1. Ebɛn ndzɛmba na yebotum ayɛ ama yɛnye Jehovah ntamu ebusuabɔ no aayɛ dzen?

 HƐN enyi gye ho dɛ yɛbɛgye mber nye hɛn adɔfo abɔ. Sɛ awarfo nya mber ma hɔnho a hɔn enyi gye paa. Mbabun so enyi gye ho dɛ wɔnye hɔn anyɛnkofo bɔbɔ. Na dɛ Christianfo no, sɛ yɛgye mber nye hɛnho bɔ a, hɛn enyi gye. Naaso, dza ɔkyɛn ne nyina no, sɛ yɛgye mber yɛ ndzɛmba a ɔbɛma yɛnye Nyankopɔn ntamu ebusuabɔ no ayɛ dzen a, ɔma hɛn enyi gye mbordo. Ndzɛmba a yɛyɛ a ɔma yɛnye Nyankopɔn ntamu ebusuabɔ no mu yɛ dzen nye mpaabɔ, Bible akenkan nye Nyankopɔn n’anohoba nye no su ahorow a ɔyɛ ahomka a yɛbɔdwendwen ho. Sɛ yɛyɛ dɛm a yebenya mfaso pii!​—Ndw. 139:17.

2. Ebɛnadze ntsi na ɔtɔ da a obotum ayɛ dzen dɛ yɛbɛyɛ ndzɛmba a ɔbɔtwe hɛn abɛn Jehovah?

² Sɛ yɛgye mber yɛ ndzɛmba a ɔtwe hɛn bɛn Jehovah a, hɛn enyi gye, naaso nnyɛ aber nyina na ne yɛ da famu. Ndɛ adagyer nnyi hɔ koraa, ntsi obotum ayɛ dzen ama hɛn dɛ yebeyi mber esi hɔ dze ayɛ ndzɛmba a ɔbɛma yɛabɛn Jehovah. Hɛn honam afamu edwuma, ebusua mu asodzi ahorow nye ndzɛmba afofor a no ho hia botum agye hɛn ber araa ma yaatse nka dɛ yennyi ber a yɛdze bɔbɔ mpaa, esũa adze na yaadwendwen dza yesũa no ho.

3. Ebɛn adze fofor na obotum agye hɛn ber?

³ Adze fofor bi so wɔ hɔ a obotum dze nkakrankakra agye hɛn mber. Ndzɛmba bi wɔ hɔ a mfom biara nnyi ho dɛ yɛbɛyɛ, naaso sɛ yɛannyɛ ahwɛyie a obotum agye mber a nkyɛ yebotum dze ayɛ ndzɛmba a ɔbɛma yɛabɛn Jehovah no. Hom mma  yɛmfa ndzɛmba a yɛyɛ dze gyegye hɛn enyi dɛ nhwɛdo. Hɛn nyina sɛ yɛgye mber yɛ ndzɛmba bi gyegye hɛn enyi a yenya do mfaso. Naaso ɔno mpo no, ndzɛmba a ɔtsetse dɛm no botum agye hɛn mber araa ma yerinnya mber a yɛdze bɛyɛ ndzɛmba a ɔbɔtwe hɛn abɛn Jehovah. Ɔwɔ dɛ yɛkaa dɛ ndzɛmba a ɔbɔtwe hɛn abɛn Jehovah no ho hia koraa kyɛn ndzɛmba a yɛdze gyegye hɛn enyi.​—Mbɛ. 25:27; 1 Tim. 4:8.

4. Ebɛnadze na yerubosusu ho?

⁴ Adzesua yi mu no, yɛbɔhwɛ siantsir a ɔsɛ dɛ yɛdze ndzɛmba a no ho hia dzi kan wɔ hɛn asetsena mu. Afei so, yɛbɔhwɛ mbrɛ yebesi dze hɛn mber edzi dwuma yie ber a yɛreyɛ ndzɛmba a ɔtwe hɛn bɛn Jehovah no. Nkyii so yɛbɔhwɛ mfaso a yɛyɛ dɛm a yebenya efi mu.

5. Sɛ ɔbabun bi dwendwen afotu a ɔwɔ Ephesusfo 5:15-17 no ho a, ebɛn kwan do na ɔbɔboa no ma oeesisi gyinae a nyansa wɔ mu?

