1. Ndɛ, Jehovah ne pɛ nye dɛn?

 NDƐ Nyankopɔn ne pɛ nye dɛ wɔbɛka Ahendzi no ho asɛmpa no wɔ wiadze nyina. (Mark 13:10; 1 Tim. 2:3, 4) Asɛmpaka edwuma no yɛ Jehovah dze, ntsi oye paa dɛ ɔdze ahyɛ no Dɔba no nsa dɛ ɔnhwɛ edwuma yi do. Ɔsɛ dɛ yenya awerɛhyɛmu dɛ Jesus yɛ kwankyerɛfo a onyim edwuma, dɛm ntsi ɔbɔhwɛ ma yeewie edwuma no dɛ mbrɛ Jehovah hwɛ kwan no ansaana ewiei no aba.​—Matt. 24:14.

2. Ebɛnadze na yebosusu ho wɔ adzesua yi mu?

² Adzesua yi mu no, yɛbɔhwɛ mbrɛ Jesus nam “akowaa nokwafo nye nyansafo” no do ma yenya Bible mu akwankyerɛ. Bio so, yebohu kwan a akowaa yi afa do ahyehyɛ Jesus n’ekyirdzifo ma wɔreka asɛmpa no ndɛ kyɛn ber biara a abɛsen kɔ. (Matt. 24:45) Afei so, yɛbɔhwɛ dza hɛn mu biara botum ayɛ dze aboa Jesus nye akowaa nokwafo no.

3. Ebɛn tum no wɔdze ama Jesus?

³ Jesus na ɔhwɛ ma asɛnka edwuma no kɔ do. Yesi dɛn hu dɛ asɛm yi yɛ nokwar? Aka kakra ma ɔakɔ sor no, ɔnye n’ekyirdzifo anokwafo bi hyiae wɔ bepɔw bi do wɔ Galilee. Ɔkaa kyerɛɛ hɔn dɛ: “Wɔdze sor nye asaase do tum nyina ama me.” Hyɛ asɛm a ɔkae dze toaa do no nsew. Ɔkaa dɛ: “Dɛm ntsi hom nkɔ nkɛyɛ amanaman nyina m’esuafo.” (Matt. 28:18, 19) Ntsi ndwuma ahorow a wɔama Jesus tum dɛ ɔnyɛ no, no mu kor nye dɛ ɔbɛkyerɛ asɛnka edwuma no kwan.

4. Ebɛnadze ntsi na ɔsɛ dɛ yenya awerɛhyɛmu dɛ Jesus da ho ara rekyerɛ asɛnka edwuma a yɛreyɛ no kwan?

 ⁴ Jesus kaa dɛ wɔbɛyɛ asɛnka nye esuafoyɛ edwuma no wɔ “amanaman nyina” na ɔbɛka n’ekyirdzifo ho ‘daa dze ekesi wiadze ewiei.’ (Matt. 28:20) Asɛm a Jesus kae no daa no edzi kofee dɛ nna ɔbɔhwɛ ma wɔaayɛ asɛnka edwuma no fi dɛm aber no dze ebesi hɛn aber yi do.

5. Ebɛn kwan do na yɛroboa ma asɛm a ɔwɔ Ndwom 110:3 no aaba mu?

⁵ Nna ɔnnhaw Jesus dɛ annhwɛ a nna oennya nyimpa pii ma wɔaannyɛ asɛnka edwuma no wɔ ewiei mber no mu. Nna onyim paa dɛ nkɔm a ɔdwontofo no hyɛɛ dɛ, “wo man dze hɔnho bɛma ɔpɛdo wɔ wo tumdzi da mu” no bɛba mu. (Ndw. 110:3) Sɛ ereyɛ asɛnka no bi a, ɔkyerɛ dɛ eroboa Jesus nye akowaa nokwafo no, na eroboa ma nkɔnhyɛ yi aaba mu. Ɔwɔ mu dɛ asɛnka edwuma no rinya nkɔenyim dze, naaso yehyia ɔhaw ahorow bi wɔ edwuma yi mu.

