1-3. Ebɛn nsɛndzendzen na obotum ama Jehovah n’asomfo eesu?

 ANA ekaa aber bi a isui? Ɔtɔ da a, hɛn enyi gye araa ma yesu. Naaso dza ɔma yɛtaa su nye awerɛhosɛm a ɔyɛ a ɔto hɛn no. Dɛ nhwɛdo no, sɛ hɛn dɔfo bi wu a, yesu. Lorilei yɛ hɛn akyerɛbaa bi a ɔwɔ United States. Aber a ne babaa wui no, ɔkãa dɛ: “Ɔtɔ da a, me babaa no wu no ma midzi awerɛhow paa. Ɔyɛ a metse nka dɛ biribiara nnyi hɔ a obotum akyekye mo werɛ. Mber a ɔtse dɛm mu no, ɔyɛ a metse nka dɛ m’awerɛhow no tun runntwa da.” *

² Ndzɛmba afofor bi so botum ama yeesu. Hiromi yɛ hɛn akyerɛbaa kwampaaefo bi a ɔwɔ Japan. Ɔno so kãa dɛ: “Ɔtɔ da a, midzi awerɛhow. Siantsir no nye dɛ, nkorɔfo a mihyia hɔn wɔ asɛnka mu no enyi nngye Bible no ho. Ɔtɔ da a, medze nyinsu bɔ Jehovah mpaa dɛ ɔmboa me ma minnya obi a ɔrohwehwɛ nokwar no.”

³ Ana ɔtɔ da a etse nka tse dɛ hɛn nuanom a yɛakã hɔnho asɛm no? Hɛn mu pii tse nka dɛm. (1 Pet. 5:9) Yɛpɛ dɛ yɛdze ‘enyigye som Jehovah.’ Naaso, osian ndzɛmba bi a ɔma yedzi awerɛhow, obu hɛn abaw mu anaa ɔsɔ hɛn nokwardzi ma Nyankopɔn hwɛ ntsi, obotum aba dɛ yɛdze nyinsuwa bɔsom Jehovah. (Ndw. 6:6; 100:2) Sɛ awerɛhow a ɔtse dɛm hyɛ hɛn do a, yebesi dɛn egyina ano?

4. Ebɛnadze na yebosusu ho wɔ adzesua yi mu?

⁴ Ebɛnadze na yebotum esũa efi Jesus hɔ? Ɔtɔfabi a, nna nsɛm hyɛ no do araa ma ‘osu.’ (John 11:35; Luke 19:41; 22:44; Heb. 5:7) Hom mma yensusu no mu bi ho nhwɛ. Aber a  yɛreyɛ dɛm no, yebohu dza yebotum esũa afa Jesus nye n’Egya Jehovah ho. Afei so, yɛbɔhwɛ dza yebotum ayɛ ber a yehyia tsebea ahorow bi a ɔma yesu no.

5. Ebɛnadze na asɛm a ɔwɔ John 11:32-36 no ma yehu fa Jesus ho?

⁵ Jesus ne nyɛnko pa Lazarus yaree na owui. Nna ɔyɛ awɔwber wɔ afe 32 H.B. (John 11:3, 14) Nna Lazarus wɔ nkyerɛbaa beenu. Hɔn nye Mary na Martha. Nna Jesus dɔ dɛm ebusua yi papaapa. Nna hɔn nuabanyin no wu no ama woridzi awerɛhow kɛse. Lazarus no wu ekyir no, Jesus kɔr Bethany, beebi a nna Mary na Martha wɔ no. Aber a Martha tsee dɛ Jesus reba no, ɔdze mbirika kehyiaa no kwan. Ɔwodze hwɛ awerɛhow ara a nna ahyɛ no do ber a ɔkãa dɛ: “Ewuradze, sɛ ewɔ ha a, nkyɛ mo nuabanyin [no] ennwu.” (John 11:21) Ɔno ekyir ber tsiabaa bi no, Jesus hun Mary nye binom dɛ worusu, na ɔno so “sui.”​—Kenkan John 11:32-36.

