1. Sɛ wɔka Jehovah ho asɛm a, ebɛnadze na ɔba w’adwen mu?

 ETWA mbrɛ Jehovah si tse ho mfonyin wɔ w’adwen mu pɛn anaa? Sɛ erobɔ no mpaa a, ihu no dɛn? Ɔwɔ mu dɛ yennhu Jehovah dze, naaso Bible no ka no ho asɛm wɔ akwan ahorow do. Ɔka dɛ Jehovah yɛ “ewia na kyɛm” nye “ogya a ɔhyew.” (Ndw. 84:11; Heb. 12:29) Enyido-adzehu bi a Ezekiel hunii mu no, ɔkaa Jehovah ho asɛm dɛ ɔtse dɛ hoabo, sika nye dwetɛ a woedzi afora a ɔtsew gya, nye nyankontɔn a ɔhyerɛn paa. (Ezek. 1:​26-28) Dɛm nsɛm a Bible no ka fa Jehovah ho yi mu bi wɔ hɔ a obotum ama hɛnho edwuruw hɛn, anaa obotum ama yaabɔ hu mpo.

2. Ebɛnadze ntsi na obotum ayɛ dzen ama binom dɛ wɔbɛbɛn Nyankopɔn?

² Yɛmmfa hɛn enyi nnhu Jehovah, ntsi bi a ɔbɛyɛ dzen ama hɛn dɛ yɛbɛgye edzi dɛ ɔdɔ hɛn. Hɛn mu binom wɔ hɔ a, osian dza yɛafa mu wɔ asetsena mu ntsi, hɛn adwen yɛ hɛn dɛ Jehovah ronndɔ hɛn da. Obotum aba dɛ nna hɛn egyanom nndɔ hɛn. Naaso yebotum enya awerɛhyɛmu dɛ Jehovah tse hɛn ase, na onyim siantsir a obotum ayɛ dzen ama hɛn dɛ yɛbɛbɛn no no. Dza ɔbɔboa hɛn ma yeetum abɛn no no, ɔnam n’Asɛm Bible no do ama yeehu no suban ahorow a ɔyɛ fɛw no.

3. Ebɛnadze ntsi na ohia dɛ yesua ɔdɔ a Jehovah wɔ ma hɛn no ho adze kɔ ekyir?

³ Jehovah dze, kasafua kor a yebotum dze aka no ho asɛm yie paa nye ɔdɔ. Bible no ka dɛ: “Nyankopɔn nye dɔ.” (1 John 4:8) Ɔdɔ na ɔka no ma ɔyɛ biribiara. Ɔdɔ a Nyankopɔn wɔ ma hɛn no yɛ kɛse, na no mu tserɛw araa ma bi ka hɔn a wɔnndɔ no no mpo. (Matt. 5:​44, 45) Adzesua yi mu no, yebosua Jehovah nye ɔdɔ a ɔwɔ ma hɛn no ho adze akɔ ekyir. Sɛ yesua Jehovah ho adze kɔ ekyir a, ɔbɔboa hɛn ma yaadɔ no kɛse.

JEHOVAH DƆ HƐN PAA

4. Ɔdɔ a Jehovah da no edzi no ma etse nka dɛn? (Hwɛ mfonyin no so.)

⁴ “Jehovah wɔ ayamuhyehye.” (Jas. 5:​11, NWT) Sɛ yɛhwɛ Bible mu a, Jehovah dze noho toto baatan bi a ɔdɔ ne ba ho.  (Isa. 66:​12, 13) Ɔwodze twa baatan bi a ɔdɔ ne ba na ɔhwɛ no yie ho mfonyin hwɛ. Ɔgyegye ne ba no wɔ ne nan do nye no dzi agor, ɔnye no kasa bɔkɔɔ na ɔkrɔkrɔw no so. Sɛ abofra no rusu anaa biribi rehaw no a, ɔhwɛ hu dɛ ɔdze dza ohia no bɛma no anaa ɔbɛma no ho aatɔ no. Ntsi hɛn so, sɛ biribi haw hɛn a, yebotum enya awerɛhyɛmu dɛ Jehovah dɔ hɛn na ɔbɔboa hɛn. Ɔdwontofo no kyerɛɛw dɛ: ‘Sɛ me dadwen dɔɔ so wɔ mo mu a, ekyekye mo werɛ na eka m’akoma to me yamu.’—Ndw. 94:19.

