1. Ebɛnadze ntsi na oye dɛ yesiesie hɛnho ansaana atoyerɛnkyɛm bi esi?

 SƐ ASƐNKƐSE bi ribesi na isiesie woho a, otum gye wo nkwa. Dɛ nhwɛdo no, hɔn a wosiesie hɔnho ansaana atoyerɛnkyɛm bi esi no, mpɛn pii no hɔn na wonya nkwa na wotum so boa afofor. Ahyehyɛdze bi a ɔwɔ Europe a wɔdze mboa ma nkorɔfo no kaa dɛ: “Sɛ nkorɔfo siesie hɔnho a, otum gye hɔn nkwa.”

2. Ebɛnadze ntsi na ɔsɛ dɛ yɛyɛ krado tweɔn ahohiahia kɛse no? (Matthew 24:44)

² “Ahohiahia kɛse” no bɛba awerɛfir mu. (Matt. 24:21) Naaso ahohiahia kɛse no nntse dɛ atoyerɛnkyɛm ahorow a osisi a obiara n’enyi nnda no, osiandɛ ɔno dze, yenyim dɛ ɔreba. Bɛyɛ mfe 2,000 nye yi na Jesus bɔɔ n’ekyirdzifo kɔkɔ dɛ wɔnyɛ krado ntweɔn dɛm da no. (Kenkan Matthew 24:44.) Sɛ yesiesie hɛnho a, ɔbɛyɛ mberɛw ama hɛn dɛ yebegyina mber a no mu yɛ dzen yi ano, na yaaboa afofor so ma wɔaayɛ dɛmara.​—Luke 21:36.

3. Ebɛn kwan do na enyimia, ayamuhyehye nye ɔdɔ botum aboa hɛn ma yeesiesie hɛnho atweɔn ahohiahia kɛse no?

³ Hom mma yɛnhwɛ su ebiasa bi a obotum aboa hɛn ma yeesiesie hɛnho atweɔn ahohiahia kɛse a ɔreba no. Sɛ ɔba no dɛ yɛnka atsɛmbusɛm a n’ano yɛ dzen, na hɔn a wɔnnsom Jehovah no soɛr tsia hɛn a, yɛbɛyɛ dɛn? (Nyi. 16:21) Sɛ ɔba dɛm a, no ho behia dɛ yenya abotar anaa yemia hɛn enyi ama yeetum etsie Jehovah, na yeenya no mu ahotodo dɛ ɔbɔbɔ hɛnho ban. Na sɛ ɔba no dɛ hɛn nuanom hwer ndzɛmba a wɔwɔ no bi anaa ne nyina fi hɔn nsa a, yɛbɛyɛ hɛn adze dɛn? (Hab. 3:17, 18) No ho behia dɛ hɛn yamu hyehye hɛn ma hɔn na yɛboa hɔn ma hɔn nsa ka dza wohia no. Sɛ aman ahorow a wɔbɛka hɔnho abɔ mu no tow hyɛ hɛn do, ma ɔno ntsi no ho behia dɛ yɛnye hɛn nuanom bɔ mu tsena fakor ber kakra a, yɛbɛyɛ hɛn adze dɛn? (Ezek. 38:10-12) Sɛ ɔba dɛm a, obehia dɛ yɛda ɔdɔ a no mu yɛ dzen edzi kyerɛ hɔn ama yɛnye hɔn nyina eetum egyina ber a no mu yɛ dzen no ano.

4. Ebɛn kwan do na Bible no ma yehu dɛ ɔsɛ dɛ yɛkɔ do nya abotar anaa yemia hɛn enyi, yenya ayamuhyehye na yɛda ɔdɔ edzi?

