1. Ebɛnadze ntsi na ndɛ nyimpa pii nngye Bible no nndzi?

 NDƐ, nyimpa pii nnhu obi a wobotum agye no edzi. Hɔn a wobu hɔn paa tse dɛ amanyɛfo, abɔdzenyansahufo nye eguadzifo mpo, ɔyɛ a wɔma hɔn nsa si famu. Ntsi sɛ dɛm nkorɔfo no ka dɛ wɔdwen hɔnho mpo a, hɔn adwen mu nntsen hɔn. Hɔn a hɔnara wɔse wɔyɛ asɔfo no mpo dze, booboo; ndzɛmba bɔn a wɔyɛ ntsi, wɔmmfa hɔn asɛm nnyɛ hwee bio. Dɛm ntsi, sɛ nkorɔfo se wɔnngye Bible a okurakura dɛm asɔfo yi nndzi a, ɔnnyɛ nwanwa.

2. Dɛ mbrɛ Ndwom 119:160 ma yehu no, ebɛn awerɛhyɛmu na ɔsɛ dɛ yenya?

² Yɛyɛ Jehovah n’asomfo, na yɛgye dzi paa dɛ ɔno nye “nokwar Nyankopɔn” no, na ɔpɛ dɛ osi hɛn yie aber nyina. (Ndw. 31:5; Isa. 48:17) Yenyim dɛ yebotum dze hɛnho ato Bible no do, osiandɛ yɛgye dzi dɛ ‘Nyankopɔn n’asɛm nyina yɛ nokwar.’ (Kenkan Ndwom 119:160.) Bible ho ɔbemfo bi kaa dɛ: “Asɛm biara nnyi hɔ a Nyankopɔn aka a ɔnnyɛ nokwar anaa ɔremmba mu. Osiandɛ Nyankopɔn no nkorɔfo gye Nyankopɔn dzi ntsi, wobotum agye nsɛm a ɔaka no so edzi.” Yɛnye dɛm ɔbemfo no yɛ adwen paa.

3. Ebɛnadze na yebosusu ho wɔ adzesua yi mu?

³ Awerɛhyɛmu a yɛwɔ wɔ Nyankopɔn n’Asɛm mu no, yebesi dɛn aboa afofor so ma woeenya bi? Hom mma yɛnhwɛ siantsir ebiasa bi ntsi a yebotum agye Bible no edzi. Adzesua yi mu no, yebohu dɛ nsɛm a ɔwɔ Bible mu no, wɔnnsesaa no. Bio so yɛbɔhwɛ mbrɛ Bible nkɔnhyɛ si ba mu. Afei so, yebohu dɛ Bible no tum sesa nyimpa n’abrabɔ.

4. Ebɛnadze ntsi na nyimpa binom adwen yɛ hɔn dɛ wɔasesa nsɛm a ɔwɔ Bible mu no?

⁴ Mbarimba anokwafo bɛyɛ 40 na Jehovah Nyankopɔn dze hɔn dzii dwuma ma wɔkyerɛɛw Bible no. Naaso dza ɔwɔ mu nye  dɛ, tsetse nsaano nkyerɛwee no ankasa dze, ndɛ bi nnyi hɔ. b Dza nyimpa afofor hwɛɛ do kyerɛwee no nkotsee na ɔwɔ hɔ ndɛ. Iyi ntsi, nyimpa binom nnhu sɛ dza Bible akyerɛwfo no ankasa kyerɛwee no, sɛ ɔno ara pɛpɛɛpɛr na ndɛ ɔwɔ hɔ no o, sɛ ɔnnyɛ ɔno o, hɔn adwen mu nntsen hɔn. Woara so ɛ, ana ebisa woho pɛn dɛ, yebesi dɛn ehu dɛ dza Bible akyerɛwfo no kyerɛwee no nye dza afofor ahwɛ do akyerɛw no nyina yɛ pɛpɛɛpɛ?

5. Nyimpa binom hwɛɛ Hebrew Kyerɛwnsɛm no do kyerɛɛw bi. Ebɛn kwan na wɔfaa do yɛɛ dɛm? (Hwɛ mfonyin a ɔwɔ Ɔweɔn-Aban yi enyim no.)

