1. Hokwan a Jehovah dze ama hɛn dɛ yɛmbɔ no mpaa no, ɔsɛ dɛ yebu no dɛn?

 ƆSOR na asaase Bɔfo no ama hɛn akyɛdze soronko bi. Ɔno nye hokwan a yɛwɔ dɛ yɛbɔ no mpaa no. Ɔwodze dwen ho hwɛ o: Yebotum efi hɛn akoma mu abɔ Jehovah mpaa aber biara ɔmmfa ho kasa a yɛka. Jehovah nnhyɛɛ hɛn ber pɔtsee a yebotum abɔ no mpaa. Ɔmmfa ho beebi a yɛwɔ no, dɛ yɛda ayarsabea anaa yɛda efiadze no, yɛwɔ awerɛhyɛmu dɛ sɛ yɛbɔ mpaa a hɛn Egya a ɔwɔ ɔdɔ no betsie hɛn. Ɔnnsɛ dɛ yɛtoto hokwan a ɔtse dɛm no ase koraa.

2. Ebɛnadze na Ɔhen David yɛɛ dze kyerɛɛ dɛ n’enyi sɔ hokwan a nna ɔwɔ dɛ ɔbɔ Jehovah mpaa no?

² Nna Ɔhen David n’enyi sɔ hokwan a ɔwɔ dɛ ɔbɔ mpaa no paa. Ɔserɛɛ Jehovah dɛ: ‘Ma me mpaabɔ nyɛ dɛ eduhuam a wɔafora no yie wɔ w’enyim.’ (Ndw. 141:1, 2) David n’aber do no, nna eduhuam krɔnkrɔn a asɔfo no dze dzi dwuma wɔ Jehovah no som mu no, nna wɔtɔ bo ara fora no yie. (Ex. 30:34, 35) Eduhuam a David dze dzii dwuma wɔ ha no ma yehu dɛ nna ɔpɛ dɛ ɔdwen nsɛm a ɔrebɛka akyerɛ no sor Egya no ho yie. Dɛm pɛpɛɛpɛr na hɛn so yɛpɛ dɛ yɛyɛ. Yɛpɛ dɛ hɛn mpaabɔ sɔ Jehovah n’enyi.

3. Sɛ yɛrobɔ Jehovah mpaa a, ɔsɛ dɛ yɛyɛ hɛn adze dɛn, na ebɛnadze ntsi a?

³ Sɛ yɛrobɔ Jehovah mpaa a, ɔnnsɛ dɛ yɛnye no kasa tse dɛ mbrɛ ɔyɛ hɛn tsipɛn bi, mbom ɔsɛ dɛ yɛda obu kɛse edzi. Ma yɛnhwɛ enyido-adzehu ahorow a ɔyɛ nwanwa a Isaiah, Ezekiel, Daniel, na John nyae no. Nna ɔsor enyido-adzehu no mu biara dze, naaso nna nsɛdzi bi wɔ mu. Ne nyinara twee  adwen sii do dɛ Jehovah yɛ Ɔhen nyimnyamfo. Isaiah hun Jehovah dɛ “ɔtse ahengua bi a ɔkrɔn na wɔama do do.” (Isa. 6:1-3) Ezekiel hun dɛ Jehovah tse no sor tseaseanam do na ‘hyerɛn a ɔtse dɛ nyankontɔn’ etwa noho ehyia. (Ezek. 1:26-28) Daniel hun nyia “ne nda fir tsetse” no dɛ ɔhyɛ atar fitaa na ogya fi n’ahengua no ho. (Dan. 7:9, 10) John so hun Jehovah dɛ ɔtsena ahengua bi do na nyankontɔn fɛɛfɛw bi a ɔtse dɛ emerald bo etwa ahengua no ho ehyia. (Nyi. 4:2-4) Enyimnyam a Jehovah wɔ no, yerunntum mmfa nntoto obi fofor biara nedze ho. Iyi ntsi aber biara a yɛbɔbɔ mpaa no, ɔsɛ dɛ yɛma ɔtsena hɛn adwen mu dɛ ɔyɛ hokwan kɛse na Jehovah dze ama hɛn, ntsi ɔsɛ dɛ yɛda obu kɛse edzi wɔ hɛn mpaabɔ mu. Naaso ebɛnadze na ɔsɛ dɛ yɛbɔ ho mpaa?

