1-2. Hɛn enuma ekyir no, ebɛnadze na ɔsɛ dɛ yɛkɔ do yɛ? Kyerɛkyerɛ mu.

 MPƐN dodow ahen na isiesie wo fie? Obotum aba dɛ ber a odzi kan a ekɛtsenaa hɔ no, isiesiee hɔ yie paa. Naaso, sɛ ɔno ekyir no ennsiesie hɔ bio a, ehwɛ a hɔ bɛyɛ dɛn? Dɛ mbrɛ inyim no, huntuma na fi bɛyɛ fie hɔ ma. Sɛ wo fie hɔ bɔkɔ do ayɛ fɛw a, ɔsɛ dɛ etaa siesie hɔ kama.

² Dɛmara so na sɛ hɛn nsusui nye hɛn suban bɛyɛ kama a, ɔsɛ dɛ yɛyɛ nsesa. Ansaana worunuma hɛn no, yɛyeer hɛnho yɛɛ nsesa biara a ohia mbrɛ ɔbɛyɛ a ‘yɛbɔhohor hɛnho efi honam nye sunsum mu fi nyina ho.’ (2 Cor. 7:1) Naaso seseiara a woenuma hɛn yi, ɔsɛ dɛ yɛdze ɔsomafo Paul n’afotu a ɔnye dɛ ‘yɛnkɔ do nyɛ hɛnho fofor no’ yɛ edwuma. (Eph. 4:23) Ebɛnadze ntsi na ɔsɛ dɛ yɛkɔ do yɛ dɛm? Osiandɛ, sɛ yaanhwɛ no yie a, ndzɛmba bɔn a ɔwɔ wiadze yi mu no botum ama hɛnho eegu fi ntsɛmara wɔ Jehovah n’enyim. Sɛ yebotum ekwetsir esian a ɔtse dɛm na Jehovah akɔ do agye hɛn ato mu a, ɔsɛ dɛ yɛhwɛ dɛ hɛn nsusui, hɛn suban nye dza hɛn enyi gye ho tse dɛn ankasa.

3. Sɛ wɔka dɛ ‘hom nsesa hom adwen’ a, ɔkyerɛ dɛn? (Romefo 12:2)

³ Ebɛnadze na ɔsɛ dɛ yɛyɛ ama yaasesa hɛn adwen, kyerɛ dɛ, yaasesa mbrɛ yesi dwen ndzɛmba ho? (Kenkan Romefo 12:2.) Yebotum akyerɛ Greek asɛmfua a wɔkyerɛɛ ase ‘hom nsesa hom adwen’ no ase dɛ “hom nsiesie hom adwen.” Iyi nnkyerɛ dɛ, sɛ yɛyɛ papa kor anaa ebien bi a nna yeewie.  Mbom ɔsɛ dɛ yɛyɛ hɛnho mu nhwehwɛmu hu nyimpa kor a yɛyɛ ankasa, na yɛyɛ nsesa biara a ohia dɛ yɛyɛ no mbrɛ ɔbɛyɛ a yɛbɔbɔ hɛn bra dɛ mbrɛ Jehovah pɛ. Naaso iyi nnyɛ da kor adzeyɛ, mbom ɔsɛ dɛ yɛkɔ do ara yɛ.

4. Ɔnnsɛ dɛ yɛma hɔn a wɔnnsom Jehovah no sɛɛ hɛn nsusui. Yebesi dɛn ayɛ dɛm?

⁴ Sɛ yɛbɛyɛ nyimpa a bɔn biara nnyi hɛnho a, aber nyina yebotum ayɛ adze a ɔsɔ Jehovah n’enyi wɔ biribiara mu. Naaso, kesi dɛ dɛm aber no bɛba no, ɔsɛ dɛ yɛyer hɛnho dɛ yɛbɛyɛ dza ɔbɛma Jehovah n’enyi agye. Asɛm a Paul kae wɔ Romefo 12:2 a ɔfa hɛn adwen a yɛbɛsesa nye Nyankopɔn n’apɛdze a yebohu ho no, ebɛn ebusuabɔ na ɔwɔ mu? Ma yɛnhwɛ. Ɔnnsɛ dɛ yɛma hɔn a wɔnnsom Jehovah no hɔn suban sɛɛ hɛn abrabɔ. Mbom, ɔsɛ dɛ yedzi kan hwehwɛ hɛnho mu na yɛhwɛ dɛ yɛrema adwen a Nyankopɔn wɔ wɔ ndzɛmba ho no akyerɛ hɛn kwan wɔ hɛn gyinaesi nye dza yɛdze sisi hɛn enyi do no mu, na nnyɛ wiadze no.

