1-2. (a) Ebɛn aber paa na yɛkaa hɛn dɔfo bi a oewu? (b) Anafua a adze rebɛkye ma Jesus ewu no, ebɛnadze na ɔyɛe?

 ƆMMFA ho ber tsentsen a hɛn adɔfo ewu no, yɛda ho ara kaa hɔn. Afe biara, sɛ odu da a wowui no a, yɛkaa hɔn paa.

² Afe biara yɛnye nyimpa ɔpepem pii hyia mu kaa obi a yɛdɔ no paa no wu. Dɛm nyimpa no nye Jesus Christ. (1 Pet. 1:8) Yehyia mu kaa nyia ɔdze no nkwa yɛɛ werdam gyee hɛn fii bɔn na owu mu no. (Matt. 20:28) Nokwasɛm nye dɛ, nna Jesus pɛ dɛ n’ekyirdzifo kaa no wu no. Anafua a adze rebɛkye ma Jesus ewu no, ɔdze afahyɛ tsitsir bi sii hɔ na ɔhyɛɛ n’ekyirdzifo dɛ: “Hom nyɛ yi mfa nyɛ me nkaa.”​—Luke 22:19.

3. Ebɛnadze na yebosusu ho wɔ adzesua yi mu?

³ Hɔn a wɔkɔ Christ no wu ho Nkaadzi no, hɔn mu kakraabi pɛ na wɔwɔ enyidado dɛ wɔbɔkɔ sor. Naaso, nyimpa ɔpepem pii a wɔwɔ enyidado dɛ wɔbɛtsena asaase do no so kɔ Nkaadzi no ase. Adzesua yi mu no, yɛbɔhwɛ siantsir a ekuw ebien no nyina ho per hɔn dɛ wɔbɔkɔ Nkaadzi no afe biara. Afei so, yɛbɔhwɛ mfaso a sɛ yɛkɔ a yenya. Odzi kan, hom mma yɛnhwɛ siantsir a hɔn a wɔasera hɔn no kɔ Nkaadzi no ase afe biara.

4. Ebɛnadze ntsi na hɔn a wɔasera hɔn no dzi paanoo no na wɔnom wenyin no bi wɔ Nkaadzi no ase?

⁴ Afe biara, hɔn a wɔasera hɔn no hwɛ kwan dɛ wɔbɔkɔ  Nkaadzi no ase na woedzi paanoo no na wɔaanom wenyin no bi. Ebɛnadze ntsi na ɔyɛ no kwan do dɛ wodzi paanoo no na wɔnom wenyin no bi? Ma yensusu dza osii wɔ anafua a otwa tun wɔ Jesus n’asaase do asetsena mu no ho, na ɔbɔboa hɛn ma yeenya dɛm asɛmbisa yi ho mbuae. Wodzii edziban a wɔdze yɛɛ Apaho no wiei no, Jesus dze afahyɛ a ndɛ yɛfrɛ no Ewuradze Edzidzi no sii hɔ. Jesus maa n’asomafo anokwafo 11 no paanoo ma wodzii na wenyin ma wɔnomee. Jesus kãa ahyɛmu ebien bi ho asɛm kyerɛɛ hɔn. Ɔno nye ahyɛmu fofor no nye Ahendzi ahyɛmu no. * (Luke 22:19, 20, 28-30) Ahyɛmu ebien yi na ebue kwan ama asomafo no nye nyimpa kakraabi dɛ wɔnkɛyɛ ahemfo nye asɔfo wɔ sor. (Nyi. 5:10; 14:1) Hɔn a wɔasera hɔn no hɔn nkaafo * no nkotsee na ɔwɔ dɛ wodzi paanoo no na wɔnom wenyin no bi wɔ Nkaadzi no ase, osiandɛ wɔka ahyɛmu ebien yi ho.