4. Jesus ne mpaabɔ a ɔwɔ Matthew 6:9, 10 no, ebɛnadze na yebotum esua efi nsɛm a odzii kan kae no mu?

⁴ Kenkan Matthew 6:9, 10. Jesus kyerɛkyerɛɛ n’esuafo no mbrɛ wobesi abɔ mpaa ma wɔaasɔ Nyankopɔn n’enyi wɔ ne Bepɔw do Asɛnka no mu. Aber a Jesus kaa dɛ ‘hom mbɔ mpaa dɛ iyi’ wiei no, odzii kan bɔɔ ndzɛmba a no ho hia ho mpaa. Ɔbɔɔ mpaa dɛ Jehovah ne dzin ho ntsew, na n’Ahendzi no a ɔbɛsɛɛ n’atamfo nyina no mbra. Afei so ɔkaa nsiesie a Jehovah bɛyɛ wɔ asaase do nye nhyira a ɔdze bɛbrɛ adasamba a wɔyɛ setsie no ho asɛm. Sɛ yɛka nsɛm a ɔtse dɛm wɔ hɛn mpaabɔ mu a, yɛda no edzi dɛ Nyankopɔn n’apɛdze ho hia hɛn.

5. Ana ɔyɛ bɔn dɛ yɛbɔbɔ ndzɛmba a yehia no ho mpaa?

⁵ Nsɛm a odzi hɔ a Jesus kae no ma yehu dɛ ɔnnyɛ bɔn dɛ yɛbɔbɔ ndzɛmba a yehia no ho mpaa. Yebotum aserɛ Jehovah dɛ ɔmma hɛn edziban a yebehia wɔ da no mu, ɔmfa hɛn bɔn nkyɛ hɛn, ɔmbɔ hɛnho ban amma yaannkɔ nsɔhwɛ mu na ɔngye hɛn mfi Satan Abɔnsam ne nsamu. (Matt. 6:11-13) Sɛ yɛbɔ iyinom ho mpaa a, nna yɛrekyerɛ Jehovah dɛ yɛgye to mu dɛ yehia no mboa na yɛpɛ dɛ yɛsɔ n’enyi.

6. Sɛ yɛrobɔ mpaa a, aso ɔsɛ dɛ yɛka nsɛm a Jesus kae wɔ ne mpaabɔ ho nhwɛdo no mu no pɛpɛɛpɛr a? Kyerɛkyerɛ mu.

⁶ Nna Jesus nnhwɛ kwan dɛ sɛ n’ekyirdzifo  robɔ mpaa a wɔbɛka nsɛm a ɔkae wɔ mpaabɔ ho nhwɛdo no mu no pɛpɛɛpɛr. Osiandɛ noara mpo, wɔ mber afofor a ɔbɔɔ mpaa mu no, dza nna ohia no dɛm aber no na ɔkaa ho asɛm. (Matt. 26:39, 42; John 17:1-26) Dɛmara na hɛn so yebotum aka dza ohia hɛn ho asɛm wɔ hɛn mpaabɔ mu. Yebotum abɔ Jehovah mpaa aserɛ no hɔ nyansa nye ntseasee aber a ɔsɛ dɛ yesi gyinae bi no. (Ndw. 119:33, 34) Afei so, sɛ yɛrebɛyɛ dwumadzi a ɔyɛ dzen ma hɛn a, yebotum aserɛ Jehovah dɛ ɔmma hɛn nyimdzee nye nyansa a yɛdze bɛyɛ. (Mbɛ. 2:6) Awofo botum abɔ mpaa ama hɔn mba, dɛmara na mbofra so botum abɔ mpaa ama hɔn awofo. Afei so, hɛn mu biara botum abɔ mpaa ama hɔn a yɛnye hɔn sua Bible nye hɔn a yɛka asɛmpa no kyerɛ hɔn no, na ɔsɛ dɛ yɛyɛ dɛm so. Naaso, sɛ yɛrobɔ mpaa a, ɔnnyɛ dza yehia nkotsee na ɔsɛ dɛ yɛka ho asɛm.

7. Ebɛnadze ntsi na sɛ yɛrobɔ mpaa a ɔsɛ dɛ yeyi Jehovah ayɛw?

⁷ Sɛ yɛrobɔ mpaa a, ɔsɛ dɛ yɛkaa na yeyi Jehovah ayɛw. Nyankopɔn na ɔfata paa dɛ yeyi no ayɛw. ‘Jehovah ye na ɔdze bɔn kyɛ.’ Afei so, ‘ayamuhyehye na adom ahyɛ no ma, ɔfa ebufuw nyaa na no mbɔbɔrhu na no nokwar dɔɔ so.’ (Ndw. 86:5, 15) Sɛ yɛhwɛ mbrɛ Jehovah tse nye ndzɛmba a ɔyɛ no a, ɔma yenya biribi papabi a yebotum egyina do eyi no ayɛw.

