1. Fa mfatoho kyerɛkyerɛ siantsir a ɔsɛ dɛ yedzi hɛn Kwankyerɛfo Jehovah n’ekyir no mu.

 FA NO dɛ ayew wɔ kwaa bi mu. Na ndzɛmba a obotum epira wo tse dɛ, mbowa a hɔnho yɛ hu nye nwura na mbowaba bɔn etwa woho ehyia. Afei so, abotan akɛseakɛse so nnyɛ na wɔ kwaa no mu. Naaso fa no dɛ, obi a onyim dɛm bea no yie na onyim beebi a sɛ efa a, esian biara ronnto wo rekyerɛ wo kwan ma eefi bea a hɔ yɛ hu yi, nkyɛ ebɛtse nka dɛn? Ekyingye biara nnyi ho dɛ, w’enyi bɛgye paa. Wiadze a yɛtse mu yi, ɔtse dɛ kwaa a yɛaka ho asɛm no. Ndzɛmba a obotum asɛɛ yɛnye Jehovah ntamu ebusuabɔ no ahyɛ mu ma twom. Naaso yɛwɔ Kwankyerɛfo papabi a obotum aboa hɛn ma yaatwe hɛnho efi ndzɛmba ahorow a ɔtsetse dɛm ho, na ɔaboa hɛn so ma yeenya onnyiewiei nkwa wɔ wiadze fofor no mu. Dɛm Kwankyerɛfo no nye Jehovah.

2. Jehovah si dɛn kyerɛ hɛn kwan?

² Jehovah si dɛn kyerɛ hɛn kwan? Kwan tsitsir a ɔfa do yɛ dɛm nye dɛ, ɔnam n’Asɛm Bible no do. Naaso, ɔsan so fa nyimpa do kyerɛ hɛn kwan. Dɛ nhwɛdo no, Jehovah nam “akowaa nokwafo nye nyansafo” no do ma hɛn nsa ka ndzɛmba a ɔma yɛnye ne ntamu ebusuabɔ no mu yɛ dzen, na ɔno boa hɛn ma yesisi gyinae pa. (Matt. 24:45) Ɔnnyɛ ɔno nko, ɔfa mbarimba anokwafo binom so do kyerɛ hɛn kwan. Dɛ nhwɛdo no, amansin do ahwɛfo nye asafo mu mpanyimfo hyɛ hɛn nkuran na wɔkyerɛkyerɛ hɛn ma yetum gyina ɔhaw a yehyia no ano. Yɛda Jehovah ase paa dɛ ɔma hɛn akwankyerɛ pa wɔ ewiei mber yi mu! Akwankyerɛ ahorow yi boa hɛn ma yɛkɔ do yɛ ndzɛmba a Jehovah pɛ, na ɔboa hɛn ma yɛkɔ do nantsew nkwa kwan no do.

3. Ebɛnadze na yebosusu ho wɔ adzesua yi mu?

³ Naaso, ɔtɔ da a, obotum ayɛ dzen ama hɛn dɛ yebedzi Jehovah n’akwankyerɛ do, nkanka aber a ɔnam nyimpa do na ɔdze dɛm  akwankyerɛ no rema hɛn no. Ebɛnadze ntsi a? Siantsir nye dɛ, bi a na hɛn enyi nngye akwankyerɛ no ho. Anaa bi a yebenya adwen dɛ nyansa nnyi akwankyerɛ no mu, ntsi akwankyerɛ no mmfi Jehovah hɔ. Mber a ɔtse dɛm mu paa na ɔsɛ dɛ yenya gyedzi dɛ Jehovah na ɔrekyerɛ no nkorɔfo kwan, na sɛ yedzi akwankyerɛ a ɔdze ma hɛn no do a, obehyira hɛn. Dza ɔbɔboa hɛn ma yaakɔ do enya gyedzi wɔ Jehovah mu no, yebosusu ndzɛmba ebiasa bi ho wɔ adzesua yi mu. Ɔno nye (1) mbrɛ Jehovah kyerɛɛ no nkorɔfo kwan wɔ Bible mber mu, (2) mbrɛ ɔrekyerɛ hɛn kwan ndɛ, na (3) sɛ yedzi Jehovah n’akwankyerɛ ekyir a nhyira a yenya.

