1-2. Pentecost afe 33 H.B. no, ebɛn anwanwadze na osii?

NNA ɔyɛ Kwesida anapa wɔ Jerusalem. Nna ɔyɛ Pentecost da no wɔ afe 33 H.B. Jesus n’esuafo bɛyɛ 120 hyiaa mu wɔ abansor dan bi mu. (Andw. 1:13-15; 2:1) Nna nda kakra a woetwa mu no, Jesus akã akyerɛ hɔn dɛ mma wommfi Jerusalem nnkɔ, osiandɛ ɔbɛma hɔn akyɛdze soronko bi. (Andw. 1:4, 5) Ebɛn asɛm na osii?

² “Awerɛfir mu ara na dede a ɔtse dɛ mframa a n’ano yɛ dzen a ɔrobɔ fi sor bae.” Dede no hyɛɛ dan no a wɔtse mu no nyina mã. Afei, “ntɛkyerɛma a wɔapaapaa mu a ɔtse dɛ gya” besisii esuafo no hɔn etsifi, ‘na sunsum krɔnkrɔn hyɛɛ hɔn nyina amaama.’ (Andw. 2:2-4) Jehovah nam dɛm anwanwa kwan yi do huee no sunsum krɔnkrɔn guu dɛm esuafo no do. (Andw. 1:8) Esuafo yi na wɔbɛyɛɛ nkorɔfo a wodzi kan a wɔdze sunsum krɔnkrɔn seraa hɔn, * na wonyaa enyidado dɛ wɔnye Jesus bedzi hen wɔ sor.

3. Hɔn a wɔseraa hɔn wɔ Pentecost da no, hɔn adwen sii hɔn pi dɛ wɔdze sunsum krɔnkrɔn asera hɔn. Ebɛnadze ntsi a?

³ Esuafo a wohyiaa mu wɔ abansor dan no mu dɛm da no, sɛ eyɛ hɔn mu kor a, wo werɛ nnkefir dza osii no da. Tɛkyerɛma a ɔtse dɛ gya besii w’etsifi, na ehyɛɛ ase kãa kasa fofor! (Andw. 2: 5-12) Ekyingye biara nnyi ho dɛ w’adwen besi wo pi dɛ wɔdze sunsum krɔnkrɔn asera wo. Naaso, hɔn a wɔdze sunsum krɔnkrɔn sera hɔn no, aso hɔn nyina na wɔsera hɔn wɔ anwanwa kwan do? Aso wɔsera hɔn nyina wɔ ber kor mu wɔ hɔn asetsena mu? Oho. Yesi dɛn hu dɛm?

4. Asomafo no hɔn aber do no, Christianfo a wɔdze sunsum krɔnkrɔn seraa hɔn no, aso wɔseraa hɔn nyina wɔ ber kor mu wɔ hɔn asetsena mu? Kyerɛkyerɛ mu.

⁴ Hom mma yensusu ber a wɔdze sunsum krɔnkrɔn sera obi ho nhwɛ. Pentecost, afe 33 H.B. no, ɔnnyɛ esuafo bɛyɛ 120 no nkotsee na wɔdze sunsum krɔnkrɔn seraa hɔn. Dɛm da no mu no, esuafo afofor bɛyɛ 3,000 so nyaa sunsum krɔnkrɔn a Jesus hyɛɛ ho bɔ no. Wɔdze sunsum krɔnkrɔn seraa hɔn ber a wɔbɔɔ hɔn esu no. (Andw. 2:37, 38, 41) Naaso, mfe a odzii ekyir bae no, Christianfo a wɔseraa hɔn no, nnyɛ hɔn nyina na wɔdze sunsum krɔnkrɔn seraa hɔn ber a wɔbɔɔ hɔn esu no. Samariafo a wɔbɔɔ hɔn esu no, nnyɛ hɔ ara na wɔseraa hɔn. Ɔyɛ mber bi mu wɔ hɔn esubɔ ekyir ana wɔresera hɔn. (Andw. 8:14-17) Biribi a ɔnntaa nnsi sii wɔ Cornelius nye ne fiefo do. Wɔdze sunsum krɔnkrɔn seraa hɔn ansaana wɔrobɔ hɔn esu mpo.​—Andw. 10:44-48.

