1. Ebɛn tsebea a no mu yɛ dzen na David kɔr mu?

 NNA David ruguan aper no nkwa. Siantsir nye dɛ, nna Israelhen Saul a ɔwɔ tum kɛse no esi no bo dɛ oboku no. Aber a nna David ruguan no, ɔkɔm dzee no. Ntsi, ɔkɔr kurow bi a wɔfrɛ no Nob mu kɛserɛɛ paanoo enum pɛ. (1 Sam. 21:1, 3) Ekyir yi, ɔno nye ne mbarimba a wɔka noho no kosumaa ɔbo-tu bi mu. (1 Sam. 22:1) Ɔbaa no dɛn na David kɔr tsebea a ɔtse dɛm mu?

2. Ebɛn ndzɛmba bɔn na Saul yɛe? (1 Samuel 23:16, 17)

² David gyee dzin wɔ Israel na odzii konyim pii so wɔ akõ mu. Iyi maa Saul n’enyi beer no na ɔtaan no dzendzenndzen. Iyi da nkyɛn a, nna Saul nankasa nyim dɛ asoɔdzen a ɔayɛ ntsi, Jehovah apow no dɛ ɔhen, na ɔapaw David dɛ ɔhen a daakye obedzi Israelman no do. (Kenkan 1 Samuel 23:16, 17.) Naaso, nna Saul da ho ara yɛ Israelhen. Nna ɔwɔ nsordaafo dɔm kɛse nye nyimpa pii a wɔtaa n’ekyir. Iyi ntsi, nna ɔwɔ dɛ David guan per no nkwa. Aso nna Saul susu dɛ obotum esiw Nyankopɔn kwan dɛ ɔbɛyɛ David ɔhen? (Isa. 55:11) Bible no nnkã. Naaso, yenyim dɛm nokwasɛm yi: Dza nna Saul reyɛ no yɛ hũ. Hɔn a wɔkõ tsia Jehovah no, onnsi hɔn yie da!

3. Ɔmmfa ho tsebea a nna David wɔ mu no, ɔtsee nka dɛn?

³ Nna David yɛ ɔbarimba a ɔbrɛ noho adze. Ɔnnyɛ nankasa na ɔkãa dɛ ɔpɛ dɛ ɔyɛ Israelhen. Jehovah na ɔpaaw no dɛ ɔmbɛyɛ ɔhen. (1 Sam. 16:1, 12, 13) Saul taan David dzendzenndzen.  David annkã dɛ Jehovah na ɔama ɔakɔ tsebea a ɔtse dɛm mu. Dɛmara so na ber a nna onnya edziban a ɔbɔso no nndzi na ɔwɔ dɛ okosuma ɔbo-tu mu no, ɔannkasa enntsia Jehovah. Mbom, obotum aba dɛ, ɔyɛ ber a nna ɔhyɛ dɛm ɔbo-tu no mu na ɔkyerɛɛw ndwom dɛdɛɛdɛw bi yii Jehovah ayɛw. Kyerɛwsɛm a adzesua yi gyina do no so ka dɛm ayɛyindwom no ho. Hɔ kã dɛ: ‘Hɔn a wɔhwehwɛ Jehovah dze, adze pa biara rinnhia hɔn.’​—Ndw. 34:10.

4. Ebɛn nsɛmbisa na yebosusu ho, na ebɛnadze ntsi na dɛm nsɛmbisa yi ho hia?

⁴ Ndɛ, Jehovah n’asomfo pii nnyi edziban a ɔbɔso hɔn anaa ndzɛmba afofor a wohia wɔ hɔn asetsena mu. * Dza ama hɛn asetsena mu ayɛ dzen so nye yarba bɔn a ɔatserɛw kɔ wiadze nyina no. Iyi da nkyɛn a, hɛn asetsena mu bɔkɔ do ayɛ dzen ber a yɛrebɛn “ahohiahia kɛse” no. (Matt. 24:21) Dɛm nokwasɛm ahorow yi wɔ hɛn adwen mu no, hom mma yensusu nsɛmbisa anan yi ho: Ebɛn kwan do na ‘adze pa biara ennhia’ David? Ebɛnadze ntsi na ɔwɔ dɛ yɛpen dza yɛwɔ no do? Ebɛnadze ntsi na yebotum agye edzi dɛ Jehovah bɔhwɛ hɛn? Afei, yebesi dɛn esiesie hɛnho ndɛ ama dza obesi daakye no?

