1-2. Ebɛn kwan do na Isaiah 65:16, 17 hyɛ hɛn nkuran dɛ mma yɛmmpa abaw?

“MMA MMPA ABAW!” Nna iyi nye afe 2017 ɔmantɔw ehyiadzi no n’asɛntsir; nna asɛntsir no hyɛ nkuran. Dwumadzi no boaa hɛn ma yehun kwan a yebotum afa do egyina ɔhaw a yerihyia no ano. Mfe anan a woetwa mu no na yɛkɔr ehyiadzi yi, na yɛda ho ara rigyina nsɛndzendzen ano wɔ wiadze bɔn yi mu.

² Ebɛn ɔhaw na ehyia no ndaansa yi? Ana wo busuanyi anaa wo nyɛnko bi a epɛ n’asɛm ewu? Ana yarba a ɔyɛ hũ bi retseetsee wo? Mpanyinyɛ ama asetsena ayɛ dzen ama wo anaa? Aso ɔyɛ ɔhaw a atoyerɛnkyɛm, basabasayɛ anaa ɔtaa dze aba? Anaa ɔyɛ nsunsuando a yarba bi tse dɛ COVID-19 yarba bɔn no dze aba? Yɛrohwɛ kwan dzendzenndzen dɛ ber bi bɛba a dɛm ndzɛmba yi botwa mu na yɛrennkaa na orinnsi bio so!​—Kenkan Isaiah 65:16, 17.

3. Ebɛnadze na no ho hia dɛ yɛyɛ, na ebɛnadze ntsi a?

³ Wiadze yi mu asetsena yɛ dzen, na bi a yebehyia ɔhaw a no mu yɛ dzen mpo daakye. (Matt. 24:21) Nokwasɛm nye dɛ, no ho hia dɛ yɛhyɛ abotar a yɛdze tsim no mu dzen. Ebɛnadze ntsi a? Osiandɛ Jesus kãa dɛ: “Hom abotar mu na hom benya hom akra.” (Luke 21:19) Sɛ yɛdwendwen mbrɛ afofor etum egyina ɔhaw a ɔtse dɛ dza yerihyia no ano no ho a, ɔbɛhyɛ hɛn dzen ma yɛdze abotar eetsim.

4. Ebɛnadze ntsi na yebotum akã dɛ Jehovah na ɔayɛ abotar a wɔdze tsim ho nhwɛdo a ɔkyɛn biara?

⁴ Woana na ɔayɛ abotar a wɔdze tsim ho nhwɛdo a ɔkyɛn biara? Ɔyɛ Jehovah Nyankopɔn a. Ana iyi yɛ wo nwanwa? Bi a iyi bɛyɛ wo nwanwa, naaso sɛ edwen ho a ibohu dɛ ɔyɛ nokwar. Abɔnsam na odzi wiadze yi do, dɛm ntsi ɔhaw ahyɛ mu mã.  Ɔwɔ mu dɛ Jehovah wɔ tum a ndɛ yi ara obotum dze eyi ɔhaw no efi hɔ dze, naaso ɔrotweɔn ekesi ber bi. (Rom. 9:22) Seseiara dze, hɛn Nyankopɔn no rotweɔn ekodu dɛ ber a ɔahyɛ no bɔsõ. Hom mma yɛnhwɛ ndzɛmba akron bi a Jehovah enya ho abotar.

5. Ebɛn kwan do na wɔabɔ Nyankopɔn ne dzin no ahorohoraa, na etse nka dɛn wɔ ho?

⁵ Ahorohoraa a wɔdze abɔ ne dzin no. Jehovah nndzi ne dzin no ho agor, na ɔpɛ dɛ obiara nya obu ma ne dzin no. (Isa. 42:8) Naaso bɛyɛ mfe 6,000 nye yi na wɔabɔ ne dzin no ahorohoraa. (Ndw. 74:10, 18, 23) Iyi hyɛɛ ase wɔ Eden ture no mu, ber a Abɔnsam (dza ɔkyerɛ nye “Otwirfo”) bɔɔ Nyankopɔn sombo dɛ ɔdze biribi a ɔbɛma Adam na Eve enya enyigye no akam hɔn. (Gen. 3:1-5) Ofi dɛm aber no besi ndɛ, ɔakɔ do abɔ Jehovah sombo dɛ ɔdze ndzɛmba a adasamba hia papaapa no akam hɔn. Nna ahorohoraa a wɔdze abɔ Jesus n’Egya ne dzin no ho asɛm haw no papaapa. Osian iyi ntsi, ɔkyerɛɛ n’ekyirdzifo no dɛ wɔmbɔ mpaa dɛ: “Hɛn Egya a ewɔ sor, wo dzin ho ntsew.”​—Matt. 6:9.

