1-2. Ebɛn tsebea ahorow na Jehovah n’asomfo pii rihyia, na ebɛn nsunsuando na iyi botum enya wɔ hɔn do?

HOM mma yensusu nsɛm ebiasa yi ho nhwɛ: Dɔkta akã akyerɛ onua aberantsɛ bi dɛ oenya yarba bi a ɔyɛ hũ a ɔbɛma ɔagogow koraa. Onua bi a oedzi bɔbor mfe 50 yer noho yɛ edwuma paara, naaso woeyi no edzi efi edwuma mu. Ɔayɛ araa naaso onnya edwuma fofor nnyɛ. Hɛn akyerɛbaa nokwafo bi ne mfe akɔ enyim ma onntum nnyɛ pii wɔ Jehovah no som mu dɛ nkan no.

² Tsebea a irihyia no, sɛ ɔnye nsɛm ebiasa a yɛakã ho asɛm no mu kor dzi nsɛ a, annhwɛ a ebɛtse nka dɛ woho nnyi mfaso bio. Dɛm nsɛm tsebea a yɛakã ho asɛm yi botum ama aahwer w’enyigye, aatse nka dɛ ennsɛ hwee, na obotum ama ebusuabɔ a enye afofor wɔ no aayɛ basaa.

3. Satan nye hɔn a odzi hɔn do tum no, wobu nyimpa nkwa dɛn?

³ Wiadze yi da adwen a Satan wɔ wɔ nkwa ho no edzi. Satan akɔ do ara nye nyimpa edzi no tse dɛ mbrɛ mfaso biara nnyi hɛn do. Nna Satan nyim dɛ obi a ɔbɛyɛ Nyankopɔn do asoɔdzen no, owu na obowu. Naaso ɔhyɛɛ da ara kãa kyerɛɛ Eve dɛ, sɛ ɔyɛ Nyankopɔn do asoɔdzen a, obenya ahotɔ. Nna iyi yɛ etsirmɔdzensɛm. Eguadzi, amanyɛsɛm, nye nyamesom nhyehyɛɛ a ɔwɔ wiadze yi mu no, Satan na odzi do tum. Ntsi, ɔnnyɛ nwanwa dɛ eguadzifo, amanyɛfo, nye nyamesom akandzifo pii da su a Satan wɔ no edzi. Wommbu nyimpa nkwa dɛ ɔsom bo na wɔnndwen mbrɛ nyimpa si tse nka ho.

4. Ebɛnadze na yerubosusu ho wɔ adzesua yi mu?

⁴ Naaso Jehovah dze, ɔpɛ dɛ yehu dɛ yɛsom bo. Nkyii so, sɛ  yɛkɔ tsebea ahorow bi mu na yɛtse nka dɛ mfaso biara nnyi hɛnho a, ɔboa hɛn. (Ndw. 136:23; Rom. 12:3) Adzesua yi mu no, yɛbɔhwɛ mbrɛ Jehovah si boa hɛn wɔ tsebea a odzidzi do yi mu: (1) Ber a yarba retseetsee hɛn, (2) ber a yehyia sikasɛm mu ahokyer, nye (3) ber a nkɔkorabɔ na mberwabɔ ma yɛtse nka dɛ yerunntum nnyɛ biribiara a mfaso wɔ do wɔ Jehovah no som mu bio no. Naaso, hom mma yendzi kan nhwɛ siantsir a yebotum agye edzi dɛ hɛn mu biara som bo ma Jehovah.

5. Ebɛnadze na ɔma yehu dɛ nyimpa som bo ma Jehovah?

⁵ Ɔwɔ mu dɛ famu dɛtse na wɔdze bɔɔ hɛn, naaso yɛsom bo koraa kyɛn dɛtse nsapuw mã. (Gen. 2:7) Yɛwɔ siantsir pii ntsi a yɛgye dzi dɛ yɛsom bo ma Jehovah. Hom mma yensusu no mu bi ho nhwɛ. Ɔbɔɔ nyimpa wɔ no su do, ntsi yetum da no su ahorow no edzi. (Gen. 1:27) Dɛm kwan yi do no, ɔmaa nyimpa bɛyɛɛ abɔdze a wɔkrɔn kyɛn abɔdze fofor biara a ɔbɔe wɔ asaase do, na ɔdze asaase na mbowa a ɔbɔe no hyɛɛ hɛn nsa.​—Ndw. 8:4-8.