⁴ Nyankopɔn n’Asɛm no hyɛ hɛn nkuran dɛ yɛnkɔ do ara mmia  hɛn enyi anaa yennya abotar, yennya ayamuhyehye na yɛnda ɔdɔ edzi. Luke 21:19 ka dɛ: “Hom abotar mu na hom bɛgye hom akra.” Colossaefo 3:12 ka dɛ: “Hom nhyɛ ayamuhyehye.” Afei so 1 Thessalonicafo 4:9, 10 ka dɛ: “Nyankopɔn akyerɛkyerɛ homankasa dɛ hom ndodɔ homho. . . . Naaso enuanom, yetu hom fo, dɛ hom mbor do pii.” Hɔn a wɔkaa nsɛm yi kyerɛɛ hɔn no, nna wɔreda enyimia, ayamuhyehye nye ɔdɔ edzi dada. Naaso nna ɔsɛ dɛ wɔkɔ do ara da dɛm su ahorow yi edzi. Hɛn so, wɔhyɛ hɛn nkuran dɛ yɛnyɛ dɛm. Dza ɔbɔboa hɛn ma yeetum ayɛ dɛm no, ma yɛnhwɛ mbrɛ tsetse Christianfo no daa dɛm su no mu biara edzi. Afei so, yɛbɔhwɛ dza yebotum ayɛ dze esuasua hɔn dze akyerɛ dɛ yɛayɛ krado rotweɔn ahohiahia kɛse no.

5. Ebɛnadze na tsetse Christianfo no yɛe a ɔboaa hɔn ma womiaa hɔn enyi gyinaa ɔhaw ahorow ano?

⁵ Nna ɔsɛ dɛ tsetse Christianfo no mia hɔn enyi gyina ɔhaw ahorow a nna worihyia no ano. (Heb. 10:36) Ɔhaw a nyimpa nyina hyia no, hɔn so wohyiaa bi. Naaso sɛ yɛdze ɔno to nkyɛn a, wohyiaa ɔhaw afofor so. Hɔn mu pii wɔ hɔ a, Jewfo nyamesom mpanyimfo nye Rome aban no retan hɔn enyi no, nna hɔn ebusuafo so dze hɔndze repee do. (Matt. 10:21) Ɔnnyɛ ɔno nko, wɔ asafo no mu so, nna ɔsɛ dɛ wɔhwɛ hu dɛ wɔremma awaafo hɔn nkyerɛkyerɛ a ɔdze mpaapaamu ba asafo no mu no nnya hɔn do tum. (Andw. 20:29, 30) Iyi nyina mu no, dɛm Christianfo yi miaa hɔn enyi gyinaa mu. (Nyi. 2:3) Ebɛnadze na ɔboaa hɔn? Adze kor nye dɛ, wɔdwendween Bible mu nhwɛdo a ɔfa nyimpa binom a womiaa hɔn enyi gyinaa ɔhaw ahorow ano no ho. Hɔn mu bi nye Job. (Jas. 5:10, 11) Afei so, wɔserɛɛ Jehovah dɛ ɔmma hɔn ahoɔdzen. (Andw. 4:29-31) Bio so, wɔdze hɔn adwen sii nhyira a sɛ womia hɔn enyi gyina ɔhaw no ano a, wobenya no do.​—Andw. 5:41.

6. Dza Merita yɛe a ɔboaa no ma otumii gyinaa ɔsoɛrtsia ano no, ebɛnadze na isua fi mu?

⁶ Binom a womiaa hɔn enyi gyinaa ɔhaw ano a Bible no nye asafo nwoma ahorow ka hɔnho asɛm no, sɛ yɛtaa sua hɔnho adze na yɛdwendwen dza wɔyɛe no ho a, ɔbɔboa hɛn ma hɛn so yeetum egyina hɛn haw ano. Dɛm na akyerɛbaa bi a wɔfrɛ no Merita a ofi Albania yɛe, na ɔboaa no ma otumii gyinaa ɔsoɛrtsia a no mu yɛ dzen a n’ebusuafo dze baa no do no ano. Ɔkaa dɛ: “Aber a musuaa Job ho adze wɔ Bible mu no, ɔkaa m’akoma paa. Amandze a ohunii nyina nna onnyim obi a ɔhyɛ ekyir, naaso ɔkaa dɛ: ‘Mirinnyi m’emudzi mmfi moho araa ma ekodu dɛ mubowu.’ (Job 27:5) Sɛ medze ɔhaw a Job hyiae no toto medze no ho a, nna medze no mmba koraa. Job mpo dze, nna onnyim obi a ɔhyɛ ne haw no ekyir, naaso emi dze minyim.”

