1-2. (a) Sɛ yɛdwendwen Jesus n’asetsena nye no som edwuma ho a, ɔma yɛtse nka dɛn? (b) Ebɛnadze na yebosusu ho wɔ adzesua yi mu?

 SƐ HƐN dɔfo bi wu a, ɔyɛ a yɛfe no paa! Sɛ yɛkaa dza ɔfaa mu ansaana oruwu a, ɔyɛ hɛn yaw paa. Ma ɔtsew akoma paa nye ber a hɛn dɔfo no faa atseetsee mu ana oruwu no. Naaso ber rokɔ do no, sɛ yɛkaa biribi a ɔkyerɛɛ hɛn, biribi a ɔyɛe anaa asɛm bi a ɔkae dze hyɛɛ hɛn nkuran anaa asɛm bi a ɔkae ma yɛserewee a, ɔma yɛsan nya enyigye.

² Dɛmara na sɛ yɛkenkan amandze a Jesus faa mu nye no wu no ho asɛm a, ɔma hɛn werɛ how. Yɛgye ber dwendwen mfaso a ɔwɔ Jesus no werdam afɔrbɔ no do no ho, naaso Nkaadzi ber no mu paa na yɛyɛ dɛm. (1 Cor. 11:24, 25) Sɛ yɛkɔ do dwendwen ndzɛmba a Jesus yɛe nye nsɛm a ɔkae aber a nna ɔwɔ asaase do no nyina ho a, ɔma hɛn enyi gye papaapa. Afei so, sɛ yɛdwendwen dza ɔreyɛ no ndɛ nye dza ɔbɛyɛ ama hɛn daakye no ho a, ɔhyɛ hɛn nkuran kɛse. Adzesua yi bɛma yeehu dɛ, sɛ yɛdwendwen ndzɛmba ahorow a ɔtsetse dɛm nye ɔdɔ a ɔwɔ ma hɛn no ho a, obekenyan hɛn ma yaayɛ ndzɛmba ahorow bi dze akyerɛ ho enyisɔ.

3. Ebɛnadze ntsi na ɔsɛ dɛ yɛkyerɛ werdam no ho enyisɔ?

³ Sɛ yɛdwendwen Jesus n’asetsena nye no wu no ho a, ɔma hɛn enyi sɔ dza ɔyɛe maa hɛn no. Aber a Jesus reyɛ n’asaase do som edwuma no nyina, ɔkyerɛkyerɛɛ nkorɔfo ma wohun nhyira a Nyankopɔn n’Ahendzi no dze bɛba. Hɛn enyi gye dza Bible no kyerɛkyerɛ fa werdam no nye mfaso a ɔwɔ do no ho paa. Hɛn enyi sɔ werdam afɔrbɔ no osiandɛ obue kwan ma hɛn ma yetum nye Jehovah na Jesus nya ebusuabɔ a no mu yɛ dzen. Hɔn a wɔgye Jesus dzi no wɔ enyidado dɛ wɔbɛtsena ase  daa. Wɔsan so wɔ enyidado dɛ wobohu hɔn adɔfo a woewuwu no bio. (John 5:28, 29; Rom. 6:23) Biribiara nnyi hɔ a yɛayɛ a ɔkyerɛ dɛ yɛfata dɛm nhyira yi. Dɛmara so na yerunntum nntua Nyankopɔn na Christ kaw wɔ dza wɔayɛ ama hɛn no ho. (Rom. 5:8, 20, 21) Naaso yebotum akyerɛ hɔn mbrɛ hɛn enyi si sɔ dza wɔayɛ ama hɛn no. Yɛbɛyɛ no dɛn?

