1. Ebɛkã ebusua a wɔtsetsee James wɔ mu no ho asɛm dɛn?

 NNA James yɛ Jesus no nua, na ebusua a wɔtsetsee no wɔ mu no nna wodzi nokwar ma Jehovah. * Nna n’awofo nye Joseph na Mary. Nna wɔdɔ Jehovah paa, na wofii hɔn akoma nyinara mu soom no. James nyaa nhyira fofor bi so; no nua panyin Jesus na ɔbɛyɛɛ Messiah a wɔhyɛɛ no ho nkɔm no. Hwɛ nhyira ara a James nyae dɛ nna ɔka ebusua a ɔtse dɛm ho!

2. Nna ebɛn ndzɛmba na James botum egyina do esũasua no nua panyin Jesus?

² Nna James wɔ ndzɛmba pii a obotum egyina do esũasua no nua panyin Jesus. (Matt. 13:55) Dɛ nhwɛdo no, nna Jesus nyim Kyerɛwnsɛm no yie paa. Iyi ntsi aber a nna oedzi mfe 12 no, ɔkyerɛkyerɛɛ nsɛm ahorow bi mu ma ɔyɛɛ akyerɛkyerɛfo a nna wɔwɔ Jerusalem no nwanwa. (Luke 2:46, 47) Obotum aba dɛ James nye Jesus bɔɔ mu yɛɛ kapenta edwuma. Sɛ dɛm na ɔtse a, ɔkyerɛ dɛ James nyaa ho kwan dze hun Jesus yie. Nna Nathan H. Knorr taa kã dɛ: “Sɛ enye obi bɔ mu yɛ edwuma a, inya ho kwan hu nyimpa no yie.” * Obotum aba dɛ James so hun mbrɛ “Jesus kɔr kan wɔ nyansa nye tsipɛn mu, na Nyankopɔn nye nyimpa hɔ enyimpa mu” no. (Luke 2:52) Osian iyi ntsi, bi a yebenya adwen dɛ nna James ka Jesus n’esuafo a wodzi kan no ho. Naaso nna nnyɛ dɛm na asɛm no tse.

3. Aber a nna Jesus reyɛ no som edwuma no, James yɛɛ n’adze dɛn?

³ Aber a nna Jesus reyɛ no som edwuma wɔ asaase do no,  James ammbɛyɛ no suanyi. (John 7:3-5) Nokwasɛm nye dɛ, Jesus n’ebusuafo a nna wosusu dɛ “n’enyi nnyi no ho do” anaa n’adwen mu aka no, obotum aba dɛ nna James ka ho. (Mark 3:21) Afei so, biribiara nnyi hɔ a ɔkyerɛ dɛ nna James wɔ hɔ bi aber a Jesus sɛn dua no do a oruwu na hɔn maame Mary gyina ne nkyɛn no.​—John 19:25-27.

4. Ebɛnadze na yebosusu ho wɔ adzesua yi mu?

⁴ Ber bi ekyir no, James bɛgyee Jesus dzii, na ɔbɛyɛɛ asafo mu panyin a nna wobu no wɔ Christianfo asafo no mu. Adzesua yi mu no, yɛbɔhwɛ ndzɛmba ebien a yebotum esũa efi James hɔ: (1) siantsir a ɔwɔ dɛ yɛkɔ do brɛ hɛnho adze nye (2) mbrɛ yebesi ayɛ akyerɛkyerɛfo pa.