⁵ Sisi gyinae a nyansa wɔ mu. Mpɛn pii no, mbabun dwendwen dza wɔdze hɔn asetsena bɛyɛ ho. Ɔyɛ a hɔn akyerɛkyerɛfo nye ebusuafo a wɔnnyɛ Adasefo hyɛ hɔn nkuran dɛ wɔnkɔ skuul nkɔ ekyir mbrɛ ɔbɛyɛ a wobenya edwuma papabi ayɛ. Nwomasua a ɔkɔ ekyir yi botum agye hɔn mber pii. Naaso, bi a hɔn awofo nye enuanom a wɔwɔ asafo no mu so bɛhyɛ hɔn nkuran dɛ wɔmfa hɔn ber nyina nsom Jehovah. Ebɛnadze na ɔbɔboa ɔbabun a ɔdɔ Jehovah no ma oeesi gyinae pa? Sɛ ɔkenkan Ephesusfo 5:15-17 na ɔdwendwen ho a, ɔbɔboa no. (Kenkan.) Sɛ ɔbabun bi kenkan dɛm kyerɛwsɛm yi wie a, obotum ebisa noho dɛ: ‘Ebɛnadze nye “dza Ewuradze pɛ” no? Ebɛn gyinae na sɛ misi a ɔbɔsɔ n’enyi? Ebɛn gyinae na misi a obotum aboa me ma medze me ber edzi dwuma yie?’ Ɔwɔ dɛ yɛkaa dɛ “nda no yɛ ndabɔn,” na ɔnnkɛkyɛr Satan no wiadze bɔn yi bɛba n’ewiei. Iyi ntsi nyansa wɔ mu dɛ yɛdze hɛn mber bedzi dwuma yie na yaayɛ ndzɛmba a ɔbɛma Jehovah n’enyi agye hɛnho.

6. Ebɛn gyinae pa na Mary sii? Nna ebɛnadze ntsi na ɔyɛ gyinae pa?

⁶ Fa ndzɛmba a no ho hia dzi kan wɔ w’asetsena mu. Ɔtɔ da a, bi a ɔwɔ dɛ yɛyɛ ndzɛmba ebien bi a mfom nnyi ho. Naaso, sɛ yebotum dze hɛn mber edzi dwuma yie a, ɔwɔ dɛ yɛyɛ dza no ho hia no. Dza osii aber a Jesus kɛseraa Mary na Martha no ma yehu dɛ asɛm yi yɛ nokwar. Ɔda edzi dɛ nna Martha n’enyi agye dɛ Jesus abɛsera hɔn, ntsi ɔgyee mber pii yɛɛ edziban. Yɛrekasa yi, nna no nua Mary dze ɔtse Jesus ne nan ho ritsie ne nkyerɛkyerɛ. Dza Martha yɛe no, nna mfom nnyi ho naaso Jesus kãa dɛ Mary dze “oeyi dza oye.” (Luke 10:38-42) Mber bi ekyir no obotum aba dɛ Mary no werɛ fiir edziban a wodzii no dɛm da no, naaso dza osũae fii Jesus hɔ no dze bi a no werɛ emmfir da. Mary n’enyi gyee mber a ɔgyee nye Jesus bɔe no ho. Dɛmara na hɛn so sɛ yɛgye mber yɛ ndzɛmba a ɔbɛma yɛatwe abɛn Jehovah a hɛn enyi bɛgye. Yebesi dɛn dze dɛm ber no edzi dwuma yie?

7. Ebɛnadze ntsi na ohia dɛ yɛgye ber bɔ mpaa, yesũa Bible no, na yɛdwendwen ho?

⁷ Ma ɔntsena w’adwen mu dɛ mpaabɔ nye Bible a yebosũa na yaadwendwen ho no ka hɛn som ho. Sɛ yɛbɔ mpaa a, nna yɛnye hɛn sor Egya a ɔdɔ hɛn papaapa no ridzi nkitaho. (Ndw. 5:7) Sɛ yesũa Bible no a, nna yɛpɛ dɛ yenya Nyankopɔn a ɔyɛ nyansa nyina Wura no “ho nyimdzee.” (Mbɛ. 2:1-5) Sɛ  yɛdwendwen dza yeesũa no ho a, ɔboa hɛn ma yehu Jehovah no su ahorow a ɔyɛ ahomka no, na ɔma yɛkaa ndzɛmba pa a ɔpɛ dɛ ɔyɛ ma adasamba nyinara no. Iyi nye kwan a oye kyɛn biara a yebotum dze hɛn ber edzi dwuma! Naaso yɛbɛyɛ dɛn dze mber kakra a yɛwɔ no edzi dwuma yie?