4. Ebɛnadze na Mary Magdalene yɛe dze kyerɛɛ dɛ n’enyi sɔ dza Jesus ayɛ ama no no? (Hwɛ mfonyin no.)

⁴ Hom mma yensusu Jewnyi ɔbaa bi a wɔfrɛ no Mary Magdalene n’asɛm no ho. Nna oruhu amandze papaapa osiandɛ nna esunsum fi esuon retseetsee no. Bi a ɔtsee nka dɛ obiara nnyi hɔ a obotum aboa no. Naaso Jesus tuu dɛm esunsum fi no fii no mu ma noho tɔɔ no koraa. Ɔwodze hwɛ enyigye ara onyae dɛ Jesus tumii boaa no! Ɔbɛyɛɛ Jesus no suanyi, na ɔdze ne ber, n’ahoɔdzen na n’ahodze boaa Jesus wɔ ɔsom edwuma no mu dze kyerɛɛ dɛ n’enyi sɔ dza ɔayɛ ama no no. (Luke 8:1-3) Mary kyerɛɛ dza Jesus yɛe maa no no ho enyisɔ paa, ɔmmfa ho mpo dɛ bi a nna onnyim adze kɛse a Jesus bɛyɛ ama no daakye no. Nna Jesus dze no nkwa bɔbɔ afɔr ama adasamba, “ama obiara a ɔgye no dzi no” eenya onnyiewiei nkwa. (John 3:16) Naaso, Mary kɔr do dzii Jesus nokwar dze kyerɛɛ dɛ n’enyi sɔ dza ɔayɛ ama no no. Aber a nna Jesus wɔ asɛndua no do a oruhu amandze no, nna Mary gyina ne nkyɛn, osiandɛ nna ɔdwen Jesus noho na ɔpɛ dɛ ɔkyekye afofor so werɛ. (John 19:25) Jesus wui no, Mary nye mbaa beenu bi dze eduhuam baa Jesus ne nda no do dɛ wɔdze rebɛsera noho. (Mark 16:1, 2) Osiandɛ Mary kɔr do dzii Jesus nokwar ntsi, Jehovah hyiraa no paa. Aber a wonyaan Jesus no, Mary nyaa hokwan hun Jesus enyim na enyim na ɔnye no kasae. Esuafo no mu piinara ennya dɛm hokwan yi bi.​—John 20:11-18.

5. Ebɛnadze na yebotum ayɛ dze akyerɛ dɛ hɛn enyi sɔ dza Jehovah na Jesus ayɛ ama hɛn no?

⁵ Hɛn so, yebotum dze hɛn ber, hɛn ahoɔdzen nye hɛn sika dze aboa atserɛw Jehovah  no som mu dze akyerɛ dɛ hɛn enyi sɔ dza Jehovah na Jesus ayɛ ama hɛn no. Dɛ nhwɛdo no, yebotum etu hɛnho ama akɔboa ma woeesisi mbea ahorow a yehyia mu som Jehovah no anaa yɛakɔboa ma woeesiesie.

6. Ebɛnadze ntsi na yebotum aka dɛ werdam no yɛ akyɛdze a Jehovah dze ama hɛn mu biara?

⁶ Sɛ yɛdwendwen mbrɛ Jehovah na Jesus si dɔ hɛn no ho a, okenyan hɛn ma hɛn so yɛdɔ hɔn bi. (1 John 4:10, 19) Sɛ yehu dɛ Jesus wui maa hɛn dɛ ankorankor a, ɔma yɛdɔ hɔn kɛse. Ɔsomfo Paul hun dɛm nokwasɛm yi, na ɔkyerɛɛ ho enyisɔ wɔ ne krataa a ɔkyerɛwee kɛmaa Galatiafo no mu. Ɔkaa dɛ: ‘Nyankopɔn ne Ba no dɔɔ me, na ɔdze noho too hɔ maa me.’ (Gal. 2:20) Osian Jesus n’afɔrbɔ no ntsi, Jehovah atwe wo aba ne nkyɛn mbrɛ ɔbɛyɛ a ibotum abɛyɛ Jehovah no nyɛnko. (John 6:44) Sɛ ibohu dɛ Jehovah hun biribi papabi wɔ mu, na otuaa bo kɛse a ɔkyɛn biara mbrɛ ɔbɛyɛ a ibotum abɛyɛ ne nyɛnko a, ana ɔnnka w’akoma? Ana iyi nnhyɛ ɔdɔ a ewɔ ma Jehovah na Jesus no mu dzen anaa? Ɔsɛ dɛ hɛn mu biara bisa noho dɛ, ‘Ɔdɔ a ɔtse dɛm no bɛhyɛ me ma maayɛ dɛn?’