6. Ebɛnadze ntsi na Lazarus wui no Jesus sui?

⁶ Ebɛnadze ntsi na Lazarus wui no Jesus sui? Insight on the Scriptures nwoma no dze mbuae no ma dɛ: “Nna Lazarus yɛ Jesus ne nyɛnko. Ntsi no wu nye awerɛhow a nna ne nkyerɛbaa no ridzi no maa Jesus ‘sii nkrum na osui.’” * Obotum aba dɛ nna Jesus rodwendwen yaw a yarba no maa ne nyɛnko pa Lazarus faa mu ana oruwu no ho. Afei so, obotum aba dɛ Jesus twaa mbrɛ nna Lazarus tse nka aber a orubowu no ho mfonyin wɔ n’adwen mu. Jesus hun mbrɛ Lazarus no wu no esi aka Mary nye Martha na iyi maa osui. Sɛ woara so, wo nyɛnko anaa wo busuanyi bi ewu a, ɔda edzi dɛ erefa yaw a ɔtse dɛm mu. Ma yɛnhwɛ ndzɛmba ebiasa a yebotum esũa efi dza osii yi mu.

7. Ebɛnadze na su a Jesus sui no ma yehu fa Jehovah ho?

⁷ Jehovah nyim mbrɛ isi tse nka. Jesus yɛ n’Egya Jehovah “no subea saso,” kyerɛ dɛ, ɔda n’Egya no suban edzi pɛpɛɛpɛ.  (Heb. 1:3) Osu a Jesus sui no ma yehu mbrɛ Jehovah tse nka ber a hɛn dɔfo bi ewu no. (John 14:9) Sɛ ewɔ tsebea a ɔtse dɛm mu a, nya awerɛhyɛmu dɛ Jehovah hu awerɛhow a iridzi no. Afei so ɔtse nka ma wo. Ɔpɛ dɛ ɔkyekye wo werɛ.​—Ndw. 34:18; 147:3.

8. Ebɛnadze ntsi na yebotum agye edzi dɛ Jesus benyan hɛn adɔfo a woewuwu no?

⁸ Jesus wɔ ɔpɛ dɛ obenyan w’adɔfo a woewuwu no. Ber tsiabaa bi ana Jesus rusu no, ɔkaa Martha n’akoma too ne yamu dɛ: “Wo nuabanyin [no] bɔsoɛr bio.” (John 11:23-27) Nna Martha yɛ Jehovah no somfo nokwafo. Ntsi, ɔnyɛ dɛn ara a nna onyim dɛ mfehaha pii a etwa mu no, nkɔnhyɛnyi Elijah nye nkɔnhyɛnyi Elisha nyaan nyimpa bi a nna woewuwu. (1 Ahe. 17:17-24; 2 Ahe. 4:32-37) Nkyii so obotum aba dɛ nna ɔatse dɛ nyimpa binom ewuwu ma Jesus enyan hɔn. (Luke 7:11-15; 8:41, 42, 49-56) Woara so botum enya awerɛhyɛmu dɛ ibohu w’adɔfo a woewuwu no bio. Jesus sui ber a nna ɔrekyekye n’anyɛnkofo a woridzi awerɛhow no hɔn werɛ no. Dza yesũa fi mu nye dɛ ɔwɔ ɔpɛ a no mu yɛ dzen dɛ obenyan ewufo!

9. Yebesi dɛn aboa hɔn a woridzi awerɛhow no dɛ mbrɛ Jesus yɛe no? Ma ho nhwɛdo.

⁹ Ibotum aboa hɔn a woridzi awerɛhow no. Jesus nye Martha na Mary ammbɔ mu ennsu kɛkɛ, mbom otsiee hɔn na ɔkyekyee hɔn werɛ so. Hɛn so, yebotum nye hɔn a woridzi awerɛhow no esu, yeetsie hɔn na yaakyekye hɔn werɛ. Dan yɛ asafo mu panyin bi a ɔwɔ Australia. Ɔkãa dɛ: “Aber a me yer wui no, nna mihia awerɛkyekyer. Aber biara nna enuanom binom nye hɔn yernom ba me nkyɛn nye me bɔbɔ nkɔmbɔ, na sɛ nna merekasa a wɔyɛ aso tsie me. Sɛ nna musu anaa mekã awerɛhow a miridzi no ho asɛm kyerɛ hɔn a, ɔnnhaw hɔn. Nna wɔyɛ ndzɛmba ahorow bi dze boa me. Sɛ nna ɔba no dɛ menntum annhohor me kaar ho, mennkedzi gua na mannyɛ edziban a, nna wɔyɛ dɛm ndzɛmba yi boa me. Nkyii so nna wɔnye me bɔ mu bɔɔ mpaa. Wɔkyerɛɛ dɛ wɔyɛ anyɛnkofo mapa nye enuanom a ‘wɔwoo hɔn maa abɛbrɛsɛ ber.’”​—Mbɛ. 17:17.