MBRƐ JEHOVAH KYERƐƐ ISRAELFO NO KWAN

4-5. Ebɛnadze na Jehovah yɛe dze kyerɛɛ dɛ nna ɔnam Moses do rekyerɛ Israelfo no kwan? (Hwɛ mfonyin no so.)

⁴ Jehovah yii Moses dɛ ɔnkɛgye Israelfo no mfi Egypt. Ɔmaa wohun biribi a ɔkyerɛ dɛ ɔno na ɔnam Moses do rema hɔn akwankyerɛ. Dɛ nhwɛdo no, Jehovah maa mununkum dum kyerɛɛ hɔn kwan wɔ da no mu, na dɛmara na sɛ odu anafua so a, ɔma gya dum kyerɛ hɔn kwan. (Ex. 13:21) Moses dzii dum no ekyir na dum no kyerɛɛ ɔno nye Israelfo no kwan dze hɔn kodur Po Memen no ho. Aber a Israelfo no kodur Po Memen no ho na wohun dɛ Egypt nsordaafo reba hɔn do no, wɔbɔɔ hu osiandɛ nna hɔn adwen yɛ hɔn dɛ wonnyi beebiara a woboguan afa, na Egyptfo no bokuku hɔn. Iyi maa Israelfo no nyaa adwen dɛ Moses aper noho paa dɛ ɔdze hɔn akɔ Po Memen no ho. Naaso, nna ɔnntse dɛm koraa. Nna ɔyɛ Jehovah nankasa na ɔnam Moses do akyerɛ no nkorɔfo no kwan ma woekodu hɔ. (Ex. 14:2) Dɛm da no, Nyankopɔn nam anwanwa kwan do gyee no nkorɔfo nkwa.—Ex. 14:​26-28.

⁵ Ɔno ekyir no, mfe 40 a Israelfo no nantseew sar no do nyina, Moses kɔr do dzii mununkum dum no ekyir dze kyerɛɛ Nyankopɔn no nkorɔfo no kwan. a Odur ber bi no, Jehovah maa dum no kesii Moses ne ntamadan do, beebi a nna Israelfo no nyina botum ehu. (Ex. 33:​7, 9, 10) Nna Jehovah nam dum no do nye Moses kasa, na ɔno ekyir no Moses so ka dza Jehovah aka kyerɛ no no kyerɛ Israelfo no. (Ndw. 99:7) Nna Israelfo no wɔ biribi a wobotum egyina do ehu dɛ Jehovah nam Moses do rekyerɛ hɔn kwan.

6. Ebɛnadze na Israelfo no yɛe wɔ akwankyerɛ a Jehovah nam Moses do dze maa hɔn no ho? (Nkanee 14:​2, 10, 11)

⁶ Awerɛhosɛm nye dɛ, dase a nna ɔkyerɛ dɛ Jehovah dze Moses ridzi dwuma no, Israelfo no mu pii anngye annto mu. (Kenkan Nkanee 14:​2, 10, 11.) Mpɛn pii na wɔanngye annto mu dɛ Jehovah nam Moses do rekyerɛ hɔn kwan. Osian dza wɔyɛe no ntsi, Jehovah amma wɔannkɔ Anohoba Asaase no do.—Nka. 14:30.

7. Hɔn a wotsiee Jehovah n’akwankyerɛ no, bi nye woananom? (Nkanee 14:24) (Hwɛ mfonyin no so.)

⁷ Naaso Israelfo binom dze, wɔkɔr do tsiee akwankyerɛ a Jehovah dze maa hɔn no. Dɛ nhwɛdo no, Jehovah kaa dɛ: ‘Caleb kɔr do fii n’akoma nyina mu dzii m’ekyir koraa.’ (Kenkan Nkanee 14:24.) Iyi ntsi, Nyankopɔn hyiraa Caleb, na ɔmaa nankasa kyerɛɛ beebi a ɔpɛ dɛ ɔtsena wɔ Canaan. (Josh. 14:​12-14) Israelfo a wɔkɔr Anohoba Asaase no do no dzii Jehovah n’akwankyerɛ ekyir. Aber a Jehovah yii Joshua dɛ ɔnhyɛ Moses n’ananmu na ondzi Israelfo no hɔn enyim no, Israelfo no ‘dzii no nyi paa no nkwa nda nyinara mu.’ (Josh. 4:14) Osian dza wɔyɛe no ntsi, Jehovah hyiraa hɔn na ɔdze hɔn kɔr asaase a nna ɔdze ahyɛ hɔn bɔ no do.—Josh. 21:​43, 44.

