1-2. Ebɛn ɔhaw ahorow na Jehovah n’asomfo anokwafo botum ehyia?

 ASƐM bi a ɔyɛ awerɛhow botum ato hɛn ma hɛn asetsena asesa prɛko pɛ. Dɛ nhwɛdo no, onua bi a ɔdze nokwardzi rosom Jehovah a wɔfrɛ no Luis a bohun dɛ oenya cancer. Dɔkta kaa kyerɛɛ no dɛ wɔaka abosoom kakraabi ma oeewu. Nna Monika na no kun so bɔ hɔnho mbɔdzen wɔ Jehovah no som mu. Naaso da kor bi, Monika bohun dɛ no kun a nna ɔsom dɛ asafo mu panyin no yɛ ndzɛmba bɔn bi wɔ sumase, na ɔayɛ dɛm mfe pii. Hɛn akyerɛbaa sigyanyi bi a wɔfrɛ no Olivia so, osian ehum kɛse bi a nna orubotu ntsi, nna ɔsɛ dɛ oguan fi beebi a ɔtse no. Aber a ɔsanee bae no, nna ehum no asɛɛ ne dan. Ber tsiabaa bi ntamu no, hɛn nuanom yi hɔn asetsena sesaa prɛko pɛ. Ɔhaw a hɛn nuanom yi hyiae yi bi ato wo pɛn anaa? Ehyia tsebea bi a ɔmaa etsee nka dɛ wo wiadze nyina aba ewiei?

² Ɔwɔ mu dɛ yɛdze nokwardzi rosom Jehovah dze, naaso dza ɔto nyimpa nyina no bi tum to hɛn so. Yarba tum bɔ hɛn na yehyia ɔhaw ahorow so. Ɔno da nkyɛn a, ɔsɛ dɛ yegyina ɔsoɛrtsia na ɔtaa a hɔn a wɔtan Nyankopɔn no nkorɔfo dze ba hɛn do no ano. Ɔwɔ mu dɛ Jehovah mmbɔ hɛnho ban mmfi ɔhaw a ɔtsetse dɛm ho dze, naaso ɔahyɛ hɛn bɔ dɛ ɔbɔboa hɛn ma yeetum egyina ano. (Isa. 41:10) Osian mboa a yenya fi Jehovah hɔ ntsi, yebotum akɔ do enya enyigye, yeesisi gyinae pa, na yaakɔ do edzi nokwar aber mpo a yerihyia tsebea a no mu yɛ dzen no. Adzesua yi mu no, yebosusu akwan anan a Jehovah fa do boa hɛn aber a yerihyia ɔhaw a no mu yɛ dzen no. Afei so, yɛbɔhwɛ dza ɔsɛ dɛ yɛyɛ ama yeenya mboa a Jehovah dze ma hɛn no do mfaso.

JEHOVAH BƆBƆ WOHO BAN

3. Sɛ ɔhaw bi to hɛn a, ebɛnadze na obotum ayɛ dzen ama hɛn dɛ yɛbɛyɛ?

 ³ Dza ɔma ɔyɛ dzen ma hɛn. Sɛ asɛm bi a ɔyɛ hu to hɛn awerɛfir mu a, bi a ɔbɛyɛ dzen ama hɛn dɛ yebosusu ndzɛmba ho yie na yeesisi gyinae pa. Ebɛnadze ntsi a? Bi a asɛm a ɔtse dɛm no bɛma hɛn akoma abotow paa. Bio so, obotum ama adwendwen ahyɛ hɛn do. Sɛ ɔba no dɛm a, nna wɔakɛyɛ tse dɛ yɛrokɔ beebi na bɔw esi ma yennhu kwan mu yie. Ɔyɛ mpo a yennhu sɛ yɛmfa bankum o, sɛ yɛmfa nyimfa o. Ma yɛnhwɛ mbrɛ ɔhaw a hɛn nkyerɛbaa beenu a yeedzi kan aka hɔnho asɛm no hyiae no maa wɔtsee nka. Olivia kaa dɛ: “Aber a ehum no sɛɛ me fie no, mo werɛ hoow araa ma nna meyɛ moho hwee a ɔnnyɛ yie, na m’abaw mu bui.” Monika so, aber a no kun dzii no hweambɔ no, ɔkaa dɛ: “Metsee nka dɛ me nsa esi famu. Nna ɔyɛ me yaw paa tse dɛ mbrɛ wɔdze sekan awɔ me. Ndzɛmba nketsenketse a meyɛ no da biara no mpo, nna ɔyɛ dzen ma me dɛ mebɛyɛ. Mannda anndwen ho da dɛ dɛm asɛm yi bɔto me.” Sɛ ɔkɛba dɛ asɛm bi si ma adwendwen hyɛ hɛn do a, ebɛnadze na Jehovah aka dɛ ɔbɛyɛ dze aboa hɛn?