⁵ Nna Jehovah mmpɛ dɛ nsɛm a ofi no hɔ no yew, ntsi ɔkaa dɛ wɔnkyerɛkyerɛw bi ngu hɔ. Ɔhyɛɛ Israel ahemfo no dɛ wɔnhwɛ Mbra no do, na wɔnkyerɛw bi. Afei so, ɔdze hyɛɛ Levifo no nsa dɛ wɔmfa Mbra no mu nsɛm no nkyerɛkyerɛ amamfo no. (Deut. 17:18; 31:24-26; Neh. 8:7) Aber a Jewfo no fii Babylon nkowaasom mu bae no, akyerɛwfo bi a wonyim edwuma yie hwɛɛ Hebrew Kyerɛwnsɛm no do kyerɛɛw bi. (Ezra 7:6) Dɛm mbarimba yi maa hɔn enyi daa hɔ aber a nna wɔreyɛ hɔn edwuma no. Wowiei no, wɔkaan nkasafua no nye akyerɛwmba no mpo hwɛɛ dɛ dza wɔakyerɛw no nye dza wɔhwɛɛ do kyerɛwee no yɛ pɛpɛɛpɛr anaa. Wɔbɔɔ mbɔdzen paa, naaso nyimpa sintɔ ntsi, nna mfom nketsenketse bi wɔ mu. Naaso, enyigyesɛm nye dɛ, nyimpa pii so kyerɛɛw asɛm kor no ara bi, ntsi ekyir yi wohun dɛm mfom nketsenketse no. Wɔyɛɛ no dɛn?

6. Nna wobesi dɛn ehu mfom a hɔn a wɔhwɛɛ Bible no do kyerɛɛw bi no dzii no?

⁶ Mfom nketsenketse a hɔn a wɔhwɛɛ Kyerɛwnsɛm no do kyerɛɛw bi no dzii no, abemfo a wɔwɔ hɔ ndɛ no wɔ kwan pa bi a wɔfa do hu dɛm mfom ahorow no. Ma yɛnyɛ dɛm mfatoho yi: Fa no dɛ wɔaka akyerɛ mbarimba 100 dɛ wɔnhwɛ asɛm bi do nkyerɛw bi. Naaso mbarimba no mu kor edzi mfom kakraabi wɔ dza ɔakyerɛw no mu. Kwan kor a yebotum afa do ehu mfom a ɔbarimba no edzi nye dɛ yɛdze dza ɔakyerɛw no bɔtoto dza afofor akyerɛw no ho. Dɛm ara na abemfo no so yɛ. Wɔdze Bible nsaano nkyerɛwee kor toto afofor ho na ɔno boa hɔn ma wohu mfom a hɔn a wɔhwɛɛ do kyerɛɛw bi no bi dzii anaa nsɛm bi a woyii fii mu no.

7. Ebɛn ahwɛyie na hɔn a wɔhwɛɛ Bible no do kyerɛɛw bi no mu pii yɛe?

⁷ Akyerɛwfo a wɔhwɛɛ Bible no do kyerɛɛw bi no yɛɛ edwumadzen paa, na wɔhwɛe hun dɛ dza wɔrekyerɛw no yɛ nokwar. Hom mma yɛnhwɛ nhwɛdo kor bi a ɔma yehu dɛ dza yɛreka yi yɛ nokwar. Wɔhwɛɛ nsɛm a ɔwɔ Genesis kesi Malachi no mu nyinara do kyerɛɛw bi. Dɛm nkyerɛwee ahorow no mu dza wɔakyɛr paa no, wɔkyerɛwee wiei wɔ afe 1008 anaa 1009 H.B. Wɔfrɛ dɛm nkyerɛwee yi Leningrad Codex. Naaso ndaansa yi, nhwehwɛmufo ehu Bible nsaano nkyerɛwee nye nsaano nkyerɛwee esinesin bi. Dɛm Bible nsaano nkyerɛwee yi, wɔyɛe no bɛyɛ mfe 1,000 ansaana wɔreyɛ Leningrad Codex no. Bi a obi benya adwen dɛ, osiandɛ wɔhwɛɛ tsetse nsaano nkyerɛwee a wohun no ndaansa yi ara do kyerɛw bi wɔ bɛyɛ mfe 1,000 ntamu ntsi, sɛ edze Leningrad Codex no toto dɛm nsaano nkyerɛwee ahorow yi ho a, ibohu nsonsonee akɛse wɔ mu. Naaso, ɔnntse dɛm koraa. Abemfo a wɔdze nsaano nkyerɛwee a wɔakyɛr no totoo dza ɔnnkyɛree ho no hun dɛ, ɔwɔ mu dɛ nsonsonee kakraabi wɔ nsɛmfua a wɔdze dzii dwuma wɔ ebien no nyina mu dze, naaso ntseasee a ɔwɔ mu no yɛ pɛpɛɛpɛr.

