1-2. Ebɛn kwan do na wobotum dze Christianfo atoto aborɔsan tsentsen bi ho? (1 Corinthfo 15:58)

 AFE 1978 mu no, wosii aborɔsan tsentsen bi a ɔtoa do 60 wɔ Tokyo a ɔwɔ Japan. Nna asaasewosow taa sisi wɔ dɛm bea no. Ntsi nna ɔyɛ nkorɔfo nwanwa dɛ woesi aborɔsan tsentsen a ɔtse dɛm esi hɔ. Ebɛnadze na hɔn a wosii dan no yɛe a sɛ asaasewosow si a ɔremma dan no nndwuruw nngu? Ndzɛmba a wɔdze sii dan no ntsi sɛ asaasewosow si a, dan no bɛkyea kakra na wɔasan atsen, naaso orunndwuruw nngu. Dɛ Christianfo no, hɛn so yɛtse dɛ dɛm aborɔsan tsentsen no. Ebɛnadze ntsi na yɛreka dɛm?

² Ɔsɛ dɛ Christiannyi hu ber a obegyina pintsinn nye ber a ɔsɛ dɛ ɔda ntseasee edzi. Sɛ ɔba no Jehovah ne mbra a ɔdze bɛyɛ edwuma a, ɔsɛ dɛ ogyina pintsinn na ɔnnsɛ dɛ ohinhim. (Kenkan 1 Corinthfo 15:58.) Ɔsɛ dɛ “ɔyɛ asoɔmberɛw” anaa otsie Jehovah, na ɔnnsɛ dɛ obu ne mbransɛm do. Naaso sɛ no ho ba hia a, ɔsɛ dɛ ɔda ntseasee edzi na ɔnnsɛ dɛ ɔyɛ katsee. (Jas. 3:17) Christiannyi a ɔtse dɛm no, ɔnnyɛ katsee dodoodow, ɔno so a ɔnnsosɔw ndzɛmba bɔn do. Adzesua yi mu no, yɛbɔhwɛ dza yɛbɛyɛ ama yeetum egyina pintsinn na yeennhinhim. Afei so, yɛbɔhwɛ akwan enum a Satan fa do dɛ ɔbɛsɛɛ hɛn bo a yeesi dɛ yɛbɔkɔ do edzi Jehovah nokwar no. Bio so, yɛbɔhwɛ dza yebotum ayɛ amma Satan ennya hɛn.

3. Ebɛn mbra na Jehovah dze ama wɔ Asomafo Ndwuma 15:28, 29 no?

³ Jehovah na ɔfata paa dɛ ɔhyehyɛ mbra ma no nkorɔfo, na mbra biara a ɔdze ma hɔn no so, ɔma wɔtse ase ama woeetum edzi do. (Isa. 33:22) Dɛ nhwɛdo no, akwankyerɛ kuw a nna ɔwɔ tsetse Christianfo no hɔn aber do no boaa Christianfo ma wohun dɛ ɔsɛ  dɛ wogyina pintsinn wɔ ndzɛmba ebiasa yi mu: (1) dɛ wɔbɔtwe hɔnho efi abosonsɔr biara ho na wɔasom Jehovah nkotsee, (2) dɛ wobobu bɔgya dɛ ɔyɛ krɔnkrɔn na (3) dɛ wɔdze Bible mu mbra a ɔfa edwamambɔ ho no bɛyɛ edwuma. (Kenkan Asomafo Ndwuma 15:28, 29.) Ebɛn kwan do na Christianfo a wɔwɔ hɔ ndɛ so botum egyina pintsinn wɔ ndzɛmba ebiasa a yɛaka ho asɛm yi mu?