5. Enyidado a Jehovah ama hɔn a wɔasera hɔn no enya no, ebɛnadze na wonyim wɔ ho?

⁵ Siantsir kor so a hɔn a wɔasera hɔn no ho per hɔn dɛ wɔbɔkɔ Nkaadzi no nye yi: Nkaadzi no ma wonya ho kwan dwendwen enyidado a wɔwɔ no ho. Jehovah ama hɔn enyidado soronko bi. Ɔno nye dɛ wobenya bɛkyebo nkwa, kyerɛ dɛ, nkwa a owu nnyi mu, nye nyimpadua a ɔmmprɔw wɔ sor. Afei so, wɔbɔkɔ akɛka Jesus Christ a wɔahyɛ no enyimnyam no nye hɔn mfɛfo 144,000 no mufo a wɔwɔ sor dada no ho ma wɔaabɔ mu edzi adze. Na dza ɔkyɛn ne nyina no, wobenya ho kwan egyina Jehovah Nyankopɔn enyim! (1 Cor. 15:51-53; 1 John 3:2) Hɔn a wɔasera hɔn no nyim dɛ Jehovah bɛma woenya ho kwan a ɔtse dɛm wɔ sor. Naaso, ansaana wobenya hɔn sor akatua no, ɔsɛ dɛ wɔkɔ do dzi nokwar kesi owu mu. (2 Tim. 4:7, 8) Sɛ hɔn a wɔasera hɔn no dwendwen hɔn enyidado no ho a, ɔma hɔn enyi gye. (Titus 2:13) ‘Nguan fofor’ no so ɛ? (John 10:16) Ebɛnadze ntsi na wɔkɔ Nkaadzi no bi?

6. Ebɛnadze ntsi na nguan fofor no kɔ Nkaadzi no ase afe biara?

⁶ Sɛ nguan fofor no kɔ Nkaadzi no bi a, wondzi paanoo no na wɔnnom wenyin no bi, mbom wɔkɔ dɛ bɔhwɛadzefo. Afe 1938 no, wɔhyɛɛ da ara too nsa frɛɛ hɔn a wɔwɔ asaase do enyidado no dɛ wɔmbra Nkaadzi no bi. Iyi yɛ ber a odzi kan a wɔtoo nsa frɛɛ hɔn. March 1, 1938 Ɔweɔn-Aban no kãa dɛ: “Ɔyɛ no kwan do dɛ [nguan fofor no] bɔkɔ afahyɛ a ɔtse dɛm ase na wɔaakɔhwɛ dza ɔkɔ do. . . . Ɔyɛ da tsitsir ma hɔn so na ɔwɔ dɛ wɔma hɔn enyi gye.” Tse dɛ anyɛnkofo a wɔdze enyigye kɔ hɔn nyɛnko n’ayefor kɔhwɛ dza ɔbɔkɔ do no, dɛmara na nguan fofor no so dze enyigye kɔ Nkaadzi no ase dɛ bɔhwɛadzefo.

7. Ebɛnadze ntsi na nguan fofor no dze enyigye hwɛ Nkaadzi ho ɔkasa no kwan?

⁷ Nguan fofor no so dwendwen enyidado a wɔwɔ no ho. Wɔdze enyigye hwɛ Nkaadzi ho ɔkasa no kwan, osiandɛ ɔkasa no mu nsɛm dodowara twe adwen si dza Christ nye ne mfɛfo adzedzifo 144,000 no bɛyɛ ama nyimpa anokwafo wɔ Mfrenhyia Apem Tumdzi no mu no do. Wɔ Jesus Christ no tumdzi ase no, hɔn a ɔnye hɔn bɔbɔ mu edzi adze no bɔboa ma wɔaadan asaase yi Paradise na  wɔaama hɔn a wɔyɛ setsie no ayɛ nyimpa a wodzi mũ. Sɛ bɔhwɛadzefo ɔpepem pii kɔ Nkaadzi no ase na wɔdwendwen Bible mu nkɔnhyɛ ahorow a obenya ne mbamu daakye no ho a, ɔma hɔn enyi gye. Dɛm nkɔnhyɛ no mu bi nye Isaiah 35:5, 6; 65:21-23; nye Nyikyerɛ 21:3, 4. Sɛ wotwa ho mfonyin dɛ wɔnye hɔn adɔfo wɔ wiadze fofor no mu a, ɔno hyɛ daakye ho enyidado a wɔwɔ no mu dzen na ɔboa hɔn ma wosi hɔn bo dɛ wɔbɔkɔ do asom Jehovah.​—Matt. 24:13; Gal. 6:9.