4. Dɛ mbrɛ Philippifo 4:​6, 7 ma yehu no, ebɛnadze na Jehovah aka dɛ ɔdze bɛma hɛn?

⁴ Dza Jehovah yɛ. Ɔaka dɛ ɔbɛma hɛn dza Bible no frɛ no “Nyankopɔn n’asomdwee” no. (Kenkan Philippifo 4:​6, 7.) Nyankopɔn n’asomdwee yi yɛ asomdwee na akomatɔyamu a anyɛnkofa a no mu dzen a yɛnye no wɔ no ma yenya. Dɛm asomdwee yi ‘tra ntseasee nyina do.’ Iyi kyerɛ dɛ Nyankopɔn n’asomdwee no bor biribiara a yebotum dze hɛn adwen ebu no do. Dɛ nhwɛdo no, efi w’akoma mu abɔ Jehovah mpaa ma iwiei no etsee nka dɛ w’akoma atɔ wo yamu anaa? Dɛm atsenka no nye “Nyankopɔn n’asomdwee.”

5. Nyankopɔn n’asomdwee si dɛn bɔ hɛn adwen na hɛn akoma ho ban?

⁵ Philippifo 4:7 san so ka dɛ, Nyankopɔn n’asomdwee no “bɔweɔn” anaa ɔbɔbɔ “hom akoma nye hom adwen” ho ban. Kasafua ankasa a wɔkyerɛɛ ase ‘weɔn’ no, nna nsordaafo na wɔtaa dze dzi dwuma. Nna wɔdze ka nsordaafo a wɔweɔn kurow bi na wɔbɔ ho ban amma atamfo ammbɔto annhyɛ hɔn do ho asɛm. Osiandɛ nna dɛm kurow no mufo nyim dɛ nsordaafo gyina kurow no n’apon ano robɔ ho ban ntsi, nna wɔda a na wɔada. Hɛn so, sɛ Nyankopɔn n’asomdwee bɔ hɛn adwen nye hɛn akoma ho ban a, ɔma hɛn akoma tɔ hɛn yamu na yɛtse nka dɛ yɛwɔ bambɔ. (Ndw. 4:8) Dɛ mbrɛ yenyim fa Hannah ho no, sɛ ɔhaw a yerihyia no emmfi hɔ amonmu hɔ ara mpo a, yebotum enya asomdwee na hɛn akoma so atɔ hɛn yamu. (1 Sam. 1:​16-18) Sɛ hɛn akoma tɔ hɛn yamu so a, mpɛn pii no, ɔma yetum susu ndzɛmba ho yie na yesisi gyinae pa.

6. Sɛ yebotum enya Nyankopɔn n’asomdwee a, ebɛnadze na ɔsɛ dɛ yɛyɛ? (Hwɛ mfonyin no so.)

⁶ Dza ɔsɛ dɛ yɛyɛ. Sɛ dadwen hyɛ wo do a, hwehwɛ mboa fi Jehovah hɔ. Ibesi dɛn ayɛ dɛm? Bɔ mpaa kesi dɛ ebɛtse nka dɛ enya Nyankopɔn n’asomdwee. (Luke 11:9;  1 Thess. 5:17) Aber a Luis a yeedzi kan aka no ho asɛm na ne yer Ana tsee dɛ wɔaka abosoom kakraabi ma oeewu no, Luis kaa dza ɔboaa hɔn ma wotumii gyinaa ɔhaw no ano ho asɛm. Ɔkaa dɛ: “Sɛ irihyia ɔhaw a ɔtse dɛm a, ɔyɛ dzen paa dɛ ibesisi gyinae pa afa ayarsa nye ndzɛmba afofor ho. Naaso dza ɔboaa hɛn paa ma hɛn asomu dwee hɛn wɔ dɛm mber a no mu yɛ dzen yi mu nye mpaabɔ.” Luis na ne yer kaa dɛ wofii hɔn akoma mu bɔɔ mpaa mpɛn pii, na wɔserɛɛ Jehovah dɛ ɔmma hɔn asomu ndwe hɔn, ɔmma hɔn akoma ntɔ hɔn yamu, na ɔmma hɔn nyansa a wɔdze besisi gyinae pa. Jehovah tsiee mpaa a wɔbɔe no, na ɔboaa hɔn. Sɛ irihyia ɔhaw a, kɔ do bɔ mpaa na ibenya Jehovah n’asomdwee, na ɔbɔbɔ w’akoma na w’adwen ho ban.—Rom. 12:12.