5. Dɛ mbrɛ 2 Corinthfo 1:21, 22 kã no, sɛ wɔdze sunsum krɔnkrɔn sera obi a, ebɛnadze na osi?

⁵ Sɛ Nyankopɔn dze sunsum krɔnkrɔn sera obi a, ebɛnadze na osi? Hom mma yensusu iyi so ho nhwɛ. Christianfo binom a wɔasera hɔn no, ahyɛse no obotum ayɛ dzen ama hɔn dɛ wɔbɛgye ato mu dɛ Jehovah apaw hɔn. Bi a wɔbɛkã dɛ, ‘Ebɛnadze ntsi na Nyankopɔn paaw me dɛ monkɔ sor?’ Bi a, hɔn mu binom renntse nka dɛm. Ɔmmfa ho mbrɛ ɔtse biara no, ɔsomafo Paul ma yehu dza osi ber a wɔasera obi no: “Na hom gyee dzii no, wɔdze sunsum krɔnkrɔn a wɔbɔɔ anohoba wɔ ho no a ɔyɛ hɛn kyɛfa ho nsewhyɛ no, asɔw hom ano.” * (Eph. 1:13, 14) Ntsi dza osi nye dɛ, Jehovah nam no sunsum krɔnkrɔn do ma dɛm Christianfo yi hu kofee dɛ ɔapaw hɔn dɛ wɔnkɔ sor. Dɛm kwan yi do no, sunsum krɔnkrɔn yɛ “nsewhyɛ [egyinamu  anaa bɔhyɛ]” a wɔdze ama a ɔma wonya awerɛhyɛmu dɛ daakye wɔbɛtsena ase daa wɔ sor, na nnyɛ asaase do.​—Kenkan 2 Corinthfo 1:21, 22.

6. Sɛ Christiannyi bi a wɔasera no benya no sor akatua a, ebɛnadze na ɔsɛ dɛ ɔyɛ?

⁶ Sɛ wɔsera Christiannyi bi a, ɔkyerɛ dɛ kwan biara do no obenya no sor akatua no? Oho. Mbom, n’adwen si no pi dɛ wɔapaw no dɛ ɔnkɔ sor. Naaso, ɔsɛ dɛ ɔma dɛm afotusɛm yi tsena n’adwen mu: “Enuanom, hom mbɔ mbɔdzen mma hom frɛ nye hom pa nsi pi: na sɛ hom yɛ yinom a, hom rimmfintsiw da.” (2 Pet. 1:10) Ntsi, Christiannyi a wɔasera no no, ɔwɔ mu dɛ wɔapaw no dɛ ɔnkɔ sor dze, naaso sɛ obenya dɛm akatua yi a, gyedɛ odzi nokwar kesi ase.​—Phil. 3:12-14; Heb. 3:1; Nyi. 2:10.

7. Ebɛn kwan do na hɔn a wɔasera hɔn no hu dɛ wɔapaw hɔn dɛ wɔnkɔ sor?

⁷ Sɛ wɔapaw obi dɛ ɔnkɔ sor a, obesi dɛn ehu? Yehu mbuae no kofee wɔ asɛm a Paul kyerɛwee kɛmaa hɔn a wɔwɔ Rome a nna wɔyɛ “ahotsewfo a wɔafrɛ hɔn” no mu. Ɔkãa kyerɛɛ hɔn dɛ: “Na hom ennya nkowaayɛ sunsum a hom dze bosuro bio, na hom enya abayɛ sunsum a yɛnam do tsẽa mu dɛ, Abba, Egya. Na sunsum nankasa nye hɛn sunsum dzi dase dɛ yɛyɛ Nyankopɔn mba.” (Rom. 1:7; 8:15, 16) Ntsi, Nyankopɔn nam no sunsum krɔnkrɔn do ma hɔn a wɔasera hɔn no hu kofee dɛ wɔapaw hɔn dɛ wɔnkɔ sor.​—1 Thess. 2:12.

8. Ebɛn kwan do na 1 John 2:20, 27 no ma yehu dɛ Christianfo a wɔasera hɔn no, wonnhia obi ma ɔaakã akyerɛ hɔn dɛ wɔasera hɔn?