8. Sɛ yɛrobɔ mpaa a, ebɛn ndzɛmba na yebotum ada Jehovah ase wɔ ho? (Ndwom 104:12-15, 24)

⁸ Sɛ yɛdze Jehovah a yebeyi no ayɛw wɔ hɛn mpaabɔ mu no to nkyɛn a, ɔsɛ dɛ ndzɛmba pa pii a ɔdze ma hɛn no so ka hɛn ma yɛda no ase. Ndzɛmba a yebotum ada no ase wɔ ho no bi nye, nhyiren ahorow a no kɔla yɛ fɛw, edziban asorɔtow a ɔyɛ dɛw, nye anyɛnkofo apapa a wɔma hɛn enyi gye no. Hɛn sor Egya no dɔ hɛn na ɔpɛ dɛ hɛn enyi gye, ntsi na ɔdze dɛm ndzɛmba yi nye pii a ɔkeka ho no ama hɛn no. (Kenkan Ndwom 104:12-15, 24.) Dza ɔkyɛn nyina no, yɛda Jehovah ase dɛ ɔama hɛn ndzɛmba pa pii a ɔboa hɛn ma yɛnye no nya ebusuabɔ a no mu yɛ dzen, nye daakye ho enyidado soronko a yɛwɔ no.

9. Ebɛnadze na ɔbɔboa hɛn ma yaakaa dɛ ɔsɛ dɛ yɛda Jehovah ase? (1 Thessalonicafo 5:17, 18)

 ⁹ Ɔnnyɛ dzen koraa dɛ hɛn werɛ befir dɛ yɛbɛda Jehovah ase wɔ ndzɛmba pa a ɔyɛ ma hɛn no ho. Ebɛnadze na ɔbɔboa wo ma aakaa dɛ ebɛda Jehovah ase? Ibotum akyerɛw ndzɛmba a ebisa efi Jehovah hɔ no ato hɔ na ofi ber to ber no ahwɛ mbrɛ Jehovah esi ebua. Sɛ ihu dɛ Jehovah ebua wo mpaabɔ bi a, da no ase wɔ ho. (Kenkan 1 Thessalonicafo 5:17, 18.) Ɔwodze dwen ho hwɛ: Sɛ yɛyɛ adze ma afofor na wɔkyerɛ ho enyisɔ a, ɔma hɛn enyi gye paa. Dɛmara na hɛn so sɛ Jehovah bua hɛn mpaabɔ na yɛda no ase a, ɔma n’enyi gye. (Col. 3:15) Adze fofor bi so wɔ hɔ a ɔsɛ dɛ yɛda Jehovah ase wɔ ho. Dɛm adze no so ho hia paa. Ɔyɛ ebɛnadze?

10. Dɛ mbrɛ 1 Peter 2:21 kyerɛ no, ebɛnadze ntsi na ɔsɛ dɛ yɛda Jehovah ase dɛ ɔsomaa Jesus baa asaase do?

¹⁰ Kenkan 1 Peter 2:21. Ɔsɛ dɛ yɛda Jehovah ase dɛ ɔsomaa ne Ba no dɛ ɔmbɛkyerɛkyerɛ hɛn. Sɛ yesua Jesus noho adze a, ɔboa hɛn ma yehu nsɛm pii fa Jehovah ho, nye ndzɛmba a yɛyɛ a ɔbɛma n’enyi agye. Sɛ yɛkyerɛ Christ n’afɔrbɔ no mu gyedzi a, ɔbɛma yɛnye Jehovah Nyankopɔn enya ebusuabɔ a no mu yɛ dzen na asomdwee so bɛtsena yɛnye no ntamu.​—Rom. 5:1.

11. Ebɛnadze ntsi na sɛ yɛrobɔ Jehovah mpaa a yɛdze fa Jesus do?

¹¹ Yɛda Jehovah ase dɛ ɔdze ne Ba no ama hɛn dɛ yɛmfa no do mbɔ no mpaa. Jehovah nam Jesus do dze hɛn ebisadze ma hɛn. Sɛ Jehovah betsie hɛn mpaabɔ na oeebua a, ɔsɛ dɛ yɛdze fa Jesus ne dzin mu. Jesus kaa dɛ: “Biribiara a hom bɛserɛ wɔ me dzin mu no, ɔno na mebɛyɛ, ama Egya no eenya enyimnyam wɔ Ba no mu.”​—John 14:13, 14.