6. Ndɛ, ɔhaw kor a yehyia wɔ asɛnka edwuma no mu nye dɛn?

⁶ Ɔhaw kor a yehyia wɔ asɛnka edwuma no mu nye ɔsoɛrtsia. Awaafo, nyamesom akandzifo nye amanyɛfo keka atorsɛm fa asɛnka edwuma no ho na iyi ama nyimpa pii enya adwen a ɔnntsen wɔ hɛnho. Sɛ hɛn ebusuafo, hɛn anyɛnkofo nye hɛn edwumamufo tse atorsɛm a ɔtsetse dɛm a, wobotum ahyɛ hɛn dɛ yengyaa asɛnka edwuma no na mma yɛnnsom Jehovah bio. Aman ahorow bi do no, wohunahuna hɛn nuanom, wɔtow hyɛ hɔn do, anaa wɔkyer hɔn, na ɔtɔ da mpo a wɔdze hɔn kogu efiadze. Iyinom nyina yɛ ndzɛmba a wɔyɛ dze soɛr tsia hɛn. Naaso, dza wɔyɛ no nnyɛ hɛn nwanwa koraa. Osiandɛ Jesus kaa dɛ: “Amanaman nyina bɛtan hom wɔ me dzin ntsi.” (Matt. 24:9) Ɔtan a wɔtan hɛn no mpo yɛ dase a ɔkyerɛ dɛ Jehovah gye hɛn to mu. (Matt. 5:11, 12) Abɔnsam na ɔhyɛ ɔsoɛrtsia a ɔtse dɛm ekyir. Naaso, Jesus wɔ tum kyɛn no koraa! Jesus roboa hɛn ma yaaka asɛmpa no akyerɛ nyimpa a wofi aman nyina mu. Hom mma yɛnhwɛ siantsir a yɛreka dɛm.

7. Ebɛn dase na ɔwɔ hɔ a ɔma yehu dɛ Nyikyerɛ 14:6, 7 no rinya ne mbamu?

⁷ Ɔhaw fofor a yehyia nye dɛ nyimpa a yehyia hɔn wɔ asɛnka mu no, hɔn mu piinara na ɔsor kasa a wɔka. Ɔwɔ mu dɛ yehyia nyimpa a ɔsor kasa a wɔka dze, naaso Jesus kae wɔ nyikyerɛ a ɔdze maa John no mu dɛ iyi runntum nnsiw asɛnka edwuma a yɛreyɛ no kwan. (Kenkan Nyikyerɛ 14:6, 7.) Ebɛn kwan do? Yɛbɔ mbɔdzen dɛ yɛbɛma nyimpa piinara enya hokwan atse Ahendzi asɛm no na woeetu ho anamɔn. Ndɛ, nyimpa a wɔwɔ wiadze yi mu beebiara botum enya Bible ho nwoma akenkan wɔ jw.org do wɔ kasa bɔbor 1,000 mu! Akwankyerɛ Kuw no peen do dɛ wɔnkyerɛ Ibotum Enya Enyigye Daa! buukuu no ase nkɔ kasa bɔbor 700 mu! Seseiara, iyi nye nwoma tsitsir a yɛdze yɛ esuafoyɛ edwuma no. Wɔayɛ Bible mu nsɛm ahorow bi video ama hɔn a wɔka mmum kasa. Wɔayɛ nwoma ahorow yi bi so braille ama enyifurafo. Yehu dɛ Bible nkɔnhyɛ ahorow rinya ne mbamu. Nyimpa a “wofi amanaman kasaa nyina mu” rusua dɛ wɔbɛka kasa krɔnn a ɔno nye Bible mu nokwar no. (Zech. 8:23; Zeph. 3:9) Jesus Christ yɛ kwankyerɛfo a onyim edwuma na ɔno na ɔboa hɛn ma yetum yɛ iyinom nyina no.

