1. Ebɛnadze ntsi na Nkaadzi da no yɛ da tsitsir paa ma hɛn wɔ afe no mu? (Luke 22:​19, 20)

 JEHOVAH n’asomfo dze, da a yɛdze kaa Christ no wu no yɛ da tsitsir paa ma hɛn wɔ afe no mu. Iyi nkotsee nye afahyɛ a Jesus hyɛɛ n’ekyirdzifo dɛ wondzi. (Kenkan Luke 22:​19, 20.) Ntsi yɛwɔ siantsir ahorow bi ntsi a yɛhwɛ Nkaadzi no kwan afe biara no. Hom mma yensusu no mu bi ho nhwɛ.

2. Ebɛnadze ntsi na yɛhwɛ Nkaadzi no kwan afe biara?

² Nkaadzi no boa hɛn ma yɛdwendwen hia a werdam no ho hia nye mfaso ahorow a ɔma yenya no ho. Bio so, ɔma yɛkaa ndzɛmba a yebotum ayɛ dze akyerɛ Jesus n’afɔrbɔ no ho enyisɔ. (2 Cor. 5:​14, 15) Afei so, ɔma yenya hokwan nye hɛn nuanom hyia mu na yɛhyehyɛ hɛnho nkuran. (Rom. 1:12) Afe biara, hɔn a woegyaa asafo nhyiamu na asɛnka kɔ no mu pii ba Nkaadzi no. Sɛ wɔba a, mbrɛ enuanom dze enyigye ma hɔn akɔaba no tum ka hɔn mu binom ma wɔsan bɔsom Jehovah. Afei so, nyimpa pii a wɔba Nkaadzi no, dza wohu na wɔtse no ma hɔn enyi gye, na iyi kenyan hɔn ma wɔhyɛ ase sua Bible no. Hom mma yɛnka, iyi nyina ka ho bi ntsi na Nkaadzi no da hɛn akoma do dɛm no!

3. Ebɛn kwan do na Nkaadzi no ka Jehovah n’asomfo a wɔwɔ wiadze nyina no bɔ mu? (Hwɛ mfonyin no so.)

³ Siantsir fofor ntsi a Nkaadzi no da hɛn akoma do nye dɛ, ɔka Jehovah n’asomfo a wɔwɔ wiadze nyina no bɔ mu. Dɛm da no, Jehovah Adasefo a wɔwɔ wiadze yi mu beebiara no hyia mu ber a ewia akɔtɔ kaa Jesus no wu no. Hɛn nyina tsie Bible mu ɔkasa a osi mfaso a werdam no ma yenya no do dua. Yɛbɔ mu tow ayɛyi ndwom ebien, yɛdze paanoo na wenyin fa hɔn a wɔaba no nyina enyim, na mpaa anan a wɔbɔ wɔ Nkaadzi no n’ase nyina, hɛn nyinara fi hɛn akoma mu gye do “amen.”  Ndɔnhwer 24 ntamu no, nna asafo ahorow a ɔwɔ wiadze nyina edzi dɛm dwuma kor yi ara. Sɛ Jehovah na Jesus hu mbrɛ yɛdze koryɛ abɔ mu rehyɛ hɔn enyimnyam wɔ dɛm kwan yi do a, hwɛ mbrɛ hɔn enyi besi agye afa.

4. Ebɛnadze na yebosusu ho wɔ adzesua yi mu?

⁴ Yerubosusu nsɛmbisa a odzidzi do yi ho wɔ adzesua yi mu: Yebesi dɛn esiesie hɛn akoma ama Nkaadzi no? Ebɛnadze na yebotum ayɛ dze aboa afofor ma woeenya Nkaadzi no do mfaso? Na yebesi dɛn so aboa hɔn a woegyaa asɛnka nye asafo nhyiamu kɔ no? Nsɛmbisa a yerubosusu ho yi bɔboa hɛn ma yeesiesie hɛnho ama dɛm dwumadzi tsitsir yi.

YEBESI DƐN ESIESIE HƐN AKOMA AMA NKAADZI NO?

5. (a) Ebɛnadze ntsi na ɔsɛ dɛ yɛdwendwen mfaso a ɔwɔ werdam no do no ho? (Ndwom 49:​7, 8) (b) Ehwɛɛ video a wɔato dzin Ebɛnadze ntsi na Jesus Wui? no, ebɛnadze na isuae fii mu?