7. Sɛ sesei yerinnhyia ɔhaw akɛse mpo a, ebɛnadze na ɔsɛ dɛ yesua dɛ yɛbɛyɛ?

⁷ Adze fofor so a obotum aboa hɛn ma yaakɔ do emia hɛn enyi nye dɛ, yɛbɛtaa abɔ Jehovah mpaa na yaaka dza ɔhaw hɛn nyina ho asɛm akyerɛ no. (Phil. 4:6; 1 Thess. 5:17) Bi a sesei dze, irinnhyia ɔhaw biara a no mu yɛ dzen. Naaso, sɛ ɔba no dɛ w’abaw mu bu, w’adwen tu fora, anaa innhu dza ennyɛ a, ana ehwehwɛ Jehovah hɔ akwankyerɛ? Ndɛ, sɛ ihyia ɔhaw nketsenketse wɔ w’asetsena mu na ehwehwɛ mboa fi Jehovah hɔ a, ɔrennyɛ dzen mma wo dɛ daakye sɛ ihyia ɔhaw akɛse a ebɔkɔ ne nkyɛn akɔhwehwɛ mboa. Sɛ eyɛ dɛm a, ɔbɛma enya ahotodo dɛ Jehovah nyim ber a ɔfata a ɔsɛ dɛ ɔboa wo nye dza ɔsɛ dɛ ɔyɛ dze boa wo.​—Ndw. 27:1, 3.

8. Ebɛn kwan do na Mira n’asɛm no ma yehu dɛ sɛ yemia hɛn enyi gyina ɔhaw ano ndɛ a, ɔbɔboa hɛn ma yeetum egyina ɔhaw afofor ano daakye? (James 1:2-4) (Hwɛ mfonyin no so.)

⁸ Sɛ yemia hɛn enyi gyina ɔhaw a yehyia no ndɛ no ano a, obotum aboa hɛn ma yeegyina ɔhaw akɛse a yebehyia wɔ ahohiahia kɛse no mu no ano. (Rom. 5:3) Ebɛnadze ntsi na yebotum aka no dɛm? Enuanom pii ehu dɛ sɛ wohyia  ɔhaw bi na wotum gyina ano a, ɔboa hɔn ma sɛ fofor so yi ne tsir a wotum gyina ano. Sɛ wohu mbrɛ Jehovah boaa hɔn ma wotumii gyinaa ɔhaw no ano a, ɔma gyedzi a wɔwɔ wɔ Jehovah mu dɛ ɔbɛsan so aboa hɔn aber a woehyia ɔhaw fofor no yɛ kɛse. Afei, gyedzi a ɔtse dɛm no boa hɔn ma wotum gyina ɔhaw fofor a wobehyia no ano. (Kenkan James 1:2-4.) Mira yɛ akyerɛbaa kwampaafo a ɔwɔ Albania. Oebohu dɛ ɔhaw ahorow bi a omiaa n’enyi gyinaa ano mber bi a abɛsen kɔ no aboa no ma fofor biara a obehyia no, otum gyina ano. Ɔkaa dɛ ɔtɔ mber bi a ɔtse nka dɛ gyama nankotsee na ne haw dɔɔ so. Naaso sɛ ɔkaa ndzɛmba a Jehovah ayɛ dze aboa no mfe 20 a etwa mu no a, dza ɔka kyerɛ noho ara nye dɛ: ‘Kɔ do dzi Jehovah nokwar. Mma dza Jehovah ayɛ ama wo mfe pii no nnyɛ kwa.’ Woara so, ibotum adwendwen dza Jehovah ayɛ aboa wo ma etum egyina wo haw ano no ho. Nya awerɛhyɛmu dɛ aber biara a ibemia w’enyi egyina ɔhaw bi ano no, Jehovah hu na obehyira wo paa. (Matt. 5:10-12) Dɛm no, sɛ ahohiahia kɛse no hyɛ ase a, ɔrennyɛ dzen mma wo, osiandɛ esua mbrɛ wosi gyina ɔhaw ano na ɔbɔboa wo ma eesi wo bo dɛ ibegyina mu ekesi ase.