4. Ebɛnadze na yɛyɛ dze kyerɛ dɛ yɛsom Jehovah nkotsee? (Nyikyerɛ 4:11)

⁴ Yɛtwe hɛnho fi abosonsɔr biara ho na yɛsom Jehovah nkotsee. Jehovah kaa kyerɛɛ Israelfo no dɛ ɔno nkotsee na ɔsɛ dɛ wɔsom no. (Deut. 5:6-10) Afei so, aber a Abɔnsam sɔɔ Jesus hwɛe no, Jesus maa ɔdaa edzi pefee dɛ Jehovah nkotsee na ɔsɛ dɛ yɛsom no. (Matt. 4:8-10) Dɛm ntsi, yɛmmfa ohonyi biara nndzi dwuma wɔ hɛn som mu. Na dɛmara so na yɛmmfa enyidzi soronko mma nyamesom mu mpanyimfo, aban mpanyimfo, nyimpa a wɔagye dzin wɔ agodzi, ndwontow, sene nye dza ɔkeka ho mu no dɛ gyama wɔyɛ enyame bi. Hɛn dze, yegyina Jehovah n’afa pintsinn na yɛsom ɔno nkotsee, osiandɛ ‘ɔno na ɔbɔɔ adze nyina.’​—Kenkan Nyikyerɛ 4:11.

5. Ebɛnadze ntsi na yɛdze Jehovah ne mbra a ɔfa nkwa na bɔgya ho no yɛ edwuma?

⁵ Jehovah bu nkwa na bɔgya dɛ ɔyɛ krɔnkrɔn, ntsi yedzi mbra a ɔdze ama hɛn wɔ ho no do. Ebɛnadze ntsi a? Osiandɛ Jehovah aka dɛ bɔgya no ara nye nkwa, na ɔyɛ akyɛdze a ɔsom bo a ofi Nyankopɔn hɔ. (Lev. 17:14) Ber a odzi kan a Jehovah kaa dɛ nyimpa botum eku mbowa awe no, ɔdze mbra kaa ho dɛ mma wonndzi bɔgya no. (Gen. 9:4) Ɔsanee sii dɛm mbra no do aber a ɔdze Moses Mbra no maa Israelfo no. (Lev. 17:10) Afei so, ɔmaa akwankyerɛ kuw a nna ɔwɔ tsetse Christianfo hɔn aber do no dze akwankyerɛ maa Christianfo nyina dɛ, ‘wɔntwe hɔnho mfi bɔgya ho.’ (Andw. 15:28, 29) Sɛ yerisi gyinae a ɔfa hɛn ayarsa ho a, yedzi dɛm mbra yi do pɛpɛɛpɛ. b

6. Sɛ yebotum edzi Jehovah ne mbra a ɔnye dɛ yɛntwe hɛnho mfi edwamambɔ ho no do a, ebɛnadze na ɔsɛ dɛ yɛyɛ?

⁶ Yedzi Jehovah ne mbra a ɔnye dɛ yɛntwe hɛnho mfi edwamambɔ ho no do pɛpɛɛpɛ. (Heb. 13:4) Ɔsomafo Paul dze kasakoa bi dzii dwuma aber a orutu Christianfo fo no. Ɔkaa wɔ afotu no mu dɛ ‘yenku’ hɛn nyimpadua akwaa. Dza iyi kyerɛ nye dɛ ɔsɛ dɛ yɛyɛ dza yebotum biara dze ko tsia akɔndɔ bɔn biara a yɛwɔ no. Ntsi ɔnnsɛ dɛ yɛhwɛ anaa yɛyɛ biribiara a ɔbɛma yɛdze hɛnho ahyɛ nda mu ɔbrasɛɛ mu. (Col. 3:5; Job 31:1) Sɛ yehyia tsebea bi a obotum ama yɛdze hɛnho ahyɛ nda mu ɔbrasɛɛ mu a, yeyi hɛn adwen fi do ntsɛmara na yɛnnyɛ biribiara a ɔbɛsɛɛ yɛnye Jehovah ntamu ebusuabɔ no.