5. Yebesi dɛn ahwehwɛ hɛnho mu ahwɛ dɛ yɛgye to mu dɛ Jehovah ne da no abɛn? (Hwɛ mfonyin no.)

⁵ Ma yɛnhwɛ dɛm asɛm yi. Jehovah pɛ dɛ yɛma ne da a ɔreba no yɛ ntsɛm wɔ hɛn adwen mu. (2 Pet. 3:12) Bisa woho dɛ: ‘Aso m’abrabɔ kyerɛ dɛ megye dzi paa dɛ wiadze bɔn yi reba n’ewiei? Aso gyinae a misisi wɔ nwomasua nye edwuma ho no kyerɛ dɛ Jehovah no som na no ho hia me paa wɔ m’asetsena mu? Ana megye dzi dɛ Jehovah bɔhwɛ menye m’ebusua, anaa metaa dwendwen asetsena mu ndzɛmba ho?’ Sɛ Jehovah hu dɛ yɛreyɛ dza yebotum biara mbrɛ ɔbɛyɛ a yɛbɛyɛ dza ɔpɛ a, ɔma n’enyi gye paa.​—Matt. 6:25-27, 33; Phil. 4:12, 13.

6. Ebɛnadze na ohia dɛ yɛkɔ do yɛ?

⁶ Ɔsɛ dɛ yɛhwehwɛ hɛnho mu dabaa, na sɛ yehu dɛ no ho hia dɛ yɛyɛ nsesa bi a, ɔsɛ  dɛ yɛyɛ. Paul kaa kyerɛɛ Corinthfo no dɛ: “Hom mpɛnsapɛnsa hom mu nhwɛ dɛ hom wɔ gyedzi no mu anaa; hom nsɔ homho nhwɛ.” (2 Cor. 13:5) Ɔnnyɛ asafo nhyiamu na asɛnka a ofi ber to ber yɛkɔ no nkotsee na ɔkyerɛ dɛ yɛwɔ “gyedzi no mu.” Dza ɔka ho bio nye dza yɛdwendwen ho, dza hɛn enyi gye ho, nye dza ɔka hɛn ma yɛyɛ biribi. Ntsi ɔsɛ dɛ yɛkenkan Bible no, yenya adwen a Jehovah wɔ wɔ ndzɛmba ho no bi, na yɛyɛ dza yebotum biara yɛ dza Jehovah pɛ dze kyerɛ dɛ yɛpɛ dɛ yɛkɔ do yɛ hɛn adwen fofor.​—1 Cor. 2:14-16.

7. Dɛ mbrɛ Ephesusfo 4:31, 32 ma yehu no, ebɛnadze bio na ɔsɛ dɛ yɛyɛ, na ebɛnadze ntsi na obotum ayɛ dzen dɛ yɛbɛyɛ dɛm?

⁷ Kenkan Ephesusfo 4:31, 32. Sɛ yɛdze hɛn adwen a yɛbɛsesa no to nkyɛn a, adze fofor so a no ho hia dɛ yɛyɛ nye dɛ ‘yɛbɛhyɛ suban fofor’ no. (Eph. 4:24) Ɔsɛ dɛ yɛbɔ hɛnho mbɔdzen paa ana yeetum ayɛ dɛm. Suban ahorow a ɔsɛ dɛ yɛyer hɛnho dɛ yebeyi no akwa no mu bi nye ɔtan, ebufuw nye akomabɔn. Ebɛnadze ntsi na obotum ayɛ dzen dɛ yɛbɛyɛ dɛm? Osiandɛ suban bɔn no bi wɔ hɔ a, wɔagye ndwow wɔ hɛn mu. Dɛ nhwɛdo no, Bible no ka dɛ nyimpa binom wɔ hɔ a hɔn bo fuw ntsɛm na hɔn akoma haw hɔn. (Mbɛ. 29:22) Hɛn enuma ekyir mpo no, no ho behia dɛ yɛkɔ do ara ko tsia suban bɔn ahorow a wɔagye ndwow wɔ hɛn mu no. Suahu ahorow a odzidzi do yi bɛma yeehu dɛ dza yɛreka yi yɛ nokwar.