⁸ Hɔn a Jehovah apaw hɔn dɛ wɔnkɔ sor no, wonnhia obi fofor ma ɔaakã akyerɛ hɔn dɛ wɔdze sunsum krɔnkrɔn asera hɔn. (Kenkan 1 John 2:20, 27.) Nokwasɛm nye dɛ, dɛ mbrɛ Jehovah nam asafo no do kyerɛkyerɛ obiara no, dɛmara so na ɔkyerɛkyerɛ Christianfo a wɔasera hɔn no. Naaso, wonnhia obi ma ɔaakã akyerɛ hɔn dɛ wɔasera hɔn. Jehovah nam no sunsum krɔnkrɔn a ɔyɛ tum a ɔkyɛn tum biara wɔ amansan yi mu no do ma wohu kofee dɛ wɔasera hɔn!

9. Dɛ mbrɛ wɔakã wɔ Ephesusfo 1:18 no, sɛ wɔsera obi a, ebɛn nsesa na dɛm nyimpa no hu?

⁹ Sɛ Nyankopɔn sera obi a, mbrɛ dɛm nyimpa no si tse nka no, obotum ayɛ dzen ama Nyankopɔn n’asomfo dodowara a wɔwɔ hɔ ndɛ, dɛ wɔbɛtse ase. Ebɛnadze ntsi a? Osiandɛ hɔndze, wɔnnseraa hɔn. Nyankopɔn bɔɔ nyimpa dɛ wɔntsena asaase do daa, na nnyɛ sor. (Gen. 1:28; Ndw. 37:29) Naaso, Jehovah apaw nyimpa binom dɛ wɔnkɔ sor. Ntsi, sɛ Nyankopɔn sera hɔn a, enyidado a wɔwɔ nye mbrɛ wosi dwen ndzɛmba ho no, ɔsesa no koraa mbrɛ ɔbɛyɛ a wɔdze hɔn adwen besi asetsena a wobenya wɔ sor no do.​—Kenkan Ephesusfo 1:18.

10. Sɛ wɔkã dɛ ‘wɔawo obi fofor’ a, ɔkyerɛ dɛn? (Hwɛ ase hɔ asɛm no so.)

¹⁰ Sɛ wɔdze sunsum krɔnkrɔn sera Christianfo a, nna ‘wɔawo hɔn fofor’ anaa ‘woefi sor awo hɔn.’ * Afei so, Jesus ama yeehu dɛ, sɛ ‘wɔwo obi fofor’ anaa ‘wofi sunsum mu wo obi’ a, mbrɛ dɛm nyimpa no tse nka no, ɔyɛ dzen dɛ obotum akyerɛkyerɛ mu akyerɛ obi a wɔnnseraa no ma wɔaatse ase yie.​—John 3:3-8; ase hɔ asɛm.

11. Sɛ wɔsera obi a, ebɛn nsesa na ɔkɔ do wɔ mbrɛ osi dwen ndzɛmba ho no mu? Kyerɛkyerɛ mu.

¹¹ Sɛ wɔsera Christianfo a, ebɛn nsesa na ɔkɔ do wɔ mbrɛ wosi dwen ndzɛmba ho no mu? Ansaana Jehovah resera dɛm Christianfo yi no, nna hɔn enyidado nye dɛ wɔbɛtsena ase daa wɔ asaase do. Nna dɛm enyidado yi som bo ma hɔn. Nna wɔhwɛ kwan dzendzenndzen dɛ ber bi bɛba a Jehovah beyi ndzebɔnyɛ nyina efi hɔ  na ɔaadan asaase paradise. Bi a, wotwaa ho mfonyin wɔ hɔn adwen mu dɛ wɔrema hɔn busuanyi anaa hɔn nyɛnko bi a oewu akɔaba aba nkwa mu bio. Naaso, wɔseraa hɔn ekyir no, wɔhyɛɛ ase dween ndzɛmba ho wɔ kwan soronko do. Ebɛnadze ntsi a? Nnyɛ dɛ wonyaa adwen bi dɛ asaase do a wɔbɛtsena daa no nnyɛ mma hɔn bio. Bio so, nnyɛ awerɛhow na amandze a woruhu wɔ asaase do no na ɔmaa wonyaa adwensakyer. Afei so, nnyɛ dɛ mpofirmu ara na wonyaa adwen bi dɛ, asaase do a wɔbɛtsena daa no bɛyɛ mfon ama hɔn. Mbom, mbrɛ nna wosi dwen ndzɛmba ho nye enyidado a wɔwɔ a nna wonndzi ho agor no, Jehovah nam no sunsum krɔnkrɔn do sesaa no.