5. Ebɛn kwan do na inya Jehovah no nokwar dɔ do mfaso?

⁵ Jehovah da nokwar dɔ edzi. (Ndw. 103:8) Dɛm ntsi sɛ yedzi mfomdo mpo a, ɔmmpa abaw wɔ hɛnho. Israelfo no dzii Jehovah hweambɔ mpɛn pii, naaso aber biara a wobonu hɔnho na woegyaa bɔn yɛ no, nna Jehovah ma wonya awerɛhyɛmu dɛ ɔda ho ara dɔ hɔn. Dɛ nhwɛdo no, ɔkaa kyerɛɛ Israelman no dɛ: “Asom bo wɔ m’enyi do, na enya enyidzi, na modɔ wo.” (Isa. 43:​4, 5) Ndɛ so Jehovah dɔ n’asomfo dɛmara. Ntsi yebotum enya ahotodo dɛ ɔbɔdɔ hɛn aber biara. Sɛ yɛyɛ bɔn kɛse mpo a, Jehovah nngyaa hɛn ekyir dzi. Sɛ yenu hɛnho na yɛsan ba ne nkyɛn a, yebohu dɛ ɔda ho ara dɔ hɛn. Jehovah ahyɛ hɛn bɔ dɛ ɔdze hɛn bɔn ‘bɛkyɛ hɛn ma wɔaabor do.’ (Isa. 55:7) Bible no ka dɛ sɛ Jehovah dze hɛn bɔn kyɛ hɛn a, ɔma hɛnho tɔ hɛn.—Andw. 3:19.

6. Ebɛnadze na Zechariah 2:8 ma yehu fa Jehovah ho?

⁶ Kenkan Zechariah 2:8. Jehovah dɔ hɛn, ntsi ɔtse mbrɛ yesi tse nka no ase, na ɔpɛ dɛ ɔbɔ hɛn ho ban. Sɛ yɛrefa ɔhaw mu a, ɔyɛ no yaw. Dɛm ntsi, yebotum enya awerɛhyɛmu dɛ sɛ yɛserɛ no dɛ ‘ɔmbɔ hɛn ho ban dɛ enyiwa kyirefuwa’ a, obetsie hɛn. (Ndw. 17:8) Enyiwa yɛ nyimpadua n’akwaa a yenndzi ho agor koraa na ɔsom bo. Ntsi sɛ Jehovah dze hɛn toto enyiwa kyirefuwa ho a, nna ɔtse dɛ mbrɛ ɔreka dɛ, ‘Obiara a ɔdze ne nsa bɛka mo nkorɔfo no, ɔdze ne nsa aka biribi a ɔsom bo ma me.’

7. Ebɛnadze ntsi na ɔsɛ dɛ yenya ahotodo kɛse dɛ Jehovah dɔ hɛn?

⁷ Jehovah pɛ dɛ egye dzi paa dɛ ɔdɔ wo. Naaso onyim dɛ osian dza afa mu wɔ asetsena mu ntsi, obotum ayɛ dzen ama wo dɛ ebɛgye edzi dɛ ɔdɔ wo. Obotum so aba dɛ osian ɔhaw a erefa mu seseiara ntsi enngye nndzi dɛ Jehovah dɔ wo. Sɛ dɛm a, ebɛnadze na  ɔbɔboa wo ma aagye edzi dɛ Jehovah dɔ wo? Jehovah ada no edzi dɛ ɔdɔ Jesus, hɔn a wɔasera hɔn no, nye hɛn nyina. Sɛ isua mbrɛ Jehovah sii yɛɛ dɛm no ho adze a, ɔbɔboa wo paa.