8. Hɔn a wɔhwɛɛ Greek Kyerɛwnsɛm no do kyerɛɛw bi no, dza wɔkyerɛwee no nye tsetse nwoma afofor a wɔahwɛ do akyerɛw bi no, ebɛn nsonsonee na ɔwɔ mu?

⁸ Tsetse Christianfo no so hwɛɛ Kyerɛwnsɛm no do kyerɛɛw bi. Wɔhwɛɛ nwoma 27 a ɔka bɔ mu yɛ Greek Kyerɛwnsɛm no do kyerɛɛw bi, na wɔdze dzii dwuma wɔ hɔn nhyiamu ase nye asɛnka mu. Aber a wɔrekyerɛw bi no,  wɔmaa hɔn enyi daa hɔ paa. Hɔn a wɔhwɛɛ Greek Kyerɛwnsɛm no do kyerɛɛw bi no, dza wɔkyerɛwee a ɔda ho ara wɔ hɔ no, ɔbemfo bi dze totoo nwoma afofor a nyimpa binom so kyerɛwee wɔ ber kor no ara mu no ho. Aber a ɔyɛɛ dɛm ntotoho no wiei no ɔkaa dɛ: ‘Hɔn a wɔhwɛɛ Greek Kyerɛwnsɛm no do kyerɛɛw bi no, dza wɔkyerɛwee no, sɛ yɛbɛka a, pii na ɔwɔ hɔ ndɛ. Ɔdɔɔ so kyɛn nwoma afofor a wɔahwɛ do akyerɛw bi, na etaa hu nwoma ahorow no nyina wɔ mu.’ Nwoma bi a wɔato dzin Anatomy of the New Testament kaa dɛ: ‘Yebotum agye edzi paa dɛ, Greek Kyerɛwnsɛm a ne nkyerɛase dzi mu a ɔwɔ hɔ ndɛ nye nsɛm a tsetse akyerɛwfo no kyerɛwee no yɛ pɛ.’

9. Ebɛn nokwasɛm na Isaiah 40:8 ma yehu fa Bible no mu nsɛm no ho?

⁹ Mfe ɔhaha pii a etwa mu no, hɔn a wɔhwɛɛ Kyerɛwnsɛm no do kyerɛɛw bi no maa hɔn enyi daa hɔ paa. Dɛm ntsi yebotum aka dɛ, Bible a yɛkenkan na yesua no ndɛ no, no mu nsɛm no nnsesae. c Ɔda edzi pefee dɛ, Jehovah hwɛe ma wɔkoraa Bible no mu nsɛm do. Dɛm ntsi ndɛ yɛwɔ Bible a no mu nsɛm no yɛ nokwar. (Kenkan Isaiah 40:8.) Bi a nyimpa binom bɛka dɛ, sɛ wɔakora Bible no mu nsɛm do mpo a, ɔno nnkyerɛ dɛ Nyankopɔn na ɔmaa wɔkyerɛwee. Hom mma yɛnhwɛ adanse ahorow a ɔma yehu dɛ Nyankopɔn na ɔmaa wɔkyerɛɛw Bible no.