7. Dɛ mbrɛ yehu wɔ mfonyin no mu no, ebɛnadze na hɛn nyina botum ayɛ dze akyerɛ dɛ yɛdɔ Jehovah na Jesus? (2 Corinthfo 5:14, 15; 6:1, 2)

⁷ Ɔdɔ a yɛwɔ ma Nyankopɔn na Christ no kenyan hɛn ma hɛn so yɛdɔ afofor. (Kenkan 2 Corinthfo 5:14, 15; 6:1, 2.) Ahokeka a yɛdze yɛ asɛnka edwuma no yɛ adze kor a ɔkyerɛ dɛ yɛdɔ afofor. Yɛka asɛmpa no kyerɛ obiara a yehyia no no. Sɛ yɛreka asɛmpa no a, yɛnnyɛ nyiyimu. Ɔmmfa ho ebusua a obi fi mu, no honamenyi hwɛbea, sika a ɔwɔ anaa no nwomasua no, yɛka asɛmpa no bi kyerɛ no. Nyankopɔn ne pɛ nye dɛ “wɔgye nyimpa nyina nkwa, na wɔba nokwar no no ho nyimdzee mu,” ntsi sɛ yɛka asɛmpa no kyerɛ obiara a,  nna yɛrema dɛm apɛdze no aba mu.​—1 Tim. 2:4.

8. Ebɛnadze na yebotum ayɛ dze akyerɛ dɛ yɛdɔ hɛn nuanom?

⁸ Adze fofor so a yɛyɛ dze kyerɛ dɛ yɛdɔ Nyankopɔn na Christ nye dɛ yɛdɔ hɛn nuanom a yɛnye hɔn som no paa. (1 John 4:21) Yɛyɛ ndzɛmba ahorow bi dze kyerɛ dɛ yɛdwen hɔnho paa, na yɛboa hɔn aber a worihyia ɔhaw no. Sɛ hɔn dɔfo bi wu a, yɛkyekye hɔn werɛ. Afei so sɛ wɔyar a, yɛkɛsera hɔn, na yɛyɛ dza yebotum biara hyɛ hɔn nkuran ber a hɔn abaw mu ebu no. (2 Cor. 1:3-7; 1 Thess. 5:11, 14) Yɛkɔ do bɔ mpaa ma hɔn, osiandɛ yenyim dɛ, ‘nyimpa tsenenee no nkotoserɛ wɔ tum kɛse.’​—Jas. 5:16.

9. Ebɛnadze bio na yebotum ayɛ dze akyerɛ dɛ yɛdɔ hɛn nuanom?

⁹ Mbɔdzen a yɛbɔ dɛ yɛbɛma asomdwee akɔ do atsena yɛnye hɛn nuanom ntamu no so kyerɛ dɛ yɛdɔ hɔn. Yɛyer hɛnho dɛ yebosuasua mbrɛ Jehovah si dze afofor hɔn bɔn kyɛ hɔn no. Jehovah fii ne pɛ mu maa ne Ba no bowui maa hɛn bɔn. Dɛm ntsi sɛ hɛn nuanom yɛ hɛn bɔn a, ɔsɛ dɛ hɛn so yefi hɛn akoma mu dze kyɛ hɔn koraa. Yɛmmpɛ dɛ yɛyɛ hɛn adze tse dɛ akowaa a ne tsirmu yɛ dzen a Jesus kaa noho asɛm wɔ no mfatoho kor bi mu no. Nna dɛm akowaa yi dze no wura kaw kɛse bi a orunntum nntua, naaso no wura no dze kyɛɛ no. Naaso, akowaa yi ammfa ne nyɛnko akowaa bi a ɔdze no kaw kakraabi no dze annkyɛ no. (Matt. 18:23-35) Sɛ enye obi enya akasakasa wɔ asafo no mu a, ibotum edzi kan ayɛ biribi dze esiesie hom ntamu ma asomdwee aba ansaana akɔ Nkaadzi no. (Matt. 5:23, 24) Sɛ eyɛ dɛm a, ɔbɛkyerɛ dɛ edɔ Jehovah na Jesus paa.