⁵ Adze tsitsir kor a yebotum ayɛ dze esiesie hɛn akoma ama Nkaadzi no nye dɛ, yɛbɔdwendwen mfaso a Jesus Christ no werdam afɔrbɔ no ma yenya no ho. Ɔka hɛn nkotsee a, nkyɛ yerunntum nngye hɛnho mmfi bɔn na owu mu da. (Kenkan Ndwom 49:​7, 8; hwɛ video a wɔato dzin Ebɛnadze Ntsi Na Jesus Wui? no so.) a Ntsi Jehovah yɛɛ nhyehyɛɛ ma Jesus dze no nkwa too hɔ gyee hɛn nkwa. Jehovah na Jesus nyina dze biribi a ɔsom bo ma hɔn bɔɔ afɔr maa hɛn. (Rom. 6:23) Sɛ yɛkɔ do dwendwen dza Jehovah na Jesus dze bɔɔ afɔr maa hɛn no ho a, ɔbɔboa hɛn paa ma yaakyerɛ werdam no ho enyisɔ kɛse. Ndzɛmba a Jehovah na Jesus hweree ansaana hɛn nsa reka werdam no, yerubosusu no mu bi ho kakra. Odzi kan, ebɛn kwan na Jesus faa do tuaa werdam no?

6. Ebɛnadze na Jesus yɛe dze tuaa werdam no?

⁶ Werdam yɛ bo a wotua san dze gye biribi. Wɔbɔɔ Adam no, nna ɔyɛ nyimpa a bɔn biara nnyi noho. Aber a ɔyɛɛ bɔn no, ɔhweer hokwan a nkyɛ ɔwɔ dɛ ɔno nye n’asefo nyina bɛtsena ase daa no. Mbrɛ ɔbɛyɛ a Jesus botum etua dza Adam hweree no, nna ɔsɛ dɛ nankasa dze no nkwa a odzi mu no bɔ afɔr. Aber a Jesus wɔ asaase do no, “ɔannyɛ bɔn na eso woennhu ndaadaa wɔ n’anomu.” (1 Pet. 2:22) Jesus wui no, nna bɔn biara nnyi noho; nna ɔtse dɛ Adam aber a ɔnnyɛɛ bɔn no. Ntsi aber a Jesus dze no nkwa bɔɔ afɔr no, otuaa nkwa a Adam hweree no.—1 Cor. 15:45; 1 Tim. 2:6.

7. Aber a Jesus wɔ asaase do no, ebɛn nsɔhwɛ ahorow na ohyiae?

⁷ Aber a Jesus wɔ asaase do no, ɔmmfa ho nsɔhwɛ ahorow a ohyiae no, ɔkɔr do yɛɛ setsie maa no sor Egya no. Aber a Jesus yɛ abofra no, nna bɔn biara nnyi noho, naaso nna ɔsɛ dɛ otsie n’awofo a bɔn wɔ hɔnho no asɛm. (Luke 2:51) Jesus yɛ aberantsɛba no, obotum aba dɛ nna ɔsɛ dɛ ogyina nhyɛdo a nkyɛ obotum ama ɔayɛ n’awofo do asoɔdzen anaa ɔatsew Jehovah do etua no ano. Aber a ɔyɛɛ panyin no, nna ɔsɛ dɛ ogyina nsɔhwɛ a Satan Abɔnsam dze baa no do no nyina ano. Ber bi mpo dze, Satan kaa kyerɛɛ no dɛ ɔnsom no. (Matt. 4:​1-11) Nna Satan awe ataa do dɛ ɔbɛma Jesus ayɛ bɔn mbrɛ ɔbɛyɛ a onnkotum etua werdam no.

8. Ebɛn nsɔhwɛ afofor na Jesus gyinaa ano?

⁸ Aber a nna Jesus reyɛ no som edwuma wɔ asaase do no, nna ɔsɛ dɛ ogyina nsɔhwɛ afofor ano. N’atamfo soɛree tsiaa no na wɔbɔɔ mbɔdzen dɛ woboku no. (Luke 4:​28, 29; 13:31) Afei so, osian mfom ahorow a nna n’ekyirdzifo no dzi ntsi, nna ɔsɛ dɛ ɔkɔ do nya hɔnho abotar. (Mark 9:​33, 34) Aber a nna woridzi n’asɛm no, wɔyɛɛ no ayakayakadze na wodzii noho fɛw so. Ɔno ekyir no, woguu n’enyim ase na wokum no yayaayaw. (Heb. 12:​1-3) No nsɔhwɛ  ne fa a otwa tun no mu no, Jehovah ammbɔ noho ban ntsi nna ɔsɛ dɛ nankasa dze n’ahoɔdzen gyina ano. b—Matt. 27:46.