8. Sɛ yɛhwɛ mbrɛ Jesus dze ne ber dzii dwuma wɔ sar no do no a, ebɛnadze na yebotum esũa efi mu?

⁸ Sɛ ɔbɛyɛ yie a, hwehwɛ beebi a hɔ yɛ dzinn na kɛhyɛ hɔ. Ma yensusu dza Jesus yɛe no ho nhwɛ. Ansaana ɔrebɛhyɛ n’asaase do som edwuma no ase no, okedzii ndafua 40 wɔ sar no do. (Luke 4:1, 2) Nna sar no do yɛ bea a hɔ yɛ dzinn, ntsi nna Jesus botum abɔ Jehovah mpaa na ɔaadwendwen dza n’Egya pɛ dɛ ɔyɛ no ho. Iyi boaa Jesus ma osiesiee noho maa nsɔhwɛ a nna ɔnnkɛkyɛr obehyia no. Ebɛnadze na ibotum esũa efi Jesus no nhwɛdo yi mu? Sɛ ewɔ ebusua a no mufo dɔɔ sõ mu a, obotum ayɛ dzen ama wo dɛ ibenya beebi a hɔ yɛ dzinn wɔ fie hɔ akɛhyɛ. Sɛ ɔtse dɛm wɔ w’afamu a, ibotum epue akɔhwehwɛ beebi a hɔ yɛ dzinn. Dɛm na akyerɛbaa bi a wɔfrɛ no Julie yɛ ber a ɔpɛ dɛ ɔgye ber bɔ Jehovah mpaa no. Ɔnye no kun tse fie kakraba bi mu wɔ France. Ɔyɛ a afofor yɛ ndzɛmba bi dze twetwe n’adwen. Julie kãa dɛ: “Da biara, mukotu mpasar wɔ beebi a hɔ yɛ dzinn. Hɔ dze mankotsee, ntsi mutum dze m’adwen si dza mepɛ dɛ meyɛ no do na mifi m’akoma mu bɔ Jehovah mpaa.”

9. Nna Jesus nnyi adagyer dze, naaso ebɛnadze na ɔyɛe dze kyerɛɛ dɛ nna ɔnye Jehovah ntamu ebusuabɔ no som bo ma no?

⁹ Nna Jesus nnyi adagyer koraa wɔ n’asetsena mu. Aber a nna Jesus reyɛ no som edwuma wɔ asaase do no, nna beebiara a ɔbɔkɔ no nkorɔfo dzi n’ekyir. Nna hɔn nyinara pɛ dɛ onya mber ma hɔn. Mber bi, Jesus kɔr kurow bi mu, na kurow no mufo “nyina behyiaa mu” wɔ fie a nna ɔwɔ mu no abow ano dɛ wɔpɛ dɛ wohu no. Ne nyinara ekyir no, Jesus gyee ber yɛɛ ndzɛmba a ɔbɛhyɛ ɔnye Jehovah ntamu ebusuabɔ no mu dzen. Ansaana adze rebɛkye no, nankotsee kɛhyɛɛ beebi a hɔ yɛ dzinn na ɔbɔɔ n’Egya mpaa.​—Mark 1:32-35.

10-11. Dɛ mbrɛ Matthew 26:40, 41 ma yehu no, ebɛnadze na Jesus kyerɛɛ n’esuafo no dɛ wɔnyɛ wɔ Gethsemane ture no mu? Naaso ebɛn asɛm na osii?

¹⁰ Anafua a adze rebɛkye ma Jesus ewu no, kyerɛ dɛ, ɔdze no som edwuma no reba ewiei no, ɔsanee kɔhwehwɛɛ beebi a hɔ yɛ dzinn wɔ Gethsemane ture no mu. Ɔkɛhyɛɛ hɔ mbrɛ ɔbɛyɛ a ɔbɔdwendwen nsɛm ho na ɔaabɔ Jehovah mpaa. (Matt. 26:36) Dɛm aber no, Jesus maa n’esuafo no mpaabɔ ho esuadze tsitsir bi.

