1. Aber a Adam na Eve yɛɛ bɔn no, annkyɛr koraa na Jehovah yɛɛ biribi. Ɔyɛɛ ebɛnadze? (Genesis 3:15)

 ABER a Adam na Eve yɛɛ bɔn no, annkyɛr koraa na Jehovah hyɛɛ nkɔm tsitsir bi. Nna dɛm nkɔnhyɛ no bɛma Adam na Eve hɔn asefo enyidado. Yebohu asɛm a Jehovah kae no wɔ Genesis 3:15.​—Kenkan.

2. Ebɛnadze ntsi na nkɔnhyɛ a ɔwɔ Genesis 3:15 no ho hia paa?

² Wɔyɛɛ dɛm nkɔnhyɛ yi ho kyerɛwtohɔ wɔ Genesis nwoma no mu. Naaso, wɔ kwan bi do no, Bible mu nwoma a wɔaka no nyina so twe adwen si dɛm nkɔnhyɛ kor yi ara do. Dɛ mbrɛ ahoma ka pradze anaa mena bɔ mu no, dɛmara na asɛm a ɔwɔ Genesis 3:15 no so ka Bible nwoma ahorow no mu nsɛm nyina bɔ mu yɛ no asɛm kor. Dɛm asɛm no nye dɛ, wɔbɔsoma Ɔgyefo bi ma ɔaabɛsɛɛ Abɔnsam nye etsirmɔdzenfo a wodzi n’ekyir nyina. * Iyi bɛma hɔn a wɔdɔ Jehovah nyina enyi agye na hɔnho atɔ hɔn!

3. Ebɛn nsɛmbisa na yebosusu ho wɔ adzesua yi mu?

³ Yebosusu nsɛmbisa ahorow bi a ɔfa nkɔnhyɛ a ɔwɔ Genesis 3:15 no ho wɔ adzesua yi mu. Nsɛmbisa no nye dɛ: Woananom na nkɔnhyɛ no ka hɔnho asɛm? Ebɛnadze na Jehovah edzi kan ayɛ ama dɛm nkɔnhyɛ yi aba mu? Yesi dɛn nya nkɔnhyɛ yi do mfaso ndɛ?

4. Woana nye “abowatsena” anaa ɔwɔ no, na yesi dɛn hu?

⁴ Hɔn a Genesis 3:14, 15 ka hɔnho asɛm no nye “abowatsena,” abowatsena no ‘n’asenyi,’ “ɔbaa,” nye ɔbaa no ‘n’asenyi.’  Bible no ma yehu dza hɔn mu biara gyina hɔ ma. * Hom mma yendzi kan nka abowatsena anaa ɔwɔ no ho asɛm. Asɛm a Jehovah kae wɔ Eden ture no mu no, abowa ɔwɔ ankasa runntum nntse ase. Ntsi ɔyɛ abɔdze bi a onyim nyansa na Jehovah buu no atsɛn no. Ɔnodze, nna ɔyɛ woana? Nyikyerɛ 12:9 ma yehu nyia ɔyɛ ɔwɔ no pefee. Ɔka dɛ Satan Abɔnsam nye “ɔwɔ dadaw” no. Sɛ dɛm dze a, nna ɔno woananom nye ɔwɔ no n’asenyi no?

5. Woananom na wɔka bɔ mu yɛ ɔwɔ no n’asenyi no?

⁵ Ehwɛ Bible mu a, wotum dze asenyi gyina hɔ ma hɔn a wosuasua obi yie paa ma afofor mpo tum ka dɛ nyimpa no yɛ hɔn egya. Ntsi, abɔfo na nyimpa a wɔsoɛr tsia Jehovah Nyankopɔn nye no nkorɔfo dɛ mbrɛ Satan so yɛ no, hɔn na wɔyɛ ɔwɔ no n’asenyi no. Iyinom nye abɔfo a wɔdaan edwuma a nna ɔhyɛ hɔn nsa wɔ sor no gyae, na wɔbaa asaase do wɔ Noah n’aber do no, nye nyimpa etsirmɔdzenfo a wɔyɛ hɔn adze tse dɛ hɔn egya Abɔnsam no.​—Gen. 6:1, 2; John 8:44; 1 John 5:19; Jude 6.