5. James yɛɛ n’adze dɛn aber a Jesus yii noho edzi kyerɛɛ no wɔ no wusoɛr ekyir no?

⁵ Ebɛn aber na James bɛyɛɛ Jesus no suanyi nokwafo? Aber a wonyaan Jesus fii owu mu no, “oyii noho kyerɛɛ James; na nkyii oyii noho kyerɛɛ asomafo no nyina.” (1 Cor. 15:7) Aber a James nye Jesus hyiae ekyir no, ɔbɛyɛɛ Jesus no suanyi. Aber a nna asomafo no wɔ abansor dan bi mu na wɔrotweɔn dɛ wobohue sunsum krɔnkrɔn egu hɔn do no, nna James wɔ hɔ bi. (Andw. 1:13, 14) Ekyir yi, James bɛyɛɛ akwankyerɛ kuw no munyi. (Andw. 15:6, 13-22; Gal. 2:9) Afei, ansaana afe 62 H.B. reba no, sunsum krɔnkrɔn maa ɔkyerɛɛw krataa kɛmaa Christianfo a nna wɔasera hɔn no. Ndɛ, ɔmmfa ho dɛ yɛwɔ enyidado dɛ yɛbɔkɔ sor anaa yɛbɛtsena asaase do no, yenya krataa no do mfaso. (Jas. 1:1) Tsetse abakɔsɛm kyerɛwfo bi a wɔfrɛ no Josephus kãa dɛ, Annas ne ba Ananias a nna ɔyɛ Jewfo hɔn Sɔfopanyin no na ɔhyɛe ma wokum James. James dzii Jehovah nokwar kesii dɛ owiee n’asaase do ɔsom edwuma no.

6. Ebɛnadze ntsi na yebotum akã dɛ nna James nntse dɛ nyamesom akandzifo a nna wɔwɔ n’aber do no?

⁶ Nna James brɛ noho adze. Ebɛnadze ntsi na yebotum akã dɛm? Ma yɛnhwɛ mbrɛ James sii yɛɛ n’adze ber a Jesus yii noho edzi kyerɛɛ no wɔ no wusoɛr ekyir, nye mbrɛ nyamesom akandzifo no so yɛɛ hɔn adze wɔ Jesus ho. Aber a James hun adanse kofee a ɔkyerɛ dɛ Jesus yɛ Nyankopɔn ne Ba no, ofii ahobrɛadze mu gyee too mu. Naaso asɔfompanyimfo no a nna wɔwɔ Jerusalem no dze, wɔannyɛ dɛm. Dɛ nhwɛdo no, aber a Jesus nyaan Lazarus fii owu mu no, wohunii na wɔtsee so. Naaso wɔanngye Jesus annto mu dɛ Jehovah na ɔsomaa no, mbom wɔyɛɛ dɛ woboku  Jesus na Lazarus nyinara. (John 11:53; 12:9-11) Ɔno ekyir no, aber a Jehovah nyaan Jesus fii owu mu no, wɔbɔɔ pɔw dɛ wɔremma nkorɔfo nnhu nokwasɛm a ɔwɔ asɛm no mu. (Matt. 28:11-15) Nna nyamesom akandzifo yi mema hɔnho do, ntsi wɔanngye Jesus annto mu dɛ ɔno nye Messiah no.

7. Ebɛnadze ntsi na ɔnnsɛ dɛ yɛmema hɛnho do?

⁷ Esuadze a ɔwɔ mu: Brɛ woho adze, na ma Jehovah nkyerɛkyerɛ wo. Dɛ mbrɛ yarba bi botum ama aayɛ dzen dɛ obi n’akoma bɛyɛ edwuma yie no, dɛmara na ahomemado so botum ama ayɛ dzen ama obi dɛ ɔdze Jehovah n’akwankyerɛ bɛyɛ edwuma. Phariseefo no maa hɔn akoma yɛɛ dzen dɛ bobaa, dɛm ntsi adanse kofee a ɔkyerɛ dɛ Jesus yɛ Nyankopɔn ne Ba, na Nyankopɔn no sunsum wɔ no do no, wɔpowee. (John 12:37-40) Suban a wɔdaa no edzi no muo, osiandɛ amma woeennya onnyiewiei nkwa. (Matt. 23:13, 33) No ho hia paa dɛ yɛkɔ do ma Nyankopɔn n’Asɛm na no sunsum no sesa hɛn nyimpa su. Afei ɔsɛ dɛ yɛma kwan ma ɔka hɛn nsusui nye hɛn gyinaesi. (Jas. 3:17) Nna James brɛ noho adze, ntsi ɔmaa kwan ma Jehovah kyerɛkyerɛɛ no. Yebohu wɔ adzesua yi mu dɛ, osiandɛ nna James brɛ noho adze ntsi ɔbɛyɛɛ ɔkyerɛkyerɛfo pa.