8. Ahemfo no hɔn aber do no, ebɛnadze na Jehovah yɛe dze kyerɛɛ no nkorɔfo kwan? Kyerɛkyerɛ mu. (Hwɛ mfonyin no so.)

⁸ Mfe bi ekyir no, Jehovah yii atsɛmbuafo dɛ wɔnkyerɛ no nkorɔfo kwan. Ekyir yi, aber a  nna ahemfo dzi Israelfo do no, Jehovah yii nkɔnhyɛfo a nna wɔdze akwankyerɛ bɛma no nkorɔfo. Ahemfo a nna wodzi Jehovah nokwar no tsiee afotu a nkɔnhyɛfo no dze maa hɔn no. Dɛ nhwɛdo no, aber a nkɔnhyɛnyi Nathan twuuw Ɔhen David n’enyim no, ɔbrɛɛ noho adze na ɔgyee too mu. (2 Sam. 12:​7, 13; 1 Mber. 17:​3, 4) Aber a nkɔnhyɛnyi Jahaziel dze akwankyerɛ maa Ɔhen Jehoshaphat no, otsiei na ɔhyɛɛ Judahfo no nkuran dɛ ‘wɔngye Nyankopɔn no nkɔnhyɛfo no ndzi.’ (2 Mber. 20:​14, 15, 20) Ɔhen Hezekiah so, aber a noho kyeer no no, ɔkɔhwehwɛɛ mboa fii nkɔnhyɛnyi Isaiah hɔ. (Isa. 37:​1-6) Aber biara a nna ahemfo yi betsie Jehovah n’akwankyerɛ no, nna ohyira hɔn na ɔbɔ ɔman no ho ban. (2 Mber. 20:​29, 30; 32:22) Nkyɛ ɔsɛ dɛ biribiara ma Nyankopɔn no nkorɔfo no hu dɛ, ɔyɛ Jehovah na ɔnam nkɔnhyɛfo no do dze akwankyerɛ rema hɔn. Naaso, ahemfo no mu pii na Israelfo no mu binom enntsie Jehovah no nkɔnhyɛfo no.—Jer. 35:​12-15.

MBRƐ JEHOVAH KYERƐƐ TSETSE CHRISTIANFO NO KWAN

9. Woananom na Jehovah faa hɔn do dze akwankyerɛ maa tsetse Christianfo no? (Hwɛ mfonyin no so.)

⁹ Jehovah hyehyɛɛ Christianfo asafo no wɔ Pentecost afe 33 H.B. Osii dɛn maa dɛm Christianfo yi akwankyerɛ? Jehovah yii Jesus dɛ ɔnyɛ asafo no ne tsir. (Eph. 5:23) Naaso Jesus nankasa nye esuafo no annkasa nkorkor amma hɔn akwankyerɛ. Mbom ɔnam asomafo no nye mpanyimfo a nna wɔwɔ Jerusalem no do na ɔdze akwankyerɛ mae. (Andw. 15:​1, 2) Afei so, asafo biara mu no, wɔpaaw mpanyimfo a nna wɔdze akwankyerɛ bɛma.—1 Thess. 5:12; Titus 1:5.

10. (a) Tsetse Christianfo no mu pii yɛɛ hɔn adze dɛn wɔ akwankyerɛ a wɔdze maa hɔn no ho? (Asomafo Ndwuma 15:​30, 31) (b) Bible mber mu no, ebɛnadze ntsi na binom anngye akwankyerɛ a Jehovah nam nyimpa do dze mae no annto mu? (Hwɛ adakaba a wɔato dzin “ Siantsir A Binom Nngye Nnto Mu Dɛ Jehovah Fa Nyimpa Do Ma No Nkorɔfo Akwankyerɛ.”)

