WUKUDA, January 18, 2023 no, wɔdze amandzɛɛbɔ tsitsir bi too gua wɔ jw.org do. Wɔbɔɔ amandzɛɛ dɛ Onua Gage Fleegle na Onua Jeffrey Winder abɛka Jehovah Adasefo Akwankyerɛ Kuw no mufo ho. Dɛm enuanom beenu yi nyina dze nokwardzi asom Jehovah mfe pii.

Onua Fleegle nyinii wɔ Pennsylvania n’anee afamu wɔ United States. N’awofo tsetsee no wɔ nokwar no mu. Aber a nna ɔyɛ aberantsɛba no, n’ebusuafo tui kɛtsenaa beebi a mboa ho hia wɔ ekuraase bi mu. Wotui kɛtsenaa hɔ no, wɔannkyɛr biara na Onua Fleegle bɔɔ esu wɔ November 20, 1988.

Nna Onua Fleegle n’awofo hyɛ no nkuran aber nyina dɛ ɔmfa ne ber nyina nsom Jehovah. Nna n’awofo taa gye amansin do ahwɛfo nye Bethelfo tsena hɔn fie. Nna Onua Fleegle hu dɛ dɛm enuanom yi wɔ enyigye. Dɛm ntsi, ɔbɔɔ esu no, wɔannkyɛr biara na ɔbɛyɛɛ daa kwampaafo wɔ September 1, 1989. Ɔdze botae bi sii n’enyi do aber a odzii mfe 12 no. Na mfe ebien wɔ n’enuma ekyir no, odur dɛm botae no ho. Botae a ɔdze sii n’enyi do nye dɛ, nna ɔpɛ dɛ ɔkɛyɛ edwuma wɔ Bethel. Wɔtoo nsa frɛɛ no dɛ ɔnkɛyɛ edwuma wɔ Brooklyn Bethel wɔ October 1991.

Aber a Onua Fleegle kɔr Brooklyn Bethel no, ɔdze mfe awɔtwe yɛɛ edwuma wɔ beebi a wotsintsim mbuukuu no, na ekyir yi, wɔmaa ɔkɛyɛɛ edwuma wɔ Ɔsom Edwuma Dwumadzibea. Dɛm aber no, ɔdze mfe kakra soom asafo bi a wɔka Russia kasa. Afe 2006 no, ɔwaar Nadia, na ɔkɛkaa noho ma wɔyɛɛ edwuma wɔ Bethel. Hɔn beenu no abɔ mu asom wɔ asafo a wɔka Portuguese kasa mu, na wɔdze bɔbor mfe du so asom asafo a wɔka Spanish kasa. Onua Fleegle dze mfe pii yɛɛ edwuma wɔ Ɔsom Edwuma Dwumadzibea hɔ, na ɔno ekyir no, ɔkɛyɛɛ edwuma wɔ Nkyerɛkyerɛ Egyinatukuw no ne ɔfese. Ofii hɔ no, ɔkɛyɛɛ edwuma wɔ Ɔsom Edwuma Egyinatukuw no ne ɔfese. Na March 2022 no, woyii no dɛ ɔnkɔboa Ɔsom Edwuma Egyinatukuw a ɔhyɛ Akwankyerɛ Kuw no n’ase no.

 Onua Winder so nyinii wɔ Murrieta a ɔwɔ California wɔ United States. N’awofo tsetsee no wɔ nokwar no mu, na ɔbɔɔ esu wɔ March 29, 1986. Bosoom a odzi hɔ no ara mu no, ɔbɛyɛɛ akwampaa boafo. N’enyi gyee ho araa ma nna ɔpɛ dɛ ɔyɛ pii ka ho. Ntsi ɔdze abosoom kakra yɛɛ akwampaa boafo edwuma no bi kaa ho, na October 1, 1986 no, ɔbɛyɛɛ daa kwampaafo.

Aber a Onua Winder yɛ aberantsɛba no, nna ɔtaa kɛsera no nuanom mpanyimfo beenu bi a nna wɔsom wɔ Bethel dɛm aber no. Nna n’enyi gye edwuma a no nuanom no yɛ wɔ Bethel no ho, ntsi ɔyɛɛ n’adwen dɛ sɛ onyin a, no so bɔkɔ akɛyɛ edwuma wɔ Bethel. Wɔtoo nsa frɛɛ no dɛ ɔnkɛyɛ edwuma wɔ Wallkill Bethel wɔ May 1990.

Aber a Onua Winder kɔr Wallkill Bethel no, ɔkɛyɛɛ edwuma wɔ dwumadzibea ahorow pii. Bi nye Cleaning Department (Dwumadzibea A Wɔhwɛ Siesie Bethel), Farm Department (Dwumadzibea A Wodua Nduadzewa Wɔ Bethel), na Bethel Ɔfese. Afe 1997 mu no, ɔwaar Angela, na hɔn beenu no abɔ mu asom wɔ Bethel dze besi ndɛ. Afe 2014 no, woyii hɔn fii Wallkill Bethel kɔr Warwick. Aber a wɔkɔr hɔ no, wɔmaa Onua Winder kɔboaa adan a nna worisisi wɔ wiadze nyina edwumayɛbea tsir hɔ no. Afei, afe 2016 no, wofii Warwick kɔr Watchtower Educational Center a ɔwɔ Patterson no. Hɔ so, Onua Winder kɛyɛɛ edwuma wɔ Audio/Video Services (Dwumadzibea A Wɔhwɛ Audio/Video Do). Mfe anan ekyir no, wɔsanee kɔr Warwick, na wɔmaa Onua Winder kɛyɛɛ edwuma wɔ Edwumayɛfo Eyiedzi Egyinatukuw no ne ɔfese. Na March 2022 no, woyii no dɛ ɔnkɔboa Edwumayɛfo Eyiedzi Egyinatukuw a ɔhyɛ Akwankyerɛ Kuw no n’ase no.

Hɛn mpaabɔ nye dɛ Jehovah nhyira dɛm ‘mbarimba a ɔdze hɔn akyɛ hɛn’ yi ma wɔnkɔ do nyɛ edwumadzen mfa mboa Ahendzi edwuma no.—Eph. 4:8.