MBRƐ JEHOVAH SI DA NO DƆ EDZI

8. Nna ebɛnadze ntsi na Jesus gye dzi dɛ n’Egya dɔ no?

⁸ Mfe ɔpepepem pii nye yi na Jehovah nye no Dɔba no afa nyɛnko, na wɔdodɔ hɔnho so paa. Anyɛnkofa biara nnyi amansan yi mu a wɔakyɛr sen hɔn anyɛnkofa no. Matthew 17:5 ma yehu dɛ Jehovah kaa no pefee dɛ ɔdɔ Jesus. Nkyɛ Jehovah botum aka no kɛkɛ dɛ, ‘Oyi nye nyia ɔsɔ m’enyi.’ Naaso, nna Jehovah pɛ dɛ yehu mbrɛ osi dɔ Jesus, ntsi ɔfrɛɛ no “mo Dɔba.” Nna Jesus yɛ ndzɛmba a ɔma Jehovah n’enyi gye, na aber mpo a ofii ne pɛ mu dɛ ɔdze no nkwa bɔbɔ afɔr no, ɔmaa n’enyi gyee paa. (Eph. 1:7) Nna Jesus so nyim dɛ n’Egya dɔ no paa. Nna Jehovah dɔ Jesus araa ma Jesus nankasa hun dɛ ɔdɔ no. Dɛm ntsi ɔdze ahotodo kaa no mpɛn pii dɛ Egya no dɔ no.—John 3:35; 10:17; 17:24.

9. Ebɛn asɛm na ɔma yɛtse ɔdɔ a Jehovah wɔ ma hɔn a wɔasera hɔn no ase? Kyerɛkyerɛ mu. (Romefo 5:5)

⁹ Hɔn a wɔasera hɔn no so, Jehovah ka kyerɛ hɔn dɛ ɔdɔ hɔn. (Kenkan Romefo 5:5.) Hom mma yɛnhwɛ kasafua “ehue” a wɔdze dzii dwuma wɔ kyerɛwsɛm yi mu no. Bible ho nwoma bi kyerɛkyerɛ dɛm kasafua yi mu dɛ ɔyɛ ɔdɔ a no mu yɛ dzen a Nyankopɔn wɔ ma hɔn a wɔasera hɔn no, na ɔdze toto esutsen ho. Dɛm ntotoho yi ma yehu dɛ Jehovah dɔ hɔn a wɔasera hɔn no paa! Hɔn so nyim dɛ ‘Nyankopɔn dɔ hɔn.’ (Jude 1) Ɔsomafo John kaa mbrɛ hɔn a wɔasera hɔn no si tse nka wɔ ɔdɔ a Nyankopɔn dze dɔ hɔn no ho asɛm. Ɔkyerɛɛw dɛ: “Hom nhwɛ ɔdɔ bi a Egya no dze adɔ hɛn, dɛ wɔfrɛ hɛn Nyankopɔn mba.” (1 John 3:1) Hɔn a wɔasera hɔn no nkotsee na Jehovah dɔ hɔn anaa? Oho, Jehovah ama yeehu dɛ ɔdɔ obiara.

10. Ebɛn adze kɛse paa na Jehovah ayɛ dze akyerɛ dɛ ɔdɔ wo?

¹⁰ Ebɛn adze kɛse paa na Jehovah ayɛ dze akyerɛ dɛ ɔdɔ hɛn? Ɔno nye werdam no; ɔyɛ ɔdɔ a ɔkyɛn biara a wɔada no edzi wɔ amansan yi mu! (John 3:16; Rom. 5:8) Jehovah maa ne Ba a ɔsom bo ma no no bowui maa nyimpa nyina mbrɛ ɔbɛyɛ a ɔdze hɛn bɔn bɛkyɛ hɛn na yaabɛyɛ n’anyɛnkofo. (1 John 4:10) Sɛ yɛdwendwen dza Jehovah na Jesus hweree mbrɛ ɔbɛyɛ a wobotum etua werdam no ho a, ɔbɛma yɛatse ɔdɔ a wɔdze dɔ hɛn no ase yie. (Gal. 2:20) Ɔnnyɛ dɛ nna Jehovah n’atsɛntsenenee hwehwɛ dɛ otua werdam no ntsi na ɔyɛɛ dɛm. Mbom ɔdɔ a ɔwɔ ma hɛn ntsi na ɔyɛɛ dɛm. Jehovah dze no Dɔba Jesus a ɔsom bo ma no paa no bɔɔ afɔr dze kyerɛɛ dɛ ɔdɔ hɛn. Osian hɛn ntsi, Jehovah maa ne Ba no bohun amandze na owui.