¹⁰ Tsetse Christianfo no yɛɛ hɔn adze dɛn wɔ akwankyerɛ a hɔn nsa kae no ho? Hɔn mu pii fii hɔn akoma mu gyee too mu na wɔdze yɛɛ edwuma. Nokwasɛm nye dɛ, “wodzii dɛw wɔ awerɛkyekyer” a wɔdze maa hɔn no ho. (Kenkan Asomafo Ndwuma 15:​30, 31.) Naaso yembisa dɛ, Jehovah si dɛn kyerɛ n’asomfo kwan ndɛ?

MBRƐ JEHOVAH REKYERƐ N’ASOMFO KWAN NDƐ

11. Hɛn aber yi do no, ebɛn nhwɛdo na ɔma yehu dɛ Jehovah akyerɛ hɔn a wodzi ndzɛmba enyim no kwan?

¹¹ Ndɛ so, Jehovah kɔ do kyerɛ n’asomfo kwan. Ɔyɛ no dɛn? Ɔnam n’Asɛm no nye ne Ba a ɔyɛ  asafo no ne tsir no do na ɔkyerɛ n’asomfo kwan. Hɛn aber yi do so, ehwɛ a, yɛwɔ dase a ɔkyerɛ dɛ Nyankopɔn kɔ do dze nyimpa dzi dwuma anaa? Nyew. Ɔwodze, ma yɛnhwɛ dza ɔkɔr do wɔ afe 1870 n’ekyir. Charles Taze Russell nye hɔn a wɔka no ho no bohun dɛ afe 1914 bɛyɛ afe tsitsir, osiandɛ wobohun dɛ nna dɛm afe no mu na wɔdze Nyankopɔn n’Ahendzi no besi hɔ. (Dan. 4:​25, 26) Bible nkɔnhyɛ a wɔyɛɛ mu nhwehwɛmu no na ɔboaa hɔn ma wohun dɛm nokwasɛm yi. Jehovah hyiraa nhwehwɛmu a wɔyɛe no do anaa? Nyew, ohyiraa do paa. Nsɛm a osisii afe 1914 no maa ɔdaa edzi paa dɛ Nyankopɔn n’Ahendzi no ahyɛ ase ridzi tum. Dɛm afe no ara mu no na Wiadze Ko I pae gui. Ɔno ekyir no, yardɔm, asaasewosow nye ɔkɔm so toatoaa do. (Luke 21:​10, 11) Nokwasɛm nye dɛ, nna Jehovah nam dɛm Christianfo mbarimba anokwafo yi do roboa no nkorɔfo.

12-13. Aber a Wiadze Ko II no rokɔ do no, ebɛn nhyehyɛɛ na wɔyɛe a nna ɔbɛma asɛnka nye ɔkyerɛkyerɛ edwuma no enya nkɔenyim?

¹² Ma yɛnhwɛ dza osii ber a nna Wiadze Ko II no rokɔ do no. Enuanom a nna wodzi ndzɛmba enyim a wɔwɔ wiadze nyina edwumayɛbea tsir no yɛɛ Nyikyerɛ 17:8 no mu nhwehwɛmu. Nhwehwɛmu a wɔyɛe no maa wohun dɛ, nnyɛ Wiadze Ko II no na ɔdze Har–​Magedon bɛba. Ntsi nna wonyim dɛ ɔnyɛ dɛn ara a, asomdwee bɛba ma Jehovah no nkorɔfo enya hokwan dze aka asɛmpa no akyerɛ nkorɔfo pii. Dɛm ntsi, Jehovah n’ahyehyɛdze no dze Ɔweɔn-Aban Gilead Bible Skuul bae mbrɛ ɔbɛyɛ a wobotum atsetse asɛmpatserɛwfo ma wɔaaka asɛmpa no na wɔakyerɛkyerɛ nkorɔfo wɔ wiadze nyina. Osian ɔko no ntsi, nna ɔtse dɛ mbrɛ iyi rennyɛ yie. Naaso aber a nna ɔko no taa mu mpo no, wɔdze asɛmpatserɛwfo kɔr aman ahorow bi do. Ɔno da nkyɛn a, akowaa nokwafo no dze skuul bi a wɔfrɛ no Course in Theocratic Ministry b bae. Nna dɛm skuul yi bɛtsetse enuanom a wɔwɔ asafo ahorow mu no ma wɔaabɛyɛ asɛmpakafo nye akyerɛkyerɛfo a wotu mpon. Nna Nyankopɔn nam dɛm kwan yi do risiesie no nkorɔfo ama edwuma a nna ɔda hɔn enyim no.