10. Ebɛn asɛm na wɔayɛ ho kyerɛwtohɔ wɔ Luke 19:36-40?

¹⁰ Jesus kɔr Jerusalem wɔ Nisan 9, 33 H.B. Aber a ɔhɛɛn kurow no mu no, nyimpadɔm bi behyiaa no, na hɔn mu binom dze hɔn ntar sesɛɛw kwan mu na wɔgyee no too mu dɛ hɔn Hen. Nna iyi yɛ enyigye da ankasa. (Kenkan Luke 19:36-40.) Dza osii wɔ iyi ekyir no, obotum aba dɛ nna n’esuafo no nnhwɛ kwan. Aber a ‘Jesus bɛnee no, ɔhwɛɛ kurow no na osui wɔ do.’ Jesus dze nyinsuwa kãa ɔhaw a nna ɔrennkyɛr ɔbɔto hɔn a wɔwɔ Jerusalem no ho asɛm.​—Luke 19:41-44.

11. Ebɛnadze ntsi na Jesus sui maa Jerusalemfo no?

¹¹ Nna Jesus no werɛ ahow osiandɛ nna onyim dɛ ɔmmfa ho dɛ Jewfo no dze enyigye rihyia no kwan no, nna hɔn mu dodowara rinntsie Ahendzi ho asɛmpa no. Iyi ntsi, nna wɔbɛsɛɛ Jerusalem kurow no. Afei so nna hɔn a wobenya hɔn tsir edzidzi mu no, wɔbɛfa hɔn ndɔmmum. (Luke 21:20-24) Awerɛhosɛm nye dɛ, nyimpa pii poow Jesus dɛ mbrɛ nna oedzi kan akã no. Beebi a ewɔ no, nkorɔfo yɛ hɔn adze dɛn wɔ Ahendzi ho asɛmpa no ho? Sɛ nyimpa pii nntsie asɛmpa no a, ebɛnadze na ibotum esũa efi osu a Jesus sui no mu? Ma yɛnhwɛ esuadze afofor ebiasa a yebotum enya efi mu.

12. Ebɛnadze na osu a Jesus sui maa afofor no ma yehu fa Jehovah?

 ¹² Jehovah dwen nyimpa ho. Su a Jesus sui no ma yehu mbrɛ Jehovah si dwen nyimpa ho. Kyerɛwnsɛm no kã dɛ: “Ɔmmpɛ dɛ obiara bɛhera, na mbom ɔpɛ dɛ hɔn nyina bɛba mfehoekyir mu.” (2 Pet. 3:9) Ndɛ so, yɛyɛ dza yebotum biara dɛ yɛbɛkã asɛmpa no ma wɔaaka afofor hɔn akoma. Yɛyɛ dɛm dze kyerɛ dɛ yɛdɔ hɔn.​—Matt. 22:39. *

13-14. Ebɛn kwan do na Jesus daa no edzi dɛ ɔwɔ ayamuhyehye ma afofor? Na yebesi dɛn esũasua dɛm su no?

¹³ Jesus yeer noho wɔ asɛnka edwuma no mu. Ɔdze ho kwan a onyae biara kyerɛkyerɛɛ afofor dze kyerɛɛ dɛ ɔdɔ hɔn. (Luke 19:47, 48) Ebɛnadze na ɔmaa ɔyɛɛ dɛm? Jesus ne yamu hyehyee no maa hɔn. Ɔtɔ da a, nna nyimpa pii pɛ dɛ wotsie Jesus ne nkyerɛkyerɛ ma ntsi nna ɔnye n’esuafo no ‘nnya mber mpo nndzidzi.’ (Mark 3:20) Afei so ber bi a ɔbarimba bi kɔr Jesus hɔ anafua no, Jesus nyaa ber maa no. (John 3:1, 2) Nyimpa a ahyɛse no Jesus kãa asɛm no kyerɛɛ hɔn no, hɔn mu pii ammbɛyɛ n’esuafo. Naaso Jesus dzii hɔn a wotsiee no no nyinara dase. Ndɛ so, yɛpɛ dɛ obiara nya ho kwan tse Ahendzi ho asɛmpa no. (Andw. 10:42) Sɛ iyi bɛyɛ yie a, otwar dɛ yɛyɛ nsesa wɔ kwan a yɛfa do kã asɛmpa no mu.