8. Ebɛn siantsir fofor ntsi na nguan fofor no kɔ Nkaadzi no?

⁸ Hom mma yɛnhwɛ siantsir fofor ntsi a nguan fofor no kɔ Nkaadzi no. Wɔpɛ dɛ wɔkyerɛ dɛ wɔdɔ hɔn a wɔasera hɔn no na wɔtaa hɔn ekyir. Bible no kãe too hɔ dɛ hɔn a wɔasera hɔn no nye hɔn a wɔwɔ enyidado dɛ wɔbɛtsena asaase do no benya ebusuabɔ a no mu yɛ dzen. Ebɛn kwan do? Hom mma yensusu nhwɛdo kakra a ɔkyerɛ dɛm ho.

9. Ebɛnadze na nkɔnhyɛ a ɔwɔ Zechariah 8:23 no ma yehu fa mbrɛ nguan fofor no bu hɔn nuanom a wɔasera hɔn no?

⁹ Kenkan Zechariah 8:23. Dɛm nkɔnhyɛ yi kã mbrɛ nguan fofor no bu hɔn nuanom a wɔasera hɔn no ho asɛm ma ɔyɛ enyigye. Nkasafua “Jewnyi baako” na “hom” a ɔwɔ nkɔnhyɛ yi mu no gyina hɔ ma kuw kor no ara. Hɔn nye Christianfo a wɔasera hɔn a wɔaka wɔ asaase do no. (Rom. 2:28, 29) “Mbarimba du a wofi amanaman kasaa nyina mu” no gyina hɔ ma nguan fofor no. Nguan fofor no “bosusuo” Christianfo a wɔasera hɔn no atar ano, kyerɛ dɛ, wobefi nokwardzi mu dze hɔnho afam hɔn a wɔasera hɔn no ho na wɔnye hɔn aabɔ mu asom Jehovah wɔ nokwar mu. Ntsi nguan fofor no kɔ Nkaadzi no ase dze kyerɛ dɛ wɔdze hɔnho afam hɔn a wɔasera hɔn no ho.

10. Ebɛnadze na Jehovah ayɛ ma nkɔnhyɛ a ɔwɔ Ezekiel 37:15-19, 24, 25 no aba mu?

¹⁰ Kenkan Ezekiel 37:15-19, 24, 25. Jehovah ama dɛm nkɔnhyɛ yi aba mu na ɔama hɔn a wɔasera hɔn no nye nguan fofor no abɔ mu reyɛ edwuma. Nkɔnhyɛ no kã poma anaa ndua ebien ho asɛm. Hɔn a wɔwɔ enyidado dɛ wɔbɔkɔ sor no tse dɛ dua a wɔakyerɛw ho “Judah dze” (ebusuakuw a nna wɔpaw Israel ahemfo fi mu) no. Hɔn a wɔwɔ enyidado dɛ wɔbɛtsena asaase do no so tse dɛ dua a wɔakyerɛw ho “Ephraim” dze no. * Jehovah bɛka ekuw ebien yi abɔ mu dɛ ‘dua kor.’ Iyi kyerɛ dɛ ekuw ebien nyina dze koryɛ bɔ mu som wɔ hɔn Hen, Christ Jesus no tumdzi ase. Afe biara hɔn a wɔasera hɔn no nye nguan fofor no kɔ Nkaadzi no ase. Naaso wɔnnkɔ dɛ ekuw ebien mbom wɔkɔ dɛ “okuw kor” a wɔwɔ “oguanhwɛfo kor.”​—John 10:16.

11. Ebɛnadze tsitsir na nguan a wɔakã hɔnho asɛm wɔ Matthew 25:31-36, 40 no yɛ dze boa Christ no nuanom no?

¹¹ Kenkan Matthew 25:31-36, 40. “Nguan” a Jesus kãa hɔnho asɛm wɔ ha no gyina hɔ ma atseneneefo a wɔwɔ hɔ wɔ ewiei mber yi mu na wɔwɔ enyidado dɛ wɔbɛtsena asaase do. Hɔn nye nguan fofor no. Wofi nokwardzi mu kɔ do boa Christ no nuanom no. Kwan tsitsir a wɔfa do yɛ dɛm nye dɛ wɔboa hɔn ma wɔyɛ edwuma kɛse a wɔdze ahyɛ hɔn nsa a ɔnye asɛnka nye esuafoyɛ edwuma a ɔrokɔ do wɔ wiadze nyina no.​—Matt. 24:14; 28:19, 20.

12-13. Ebɛn ndzɛmba bio na nguan fofor no yɛ dze boa Christ no nuanom no?