9. Yɛtse nka dɛn wɔ afɔr a Jesus bɔe no ho? (1 Peter 1:8)

⁹ Nokwasɛm nye dɛ, Jesus hun amandze paa ansaana orutua werdam no. Jesus fi ne pɛ mu dze ndzɛmba pii bɔɔ afɔr dze tuaa werdam no maa hɛn. Sɛ yɛdwendwen dza ɔyɛe maa hɛn no ho a, ɔma yɛdɔ no kɛse.—Kenkan 1 Peter 1:8.

10. Ebɛnadze na Jehovah hweree ansaana orutua werdam no?

¹⁰ Na Jehovah so ɛ? Ebɛnadze na ofii ne pɛ mu dze bɔɔ afɔr ama Jesus eetum etua werdam no? Ebusuabɔ a nna ɔda Jehovah na Jesus hɔn ntamu no, no mu yɛ dzen kyɛn ebusuabɔ biara a ɔda egya bi na ne ba ntamu. (Mbɛ. 8:30) Aber a Jehovah hun dɛ Jesus refa nsɔhwɛ ahorow pii mu wɔ asaase yi do no, ehwɛ a, nna ɔbɛtse nka dɛn? Ekyingye biara nnyi ho dɛ, ɔyɛɛ Jehovah yaw paa aber a ohun dɛ ne Ba no ruhu amandze, obiara apow no, na ɔrefa nsɔhwɛ mu no.

11. Fa mfatoho kyerɛkyerɛ mbrɛ Jehovah sii tsee nka aber a wokum Jesus no mu.

¹¹ Ɔwofo biara a ne ba ewu pɛn no nyim yaw na awerɛhow a owu dze ba no. Ɔwɔ mu dɛ yɛgye owusoɛr no dzi paa dze, naaso sɛ hɛn dɔfo bi wu a, yedzi awerɛhow na ɔyɛ hɛn yaw. Dɛm nhwɛdo yi boa hɛn ma yɛtse dza Jehovah faa mu no ase aber a no Dɔba no hun amandze na owui wɔ afe 33 H.B. c—Matt. 3:17.

12. Sɛ wɔaka kakra ma yɛayɛ Nkaadzi no a, ebɛnadze na yebotum ayɛ?

¹² Ofitsi dɛm aber yi ara kesi dɛ yɛbɛyɛ Nkaadzi no, sɛ wankasa rusua adze a, ibotum esua werdam no ho adze. Dɛmara na sɛ hom reyɛ ebusua som a, hom botum ayɛ dɛm. Sɛ yɛpɛ dɛ yesua werdam no ho adze kɔ ekyir a, yebotum dze Buukuu A Jehovah Adasefo Dze Yɛ Nhwehwɛmu anaa asafo nwoma ahorow no mu bi ayɛ dɛm. d Afei so, ɔsɛ dɛ yɛbɔ mbɔdzen dɛ yebedzi Nkaadzi Bible akenkan ho nhyehyɛɛ a ɔwɔ Hɛn Asɛnka Nye Christianfo Asetsena—Nhyiamu Dwumadzi Nwoma no mu no do. Ɔno da nkyɛn a, sɛ Nkaadzi da no so a, mma hɛn werɛ mmfir dɛ yɛbɔhwɛ Daa Asɛm tsitsir a wɔyɛ no Nkaadzi da no. Sɛ yesiesie hɛn akoma ma Nkaadzi no a, yebotum aboa afofor ma hɔn so enya do mfaso.—Ezra 7:10.

 BOA AFOFOR MA WONNYA NKAADZI NO DO MFASO

13. Adze a odzi kan a yebotum ayɛ dze aboa afofor ma woeenya Nkaadzi no do mfaso nye dɛn?

¹³ Yebesi dɛn aboa afofor ma woeenya Nkaadzi no do mfaso? Odzi kan, ɔsɛ dɛ yɛto nsa frɛ hɔn. Yɛdze hɔn a yɛbɔto nsa afrɛ hɔn wɔ asɛnka mu no to nkyɛn a, yebotum so akyerɛw nkorɔfo a yɛpɛ dɛ yɛto nsa frɛ hɔn no hɔn edzin. Binom nye hɛn ebusuafo, hɛn edwumamufo, hɛn skuulfo, nye nkorɔfo afofor a yenyim hɔn. Sɛ yeennya nsato krataa no pii a, yebotum dze no ho link no asɛnd hɔn. Adze yi ara, yennyim obi a ɔbɛba nye obi a ɔremmba.—Ɔsɛnk. 11:6.