10. Ka Bible mu nkɔnhyɛ kor a ɔbaa mu a ɔma yehu dɛ 2 Peter 1:21 yɛ nokwar ho asɛm. (Hwɛ mfonyin ahorow no.)

¹⁰ Sɛ yɛhwɛ Bible no mu a, yehu nkɔnhyɛ pii a ɔbaa mu. Nkɔnhyɛ yi mu bi wɔ hɔ a, odzii mfe ɔhaha pii ansaana ɔreba mu. Abakɔsɛm ma yehu dɛ, dɛm nkɔnhyɛ ahorow yi baa mu ampa. Iyi nnyɛ hɛn nwanwa, osiandɛ yenyim dɛ Jehovah na ɔmaa wɔhyɛɛ nkɔm ahorow a ɔwɔ Bible no mu no. (Kenkan 2 Peter 1:21.) Ɔwodze ma yɛnhwɛ nkɔnhyɛ ahorow a ɔfa Babylon kurow no ne sɛɛ ho no. Bɛyɛ afe 778 kesi 732 A.H.B. hɔ beebi no, Nyankopɔn maa nkɔnhyɛnyi Isaiah hyɛɛ nkɔm dɛ wɔbɛsɛɛ Babylon kurow a nna ɔwɔ tum kɛse no. Isaiah bɔɔ nyia nna obedzi enyim ma wɔaasɛɛ kurow  no mpo ne dzin. Ɔkaa dɛ wɔfrɛ no Cyrus, na ɔkyerɛɛ kwan a wɔbɛfa do so asɛɛ kurow no. (Isa. 44:27–45:2) Isaiah sanee kaa dɛ wɔbɛsɛɛ Babylon kurow no koraa a obiara nnkotum atsena mu. (Isa. 13:19, 20) Dɛm pɛpɛɛpɛr so na osii. Mediafo na Persiafo sɛɛ Babylon kurow no wɔ afe 539 A.H.B. Beebi a nna dɛm kurow a ɔwɔ tum yi wɔ no, ndɛ wɔadan amamfo a obiara nntse hɔ.​—Sɛ ewɔ Ibotum Enya Enyigye Daa! buukuu no bi wɔ elɛktrɔnek efir do a, hwɛ video a wɔato dzin Bible No Hyɛɛ Babylon Kurow Ne Sɛɛ Ho Nkɔm Too Hɔ no. Kɔ adzesua 03 na hwɛ asɛm a otsia 5.

11. Ebɛn kwan do na Daniel 2:41-43 rinya ne mbamu ndɛ?

¹¹ Nnyɛ tsetse mber mu nkotsee na Bible nkɔnhyɛ baa mu, mbom bi so rinya ne mbamu wɔ hɛn aber yi do. Ɔwodze ma yɛnhwɛ nkɔm a Daniel hyɛe faa Anglo-America Wiadze Tumdzi no ho, na ibohu dɛ dɛm nkɔnhyɛ no rinya ne mbamu ma ɔyɛ nwanwa paa. (Kenkan Daniel 2:41-43.) Nkɔnhyɛ no kae too hɔ pɛpɛɛpɛ dɛ Anglo-America Wiadze Tumdzi no, ne “fa bɛyɛ dzen” dɛ dadze na “ne fa bɛyɛ mberɛw” dɛ dɛtse. Ndɛ yehu dɛ dɛm asɛm yi yɛ nokwar paa. Britain na America ada no edzi dɛ wɔyɛ dzen dɛ dadze. Siantsir nye dɛ, dɛm aman ebien yi dzii akotsen wɔ Wiadze Ko ebien no nyina mu ma wodzii konyim. Wɔwɔ nsordaafo a hɔnho yɛ dzen paa. Naaso, amamfo a wodzi hɔn do tum no ama hɔn tumdzi no ayɛ mberɛw. Wɔatsetsew ekuw ahorow dze per hwehwɛ hɔn fahodzi, edwumayɛfo so atsetsew ekuw ahorow pii dze hwehwɛ hɔn eyiedzi, na binom so yɛ ɔyɛkyerɛ tsia aban no. Ndaansa yi, ɔbemfo bi a onyim wiadze amanyɛsɛm yie no kaa dɛ: “Ndɛ, aman ahorow a wɔdze ka-bi-ma-menka-bi amambu yɛ edwuma paa no, sɛ ehwɛ mu a, ɔyɛ United States ɔman no paa na aban no na amamfo hɔn adwen nnhyia wɔ amambu nsɛm ho.” Ɔno da nkyɛn a, Britain a ɔka America ho ma wodzi wiadze nyina do tum no so wɔ ne haw. Ɔno nye dɛ ndaansa yi hɔn mu apaapaa osiandɛ amamfo no hɔn adwen nnhyia wɔ aman ahorow a wɔwɔ European Union no mu a ɔsɛ dɛ wɔnye hɔn bɔ. Dɛm nkyekyɛmu a yɛaka ho asɛm yi ma ɔyɛ dzen ma Anglo-America Wiadze Tumdzi no dɛ ɔbɛyɛ dza ɔnoara pɛ.