¹¹ Hom mma yensusu dza osii no ho. Wodur Gethsemane ture no mu bɛyɛ esuom. Jesus kãa kyerɛɛ n’asomafo no dɛ ‘wɔnweɔn,’ na  ogyaa hɔn hɔ kɔbɔɔ mpaa. (Matt. 26:37-39) Aber a Jesus robɔ mpaa no nna asomafo no adeda. Jesus bohun dɛ wɔadeda no, ɔkãa kyerɛɛ hɔn bio dɛ: “Hom nweɔn na hom nsɔr.” (Kenkan Matthew 26:40, 41.) Jesus hun dɛ n’esuafo no ahaw paa, na wɔaberɛ so. Jesus tsee asomafo no ase na ɔkãa dɛ “honam yɛ mberɛw.” Iyi ekyir no, Jesus sanee kɔbɔɔ mpaa mprɛnu. Ne nyina mu no, ɔbɛba no, nna esuafo no rommbɔ mpaa mbom no wɔadeda.​—Matt. 26:42-45.

12. Sɛ ɔtɔ da na yɛtse nka dɛ yɛahaw anaa yɛaberɛ ma ntsi yenntum mmbɔ mpaa a, ebɛnadze na yebotum ayɛ?

¹² Hwehwɛ mber pa. Ɔtɔ da a ebɔhwɛ no nna yɛahaw anaa yɛaberɛ paa ma ntsi yenntum mmbɔ mpaa mpo. Sɛ biribi a ɔtse dɛm ato wo pɛn a, tse ase dɛ ɔto nyimpa pii so. Ebɛnadze na ibotum ayɛ? Nyimpa binom a wɔtaa bɔ Jehovah mpaa ewimbir no ehu dɛ, sɛ wɔbɔ mpaa aber a adze nnsaa pii a ɔboa hɔn paa, osiandɛ dɛm aber no nna wɔmmberɛɛ kɛse. Afofor so ehu dɛ, sɛ wɔrobɔ mpaa na wogyina hɔ anaa wɔtsena hɔ a ɔboa hɔn paa. Naaso, sɛ etse nka dɛ adwendwen ahyɛ wo do anaa w’abaw mu ebu ma ntsi nntum mmbɔ mpaa a, ebɛnadze na ibotum ayɛ? Kã mbrɛ isi tse nka no ho asɛm kyerɛ Jehovah. Ibotum enya awerɛhyɛmu dɛ hɛn Egya a ɔwɔ mbɔbɔrhu no bɛtse wo ase.​—Ndw. 139:4.

13. Ebɛn kwan do na hɛn elɛktrɔnek mfir botum atwetwe hɛn adwen ber a yerusũa adze anaa yɛwɔ asafo nhyiamu ase no?

¹³ Sɛ irusũa adze a, mma biribiara nntwetwe w’adwen. Nnyɛ mpaabɔ nkotsee nye adze a yebotum ayɛ dze ahyɛ yɛnye Jehovah ntamu ebusuabɔ no mu dzen. Sɛ yesũa Bible no na yɛkɔ asafo nhyiamu a, ɔno so boa hɛn ma yɛtwe bɛn Nyankopɔn. Sɛ irusũa adze anaa ewɔ asafo nhyiamu ase a, ebɛnadze na ibotum ayɛ ama edze dɛm mber no eedzi dwuma yie? Bisa woho dɛ, ‘Sɛ murusũa adze anaa mowɔ asafo nhyiamu ase a, ebɛnadze na ɔtwetwe m’adwen?’ Ana inya kɔɔl, email, anaa tɛst mesegye wɔ wo fon anaa elɛktrɔnek efir fofor bi do? Ndɛ, nyimpa ɔpepepem pii na wɔwɔ mfir a ɔtsetse dɛm. Nhwehwɛmufo bi kyerɛ dɛ, sɛ obi pɛ dɛ ɔdze n’adwen si biribi a ɔreyɛ do a, fon a ɔda ne nkyɛn kɛkɛ no mpo botum atwetwe n’adwen. Ɔbemfo bi kãa dɛ ɔba no dɛm a “ɔmma mmfa w’adwen nnsi dza ereyɛ no do. Ebɔhwɛ no, nna w’adwen nenam beebi.” Sɛ yɛkɔ ɔmansin anaa ɔmantɔw ehyiadzi a,  ansaana dwumadzi no rebɛhyɛ ase no, wɔhyɛ hɛn nkuran dɛ yɛmfa hɛn elɛktrɔnek mfir nto beebi a ɔrennyɛ dede nnhaw afofor. Sɛ yerusũa adze anaa yɛreyɛ ndzɛmba a ɔbɔtwe hɛn abɛn Jehovah a, yebotum ayɛ dɛmara mbrɛ ɔbɛyɛ a hɛn mfir no ronntwetwe hɛn adwen.