10-11. Ebɛnadze na asafo mu mpanyimfo botum ayɛ dze akyerɛ dɛ wɔdɔ Jehovah na Jesus? (1 Peter 5:1, 2)

¹⁰ Ebɛnadze na asafo mu mpanyimfo botum ayɛ dze akyerɛ dɛ wɔdɔ Jehovah na Jesus? Adze tsitsir a wobotum ayɛ dze akyerɛ dɛ wɔdɔ Jehovah na Jesus nye dɛ wɔbɔhwɛ Jesus no nguan na wɔdze hɔn ehiadze ama hɔn. (Kenkan 1 Peter 5:1, 2.) Jesus kaa iyi ho asɛm pefee kyerɛɛ ɔsomafo Peter. Peter poow Jesus mpɛn ebiasa no, ekyir yi nna noho per no dɛ ɔbɛda no edzi akyerɛ Jesus dɛ ɔdɔ no. Jesus no wusoɛr ekyir no, obisaa Peter dɛ: “Simon, John ne ba, ana edɔ me?” Yɛgye dzi paa dɛ nna Peter bɛyɛ biribiara dze akyerɛ dɛ ɔdɔ no Wura paa. Jesus kaa kyerɛɛ Peter dɛ: ‘Hwɛ mo nguan nkakraba.’ (John 21:15-17) Peter so dze no nkwa nda a aka no nyina daa ɔdɔ edzi kyerɛɛ Jesus no nguan no, na ɔdze dza wohia maa hɔn. Ɔyɛɛ dɛm dze kyerɛɛ dɛ nna ɔdɔ Jesus.

¹¹ Asafo mu mpanyimfo, hom besi dɛn ada no edzi wɔ Nkaadzi ber no mu dɛ asɛm a Jesus kaa kyerɛɛ Peter no ho hia hom paa? Dza hom botum ayɛ dze akyerɛ dɛ hom dɔ Jehovah na Jesus nye dɛ hom bɛtaa aserasera enuanom no na hom ahyɛ hɔn nkuran, na hom mfa nyɛ hom botae dɛ hom bɔboa hɔn a woegyaa asafo nhyiamu na asɛnka kɔ no ma wɔaasan aba Jehovah ne nkyɛn. (Ezek. 34:11, 12) Afei so, hom botum akyerɛ dɛ hom dwen Bible esuafo nye afofor a wɔbɛba Nkaadzi no bi no ho. Ɔsɛ dɛ hom yɛ dza hom botum nyina dze boa hɔn a wɔtse dɛm no ma hɔn enyi gye, osiandɛ wobotum abɛyɛ Jesus n’esuafo.

12. Sɛ yɛdwendwen asɛm a Jesus kae anafua a adze rebɛkye ma oeewu no ho a, ɔbɛma yenya akokodur. Ebɛnadze ntsi a? (John 16:32, 33)

¹² Anafua a adze rebɛkye ma Jesus ewu no, ɔkaa kyerɛɛ n’esuafo no dɛ: ‘Wiadze yi mu dze hom bohu amandze, naaso hom nnya akokodur osiandɛ medzi wiadze do konyim.’ (Kenkan John 16:32, 33.) Aber a Jesus  n’atamfo dze ɔhaw baa no do no, ebɛnadze na ɔboaa no ma ɔdze akokodur gyinaa mu na odzii nokwar kesii owu mu? Ɔdze noho too Jehovah do. Nna onyim dɛ n’ekyirdzifo so behyia ɔhaw a ɔtse dɛmara, dɛm ntsi ɔserɛɛ Jehovah dɛ ɔnhwɛ hɔn do. (John 17:11) Ebɛnadze ntsi na iyi ma yenya akokodur? Osiandɛ Jehovah noho yɛ dzen kyɛn hɛn atamfo no koraa. (1 John 4:4) Jehovah n’enyi tua dza ɔrokɔ do nyina. Yɛgye dzi paa dɛ sɛ yɛdze hɛnho to no do a, ɔbɔboa hɛn ma yeedzi suro biara do na yaada akokodur edzi.