12. Ebɛn awerɛhyɛmu na nkɔnhyɛ ahorow a ɔwɔ Bible mu no ma yenya?

¹² Bible mu nkɔnhyɛ ahorow a aba mu no ma yɛgye dzi paa dɛ Nyankopɔn no bɔhyɛ ahorow a ɔfa daakye ho no so bɛba mu. Aber a ɔdwontofo no robɔ Jehovah mpaa no ɔkaa asɛm bi, na yɛnye no yɛ adwen paa. Ɔkaa dɛ: ‘M’enyi egyina wo nkwagye, osiandɛ m’enyi da w’asɛm do.’ (Ndw. 119:81) Sɛ yɛkenkan Bible no a, yehu dɛ Jehovah ada ayamuyie edzi akyerɛ hɛn na ɔama hɛn ‘daakye nye enyidado.’ (Jer. 29:11) Daakye ho enyidado a yɛwɔ no nngyina nyimpa mbɔdzembɔ do na mbom ogyina Jehovah no bɔhyɛ do. Hom mma yɛnkɔ do nyer hɛnho nsua Bible mu nkɔnhyɛ ahorow no mfa nhyɛ gyedzi a yɛwɔ wɔ Nyankopɔn n’Asɛm mu no mu dzen.

13. Dɛ mbrɛ Ndwom 119:66, 138 kyerɛ no, ebɛnadze fofor na ɔma yehu dɛ yebotum agye Bible no edzi?

¹³ Hom mma yɛnhwɛ adze fofor ntsi a yebotum agye Bible no edzi. Ɔno nye dɛ, sɛ afofor dze no mu afotu bɔ hɔn bra a, ɔboa hɔn paa. (Kenkan Ndwom 119:66, 138.) Dɛ nhwɛdo no, awarfo binom a nkyɛ hɔn awar reyɛ egu no, ndɛ hɔn awar no asɔ twann na wɔwɔ enyigye ankasa osiandɛ wɔdze Bible mu afotu yɛɛ edwuma. Hɔn mba no so enyi gye osiandɛ hɔn awofo a wɔyɛ Christianfo no dɔ hɔn na wɔtse nka dɛ wɔwɔ bambɔ.​—Eph. 5:22-29.

14. Ma nhwɛdo a ɔkyerɛ dɛ Bible no tum sesa nyimpa n’abrabɔ ma ɔyɛ papa.

¹⁴ Nsɛmbɔndzifo a hɔnho yɛ hu mpo, sɛ  wɔdze Bible mu afotu bɔ hɔn bra a, ɔboa ma wotum sesa hɔn suban. Hom mma yɛnhwɛ mbrɛ Bible mu afotu boaa ɔbarimba bi a wɔfrɛ no Jack a nna ɔda efiadze no. d Nna ɔyɛ nsɛmbɔndzinyi a n’enyi yɛ dzen paa. Nsɛmbɔndzifo a woebu hɔn kumfɔ a wɔwɔ efiadze hɔ a hɔnho yɛ hu paa no, nna ɔka ho bi. Naaso ber bi a nna enuanom nye obi rusua Bible no, ɔkɛtsenaa mu bi. Ayamuyie a enuanom no daa no edzi no kaa n’akoma paa. Dɛm ntsi ɔpeen do dɛ wɔnye no nsua Bible no. Aber a ɔdze Bible mu afotu bɔɔ ne bra no, n’abrabɔ na no suban sesae yɛɛ papa. Ber kɔr do no, Jack bɛyɛɛ ɔdawurbɔfo a ɔmmbɔɔ esu na ekyir yi wɔbɔɔ no esu. Ɔdze nsi kaa Nyankopɔn n’Ahendzi no ho asɛm kyerɛɛ hɔn a ɔnye hɔn wɔ efiadze hɔ no, na annyɛ yie koraa no, ɔboaa hɔn mu baanan ma wobosuaa Bible no. Odur da a woruboku Jack no, nna ɔasesa koraa. Mbranyimfo a nna worutwitwa agye no no mu kor kaa dɛ: “Jack a nna minyim no mfe 20 a etwa mu no, ɔnnyɛ ɔno nye yi. Jehovah Adasefo hɔn nkyerɛkyerɛ no asesa n’abrabɔ koraa.” Ɔwɔ mu dɛ wokum Jack dze, naaso n’asɛm no ma yehu dɛ yebotum agye Bible no edzi. Afei so, ɔma yehu dɛ Bible no tum sesa nyimpa n’abrabɔ ma ɔyɛ papa.​—Isa. 11:6-9.