9. Ebɛnadze na enuanom a wɔwɔ Antioch a ɔwɔ Syria no yɛe dze kyerɛɛ dɛ wɔwɔ ayamuhyehye?

⁹ Hom mma yɛnhwɛ dza osii aber a ɔkɔm kɛse bi sii ma ɔkaa Christianfo a nna wɔwɔ Judea no. Aber a enuanom a wɔwɔ Antioch a ɔwɔ Syria no tsee ɔkɔm no ho asɛm no, hɔn yamu hyehyee hɔn maa hɔn nuanom a wɔwɔ Judea no. Naaso hɔn yamu annhyehye hɔn kɛkɛ, mbom wɔyɛɛ biribi dze boaa hɔn. Wɔbɔɔ “hɔn tsirmu dɛ wɔdze biribi bɔmona enuanom a wɔtse Judea” no dɛ mbrɛ hɔn mu biara botum. (Andw. 11:27-30) Ɔwɔ mu dɛ nna enuanom a wɔwɔ Antioch no mmbɛn enuanom a ɔkɔm ruku hɔn wɔ Judea no dze, naaso wosii hɔn bo dɛ wɔbɛyɛ biribi dze aboa hɔn.​—1 John 3:17, 18.

10. Sɛ atoyerɛnkyɛm bi si ma hɛn nuanom ho ka a, ebɛnadze na yebotum ayɛ dze akyerɛ dɛ yɛwɔ ayamuhyehye? (Hwɛ mfonyin no so.)

¹⁰ Hɛn so, sɛ yɛtse dɛ atoyerɛnkyɛm bi esi ma hɛn nuanom ho aka a, yebotum ayɛ biribi ntsɛmara dze aboa hɔn dze akyerɛ dɛ yɛwɔ ayamuhyehye. Ndzɛmba a yebotum ayɛ no bi nye dɛ, yebebisa hɛn asafo mu mpanyimfo dza yebotum ayɛ dze aboa, yebeyi ntoboa dze aboa wiadze nyina som edwuma no, anaa yɛbɔbɔ mpaa ama hɛn nuanom a atoyerɛnkyɛm no ama hɔnho aka no. b (Mbɛ. 17:17) Dɛ nhwɛdo no, wɔ 2020 mu no, wɔtseew Atoyerɛnkyɛm Ber Mu Mboa Egyinatukuw ahorow bɔbor 950 wɔ wiadze nyinara dɛ wɔmfa mboa mma enuanom a COVID-19 ama hɔnho akyer hɔn no. Enuanom a wɔdze mboa ma wɔ atoyerɛnkyɛm ber mu no fata nkamfo paa. Ayamuhyehye a wɔwɔ ma hɔn nuanom no kenyan hɔn ma wɔdze ndzɛmba a wohia no kɛma hɔn na wɔboa hɔn ma wɔkɔ do som Jehovah. Na ɔtɔ da mpo a, sɛ atoyerɛnkyɛm no sɛɛ mbea ahorow a yehyia mu som anaa enuanom hɔn efie a, wosiesie anaa wosi no fofor.​—Fa toto 2 Corinthfo 8:1-4 ho.