6. Ebɛnadze ntsi na yerunntum nnka dɛ “ɔbaa no” nye Eve?

⁶ Afei, hom mma yɛnhwɛ “ɔbaa no.” Ɔno so yɛ woana? Yerunntum nnka dɛ ɔyɛ Eve. Ebɛnadze ntsi na yɛreka dɛm? Ɔwodze, ma yensusu siantsir kor pɛ ho. Nkɔnhyɛ no ka dɛ ɔbaa no n’asenyi no “bɔbɔ” anaa ɔbɛpɛkyɛw ɔwɔ no ne tsir. Dɛ mbrɛ yeedzi kan ehu no, ɔwɔ no nye ɔbɔfo bɔn Satan. Na ɔbɔfo so dze, Eve n’asefo a bɔn wɔ hɔnho no mu biara nnyi hɔ a obotum asɛɛ no. Sɛ dɛm dze a, nna ɔno woana na ɔbɛpɛkyɛw Satan ne tsir?

7. Dɛ mbrɛ Nyikyerɛ 12:1, 2, 5, 10 ma yehu no, woana nye ɔbaa a wɔkaa noho asɛm wɔ Genesis 3:15 no?

⁷ Ɔbaa a wɔkaa noho asɛm wɔ Genesis 3:15 no, Nyikyerɛ nwoma no ma yehu ne nyimpaban. (Kenkan Nyikyerɛ 12:1, 2, 5, 10.)  Ɔnnyɛ ɔbaa bi a ɔwɔ asaase yi do o! Bible no ka dɛ bosoom wɔ n’ananadze na ahenkyɛw a wɔdze nworaba 12 ayɛ hyɛ ne tsir. Yenyim dɛ sɛ ɔbaa bi nyinsen na ɔrobɔwo a, ɔwo nyimpa. Naaso ɔbabanyin a ɔbaa yi woo no no dze, nna ɔyɛ Nyankopɔn n’Ahendzi no. Ahendzi a yɛreka ho asɛm yi wɔ sor. Ntsi nna kyerɛ dɛ ɔbaa yi so wɔ sor. Sɛ dɛm dze a, nna ɔno yebotum aka dɛ ɔbaa yi gyina hɔ ma Nyankopɔn n’ahyehyɛdze no ne fa a ɔwɔ sor a abɔfo anokwafo na wɔyɛ no mufo no.​—Gal. 4:26.

8. Woana nye ɔbaa no n’asenyi tsitsir no, na ebɛn aber na ɔbɛyɛɛ asenyi tsitsir no? (Genesis 22:15-18)

⁸ Bible no san so boa hɛn ma yehu obi a ɔyɛ ɔbaa no n’asenyi tsitsir no. Nna dɛm asenyi tsitsir yi befi Abraham n’ebusua mu. (Kenkan Genesis 22:15-18.) Nna Jesus fi egyapanyin Abraham n’ebusua mu dɛ mbrɛ nkɔnhyɛ no kae no. (Luke 3:23, 34) Naaso, dɛ mbrɛ yeedzi kan ehu no, nna ɔsɛ dɛ asenyi no yɛ obi a ɔwɔ tum a ɔbor nyimpa dze do mbrɛ ɔbɛyɛ a obotum eyi Satan Abɔnsam efi hɔ korakora. Iyi ntsi dza Nyankopɔn yɛe nye dɛ, aber a Jesus dzii bɛyɛ mfe 30 no, ɔdze no sunsum krɔnkrɔn no seraa no ma ɔbɛyɛɛ obi a wɔdze sunsum awo no. Ntsi wɔseraa Jesus no, ɔbɛyɛɛ ɔbaa no n’asenyi tsitsir. (Gal. 3:16) Jesus no wusoɛr ekyir no, Nyankopɔn dze “enyimnyam nye enyidzi [bɔɔ] no abɔtsir” na ɔdze “sor nye asaase do tum nyina” maa no. Iyi ntsi seseiara Jesus wɔ tum a ɔdze ‘bɛsɛɛ Abɔnsam no ndwuma.’​—Heb. 2:7; Matt. 28:18; 1 John 3:8.

9-10. (a) Woananom na wɔka Jesus ho ma wɔyɛ ɔbaa no n’asenyi no, na wosi dɛn bɛka ho? (b) Ebɛnadze na yerubosusu ho?