¹⁴ Fi wo pɛ mu yɛ nsesa. Sɛ yɛannyɛ nsesa wɔ ber a yɛdze kã asɛmpa no mu a, bi a nyimpa a wɔpɛ dɛ wotsie no, hɛn nsa rennka hɔn. Akyerɛbaa kwampaaefo bi a wɔfrɛ no Matilda kãa dɛ: “Ɔyɛ a menye mo kun yɛ nsesa wɔ ber a yɛdze kɔ asɛnka no mu. Mbea a ndwuma wɔ no, yɛkɔ hɔ anapa tutuutu. Sɛ odu ewiaber a nyimpa wɔ kurow mu a, yɛyɛ bagua mu adasedzi. Odu ewimbir so a, yɛto nkorɔfo wɔ fie nye hɔn bɔ nkɔmbɔ.” Nnyɛ aber a oye ma hɛn nkotsee na ɔwɔ dɛ yɛkɔ asɛnka, mbom ɔwɔ dɛ yefi hɛn pɛ mu yɛ nsesa wɔ ber a yɛdze kɔ asɛnka no mu mbrɛ ɔbɛyɛ a yebenya nyimpa pii akã asɛm no akyerɛ hɔn. Sɛ yɛyɛ dɛm a, yebotum enya awerɛhyɛmu dɛ Jehovah n’enyi bɔsɔ hɛn mbɔdzembɔ no.

15. Dɛ mbrɛ Luke 22:39-44 ma yehu no, anafua a aka kakra ma Jesus ewu no, ebɛn asɛm sii?

¹⁵ Nisan 14, 33 H.B. anafua no, Jesus kɔr Gethsemane ture no mu. Ɔkɔr hɔ no, ofii n’akoma mu bɔɔ Jehovah mpaa. (Kenkan Luke 22:39-44.) Ɔyɛ ber a nna no mu yɛ dzen mu yi na Jesus dze “nkekamu a ɔyɛ dzen nye nyinsu yɛɛ asɔr” wɔ Nyankopɔn enyim. (Heb. 5:7) Dɛm anafua no a nna aka kakra ma Jesus ewu no, ebɛnadze na ɔbɔɔ ho mpaa? Ɔbɔɔ Jehovah mpaa dɛ ɔnhyɛ no dzen ma ɔnkɔ do ndzi no nokwar na ɔnyɛ n’apɛdze. Aber a Jesus fii n’akoma mu bɔɔ Jehovah mpaa no, otsiee no, na ɔsomaa ɔbɔfo bi ma ɔbɛhyɛɛ no dzen.

16. Aber a nna Jesus robɔ mpaa wɔ Gethsemane ture no mu no, nna ebɛnadze ho asɛm na ɔhaw no?

¹⁶ Ɔda edzi dɛ aber a nna Jesus robɔ mpaa wɔ Gethsemane ture no mu no osui. Ebɛnadze ntsi a? Osiandɛ nna ɔhaw no dɛ nkorɔfo bobu no dɛ ommbu Jehovah ne dzin. Afei so nna onyim dɛ ɔwɔ dɛ ɔkɔ do dzi nokwar na ɔtsew n’Egya ne dzin ho; nna iyi ho hia no papaapa. Sɛ woara so rihyia tsebea a no mu yɛ dzen a ɔma ɔyɛ dzen ma wo dɛ ibedzi Jehovah nokwar a, ebɛnadze na ibotum esũa efi osu a Jesus sui no mu? Ma yɛnsan nsusu esuadze ebiasa ho.

17. Jehovah tsiee mpaa a Jesus fii n’akoma mu bɔe no. Ebɛnadze na iyi ma yehu fa Jehovah ho?

¹⁷ Jehovah tsie wo mpaabɔ. Jehovah tsiee mpaa a Jesus fii n’akoma mu bɔe no. Ebɛnadze ntsi na otsiee no? Osiandɛ, dza nna ohia Jesus ara nye dɛ ɔbɔkɔ do edzi nokwar ama n’Egya, na ɔaatsew ne dzin ho. Hɛn so, sɛ yɛma nokwar a yɛbɔkɔ do edzi ama Jehovah nye ne dzin a yɛbɛtsew ho no ho hia hɛn a, obetsie hɛn mpaabɔ.​—Ndw. 145:18, 19.