12. Ebɛnadze bio ntsi na ɔsɛ dɛ yɛda Jehovah ase dɛ ɔdze ne Ba no ama hɛn?

¹² Jehovah dze hɛn bɔn kyɛ hɛn osian Jesus no werdam afɔrbɔ no ntsi. Bible no ka Jesus ho asɛm dɛ ɔyɛ hɛn ‘sɔfopanyin na ɔtsena Enyimnyam Hen no n’ahengua no enyimfa wɔ sorsor.’ (Heb. 8:1) Jesus yɛ hɛn ‘boafo a ɔwɔ Egya no nkyɛn.’ (1 John 2:1) Yɛda Jehovah ase paa dɛ ɔama hɛn Sɔfopanyin mbɔbɔrhufo a ɔtse hɛn mberɛwyɛ ase na “odzi ma hɛn”! (Rom. 8:34; Heb. 4:15) Bɔn wɔ hɛnho, ntsi sɛ nnyɛ Jesus n’afɔrbɔ no a, nkyɛ yerunntum nnkɔ Jehovah n’enyim wɔ mpaabɔ mu da. Yebotum aka paa dɛ Jehovah no Dɔba no a ɔdze no maa hɛn no yɛ akyɛdze a ɔsom bo, na yerunntum nnda no ase nnwie da! Anaa ɔnntse dɛm?

13. Anafua a adze rebɛkye ma Jesus ewu no, ebɛnadze na ɔyɛe dze kyerɛɛ dɛ ɔdɔ n’esuafo no?

¹³ Anafua a adze rebɛkye ma Jesus ewu no, ɔbɔɔ mpaa tsentsenntsen bi. Nna dza ɔreka ara nye dɛ n’Egya nhwɛ n’esuafo no do osian Abɔnsam ntsi. (John 17:15) Iyi ma yehu dɛ nna Jesus dɔ hɔn papaapa! Nna onyim dɛ ɔrennkyɛr na oehyia nsɔhwɛ a no mu dzen paa. Naaso, ɔdze ne haw no too nkyɛn, na ɔmaa n’asomafo no hɔn eyiedzi ho hiaa no.

14. Ebɛnadze na yebotum ayɛ dze akyerɛ dɛ yɛdɔ hɛn nuanom?

¹⁴ Yesuasua Jesus na yɛmmfa hɛn adwen nnsi dza hɛn nkotsee yehia do. Mbom yɛkaa hɛn nuanom wɔ mpaabɔ mu aber nyina. Sɛ yɛyɛ dɛm a nna yɛreda no edzi dɛ yeridzi Jesus n’ahyɛdze a ɔnye dɛ yɛndodɔ hɛnho no do. Afei so nna yɛrema Jehovah ehu dɛ yɛdɔ hɛn nuanom papaapa. (John 13:34) Sɛ yɛbɔ mpaa ma hɛn nuanom a ɔnnyɛ ber sɛɛ koraa, mbom ɔboa hɔn paa. Bible no ma yehu dɛ  ‘nyimpa tsenenee no nkotoserɛ wɔ tum kɛse.’​—Jas. 5:16.

15. Ebɛnadze ntsi na ɔsɛ dɛ yɛbɔ mpaa ma hɛn nuanom?

¹⁵ Ɔsɛ dɛ yɛbɔ mpaa ma hɛn nuanom osiandɛ wohyia nsɛndzendzen pii. Yebotum aserɛ Jehovah dɛ ɔmboa hɔn ma wongyina yarba, atoyerɛnkyɛm, akodzi, ɔsoɛrtsia nye nsɛndzendzen afofor a wohyia no ano. Enuanom a wotu hɔnho ma dze mboa ma hɔn a hɔnho akyer hɔn no so, yebotum abɔ mpaa ama hɔn. Bi mpo a na inyim enuanom binom a worihyia nsɛndzendzen a yɛaka ho asɛm yi bi. Ibotum abɔ enuanom a wɔtse dɛm no edzin wɔ wo mpaabɔ mu. Sɛ yɛbɔ mpaa serɛ Jehovah dɛ ɔmboa hɛn nuanom ma wongyina dza worihyia no ano a, nna yɛreda no edzi dɛ yɛdɔ hɔn paa.

16. Ebɛnadze ntsi na ɔsɛ dɛ yɛbɔ mpaa ma enuanom a wodzi ndzɛmba enyim no?

¹⁶ Sɛ yɛbɔ mpaa ma hɔn a wodzi ndzɛmba enyim wɔ asafo no mu no a, hɔn enyi sɔ na mpaa a ɔtse dɛm no so boa hɔn. Nna ɔsomafo Paul gye to mu dɛ ohia afofor hɔn mpaabɔ. Ɔkaa dɛ: ‘Wɔmbɔ mpaa mma mo so, dɛ sɛ mubue m’ano a, Nyankopɔn mma muntum memfa ndam nka asɛmpa no, nda no mu esumasɛm no edzi.’ (Eph. 6:19, Baebor) Ndɛ so enuanom mbarimba a wodzi ndzɛmba enyim no yɛ edwumadzen paa. Yɛbɔ mpaa dɛ Jehovah nhyira edwumadzen a wɔyɛ no do. Yɛyɛ dɛm dze kyerɛ dɛ yɛdɔ hɔn.