14. Ma nhwɛdo a ɔkyerɛ dɛ sɛ yɛdze nsato krataa anaa ne link ma obi a, ɔboa paa.

¹⁴ Sɛ edze nsato krataa no anaa ne link ma obi a, ɔboa paa. Da kor bi, akyerɛbaa bi a no kun nnyɛ Jehovah Dasefo kaa kyerɛ no dɛ ɔnye no bɔkɔ Nkaadzi no. Iyi yɛɛ akyerɛbaa no nwanwa paa. Ebɛnadze ntsi a? Siantsir nye dɛ, nna mpɛn pii na akyerɛbaa no ato nsa afrɛ no kun dɛ ɔnye no nkɔ Nkaadzi, naaso no mu biara nnyi hɔ a ɔnye no kɔree. Ebɛnadze na ɔmaa ɔsesaa n’adwen dɛm aber yi? Ɔkaa dɛ: “Asafo mu panyin bi a minyim no na ɔmaa me nsato krataa no bi.” Dɛm afe no, akyerɛbaa no kun no nye no kɔr Nkaadzi no, na ofi dɛm aber no rokɔ no nna afe biara ɔkɔ bi.

15. Sɛ yɛroto nsa afrɛ nkorɔfo ma wɔaaba Nkaadzi no ase a, ebɛnadze na ɔsɛ dɛ yɛkaa?

¹⁵ Kaa dɛ bi a hɔn a yɛbɔto nsa afrɛ hɔn no bebisa hɛn nsɛm bi a ɔfa Nkaadzi no ho, nkanka hɔn a wɔmmbaa hɛn asafo nhyiamu ase da no. Ɔsɛ dɛ yɛdwendwen nsɛm a wobotum ebisa hɛn no ho na yɛyɛ krado dɛ yɛbɛkyerɛkyerɛ hɔn mu. (Col. 4:6) Dɛ nhwɛdo no, bi a binom bebisa hɛn dɛ: ‘Ebɛnadze na ɔbɔkɔ do wɔ hɔ?’ ‘Obedzi ndɔnhwer ahen?’ ‘Ebɛn atar na ɔsɛ dɛ yɛhyɛ?’ ‘Ɔsɛ dɛ mutua sika bi ana maba anaa?’ ‘Wɔbɛgyegye kɔlɛhyɛn anaa?’ Sɛ yɛroto nsa afrɛ obi ma ɔaaba Nkaadzi no ase a, yebotum ebisa no dɛ, “Ewɔ asɛm bi a epɛ dɛ ibisa anaa?” Sɛ ɔba no dɛ ɔwɔ bi a, bɔ mbɔdzen kyerɛkyerɛ no mu. Afei so, ibotum eyi video a wɔato dzin Kaa Jesus No Wu No nye Ebɛnadze na Ɔkɔ do wɔ Hɛn Ahendzi Asa Do? no akyerɛ no na aboa no ma woeebohu dza ɔkɔ do wɔ hɛn asafo  nhyiamu ase. Bio so, ibotum enya nsɛm bi wɔ Ibotum Enya Enyigye Daa! buukuu no n’adzesua a otsia 28 no na enye no abɔ ho nkɔmbɔ.

16. Ebɛn nsɛm afofor na hɔn a yɛto nsa frɛ hɔn ma wɔba Nkaadzi no botum ebisa?

¹⁶ Sɛ yewie Nkaadzi no a, bi a hɔn a yɛtoo nsa frɛɛ hɔn no bɛpɛ dɛ wobisa hɛn nsɛm ahorow bi. Bi a wobebisa hɛn dɛ, ‘Ebɛnadze ntsi na nyimpa kakraabi anaadɛ obiara enndzi paanoo no na ɔannom wenyin no bi?’ Bi a wobotum so ebisa hɛn dɛ, ‘Mpɛn dodow ahen na hom yɛ Nkaadzi no?’ Bi so a wobebisa hɛn dɛ, ‘Ntsi dɛm kwan yi ara na Jehovah Adasefo fa do yɛ hɔn nhyiamu ahorow no a?’ Wɔbɛkyerɛkyerɛ dɛm nsɛm yi mu ber a wɔrema Nkaadzi ho ɔkasa no, naaso bi a hɔn a yɛato nsa afrɛ no bɛpɛ dɛ wonya nkyerɛkyerɛmu pii ka ho. Sɛ yɛkɔ jw.org a, yebohu asɛm a wɔato dzin “Ebɛnadze Ntsi Na Ɔkwan A Jehovah Adasefo Fa Do Dzi Ewuradze Edzidzi No Yɛ Soronko Fi Ɔsom Afofor Dze Ho?” Sɛ yɛkenkan dɛm asɛm yi a, obotum aboa hɛn ma yeetum eyi hɔn nsɛmbisa no bi ano. Ansaana Nkaadzi da no bodu, aber a Nkaadzi no rokɔ do nye aber a yeewie no, ɔsɛ dɛ yɛyɛ dza yebotum biara dɛ yɛbɔboa hɔn a wɔwɔ akoma pa no ma woeenya Nkaadzi no do mfaso kɛse.—Andw. 13:48.