11. Ebɛn kwan do na ayamuhyehye a yɛda no edzi no hyɛ Nyankopɔn enyimnyam?

¹¹ Sɛ atoyerɛnkyɛm si na yɛyɛ ndzɛmba ahorow dze boa hɛn nuanom dze kyerɛ dɛ yɛwɔ ayamuhyehye a, afofor hu. Dɛ nhwɛdo no, wɔ 2019 mu no, ehum gyampaturdu bi a wɔfrɛ no Hurricane Dorian sɛɛ Ahendzi Asa bi a ɔwɔ Bahamas. Aber a wɔresan esi Ahendzi Asa no, enuanom no kaa kyerɛɛ obi a osisi adan a ɔnnyɛ Ɔdasefo dɛ ɔnsese dan no ho kaw no mma hɔn. Dza ɔkaa kyerɛɛ enuanom no nye dɛ: “Merenngye hom hwee . . . mfir a medze bɛyɛ edwuma no, hɔn a wɔbɛyɛ nye ndzɛmba a yɛdze bɛyɛ no ho kaw no nyina mafa. . . . Mepɛ dɛ meyɛ kyɛ hom ahyehyɛdze no kɛkɛ. Osiandɛ mbrɛ [hom]  si boaboa homho no yɛ me fɛw paa.” Ɔwɔ mu dɛ nyimpa a wɔwɔ wiadze no mu dodow no ara nnyim Jehovah dze, naaso hɔn mu pii hu ndzɛmba a Jehovah Adasefo yɛ no. Ayamuhyehye a yɛda no edzi kyerɛ afofor no twe nkorɔfo bɛn Jehovah a “n’ehumbɔbɔr dɔɔ so no,” na iyi ka akoma paa!​—Eph. 2:4.

12. Sɛ yɛda ayamuhyehye edzi ndɛ a, ebɛn kwan do na ɔbɔboa hɛn wɔ ahohiahia kɛse no mu? (Nyikyerɛ 13:16, 17)

¹² Ebɛnadze ntsi na no ho behia dɛ yɛda ayamuhyehye edzi wɔ ahohiahia kɛse no mu? Bible no ma yehu dɛ hɔn a wɔnntaa wiadze yi tumdzi ekyir no, wobehyia ɔhaw ndɛ, na ahohiahia kɛse no mu so wɔremmfa hɔnho nndzi. (Kenkan Nyikyerɛ 13:16, 17.) Bi a dɛm aber no hɛn nuanom behia asetsena mu ndzɛmba ahorow bi. Sɛ hɛn Hen Christ Jesus ba dɛ orubobu atsɛn a, ɔmbra dɛ ɔbɛba abɔto hɛn dɛ yɛreda ayamuhyehye edzi akyerɛ hɛnho. Dɛm no ɔbɛka akyerɛ hɛn dɛ ‘yɛmbɛfa Ahenman’ no.​—Matt. 25:34-40.

13. Dɛ mbrɛ Romefo 15:7 ma yehu no, ebɛnadze na tsetse Christianfo no yɛe dze kyerɛɛ dɛ wɔdodɔ hɔnho paa?

¹³ Nna nkorɔfo nyim dɛ tsetse Christianfo no dodɔ hɔnho paa. Naaso ehwɛ a, nna ɔyɛ mberɛw ma hɔn dɛ wɔbɛda ɔdɔ edzi akyerɛ hɔnho anaa? Ɔwodze, ma yɛnhwɛ nyimpa ahorow a nna wɔwɔ Rome asafo no mu no. Nna nnyɛ Jewfo a wɔdze Moses Mbra no akyerɛkyerɛ hɔn no nkotsee na wɔwɔ mu. Mbom nna Amanamamfo a ɔsor hɔn amambra nye mbrɛ wosii tsetsee hɔn no so wɔ asafo no mu bi. Obotum aba dɛ, Christianfo no bi wɔ hɔ a, nna wɔyɛ nkowaa na binom so yɛ adehye. Bi a nna Christianfo no mu binom mpo wɔ nkowaa. Ɔmmfa ho dɛ nna tsetse Christianfo no nsɛm tsebea nnyɛ pɛ no, ebɛnadze na wɔyɛe dze kyerɛɛ dɛ wɔdodɔ hɔnho? Ɔsomafo Paul tuu hɔn fo dɛ “hom ngyegye homho.” (Kenkan Romefo 15:7.) Nna Paul repɛ akyerɛ dɛn? Kasafua a wɔkyerɛɛ ase ‘hom ngye’ no, dza ɔkyerɛ nye dɛ ebɛgye obi fɛw do anaa ebɛgye no hɔho tse dɛ mbrɛ obi gye obi ba ne fie anaa ɔfa no nyɛnko no. Dɛ nhwɛdo no, nna Onesimus yɛ Philemon n’akowaa a oeguan efi ne nkyɛn. Paul kaa kyerɛɛ Philemon dɛ: ‘Gye no fɛw do.’ (Philem. 17) Afei so, Priscilla na Aquila gyee Apollos fɛw do. Nna Apollos nnyim Christiansom ho nsɛm pii dɛ dɛm awarfo yi, naaso “wɔfaa no baa hɔn nkyɛn.” (Andw. 18:26) Ɔwɔ mu dɛ nna dɛm Christianfo yi nsɛm tsebea gu ahorow dze, naaso wɔamma ɔno ennsiw hɔn kwan dɛ wɔbɛda ɔdɔ edzi akyerɛ hɔnho.