7. Ebɛnadze na ɔsɛ dɛ yesi hɛn bo dɛ yɛbɛyɛ, na ebɛnadze ntsi na ɔsɛ dɛ yɛyɛ dɛm?

⁷ Jehovah pɛ dɛ ‘yefi hɛn akoma mu yɛ setsie’ ma no. (Rom. 6:17) Sɛ yɛdze Jehovah ne mbra bɔ hɛn bra a, ɔboa hɛnankasa, na ne mbra so dze, yerunntum nnsesa no ma ɔnye dza yɛpɛ nnhyia. (Isa. 48:17, 18; 1 Cor. 6:9, 10) Ntsi yɛyer hɛnho dɛ yɛbɛyɛ dza Jehovah pɛ, na yɛyɛ hɛn adze dɛ ɔdwontofo no. Ɔkaa dɛ: “Madan m’akoma dɛ mibedzi wo mbra do daa, ekodu ewiei mpo.” (Ndw. 119:112) Naaso Satan dze, ɔreyɛ dza obotum biara dɛ ɔbɛma wɔayɛ dzen ama hɛn dɛ yebefi hɛn akoma mu ayɛ setsie ama Jehovah. Ebɛn akwan na ɔfa do yɛ dɛm?

8. Satan nam ɔsoɛrtsia do pɛ dɛ ɔsɛɛ hɛn bo a yeesi dɛ yɛbɛyɛ dza Jehovah pɛ no. Ɔyɛ no dɛn?

⁸ Ɔsoɛrtsia. Abɔnsam tum ma afofor yɛ hɛn basabasa anaa wɔhyɛ hɛn dɛ yɛnyɛ dza Jehovah kyir. Dza ɔpɛ ara nye dɛ ‘ɔbɛmen’ hɛn anaa  ɔbɛma yɛayɛ biribi a ɔbɛsɛɛ yɛnye Jehovah ntamu ebusuabɔ no. (1 Pet. 5:8) Dɛ nhwɛdo no, Satan maa nyimpa binom puuw tsetse Christianfo no, wɔboor hɔn na wokunkum binom so osiandɛ nna woesi hɔn bo pintsinn dɛ wɔbɛyɛ dza Jehovah pɛ. (Andw. 5:27, 28, 40; 7:54-60) Ndɛ so, Satan ma wɔsoɛr tsia hɛn. Atseetsee a wɔdze hɛn nuanom a wɔwɔ Russia na aman afofor do refa mu no ma yehu dɛ iyi yɛ nokwar. Afei so, enuanom beberee wɔ hɔ a, hɔn a wɔmmpɛ hɛn asɛm no tan hɔn enyi.

9. Ma mfatoho a ɔkyerɛ dɛ ɔsɛ dɛ yɛhwɛ yie wɔ nhyɛdo a ɔnnda edzi ho.

⁹ Nhyɛdo a ɔnnda edzi. Sɛ ɔsoɛrtsia a Satan dze ba hɛn do no da nkyɛn a, ɔdze “ndaadaa” so dzi dwuma. (Eph. 6:11) Dɛ nhwɛdo no, wɔdze onua bi a wɔfrɛ no Bob kɔr ayarsabea dɛ wɔnkɛyɛ no oprehyɛn bi a ɔyɛ hu. Ɔkaa kyerɛɛ adɔktafo no dɛ, sɛ wɔreyɛ no oprehyɛn no a ɔrenngye bɔgya wɔ kwan biara do. Dɔkta a ɔbɛyɛ oprehyɛn no peen do dɛ ɔbɛyɛ dza ɔaka no. Naaso adze rebɛkye ma wɔayɛ Bob oprehyɛn no, dɔkta fofor bi baa ne nkyɛn aber a n’ebusuafo efi ne nkyɛn kɔ fie no. Ɔkaa kyerɛɛ no dɛ wɔremma no bɔgya, naaso wɔdze bi besi nkyɛn na sɛ no ho ba hia a, wɔdze ama no. Bi a nna ɔyɛ dɔkta no dɛ Bob bɛsesa n’adwen osiandɛ n’ebusuafo nnyi ne nkyɛn ntsi. Naaso Bob sii no pi dɛ, ɔmmfa ho dza obesi biara no, mma wɔmma no bɔgya.