5-6. David kãa dɛ “adze pa biara rinnhia” Nyankopɔn n’asomfo. Ebɛn kwan do na Ndwom 23:1-6 no boa hɛn ma yɛtse dza nna David pɛ dɛ ɔkyerɛ no ase?

⁵ Ber a David kãa dɛ Jehovah n’asomfo dze, “adze pa biara rinnhia hɔn” no, nna ɔpɛ dɛ ɔkyerɛ dɛn? Yehu asɛm bi a ɔnye iyi dzi nsɛ wɔ Ndwom 23. Sɛ yesusu ho a, ɔbɛma yehu dza nna David pɛ dɛ ɔkyerɛ. (Kenkan Ndwom 23:1-6.) David hyɛɛ dɛm ndwom no ase dɛ: “Ewuradze nye mo guanhwɛfo; mirinnhia.” Sɛ yɛhwɛ ndwom no ne fã a aka no mu a, yehu dɛ David kãa ndzɛmba bi a no ho hia papaapa ho asɛm. Ɔno nye dɛ, nna obu Jehovah dɛ no Guanhwɛfo, ntsi onyaa ndzepa pii fi no hɔ. Jehovah gyaa no faa “tsenenee akwan mu.” Afei so, odzii boaa David wɔ mber pa  nye mber bɔn mu. Naaso, nna David nyim dɛ Jehovah ‘n’edzidzibea’ a no do efuw yɛ prɔmprɔm a ɔbɛda no nnkyerɛ dɛ onnkehyia ɔhaw wɔ n’asetsena mu. Odur beebi no, nna n’asetsena tse dɛ mbrɛ ɔnam “owu nwinwin bɔnsa” mu, na onyaa atamfo so. Nna iyinom botum ama n’abaw mu eebu. Naaso, osiandɛ nna Jehovah nye David no Guanhwɛfo ntsi, ‘oennsuro mbusu bi.’

⁶ Afei, hom mma yensusu dɛm asɛmbisa yi ho: Ebɛn kwan do na “adze pa biara” ennhia David? Mbuae no nye dɛ, adze biara a nna obehia ama ɔaakɔ do abɛn Jehovah no, ne nsa kae. Nna onnhia honam afamu ndzɛmba pii ana n’enyi aagye. David peen dza Jehovah dze maa no no do. Dza nna ohia no papaapa nye dɛ Nyankopɔn behyira no na ɔaabɔ no ho ban.

7. Dɛ mbrɛ Luke 21:20-24 kyerɛ no, ebɛn tsebea a no mu yɛ dzen na Christianfo a nna wɔtse Judea no hyiae?

⁷ Sɛ yɛhwɛ nsɛm a David kãe no a, yehu dɛ no ho hia papaapa dɛ yenya honam afamu ndzɛmba ho adwen pa. Yebotum dze honam afamu ndzɛmba a yɛwɔ no edzi dwuma, naaso onnyi dɛ yɛma ndzɛmba a ɔtse dɛm no yɛ adze tsitsir wɔ hɛn asetsena mu. Christianfo a nna wɔtse Judea no bɛtsee dɛm nokwasɛm a no ho hia yi ase. (Kenkan Luke 21:20-24.) Nna Jesus akã akyerɛ hɔn dɛ, mber bi bɛba a nsordaafo ‘dɔm botwa Jerusalem ho ehyia.’ Sɛ dɛm asɛm yi si a, nna ɔwɔ dɛ ‘woguan kɔ nkokwaa do.’ Nna dɛm a wɔbɛyɛ no bɛma woenya nkwa. Naaso, nna wɔbɔhwer ndzɛmba pii. Ɔweɔn-Aban bi bɛkãa dɛ: “Wogyaa hɔn nhaban nye hɔn efie hɔ, wɔammfa hɔn egyapadze a ɔwɔ hɔn efie mu no mpo. Nna wɔgye dzi dɛ, sɛ wɔdze ndzɛmba a nna ɔtse dɛ mbrɛ no ho hia no to nkyɛn, na wɔdze Jehovah no som dzi kan wɔ hɔn asetsena mu a, Jehovah bɔboa hɔn na ɔaabɔ hɔnho ban.”