11. Ebɛnadze na yesua fi Jeremiah 31:3 mu?

¹¹ Dɛ mbrɛ yeebohu no, Jehovah nnka no kɛkɛ dɛ ɔdɔ hɛn mbom ɔma yehu dɛ ɔdɔ hɛn. (Kenkan Jeremiah 31:3.) Osiandɛ Jehovah dɔ hɛn ntsi ɔatwe hɛn aba ne nkyɛn. (Fa toto Deuteronomy 7:​7, 8 ho.) Nyimpa biara anaa biribiara nnyi hɔ a obotum atsew hɛn efi Nyankopɔn no dɔ no ho. (Rom. 8:​38, 39) Mbrɛ Jehovah si dɔ wo no ma etse nka dɛn? Kenkan Ndwom 23 na ibohu mbrɛ nna osi dɔ David na ɔdwen no ho nye mbrɛ iyi maa David tsee nka. Afei, yɛbɔhwɛ mbrɛ iyi besi aboa hɛn so.

ƆDƆ A JEHOVAH WƆ MA WO NO MA ETSE NKA DƐN?

12. Sɛ wɔka dɛ ka Ndwom 23 ho asɛm tsiabaa a, ebɛka dɛn?

¹² Kenkan Ndwom 23:​1-6. David na ɔkyerɛɛw Ndwom 23 no. Dɛm ndwom no mu no,  ɔdze ahotodo kaa dɛ Jehovah dɔ no na ɔdwen no ho. Ɔkaa anyɛnkofa a ɔnye Jehovah wɔ no ho asɛm, na ɔkaa dɛ Jehovah yɛ no Guanhwɛfo. David maa Jehovah kyerɛɛ no kwan na iyi maa ɔtsee nka dɛ ɔwɔ bambɔ. Dɛm ntsi ɔdze noho too no do korakora. Nna David nyim dɛ Jehovah bɔdɔ no no nkwa nda nyinara. Ebɛnadze na ɔmaa David nyaa ahotodo a ɔtse dɛm?

13. Nna ebɛnadze ntsi na David gye dzi dɛ Jehovah bɔhwɛ no?

¹³ “Hwee nnkehia me.” David tsee nka dɛ Jehovah dwen no ho paa, osiandɛ aber biara nna ɔma ne nsa ka dza ohia. Bio so, nna David nyim dɛ Jehovah yɛ ne nyɛnko na ɔpɛ n’asɛm so. Dɛm ntsi nna ɔgye dzi paa dɛ ɔmmfa ho dza daakye obesi biara no, Jehovah bɔkɔ do ahwɛ no na ɔama ne nsa aka dza ohia. Osiandɛ nna David gye dzi dɛ Jehovah dɔ no na ɔbɛma ne nsa aka dza ohia ntsi, ɔanndwendwen annhaw no ho. Iyi maa n’enyi gyee paa, na n’akoma so tɔɔ ne yamu.—Ndw. 16:11.

14. Ebɛnadze na Jehovah yɛ dze kyerɛ dɛ ɔdɔ hɛn na ɔdwen hɛnho?

¹⁴ Osiandɛ Jehovah dɔ hɛn ntsi ɔhwɛ hɛn, nkanka aber a yerihyia ɔhaw wɔ hɛn asetsena mu. Dɛ nhwɛdo no, hɛn akyerɛbaa Claire a dze mfe bɔbor 20 asom wɔ Bethel. Aber a n’ebusuafo hyiaa ɔhaw akɛse toatoaa do no, nna onnhu dza ɔnyɛ noho. Ne papa nyaa stroke, wotuu no nuabaa kakraba, na edwuma a nna n’ebusuafo yɛ dze hwɛ hɔnho no so sɛɛe. Ebɛnadze na Jehovah yɛe dze kyerɛɛ dɛ ɔdɔ Claire n’ebusuafo no na ɔdwen hɔnho? Claire kaa dɛ: “Da biara da, nna Jehovah hwɛ hu dɛ m’ebusua no nsa aka dza wohia. Mpɛn pii no, nna dza Jehovah dze ma hɔn no bor dza wohia no do koraa! Metaa dwendwen mbrɛ  Jehovah sii boaa hɛn no ho, na mo werɛ rimmfir ɔdɔ a ɔdaa no edzi kyerɛɛ hɛn no da. Iyi aboa me ma sɛ mihyia nsɔhwɛ a, memma m’abaw mu mmbu, mbom no mokɔ do dze enyigye som Jehovah.”