13. Ebɛnadze na Joseph a ofi Arimathea yɛe dze kyerɛɛ dɛ ɔwɔ akokodur?

¹³ Hom mma yensusu Joseph a ofi Arimathea n’asɛm no ho nhwɛ. Nna ɔyɛ obi a Jewfo no bu no paa. Nna ɔka Sanhedrin bagua no a ɔyɛ Jewfo no hɔn asɛndzibea kunyin no ho. Aber a Jesus reyɛ no som edwuma wɔ asaase do no, nna Joseph bɔ mbɔdzen pii, naaso nna onnyi akokodur. John kaa dɛ nna “ɔyɛ Jesus no suanyi, na Jewfo ho hu ntsi ɔyɛɛ no kukua mu.” (John 19:38) Ɔwɔ mu dɛ nna n’enyi gye Ahendzi ho asɛmpa no ho dze, naaso ɔamma nkorɔfo ennhu dɛ ɔgye Jesus dzi. Bi a nna osuro dɛ, sɛ nkorɔfo hu dɛ ɔyɛ Jesus no suanyi a, hokwan a ɔwɔ no befi ne nsa. Naaso Bible no ka dɛ, aber a Jesus wui no, Joseph dze ‘akokodur kɔr Pilate hɔ kɛserɛɛ Jesus no fun no.’ (Mark 15:42, 43) Afei dze, nna Joseph ama obiara ehu dɛ ɔyɛ Jesus no suanyi.

14. Sɛ nyimpa ho suro hyɛ wo do a, ebɛnadze na ɔsɛ dɛ eyɛ?

¹⁴ Aso ɔyɛ a nyimpa ho suro hyɛ wo do dɛ Joseph? Sɛ ewɔ skuul anaa edwuma mu a, aso ɔtɔ da a, efɛr dɛ ebɛma afofor ehu dɛ eyɛ Jehovah Dasefo? Ana erotwentweɔn w’ananadze dɛ ebɛhyɛ asɛnka ase anaa dɛ ebɔbɔ esu osian adwen a afofor benya wɔ woho ntsi? Mma mma mbrɛ isi tse nka no nnsiw wo kwan dɛ ebɛyɛ dza inyim dɛ ɔyɛ papa dɛ eyɛ no. Fi w’akoma nyina mu bɔ Jehovah mpaa. Serɛ no dɛ ɔmma wo akokodur a edze bɛyɛ dza ɔpɛ. Sɛ ihu mbrɛ Jehovah rubua wo mpaabɔ no a, ɔbɛhyɛ wo dzen na ɔbɛma enya akokodur kɛse.​—Isa. 41:10, 13.

15. Aber a Jesus yii noho edzi kyerɛɛ n’esuafo ekyir no, ebɛnadze na enyigye a wonyae no kenyaan hɔn ma wɔyɛe? (Luke 24:52, 53)