8. Asɛm a ɔtoo tsetse Christianfo a nna wɔtse Judea no, ebɛnadze na yebotum esũa efi mu?

⁸ Asɛm a ɔtoo tsetse Christianfo a nna wɔtse Judea no, ebɛnadze na yebotum esũa efi mu? Ɔweɔn-Aban a yɛakã ho asɛm no kãa dɛ: “Obotum aba dɛ daakye yebehyia nsɔhwɛ a ɔbɛma adwen a yɛwɔ wɔ honam afamu ndzɛmba ho no ada edzi. Ebɛnadze na ohia hɛn paa wɔ asetsena mu? Aso ɔyɛ ndzɛmba a yɛwɔ wɔ asetsena mu no anaa nkwa a Nyankopɔn dze bɛma hɔn a wodzi no nokwar no? Nokwasɛm nye dɛ, sɛ ewiei no ba a, bi a yebehyia ɔhaw pii na bi a obehia dɛ yɛdze ndzɛmba pii so bɔ afɔr. Naaso, dɛ mbrɛ tsetse Christianfo a woguanee fii Judea no dze ndzɛmba bɔɔ afɔr no, ɔwɔ dɛ hɛn so yɛyɛ krado dɛ yɛbɛyɛ dɛmara.” *

9. Ebɛn nkuranhyɛ na inya fi afotu a ɔsomafo Paul dze maa Hebrewfo no mu?

⁹ Hwɛ mbrɛ nna obesi ayɛ dzen ama dɛm Christianfo no dɛ wobegyaa ndzɛmba a wɔwɔ nyinara hɔ na wɔaakɛhyɛ asetsena fofor ase wɔ beebi. Nna ohia dɛ wonya Jehovah mu gyedzi dɛ ɔbɛma hɔn nsa aka hɔn daa daa ehiadze. Naaso, nna biribi fofor so wɔ hɔ a obotum aboa hɔn. Mfrenhyia enum ansaana Romefo rubotwa Jerusalem ho ehyia no, ɔsomafo Paul dze afotu bi a no ho hia maa Hebrewfo no. Ɔkãa dɛ: “Mma sika enyiber mmba hom abrabɔ mu; hom bo ndwe dza hom wɔ no ara: na nankasa akã dɛ, Mirinngya wo da, eso meremmpa wo da biara da. Ntsi yɛdze ndam kã dɛ, Ewuradze nye mo boafo; murunnsuro: Nyimpa botum ayɛ me dɛn?” (Heb. 13:5, 6) Hɔn a wotsiee Paul n’afotu yi guu asopa mu ansaana Romefo robɔtow ahyɛ Jerusalem do no, ɔda edzi dɛ, annyɛ dzen amma hɔn dɛ wɔbɛma hɔn asetsena aba famu wɔ beebi a woguanee kɔree no. Nna wɔgye dzi dɛ Jehovah  dze hɔn daa daa ehiadze bɛma hɔn. Paul n’asɛm no ma yenya awerɛhyɛmu dɛ yebotum enya gyedzi a ɔtse dɛmara.