6. Ebɛnadze ntsi na Jehovah ama kwan ma mber pii egu mu mbrɛ ɔbɛyɛ a obesiesie no tumdzi ho asɛm no?

⁶ No tumdzi a wɔasoɛr etsia. Jehovah nkotsee na ɔwɔ ho kwan dɛ odzi sor na asaase do tum, na kwan a ɔfa do dzi tum no ye kyɛn biara. (Nyi. 4:11) Naaso Abɔnsam abɔ mbɔdzen dɛ ɔbɛdaadaa abɔfo na nyimpa ma woeenya adwen dɛ Nyankopɔn nnyi dɛm ho kwan no. Nna ɔbɛgye ber ana wɔaada edzi dɛ Jehovah wɔ ho kwan dɛ odzi tum, na ɔyɛ tumdzifo a oye kyɛn biara. Nyansa wɔ mu dɛ Nyankopɔn ama mber pii egu mu ma ada edzi dɛ sɛ nyimpa dzi tum aber a ɔno Ɔbɔadze no ne nsa nnyi mu a, onnkesi hɔn yie da! (Jer. 10:23) Osian Nyankopɔn n’abotar ntsi, obesiesie asɛm no korakora. Iyi bɛma obiara ehu dɛ Jehovah no tumdzi na ɔfata, na n’Ahendzi no nkotsee na ɔdze asomdwee nye bambɔ a odzi mũ bɛbrɛ adasamba.

7. Woananom na wɔatsew Jehovah no do etũa, na ebɛnadze na ɔdze bɛyɛ hɔn?

⁷ Etũa a ne mba binom atsew etsia no. Jehovah bɔɔ abɔfo na nyimpa dɛ abɔdze a sintɔ biara nnyi hɔnho. Naaso ɔbɔfo otuatsewnyi bi a ekyir yi wɔbɛfrɛɛ no Satan (dza ɔkyerɛ nye “Ɔsoɛrtsiafo”) maa nyimpa a wodzi mũ, Adam na Eve, tseew Jehovah do etũa. Ber kɔr do no, abɔfo na nyimpa binom so kɛkaa etuatsew no ho. (Jude 6) Ekyir yi, Israelman a nna Nyankopɔn apaw hɔn dɛ nankasa ne man mpo, hɔn mu binom poow no na wɔkɔsoom ator enyame. (Isa. 63:8, 10) Jehovah tsee nka dɛ woeyi no ama. Ne nyinara ekyir no oegyina ano, na ɔbɔkɔ do dze abotar atweɔn ekesi dɛ ɔbɛsɛɛ etuatsewfo nyinara. Iyi bɛma n’anokwafo a wɔnye no rigyina emumuyɛ a ɔrokɔ do wɔ wiadze yi mu ano no enya ahotɔ!

8-9. Ebɛn atorsɛm na wɔakã afa Jehovah ho, na yɛyɛ hɛn adze dɛn wɔ ho?

⁸ Atorsɛm a Abɔnsam kã fa noho. Satan bɔɔ Jehovah no somfo ɔtseneneenyi Job sombo. Dza nna ɔrepɛ akyerɛ nye dɛ, ndzɛmba pa a Jehovah n’asomfo anokwafo nyinara nya fi ne nkyɛn ntsi na wɔsom no. (Job 1:8-11; 2:3-5) Dze besi ndɛ, Abɔnsam akɔ do dze dɛm sombo yi abɔ nyimpa. (Nyi. 12:10) Sɛ yegyina nsɔhwɛ a yehyia no ano na yefi ɔdɔ mu kɔ do dzi Jehovah nokwar a, nna yɛreda no edzi dɛ Satan no sombo yi yɛ ator. Sɛ yɛyɛ dɛm a Jehovah behyira hɛn tse dɛ mbrɛ ohyiraa Job wɔ abotar a ɔdze tsimii no ho no.​—Jas. 5:11.