8. Ebɛnadze na ɔbɔboa hɛn ma yaabɛyɛ akyerɛkyerɛfo pa?

⁸ James annkɔ skuul annkɔ ekyir. Ɔda edzi kofee dɛ, mbrɛ nna nyamesom akandzifo a wɔwɔ James n’aber do bu asomafo Peter nye John no, nna dɛmara na wobu no so. Nna wobu no dɛ ‘onnsũaa nwoma na ɔyɛ atsetsekwaa.’ (Andw. 4:13) Naaso James bɛyɛɛ ɔkyerɛkyerɛfo pa. Yehu iyi aber a yɛrekenkan Bible mu nwoma a ɔkyerɛwee no. Bi a hɛnara so, yɛannkɔ skuul annkɔ ekyir dɛ James. Sɛ dɛm mpo a, Jehovah botum afa no sunsum krɔnkrɔn no nye ntsetsee a n’ahyehyɛdze no dze ma no do ama hɛn so yɛabɛyɛ akyerɛkyerɛfo pa. Hom mma yɛnhwɛ nhwɛdo pa a James yɛe dɛ ɔkyerɛkyerɛfo, nye dza yebotum esũa efi mu.

9. Ebɛkã kwan a nna James fa do kyerɛkyerɛ no ho asɛm dɛn?

⁹ James ammfa nsɛm a n’asetse yɛ dzen enndzi  dwuma. Iyi ntsi, nna n’etsiefo nyim dza ɔsɛ dɛ wɔyɛ nye kwan a wɔbɛfa do ayɛ dɛm. Dɛ nhwɛdo no, James kãa dɛ sɛ obi yɛ Christiannyi a, ɔsɛ dɛ onya ɔpɛ dɛ obohu amandze, na sɛ ɔba no dɛm so a, ɔnnsɛ dɛ no bo fuw obiara. Osian kwan a ɔfaa do kãa dɛm asɛm no ntsi, ɔnnyɛ dzen dɛ obi bɛtse ase. Ɔkãa no dɛn? James kãa dɛ: ‘Yɛfrɛ hɔn a wɔdze abotar tsimii no esiarfo: hom atse Job n’abotar no ho asɛm, na hom ehu mbrɛ Jehovah maa owiee no no, dɛ, Jehovah wɔ ayamuhyehye na ehumbɔbɔr.’ (Jas. 5:11) Hyɛ no nsew dɛ, James dze ne nkyerɛkyerɛ no gyinaa Kyerɛwnsɛm no do. Ɔdze Nyankopɔn n’Asɛm no boaa n’etsiefo ma wohun dɛ, sɛ obi dzi Jehovah nokwar dɛ mbrɛ Job yɛe no a, Jehovah behyira no. Ntsi, James dze nsɛm a n’asetse nnyɛ dzen kyerɛkyerɛɛ dɛm nokwasɛm yi mu, na ɔyɛɛ dɛm dze twee adwen sii Jehovah do, na nnyɛ nankasa no do.

10. Sɛ yɛrekyerɛkyerɛ afofor a, ebɛnadze na yebotum ayɛ dze esũasua James?

¹⁰ Esuadze a ɔwɔ mu: Kã nsɛm a n’asetse nnyɛ dzen, na fa Nyankopɔn n’Asɛm no dzi dwuma. Sɛ yɛrekyerɛkyerɛ afofor a, ɔsɛ dɛ yɛma wohu dɛ dza yɛrekyerɛkyerɛ hɔn no mmfi hɛn hɔ na mbom ofi Jehovah hɔ, na ɔdwen hɔnho so. (Rom. 11:33) Sɛ yebotum ayɛ dɛm a, ɔwɔ dɛ yɛdze dza yɛbɛkã biara gyina Kyerɛwnsɛm no do. Fa no dɛ Bible suanyi bi akɔ tsebea bi mu anaa orisi gyinae bi. Dɛ nkyɛ ebɛkã dɛ emi a nkyɛ dɛm na mebɛyɛ no, mbom ɔwɔ dɛ eboa no ma osusu dza Bible no kã no ho, ama oeehu dza Jehovah hwehwɛ dɛ ɔyɛ. Yɛyɛ dɛm a, wobenya ɔpɛ a no mu yɛ dzen dɛ wɔbɔsɔ Jehovah n’enyi na nnyɛ hɛn.