8. Ebɛnadze na woefi asɛnka edwuma a yɛreyɛ no mu aba?

⁸ Ndɛ, nyimpa bɔbor 8,000,000 na wɔdze hɔnho abɔ Jehovah n’ahyehyɛdze no, na wɔwɔ nsaase 240 do. Afe biara so nyimpa mpempem pii na wonuma hɔn dɛ Jehovah Adasefo! Nnyɛ hɔn dodow a ɔrokɔ enyim no  nye asɛm no, mbom dza ohia paa nye suban pa a dɛm esuafo afofor yi da no edzi no, kyerɛ dɛ, wɔahyɛ ‘suban fofor’ no. (Col. 3:8-10) Nna hɔn mu pii wɔ hɔ a, wɔbɔ ɔbrakyew, wɔyɛ basabasa, wɔyɛ nyimpa mu nyiyimu na ɔman ho dɔ agye hɔn tsir tam. Naaso, woegyaa iyinom nyina abɛyɛ Christ n’esuafo. Nkɔnhyɛ a ɔwɔ Isaiah 2:4 no aba mu wɔ hɔn afamu; ‘wonnsua akodzi bio.’ Yɛrobɔ mbɔdzen dɛ yɛbɛhyɛ suban fofor no. Sɛ nkorɔfo hu suban a ɔtse dɛm a ɔboa hɔn ma wɔtwe bɛn Nyankopɔn n’ahyehyɛdze no. Afei so yɛda no edzi dɛ yedzi hɛn kwankyerɛfo Christ Jesus n’ekyir. (John 13:35; 1 Pet. 2:12) Dɛm ndzɛmba a yɛaka ho asɛm yi nyina mmba kwa. Jesus na ɔroboa hɛn.

9. Dɛ mbrɛ Matthew 24:45-47 ma yehu no, ebɛnadze na Jesus kaa dɛ ɔbɛyɛ wɔ ewiei mber no mu?

⁹ Kenkan Matthew 24:45-47. Jesus kae too hɔ dɛ wɔ nda a odzi ekyir no mu no, obeyi “akowaa nokwafo nye nyansafo” bi dɛ ɔmfa Nyankopɔn n’Asɛm nkyerɛkyerɛ n’esuafo. Ntsi yɛhwɛ kwan dɛ akowaa yi bɛyɛ edwumadzen wɔ hɛn aber yi do. Na dɛm pɛpɛɛpɛr na yehu dɛ akowaa yi reyɛ. Jesus nam dɛm mbarimba kakraabi yi do ma Nyankopɔn no nkorɔfo nye hɔn a yɛnye hɔn sua adze no sunsum afamu “edziban wɔ ber a ɔsɛ mu.” Mbarimba yi nnyɛ etumfo wɔ hɔn nuanom hɔn gyedzi do. (2 Cor. 1:24) Mbom wɔgye to mu dɛ Jesus Christ na ɔyɛ “kwankyerɛfo na ɔsafohen” ma no nkorɔfo.​—Isa. 55:4.

10. Nwoma ahorow a wɔada no edzi wɔ mfonyin no mu no, no mu hendze na ɔboaa wo ibohun nkwa kwan no?

¹⁰ Ofi afe 1919 reba no, akowaa nokwafo no etsintsim nwoma pii. Dɛm nwoma ahorow yi aboa nyimpa akomapafo ma woesua Bible no. Akowaa no yii The Harp of God nwoma no edzi wɔ afe 1921 dɛ ɔmboa akomapafo ma wonsua Bible mu mfitsiase nkyerɛkyerɛ.  Mber kɔr do no, woyii nwoma afofor so edzi. Aso ekaa nwoma a isuae a ɔboaa wo ma ibohun hɛn sor Egya no na inyaa ɔdɔ maa no? Ana ɔyɛ “Let God Be True,” The Truth That Leads to Eternal Life, You Can Live Forever in Paradise on Earth, Nimdeɛ a Ɛde Kɔ Daa Nkwa Mu, Dɛn na Bible Kyerɛkyerɛ Ankasa?, Ebɛnadze na Bible no Kyerɛkyerɛ Hɛn?, anaa hɛn nwoma fofor Ibotum Enya Enyigye Daa! no a? Wɔyɛɛ dɛm nwoma ahorow yi dɛ ɔmboa hɛn ma yɛnyɛ nkorɔfo esuafo. Nwoma yi mu biara a wobeyi no edzi no, odzi dwuma tsitsir bi wɔ dɛm aber no mu.