10. Ebɛn afotu na Paul dze ma hɛn?

¹⁰ Paul dze afotu a ɔtse dɛmara so maa Timothy. Dɛm afotu no kɔ ma hɛn so. Ɔkãa dɛ: “Sɛ yɛwɔ edziban nye akataho a, hom mma ɔnoara ndɔɔ hɛn sõ.” (1 Tim. 6:8) Aso ɔyɛ bɔn dɛ ofi ber to ber no, yebedzi edziban a no bo yɛ dzen, yɛbɛpɛ dan papa atsena mu, na yaatotɔ ntar afofor? Nnyɛ dɛm na Paul repɛ akyerɛ. Nna dza ɔrekã nye dɛ, ɔwɔ dɛ yɛma dza yɛwɔ no ara dɔɔ hɛn sõ. (Phil. 4:12) Iyi nye adze a ɔboaa Paul. Ebusuabɔ a yɛnye Jehovah wɔ no, ɔno nye adze a ɔsom bo ma hɛn paa, na nnyɛ honam afamu ndzɛmba a yɛwɔ no.​—Hab. 3:17, 18.

11. Asɛm a Moses kãa kyerɛɛ Israelfo no dɛ, wɔmma hɔn enyi nsɔ dza wɔwɔ no, ebɛnadze na yebotum esũa efi mu?

¹¹ Obotum aba dɛ, dza yesusu dɛ yehia no, ɔnnyɛ ɔno na Jehovah hu dɛ yehia. Hom mma yɛnhwɛ asɛm a Moses kãa kyerɛɛ Israelfo no aber a wɔnantseew sar no do mfe 40 no. Ɔkãa dɛ: “Ewuradze wo Nyankopɔn ehyira wo wɔ wo nsaano edwuma nyinara mu: oehu wo nantsew wɔ sar kɛse yi do: mfe eduanan yi Ewuradze wo Nyankopɔn edzi w’ekyir; onnhia wo biribiara.” (Deut. 2:7) Jehovah maa Israelfo no manna ma wodzii wɔ dɛm mfrenhyia 40 no mu. Jehovah hwɛɛ hɔn ma hɔn ntar aanntsetsew. Ntsi, ntar a worifi Egypt nna ɔhyɛ hɔn no, ɔnoara na wɔkɔr do hyɛe. (Deut. 8:3, 4)  Obotum aba dɛ, Israelfo no bi nyaa adwen dɛ ndzɛmba yi a Jehovah yɛe maa hɔn no nndɔɔ sõ. Naaso, Moses kãa kyerɛɛ hɔn dɛ biribiara ennhia hɔn. Sɛ kakra a Jehovah dze ma hɛn no mpo yɛma hɛn enyi sɔ, yebu no dɛ ɔyɛ nhyira, na yɛda no ase wɔ ho a, ɔma n’enyi gye.

12. Ebɛnadze na ɔkyerɛ dɛ David ammfa noho aannto nankasa n’ahoɔdzen do na mbom ɔdze too Jehovah do?

¹² Nna David nyim dɛ Jehovah yɛ ɔnokwafo na ɔdwen hɔn a wɔdɔ no no ho papaapa. Ɔwɔ mu dɛ aber a David kyerɛɛw Ndwom 34 no, nna no nkwa da esian mu dze, naaso Jehovah mu gyedzi a ɔwɔ no maa ohun dɛ “Ewuradze no bɔfoe” robɔ noho ban. (Ndw. 34:7) Obotum aba dɛ, nna David dze Jehovah no bɔfoe rototo sordaanyi bi a ɔrobɔ bea bi ho ban ho. Aber biara, nna sordaanyi yi ayɛ krado rohwɛ dɛ ɔtamfo bi reba a. Nna David nankasa yɛ ɔkofo kukudurnyi. Iyi da nkyɛn a, nna Jehovah abɔ no anohoba dɛ ɔbɛyɛ ɔhen. Naaso, David ammfa noho aannto ahoɔdzen a ɔdze tow tsiabo anaa peaa dze ku atamfo no do. (1 Sam. 16:13; 24:12) David dze noho too Nyankopɔn do, na onyaa gyedzi dɛ Jehovah no bɔfoe bɔ hɔn a wosuro no no ho ban na “ɔgye hɔn.” Ndɛ yɛnnhwɛ kwan dɛ Jehovah bɔbɔ hɛnho ban anwanwa kwan do. Naaso, yɛwɔ gyedzi dɛ obiara a ɔdze noho to Jehovah do no, sɛ owu ndɛ mpo a, daakye obenya onnyiewiei nkwa.