11. Nna ebɛn nsɛndzendzen na Christianfo binom a wɔwɔ James n’aber do no rihyia? Na ebɛn afotu na ɔdze maa hɔn? (James 5:13-15)

¹¹ James dze afotu a no mu da hɔ mae. Sɛ yɛhwɛ James ne krataa no mu a, ɔda edzi dɛ nna onyim nsɛndzendzen a ne mfɛfo agyedzifo no rihyia, na ɔmaa hɔn akwankyerɛ a ɔbɔboa hɔn ma woeetum edzi nsɛndzendzen a ɔtse dɛm do. Dɛ nhwɛdo no, nna Christianfo binom wɔ hɔ a wɔtwentweɔn hɔn ananadze dɛ wɔdze afotu bɛyɛ edwuma. (Jas. 1:22) Binom so wɔ hɔ a nna wɔnye esikafo dzi no yie kyɛn ehiafo. (Jas. 2:1-3) Afofor so dze, nna ɔyɛ dzen ma hɔn dɛ wɔbɔhwɛ hɔn ano kasa yie. (Jas. 3:8-10) Nna asɛm yi yɛ enyibersɛm, naaso James kɔr do nyaa no nuanom Christianfo yi ho abotar. Ofii ayamuyie mu dze afotu a no mu da hɔ maa hɔn. Afei ɔhyɛɛ hɔn a nna wɔayɛ mberɛw wɔ Jehovah no som mu no nkuran dɛ wɔnhwehwɛ mboa mfi asafo mu mpanyimfo hɔ.​—Kenkan James 5:13-15.

12. Sɛ yɛroboa hɛn Bible esuafo ma wɔaayɛ nsesa wɔ hɔn asetsena mu a, yebesi dɛn akɔ do enya hɔnho adwen pa?

¹² Esuadze a ɔwɔ mu: Fa afotu a no mu da hɔ ma afofor, naaso nya hɔnho adwen pa. Bi a ɔbɛyɛ dzen ama Bible esuafo no mu binom dɛ wɔdze Bible mu afotu bɛyɛ edwuma. (Jas. 4:1-4) Bi a ɔbɛgye hɔn mber dodow bi ana woeegyaa ndzeyɛɛbɔn bi yɛ na wɔaada su pa edzi. Ɔwɔ dɛ yesũasua James na yenya akokodur kã nsesa a ohia dɛ hɛn Bible esuafo no yɛ wɔ hɔn asetsena mu no ho asɛm kyerɛ hɔn. Afei so, ɔwɔ dɛ yenya adwen pa na yɛgye dzi dɛ Jehovah bɔtwe hɔn a wɔbrɛ hɔnho adze no aba ne nkyɛn, na ɔaahyɛ hɔn dzen ma wɔaayɛ nsesa a ohia wɔ hɔn asetsena mu no.​—Jas. 4:10.

13. Dɛ mbrɛ James 3:2 kyerɛ no, nna ebɛnadze na James gye to mu?

¹³ James emmbu noho dɛ ɔkyɛn afofor. James anntse nka dɛ osian ebusua a ofi mu anaa ɔsom ho kwan a nna ɔwɔ ntsi ɔyɛ soronko fi no nuanom no ho anaa ɔkyɛn hɔn. Ɔkãa ne mfɛfo Christianfo ho asɛm dɛ wɔyɛ no “nuanom adɔfo.” (Jas. 1:16, 19; 2:5) Ɔannyɛ biribiara annkyerɛ dɛ ɔnodze asɛm biara nnyi noho. Mbom  ɔkãa ɔno na ne mfɛfo Christianfo nyina ho asɛm dɛ: “Hɛn nyina yɛfom ndzɛmba pii mu.”​—Kenkan James 3:2.