8-9. Dɛ mbrɛ Stephen n’asɛm no ma yehu no, ebɛnadze ntsi na no ho hia dɛ yɛkɔ do yi suban dadaw no gu?

⁸ Nna ɔyɛ dzen ma onua bi a wɔfrɛ no Stephen dɛ ɔbɛhyɛ n’ebufuw do. Ɔkaa dɛ: “Wonumaa me no ekyir mpo no, nna ɔwɔ dɛ mokɔ do hyɛ m’ebufuw do. Dɛ nhwɛdo no, da kor bi, nna menye enuanom bi reyɛ efiefi asɛnka edwuma no. Obi hɛn me kaar no mu kotuu radio a ɔwɔ mu no. Mutuu mbirika kaa no do dɛ merekɛkyer no. Aber a mereyɛ abɛn no no, ogyaa radio no mu too hɔ na oguanee. Aber a mekaa ho asɛm kyerɛɛ enuanom a nna menye hɔn nam asɛnka mu no, asafo mu panyin kor a ɔka kuw no ho no bisaa me dɛ, ‘Stephen, sɛ wo nsa suoo nyimpa no mu a, nkyɛ ebɛnadze na edze bɛyɛ no?’ Asɛm a asafo mu panyin no kae no maa mususuu nsɛm ho kɔr ekyir, na ɔhyɛɛ me nkuran dɛ ɔwɔ dɛ mobɔ mbɔdzen dɛ mebɛyɛ nyimpa a mepɛ asomdwee.” b

⁹ Stephen n’asɛm no ma yehu dɛ, suban bɔn bi a yɛdwen dɛ yegyaa no, yerunnhu mbrɛ ɔbɛyɛ, yebohu ara nye dɛ wɔasan eyi ne tsir. Sɛ dɛm asɛm yi bi to wo a, mma w’abaw mu mmbu na enntse nka dɛ eyɛ Christiannyi bɔdamfo atse. Ɔsomafo Paul mpo kaa dɛ: ‘Aber a mepɛ dɛ meyɛ papa no, bɔn wɔ mo mu.’ (Rom. 7:21-23) Christianfo nyinara bɔn wɔ hɛnho. Ntsi dɛ mbrɛ yɛkɔ do siesie hɛn fie amma huntuma na fi anngye hɔ ammbɔ do no, dɛmara so na ɔsɛ dɛ yɛkɔ do ko tsia suban ahorow bi a yɛabɔ mbɔdzen egyaa naaso ɔyɛ a nna woeyi ne tsir no. Ɔsɛ dɛ yɛbɔ mbɔdzen yɛ dza yebotum biara dɛ yɛbɛma hɛnho akɔ do atsew. Yebesi dɛn ayɛ dɛm?

10. Yɛbɛyɛ dɛn egyaa suban bɔn bi? (1 John 5:14, 15)

¹⁰ Suban biara a ɔyɛ dzen ma wo dɛ ibegyaa no, ka ho asɛm kyerɛ Jehovah, na nya awerɛhyɛmu dɛ obetsie wo na ɔaboa wo ma eetum edzi do. (Kenkan 1 John 5:14, 15.) Ɔwɔ mu, Jehovah rinnyi suban no mmfi hɔ anwanwa kwan do dze, naaso ɔbɛhyɛ wo dzen ma eetum ahyɛ woho do. (1 Pet. 5:10) Ber kor no ara so, yɛ wo mpaabɔ no ho edwuma, na twe woho fi ndzɛmba a obotum atwetwe wo ma  aasan ada dɛm suban no edzi no ho. Dɛ nhwɛdo no, twe woho fi sene, TV do dwumadzi, nye nsɛm a ɔkamfo suban a epɛ dɛ igyaa no ho. Afei so, mma nndwendwen ndzɛmba bɔn ho.​—Phil. 4:8; Col. 3:2.