6. Ebɛn adze fofor na ɔma yehu dɛ Jehovah bu nyimpa a yɛtɔ sin dɛ yɛsom bo?

⁶ Ber a Adam yɛɛ bɔn no, ɔno ekyir mpo no Jehovah kɔr do buu nyimpa dɛ yɛsom bo. Obu hɛn dɛ yɛsom bo araa ma ɔdze no Dɔba, Jesus, maa dɛ werdam. (1 John 4:9, 10) Jehovah dze werdam afɔrbɔ no bɛyɛ edwuma dze enyan hɔn a Adam no bɔn ama woewuwu no. Obenyan “hɔn a wɔtsen nye hɔn a wɔnntsen” aba nkwa mu. (Andw. 24:15) Ɔmmfa ho dɛ yɛyar, yedzi hia, yɛabɔ nkɔkora anaa mberwa no, Jehovah n’Asɛm ma yehu dɛ yɛsom bo ma no.​—Andw. 10:34, 35.

7. Ebɛn siantsir afofor na Nyankopɔn n’asomfo wɔ a ɔma wɔgye dzi dɛ Jehovah bu hɔn dɛ wɔsom bo?

⁷ Yɛwɔ siantsir afofor ntsi a yɛgye dzi dɛ Jehovah bu hɛn dɛ yɛsom bo. Ohun mbrɛ yesii yɛɛ hɛn adze wɔ asɛmpa no ho, ntsi na ɔatwe hɛn aba ne nkyɛn no. (John 6:44) Jehovah twee bɛɛn hɛn aber a yɛhyɛɛ ase dɛ yɛrotwe abɛn no no. (Jas. 4:8) Afei so, sɛ yɛhwɛ akwan ahorow a Jehovah fa do kyerɛkyerɛ hɛn no a, yehu dɛ ɔgye mber na mbɔdzembɔ papaapa, ntsi iyi ma yehu dɛ yɛsom bo ma no. Onyim nyimpa ban a hɛn mu biara yɛ seseiara, na onyim mbrɛ yebesi etu mpon afa. Bio so, ɔtsẽa hɛn osian ɔdɔ a ɔwɔ ma hɛn ntsi. (Mbɛ. 3:11, 12) Hwɛ adanse a odzi mũ ara a yɛwɔ a ɔma yehu dɛ Jehovah bu hɛn dɛ yɛsom bo!

8. Ebɛn kwan do na asɛm a ɔwɔ Ndwom 18:27-29 no botum aka mbrɛ yesi bu ɔhaw ahorow a yehyia no?

⁸ Nna nyimpa binom bu Ɔhen David dɛ mfaso biara nnyi no do, naaso nna onyim dɛ Jehovah dɔ no na ɔboaa no. Iyi maa David nyaa tsebea a ɔkɔr mu no ho adwen pa. (2 Sam. 16:5-7) Sɛ yɛtse nka dɛ hɛn abaw mu ebu anaa yerihyia nsɛndzendzen a, Jehovah botum aboa hɛn ma yeehu ndzɛmba wɔ kwan fofor do koraa. Afei so, obotum aboa hɛn ma yeedzi akwansidze biara do. (Kenkan Ndwom 18:27-29.) Sɛ Jehovah ka hɛnho a, biribiara runntum nnsiw hɛn kwan dɛ yɛdze enyigye bɔsom no. (Rom. 8:31) Afei, hom mma yɛnhwɛ tsebea ebiasa no a yeedzi kan akã ho asɛm no. Dɛm tsebea ebiasa no, sɛ yɛkɔ mu a, no ho behia papaapa dɛ yɛkaa dɛ Jehovah dɔ hɛn na obu hɛn dɛ yɛsom bo ma no.

9. Ebɛn kwan do na yarba botum aka mbrɛ yesi bu hɛnho?

⁹ Yarba botum atseetsee hɛn ma yaatse nka dɛ hɛnho nnyi mfaso mma obiara bio. Sɛ afofor hu dɛ yenntum nnyɛ ndzɛmba ahorow bi a, annhwɛ a yɛbɛtse nka dɛ hɛn enyim egu ase. Dɛmara so na yebotum atse nka dɛm ber a no ho ebehia dɛ yɛhwehwɛ mboa fi afofor hɔ no. Sɛ afofor nnyim dɛ yɛyar mpo a, osiandɛ yenntum nnyɛ ndzɛmba ahorow bi a nkan no nna yetum yɛ ntsi, bi a yɛbɛtse nka dɛ hɛn enyim  egu ase. Jehovah bɛma hɛn do wɔ ahohia ber a ɔtse dɛm mu. Ebɛn kwan do?