14. Ebɛnadze ntsi na ɔwɔ dɛ yɛgye to mu dɛ hɛn so yedzi mfom?

¹⁴ Esuadze a ɔwɔ mu: Ma ɔntsena w’adwen mu dɛ hɛn nyina yɛfom. Onnyi dɛ yenya adwen dɛ yɛsen hɛn Bible esuafo. Ebɛnadze ntsi a? Sɛ yɛma hɛn Bible esuafo nya adwen dɛ, hɛndze yenndzi mfom a, hɔn abaw mu botum ebu, na wobotum enya adwen dɛ wonnkotum ayɛ dza Nyankopɔn hwehwɛ fi hɔn hɔ no. Naaso, sɛ yɛma hɛn Bible esuafo hu dɛ, ɔnnyɛ aber nyina na ɔyɛ mberɛw ma hɛn dɛ yɛdze Kyerɛwnsɛm mu ngyinadonsɛm bɔbɔ hɛn bra, na yɛma wohu mbrɛ Jehovah esi aboa hɛn ma yeedzi nsɛndzendzen ahorow do a, yɛbɔboa hɔn ma woeehu dɛ, hɔn so botum abɔsom Jehovah.

15. Ebɛkã mfatoho ahorow a James dze dzii dwuma no ho asɛm dɛn? (James 3:2-6, 10-12)

¹⁵ James dze mfatoho a ɔka akoma dzii dwuma wɔ ne nkyerɛkyerɛ mu. Ɔda edzi kofee dɛ sunsum krɔnkrɔn na ɔboaa no. Yenyim dɛ Jesus dze mfatoho pii dzii dwuma wɔ ne nkyerɛkyerɛ mu. Obotum aba dɛ James sũaa pii fii no hɔ. Mfatoho ahorow a James dze dzii dwuma wɔ ne nkrataa no mu no, nna n’asetse nnyɛ dzen, na esuadze a ɔwɔ mu no so, no mu da hɔ.​—Kenkan James 3:2-6, 10-12.

16. Ebɛnadze ntsi na ɔwɔ dɛ yɛdze mfatoho a otu mpon dzi dwuma?

¹⁶ Esuadze a ɔwɔ mu: Fa mfatoho a otu mpon dzi dwuma wɔ wo nkyerɛkyerɛ mu. Sɛ yɛdze mfatoho a otu mpon dzi dwuma wɔ hɛn nkyerɛkyerɛ mu a, yɛboa nkorɔfo ma wɔtse esuadze a ɔwɔ mu no ase, na wotum twa ho mfonyin wɔ hɔn adwen mu so. Iyi botum aboa hɛn etsiefo ma wɔakaa Bible mu nokwasɛm a no ho hia no. Sɛ ɔba no mfatoho a otu mpon a wɔdze dzi dwuma wɔ nkyerɛkyerɛ mu a, nna Jesus aben wɔ mu papaapa, na James sũasuaa no. Hom mma yensusu James ne mfatoho no mu kor ho, na yɛnhwɛ siantsir a otu mpon.