14. Dɛ mbrɛ Philippifo 4:6, 7 kyerɛ no, ebɛn kwan do na Jehovah bɔboa hɛn ma yɛdze hɛn adwen eesi dza yɛreyɛ no do?

¹⁴ Serɛ Jehovah dɛ ɔmboa wo ma fa w’adwen si dza ereyɛ no do. Sɛ irusũa adze anaa ewɔ asafo nhyiamu ase na ihu dɛ w’adwen rikyinkyin a, serɛ Jehovah dɛ ɔmboa wo ma fa w’adwen si adzesua no do. Sɛ adwendwen anaa awerɛhow hyɛ wo do a, obotum ayɛ dzen ama wo dɛ edze w’adwen besi Nyankopɔn no som mu ndzɛmba do. Naaso ohia paa dɛ yɛyɛ dɛm. Serɛ Nyankopɔn dɛ ɔmma n’asomdwee no mbɔ w’akoma na ‘w’adwen’ ho ban.​—Kenkan Philippifo 4:6, 7.

15. Sɛ yɛgye ber yɛ ndzɛmba a ɔbɔtwe hɛn abɛn Jehovah a, ebɛn mfaso na yebenya?

¹⁵ Sɛ yɛgye ber nye Jehovah kasa, yetsie no na yɛdwendwen noho a, yenya do mfaso kɛse. Ebɛn kwan do? Odzi kan no, ɔbɔboa hɛn ma yeesisi gyinae pa. Bible no tu hɛn fo dɛ obi a ‘ɔnye enyansafo nantsew no obohu nyansa.’ (Mbɛ. 13:20) Sɛ yɛgye mber yɛ ndzɛmba a ɔbɔtwe hɛn abɛn Jehovah a ɔyɛ nyansa nyina Wura no a, hɛn so yebohu nyansa. Yebohu kwan pa a yebotum afa do asɔ n’enyi. Nkyii so ɔbɛma yekwetsir dɛ yebesi gyinae a ɔbɛma Jehovah no werɛ ahow.

16. Sɛ yɛgye ber bɔ mpaa na yesũa Jehovah ho adze a, ebɛn kwan do na ɔbɔboa hɛn ma yaayɛ akyerɛkyerɛfo pa?

¹⁶ Otsĩa ebien, ɔbɔboa hɛn ma yaayɛ akyerɛkyerɛfo pa. Sɛ yɛnye afofor rusũa Bible no a, ndzɛmba a ohia hɛn paa no mu kor nye dɛ yɛbɔboa hɔn ma wɔaatwe abɛn Jehovah. Sɛ yɛkɔ do bɔ hɛn sor Egya no mpaa na yesũa noho adze a, ɔdɔ a yɛwɔ ma no no bɛyɛ kɛse na iyi bɛma yeetum akyerɛkyerɛ hɛn esuafo no yie ma hɔn so wɔaadɔ no. Dɛm na Jesus yɛe. Ɔdze enyigye kãa n’Egya ho asɛm na ɔkyerɛɛ dɛ ɔdɔ no. Iyi kaa n’ekyirdzifo anokwafo no so ma wɔdɔɔ no.​—John 17:25, 26.

17. Ebɛn kwan do na mpaabɔ na adzesua boa hɛn ma yɛhyɛ hɛn gyedzi dzen?

¹⁷ Otsĩa ebiasa, ɔbɛma hɛn gyedzi ayɛ dzen. Sɛ yɛbɔ mpaa serɛ Nyankopɔn hɔ akwankyerɛ, awerɛkyekyer anaa mboa bi a, ɔbɔboa hɛn dɛn? Aber biara a Jehovah bobua mpaa a ɔtse dɛm no, gyedzi a yɛwɔ wɔ no mu yɛ kɛse. (1 John 5:15) Ebɛnadze bio na eyɛ a, obotum ahyɛ wo gyedzi dzen? Ɔno nye ankorankor adzesua a ebɛyɛ no. Ɔwɔ dɛ yɛkaa dɛ “gyedzi no fi otsie mu,” kyerɛ dɛ, dza yɛtse no tum ma yenya gyedzi. (Rom. 10:17) Naaso, sɛ hɛn gyedzi bɛyɛ dzen a, ɔnnsɛ dɛ yesũa adze kɛkɛ  mbom ɔwɔ dɛ yɛyɛ biribi ka ho. Ɔyɛ ebɛnadze?