¹³ Sɛ yɛhwɛ dza osii no nyina a, ɔma yehu paa dɛ nna Jehovah na ɔrekyerɛ no nkorɔfo kwan wɔ mber a no mu yɛ dzen no mu. Ofi Wiadze Ko II reba no, Jehovah n’asomfo a wɔwɔ aman pii do no enya asomdwee nye fahodzi dze reka asɛmpa no. Nokwasɛm nye dɛ, asɛnka edwuma no afa ne tam pa efura.

14. Ebɛnadze ntsi na yebotum dze hɛnho ato akwankyerɛ a Jehovah n’ahyehyɛdze no nye asafo mu mpanyimfo dze ma hɛn no do? (Nyikyerɛ 2:1) (Hwɛ mfonyin no so.)

¹⁴ Ndɛ so, Akwankyerɛ Kuw no mufo kɔ do dze hɔnho to Christ n’akwankyerɛ do. Wɔpɛ dɛ akwankyerɛ a wɔdze ma enuanom no nye dza Jehovah na Jesus pɛ no hyia. Afei so, wɔnam amansin do ahwɛfo nye asafo mu mpanyimfo do dze akwankyerɛ ma asafo ahorow no. c Asafo mu mpanyimfo a wɔdze sunsum krɔnkrɔn asera hɔn nye asafo mu mpanyimfo nyina wɔ Christ “ne nsa nyimfa mu.” (Kenkan Nyikyerɛ 2:1.) Nokwasɛm nye dɛ, bɔn wɔ asafo mu mpanyimfo ho na wodzi mfomdo so. Dɛmara na Moses, Joshua nye asomafo no so, ɔtɔ da a nna wodzi mfom. (Nka. 20:12; Josh. 9:​14, 15; Rom. 3:23) Naaso, yehu paa dɛ Christ na ɔrekyerɛ akowaa nokwafo no nye asafo mu mpanyimfo no kwan, na ɔbɔkɔ do ayɛ dɛm “daa, dze ekesi wiadze ewiei.” (Matt. 28:20) Dɛm ntsi, ɔsɛ dɛ yetsie akwankyerɛ a Christ nam hɔn a wodzi ndzɛmba enyim no do dze ma hɛn no, na yenya mu awerɛhyɛmu.

YEDZI JEHOVAH N’AKWANKYERƐ EKYIR A, NHYIRA A YENYA

15-16. Hɔn a wotsiee Jehovah n’akwankyerɛ no, ebɛnadze na ibotum esua efi hɔn asɛm no mu?

¹⁵ Sɛ yɛkɔ do dzi Jehovah n’akwankyerɛ ekyir a, ndɛ mpo obehyira hɛn. Dɛ nhwɛdo no, Andy na Robyn tsiee afotu a wɔdze ma hɛn dɛ yɛmma hɛn asetsena mbra famu no. (Hwɛ Matthew 6:22 no ho nkyerɛkyerɛmu no.) Dza wɔyɛe no boaa hɔn ma wotumii tuu hɔnho mae kɔboaa asafo adansi edwuma no. Robyn kaa dɛ: “Ɔtɔ da a, dan a yenya tsena mu no, ɔyɛ a nna no mu kyer na bi mpo wɔ hɔ a, nna gyaadze nnyi hɔ. Afei so, nna m’enyi gye mfonyintwa ho paa, naaso nna ɔsɛ dɛ motontɔn mfir a medze twa mfonyin no mu pii. Sɛ morotɔn a, ebɔhwɛ no, nna m’enyi atsetsɛw. Naaso, misii mo bo dɛ mubosuasua dza Abraham ne yer Sarah yɛe no, na mahwɛ m’enyim tsenn a meremma biribiara nntwetwe m’adwen.” (Heb. 11:15) Ebɛn nhyira na dɛm awarfo yi nyae fii dza wɔyɛe no mu? Robyn kaa dɛ: “Hɛn akoma atɔ hɛn yamu paa, osiandɛ yenyim dɛ yɛreyɛ dza yebotum biara ama Jehovah. Sɛ yɛreyɛ asafo edwuma a, ɔma hɛn enyi gye paa osiandɛ ɔma yehu mbrɛ asetsena bɛyɛ wɔ wiadze fofor no mu.” Andy so dze kaa ho dɛ: “Yeetu hɛnho ama koraa roboa Ahendzi edwuma no, na iyi ma hɛn akoma tɔ hɛn yamu paa.”