11. Sɛ yebotum akɔ do ahyɛ suban fofor no a, ebɛn ndzɛmba na ɔsɛ dɛ yɛyɛ?

¹¹ Sɛ eyi suban dadaw no egu mpo a, no ho hia dɛ ehyɛ fofor no so. Ebɛyɛ no dɛn? Sɛ irusua Jehovah no su ahorow no ho adze a, fa si w’enyi do dɛ ibosuasua Jehovah na woara so ada dɛm su no bi edzi. (Eph. 5:1, 2) Dɛ nhwɛdo no, sɛ ekenkan Bible mu asɛm bi na ɔfa mbrɛ Jehovah si dze bɔn kyɛ ho a, ɔyɛ a bisa woho dɛ, ‘Aso medze afofor hɔn bɔn kyɛ hɔn?’ Sɛ ekenkan mbrɛ Jehovah si da ayamuhyehye edzi kyerɛ hɔn a hɔnho akyer hɔn wɔ sikasɛm afamu no a, bisa woho dɛ, ‘Ana mara so metse nka dɛmara ma mo nuanom a hɔn sikasɛm nnkɔ yie no na meyɛ biribi dze boa hɔn?’ Bɔ mbɔdzen hyɛ suban fofor no fa sesa w’adwen. Na aber a ereyɛ dɛm no so, ɔyɛ a nya woho abotar.

12. Ebɛn kwan do na Stephen hun dɛ Bible no wɔ tum a ɔsakyer nyimpa?

¹² Stephen a yeedzi kan aka noho asɛm no hun dɛ nkakrankakra no, oetum ahyɛ suban fofor no. Ɔkaa dɛ: “Ofitsi ber a wonumaa me besi ndɛ, mehyia tsebea ahorow pii a nkyɛ obotum ama mo bo efuw. Sɛ mihyia nkorɔfo a wɔpɛ dɛ wɔhyɛ me ebufuw a, mesua mbrɛ mibesi atwe moho na meefi hɔ asomdwee mu. Nyimpa pii abɔ m’abaw do wɔ mbrɛ mesi ayɛ m’adze wɔ tsebea a ɔtsetse dɛm ho. Me yer mpo ka hɔn a wɔabɔ m’abaw do no ho. Mbrɛ mesi ayɛ m’adze wɔ tsebea a ɔtse dɛm ho no, ɔyɛ mankasa mpo nwanwa! Nsesa a mayɛ wɔ me nyimpasu mu no, medze enyimnyamhyɛ no nyina ma Jehovah. Megye dzi papaapa dɛ dɛm nsakyer ahorow a mayɛ yi yɛ dase a ɔma yehu dɛ Bible no wɔ tum a ɔsakyer nyimpa.”

13. Ebɛnadze na sɛ yɛyɛ a ɔbɔboa hɛn ma yeetum ako etsia akɔndɔ bɔn? (Galatiafo 5:16)

¹³ Kenkan Galatiafo 5:16. Jehovah fi ayamuyie mu dze no sunsum krɔnkrɔn no boa hɛn mbrɛ ɔbɛyɛ a yebotum ayɛ dza ɔtsen. Sɛ yesua Bible no a, nna yɛrema kwan ma sunsum krɔnkrɔn no akyerɛ hɛn kwan. Sɛ yɛkɔ Christianfo nhyiamu so a, Jehovah ma hɛn no sunsum krɔnkrɔn no. Sɛ yɛkɔ nhyiamu a ɔtse dɛm ase a, yetum gye ber nye hɛn nuanom a hɔn so wɔrobɔ mbɔdzen dɛ wɔbɛyɛ dza ɔtsen no bɔ, na iyi hyɛ hɛn nkuran paa. (Heb. 10:24, 25; 13:7) Afei so sɛ yefi hɛn akoma mu bɔ Jehovah mpaa na yɛserɛ no dɛ ɔmboa hɛn ma yentum ndzi mberɛwyɛ bi do a, ɔbɛma hɛn no sunsum krɔnkrɔn no ama yeetum akɔ do ako etsia dɛm mberɛwyɛ no. Ɔwɔ mu dɛ dza yɛaka ho asɛm yi rinnyi akɔndɔ bɔn no mmfi hɔ dze, naaso ɔbɔboa hɛn ma sɛ akɔndɔ no ba mpo a, yerinndzi ekyir nnkɛyɛ bɔn. Dɛ mbrɛ Galatiafo 5:16 ma yehu no, hɔn a wɔnantsew sunsum mu no rinndzi “honam akɔndɔ” ekyir da.