⁹ Nnyɛ Jesus nkotsee na ɔbɛyɛ asenyi no, mbom nna nyimpa binom so bɛka noho. Ɔsomafo Paul kaa asɛm bi kyerɛɛ Christianfo bi a nna wɔasera hɔn. Nna hɔn mu binom yɛ Jewfo na binom so yɛ Amanamamfo. Dza ɔkae no ma yehu hɔn a wɔka Jesus ho ma wɔyɛ asenyi no. Paul kaa dɛ: “Sɛ hom yɛ Christ dze a, na hom yɛ Abraham asefo, na hom nam anohoba no do yɛ adzedzifo.” (Gal. 3:28, 29) Sɛ Jehovah dze sunsum krɔnkrɔn no sera Christiannyi bi a, dɛm nyimpa no bɛyɛ ɔbaa no n’asenyi no ne fa. Dɛm ntsi Jesus Christ nye 144,000 a wɔnye no bɔbɔ mu edzi adze no na wɔka bɔ mu yɛ ɔbaa no n’asenyi no. (Nyi. 14:1) Hɔn nyina bɔ mbɔdzen yɛ hɔn adze tse dɛ hɔn Egya, Jehovah Nyankopɔn.

¹⁰ Dze besi ha yi, yeehu hɔn a Genesis 3:15 no ka hɔnho asɛm no. Afei, hom mma yɛnhwɛ mbrɛ Jehovah dze no nkakrankakra rema dɛm nkɔnhyɛ yi aba mu nye mbrɛ yerinya do mfaso no ho asɛm kakra.

11. Ɔwɔ no sii dɛn kaa ɔbaa no n’asenyi no “n’anantsir”?

¹¹ Dɛ mbrɛ nkɔnhyɛ a ɔwɔ Genesis 3:15 kyerɛ no, nna ɔwɔ no bɛka ɔbaa no n’asenyi no “n’anantsir.” Nkɔnhyɛ no ne fa yi baa mu aber a Satan maa Jewfo na Romefo no kum Nyankopɔn ne Ba no. (Luke 23:13, 20-24) Sɛ obi pira wɔ ne nantsir a, ɔbɛgye mber kakra ana oeetum anantsew. Dɛm pɛpɛɛpɛr na osii wɔ Jesus n’afamu. Aber a owui ma wokesiee no no, odzii nda ebiasa wɔ nda no mu a nna onntum nnyɛ noho hwee.​—Matt. 16:21.

12. Ebɛn kwan do na ɔbaa no n’asenyi no bɛpɛkyɛw ɔwɔ no ne tsir? Na ebɛn aber na ɔbɛyɛ iyi?

¹² Sɛ nna nkɔnhyɛ a ɔwɔ Genesis 3:15 no botum aba mu a, nna ɔnnsɛ dɛ Jesus ka nda no mu. Ebɛnadze ntsi a? Osiandɛ nkɔnhyɛ no kaa dɛ asenyi no bɛpɛkyɛw ɔwɔ no ne tsir. Ntsi iyi ma yehu dɛ nna ɔsɛ dɛ Jesus ne nantsir kur no wu, anaa wɔ kwan fofor do no, wonyan Jesus fi owu mu. Na ampaara so, wonyaan no! Jesus wui ne ndaansa ekyir no, Jehovah nyaan no dɛ sunsum abɔdze a obiara  runntum nnsɛɛ no. Ɔrennkyɛr koraa, wɔ Nyankopɔn ne ber a ɔsɛ mu no, Jesus beyi Satan efi korakora. (Heb. 2:14) Afei, ɔwɔ no n’asenyi a ogyina hɔ ma Nyankopɔn n’atamfo no, Christ nye hɔn a wɔnye no bɔbɔ mu edzi adze no beyi hɔn nyina efi asaase yi do.​—Nyi. 17:14; 20:4, 10. *