15. Ebɛnadze na ɔmaa David noho dwee no? (Hwɛ mfonyin no so.)

¹⁵ “Ɔma me kra ho dwe no.” Ɔtɔ da a, osian ɔhaw nye nsɔhwɛ a nna David hyia ntsi, nna ɔtseetsee. (Ndw. 18:​4-6) Naaso, ɔdɔ a nna Jehovah wɔ ma no nye mbrɛ osii hwɛɛ no no maa noho dwee no. Jehovah dzii ne nyɛnko a nna ɔahaw yi enyim kɔr ‘edzidzibea a hɔ yɛ frɔmfrɔm’ na ‘ahomgyebea a nsutaae pii wɔ.’ Iyi maa David nyaa ahoɔdzen na ɔkɔr do dze enyigye soom Jehovah.—Ndw. 18:​28-32.

16. Ebɛn kwan do na ɔdɔ a Jehovah wɔ ma wo no ma woho dwe wo?

¹⁶ Dɛmara na ndɛ so, sɛ yehyia nsɔhwɛ anaa yɛtseetsee wɔ asetsena mu a, osian ‘Jehovah no nokwar dɔ ntsi, hɛn ase nnhyew.’ (Kwa. 3:22; Col. 1:11) Hom mma yensusu dza ɔtoo hɛn akyerɛbaa Rachel no ho nhwɛ. Aber a nna COVID-19 yarba no taa mu no, no kun fii fie na ogyaa Jehovah som. Asɛm yi bubuu no paa. Naaso, ebɛnadze na Jehovah yɛe maa no? Ɔkaa dɛ: “Jehovah maa muhun dɛ ɔdɔ me. Ɔmaa me anyɛnkofo a nna wɔbɛsera me nye me bɔ nkɔmbɔ, na wɔyɛ edziban brɛ me. Afei so, nna wɔsɛnd me mɛsegye nye kyerɛwnsɛm ahorow dze hyɛ me nkuran, nna wɔserew kyerɛ me, na nna wɔtaa kaa me dɛ Jehovah rohwɛ me. Meda Jehovah ase da biara dɛ ɔama me ebusua kɛse a wɔdɔ me.”

17. Nna ebɛnadze ntsi na David ‘nnsuro mbusu biara’?

¹⁷ “Murunnsuro mbusu bi, osiandɛ ɔwoara wɔ me nkyɛn.” Mpɛn pii no, nna David hyia tsebea ahorow bi a ɔdze no nkwa to esian mu, na nna atamfo a hɔnho yɛ hu pii so rohwehwɛ no eku no. Naaso, ɔdɔ a nna Jehovah wɔ ma no maa ɔtsee nka dɛ ɔwɔ bambɔ na ɔammbɔ hu. Nna David nyim dɛ Jehovah ka noho wɔ tsebea nyina mu, na iyi kyekyee no werɛ. Iyi ntsi David toow ndwom dɛ: ‘Jehovah yii me fii mo suro nyinara mu.’ (Ndw. 34:4) Ɔwɔ mu dɛ nna ɔtɔ da a David bɔ hu paa dze, naaso osiandɛ nna onyim dɛ Jehovah dɔ no ntsi, otumii dzii suro no do.