12. Dɛ mbrɛ 1 Peter 1:3, 4 kyerɛ no, Christianfo a wɔasera hɔn no tse nka dɛn wɔ enyidado a wɔwɔ no ho?

¹² Sɛ wɔsera obi a, bi a ɔbɛtse nka dɛ ɔmmfata dɛ wɔdze ho kwan a ɔtse dɛm ama no. Naaso, n’adwen nnyɛ no ebien ebien dɛ Jehovah asera no. Sɛ ɔdwendwen enyidado a ɔwɔ dɛ ɔbɔkɔ sor no ho a, n’enyi gye na onya enyisɔ kɛsenara.​—Kenkan 1 Peter 1:3, 4.

13. Christianfo a wɔasera hɔn no tse nka dɛn wɔ asetsena a wɔwɔ mu wɔ asaase do no ho?

¹³ Ntsi, iyi kyerɛ dɛ Christianfo a wɔasera hɔn no pɛ dɛ wowu anaa? Ɔsomafo Paul ma yenya asɛmbisa yi ho mbuae. Ɔdze Christianfo a wɔasera hɔn no hɔn nyimpadua totoo ntamadan ho. Ɔkãa dɛ: “Na hɛn a yɛtsetse ntamadan yi mu, yesi nkrum na ɔhyɛ hɛn do: nnyɛ dɛ yɛpɛ dɛ wɔpa hɛn ho tam bi a, na mbom dɛ yɛbɛhyɛ egu do a, ama nkwa aamen dza owu.” (2 Cor. 5:4) Nnyɛ dɛ asetsena afon dɛm Christianfo yi ma ntsi wɔpɛ dɛ wowu. Mbom, hɔn enyi gye wɔ asetsena mu, na wɔpɛ dɛ da biara wɔnye hɔn ebusuafo nye hɔn anyɛnkofo som Jehovah. Naaso, ɔmmfa ho dza wɔreyɛ biara no, wɔma daakye ho enyidado soronko a wɔwɔ no tsena hɔn adwen mu daa.​—1 Cor. 15:53; 2 Pet. 1:4; 1 John 3:2, 3; Nyi. 20:6.

14. Ebɛnadze na ɔnnkyerɛ dɛ wɔdze sunsum krɔnkrɔn asera obi?

¹⁴ Bi a, erodwen ho dɛ wɔdze sunsum krɔnkrɔn asera wo anaa. Sɛ ɔyɛ wo dɛ wɔdze sunsum krɔnkrɔn asera wo a, ɔnodze susu nsɛmbisa a no ho hia yi ho: Ana meyɛ obi a mowɔ ɔpɛ a no mu yɛ dzen dɛ mebɛyɛ Jehovah n’apɛdze? Ana metse nka dɛ meyer moho dzendzenndzen yɛ asɛnka edwuma no? Ana meyɛ obi a medze nsi sũa Nyankopɔn n’Asɛm nye “Nyankopɔn adze a no mu dɔ” no? (1 Cor. 2:10) Ana meyɛ obi a muhu dɛ Jehovah ama m’asɛnka edwuma asow aba kɛse? Ana meyɛ obi a metse nka dɛ mowɔ asodzi kɛse dɛ moboa afofor ma wosũa Jehovah ho adze? Ana meyɛ obi a mehu biribi a ɔkyerɛ dɛ Jehovah roboa me wɔ akwan pɔtsee bi do wɔ m’asetsena mu? Sɛ iyi dɛm nsɛmbisa yi ano dɛ nyew a, ɔkyerɛ dɛ Nyankopɔn afrɛ wo dɛ kɔ sor a? Oho, ɔnnkyerɛ dɛm. Ebɛnadze ntsi a? Osiandɛ, Nyankopɔn n’asomfo a wɔasera hɔn nye hɔn a wɔnnseraa hɔn no, hɔn nyina botum atse nka dɛm. Jehovah nam no sunsum krɔnkrɔn do botum aboa n’asomfo mu biara ma ɔaayɛ dɛm ndzɛmba yi, dɛ wɔasera no anaa wɔnnseraa no. Nokwasɛm nye dɛ, sɛ w’adwen yɛ wo ebien ebien dɛ wɔdze sunsum krɔnkrɔn asera wo anaa wɔmmfae nnseraa wo a, dɛm adwen mu naayɛ no kyerɛ dɛ wɔnnseraa wo. Hɔn a Jehovah afrɛ hɔn no, hɔn adwen nnyɛ hɔn ebien ebien dɛ wɔasera hɔn anaa wɔnnseraa hɔn! Wonyim kofee dɛ wɔasera hɔn!