10. Dɛ mbrɛ Mbɛbusɛm 12:25 kyerɛ no, sɛ yɛyar a, ebɛnadze na obotum aboa hɛn?

¹⁰ Sɛ yɛyar a, ‘nsɛmpa’ a afofor bɛkã akyerɛ hɛn no botum ahyɛ hɛn nkuran. (Kenkan Mbɛbusɛm 12:25.) Jehovah akora nsɛmpa pii do wɔ Bible no mu a ɔkaa hɛn dɛ yɛsom bo ma no ɔmmfa ho dɛ yɛyar no. (Ndw. 31:19; 41:3) Sɛ yɛkenkan nsɛm a ɔtse dɛm a ofi sunsum mu no, na mpo yɛsan kenkan no bio a, Jehovah bɔboa hɛn ma yeedzi dadwen a hɛn yarba no dze aba hɛn do no ho dwuma.

11. Ebɛn kwan do na onua bi nyaa Jehovah no mboa?

¹¹ Hom mma yensusu Jorge n’asɛm no ho nhwɛ. Jorge yɛ aberantsɛ a onyaa yarba bi a ɔyɛ hũ. Yarba no mu yɛɛ dzen araa ma nna Jorge tse nka dɛ mfaso biara nnyi no do bio. Jorge kãa dɛ, “Mbrɛ yarba no maa metsee nka anaa fɛr a yarba no maa mefɛree osian twe a ɔtwetwee afofor adwen baa mo do no, mannda annso ho daa. Ber a yarba no mu yɛɛ dzen no, modween mbrɛ m’asetsena besi asesa afa no ho. Mo werɛ hoow kɛse, ntsi meserɛɛ Jehovah dɛ ɔmboa me.” Ebɛn kwan do na Jehovah boaa no? Jorge dze kaa ho dɛ, “Osiandɛ nna ɔyɛ dzen ma me dɛ medze m’adwen besi biribi do ntsi, wɔhyɛɛ me nkuran dɛ menkenkan nsɛm ntsiantsia a ɔwɔ Ndwom nwoma no mu a ɔma yehu dɛ Jehovah dwen n’asomfo ho no. Da biara, nna mekenkan dɛm kyerɛwnsɛm no mpɛn pii, na ɔmaa minyaa awerɛkyekyer na dzenhyɛ. Mber kakra ekyir no, afofor hyɛɛ ase hun dɛ nna m’enyi regye kɛse. Wɔkãe mpo dɛ adwen pa a minyae wɔ me tsebea no ho no hyɛɛ hɔn nkuran. Muhun dɛ Jehovah ebua me mpaabɔ! Ɔboaa me ma mesesaa adwen a nna mowɔ wɔ mankasa moho no. Afei, dza n’Asɛm no kã wɔ adwen a ɔwɔ wɔ mo ho ɔmmfa ho dɛ meyar no, mehyɛɛ ase dwendween ho.”

12. Sɛ yarba bi retseetsee wo a, ebɛnadze na ibotum ayɛ ama eenya Jehovah no mboa?

¹² Sɛ yarba bi retseetsee wo a, nya awerɛhyɛmu  dɛ Jehovah nyim tsebea a erefa mu. Mbrɛ ɔbɛyɛ a ibenya tsebea a ewɔ mu no ho adwen pa no, serɛ no dɛ ɔmboa wo. Afei, hwehwɛ nsɛm a ɔma awerɛkyekyer a Jehovah akora do wɔ Bible no mu ama wo no. Fa w’adwen si kyerɛwnsɛm a ɔma yehu mbrɛ Jehovah si bu n’asomfo fa no do. Ber a ereyɛ dɛm no, ibohu dɛ Jehovah ye ma hɔn a wɔsom no wɔ nokwardzi mu nyina no.​—Ndw. 84:11.