¹⁶ Sɛ yetsie Jehovah n’akwankyerɛ a, ebɛn nhyira fofor na yenya? Aber a Marcia wiee ntoado skuul no, wotuu no fo dɛ ɔnyɛ akwampaa  edwuma no na dɛm pɛpɛɛpɛ na ɔyɛe. (Matt. 6:33; Rom. 12:11) Marcia kaa dɛ: “Minyaa hokwan a nkyɛ medze bɔkɔ university mfe anan a murunntua hwee. Naaso nna mepɛ dɛ meyɛ pii wɔ Jehovah no som mu. Ntsi misii gyinae dɛ, mobɔkɔ skuul bi a wɔkyerɛ nsaanodwuma na mekosua nsaanodwuma a ɔbɔboa me ma meetum ayɛ mo som edwuma no. Gyinae pa a misisii wɔ m’asetsena mu no, iyi ka ho bi. Seseiara, m’enyi agye paa dɛ morosom dɛ daa kwampaafo, na m’edwuma a meyɛ no so ma me kwan ma mutum kɔ Bethel kɔboa edwuma a wɔyɛ wɔ hɔ no. Afei so, mutum yɛ ndzɛmba pii wɔ Jehovah no som mu.”

17. Sɛ yɛkɔ do tsie Jehovah n’akwankyerɛ a, ebɛn nhyira afofor na yebenya? (Isaiah 48:​17, 18)

¹⁷ Ɔtɔ da a, wɔma hɛn akwankyerɛ a ɔbɔ hɛnho ban fi honam afamu ndzɛmba a yebedzi ekyir, nye ndzɛmba a obotum ama yaayɛ Nyankopɔn do asoɔdzen no ho. Iyi mu so, sɛ yetsie Jehovah n’akwankyerɛ a, obehyira hɛn. Afei so, ɔboa hɛn ma yenya tsibowa pa, na yɛmmfa hɛnho nnkɛhyɛ ɔhaw biara mu. (1 Tim. 6:​9, 10) Iyi ma yetum fi hɛn akoma nyina mu som Jehovah, na ɔno ma yenya enyigye, asomdwee nye akomatɔyamu ankasa.—Kenkan Isaiah 48:​17, 18.

18. Ebɛnadze ntsi na esi wo bo dɛ ebɔkɔ do etsie Jehovah n’akwankyerɛ?

¹⁸ Ɔda edzi pefee dɛ, wɔ ahohiahia kɛse no mu na Christ ne Mfrenhyia Apem Tumdzi n’ase mpo, Jehovah bɔkɔ do afa nyimpa do dze akwankyerɛ ama. (Ndw. 45:16) Sɛ wɔdze akwankyerɛ bi ma hɛn na hɛn enyi nngye ho mpo a, yɛbɔkɔ do dze ayɛ edwuma anaa? Mbrɛ yesi yɛ hɛn adze wɔ akwankyerɛ a Jehovah dze ma hɛn seseiara ho no, ɔno na ɔbɛkyerɛ mbrɛ yebesi ayɛ hɛn adze wɔ dɛm aber no. Dɛm ntsi, akwankyerɛ biara a ofi Jehovah hɔ, nye dza ofi nyimpa a oeyi hɔn dɛ wɔnhwɛ hɛn do no hɔ no, hom mma yɛnkɔ do ndzi ekyir daa. (Isa. 32:​1, 2; Heb. 13:17) Sɛ yɛyɛ dɛm a, yebotum dze hɛnho ato hɛn Kwankyerɛfo Jehovah do. Osiandɛ ɔno na ɔrobɔ hɛnho ban efi esian a ɔwɔ Satan wiadze yi mu no ho na ɔrekyerɛ hɛn kwan akɔ wiadze fofor no mu.