15. Hɔn a woenya Nyankopɔn no sunsum krɔnkrɔn no, nnyɛ hɔn nyina na wɔapaw hɔn dɛ wɔnkɔ sor. Yesi dɛn hu dɛm?

¹⁵ Sɛ yɛhwɛ Bible no mu a, yebohu nyimpa a wɔwɔ gyedzi a wonyaa sunsum krɔnkrɔn. Naaso, nna wonnyi enyidado dɛ wɔbɔkɔ sor. Sunsum krɔnkrɔn kyerɛɛ David kwan. (1 Sam. 16:13) Sunsum krɔnkrɔn boaa no ma ɔtsee  Jehovah ho adze a no mu dɔ no ase, na ɔmaa ɔkyerɛɛw Bible ne fã bi so. (Mark 12:36) Ɔno mpo no, ɔsomafo Peter kãa dɛ David ‘ammfow annkɔ sor.’ (Andw. 2:34) John Onumanyi so, nna ‘sunsum krɔnkrɔn ahyɛ no mã.’ (Luke 1:13-16) Jesus kãa dɛ nyimpa biara nnyi asaase do a ɔyɛ kɛse kyɛn John, naaso ɔkãa dɛ John nnka ɔsor Ahendzi no ho. (Matt. 11:10, 11) Jehovah nam no sunsum krɔnkrɔn do maa dɛm mbarimba yi tum ma wɔyɛɛ anwanwadze, naaso ɔammfa dɛm sunsum no ammpaw hɔn dɛ wɔnkɛtsena sor. Aso iyi kyerɛ dɛ nna wɔnnyɛ anokwafo tse dɛ hɔn a wɔapaw hɔn dɛ wonkedzi hen wo sor no? Oho. Dza ɔkyerɛ ara nye dɛ Jehovah bɛsan dze hɔn aba nkwa mu ma wɔaabɛtsena Paradise wɔ asaase do.​—John 5:28, 29; Andw. 24:15.

16. Nyankopɔn n’asomfo a wɔwɔ hɔ ndɛ no, ebɛn akatua na hɔn mu fã kɛsenara hwɛ kwan dɛ wobenya?

¹⁶ Nyankopɔn n’asomfo a wɔwɔ hɔ ndɛ no, hɔn mu fã kɛsenara nnyi enyidado dɛ wɔbɔkɔ akɛtsena sor. Tse dɛ Abraham, Sarah, David, John Onumanyi, nye mbarimba na mbaa afofor pii a Bible kã hɔnho asɛm no, wɔhwɛ kwan dɛ wɔbɛtsena asaase do ma Nyankopɔn n’Ahendzi eedzi hɔn do tum.​—Heb. 11:10.

17. Ebɛn nsɛmbisa na yebenya ho mbuae wɔ adzesua a odzi hɔ no mu?

¹⁷ Christianfo a wɔasera hɔn no, binom da ho ara ka Nyankopɔn n’asomfo a wɔwɔ hɔ ndɛ no ho. Dɛm ntsi, bi a yebebisa hɛnho nsɛm bi. (Nyi. 12:17) Dɛ nhwɛdo no, hɔn a wɔasera hɔn no, ɔsɛ dɛ wobu hɔnho dɛn? Sɛ obi wɔ w’asafo mu na ɔhyɛ ase dzi paanoo no na ɔnom wenyin no bi wɔ Nkaadzi no ase a, ebɛn adwen na ɔsɛ dɛ inya wɔ no ho? Hɔn a wɔkã dɛ wɔasera hɔn no, sɛ hɔn dodow da ho ara rokɔ enyim ɛ? Aso ɔsɛ dɛ ema iyi ho asɛm haw wo? Yebenya nsɛmbisa yi ho mbuae wɔ adzesua a odzi hɔ no mu.