13. Yesi dɛn nya dɛm nkɔnhyɛ a wɔaba mu yi do mfaso?

¹³ Sɛ eyɛ Nyankopɔn no somfo a ehyira woho do ama no a, nna ɔno irinya nkɔnhyɛ yi ne mbamu do mfaso paa. Jesus baa asaase yi do dɛ nyimpa no, ɔdaa suban a ne Papa Jehovah wɔ no bi edzi pɛpɛɛpɛ. (John 14:9) Iyi ntsi, Jesus noho adze a yeesua no aboa hɛn ma yeehu Jehovah Nyankopɔn no suban, na yɛdɔ no. Afei so, Jesus na odzi Christianfo asafo no enyim, ntsi nkyerɛkyerɛ na akwankyerɛ a ɔdze ma no roboa hɛn paa. Ɔakyerɛ hɛn kwan a ɔsɛ dɛ yɛfa do bɔ hɛn bra ama Jehovah aagye hɛn ato mu. Ɔno da nkyɛn a, hɛn nyinara yenya Jesus no wu anaa ne nantsir a wɔkae no do mfaso. Ɔyɛ ebɛn mfaso a? Aber a Jehovah nyaan Jesus no, Jehovah gyee Jesus no bɔgyaa a ɔdze bɔɔ afɔr no too mu dɛ, dɛm afɔrbɔ no botum ‘atsew hɛnho efi bɔn nyina ho.’​—1 John 1:7.

14. Yesi dɛn hu dɛ nna mber bi botwa mu ansaana nkɔm a Jehovah hyɛe wɔ Eden ture no mu no aba mu? Kyerɛkyerɛ mu.

¹⁴ Nsɛm a Jehovah kae wɔ Eden ture no mu no ma yehu dɛ nna mber bi botwa mu ansaana dɛm nsɛm no aba mu. Nna ɔwɔ dɛ ɔbaa no wo asenyi a wɔkaa noho asɛm no. Afei so nna ɔwɔ dɛ Abɔnsam nya hɔn a wɔbɛtaa n’ekyir. Bio so, nna ɔwɔ dɛ ɔtan bɛda ekuw ebien yi ntamu. Nna iyinom nyina bɛgye mber ana wɔaaba mu. Sɛ yɛtse nkɔnhyɛ yi ase a, ɔboa hɛn osiandɛ ɔma yɛda hɛnho do dɛ wiadze a Satan dzi do hen yi bɛtan Jehovah n’asomfo enyi. Aber a Jesus baa asaase do no, ɔkaa asɛm a ɔtse dɛmara kyerɛɛ n’esuafo no. (Mark 13:13; John 17:14) Mfe 100 a abɛsen kɔ yi dze, yeehu paa dɛ dɛm ɔtan a wɔkaa ho asɛm too hɔ yi aba mu ampa. Ebɛnadze ntsi na yɛreka dɛm?

15. Ɔtan a wiadze no dze tan Nyankopɔn no nkorɔfo no, yɛ ara na ɔreyɛ kɛse, ebɛnadze ntsi a? Ebɛnadze ntsi na ɔnnsɛ dɛ yesuro Satan koraa?

¹⁵ Aber a wɔdze Jesus sii egua do dɛ Messiah Ahendzi no do Hen wɔ 1914 no, wɔannkyɛr biara na otuu Satan fii sor baa asaase do. Seseiara, ɔaka asaase yi do ha, na ɔtse ha rotweɔn no wu. (Nyi. 12:9, 12) Naaso, ɔnntsena hɔ komm o, no bo efuw paa, na ɔdze n’ebufuw no akɔsoasoa Nyankopɔn no nkorɔfo do. (Nyi. 12:13, 17) Dɛm ntsi, ɔtan a wiadze no dze tan Nyankopɔn no nkorɔfo no, yɛ ara na ɔreyɛ kɛse. Naaso, ɔnnsɛ dɛ yesuro Satan nye hɔn a wodzi n’ekyir no koraa. Mbom ɔsɛ dɛ yenya awerɛhyɛmu a ɔsomafo Paul nyae no bi. Ɔkaa dɛ: “Sɛ Nyankopɔn wɔ hɛn afa a, woana na obotum asoɛr etsia hɛn?” (Rom. 8:31, Baebor) Dɛ mbrɛ yeehu no, nkɔnhyɛ a ɔwɔ Genesis 3:15 no mu fa kɛsenara aba mu, dɛm ntsi ɔsɛ dɛ yenya awerɛhyɛmu kɛse wɔ Jehovah mu.

16-18. Ebɛn kwan do na dza Curtis, Ursula, nye Jessica nyim fa nkɔnhyɛ a ɔwɔ Genesis 3:15 ho no aboa hɔn?