 ¹² Afe biara, aka adapɛn kakra ma Nkaadzi no aso no, nguan fofor no dze hɔnho hyɛ ɔsatu a wɔyɛ wɔ wiadze nyina mu no mu, na wɔto nsa frɛ nyimpa akomapafo ba Nkaadzi no ase. Wɔyɛ dɛm dze boa Christ no nuanom no. (Hwɛ adakaba a wɔato dzin “ Ana Irisiesie Woho Ama Nkaadzi No?”) Afei so, nguan fofor no boa ma wɔyɛ Nkaadzi no ho nhyehyɛɛ nyina wɔ beebi a wɔwɔ no. Sɛ ɔba no dɛ hɔn a wɔasera hɔn no bi nnyi hɔn asafo no mu mpo a, wɔyɛ nhyehyɛɛ a ɔtse dɛm. Nguan fofor no enyi gye ho dɛ wɔbɛyɛ ndwuma a ɔtse dɛm dze aboa Christ no nuanom no. Nguan fofor no nyim dɛ Jesus hu dza wɔyɛ dze boa no nuanom no dɛ wɔyɛ ma noara.​—Matt. 25:37-40.

¹³ Sɛ dza yeesusu ho yi da nkyɛn a, ebɛnadze bio na ɔma nguan fofor no nye hɔn a wɔasera hɔn no nyina kɔ Nkaadzi no?

14. Ebɛnadze na Jehovah na Jesus ayɛ dze akyerɛ dɛ wɔdɔ hɛn paa?

¹⁴ Yɛda Jehovah na Jesus ase wɔ ɔdɔ a wɔada no edzi akyerɛ hɛn no ho. Jehovah ayɛ ndzɛmba pii dze akyerɛ dɛ ɔdɔ hɛn. Naaso, dza ɔkyɛn ne nyina nye no Dɔba no a ɔmaa obohun amandze na owui maa hɛn no. (John 3:16) Jesus so kyerɛɛ dɛ ɔdɔ hɛn paa dze nam ne pɛ mu a ofii dze no nkwa too hɔ maa hɛn no do. (John 15:13) Ɔdɔ a Jehovah na Jesus ada no edzi akyerɛ hɛn no, yennkotum etua ho kaw da. Naaso, yebotum dze dza yɛyɛ wɔ hɛn asetsena mu da biara da no akyerɛ dɛ hɛn enyiwa sɔ ɔdɔ a wɔada no edzi akyerɛ hɛn no. (Col. 3:15) Afei so, yɛkɔ Nkaadzi no ase mbrɛ ɔbɛyɛ a yɛbɛkaa ɔdɔ a wɔada no edzi akyerɛ hɛn no, na hɛn so yaakyerɛ dɛ yɛdɔ hɔn.

15. Ebɛnadze ntsi na hɔn a wɔasera hɔn no nye nguan fofor no nyina bu werdam no dɛ ɔsom bo kɛse?

¹⁵ Yebu werdam no dɛ ɔsom bo na hɛn enyi sɔ. (Matt. 20:28) Hɔn a wɔasera hɔn no bu werdam no dɛ ɔsom bo, osiandɛ ɔno na wɔama woenya enyidado dɛ wɔbɔkɔ sor. Jehovah ebu hɔn atseneneefo na ɔafa hɔn dɛ ne mba osian gyedzi a wɔwɔ wɔ Christ n’afɔrbɔ no mu ntsi. (Rom. 5:1; 8:15-17, 23) Nguan fofor no so enyi sɔ werdam no. Osiandɛ wɔwɔ gyedzi wɔ Christ n’afɔrbɔ no mu ntsi, wɔwɔ gyinabew pa wɔ Nyankopɔn enyim na wobotum dze ɔsom a no ho tsew ama no. Afei so, wɔwɔ enyidado dɛ wɔbɛgye hɔn nkwa wɔ “ahohia kɛse no” mu. (Nyi. 7:13-15) Kwan kor a hɔn a wɔasera hɔn no nye nguan fofor no kyerɛ dɛ hɔn enyi sɔ werdam no nye dɛ wɔbɔkɔ Nkaadzi no bi afe biara.

16. Adze fofor ntsi a yɛkɔ Nkaadzi no nye dɛn?

¹⁶ Adze fofor ntsi a yɛkɔ Nkaadzi no nye dɛ yɛpɛ dɛ yetsie Jesus. Dɛ yɛbɔkɔ sor o, dɛ yɛbɛtsena asaase do o, yɛma ahyɛdze a Jesus dze mae wɔ anafua a ɔdze Nkaadzi no sii hɔ no tsena hɛn adwen mu. Ɔkãa dɛ: “Hom nyɛ yi mfa nyɛ me nkaa.”​—1 Cor. 11:23, 24.