¹⁵ Jesus no wu no maa esuafo no werɛ hoow paa. Ɔwodze twa dza nna wɔrefa mu no ho mfonyin hwɛ. Sɛ wɔdze hɔn nyɛnko berɛbo a nna oewu no to nkyɛn a, nna wɔtse nka so dɛ hɔn enyidado asa. (Luke 24:17-21) Naaso aber a Jesus yii noho edzi kyerɛɛ hɔn no, ndzɛmba a ɔyɛe ma Bible nkɔnhyɛ baa mu no,  ɔgyee mber boaa hɔn maa wɔtsee ase. Jesus amma annso hɔ ara, ɔdze edwuma bi a no ho hia hyɛɛ hɔn nsa dɛ wɔnyɛ. (Luke 24:26, 27, 45-48) Wonyaan Jesus no, ndafua 40 ekyir no, ɔkɔr sor. Dze besi dɛm aber no dze, nna esuafo no hɔn awerɛhow adan enyigye nkotsee. Dza ɔmaa hɔn enyi gyee nye dɛ, nna wonyim dɛ hɔn Wura no tse ase, na ɔbɔboa hɔn ma woeetum ayɛ edwuma a ɔdze ahyɛ hɔn nsa no. Enyigye a wonyae no kenyaan hɔn ma wɔkɔr do yii Jehovah ayɛw.​—Kenkan Luke 24:52, 53; Andw. 5:42.

16. Yebesi dɛn esuasua Jesus n’esuafo no?

¹⁶ Yebesi dɛn esuasua Jesus n’esuafo no? Sɛ yɛsom Jehovah a, hɛn enyi bɛgye. Nnyɛ Nkaadzi ber no mu nkotsee na yebenya enyigye a ɔtse dɛm na mbom afe mu no nyina so. Iyi hwehwɛ dɛ yɛdze Nyankopɔn n’Ahendzi dzi kan wɔ hɛn asetsena mu. Dɛ nhwɛdo no, enuanom pii ayɛ nsesa wɔ ber a wɔdze yɛ edwuma mu mbrɛ ɔbɛyɛ a wobotum enya ber akɔ asɛnka na asafo nhyiamu na wɔaayɛ ebusua som dabaa. Binom mpo esi gyinae dɛ wɔremmpɛ asetsena mu ndzɛmba a afofor susu dɛ no ho hia no bi mbrɛ ɔbɛyɛ a wobotum ayɛ pii wɔ asafo no mu anaa wobotum akɔsom wɔ beebi a wohia Ahendzi adawurbɔfo pii. Ɔwɔ mu, ɔwɔ dɛ yemia hɛn enyi ana yeetum akɔ do asom Jehovah, naaso Jehovah ahyɛ hɛn bɔ dɛ sɛ yɛdze Ahendzi ndzɛmba dzi kan wɔ hɛn asetsena mu a, obehyira hɛn paa.​—Mbɛ. 10:22; Matt. 6:32, 33.

17. Ebɛnadze na esi wo bo dɛ ebɛyɛ wɔ Nkaadzi ber no mu? (Hwɛ mfonyin no.)

¹⁷ Yɛrohwɛ kwan dzendzenndzen dɛ yɛbɛyɛ afe yi Nkaadzi no Benada, April 4. Naaso, mma nntweɔn mma dɛm da no nnso ansaana adwendwen Jesus n’asetsena nye no wu, na ɔdɔ a ɔnye Jehovah ada no edzi akyerɛ hɛn no ho. Mbom fa hokwan biara a ibenya wɔ Nkaadzi ber no mu no yɛ dɛm. Dɛ nhwɛdo no, wɔ New World Translation no mu no, asɛm bi wɔ Nkekaho B12 a wɔato dzin “Dapɛn A Otwa Tun Wɔ Jesus N’asaase Do Asetsena Mu.” Nsɛm a osisii a wɔaka ho asɛm wɔ hɔ no, gye ber kenkan na dwendwen ho. Aber a erekenkan nsɛm a osisii wɔ Jesus n’asetsena mu no, hwehwɛ Bible mu asɛm bi a ɔbɛma enyisɔ, ɔdɔ, akokodur na enyigye a ewɔ no ayɛ kɛse. Afei, hwehwɛ ndzɛmba pɔtsee a ibotum ayɛ dze akyerɛ dɛ w’enyi sɔ dza Jehovah na Jesus ayɛ ama hɛn no paa. Nya awerɛhyɛmu dɛ ndzɛmba a eyɛ dze kaa Jesus wɔ Nkaadzi ber no mu no, n’enyi bɔsɔ ne nyina.​—Nyi. 2:19.