¹⁶ Jehovah no bɔhyɛ a ɔwɔ Genesis 3:15 no botum aboa hɛn ma yeegyina nsɛndzendzen biara a yebehyia wɔ asetsena mu no ano. Asɛmpatserɛwnyi bi a wɔfrɛ Curtis a ɔsom wɔ Guam kaa dɛ: “Ɔtɔ da a, tsebea ahorow a mihyia no ma ɔyɛ dzen ma me dɛ mobɔkɔ do edzi Jehovah nokwar. Naaso, nkɔnhyɛ a ɔwɔ Genesis 3:15 a modwendween ho no aboa me ma menya awerɛhyɛmu kɛse wɔ mo sor Egya no  mu.” Curtis rohwɛ da a Jehovah beyi ɔhaw a yerihyia nyina efi hɔ no kwan dzendzenndzen.

¹⁷ Wɔfrɛ akyerɛbaa bi a ɔwɔ Bavaria no Ursula. Ɔno so kaa dɛ aber a ɔtsee nkɔnhyɛ a ɔwɔ Genesis 3:15 no ase no, ɔma ɔgyee dzii dɛ Nyankopɔn na ɔmaa wɔkyerɛɛw Bible no ampa. Ohun dɛ nkɔnhyɛ afofor a wɔaka nyina twe adwen si dɛm nkɔnhyɛ yi do, na iyi maa n’enyi gyee paa. Ɔsanee so kaa dɛ: “Aber a muhun dɛ Jehovah yɛɛ biribi ntsɛmara mbrɛ ɔbɛyɛ a adasamba benya enyidado no, ɔkaa m’akoma paa.”

¹⁸ Akyerɛbaa Jessica so wɔ Micronesia. Asɛm a ɔno so kae nye dɛ: “Ndɛ na ndɛ nyina, meda ho ara kaa mbrɛ misii tsee nka aber a muhun dɛ mehu nokwar no! Muhun dɛ nkɔnhyɛ a ɔwɔ Genesis 3:15 no rinya ne mbamu. Wɔaboa me ma mehu dɛ dza yɛrefa mu ndɛ no, nnyɛ dɛm na Jehovah pɛ koraa. Bio so, nkɔnhyɛ no aboa me ma magye edzi paa dɛ Jehovah a mobɔsom no no bɛma meenya asetsena a akomatɔyamu wɔ mu ndɛ nye asetsena papabi daakye.”

19. Ebɛnadze ntsi na ɔsɛ dɛ yenya awerɛhyɛmu dɛ mbrɛ ɔtse biara nkɔnhyɛ no ne fa a otwa tun no bɛba mu?

¹⁹ Adzesua yi ama yeehu dɛ, nkɔnhyɛ a ɔwɔ Genesis 3:15 no gu do ara rinya ne mbamu. Hɔn a wɔyɛ ɔbaa no n’asenyi no nye hɔn a wɔyɛ ɔwɔ no n’asenyi no, yeehu hɔn nyina. Afei so, yeehu dɛ Jesus na ɔyɛ ɔbaa no n’asenyi tsitsir no, na ne nantsir kur no so ewu. Seseiara dze, ɔyɛ Ɔhen a ɔwɔ tum paa, na obiara runntum nnku no. Hɔn a wɔnye Jesus bɔbɔ mu edzi adze wɔ sor no so, wɔaka kakraabi ma Jehovah eyi hɔn ewie. Osiandɛ nkɔnhyɛ no ne fa a odzi kan no aba mu ntsi, ɔsɛ dɛ yenya awerɛhyɛmu dɛ mbrɛ ɔtse biara ne fa a otwa tun no so bɛba mu. Ɔno nye dɛ, ɔrennkyɛr wɔbɛpɛkyɛw ɔwɔ no ne tsir. Sɛ wɔsɛɛ Satan a, Nyankopɔn n’asomfo anokwafo enyi bɛgye paa! Naaso, seseiara a wɔnnsɛɛ no yi, hom mma yɛnkɔ do ndzi Jehovah nokwar daa. Hɛn Nyankopɔn a yɛsom no no, onndzi akɔhwi, ntsi yebotum agye no edzi. Ɔnam ɔbaa no n’asenyi no do dze nhyira pii bɛbrɛ “asaase [do] amanaman nyinara.”​—Gen. 22:18.