JEHOVAH BƐMA ETSINTSIM

7. Sɛ yerihyia ɔhaw bi a no mu yɛ dzen a, obotum ama yaatse nka dɛn?

⁷ Dza ɔma ɔyɛ dzen ma hɛn. Sɛ yehyia nsɔhwɛ a no mu yɛ dzen a, bi a mbrɛ yesi tse nka, yesusu ndzɛmba ho, nye mbrɛ yesi yɛ hɛn adze no bɛsesa, na ɔrennyɛ tse dɛ mbrɛ yɛyɛ no dabaa no. Ɔbɛma yɛayɛ tse dɛ po do hɛn bi a ɔnam po do na ehum bɔ no kɔ afa na afa. Kyerɛ dɛ, ndɛ sɛ yɛtse nka dɛm a, ɔkyena na wɔasesa. Hɛn akyerɛbaa Ana a yeedzi kan aka no ho asɛm no kaa mbrɛ osii tsee nka aber a no kun Luis wui no. Ɔkaa dɛ: “Ɔyɛ a meyɛ hahaaha araa ma mara mpo moho yɛ me mbɔbɔr. Afei so, mo bo fuw dɛ mo kun ewu.” Ɔtɔ da so a, nna Ana tse nka dɛ ɔayɛ ankonam, na sɛ ɔkɛba no dɛ ɔsɛ dɛ osisi ndzɛmba bi a nna Luis dzi ho dwuma yie ho gyinae bi a, nna n’adwen nyinara etu afora. Ɔtɔ da a, nna ɔtse nka tse dɛ po do hɛn bi a ɔnam po do na ehum rutu. Sɛ mbrɛ yesi tse nka wɔ ɔhaw bi a yɛrefa mu no ho retseetsee hɛn ma yennhu dza yɛnnyɛ a, ebɛnadze na Jehovah yɛ dze boa hɛn?

8. Dɛ mbrɛ Jehovah aka wɔ Isaiah 33:6 no, ebɛn awerɛhyɛmu na ɔdze ama hɛn?

⁸ Dza Jehovah yɛ. Jehovah ama hɛn awerɛhyɛmu dɛ ɔbɛma yeetsintsim. (Kenkan Isaiah 33:6.) Sɛ ehum bi rutu wɔ po do a, obotum awosow po do hɛn bi dzendzenndzen akɔ afa na afa. Po do ahɛn pii wɔ hɔ a, wɔayɛ biribi wɔ n’ase a sɛ ehum tu a ɔboa no. Dɛm adze no hyɛ hɛn no n’afa na n’afa wɔ nsu no mu, ntsi sɛ ehum rutu a, ɔnnwosow no kɛse. Afei so, ɔbɔ hɔn a wɔwɔ mu no ho ban, na ɔma hɔnho tɔ hɔn kakra wɔ nsu no do. Naaso, sɛ dɛm adze no botum abɔ edwuma yie a, ɔnnsɛ dɛ po do hɛn no gyina fakor, mbom ɔsɛ dɛ ɔkɔ n’enyim. Dɛmara na hɛn so, sɛ Jehovah botum aboa hɛn ma yeetsintsim wɔ nsɔhwɛ mu a, ɔnnsɛ dɛ yegyina fakor, mbom ɔsɛ dɛ yɛkɔ do dze nokwardzi som.

9. Ebɛn kwan do na hɛn edwindadze ahorow a yɛdze yɛ nhwehwɛmu no botum aboa hɛn ma yeegyina pintsinn? (Hwɛ mfonyin no so.)