⁹ Satan nam ator som mu akandzifo do kã dɛ Jehovah ne tsirmu yɛ dzen na ɔno na ɔma nyimpa hu amandze. Binom mpo kã dɛ sɛ  mbofra wu a, Nyankopɔn na ɔato nsa afrɛ hɔn akɔ sor osiandɛ ohia abɔfo pii wɔ hɔ. Hwɛ ebususɛm ara a ɔtse dɛm! Hɛndze yenyim dɛ dɛm asɛm yi nnyɛ nokwar. Sɛ yarba bɔn bi bɔ hɛn anaa sɛ hɛn dɔfo bi wu a, yɛmmfa ho sombo no mmbɔ hɛn Nyankopɔn no. Mbom no, yɛgye dzi dɛ mber bi bɛba a obeyi ɔhaw nyina efi hɔ. Yɛkyerɛkyerɛ akomapafo ma wohu dɛ Jehovah yɛ ɔdɔ Nyankopɔn. Iyi ma onya asɛm bi bua nyia ɔhyɛ no ahorohoraa no.​—Mbɛ. 27:11.

10. Ebɛnadze na Ndwom 22:23, 24 ma yehu fa Jehovah ho?

¹⁰ Amandze a n’asomfo anokwafo hu. Jehovah yɛ Nyankopɔn a ɔwɔ ayamuhyehye. Sɛ ohu dɛ ɔtaa, yarba, anaa hɛn sintɔ ntsi yeruhu amandze a ne yamu hyehye no. (Kenkan Ndwom 22:23, 24.) Sɛ yɛrefa yaw mu a Jehovah hu; ɔwɔ ɔpɛ dɛ obeyi efi hɔ, na obeyi efi hɔ so. (Fa toto Exodus 3:7, 8; Isaiah 63:9 ho.) Mber bi bɛba a “ɔbɛpepa [hɛn] enyiwa mu nyinsuwa nyina; na owu nnyi hɔ bio; na awerɛhow, nye sũ, nye yaw bi nnyi hɔ bio.”​—Nyi. 21:4.

11. Ebɛnadze na Jehovah kaa wɔ n’asomfo anokwafo a woewuwu no ho?

¹¹ Ɔafe n’anyɛnkofo a woewuwu no. Jehovah tse nka dɛn wɔ n’asomfo a woewuwu no ho? Ɔafe hɔn papaapa! (Job 14:15) Ana ibotum dze w’adwen ebu mbrɛ Jehovah esi afe ne nyɛnko Abraham? (Jas. 2:23) Anaadɛ Moses a ɔnye no kasaa “enyim nye enyim” no? (Ex. 33:11) Jehovah rohwɛ kwan dzendzenndzen dɛ David nye adwontofo afofor bɔtow ayɛyi ndwom a ɔyɛ dɛw ama no! (Ndw. 104:33) Ɔwɔ mu dɛ Nyankopɔn n’asomfo yi ewuwu dze, naaso Jehovah no werɛ mmfir hɔn da. (Isa. 49:15) Ɔkaa hɔnho nsɛm nyinara. Wɔ kwan bi do no “hɔn nyina tse ase ma no.” (Luke 20:38) Mber bi bɛba a obenyan hɔn aba nkwa mu bio na ɔbɛsan etsie mpaa a wobefi  hɔn akoma mu abɔ no na ɔaagye hɔn som ato mu. Sɛ wo dɔfo bi ewu a, ma dɛm nsɛm yi nhyɛ wo dzen na ɔnkyekye wo werɛ.

12. Ebɛnadze na ɔrokɔ do wɔ wiadze bɔn yi mu a ɔma Jehovah dzi yaw papaapa?

¹² Ndzebɔnyɛfo a wɔhyɛ afofor do. Aber a Eden etuatsew no hyɛɛ ase no, nna Jehovah nyim dɛ ndzɛmba bɛsɛɛ koraa ana asan ayɛ yie bio. Jehovah kyir emumuyɛ, atsɛnkyew nye basabasayɛ a ɔrokɔ do wɔ wiadze yi mu ndɛ no. Ofi tsetse besi ndɛ, Jehovah akɔ do enya ayamuhyehye ama hɔn a wɔyɛ mberɛw nye hɔn a wonnyi obi a ɔbɔ hɔnho ban tse dɛ ngyanka na ekunafo. (Zech. 7:9, 10) Sɛ Jehovah hu dɛ wɔrehyɛ n’asomfo anokwafo do na wɔdze hɔn egu efiadze a ɔyɛ no yaw dɛ. Nya awerɛhyɛmu dɛ Jehovah dɔ hom a hom dze abotar nye no rigyina ɔhaw a ɔtse dɛm ano no nyina.

