Jehovah pɛ dɛ awarfo nye hɔnho nya ebusuabɔ a no mu yɛ dzen na wonya enyigye daa. (Matt. 19:4-6) Sɛ epɛ dɛ ewar a, ibesi dɛn enya ɔhokafo a ɔfata? Jehovah nye hɛn Bɔfo, ntsi onyim adze a ɔwɔ dɛ yɛyɛ ama hɛn enyi aagye dɛ awarfo. Dɛm ntsi sɛ edze ngyinadonsɛm a ɔdze ama hɛn no yɛ edwuma a, obesi wo yie. Susu dɛm ngyinadonsɛm no bi ho hwɛ.

Odzi kan no, nokwasɛm bi wɔ hɔ a ɔwɔ dɛ yehu fa hɛnho. Ɔno nye dɛ: “Akoma yɛ ɔdaadaafo kyɛn adze nyina, na ɔyɛ otsiɔdzenfo pasaa.” (Jer. 17:9) Sɛ nyimpa beenu bi enyi gye hɔnho na sɛ wɔpɛ dɛ wɔwar a, atsenka a wɔwɔ ma hɔnho no mu botum ayɛ dzen na ɔno botum ama ayɛ dzen ama hɔn dɛ wobesi gyinae a nyansa wɔ mu. Sɛ nyimpa beenu gyina mbrɛ wosi tse nka ma hɔnho nkotsee no do war a, mpɛn pii no dza ofi mu ba no yɛ awerɛhow. (Mbɛ. 28:26) Dɛm ntsi na nyansa nnyi mu dɛ nyimpa beenu bi bɛda nkãtse a ɔkɔ ekyir edzi akyerɛ hɔnho, anaa wɔbɛhyehyɛ hɔnho bɔ aber mpo a wonnyim hɔnho yie no.

Mbɛbusɛm 22:3 kã dɛ: “Ɔbadwembanyi hu mbusu, na ohuntsa noho: na mbatam dze, wɔnam hɔn enyim araa kɔtɔ mbusu no mu.” Ebɛn esian na ɔwɔ wɛbsaet a wɔdze hwehwɛ awar mu hokafo no mu? Awerɛhosɛm nye dɛ, binom nye afofor yɛɛ awar nhyehyɛɛ wɔ intanɛt do naaso okowiee ase no wɔdaadaa hɔn. Bio so nyimpa bɔn bi ebue account wɔ mbea a ɔtsetse dɛm dze adaadaa nkorɔfo agye hɔnho sika. Ɔtɔfabi a nyimpa bɔn a wɔtse dɛm no kã dɛ wɔyɛ Adasefo.

Susu esian fofor so ho hwɛ. Wɛbsaet ahorow a ɔtse dɛm no bi dze kɔmpiwta do dwumadzi bi dzi dwuma dze kyerɛ nyimpa beenu bi a wobotum ayɛ awar nhyehyɛɛ. Naaso biribiara nnyi hɔ a ɔkyerɛ dɛ dɛm a wɔyɛ no sow aba ankasa. Awar yɛ enyibersɛm, ntsi ehwɛ a nyansa wɔ mu dɛ edze wo werɛ bɛhyɛ kɔmpiwta do dwumadzi bi mu dɛ ɔno na ɔnkyerɛ wo obi a ibotum awar no daakye? Bible mu ngyinadonsɛm dze ibotum dze woho ato do, na kɔmpiwta do dwumadzi dze innkotum dze woho ato do dabiarada.​—Mbɛ. 1:7; 3:5-7.

Ngyinadosɛm bi wɔ Mbɛbusɛm 14:15 dɛ: “Ɔbatam gye asɛm biara dzi: na ɔbadwembanyi dze, ɔhwɛ ne nantsew yie.” Ansaana ibesi gyinae dɛ ebɔwar obi no ɔwɔ dɛ ihu nyimpa no yie. Ntsi sɛ intanɛt do nkotsee na ihyia nyimpa no a, ɔbɛyɛ dzen dɛ ibohu nyimpa no yie. Sɛ obiara kã noho  asɛm kyerɛ ne nyɛnko anaa mpo hom dze ndɔnhwer pii tɛst homho a, aso ibotum akã no ampaara dɛ inyim nyimpa no yie? Nyimpa binom yɛɛ dɛm ma nna wosusu dɛ woenya hɔn dɔfo, naaso ekyir yi a wohyiaa nyimpa no, dza wohunii no bɔɔ hɔn do.