⁹ Dza ɔsɛ dɛ yɛyɛ. Sɛ mbrɛ isi tse nka wɔ  haw a irihyia ho no hyɛ wo do a, yɛ dza ibotum biara dɛ ebɔkɔ do abɔ mpaa, akɔ asafo nhyiamu nye asɛnka. Bi a, irunntum nnyɛ dɛm ndzɛmba yi tse dɛ mber bi a abɛsen kɔ, naaso kaa dɛ Jehovah tse wo ase na n’enyi sɔ mbɔdzen biara a erobɔ no. (Fa toto Luke 21:​1-4 ho.) Afei so, ɔyɛ a gye ber sua adze na dwendwen dza isua no ho. Ebɛnadze ntsi a? Osiandɛ, Jehovah nam n’ahyehyɛdze no do ma yenya nsɛm nye video ahorow a otum boa hɛn ma yegyina hɛn nan do aber a yerihyia nsɔhwɛ a no mu yɛ dzen no. Mbrɛ ɔbɛyɛ na eehu dza ɔbɔboa wo no, ibotum ayɛ nhwehwɛmu wɔ edwindadze ahorow a yɛdze yɛ nhwehwɛmu a ɔwɔ wo kasaa mu no mu. Dɛm edwindadze ahorow no bi nye JW Library^® app, Watch Tower Publications Index, nye Buukuu A Jehovah Adasefo Dze Yɛ Nhwehwɛmu no. Monika a yeedzi kan aka no ho asɛm no kaa dɛ, sɛ ohu dɛ mbrɛ osi tse nka no resesa, na no werɛ ahow a, ntsɛmara ɔdze edwindadze ahorow a yɛwɔ no yɛ nhwehwɛmu. Dɛ nhwɛdo no, nna otum yɛ nhwehwɛmu wɔ nsɛm a ɔfa “ebufuw” ho. Ɔtɔfabi so a, nna ɔhwehwɛ “hweambɔdzi” anaa “nokwardzi” ho nsɛm pii. Afei, ɔkenkan nsɛm ahorow a onya no kesi dɛ n’ahom bɛka noho. Ɔkaa dɛ: “Mehyɛɛ ase dɛ mereyɛ nhwehwɛmu no, nna munnhu dza mennyɛ ho nhwehwɛmu mpo. Naaso mokɔr do kenkanee no, mebɛtsee nka dɛ Jehovah reyɛ me etuu. Aber a meyɛɛ nhwehwɛmu no, mubohun dɛ Jehovah tse mbrɛ misi tse nka no ase, na ɔroboa mo so.” Mboa a ɔtse dɛm a Jehovah dze ma hɛn no botum so aboa hɛn ma yeegyina pintsinn ekesi dɛ yɛbɛtse nka dɛ hɛn akoma atɔ hɛn yamu.—Ndw. 119:​143, 144.

JEHOVAH BƆBOA WO

10. Sɛ yehyia ɔhaw bi a no mu yɛ dzen a, obotum ama yaatse nka dɛn?

¹⁰ Dza ɔma ɔyɛ dzen ma hɛn. Sɛ yehyia ɔhaw bi a ɔyɛ hu a, yebotum atse nka dɛ yɛaberɛ na hɛn enyi mpo renngye. Yebotum ayɛ dɛ mbirikatunyi bi a onyim mbirika tu yie paa a oepira ma ɔpensew. Sɛ ɔba no dɛm a, bi a ɔbɛyɛ dzen ama hɛn dɛ yɛbɛyɛ ndzɛmba bi a nna ne yɛ nnyɛ dzen a yɛyɛ no. Anaa biribiara mpo rummpusuw hɛn ma yɛnyɛ ndzɛmba bi a mber bi nna yɛdze enyigye yɛ no. Dɛ mbrɛ Elijah tsee nka no, ɔtɔ da a obotum ayɛ dzen ama hɛn mpo dɛ yɛbɔsoɛr. Ɔyɛ a yɛpɛ dɛ yɛda. (1 Ahe. 19:​5-7) Sɛ yɛtse nka dɛ yɛayɛ mberɛw a, ebɛnadze na Jehovah ahyɛ hɛn bɔ dɛ ɔbɛyɛ ama hɛn?