10. Adwen a hɔn a wɔmmfa Nyankopɔn ne mbra nnyɛ hwee wɔ no, ebɛnadze ntsi na ɔyɛ hu? (1 Corinthfo 3:19, 20)

¹⁰ Adwen a hɔn a wɔmmfa Nyankopɔn ne mbra nnyɛ hwee no wɔ. Sɛ yenya adwen a hɔn a wɔmmfa Jehovah ne mbra nnyɛ hwee no wɔ no bi a, annhwɛ a hɛn so yɛbɛyɛ hɛn adze tse dɛ hɔn ara. (Kenkan 1 Corinthfo 3:19, 20.) “Wiadze yi nyansaa” taa ma nyimpa bu Nyankopɔn ne mbra do. Asɛm yi bi too tsetse Christianfo bi a nna wɔwɔ Pergamum nye Thyatira no. Wɔmaa abosonsɔr na ndwamanbra a nkorɔfo dze hɔnho hyɛ mu wɔ hɔn aber do no nyaa hɔn do tum. Osiandɛ nna wɔrososɔw ɔbrasɛɛ a ɔtse dɛm do ntsi, Jesus dze afotu a no mu yɛ dzen kɛmaa dɛm asafo ahorow ebien yi. (Nyi. 2:14, 20) Ndɛ so, nyimpa a woetwa hɛnho ehyia no botum ahyɛ hɛn dɛ yɛmfa hɛnho nhyɛ ndzɛmba ahorow a Jehovah kyir no mu. Hɛn ebusuafo nye hɛn anyɛnkofo bi mpo botum aka dɛ yɛyɛ katsee dodow, na sɛ yebu hɛn enyi gu Jehovah ne mbra do a, nna wɔayɛ dɛn. Dɛ nhwɛdo no, wobotum aka dɛ sɛ yɛdze hɛnho hyɛ ɔbrasɛɛ mu a, ɔnnyɛ bɔn, na Nyankopɔn ne mbra a ɔfa abrabɔ ho no etwa mu.

11. Ebɛnadze na ɔnnsɛ dɛ yɛyɛ?

¹¹ Ɔtɔ da a, yebotum enya adwen dɛ akwankyerɛ a Jehovah dze ma hɛn no, no mu nnda hɔ papa, anaa akwankyerɛ a yehia no, nnyɛ ne nyinara na ɔdze ama hɛn no. Sɛ yɛannhwɛ yie a, iyi bɛma yɛayɛ adze ma ‘wɔatra dza wɔakyerɛw no.’ (1 Cor. 4:6) Nna nyamesom mpanyimfo a wɔwɔ Jesus n’aber do no yɛ ndzɛmba ma ɔtra dza Bible no aka no. Hɔnankasa hyehyɛɛ hɔn mbra kaa Jehovah dze no ho na wɔmaa ɔyɛɛ dzen maa afofor dɛ wobotum edzi do. (Matt. 23:4) Jehovah nam Bible no na n’ahyehyɛdze no do ma hɛn akwankyerɛ a no mu da hɔ. Ntsi, yennyi biribiara a yebotum egyina do dze hɛn nsusui ahyehyɛ mbra aka akwankyerɛ a Jehovah dze ma hɛn no ho. (Mbɛ. 3:5-7) Iyi ntsi, yɛnnyɛ ndzɛmba nntra dza Bible aka no, anaa yenngyina mbrɛ yesi tse nka do nnhyehyɛ mbra mma hɛn nuanom wɔ ndzɛmba a hɔnankasa na ɔsɛ dɛ wosi ho gyinae no ho.