Ɔdwontofo no kãa dɛ: “Mennye nyimpa huhuw nntsenae; nkyii so merennye ndabrabafo nnkɔ mu.” (Ndw. 26:4) Wɔ wɛbsaet a wɔdze hwehwɛ awar mu hokafo do no, nyimpa pii tse nka dɛ sɛ wɔkã hɔnho nsɛm bi a ɔnnyɛ nokwar wɔ do a ɔnnyɛ hwee. Wɔtse nka dɛ sɛ wɔyɛ dɛm a na ɔbɛma afofor nye hɔn edzi nkitaho. Wobotum dze suban bɔn bi a wɔwɔ no esie, anaadɛ hɔn suban bɔn no rennda edzi aber a wɔnye wo ridzi nkitaho wɔ intanɛt do no. Bi a binom bɛda hɔnho edzi dɛ wɔyɛ Jehovah Adasefo naaso asɛm no nye dɛ aso wɔyɛ Christianfo a woenuma hɔn? Ana wɔyɛ Christianfo a hɔnho akokwaa? Ana wɔnye Jehovah ntamu ebusuabɔ no yɛ papa? Asafo a wɔwɔ mu no afofor bu hɔn dɛn? Anaaso dɛ bi a wɔnnyɛ nhwɛdo pa anaa wɔyɛ “fɛkuw bɔn”? (1 Cor. 15:33; 2 Tim. 2:20, 21) Aso wɔyɛ hɔn a Kyerɛwnsɛm no ma hɔn kwan dɛ wobotum awar? Ɔwɔ dɛ ihu dɛm nsɛm yi nyina naaso gyedɛ ibisa Adasefo afofor a wonyim dɛm nyimpa no yie na wɔaaboa wo ma eehu dɛm nokwasɛm no. (Mbɛ. 15:22) Na kaa so dɛ sɛ obi yɛ Jehovah no somfo nokwafo a, ɔrennye obi a ɔnngye nndzi nntwe “kɔndua kor.”​—2 Cor. 6:14; 1 Cor. 7:39.

Sɛ ehwɛ esian ahorow a ɔwɔ wɛbsaet a wɔdze hwehwɛ awar mu hokafo no mu a, ebɛgye ato mu dɛ ibotum afa kwan ahorow a ɔfata do dze enya obi a ibotum nye no ayɛ nhyehyɛɛ pa a obotum ekowie awar mu. Henfa na ibotum ehyia obi a ibotum awar no daakye? Sɛ ho kwan ba dɛ ibotum nye afofor abɔ mu ehyia enyim-na-enyim a ibotum ehu obi na aafa no nyɛnko aber a akɔ asafo nhyiamu, ɔmansin anaa ɔmantɔw ehyiadzi nye nhyiamu afofor ase no.

Sɛ ɔrennyɛ yie dɛ nyimpa dodow bɔbɔ mu ehyia mu tse dɛ COVID-19 aber mu a, yɛfa abaɛfor kwan ahorow do dze kɔ asafo nhyiamu. Wɔ nhyiamu ahorow a ɔtse dɛm ase no, ibohu Adasefo afofor a wɔyɛ esigyafo na aafa hɔn nyɛnko. Ibohu mbrɛ wɔdze hɔnho hyɛ nhyiamu dwumadzi no mu na ibohu mbrɛ wɔnam hɔn kasaa nye hɔn mbuaema do da hɔn gyedzi edzi. (1 Tim. 6:11, 12) Wɔ nhyiamu a wɔdze elɛktrɔnek mfir kɔ do no, ibotum dze ɔfã a ɔma kwan ma nyimpa beenu na no mboree tum hyia mu no edzi dwuma na enye afofor aabɔ nkɔmbɔ. Ɔwɔ mu dɛ enye nkorɔfo rinnhyia mu enyim-na-enyim wɔ nhyiamu a ɔtsetse dɛm no ase dze, naaso ibenya ho kwan ehu mbrɛ nyimpa a epɛ dɛ ewar no no nye afofor dzi, na ɔno bɛma ehu no suban ankasa. (1 Pet. 3:4) Afei, sɛ nkakrankakra ibohu nyimpa no yie na hom beenu no nyina hom botae yɛ kor, na hom botum abɔ mu atsena dɛ awarfo a, ibohu.

Sɛ esigyafo fa kwan a ɔnye Bible mu ngyinadonsɛm hyia do hwehwɛ ahokafo a, wobohu nokwasɛm a ɔwɔ dɛm abɛbusɛm yi mu dɛ: “Obiara a onya ɔyer [anaa okun] no, oenya adze pa, na oenya [Jehovah] n’enyimpa.”​—Mbɛ. 18:22.