17. Ebɛn kwan do na Nkaadzi no boa hɛn ma yɛtwe bɛn Jehovah?

¹⁷ Nkaadzi no ma yɛtwe bɛn Jehovah. (Jas. 4:8) Dɛ mbrɛ yeebohu wɔ adzesua yi mu no, Nkaadzi no ma yenya ho kwan dwendwen enyidado a Jehovah ama yeenya nye ɔdɔ kɛse a ɔada no edzi akyerɛ hɛn no ho. (Jer. 29:11; 1 John 4:8-10) Sɛ yɛdwendwen hɛn daakye enyidado a osi pi nye Nyankopɔn no dɔ a ɔmmbɔ adze no ho a, ɔboa hɛn ma yɛdɔ  Jehovah kɛse na yɛhyɛ yɛnye no ntamu ebusuabɔ no mu dzen.​—Rom. 8:38, 39.

18. Sɛ yɛdwendwen dza Jesus yɛe no ho a, ebɛnadze na ɔka hɛn ma yɛyɛ?

¹⁸ Nkaadzi no ma yɛdwendwen dza Jesus yɛe no ho. (1 Pet. 2:21) Aka nda kakra ma Nkaadzi no edu no, yɛdze hɛn adwen si dza osisii wɔ Jesus n’asetsena mu wɔ dapɛn a otwa tun wɔ n’asaase do asetsena mu no do. Afei so, yɛdwendwen no wu nye no wusoɛr ho. Sɛ Nkaadzi da no du a, wɔma Nkaadzi no ho ɔkasa ewimbir no na ɔma yɛkaa ɔdɔ a Jesus wɔ ma hɛn no. (Eph. 5:2; 1 John 3:16) Sɛ yɛkenkan dza Jesus yɛe maa hɛn no ho asɛm na yɛdwendwen ho a, ɔsɛ dɛ ɔka hɛn ma yɛkɔ do nantsew “dɛ mbrɛ ɔno so nantsewee” no.​—1 John 2:6.

19. Yebesi dɛn akɔ do atsena Nyankopɔn no dɔ mu?

¹⁹ Nkaadzi no ma yesi hɛn bo dɛ yɛbɔkɔ do atsena Nyankopɔn no dɔ mu. (Jude 20, 21) Sɛ yɛyɛ dza yebotum biara dɛ yebetsie Nyankopɔn, yɛbɛtsew ne dzin ho na yaama n’enyi agye a, ɔkyerɛ dɛ yɛpɛ dɛ yɛkɔ do tsena no dɔ mu. (Mbɛ. 27:11; Matt. 6:9; 1 John 5:3) Nkaadzi no ma yesi hɛn bo dɛ yɛbɛyɛ Jehovah n’apɛdze da biara da. Sɛ yɛyɛ dɛm a, nna yɛrekã akyerɛ no dɛ, ‘Yɛpɛ dɛ yɛkɔ do tsena wo dɔ mu afebɔɔ!’

20. Ebɛn siantsir papa bi ntsi na yɛkɔ Nkaadzi no?

²⁰ Sɛ yɛwɔ enyidado dɛ yɛbɔkɔ sor o, yɛbɛtsena asaase do o, yɛwɔ siantsir papa bi ntsi a yɛkɔ Nkaadzi no. Afe biara sɛ Nkaadzi no sõ ma yehyia mu a, yɛkaa hɛn dɔfo bi no wu. Dɛm nyimpa no nye Jesus Christ. Dza ɔkyɛn ne nyina no, yɛkaa ɔdɔ kɛse a Nyankopɔn ada no edzi akyerɛ hɛn no. Ɔno nye dɛ ɔmaa ne Ba no bowui gyee hɛn nkwa. Afe yi, yɛbɛyɛ Nkaadzi no Fida, April 15, 2022 ber a ewia akɔtɔ. Yɛdɔ Jehovah nye ne Ba no. Ntsi, ɔwɔ dɛ yɛma Nkaadzi no ho hia hɛn kyɛn biribiara, na sɛ ber sõ a ɔnnsɛ dɛ yɛma ɔpa hɛn tsir do da.