12. Ebɛn kwan do na Satan tserɛw “ndaadaa hun” mu?

¹² Ndaadaasɛm. Satan nam “ndaadaa hun” na “wiadze mfitsiasesɛm” do daadaa nkorɔfo na ɔma hɔn mu paapaa. (Col. 2:8) Tsetse Christianfo no hɔn aber do no, nna ndaadaa hun na wiadze mfitsiasesɛm no mu bi nye nyimpa nyansapɛ, Jewfo nkyerɛkyerɛ a onngyina Kyerɛwnsɛm no do, nye nkyerɛkyerɛ a ɔnye dɛ ɔsɛ  dɛ Christianfo dzi Moses Mbra do. Nna iyi yɛ ndaadaa, osiandɛ ɔmaa nkorɔfo yii hɔn adwen fii Jehovah a ɔyɛ nyansa nyina Wura no do. Ndɛ so, dza Satan yɛ nye dɛ, ɔnam TV na dawurbɔ ndwuma nye sohyial nɛtwɛk do tserɛw nsɛm a onnyi ngyinado nye atorsɛm a aban mpanyimfo keka no mu. Atorsɛm a ɔtsetse dɛm pii buu do aber a COVID-19 bae no. c Naaso, Jehovah n’ahyehyɛdze no dze akwankyerɛ mae, na enuanom a wotsiee no, ɔboaa hɔn ma dadwen annhyɛ hɔn do dɛ hɔn a wotsiee atorsɛm no.​—Matt. 24:45.

13. Ebɛnadze ntsi na ɔsɛ dɛ yɛyɛ ahwɛyie wɔ ndzɛmba a obotum atwetwe hɛn adwen no ho?

¹³ Ndzɛmba a ɔtwetwe adwen. Ɔnnsɛ dɛ yebu hɛn enyi gu ‘ndzɛmba ahorow a ohia no do.’ (Phil. 1:9, 10) Sɛ yɛma ndzɛmba twetwe hɛn adwen a, yɛbɛsɛɛ hɛn ber nye ahoɔdzen a yɛdze bɛyɛ ndzɛmba a no ho hia no. Ndzɛmba ahorow a yɛtaa yɛ no dabaa tse dɛ edzidzi, ɔnom, enyigyedze, nye edwuma mpo botum atwetwe hɛn adwen sɛ yɛma ɔbɛyɛ ndzɛmba a no ho hia hɛn paa wɔ hɛn asetsena mu a. (Luke 21:34, 35) Ɔno da nkyɛn a, da biara yɛtse ɔyɛkyerɛ ahorow a ɔkɔ do nye amanyɛsɛm ho amandzɛɛbɔ. Ɔnnsɛ dɛ yɛma kwan ma nsɛm a ɔtsetse dɛm no twetwe hɛn adwen koraa. Annyɛ dɛm a obotum ama yɛdze hɛn akoma ekedzi ɔfa bi ekyir. Satan fa akwan ahorow a yɛaka ho asɛm yi do, mbrɛ ɔbɛyɛ a ɔbɛsɛɛ hɛn bo a yeesi dɛ yɛbɔkɔ do edzi Jehovah nokwar no. Dze besi ha yi, hom mma yɛnhwɛ kwan a yebotum afa do ako etsia Satan na yaakɔ do edzi Jehovah nokwar.

14. Adze kor a obotum aboa hɛn ma yaakɔ do egyina Jehovah n’afa pintsinn nye dɛn?

¹⁴ Dwendwen siantsir a ihyiraa woho do maa Jehovah na ebɔɔ esu no ho. Ituu dɛm anamɔn no, osiandɛ nna epɛ dɛ igyina Jehovah n’afa. Dwendwen dza ɔboaa wo ma ebɛgyee dzii dɛ ehu nokwar no ho. Isuaa Jehovah no ho adze pii na ibenyaa ɔdɔ na obu kɛse maa wo sor Egya no. Ibenyaa no mu gyedzi, na dɛm gyedzi no kenyaan wo ma inuu woho wɔ wo bɔn ho. Ɔdɔ a ewɔ ma Jehovah no maa etwee woho fii ndzɛmba a okyir no ho na eyɛɛ dza n’enyi gye ho. Aber a etsee nka dɛ Nyankopɔn dze wo bɔn  nyina akyɛ wo no, w’akoma tɔɔ wo yamu paa. (Ndw. 32:1, 2) Ehyɛɛ ase kɔr asafo nhyiamu na ekaa ndzɛmba papa a irusua no ho asɛm kyerɛɛ nkorɔfo. Sesei dze, eyɛ Christiannyi a ehyira woho do ama Jehovah na abɔ esu, na esi wo bo dɛ ebɔkɔ do anantsew nkwa kwan no do ekesi daa.​—Matt. 7:13, 14.