11. Ebɛnadze ntsi na ohia paa dɛ hɛn nyina sua Jehovah ho adze na yenya Bible mu nyimdzee a odzi mu?

¹¹ Nnyɛ hɔn a yɛnye hɔn sua adze no nkotsee na ɔsɛ dɛ wosua Jehovah ho adze na wonya Bible mu nyimdzee a odzi mu. Ɔsɛ dɛ hɛn nyina yɛ dɛmara. Ɔsomafo Paul kaa dɛ: “Edziban dzen sɛ hɔn a woenyin.” Paul dze kaa ho dɛ, sɛ yɛdze dza yesua fi Bible mu no yɛ edwuma a, ɔbɔboa hɛn ma yeetum ‘ehu papa na bɔn.’ (Heb. 5:14) Ndɛ, osiandɛ nyimpa piinara na hɔn suban asɛɛ koraa ntsi obotum ayɛ dzen paa ama hɛn dɛ yebedzi Jehovah n’ahyɛdze do. Naaso, Jesus hwɛ hu dɛ hɛn nsa bɛka ndzɛmba a ɔbɔboa hɛn ma hɛn gyedzi aakɔ do ayɛ kɛse. Hɛn nsa ka dɛm ndzɛmba yi fi Nyankopɔn n’Asɛm Bible no mu. Jesus na ɔkyerɛ akowaa nokwafo no kwan ma osiesie edziban a ɔtse dɛm ma hɛn aber nyina.

12. Ebɛn kwan do na yɛahyɛ Nyankopɔn ne dzin no enyimnyam dɛ mbrɛ Jesus yɛe no?

¹² Yɛdze enyimnyam a ɔfata Jehovah ne dzin no ma no dɛ mbrɛ Jesus yɛe no. (John 17:6, 26) Dɛ nhwɛdo no, wɔ afe 1931 mu no yɛfaa dzin Jehovah Adasefo a ogyina Bible do no too hɛnho do. Yɛyɛɛ dɛm dze kyerɛɛ dɛ hɛn sor Egya no ne dzin no ho hia hɛn, na yɛpɛ dɛ wɔdze frɛ hɛn. (Isa. 43:10-12) Ofitsi October 1931 reba no, Ɔweɔn-Aban biara a  ɔbɛba no, ibohu Nyankopɔn ne dzin no wɔ enyim. Ɔno da nkyɛn a, yɛdze Nyankopɔn ne dzin no ahyehyɛ beebiara a ɔsɛ dɛ ɔhyɛ wɔ New World Translation of the Holy Scriptures no mu. Iyi ma yɛda nsew koraa fi asɔr ahorow a wɔse wɔyɛ Christianfo naaso woeyiyi Jehovah ne dzin efi hɔn Bible nkyerɛase ahorow pii mu no ho!

13. Ebɛnadze na ɔma egye dzi dɛ Jesus dze “akowaa nokwafo nye nyansafo” no ridzi dwuma? (John 6:68)

¹³ Jesus nam “akowaa nokwafo nye nyansafo” no do dze ahyehyɛdze soronko bi esi hɔ wɔ asaase yi do a ɔbɔboa n’ekyirdzifo ma wɔasom Nyankopɔn wɔ nokwar mu. Etse nka dɛn wɔ dɛm ahyehyɛdze yi ho? Dza ɔbɔboa wo ma eebua asɛm yi no, bi a ɔsɛ dɛ edwendwen asɛm a ɔsomafo Peter kaa kyerɛɛ Jesus yi ho. Ɔkaa dɛ: “Woana hɔ na yɛbɔkɔ? Ɔwo na ewɔ onnyiewiei nkwa ho asɛm.” (John 6:68) Yebotum ebisa hɛnho dɛ, sɛ yeennhu Jehovah n’ahyehyɛdze yi a nkyɛ sesei yɛwɔ hen? Jesus nam ahyehyɛdze yi do hwɛ hu dɛ hɛn nsa bɛka biribiara a ɔbɔboa hɛn ma yaakɔ do edzi Jehovah nokwar. Bio so, ɔtsetse hɛn mbrɛ ɔbɛyɛ a yebotum ayɛ asɛnka edwuma no yie. Afei so, ɔboa hɛn mbrɛ ɔbɛyɛ a yebotum ahyɛ ‘suban fofor’ no ama Jehovah aagye hɛn ato mu.​—Eph. 4:24.