13. Ebɛn kwan do na nyimpa suban asɛɛ wɔ Nyankopɔn enyim, na ebɛnadze na ɔbɛyɛ wɔ ho?

¹³ Nyimpa suban a asɛɛ koraa. Satan n’enyi gye ho dɛ ɔbɛma nyimpa a wɔbɔɔ hɔn wɔ Nyankopɔn no su do no ayɛ ndzɛmba bɔn. Noah n’aber do no, ber a Nyankopɔn “hun dɛ nyimpa n’emumuyɛ ayɛ kɛse wɔ asaase do” no, Jehovah “nuu noho dɛ ɔyɛɛ nyimpa wɔ asaase, na ɔyɛɛ no yaw wɔ n’akoma mu.” (Gen. 6:5, 6, 11) Ofi dɛm aber no besi ndɛ, ana ndzɛmba asesa ayɛ papa? Dabida! Sɛ Abɔnsam hu mbrɛ ɔbrakyew ebu do wɔ ndɛ wiadze yi mu no a, n’enyi gye papaapa. Ɔbrakyew yi mu bi nye edwamambɔ, mbarimba a wɔnye hɔnho da, nye mbaa a wɔnye hɔnho da! (Eph. 4:18, 19) Sɛ Satan bɔ mbɔdzen ma Jehovah no nokwar asomfo no bi yɛ bɔn a, n’enyi gye papaapa. Jehovah nankasa ne ber a ɔsɛ mu no, ɔbɛsɛɛ hɔn a wɔbɔ ɔbrakyew na wɔmmpɛ dɛ wɔbɛsesa hɔn akwan no nyina dze akyerɛ dɛ okyir suban a ɔtse dɛm koraa.

14. Ebɛn kwan do na nyimpa dze Nyankopɔn n’abɔdze a ɔwɔ asaase do no ridzi dwuma?

¹⁴ N’abɔdze a wɔresɛɛ no. Nnyɛ dɛ “nyimpa dzi ne nyɛnko no do tum dze ma noara no mbusu” kɛkɛ o, mbom ɔresɛɛ abɔdze bi tse dɛ mbowa nye asaase a Jehovah dze ahyɛ ne nsa no. (Ɔsɛnk. 8:9; Gen. 1:28) Abɔdze ho enyimdzefo bɔ kɔkɔ dɛ osian ndzɛmba ahorow bi a nyimpa yɛ ntsi, mbowa na nduadzewa asorɔtow bɔbor ɔpepem kor ase botu koraa wɔ mfe kakraabi a ɔda hɛn enyim no mu. Ɔnnyɛ nwanwa dɛ nyimpa pii kã dɛ abɔdze wɔ ɔhaw kɛse mu! Enyigyesɛm nye dɛ, Jehovah abɔ anohoba dɛ ɔbɛsɛɛ “hɔn a wɔsɛɛ asaase no,” na ɔaama asaase no nyinara ayɛ Paradise.​—Nyi. 11:18; Isa. 35:1.

15-16. Ebɛnadze na ɔsɛ dɛ ɔka hɛn ma yenya ɔhaw a yerihyia no ho abotar tse dɛ Jehovah? Fa mfatoho kyerɛkyerɛ mu.

¹⁵ Ɔwodze dwendwen yaw ara a hɛn sor Egya no afa mu mfe mpempem pii no ho hwɛ. (Hwɛ adakaba a wɔato dzin “ Ndzɛmba A Jehovah Enya Ho Abotar.”) Jehovah botum asɛɛ dɛm wiadze bɔn yi aber biara a ɔpɛ. Naaso abotar a ɔada no edzi no aboa hɛn kɛsenara! Ɔwodze ma yɛnyɛ dɛm mfatoho yi nhwɛ. Fa no dɛ datser bi akã akyerɛ awarfo bi dɛ hɔn ba a wɔrobɔwo no no bedzi dzɛm, iyi bɛma asetsena ayɛ dzen ama abofra no, na ɔnnkɛtsena ase akyɛr. Naaso sɛ wɔwo abofra no a, hɔn enyi gye ɔmmfa ho dɛ ɔbɛyɛ dzen ama hɔn dɛ wɔbɔhwɛ no no. Osiandɛ wɔdɔ abofra no ntsi, wobegyina ɔhaw biara a wobehyia no ano mbrɛ ɔbɛyɛ a wɔbɛma abofra no enya asetsena pa.