13. Sɛ Gog a ofi Magog tow hyɛ Nyankopɔn no nkorɔfo do a, ebɛnadze ntsi na ɔbɛyɛ dɛ yennyi bambɔ biara? Naaso, ebɛnadze ntsi na onnyi dɛ yesuro? (Hwɛ mfonyin a ɔwɔ Ɔweɔn-Aban yi enyim no.)

¹³ Ɔnnkɛkyɛr, gyedzi a yɛwɔ wɔ Jehovah no tum a ɔdze gye no nkorɔfo mu no, wɔbɔsɔ ahwɛ. Sɛ Gog a ofi Magog, kyerɛ aman a wɔaka hɔnho abɔ mu no, tow hyɛ Nyankopɔn no nkorɔfo do a, ɔbɛyɛ tse dɛ mbrɛ hɛn nkwa da esian mu no. Ɔwɔ dɛ yenya gyedzi dɛ Jehovah botum agye hɛn, na ɔbɛgye hɛn nkwa so. Aman no hɔn enyi do, yɛbɛyɛ tse dɛ nguan a wonnyi obiara a ɔbɔ hɔnho ban. (Ezek. 38:10-12) Afei so, wobohu hɛn dɛ yennyi akodze, na yennyi akodzi ho nyimdzee biara so. Hɔn adwen bɛyɛ hɔn dɛ wobotum edzi hɛn do konyim koraa. Gyedzi a yɛwɔ wɔ Jehovah mu no bɛma yehu dɛ, n’abɔfoe mpempem pii etwa hɛnho ehyia a wɔrobɔ hɛnho ban. Naaso, aman no nnkohu biribi a ɔtse dɛm. Ebɛnadze ntsi a? Osiandɛ wonnyi gyedzi a wɔdze bohu. Ɔbɛyɛ hɔn ahobow ber a sor abɔfodɔm aba robɔkõ ama hɛn no!​—Nyi. 19:11, 14, 15.

14. Ebɛn ndzɛmba na yebotum ayɛ no ndɛ dze esiesie hɛnho ama dza obesi daakye no?

¹⁴ Ebɛnadze na yebotum ayɛ no ndɛ dze esiesie hɛnho ama dza obesi daakye no? Odzi kan no, ɔwɔ dɛ yenya honam afamu ndzɛmba ho adwen pa. Ɔwɔ dɛ yɛma ɔtsena hɛn adwen mu dɛ, mber bi bɛba a, yɛremmfa dɛm ndzɛmba yi nnyɛ hwee. Afei so, ɔwɔ dɛ yɛma hɛn enyi sɔ dza yɛwɔ no, na yedzi dɛw kɛse dɛ yɛnye Jehovah wɔ ebusuabɔ a no mu yɛ dzen. Sɛ yɛkɔ do hyɛ ebusuabɔ a ɔtse dɛm mu dzen a, yebotum enya gyedzi kɛse dɛ, sɛ Gog a ofi Magog tow hyɛ hɛn do a, Jehovah bɔbɔ hɛnho ban.