18. Ebɛnadze ntsi na yebotum akã dɛ Jesus yɛ nyɛnko a ɔtse hɛn ase?

¹⁸ Jesus nyim mbrɛ isi tse nka. Sɛ dadwen hyɛ hɛn do na yɛwɔ nyɛnko a ɔtse hɛn ase na obotum akyekye hɛn werɛ a, ɔma hɛn enyi gye paa. Na sɛ nyimpa no ehyia tsebea a yerihyia no bi pɛn a, ɔboa paa. Jesus tse dɛ dɛm nyɛnko no. Sɛ yɛyɛ mberɛw na yehia mboa a, ɔtse hɛn ase. Onyim hɛn mberɛwyɛ, na ɔbɔhwɛ  ehu dɛ hɛn nsa bɛka mboa a yehia no wɔ ‘ber a ɔsɛ mu.’ (Heb. 4:15, 16) Jesus gyee mboa a ɔbɔfo bi dze maa no wɔ Gethsemane ture no mu no too mu, dɛmara na hɛn so ɔwɔ dɛ yɛgye mboa a Jehovah dze ma hɛn no to mu. Mboa no bi botum efi hɛn nwoma, video anaa ɔkasa mu. Dɛmara na asafo mu panyin bi anaa onua bi a noho akokwaa botum abɛsera hɛn ahyɛ hɛn nkuran.

19. Sɛ irihyia tsebea a ɔma ɔyɛ dzen ma wo dɛ ibedzi Nyankopɔn nokwar a, ebɛnadze na obotum ahyɛ wo dzen? Ma ho nhwɛdo.

¹⁹ Jehovah bɛma enya “Nyankopɔn asomdwee.” Jehovah besi dɛn ahyɛ hɛn dzen? Sɛ yɛbɔ mpaa a, yebenya “Nyankopɔn asomdwee a ɔtra ntseasee nyina no.” (Phil. 4:6, 7) Jehovah n’asomdwee no ma hɛn akoma tɔ hɛn yamu na yenya adwen pa. Akyerɛbaa bi a wɔfrɛ no Luz hun dɛ dɛm asɛm yi yɛ nokwar. Ɔkãa dɛ: “Ɔyɛ a metse nka dɛ mayɛ ankonam. Iyi ntsi ɔtɔ da a, metse nka dɛ Jehovah nndɔ me. Ɔba no dɛm a, ntsɛmara mobɔ Jehovah mpaa na mekã mbrɛ misi tse nka no ho asɛm kyerɛ no. Sɛ mobɔ mpaa a, ɔboa me ma m’asomu dwe me.” Akyerɛbaa no n’asɛm no ma yehu dɛ, sɛ yɛbɔ mpaa a, ɔma yenya asomdwee.

20. Ebɛnadze na yeesũa efi osu a Jesus sui no mu?

²⁰ Hwɛ awerɛkyekyensɛm nye esuadze ara a yeenya efi osu a Jesus sui no mu! Yeebohu dɛ ɔwɔ dɛ yɛboa hɛn anyɛnkofo a woridzi awerɛhow no, na yenya awerɛhyɛmu dɛ sɛ hɛn dɔfo bi wu a, Jehovah na Jesus bɔboa hɛn. Wɔhyɛ hɛn nkuran dɛ yɛmfa ayamuhyehye nyɛ asɛnka nye ɔkyerɛkyerɛ edwuma no, osiandɛ Jehovah Nyankopɔn na Jesus Christ nyina da su a ɔtse dɛm edzi. Afei so yenyim dɛ Jehovah na no Dɔba no nyim mbrɛ yesi tse nka, wɔtse hɛn mberɛwyɛ ase na wɔpɛ dɛ wɔboa hɛn ma yetum gyina tsebea biara a yerihyia no ano. Hom mma yɛnkɔ do mfa dza yeesũa yi mbɔ hɛn bra kesi dɛ Jehovah bɛma n’anohoba a ɔka akoma yi aba mu. Jehovah abɔ anohoba dɛ “ɔbɛpepa [hɛn] enyiwa mu nyinsuwa nyina”!​—Nyi. 21:4.