1. Aber a ehyɛɛ ase dɛ irusua Bible no, ebɛn nokwasɛm na ihunii?

 EKAA aber a ehyɛɛ ase dɛ irusua Bible no anaa? Bi a ɔyɛɛ wo nwanwa dɛ ibohun dɛ saana Nyankopɔn wɔ dzin. Ber a ihun dɛ Nyankopɔn nnyɛ nyimpa ayakayakadze wɔ abɔnsamgyamu no, bi a w’akoma tɔɔ wo yamu paa. Afei so aber a ihun dɛ ibotum ehu w’adɔfo a woewuwu no bio na enye hɔn atsena Paradise asaase do no, ɔbɛyɛ dɛ w’enyiwa gyee paa.

2. Sɛ Bible mu nokwasɛm a isuae no da nkyɛn a, ebɛn nkɔenyim bio na inyae? (Ephesusfo 5:1, 2)

² Ber a isuaa Bible no, ɔdɔ a ewɔ ma Jehovah no yɛɛ kɛse. Dɛm ɔdɔ no kenyaan wo ma edze dza isuae no yɛɛ edwuma. Osian Bible mu afotusɛm a edze yɛɛ edwuma ntsi, itumii sisii gyinae pa. Ebɔɔ mbɔdzen dɛ ebɛda suban pa edzi mbrɛ ɔbɛyɛ a Nyankopɔn n’enyiwa bɛgye woho. Dɛ mbrɛ abofra suasua n’awofo a wɔwɔ ɔdɔ no, dɛmara na wo so suasuaa wo sor Egya no.​—Kenkan Ephesusfo 5:1, 2.

3. Ebɛn nsɛm na yebotum ebisa hɛnho?

³ Yebotum ebisa hɛnho dɛ: ‘Ɔdɔ a mowɔ ma Jehovah sesei no ayɛ kɛse kyɛn ber a mobɔɔ esu no anaa? Ofi dɛm aber no besi ndɛ, mbrɛ misi susu ndzɛmba ho na meyɛ m’adze, nkanka mbrɛ misi da ɔdɔ edzi kyerɛ mo nuanom no kyerɛ dɛ murusuasua Jehovah anaa?’ Sɛ tsebea bi ntsi, ‘ɔdɔ a nna ewɔ no kan no’ ano adwe a, mma w’abaw mu mmbu atse. Biribi a ɔtse dɛm too tsetse Christianfo no. Naaso Jesus ammpa abaw wɔ hɔnho, na dɛmara na ndɛ so ɔremmpa abaw wɔ hɛnho. (Nyi. 2:4, 7) Onyim dɛ yebotum asan ahyɛ ɔdɔ a yenyae aber a yebohun nokwar no mu dzen.

4. Ebɛnadze na yebosusu ho wɔ adzesua yi mu?

 ⁴ Dɛm adzesua yi bɔboa hɛn ma yeehu dza yebotum ayɛ ama ɔdɔ a yɛwɔ ma Jehovah nye hɛn nuanom no akɔ do ayɛ kɛse. Afei so, yɛbɔhwɛ nhyira nye mfaso a yɛnye afofor benya aber a yɛreyɛ dɛm no.

5-6. Ebɛn ɔhaw na ɔsomafo Paul hyiae wɔ no som edwuma no mu, na ebɛnadze na ɔboaa no ma ɔkɔr do soom Jehovah?

⁵ Nna ɔsomafo Paul n’enyi gye paa wɔ Jehovah no som mu, naaso ohyiaa ɔhaw pii wɔ n’asetsena mu. Nna ɔtaa tutu akwan kɔ ekyir. Dɛm aber no so nna akwantu nnda famu koraa. Ɔtɔ da a, nna ohyia ɔhaw bi tse dɛ “esutsen mu esian” na “edwotwafo nsamu esian” wɔ n’akwantu no mu. Afei so ɔyɛ a, nna hɔn a wɔmmpɛ n’asɛm no bor no. (2 Cor. 11:23-27) Ɔno da nkyɛn a, nna nnyɛ aber nyina na nankasa no nuanom Christianfo no mpo kyerɛ ndzɛmba a ofi n’akoma mu yɛ dze boa hɔn no ho enyisɔ.​—2 Cor. 10:10; Phil. 4:15.