11. Kwan fofor a Jehovah fa do boa hɛn nye dɛn? (Ndwom 94:18)

¹¹ Dza Jehovah yɛ. Jehovah ahyɛ hɛn bɔ dɛ ɔbɔboa hɛn. (Kenkan Ndwom 94:18.) Dɛ  mbrɛ sɛ mbirikatunyi bi pira a, ohia mboa ana oetum anantsew no, hɛn so, sɛ yehyia ɔhaw a no mu yɛ dzen a, bi a yebehia mboa ana yeetum akɔ do asom Jehovah. Mber a ɔtse dɛm mu no, Jehovah ma hɛn awerɛhyɛmu dɛ: ‘Emi mara Jehovah wo Nyankopɔn mubosuo wo nsa nyimfa mu, dɛ, Mma nnsuro; mobɔboa wo.’ (Isa. 41:13) Jehovah yɛɛ biribi dɛm dze boaa Ɔhen David. Aber a ohyiaa nsɔhwɛ ahorow na n’atamfo so ritsiw no no, ɔkaa kyerɛɛ Jehovah dɛ: “Wo nsa enyimfa esuo mo mu.” (Ndw. 18:35) Naaso, ebɛn kwan na Jehovah fa do boa hɛn?

12. Sɛ yɛyɛ mberɛw a, woananom na Jehovah botum afa hɔn do aboa hɛn?

¹² Mpɛn pii no, kwan a Jehovah fa do boa hɛn nye dɛ okenyan afofor ma wɔdze mboa a yehia no ma hɛn. Dɛ mfatoho no, mber bi a David tsee nka dɛ ɔayɛ mberɛw no, ne nyɛnko Jonathan kɛseraa no hyɛɛ no dzen na ɔkaa n’akoma too ne yamu. (1 Sam. 23:​16, 17) Dɛmara so na Jehovah faa Elisha do dze mboa a nna Elijah behia no maa no. (1 Ahe. 19:​16, 21; 2 Ahe. 2:2) Ndɛ so, Jehovah botum afa hɛn ebusuafo, hɛn anyɛnkofo, anaa asafo mu mpanyimfo do aboa hɛn. Naaso, mbrɛ ɔtse nye dɛ, sɛ hɛn abaw mu bu a, bi a ɔbɛyɛ dzen ama hɛn mpo dɛ yɛbɛbɛn nkorɔfo. Na ɔyɛ so a yɛmmpɛ dɛ afofor bɛn hɛn. Sɛ yɛtse nka dɛm a, ɔnnyɛ bɔn. Naaso, ebɛnadze na yebotum ayɛ ama hɛn nsa aaka mboa a Jehovah pɛ dɛ ɔdze ma hɛn no?

13. Sɛ Jehovah bɔboa hɛn a, ebɛnadze na ɔsɛ dɛ yɛyɛ? (Hwɛ mfonyin no so.)

¹³ Dza ɔsɛ dɛ yɛyɛ. Yɛ dza ibotum biara dɛ erenntsew woho mmfi nkorɔfo ho. Sɛ yɛtsew hɛnho fi afofor ho a, ɔma yɛdze hɛn adwen si ɔhaw a yɛrefa mu no do na yɛdwen hɛn nkotsee hɛnho. Sɛ ɔba no dɛm a, ɔma ɔyɛ dzen dɛ yebesisi gyinae pa. (Mbɛ. 18:1) Nokwasɛm nye dɛ, ɔwɔ mu ara a, hɛn mu biara bɛpɛ dɛ ɔtsew noho kakra, nkanka aber a awerɛhosɛm bi ato hɛn no. Naaso, Jehovah fa afofor do boa hɛn. Ntsi, sɛ ɔkɛba dɛ yɛtsew hɛnho fi afofor ho ber tsentsen a, ɔbɛyɛ dɛn na Jehovah aboa hɛn? Dɛm ntsi, sɛ ɔhaw a yerihyia no mu yɛ dzen dɛ dɛn ara mpo a, ɔsɛ dɛ yɛgye mboa a hɛn ebusuafo, hɛn anyɛnkofo, nye asafo mu mpanyimfo dze ma hɛn no to mu. Hu hɔn dɛ Jehovah bɛfa hɔn do dze mboa biara a ihia no ama wo.—Mbɛ. 17:17; Isa. 32:​1, 2.

JEHOVAH BƐKYEKYE WO WERƐ

14. Ebɛn ndzɛmba na obotum ama yaabɔ hu?

¹⁴ Dza ɔma ɔyɛ dzen ma hɛn. Ɔtɔfabi a, bi a ɔhaw bi a yerihyia no bɛma yaabɔ hu. Sɛ yɛhwɛ Bible no mu a, Nyankopɔn n’asomfo anokwafo  binom a wɔtsenaa ase tsetse no kaa dza hɔn atamfo dze yɛɛ hɔn, nye nhyɛdo a wohyiae a ɔmaa wɔtseetsee na ɔbɔɔ hɔn hu no ho asɛm. (Ndw. 18:4; 55: 1, 5) Hɛn so, hɛn skuulfo, hɛn edwumamufo, hɛn ebusuafo, nye aban no botum atan hɛn enyi. Afei so, bi a yarba bi a ɔyɛ hu a wɔabɔ hɛn ntsi, yesuro dɛ yebowu. Sɛ yɛkɔ tsebea a ɔtse dɛm mu a, nna yɛakɛyɛ tse dɛ abofra bi a onntum nnyɛ noho hwee. Ebɛnadze na Jehovah yɛ dze boa hɛn wɔ mber a ɔtse dɛm mu?