15. Ebɛn nsɛm na osisii wɔ David ne mbabun ber mu a ɔmaa ohun dɛ Jehovah bɔboa no aber nyina?

¹⁵ Hom mma yɛnhwɛ adze fofor so a ɔboaa David ma ogyinaa nsɔhwɛ ano. Dɛm adze kor no ara botum aboa hɛn ma yeesiesie hɛnho ama nsɔhwɛ. David kãa dɛ: “Hom nsɔ nhwɛ na hom nhu dɛ Ewuradze ye: Nhyiranyi nye nyimpa a no werɛ hyɛ no mu.” (Ndw. 34:8) Asɛm a David kãe yi ma yehu dɛ nna onyim dɛ  Jehovah bɔboa no. Nna ɔdze noho to Jehovah do aber nyina. Jehovah amma ne nsa eennsi famu da. Aber a nna David yɛ ɔbabun no, ɔnye Philistianyi ɔbran Goliath koe. Ɔkãa kyerɛɛ ɔkofo a noho yɛ hũ yi dɛ: “Ndɛ da yi Ewuradze beyi wo ahyɛ me nsa.” (1 Sam. 17:46) Iyi ekyir no, David kɔsoom Ɔhen Saul. Dɛm ɔhen yi bɔɔ mbɔdzen mpɛn pii dɛ oboku David. Naaso, nna “Ewuradze dzi [David] n’ekyir.” (1 Sam. 18:12) Nna Jehovah aboa David mber bi a etwa mu. Ntsi, nna David nyim dɛ ɔbɔboa no wɔ nsɔhwɛ a orihyia no mu.

16. Yebesi dɛn ‘asɔ’ Jehovah ne papayɛ ahwɛ?

¹⁶ Sɛ yɛdze hɛnho to Jehovah do dɛ ɔno na obotum aboa hɛn ndɛ a, ɔbɛma yeenya no mu awerɛhyɛmu dɛ daakye so obotum aboa hɛn. Yehia gyedzi paa ana yeetum aserɛ kwan wɔ hɛn edwumawura hɔ dze akɔ ɔmansin na ɔmantɔw ehyiadzi. Dɛmara so na sɛ yebotum aserɛ hɛn edwumawura dɛ ɔnyɛ nsakyer wɔ mber a yɛdze yɛ edwuma no mu ama yeetum akɔ asafo nhyiamu nyina, na yeenya ber pii dze ayɛ asɛnka edwuma no a, yehia gyedzi. Afei, ohia dɛ yɛdze hɛnho to Jehovah do dɛ obotum aboa hɛn ma yaayɛ dɛm ndzɛmba yi nyina. Naaso, yɛmfa no dɛ hɛn edwumawura no anngye hɛn adzeserɛ no annto mu, ntsi hɛn edwuma no efi hɛn nsa. Sɛ ɔba no dɛm a, yɛbɛyɛ dɛn? Ana yɛgye Jehovah dzi dɛ orinnyi hɛn baako nnhyɛ nsa, na orinngyaa hɛn da, mbom no ɔdze dza yehia wɔ asetsena mu biara no bɛma hɛn? (Heb. 13:5) Enuanom pii a wɔyɛ ber nyina som edwuma no wɔ suahu pii a ɔma yehu dɛ Jehovah boaa hɔn ber a nna wohia no mboa kɛse no. Jehovah dze, ɔyɛ ɔnokwafo ampa.

17. Afe asɛm ma afe 2022 nye dɛn, na ebɛnadze ntsi na ɔyɛ ne ber mu dze?

¹⁷ Sɛ Jehovah wɔ hɛn afã a, ɔnnsɛ dɛ yesuro biribiara a obesi daakye no. Sɛ yɛdze Ahendzi no dzi kan wɔ hɛn asetsena mu a, Nyankopɔn nnkeyi hɛn tokyen da. Ohia dɛ yesiesie hɛnho ndɛ ma nsɛndzendzen a yebehyia no daakye no, na yɛdze hɛnho to Jehovah do dɛ onnkeyi hɛn tokyen. Dɛm ntsi, Akwankyerɛ Kuw no eyi Ndwom 34:10 dɛ hɛn afe asɛm ma afe 2022. Hɔ kã dɛ: ‘Hɔn a wɔhwehwɛ Jehovah dze, adze pa biara rinnhia hɔn.’