14. Ebɛnadze ntsi na no ho hia dɛ yɛkɔ do ko tsia akɔndɔ bɔn?

¹⁴ Sɛ yɛhyɛ ase yɛ ndzɛmba bi a ɔbɔboa hɛn ma yɛnye Jehovah enya ebusuabɔ pa a, ɔnnsɛ dɛ yɛdze kɔso kwan mu, mbom ɔsɛ dɛ yɛkɔ do yɛ ama yeetum akɔ do ako etsia akɔndɔ bɔn. Ebɛnadze ntsi a? Osiandɛ ɔtamfo kor bi wɔ hɔ a, da biara osi hɛn kɔn do araa nye yi. Ɔno nye dza opiapia anaa ɔtwetwe hɛn dɛ yɛnyɛ bɔn no. Hɛn enuma ekyir mpo no, bi a yebohu ndzɛmba kor anaa ebien bi a no ho behia dɛ yɛkɔ do ara ko tsia, tse dɛ kyakyatow, nsawe, anaa ponografi. (Eph. 5:3, 4) Onua aberantsɛ bi kaa dɛ: “Ndzɛmba a nna ɔyɛ dzen ma me paa dɛ mobɔko etsia no, no mu kor nye dɛ nna ɔyɛ a metse nka dɛ menye me nyɛnko  banyin nda. Nna ɔyɛ me dɛ dɛm atsenka no bɛtsew akɔ, naaso ɔkɔ do haw me.” Sɛ ɔyɛ dzen ma wo paa dɛ ebɔko etsia akɔndɔ bɔn bi a, ebɛnadze na obotum aboa wo?

15. Sɛ yɛma ɔtsena hɛn adwen mu dɛ nnyɛ hɛn nkotsee na yɛroko etsia akɔndɔ bɔn a, ɔboa hɛn dɛn? (Hwɛ mfonyin no.)

¹⁵ Sɛ ɔyɛ dzen ma wo paa dɛ ebɔko etsia akɔndɔ bɔn bi a, kaa dɛ ɔnnyɛ wankotsee na irihyia ɔhaw a ɔtse dɛm. Bible no ka dɛ: ‘Nsɔhwɛ bi nntoo hom, gyedɛ dza ɔto nyimpa nyinara no.’ (1 Cor. 10:13a) Wɔkyerɛɛw dɛm asɛm yi kɛmaa Christianfo mbarimba na mbaa a nna wɔwɔ Corinth no. Nkan no, nna hɔn mu binom yɛ awartofo, mbarimba a wɔnye mbarimba da, mbaa a wɔnye mbaa da, nye hɔn a wɔwe nsa. (1 Cor. 6:9-11) Ehwɛ a, wɔ hɔn enuma ekyir no, akɔndɔ bɔn yi mu biara annhaw hɔn anaa? Ɔnyɛ dɛn ara a, wohyiaa ɔhaw a ɔtse dɛm. Ɔyɛ nokwar dɛ nna hɔn nyinara yɛ Christianfo a wɔasera hɔn dze, naaso nna bɔn wɔ hɔnho. Ɔda edzi dɛ nna ɔsɛ dɛ wɔkɔ do ara ko tsia akɔndɔ bɔn. Ɔsɛ dɛ hɔn asɛm no hyɛ hɛn nkuran. Ebɛnadze ntsi a? Osiandɛ akɔndɔ bɔn biara a erobɔ mbɔdzen dɛ ebɔko etsia no, obi etum edzi do. Nokwasɛm nye dɛ ibotum egyina ‘gyedzi no mu pintsinn, osiandɛ inyim dɛ amandzehu kor no ara na wo nuanom a wɔwɔ wiadze nyina no rihyia.’​—1 Pet. 5:9.