18. Ma nhwɛdo a ɔkyerɛ siantsir a no ho hia dɛ yɛdwendwen dza yesũa no ho.

¹⁸ Ɔsɛ dɛ yɛdwendwen dza yesũa no ho. Hom mma yensusu Ndwom 77 ne kyerɛwfo no n’asɛm no ho. Nna ɔahaw osiandɛ nna ɔtse nka dɛ ɔnye ne mfɛfo Israelfo ahwer Jehovah n’enyimpa. Osian iyi ntsi, nna odu anafua a onntum nnda. (Nyiyimu 2-8) Ebɛnadze na ɔyɛe? Ɔkãa kyerɛɛ Jehovah dɛ: “Mobɔdwendwen wo ndwuma nyina ho, na mesina adwen wɔ wo ndzeyɛɛ ho.” (Nyiyimu 12) Nokwasɛm nye dɛ nna ɔdwontofo no nyim dza Jehovah ayɛ ama no nkorɔfo wɔ mber bi a etwa mu no. Naaso, dadwen a nna ahyɛ no do no maa obisaa dɛ: “Aso Nyankopɔn no werɛ efir dɛ ɔbɛyɛ adom? Aso ɔdze ebufuw atow n’ayamuhyehye mu?” (Nyiyimu 9) Ɔdwontofo no dwendween Jehovah no ndwuma nye mbrɛ ɔdaa ehumbɔbɔr nye ayamuhyehye edzi kyerɛɛ no nkorɔfo wɔ tsetse mber mu no ho. (Nyiyimu 11) Ebɛnadze na ofii dza ɔyɛe yi mu bae? Ɔdwontofo no bɛgyee too mu dɛ Jehovah rinnyi no nkorɔfo tokyen. (Nyiyimu 15) Dɛmara na woara so, sɛ edwendwen dza Jehovah ayɛ ama no nkorɔfo, nye dza ɔayɛ ama warankasa no ho a, ɔbɛma wo gyedzi ayɛ dzen.

19. Sɛ yɛgye ber dwendwen dza yesũa no ho a, ɔbɔboa hɛn dɛn?

¹⁹ Dza otsĩa anan nye dza no ho hia sen biara no, ɔdɔ a yɛwɔ ma Jehovah no bɛyɛ kɛse. Su tsitsir a obotum aboa hɛn ma yeetsie Jehovah, yaayɛ ndzɛmba a ɔbɛma yɛasɔ n’enyi, na yeetum egyina nsɔhwɛ biara a yebehyia no ano nye ɔdɔ. (Matt. 22:37-39; 1 Cor. 13:4, 7; 1 John 5:3) Sɛ yɛdɔ Jehovah paa na yɛnye no nya anyɛnkofa a no mu yɛ dzen a, ɔsom bo kyɛn biribiara!​—Ndw. 63:1-8.

20. Ibesi dɛn dze wo ber edzi dwuma yie ama eetum ayɛ ndzɛmba a ɔbɔtwe wo abɛn Jehovah?

²⁰ Ma ɔntsena w’adwen mu dɛ mpaabɔ nye Bible a yebosũa na yaadwendwen ho no ka hɛn som ho. Yebotum ahwehwɛ beebi a hɔ yɛ dzinn akɛhyɛ na yaayɛ ndzɛmba a ɔbɔtwe hɛn abɛn Jehovah dɛ mbrɛ Jesus yɛe no. Mma mma biribiara nntwetwe w’adwen. Sɛ irusũa adze anaa ewɔ asafo nhyiamu ase a, serɛ Jehovah ma ɔmboa wo ma fa w’adwen si dza ereyɛ no do. Sɛ edze wo ber dzi dwuma yie ndɛ a, Jehovah bɛma enya onnyiewiei nkwa wɔ no wiadze fofor no mu.​—Mark 4:24.