⁶ Ebɛnadze na ɔboaa Paul ma ɔkɔr do soom Jehovah? Osuaa Jehovah no su ho adze pii fii Bible no mu. Afei so, osuaa pii fii ndzɛmba ahorow a osisii wɔ n’asetsena mu no mu. Dɛm a ɔyɛe no boaa no ma ɔbɛgyee dzii dɛ Jehovah dɔ no paa. (Rom. 8:38, 39; Eph. 2:4, 5) Na iyi maa ɔno so bɔdɔɔ Jehovah paa. Paul ‘soom ahotseweefo no, na ɔkɔr do yɛɛ’ dɛm dze kyerɛɛ dɛ ɔdɔ Jehovah.​—Heb. 6:10.

7. Sɛ ɔdɔ a yɛwɔ ma Jehovah no botum ayɛ kɛse a, adze kor a yebotum ayɛ nye dɛn?

⁷ Sɛ yɛyer hɛnho sua Bible no a, ɔdɔ a yɛwɔ ma Jehovah no bɛyɛ kɛse. Sɛ erekenkan Bible no a, bɔ mbɔdzen dɛ ibohu mbrɛ dza erekenkan no ma ihu fa Jehovah ho. Bisa woho dɛ: ‘Ebɛnadze na ɔwɔ kyerɛwsɛm yi mu a ɔma muhu dɛ Jehovah dɔ me? Ebɛnadze na ɔwɔ dza makenkan yi mu a ɔbɔboa me ma maadɔ Jehovah?’

8. Ebɛn kwan do na mpaabɔ botum aboa hɛn ma yaadɔ Nyankopɔn kɛse?

⁸ Adze fofor so a ɔbɔboa hɛn ma ɔdɔ a yɛwɔ ma Jehovah no ayɛ kɛse nye dɛ yebefi hɛn akoma mu abɔ no mpaa aber nyina. (Ndw. 25:4, 5) Jehovah so betsie mpaa a ɔtse dɛm no. (1 John 3:21, 22) Akyerɛbaa bi a ɔwɔ Asia a wɔfrɛ no Khanh kaa dɛ: “Ahyɛse no dze, nna ndzɛmba a mesua afa Jehovah ho no na ɔma modɔ no. Naaso aber a muhun mbrɛ Jehovah sii buaa me mpaabɔ no, ɔdɔ a mowɔ ma no no yɛɛ kɛse. Osiandɛ nna menya ɔdɔ ama Jehovah ntsi, nna mepɛ dɛ meyɛ dza ɔpɛ.” b

9. Ebɛnadze na ɔma yehu dɛ nna Timothy dɔ enuanom no paa?

⁹ Mfe bi ekyir aber a Paul bɛyɛɛ Christiannyi no, ohyiaa aberantsɛ kamakama bi a wɔfrɛ no Timothy. Nna Timothy dɔ Jehovah na ɔdɔ afofor so. Paul kaa kyerɛɛ Philippifo no dɛ: ‘Minnyi obiara a ɔtse dɛ Timothy a obefi n’akoma mu edzi hom nsɛm ho dwuma.’ (Phil. 2:20) Hyɛ no nsew dɛ, wɔ dɛm asɛm yi mu no, Paul annka Timothy ho asɛm dɛ ɔyɛ obi a otum toto ndzɛmba yie anaa ɔyɛ ɔkasafo pa. Mbom no ɔkaa dɛ obefi n’akoma mu edzi hɔn nsɛm ho dwuma. Iyi kyerɛ dɛ nna Paul nyim dɛ Timothy dɔ enuanom no paa. Ekyingye biara nnyi ho dɛ nna asafo ahorow a Timothy som hɔn no yamu a nkyɛ ber aso ma ɔaaba bio.​—1 Cor. 4:17.