17-18. Ebɛn aber na bi a wɔbɛka akyerɛ hɛn dɛ yengyina afofor ananmu mbɔ mpaa, na ebɛnadze na ɔsɛ dɛ yɛma ɔtsena hɛn adwen mu?

¹⁷ Ɔtɔ da a yetum gyina afofor ananmu bɔ mpaa. Dɛ nhwɛdo no, akyerɛbaa bi botum aka akyerɛ akyerɛbaa fofor a orikegya no ma ɔaakɛyɛ ne Bible adzesua no dɛ ɔyɛ a ɔmbɔ mpaa. Bi a nna akyerɛbaa a ɔaka akyerɛ no dɛ ɔmbɔ mpaa no nnyim osuanyi no yie, ntsi ɔbɛpɛ dɛ ɔbɔ mpaa no aber a woewie adzesua no. Dɛm no, akyerɛbaa no benya mber ehu osuanyi no n’ehiadze na ɔaka ho asɛm wɔ ne mpaabɔ no mu.

¹⁸ Bi a wɔbɛka akyerɛ onua bi dɛ ɔmbɔ mpaa wɔ asafo nhyiamu anaa asɛnka nhyiamu ase. Enuanom a wonya hokwan a ɔtse  dɛm no, ɔsɛ dɛ wɔma siantsir a woehyia mu no tsena hɔn adwen mu. Ɔnnsɛ dɛ wɔma hɔn mpaabɔ no yɛ tse dɛ worutu enuanom fo anaa wɔrema nkaabɔ. Hɛn asafo nhyiamu ahorow ase no, ndwontow na mpaabɔ no nyina yɛ minitsi enum pɛr. Ntsi sɛ wɔfrɛ onua bi dɛ ɔmbɔ mpaa a, ɔnnsɛ dɛ ‘ɔkasa dodow’ anaa ɔma ne nsɛm yɛ pii, nkanka aber a ɔrobɔ mpaa ma wɔdze aahyɛ nhyiamu no ase no.​—Matt. 6:7.

19. Ebɛnadze na ɔbɔboa hɛn ma yeesiesie hɛnho ama Jehovah ne da kɛse no?

¹⁹ Aber a Jehovah ne da kɛse no rebɛn no, ɔsɛ dɛ yɛma mpaabɔ yɛ adze tsitsir wɔ hɛn asetsena mu. Jesus kaa iyi ho asɛm dɛ: “Hom nweɔn daa, na hom ndzi nkotoserɛ, ma hom eenya tum dɛ hom dze befi ndzɛmba yi a ɔbɛba yi nyina nsa.” (Luke 21:36) Nokwasɛm nye dɛ, sɛ yɛbɔ mpaa aber nyina a, ɔbɔboa hɛn ma yaakɔ do aweɔn amma Jehovah ne da no aammbɔto hɛn awerɛfir mu.

20. Ebɛnadze na yɛyɛ a ɔbɛma hɛn mpaabɔ ayɛ dɛ eduhuam a oyi nka huanhuam?

²⁰ Dze besi ha yi, ebɛnadze na yeesusu ho? Hokwan a Jehovah dze ama hɛn dɛ yɛmbɔ no mpaa no, hɛn enyi sɔ paa. Sɛ yɛrobɔ mpaa a ɔsɛ dɛ yɛdze hɛn adwen si Jehovah n’apɛdze do. Ɔsɛ dɛ yɛda Jehovah ase wɔ ne Ba no nye n’Ahendzi no ho. Afei so, ɔsɛ dɛ yɛbɔ mpaa ma hɛn nuanom. Yebotum so abɔ ndzɛmba a ohia hɛn nye dza ɔbɛma hɛn gyedzi ayɛ dzen ho mpaa. Sɛ yɛgye mber dwendwen nsɛm a yɛbɛka wɔ hɛn mpaabɔ mu no ho a, nna yɛrekyerɛ dɛ hokwan a yɛwɔ dɛ yɛbɔ Jehovah mpaa no som bo ma hɛn paa. Sɛ ɔba no dɛm a, hɛn nsɛm bɛyɛ dɛ eduhuam a oyi nka huanhuam wɔ Jehovah n’enyim na n’enyi bɛgye ho.​—Mbɛ. 15:8.