¹⁶ Dɛm pɛpɛɛpɛr na Adam na Eve hɔn asefo a wɔwo hɔn no so tse. Naaso Jehovah dɔ hɔn na ɔdwen hɔnho. (1 John 4:19) Jehovah nntse dɛ awofo a yɛakã hɔnho asɛm wɔ mfatoho  yi mu no, ntsi obotum ayɛ tsebea no ho biribi. Wɔ nankasa ne ber a ɔahyɛ mu no, obeyi ɔhaw a adasamba rihyia nyina efi hɔ. (Matt. 24:36) Ɔsɛ dɛ Jehovah no dɔ yi ka hɛn ma yɛdze abotar nye no gyina ɔhaw a yerihyia no ano kesi dɛ obeyi efi hɔ.

17. Ebɛn kwan do na Jesus no ho asɛm a wɔakã wɔ Hebrewfo 12:2, 3 hyɛ hɛn nkuran ma yɛkɔ do gyina ɔhaw a yerihyia no ano?

¹⁷ Jehovah ayɛ abotar a wɔdze gyina ɔhaw ano ho nhwɛdo a odzi mũ. Jesus sũasuaa n’Egya n’abotar no pɛpɛɛpɛr. Aber a Jesus wɔ asaase do no, ogyinaa kasatsia nye enyiwu ano na ohun asɛndua ho amandze maa hɛn. (Kenkan Hebrewfo 12:2, 3.) Ekyingye biara nnyi ho dɛ, abotar a Jehovah da no edzi no na ɔhyɛɛ Jesus dzen ma ogyinaa ɔhaw a ohyiae no ano. Dɛmara na obotum ahyɛ hɛn so dzen.

18. Ebɛn kwan do na 2 Peter 3:9 boa hɛn ma yehu dza Jehovah n’abotar no dze aba?

¹⁸ Kenkan 2 Peter 3:9. Jehovah na onyim mber pa a ɔdze bɛsɛɛ wiadze bɔn yi. Osian Jehovah n’abotar ntsi nyimpakuw kɛse bi a hɔn dodow yɛ ɔpepem pii enya ho kwan rosom no na woriyi no ayɛw. Hɔn enyi agye dɛ Jehovah enya abotar atweɔn ma wɔawo hɔn, wɔabɔdɔ no, na woetum ehyira hɔnho do ama no. Sɛ Jehovah tua nyimpa ɔpepem pii a wɔdze abotar gyinaa ɔhaw ano kesii ase no kaw a, yebohu dɛ abotar a onyae wɔ ndzɛmba ho no, no do wɔ mfaso kɛse!

19. Ebɛnadze na ɔsɛ dɛ yesi hɛn bo dɛ yɛbɛyɛ? Yɛyɛ dɛm a ebɛn akatua na yebenya?

¹⁹ Jehovah akyerɛ hɛn mbrɛ yebesi dze enyigye egyina ɔhaw ano. Ɔmmfa ho awerɛhow nye yaw a Satan dze aba no, Jehovah da ho ara yɛ enyigye Nyankopɔn. (1 Tim. 1:11) Hɛn so yebotum akɔ do enya enyigye aber a yɛdze abotar rotweɔn dɛ Jehovah bɛtsew ne dzin ho, ɔbɛkyerɛ dɛ no tumdzi na ɔfata, na oeeyi emumuyɛ nye hɛn haw nyinara efi hɔ no. Ɔmbra dɛ abotar a hɛn sor Egya no enya dze rigyina ndzɛmba ano no bɛka hɛn ma hɛn so yeesi hɛn bo dɛ yɛbɛyɛ dɛmara. Sɛ yɛyɛ dɛm a, hɛn mu biara bohu dɛ dɛm asɛm yi yɛ nokwar: “Siarfo nye nyimpa a ɔsɔw nsɔhwɛ; na sɛ otum gyina enyim a, obenya nkwa ahenkyɛw a [Jehovah] dze abɔ hɔn a wɔdɔ no no anohoba no.”​—Jas. 1:12.