15. Ebɛn awerɛhyɛmu na Ndwom 94:19 ma yenya?

¹⁵ Dza Jehovah yɛ. Ɔkyekye hɛn werɛ na ɔka hɛn akoma to hɛn yamu. (Kenkan Ndwom 94:19.) Sɛ yɛhwɛ asɛm a ɔdwontofo no kyerɛwee yi a, yebotum dze atoto basiaba bi a suro ama onntum nnda osian wimu a ɔrobobɔ mu ntsi. Sɛ ɔba no dɛm a, ne papa bɔkɔ ne nkyɛn akɛka no efua, na ɔaboaboa no ma ɔaada. Sɛ wimu a ɔrobobɔ mu no enngyaa mpo a, osiandɛ papa no roboaboa no no ntsi, orunnsuro. Hɛn so sɛ yerihyia ɔhaw a, yebehia hɛn sor Egya no ma ɔaaka hɛn efua kesi dɛ hɛn akoma bɔtɔ hɛn yamu. Naaso, yebesi dɛn enya awerɛkyekyer a ɔtse dɛm efi Jehovah hɔ?

16. Sɛ Jehovah bɛkyekye hɛn werɛ a, ebɛnadze na ɔsɛ dɛ yɛyɛ? (Hwɛ mfonyin no so.)

¹⁶ Dza ɔsɛ dɛ yɛyɛ. Taa bɔ Jehovah mpaa na kenkan n’Asɛm no, na ɔno bɛma abɛn no kɛse. (Ndw. 77:​1, 12-14) Sɛ etaa yɛ dɛm a, aber biara a adwendwen bɛhyɛ wo do no, dza odzi kan a ebɛyɛ nye dɛ ebɔhwehwɛ mboa efi wo sor Egya no hɔ. Ntsi ɔyɛ a, ka dza ɔhaw nyina ho asɛm kyerɛ Jehovah. Afei so, kenkan Nyankopɔn n’Asɛm no, na ɔnam do bɛkasa akyerɛ wo na ɔakyekye wo werɛ. (Ndw. 119:28) Ebɛba ebohu dɛ kyerɛwnsɛm ahorow bi wɔ hɔ a, sɛ ihyia ɔhaw na ekenkan a ɔbɛkyekye wo werɛ paa. Dɛ nhwɛdo no, sɛ ehwɛ Job, Ndwom, na Mbɛbusɛm nwoma no mu, anaa nsɛm a Jesus kae wɔ Matthew tsir 6 no mu a, ibenya awerɛkyekyesɛm pii wɔ hɔ a obotum aboa wo. Sɛ ebɔ Jehovah mpaa na ekenkan n’Asɛm no a, ɔbɛkyekye wo werɛ.

17. Ebɛn awerɛhyɛmu na yebotum enya?

¹⁷ Yebotum enya awerɛhyɛmu dɛ, sɛ ɔto ma ɔyɛ dzen a, Jehovah bɔboa hɛn. Hom mma yɛnkaa dɛ, ɔbɛka hɛnho aber nyina. (Ndw. 23:4; 94:14) Jehovah ahyɛ hɛn bɔ dɛ ɔbɔbɔ hɛn ho ban, ɔbɛma yeetsim, ɔbɔboa hɛn, na ɔakyekye hɛn werɛ so. Isaiah 26:3 ka Jehovah ho asɛm dɛ: “Nyia n’adwen etsim wo do no, ebɔkora no asomdwee a odzi mu mu: osiandɛ ɔdze no werɛ hyɛ wo mu.” Dɛm ntsi, fa woho to Jehovah do, na yɛ dza ibotum biara ama eenya mboa a ɔdze ma wo no do mfaso. Sɛ eyɛ dɛm a, ibenya ahoɔdzen dze egyina ɔhaw biara a ibehyia no ano.