyɛm. Aaron ne fiefo, hom ntwer Jehovah: Ɔnoara nye hɔn mboa na hɔn kyɛm. Hom a hom suro Jehovah, hom ntwer Jehovah: Ɔnoara nye hɔn mboa na hɔn kyɛm.’ Sɛ yɛhwɛ dɛm ndwom yi mu a, nna ne ngyedo no bɔboa hɔn a wɔrotow no ma ndwom no mu nsɛm no aka hɔn tsirmu na aka hɔn akoma so.

Nna wɔdze si nsɛm a no ho hia do dua. Ɔtɔfabi a, nna nsɛm bi a no ho hia a Bible akyerɛwfo no akyerɛw no, nna wɔsan kyerɛw no bio. Dɛ nhwɛdo no, aber a Jehovah kaa kyerɛɛ Israelfo no dɛ mma wonndzi bɔgya no, ɔmaa Moses sanee kyerɛɛw siantsir a onnyi dɛ wodzi bɔgya no mpɛn dodow bi. Nna Nyankopɔn pɛ dɛ osi do dua ma wohu dɛ honam biara no nkwa wɔ no bɔgyaa mu, kyerɛ dɛ, bɔgya gyina hɔ ma nkwa. (Lev. 17:​11, 14) Ekyir yi, wɔ krataa a asomafo no nye mpanyimfo a nna wɔwɔ Jerusalem no kyerɛwee kɛmaa Christianfo no mu no, wɔkaa ndzɛmba bi a Nyankopɔn n’enyi nngye ho. Dɛm krataa no mu no, wɔsanee kaa no bio dɛ ɔsɛ dɛ Christianfo twe hɔnho fi bɔgya ho.—Andw. 15:​20, 29.

Sɛ yɛhwɛ Kyerɛwnsɛm no mu a, ɔyɛ a nna wɔsan ka nsɛm bi a wɔaka dada no bio, naaso ɔno nnkyerɛ dɛ dɛmara na Jehovah pɛ dɛ ɔyɛ hɛn suban. Dɛ nhwɛdo no, Jesus kaa dɛ: “Sɛ hom robɔ mpaa a, mma hom nntsi nsɛm kor no ara mu nnka no mpɛn pii.” (Matt. 6:​7, NWT) Afei, ɔtoaa do kaa nsɛm bi a ɔfata na ɔnye Nyankopɔn n’apɛdze hyia a yebotum abɔ ho mpaa. (Matt. 6:​9-13) Dɛm ntsi, sɛ yɛrobɔ mpaa a, yenntsi asɛm kor no ara mu nnka no mpɛn pii. Naaso aber biara a yɛbɔbɔ mpaa no, yebotum asan aka nsɛm bi a yɛaka ho asɛm dada wɔ hɛn mpaabɔ mu no bio.—Matt. 7:​7-11.

Siantsir papabi ntsi na Nyankopɔn maa wɔkaa nsɛm bi mpɛn pii wɔ n’Asɛm mu no. Akwan ahorow a hɛn Kyerɛkyerɛfo Kunyin no fa do kyerɛkyerɛ hɛn ma yenya do mfaso no, no mu kor na yɛaka ho asɛm yi.—Isa. 48:​17, 18.