15. Ebɛn kwan do na Bible mu afotu a Jehovah n’asomfo dze bɔ hɔn bra no ma wɔda nsew ndɛ? (Hwɛ mfonyin no.)

¹⁵ Jehovah n’asomfo dze Bible mu afotu bɔ hɔn bra, dɛm ntsi wɔyɛ kor. (John 13:35; 1 Cor. 1:10) Asomdwee na koryɛ a ɔwɔ hɛn ntamu no yɛ soronko koraa. Osiandɛ sɛ yɛhwɛ wiadze no mu a, yehu dɛ amanyɛsɛm, ebusua a obi fi mu nye dza ɔkeka ho ama nyimpa mu apaapaa. Aber a aberantsɛ bi a wɔfrɛ no Jean hun koryɛ a ɔwɔ Jehovah Adasefo mu no, ɔkaa n’akoma paa. Onyinii wɔ Africa. Aber a ɔko sii ne man mu no, ɔkɔr sogya, naaso ekyir yi oguanee fii ne man mu kɔr ɔman fofor a ɔbɛn hɔn mu. Hɔ na okehyiaa Jehovah Adasefo. Jean kaa dɛ: “Wɔdze Bible no boaa me ma muhun dɛ nokwar Christianfo mmfa hɔnho nnhyehyɛ amanyɛsɛm mu na koryɛ wɔ hɔn ntamu. Afei so wɔdodɔ hɔnho.” Ɔdze kaa ho dɛ: “Nna medze  mo nkwa esi hɔ dɛ mobɔko ama me man, naaso aber a mubosuaa Bible mu nokwar no, okenyaan me ma mihyiraa mo nkwa do maa Jehovah.” Jean sesaa koraa. Seseiara ɔnye nkorɔfo a ɔsor beebi a wofi no nnko bio, mbom ɔka Bible mu nokwar a ɔka nkorɔfo bɔ mu no ho asɛm kyerɛ obiara a obehyia no no. Ɔmmfa ho ɔman a yefi mu no, sɛ yɛdze Bible no mu afotu bɔ hɛn bra a, ɔboa hɛn paa. Iyi yɛ adanse a odzi mu a yebotum egyina do agye Nyankopɔn n’Asɛm no edzi.

16. Ebɛnadze ntsi na no ho hia dɛ yɛhyɛ gyedzi a yɛwɔ wɔ Nyankopɔn n’Asɛm mu dzen?

¹⁶ Ndzɛmba sɛɛ ara na ɔresɛɛ wɔ wiadze yi mu. Dɛm ntsi ber rokɔ do no obotum ayɛ dzen ama hɛn paa dɛ yɛbɛgye Nyankopɔn n’Asɛm no edzi. Afofor botum ama hɛn adwen mu ayɛ hɛn konsee wɔ Bible mu nokwar no ho. Anaadɛ wobotum ama hɛn adwen mu ayɛ hɛn konsee dɛ ana Jehovah na oeyi akowaa nokwafo nye nyansafo no dɛ ɔnkyerɛ n’asomfo kwan ndɛ anaa. Naaso sɛ yɛgye dzi paa dɛ Nyankopɔn n’Asɛm no yɛ nokwar aber nyinara a, ɔbɔboa hɛn ma yaako etsia ndzɛmba a ɔtsetse dɛm a obotum asɛɛ hɛn gyedzi no. Bio so, ɔbɔboa hɛn ma ‘yeesi hɛn bo dɛ yebedzi Jehovah ne mbra do daa ekodu ewiei.’ (Ndw. 119:112) Afei so, hɛn ‘enyi ronnto’ dɛ yɛbɛka Bible mu nokwar no akyerɛ afofor na yaahyɛ hɔn nkuran dɛ wɔmfa mbɔ hɔn bra. (Ndw. 119:46) Ɔno da nkyɛn a, ɔbɔboa hɛn ma yɛdze abotar na enyigye egyina ɔhaw ahorow a no mu yɛ dzen tse dɛ ɔsoɛrtsia ano.​—Col. 1:11; Ndw. 119:143, 157.

17. Ebɛnadze na hɛn afe asɛm no bɛma atsena hɛn adwen mu?

¹⁷ Yɛda Jehovah ase paa dɛ ɔaboa hɛn ma yeehu nokwar no! Wiadze a yɛtse mu yi dze, ɔhaw ara nko twom na nyimpa nnhu beebi a wɔmfa hɔn tsir mfa. Naaso iyi nyina mu no, nokwar no ma yehu mbrɛ yebesi abɔ hɛn bra, na iyi ma hɛn asomu dwe hɛn. Afei so, ɔma yenya enyidado dɛ Nyankopɔn nam n’Ahendzi no do bɛma yeenya asetsena papabi daakye. Hom mma hɛn afe asɛm ma afe 2023 no mboa hɛn nyina ma yɛnkɔ do ngye ndzi dɛ Nyankopɔn n’Asɛm nyina yɛ nokwar!​—Ndw. 119:160.