13. Sɛ ebusua tsir bi hwer n’edwuma a, obotum atse nka dɛn?

¹³ Ebusua tsir biara pɛ dɛ ɔma n’ebusua dza wohia ama wɔaakɔ do atsena ase. Fa no dɛ onua bi n’edwuma efi ne nsa ɔmmfa ho dɛ ɔnnyɛɛ bɔn biara no. Ɔreyɛ dza obotum biara ahwehwɛ fofor, naaso onnya bi. Tsebea a ɔtse dɛm mu no, annhwɛ a ɔbɛtse nka dɛ mfaso biara nnyi no do bio. Sɛ ɔdze n’adwen si Jehovah no bɔhyɛ ahorow do a, ɔbɔboa no dɛn?

14. Ebɛnadze ntsi na Jehovah dzi no bɔhyɛ do?

¹⁴ Jehovah dzi no bɔhyɛ do daa. (Josh. 21:45; 23:14) Ndzɛmba pii ntsi na ɔyɛ dɛm. Odzi kan, obotum aka ne dzin. Jehovah ahyɛ bɔ dɛ ɔbɔhwɛ n’asomfo anokwafo, na ɔtse nka dɛ ɔyɛ n’asodzii dɛ odzi bɔhyɛ a ɔtse dɛm do. (Ndw. 31:1-3) Bio so, Jehovah nyim dɛ sɛ ɔannhwɛ n’asomfo a yɛka n’ebusua ho a, asetsena ronnkɔ yie mma hɛn na hɛn werɛ bɔhow. Dɛm ntsi, ɔahyɛ bɔ dɛ ɔbɛma hɛn dza yehia ama yaatsena ase nye dza yehia ama yaakɔ do asom no wɔ nokwardzi mu. Biribiara nnyi hɔ a obotum esiw no kwan dɛ obedzi bɔ a ɔahyɛ yi do!​—Matt. 6:30-33; 24:45.

15. (a) Ebɛn ɔhaw na tsetse Christianfo no hyiae? (b) Ebɛn awerɛhyɛmu na Ndwom 37:18, 19 no ma yenya?

¹⁵ Sɛ yɛma siantsir a Jehovah dzi no bɔhyɛ do no tsena hɛn adwen mu a, yebotum enya awerɛhyɛmu dɛ ɔbɔboa hɛn ber a yehyia sikasɛm mu ahokyer no. Hom mma yɛnhwɛ nhwɛdo a tsetse  Christianfo no yɛe no. Ber a wɔdze ɔtaa kɛse baa asafo a nna ɔwɔ Jerusalem do no, ‘hɔn nyina petsee gyedɛ asomafo no nko.’ (Andw. 8:1) Susu dza nna iyi dze bɛba ho hwɛ. Sikasɛm mu ahokyer! Siantsir nye dɛ obotum aba dɛ Christianfo binom hɔn efie sɛɛe na hɔn edwuma fii hɔn nsa. Naaso, Jehovah ammpow hɔn, dɛmara so na wɔannhwer hɔn enyigye. (Andw. 8:4; Heb. 13:5, 6; Jas. 1:2, 3) Jehovah boaa dɛm Christianfo anokwafo no, na ɔbɔboa hɛn so.​—Kenkan Ndwom 37:18, 19.

16. Ebɛn tsebea na sɛ yɛkɔ mu a obotum ama yeenya adwen dɛ bi a Jehovah mmbu ɔsom a yɛdze ma no no dɛ ɔsom bo?

¹⁶ Ber a yɛrobɔ nkɔkora na mberwa no, bi a yɛbɛhyɛ ase atse nka dɛ kakraabi na yebotum ayɛ ama Jehovah. Bi a dadwen a ɔtse dɛm hyɛɛ Ɔhen David do ber a nna ɔrobɔ akɔkora no. (Ndw. 71:9) Ebɛn kwan do na Jehovah bɔboa hɛn?