15. Ebɛnadze ntsi na mfaso wɔ do dɛ yebosua adze na yaadwendwen ho?

¹⁵ Sua Nyankopɔn n’Asɛm no na dwendwen ho. Sɛ dua bi gye ndwow yie a otum gyina ehum ano. Dɛmara na hɛn so sɛ yebotum egyina pintsinn a, ɔsɛ dɛ yɛdze hɛn gyedzi gyina Bible no do. Sɛ dua rinyin a, no ndwow so nyin kɔ famu na ɔtserɛw. Hɛn so, sɛ yesua adze na yɛdwendwen ho a, ɔhyɛ hɛn gyedzi dzen na ɔma yehu dɛ sɛ yɛdze Jehovah n’akwankyerɛ yɛ edwuma a hɛnara na yenya do mfaso. (Col. 2:6, 7) Afei so, ɔyɛ a, dwendwen mbrɛ Jehovah n’akwankyerɛ, n’afotu nye ɔkwan a ɔfaa do bɔɔ n’asomfo ho ban wɔ tsetse mber mu no sii boaa hɔn no ho. Dɛ nhwɛdo no, aber a Ezekiel nyaa enyido-adzehu bi na ohun dɛ ɔbɔfo bi rususu asɔrfi no ho ndzɛmba ahorow no, ɔhwɛɛ dza nna ɔbɔfo no reyɛ no yie. Dɛm enyido-adzehu yi hyɛɛ Ezekiel ne gyedzi dzen, na ɔma hɛn so yenya esuadze a ɔboa hɛn ma yehu mbrɛ yebesi asom Jehovah wɔ nokwar mu. d (Ezek. 40:1-4; 43:10-12) Hɛn so, sɛ yɛgye mber sua Bible mu nokwasɛm a no mu dɔ no ho adze na yɛdwendwen ho a, yebenya do mfaso pii.

16. Ebɛn kwan do na Bob n’adwen a nna oesi no pi no boaa no? (Ndwom 112:7)

¹⁶ Ma w’adwen nsi pi. Ɔhen David kaa dɛ: “M’akoma etsim, Ao Nyankopɔn.” Asɛm a ɔkae yi ma yehu dɛ nna oesi n’adwen pi dɛ ɔbɔdɔ Jehovah aber nyina. (Ndw. 57:7) Hɛn so, ɔsɛ dɛ yesuasua David na yɛdze hɛnho to Jehovah do koraa. (Kenkan Ndwom 112:7.) Dɛm na Bob a yeedzi kan aka noho asɛm no yɛe ma ɔboaa no. Aber a dɔkta no kaa kyerɛɛ no dɛ wɔremma no bɔgya, naaso wɔdze bi besi nkyɛn na sɛ no ho ba hia a, wɔdze ama no no, osiandɛ nna oesi n’adwen pi ntsi, hɔ no ara na ɔkaa dɛ sɛ wɔbɛpɛ dɛ wɔma no bɔgya dze a, obefi ayarsabea hɔ akɔ ntsɛmara. Ekyir yi Bob kaa dɛ, “Manntwentweɔn m’ananadze koraa wɔ asɛm no ho, na munnuu moho so da wɔ gyinae a misii no ho.”