17. Ebɛnadze ntsi na mfatoho a ɔwɔ James 1:22-25 no tu mpon paa?

¹⁷ Kenkan James 1:22-25. Ahwehwɛ a James dze yɛɛ mfatoho no, yɛwɔ siantsir pii ntsi a yebotum akã dɛ otu mpon. Nna ɔrotwe adwen esi esuadze pɔtsee bi do. Ɔnye dɛ, sɛ yebenya Nyankopɔn n’Asɛm do mfaso a, onnyi dɛ yɛkenkan no kɛkɛ. Mbom, ɔwɔ dɛ yɛdze  dza yɛkenkan no bɔ hɛn bra. Mfatoho a James dze dzii dwuma no, nna ɔnnyɛ dzen koraa dɛ n’etsiefo bɛtse ase. Nna ɔfa obi a ɔhwɛ n’enyim wɔ ahwehwɛ mu ho. Nna James pɛ dɛ ɔkyerɛ dɛn? Sɛ obi hwɛ n’enyim wɔ ahwehwɛ mu, na ohu dɛ biribi nnkɔ yie na ɔaannyɛ ho hwee a, ɔyɛ adze gyangyan koraa. Dɛmara so na sɛ obi kenkan Nyankopɔn n’Asɛm, na ohu nsesa bi a ɔwɔ dɛ ɔyɛ, na ɔaannyɛ a, ɔyɛ adze gyangyan koraa.

18. Sɛ yɛdze mfatoho ridzi dwuma a, ebɛn ndzɛmba ebiasa na ɔwɔ dɛ yɛyɛ?

¹⁸ Sɛ yɛdze mfatoho ridzi dwuma a, yebotum esũasua James na yaayɛ ndzɛmba ebiasa yi: (1) Ɔwɔ dɛ yɛhwɛ hu dɛ mfatoho no fata na osi asɛm a yɛrekã no do dua. (2) Mfatoho a yɛdze bedzi dwuma no, ɔwɔ dɛ ɔyɛ dza hɛn etsiefo botum atse ase. (3) Esuadze a ɔwɔ mfatoho no mu no, ɔwɔ dɛ yɛma no mu da hɔ. Sɛ ɔyɛ dzen ma wo dɛ ibenya mfatoho ahorow a ɔfata a edze bedzi dwuma wɔ wo nkyerɛkyerɛ mu a, hwɛ Watch Tower Publications Index no mu. Kɔ ɔfã a wɔato dzin “Illustrations” (Mfatoho Ahorow), na ibenya pii wɔ hɔ dze edzi dwuma. Yebotum dze mfatoho atoto akasamu ho. Sɛ edze akasamu dzi dwuma a, ɔnnyɛ dzen dɛ obiara bɛtse asɛm a erekã no. Dɛmara so na sɛ edze mfatoho dzi dwuma a, ɔnnyɛ dzen dɛ etsiefo bɛtse dza erekã no ase. Sɛ yɛdze mfatoho pii dzi dwuma a, hɛn etsiefo hɔn adwen botum etu afora. Dɛm ntsi, nsɛntsitsir a yɛpɛ dɛ wɔtse ase nkotsee na ɔwɔ dɛ yɛdze mfatoho dzi dwuma dze kyerɛkyerɛ mu. Nokwasɛm nye dɛ, botae tsitsir a ntsi yɛpɛ dɛ yetu mpon wɔ hɛn nkyerɛkyerɛ mu nye dɛ, yɛbɔboa nyimpa pii ma wɔaabɔsom Jehovah, na nnyɛ dɛ yɛbɔtwe afofor adwen aba hɛn do.

19. Ebɛnadze na yɛyɛ dze kyerɛ dɛ yɛdɔ hɛn nuanom?

¹⁹ Hɛndze, yɛnntse dɛ James, osiandɛ nna no nua panyin Jesus dzi mũ. Naaso, yeenya ho kwan dɛ yɛnye hɛn nuanom Christianfo abɔ mu rosom Jehovah. Yɛnye hɔn bɔ fɛkuw, yesũasua hɔn, na yefi nokwardzi mu nye hɔn bɔ mu yɛ asɛnka nye ɔkyerɛkyerɛ edwuma no. Yɛyɛ iyinom nyina dze kyerɛ dɛ yɛdɔ hɔn. Sɛ yɛbɔ mbɔdzen sũasua James wɔ hɛn abrabɔ, hɛn ndzeyɛɛ nye mbrɛ yesi kyerɛkyerɛ no mu a, yɛbɛhyɛ Jehovah enyimnyam. Afei so, yebotum aboa nyimpa a wɔwɔ akoma pa ma wɔaatwe abɛn hɛn sor Egya a ɔwɔ ɔdɔ no.