14. Ebɛnadze na Anna na no kun yɛe dze kyerɛɛ dɛ wɔdɔ enuanom no?

¹⁴ Hɛn so, sɛ yɛfa hɛn nuanom nyɛnko na yɛgye ber nye hɔn yɛ ndzɛmba bɔ mu a, ɔkyerɛ dɛ yɛdɔ hɔn. Iyi bɛma hɔn so wɔada ɔdɔ edzi akyerɛ hɛn. (2 Cor. 6:11-13) Hom mma yensusu Anna na no kun ho nhwɛ. Aber a wɔdze hɔn kɔr ɔman bi a ɔwɔ Africa Anee afamu dɛ asɛmpatserɛwfo no, annkyɛr koraa na COVID-19 yii ne tsir. Osian yarba no ntsi, nna wonntum nye enuanom a wɔnye hɔn wɔ asafo mu no nnhyia mu enyim na enyim. Nna ebɛnadze na dɛm awarfo yi botum ayɛ dze akyerɛ dɛ wɔdɔ enuanom no? Wɔnye enuanom no bɔɔ nkɔmbɔ wɔ video kɔnferɛns do, na wɔkaa kyerɛɛ hɔn dɛ hɔn enyi bɛgye ho paa dɛ wobohu hɔn yie. Dza awarfo yi yɛe no kaa enuanom no akoma paa. Iyi ntsi, nna enuanom no so taa frɛ hɔn na wɔsɛnd hɔn tɛst mɛsegye. Ebɛnadze ntsi na asɛmpatserɛwfo yi bɔɔ mbɔdzen dɛ wobohu enuanom no yie? Anna kaa dɛ, “Ndzɛmba ahorow a enuanom ayɛ ama menye m’ebusuafo wɔ mber pa na mber bɔn mu dze akyerɛ dɛ wɔdɔ me no, mo werɛ rimmfir da. Iyi na woekenyan me ma mara so meda ɔdɔ edzi kyerɛ afofor.”

15. Ɔdze fa hɛn nuanom a yɛbɔdɔ hɔn ho no, ebɛnadze na isua fi Vanessa n’asɛm no mu? (Hwɛ mfonyin no so.)

¹⁵ Hɛn mu pii wɔ hɔ a, asafo a yɛwɔ mu no,  ɔsor enuanom binom hɔn amambra, mbrɛ wosii tsetsee hɔn, nye hɔn suban. Sɛ yɛdze hɛn adwen si suban pa a dɛm enuanom yi wɔ no do a, ɔdɔ a yɛwɔ ma hɔn no bɛyɛ kɛse. Hom mma yɛmfa akyerɛbaa bi a wɔfrɛ no Vanessa a ɔwɔ New Zealand no dɛ nhwɛdo. Nna ɔyɛ dzen ma no dɛ ɔnye enuanom binom a wɔwɔ n’asafo mu no bɔbɔ. Naaso ekyir yi ohun dɛ, ɔnnsɛ dɛ ɔtwe noho fi dɛm enuanom no ho, mbom ɔsɛ dɛ ɔgye mber na ɔnye hɔn bɔ. Aber a ɔyɛɛ dɛm no, ɔboaa no ma ohun dza Jehovah n’enyi gye ho wɔ dɛm enuanom no ho. Ɔkaa dɛ: “Ofitsi ber a mo kun bɛyɛɛ ɔmansin do hwɛfo no, yeehyia enuanom a ɔsor hɔn suban nye mbrɛ wosi yɛ hɔn adze. Seseiara dze, ɔnnyɛ dzen mma me bio dɛ menye hɔn bɔbɔ. Sɛ muhu mbrɛ nyimpa si gu ahorow no a, ɔma m’enyi gye paa. Ɔda edzi pefee dɛ, Jehovah so n’enyi gye ho. Siantsir nye dɛ ɔatwe hɛn aba n’ahyehyɛdze a nyimpa ahorow nyina wɔ mu no mu dɛ yɛmbɔsom no.” Sɛ yehu hɛn nuanom dɛ mbrɛ Jehovah hu hɔn no a, ɔkyerɛ dɛ yɛdɔ hɔn.​—2 Cor. 8:24.