17. Ebɛnadze na yebotum esua efi Bob n’asɛm no mu?

 ¹⁷ Bob tumii gyinaa pintsinn, osiandɛ ansaana ɔrokɔ ayarsabea hɔ no, nna oedzi kan esi gyinae dada dɛ ɔrenngye bɔgya. Ebɛnadze na ɔboaa no? Dza odzi kan no, nna ɔpɛ dɛ ɔyɛ adze a ɔbɛma Jehovah n’enyi agye. Otsia ebien, dza Bible no nye asafo nwoma ahorow ka fa nkwa na bɔgya ho no, osuaa no yie. Otsia ebiasa, nna ɔgye dzi paa dɛ, sɛ odzi Jehovah ne mbra do a, obehyira no afebɔɔ. Hɛn so, ɔmmfa ho ɔhaw biara a yebehyia no, sɛ yesi hɛn adwen pi a, yebotum egyina ano.

18. Ebɛn kwan do na Barak n’asɛm no ma yehu dɛ ɔsɛ dɛ yɛdze hɛnho to Jehovah do? (Hwɛ mfonyin a ɔwɔ Ɔweɔn-Aban yi enyim no.)

¹⁸ Fa woho to Jehovah do. Barak nyaa awerɛhyɛmu wɔ akwankyerɛ a Jehovah dze maa no no mu, ne dɛm ntsi odzii konyim. Jehovah kaa kyerɛɛ Barak dɛ wɔnye Canaan nsordaafo a wɔwɔ akodze no nkɔko. Dɛm aber no, nna Sisera nye Canaan nsordaafo no hɔn safohen. Naaso nna Israelfo no nnyɛɛ krado dɛ wɔbɔkɔ ɔko na nna wonnyi akodze biara so. (Atsɛ. 5:8) Jehovah nam ɔbaa nkɔnhyɛnyi bi a wɔfrɛ no Deborah do kaa kyerɛɛ Barak dɛ onsian mfi Bepɔw Tabor do na onkehyia Sisera na ne ntseaseanam 900 no wɔ asaase tɛtɛr no do. Sɛ nna Israelfo no sian kɔ bea a ɔtse dɛm a, nna Canaanfo no ho bɛyɛ har asen hɔn, osiandɛ nna wɔtsetse ntseaseanam do. Nna Barak nyim iyi paa, naaso otsiee akwankyerɛ no. Aber a Israel nsordaafo no risian Bepɔw Tabor no, Jehovah maa nsu kɛse bi tɔree. Nsu no maa asaase no do yɛɛ atɛkyɛ, na Sisera ne ntseaseanam no kaa atɛkyɛ no mu. Jehovah maa Barak dzii hɔn atamfo no do konyim. (Atsɛ. 4:1-7, 10, 13-16) Dɛ mbrɛ Jehovah yɛe maa Israelfo no, hɛn so, sɛ yɛdze hɛnho to no do na yenya awerɛhyɛmu wɔ akwankyerɛ a ɔnam n’ahyehyɛdze no do dze ma hɛn no mu a, yebedzi konyim.​—Deut. 31:6.

19. Ebɛnadze ntsi na esi wo bo dɛ ebɔkɔ do egyina pintsinn?

¹⁹ Yɛtse Satan no wiadze bɔn yi mu, ntsi no ho hia dɛ yɛkɔ do yer hɛnho dɛ yebegyina pintsinn. (1 Tim. 6:11, 12; 2 Pet. 3:17) Hom mma yensi hɛn bo dɛ yɛremma ɔsoɛrtsia, nhyɛdo a ɔnnda edzi, adwen a hɔn a wɔmmfa Nyankopɔn ne mbra nnyɛ hwee no wɔ, ndaadaasɛm nye ndzɛmba a ɔtwetwe adwen mma hɛn gyedzi nnhinhim da. (Eph. 4:14) Mbom hom mma yengyina pintsinn wɔ Jehovah no som mu na yɛnkɔ do ndzi ne mbra a ɔdze ama hɛn no do. Naaso aber a yɛreyɛ dɛm no, ɔsɛ dɛ yɛda ntseasee edzi. Adzesua a odzi hɔ no, yɛbɔhwɛ mbrɛ Jehovah nye Jesus si da ntseasee edzi.