18. Sɛ biribi ma ebɔ hu a, ebɛn kwan do na ɔdɔ a Jehovah wɔ ma wo no botum ahyɛ wo dzen?

¹⁸ Sɛ yeruhu amandze na yɛkaa dɛ Jehovah dɔ hɛn a, ebɛn kwan do na ɔboa hɛn?  Akyerɛbaa kwampaafo bi a wɔfrɛ no Susi kaa mbrɛ ɔnye no kun tsee nka aber a hɔn babanyin kum no ho no. Ɔkaa dɛ: “Sɛ awerɛhosɛm bi si awerɛfir mu a, otum bubu wo araa ma eyɛ woho hwee a ɔnnyɛ yie. Naaso ɔdɔ a Jehovah wɔ ma hɛn no ma hɛn akoma tɔ hɛn yamu na yɛtse nka dɛ yɛwɔ bambɔ.” Rachel a yedzii kan kaa no ho asɛm no kaa dɛ: “Da kor anafua bi, awerɛhow hyɛɛ mo do paa, na meyɛɛ basaa. Afei so, nna musuro. Dɛm ntsi mobɔɔ Jehovah mpaa. Hɔ no ara, metsee nka dɛ Jehovah aka m’akoma ato me yamu na ɔama moho adwe me fɔmm dɛ mbrɛ baatan bi yɛ ma ne ba no, na mefaa mu dae. Mo werɛ rimmfir dɛm da no da.” Asafo mu panyin bi a wɔfrɛ no Tasos so, ɔammpen do dɛ ɔbɔkɔ sogya ntsi wɔdze no kɔtoo efiadze. Ebɛnadze na Jehovah yɛe ma ohun dɛ ɔdɔ no na ɔdwen noho? Ɔkaa dɛ: “Dza nna mihia no, Jehovah maa minyae boor do. Iyi maa megyee dzii paa dɛ mubotum dze moho ato no do. Afei so, ɔmmfa ho dɛ nna efiadze hɔ nnyɛ no, Jehovah no sunsum no boaa me ma m’enyi gyee. Iyi maa minyaa awerɛhyɛmu dɛ sɛ mokɔ do dze moho to Jehovah do a, ɔbɛma mehu ndzɛmba bi a ɔyɛ dze kyerɛ dɛ ɔdɔ me paa. Ntsi mehyɛɛ akwampaa edwuma no ase wɔ efiadze hɔ.”

TWE BƐN ƆDƆ NYANKOPƆN NO

19. (a) Sɛ yenyim dɛ Nyankopɔn dɔ hɛn a, ebɛnadze na yɛbɔbɔ ho mpaa? (b) Dza Bible ka fa Jehovah no dɔ ho no, no mu hendze na w’enyi gye ho paa? (Hwɛ adakaba a wɔato dzin “ Bible Mu Nsɛm Bi A Ɔma Yehu Dɛ Jehovah Dɔ Hɛn Paa.”)

¹⁹ Suahu ahorow a yeesusu ho wɔ adzesua yi mu no, ne nyina ma yehu dɛ Jehovah a ɔyɛ ‘ɔdɔ Nyankopɔn’ no ka hɛnho aber nyina! (2 Cor. 13:11) Jehovah dwen hɛn mu biara ho. Yɛgye dzi paa dɛ Jehovah no nokwar dɔ etwa hɛnho ehyia. (Ndw. 32:10) Ɔdɔ a Jehovah ada no edzi akyerɛ hɛn no, sɛ yɛkɔ do dwendwen ho a, ɔbɛma yeehu mbrɛ osi dwen hɛnho, na ɔbɛma yɛatwe abɛn no kɛse. Yebotum abɔ no mpaa aber biara na yaaserɛ no dɛ ɔnkɔ do nda no dɔ edzi nkyerɛ hɛn. Afei so, yebotum aka dza ɔhaw hɛn nyina ho asɛm akyerɛ no, osiandɛ yɛwɔ awerɛhyɛmu dɛ ɔtse hɛn ase na, ɔpɛ paa dɛ ɔboa hɛn.—Ndw. 145:​18, 19.

20. Ebɛn kwan do na ɔdɔ a Jehovah wɔ ma hɛn no twe hɛn bɛn no?

²⁰ Sɛ awɔw ba a, ɔyɛ a yɛpɛ dɛ yɛkɛtsena gya bi ho ama hɛnho aayɛ hɛn hyew. Dɛmara so na sɛ yɛrefa ɔhaw mu a, ɔsɛ dɛ yɛma ɔdɔ a Jehovah wɔ ma hɛn no twe hɛn bɛn no, na ɔno bɛma hɛn akoma atɔ hɛn yamu. Ɔdɔ a Jehovah wɔ ma hɛn no mu yɛ dzen na ɔtserɛw so. Dɛm ntsi ma w’enyi ngye dɛ Jehovah dɔ wo. Hom mma hɛn mu biara so mpaa mu nka dɛ: ‘Modɔ Jehovah’!—Ndw. 116:1.