16. Ebɛn adwen na ɔnnsɛ dɛ yenya, na ebɛnadze ntsi a?

¹⁶ Mma nnya adwen da dɛ mberɛwyɛ bi a eroko etsia no, obiara nntse wo ase. Sɛ inya dɛm adwen no a, ɔbɛma atse nka dɛ enyidado nyinara asa. Afei so ɔbɛma atse nka dɛ irunntum nndzi akɔndɔ bɔn a ɔtse dɛm do. Naaso nnyɛ dɛm na Bible no ka. Mbom ɔka dɛ: ‘Nyankopɔn yɛ ɔnokwafo a ɔremma wɔnnsɔ hom nnhwɛ nnkyɛn dza hom botum egyina ano, na mbom ɔdze ɔkwan bɛka nsɔhwɛ no ho a wɔnam mu fi nsa ama hom eetum egyina ano.’ (1 Cor. 10:13b) Dɛm ntsi sɛ ɔyɛ dzen ma  hɛn paa dɛ yɛbɔko etsia akɔndɔ bɔn bi mpo a, yebotum edzi do. Jehovah bɔboa hɛn ma yeetum ahyɛ hɛnho do na yeenndzi hɛn akɔndɔ ekyir annkɛyɛ bɔn.

17. Ɔnyɛ dɛn ara a akɔndɔ bɔn bɛba hɛn akwan mu, naaso sɛ ɔba a ebɛnadze na ɔsɛ dɛ yɛyɛ?

¹⁷ Mma wo werɛ mmfir dɛm asɛm yi da: Eyɛ nyimpa a bɔn wɔ woho yi ara dze, ɔnyɛ dɛn ara a akɔndɔ bɔn bɛba w’akwan mu. Naaso sɛ ɔba a, yɛ w’adze tse dɛ Joseph na pow no ntsɛmara. Aber a Potiphar ne yer kaa dɛ ɔnye no nda no, oguanee fii n’enyim ntsɛmara. (Gen. 39:12) Ɔnnsɛ dɛ idzi w’akɔndɔ ekyir na ekɛyɛ bɔn!

18-19. Aber a yɛreyɛ dza yebotum biara dɛ yɛbɛsesa hɛn adwen no, ebɛn nsɛm na yebotum ebisa hɛnho?

¹⁸ Hɛn adwen a yɛbɛyɛ no fofor no hwehwɛ dɛ yɛkɔ do ara ma dza yɛdwendwen ho nye dza yɛyɛ no nye Jehovah ne pɛ hyia. Dɛm ntsi, ɔsɛ dɛ yɛhwehwɛ hɛnho mu na yebisa hɛnho aber nyinara dɛ: ‘Aso m’abrabɔ kyerɛ dɛ megye dzi paa dɛ wiadze bɔn yi reba n’ewiei? Suban fofor no a morobɔ mbɔdzen dɛ mebɛhyɛ no, ebɛn nkɔenyim na menya? Ana merema kwan ma Jehovah no sunsum no akyerɛ me kwan mbrɛ ɔbɛyɛ a mubotum ahyɛ moho do na menndzi honam akɔndɔ ekyir annkɛyɛ bɔn?’

¹⁹ Aber a erohwehwɛ woho mu no, mma nnhwɛ kwan dɛ ebɛyɛ biribiara pɛpɛɛpɛr, mbom ma w’enyi ngye nkɔenyim a enya no ho. Sɛ ihu dɛ pii wɔ hɔ a ɔsɛ dɛ eyɛ a, mma w’abaw mu mmbu. Mbom fa afotusɛm a ɔwɔ Philippifo 3:16 no yɛ edwuma. Hɔ ka dɛ: “Dza yeedu ho dada no, noara so do na hom mma yendua nnantsew.” Aber a ereyɛ dɛm no, nya awerɛhyɛmu dɛ Jehovah behyira mbɔdzen a erobɔ dɛ ebɔkɔ do asesa w’adwen no do.