BOA HƆN A WOEGYAA ASAFO NHYIAMU NYE ASƐNKA KƆ NO

17. Ebɛnadze na asafo mu mpanyimfo botum ayɛ dze aboa hɔn a woegyaa asafo nhyiamu nye asɛnka kɔ no? (Ezekiel 34:​12, 16)

¹⁷ Sɛ Nkaadzi ber no du a, ebɛnadze na asafo mu mpanyimfo botum ayɛ dze aboa hɔn a woegyaa asafo nhyiamu nye asɛnka kɔ no? Ɔsɛ dɛ wɔma dɛm enuanom yi hu dɛ wɔdwen hɔnho na wɔdɔ hɔn so. (Kenkan Ezekiel 34:​12, 16.) Hom mfa nyɛ hom botae dɛ hom bɛsera hɔn mpɛn dodow biara a hom botum ansaana Nkaadzi ber no edu. Ɔyɛ a hom mma wonhu dɛ hom dwen hɔnho na hom pɛ dɛ hom boa hɔn wɔ kwan biara a hom botum do. Afei, hom nto nsa mfrɛ hɔn ma wɔmbra Nkaadzi no bi. Sɛ wɔba a, hom mfi ɔdɔ mu ngye hɔn fɛw do. Sɛ yewie Nkaadzi no a, hom nkɔ do nsera hɔn anaa hom mfrɛ hɔn na hom mboa hɔn mma wontum nsan mbɔsom Jehovah.—1 Pet. 2:25.

18. Ebɛnadze na hɛn nyina botum ayɛ dze aboa hɔn a woegyaa asafo nhyiamu nye asɛnka kɔ no? (Romefo 12:10)

 ¹⁸ Enuanom a wɔwɔ asafo no mu no so botum aboa hɔn a woegyaa asafo nhyiamu nye asɛnka kɔ a wɔba Nkaadzi no. Ebɛnadze na wobotum ayɛ dze aboa hɔn? Ɔsɛ dɛ wɔma wohu dɛ wɔdɔ hɔn, wɔdwen hɔn ho, na wobu hɔn so. (Kenkan Romefo 12:10.) Ɔsɛ dɛ yɛkaa dɛ bi a nna ɔnnda famu mma dɛm enuanom yi dɛ wɔbɛsan aba asafo nhyiamu. Bi a nna wosuro dɛ sɛ wɔba asafo nhyiamu a, annhwɛ a enuanom renngye hɔn fɛw do. e Ntsi sɛ wɔba a, mma yemmbisa hɔn nsɛm bi a ɔbɛma wɔafɛr anaadɛ mma yɛnnka nsɛm bi a ɔbɛhaw hɔn. (1 Thess. 5:11) Kaa dɛ, dɛm enuanom yi yɛ hɛn mfɛfo agyedzifo. Na hɛn enyi gye ho dɛ yɛnye hɔn nyina bɔbɔ mu asom bio!—Ndw. 119:176; Andw. 20:35.

19. Sɛ yɛkaa Jesus no wu no a, ebɛn mfaso na ɔma yenya?

¹⁹ Ɔyɛ hɛn enyigye dɛ Jesus hyɛɛ hɛn dɛ yɛnkaa no wu no afe biara, na yɛtse siantsir a iyi ho hia paa no ase. Sɛ yɛkɔ Nkaadzi no a, ɔboa hɛn paa na dɛmara so na ɔboa hɔn a yɛto nsa frɛ hɔn ma wɔba bi no. (Isa. 48:​17, 18) Sɛ yɛkɔ Nkaadzi no so a, ɔboa hɛn ma ɔdɔ a yɛwɔ ma Jehovah na Jesus no mu yɛ dzen. Yɛkyerɛ dɛ hɛn enyi sɔ dza wɔayɛ ama hɛn no paa. Afei so, ɔma yɛbɛn hɛn nuanom kɛse. Bio so, ɔma yetum boa afofor ma wobohu mbrɛ hɔn so wobotum enya nhyira ahorow a werdam no ma yenya no. Ntsi hom mma yɛnyɛ dza yebotum biara mfa nsiesie hɛnho mma afe yi Nkaadzi no, osiandɛ ɔyɛ da tsitsir paa ma hɛn wɔ afe no mu!