17. Ebɛnadze na yebotum esũa efi hɛn akyerɛbaa a wɔfrɛ no Jheri n’asɛm no mu?

¹⁷ Hom mma yensusu hɛn akyerɛbaa bi a wɔfrɛ no Jheri n’asɛm no ho nhwɛ. Wɔtoo nsa frɛɛ no dɛ ɔmbra dwumadzi bi a wɔbɛyɛ wɔ Ahendzi Asa do hɔ no bi. Nna ɔyɛ dwumadzi a wɔdze bɛtsetse enuanom ma woeehu mbrɛ wobesi esiesie hɔn Ahendzi Asa no. Jheri kãa dɛ: “Mabɔ aberwa, meyɛ kunafo, na minnyi nyimdzee biara a Jehovah botum dze me ayɛ edwuma. Mfaso biara nnyi mo do.” Anafua ana adze rebɛkye ma wɔaahyɛ dwumadzi no ase no, ɔkãa n’akoma mu nsɛm nyinara kyerɛɛ Jehovah wɔ mpaabɔ mu. Da a odzi hɔ a odur Ahendzi Asa do hɔ no, nna n’adwen mu nntsen no; onnhu sɛ ɔda ho ara fata dɛ ɔba dwumadzi no bi anaadɛ ɔmmfata. Ber a dwumadzi no rokɔ do no, akasafo no mu kor kãa dɛ nyimdzee a ɔsom bo paara a yɛwɔ no, ɔno nye ɔpɛ a yɛwɔ dɛ yɛbɛma Jehovah  akyerɛkyerɛ hɛn. Jheri kãa dɛ: “Muhun dɛ, ‘Mowɔ dɛm nyimdzee no!’ Ber a muhun dɛ Jehovah rubua me mpaabɔ no, mehyɛɛ ase sui. Nna ɔrema me awerɛhyɛmu dɛ mowɔ biribi a ɔsom bo a mubotum dze aboa na ɔwɔ ɔpɛ dɛ ɔbɛkyerɛkyerɛ me!” Ber a Jheri rekaakaa dza ɔkɔr do no, ɔkãa dɛ: “Mokɔr dwumadzi no ase no, nna metse nka dɛ musuro, m’abaw mu ebu na minnyim hwee. Naaso, dwumadzi no baa ewiei no, nna metse nka dɛ menya nkuranhyɛ na ahotodo a mubotum dze ayɛ biribi a mfaso wɔ do aboa!”

18. Ebɛn kwan do na Bible no ma yehu dɛ sɛ yɛrobɔ nkɔkora na mberwa mpo a, Jehovah kɔ do bu ɔsom a yɛdze ma no no dɛ ɔsom bo?

¹⁸ Ber a yɛrobɔ nkɔkora na mberwa no, yebotum enya awerɛhyɛmu dɛ Jehovah da ho ara wɔ biribi ma hɛn a yebotum ayɛ. (Ndw. 92:12-15) Jesus ama yeehu dɛ ɔmmfa ho dɛ yenntum nnyɛ pii anaa mbɔdzen a yɛbɔ no suar wɔ hɛn enyi do no, Jehovah bu dza yetum yɛ wɔ no som mu no dɛ ɔsom bo. (Luke 21:2-4) Ntsi, fa w’adwen si dza ibotum ayɛ no do. Dɛ nhwɛdo no, ibotum akã Jehovah ho asɛm akyerɛ afofor, abɔ mpaa ama wo nuanom, na aahyɛ afofor nkuran ma wɔaakɔ do edzi nokwar. Jehovah bu wo dɛ eyɛ n’edwumaboafo osian w’akoma mu a ifi yɛ setsie ma no, na nnyɛ dza itum yɛ ntsi a.​—1 Cor. 3:5-9.

19. Ebɛn awerɛhyɛmu na Romefo 8:38, 39 no ma yenya?

¹⁹ Hwɛ enyisɔ kɛse a yɛwɔ dɛ yɛsom Jehovah, Nyankopɔn a obu n’asomfo dɛ wɔsom bo ankasa no! Ɔbɔɔ hɛn dɛ yɛnyɛ n’apɛdze, na ɔsom krɔnn a yɛdze ma no no na ɔma yenya akomatɔyamu wɔ hɛn asetsena mu. (Nyi. 4:11) Ɔwɔ mu dɛ bi a wiadze no bu hɛn dɛ mfaso biara nnyi hɛn do, naaso Jehovah dze, obu hɛn dɛ yɛsom bo. (Heb. 11:16, 38) Sɛ yɛtse nka dɛ yarba, sikasɛm mu ahokyer, nkɔkorabɔ anaa mberwabɔ ama hɛn abaw mu ebu a, hom mma yɛnkaa dɛ biribiara runntum nntsew hɛn mmfi ɔdɔ a hɛn sor Egya no wɔ ma hɛn no ho.​—Kenkan Romefo 8:38, 39.