16. Ebɛnadze ntsi na no ho behia paa dɛ yɛdɔ hɛn nuanom wɔ ahohiahia kɛse no mu? (Hwɛ mfonyin no so.)

¹⁶ Ahohiahia kɛse no mu no, no ho behia paa dɛ yɛda ɔdɔ kɛse edzi kyerɛ hɛnho. Sɛ ahohiahia kɛse no hyɛ ase a, henfa paa na yebenya bambɔ? Ɔwodze ma yɛnhwɛ dza Jehovah kaa kyerɛɛ no nkorɔfo a nna wɔwɔ Babylon no dɛ wɔnyɛ aber a wɔtowee hyɛɛ kurow no do no. Jehovah kaa dɛ: “Me man, hom mbra, hom mbɛhɛn hom adankyir mu, na hom ntotow homho mbobow mu: hom nhuntsa ber kakra, ma onkodu dɛ ebufuhyew no botwa mu akɔ.” (Isa. 26:20) Bi a hɛn so, asɛm kor yi ara na yɛdze bɛyɛ edwuma wɔ ahohiahia kɛse no mu. Obotum aba dɛ, “adankyir” a kyerɛwsɛm no ka ho asɛm no begyina hɔ ama hɛn asafo ahorow no. Jehovah ahyɛ hɛn bɔ dɛ, wɔ ahohiahia kɛse no mu no, sɛ yɛkɔ do nye hɛn nuanom bɔ mu som no a, ɔbɔbɔ hɛnho ban. Dɛm ntsi, ndɛ paa na ɔsɛ dɛ yɛbɔ mbɔdzen dɔ hɛn nuanom na yebu hɛn enyi gu hɔn sintɔ do. Bi a ɔno na ɔbɛma yeenya nkwa!

17. Sɛ yesiesie hɛnho ndɛ ma dza obesisi daakye no a, ebɛn kwan do na ɔbɔboa hɛn wɔ ahohiahia kɛse no mu?

¹⁷ ‘Jehovah ne da kɛse no’ bɛma adasamba nyina ho ehiahia hɔn. (Zeph. 1:14, 15) Mbrɛ ɔtse nye dɛ, Jehovah n’asomfo mpo ho bɛkyer hɔn. Naaso sɛ yesiesie hɛnho ndɛ ma ndzɛmba a obesisi daakye no a, hɛn akoma runntu na yebotum aboa hɛn nuanom so. Sɛ yɛyɛ dɛm a, yebotum emia hɛn enyi egyina ɔhaw biara a yebehyia no ano. Sɛ hɛn nuanom kɔ ahokyer mu a, yɛbɛyɛ dza yebotum biara dze aboa hɔn, na yaama hɔn nsa aka dza wohia dze akyerɛ dɛ yɛwɔ ayamuhyehye. Afei so, yɛnye hɛn nuanom a yɛdɔ hɔn no bɔbɔ pampee. Iyi bɛma Jehovah agye hɛn nkwa akɔ wiadze fofor no mu. Hɔ dze atoyerɛnkyɛm na amandzehu a ɔretseetsee hɛn ndɛ no remmba hɛn adwen mu bio.​—Isa. 65:17.