14. Ebɛn mboa na enya efi Jehovah n’ahyehyɛdze no hɔ wɔ COVID-19 mber yi mu?

¹⁴ Jesus ma hɛn akwankyerɛ wɔ mber a no mu yɛ dzen mu. COVID-19 aber yi mu no, yeehu dɛ mfaso wɔ akwankyerɛ ahorow a ɔtse dɛm do. Aber a nna nyimpa a wɔwɔ wiadze no mu dze hɔn tsir repempem no, Jesus hwɛe ma hɛn nsa kaa akwankyerɛ a no mu da hɔ a ɔbɔbɔ hɛnho ban. Wotuu hɛn fo dɛ sɛ yerupue akɔ dɔm mu a, yɛnhyɛ nose mask na yɛntsetsew hɛn ntamu. Wɔhyɛɛ asafo mu  mpanyimfo so nkuran dɛ wɔnye enuanom a wɔwɔ asafo no mu nyina ndzi nkitaho dabaa, na wɔnhwɛ honam afamu mboa a wobotum dze ama hɔn. Nnyɛ ɔno nko, nna ɔsɛ dɛ wɔboa enuanom no ma wɔnye Jehovah ntamu ebusuabɔ no mu kɔ do ara yɛ dzen. (Isa. 32:1, 2) Ɔno da nkyɛn a, hɛn nsa kaa akwankyerɛ nye nsɛm a ɔhyɛ gyedzi dzen fii Akwankyerɛ Kuw no amandzɛɛbɔ ahorow no mu.

15. Aber a yarba bɔn no tserɛwee no, ebɛn akwankyerɛ na wɔdze maa hɛn wɔ mbrɛ yebesi ayɛ asafo nhyiamu nye asɛnka edwuma no ho, na ebɛnadze na woefi mu aba?

¹⁵ Dɛm aber no mu ara so hɛn nsa kaa akwankyerɛ a no mu da hɔ a ɔfa mbrɛ yebesi ayɛ asafo nhyiamu nye asɛnka edwuma no ho. Ntsɛmara na wɔyɛɛ nhyehyɛɛ maa hɛn dɛ yɛmfa video do nyɛ asafo nhyiamu, nye ɔmansin na ɔmantɔw ehyiadzi. Nkyii so hɛn asɛnka edwuma no ne fa kɛsenara begyinaa tɛlefon na krataakyerɛw do. Jehovah hyiraa hɛn mbɔdzembɔ yi do. Bethel pii abɔ amandzɛɛ dɛ hɔn adawurbɔfo no dodow no akɔ enyim paa. Nokwasɛm nye dɛ, enuanom pii enya suahu ahorow a ɔhyɛ nkuran wɔ dɛm aber yi mu.​—Hwɛ adakaba a wɔato dzin “ Jehovah Rihyira Hɛn Asɛnka Edwuma No Do.”

16. Ebɛn awerɛhyɛmu na ɔsɛ dɛ yenya?

¹⁶ Bi a binom tsee nka dɛ ahyehyɛdze no yɛ dodow, na wɔama yarba no ayɛ huhuuhu. Naaso mber kɔr do no, ɔdaa edzi dɛ akwankyerɛ a wɔdze maa hɛn no, nna nyansa wɔ mu paa. (Matt. 11:19) Sɛ yɛdwendwen mbrɛ Jesus fi ɔdɔ mu rekyerɛ no nkorɔfo kwan no ho a, ɔma yɛgye dzi dɛ ɔmmfa ho dza obesi biara no Jehovah na no Dɔba no rinngyaa hɛn da.​—Kenkan Hebrewfo 13:5, 6.

17. Etse nka dɛn dɛ erosom wɔ Jesus n’akwankyerɛ ase?

¹⁷ Ɔyɛ hɛn enyigye paa dɛ yɛrosom wɔ Jesus n’akwankyerɛ ase! Ɔsor hɛn nyina hɛn amambra, ɔman a yefi mu nye kasa a yɛka, naaso yɛdze koryɛ rosom wɔ ahyehyɛdze yi mu. Hɛn nsa ka akwankyerɛ fi Nyankopɔn n’Asɛm Bible no mu na wɔtsetse hɛn ma yetum yɛ asɛnka edwuma no yie. Afei so, ahyehyɛdze no roboa hɛn mu biara ma oeetum ahyɛ suban fofor no na ɔaada ɔdɔ edzi akyerɛ no nua. Ɔsɛ dɛ yɛma hɛn enyi gye na yɛhoahoa hɛnho osiandɛ Jesus nye hɛn kwankyerɛfo!