10. Ebɛnadze na Anna na no kun yɛe dze kyerɛɛ dɛ wɔdɔ hɔn nuanom?

¹⁰ Hɛn so, yɛhwehwɛ ndzɛmba ahorow a yebotum ayɛ dze aboa hɛn nuanom Christianfo. (Heb. 13:16) Hom mma yɛnhwɛ  dza Anna a yedzii kan kaa noho asɛm wɔ adzesua a odzi iyi enyim mu yɛe no. Ɔnye no kun kɛseraa ebusua bi a wɔyɛ Adasefo aber a ehum kɛse bi tui. Aber a wɔkɔree no, wohun dɛ ehum no ebu hɔn dan no sor egu mu ma hɔn ndzɛmba mu nyinara asɛɛ. Anna kaa dɛ: “Yeyiyii hɔn ndzɛmba no kɔhoree, na yɛtoow do bobɔɔw no kama na yɛdze kɛmaa hɔn. Hɛn dze, yeennhu dɛ ɔyɛ adze kɛse bi na yɛyɛe, naaso dza yɛyɛe no maa yɛnye hɔn benyaa anyɛnkofa a no mu yɛ dzen paa. Na ndɛ na ndɛ nyina, hɛn anyɛnkofa no mu yɛ dzen paa.” Ɔdɔ a Anna na no kun wɔ ma enuanom no na okenyaan hɔn ma wɔboaa hɔn no.​—1 John 3:17, 18.

11. (a) Sɛ yɛda ɔdɔ edzi kyerɛ afofor a, ɔma wɔtse nka dɛn? (b) Dɛ mbrɛ Mbɛbusɛm 19:17 ma yehu no, ebɛnadze na Jehovah yɛ wɔ ɔdɔ a yɛda no edzi kyerɛ afofor no ho?

¹¹ Sɛ yɛda ɔdɔ na ayamuyie edzi kyerɛ nkorɔfo a, mpɛn pii no wohu dɛ yɛrobɔ mbɔdzen dɛ yebosuasua Jehovah. Na sɛ ɔba no dɛm a, hɔn enyi sɔ ayamuyie a yɛda no edzi no paa. Sɛ Khanh a yeedzi kan aka noho asɛm no kaakaa hɔn a wɔboaa no mber bi a etwa mu no a, n’enyi gye paa. Ɔkaa dɛ: “Nna enuanom mbaa binom nye me kɔ asɛnka. Afei so nna wɔbɛfa me wɔ fie ma yekedzidzi, na yewie a wɔasan ebesian me. M’enyi sɔ dza enuanom yi nyina yɛe dze boaa me no paa. Mebohu dɛ dɛm enuanom yi bɔɔ mbɔdzen paa ansaana worutum ayɛ dɛm. Na ɔdɔ na ɔkaa hɔn ma wɔboaa me.” Nokwasɛm nye dɛ nnyɛ hɔn a yɛbɔboa hɔn no nyina na wɔbɛda hɛn ase. Khanh toaa n’asɛm no do dɛ: “Me yamu a nkyɛ mubotum ayɛ biribi dze etua dza enuanom no yɛe maa me no do kaw, naaso minnyim beebi a seseiara wɔwɔ. Minyim dɛ Jehovah dze onyim beebi a dɛm enuanom yi wɔ, na meserɛ no dɛ onhyira hɔn mma me.” Dza Khanh kae yi yɛ nokwar paa. Biribiara a yɛyɛ dze boa afofor no, sɛ osuar  mpo a, Jehovah hu. Obu no dɛ afɔrbɔ a ɔsom bo, anaa biribi a yɛdze abɔ no bosea na obotua ama hɛn.​—Kenkan Mbɛbusɛm 19:17.

12. Ebɛnadze na mbarimba a wɔwɔ asafo no mu no botum ayɛ dze akyerɛ dɛ wɔdɔ enuanom no? (Hwɛ mfonyin ahorow no so.)

¹² Sɛ eyɛ onuabanyin a, ibesi dɛn akyerɛ dɛ edɔ afofor na ebɛnadze na ibotum ayɛ dze aboa hɔn? Onua aberantsɛ bi a wɔfrɛ no Jordan bisaa asafo mu panyin bi ndzɛmba a obotum ayɛ dze aboa asafo no. Asafo mu panyin no kamfoo Jordan paa wɔ nkɔenyim a oenya no ho na ɔmaa no nyansahyɛ a obotum aboa no ma ɔaayɛ pii aka ho. Dɛ nhwɛdo no, asafo mu panyin no kaa kyerɛɛ no dɛ, ɔyɛ a ɔmbra Ahendzi Asa do ntsɛm na ɔmma enuanom no akɔaba na ɔmma mbuae so. Afei so, ɔnye n’asɛnka kuw no ntaa nkɔ asɛnka na ɔnhwehwɛ akwan ahorow a obotum afa do aboa enuanom no. Aber a Jordan dze dɛm afotu yi yɛɛ edwuma no, osuaa mbrɛ wosi yɛ ndzɛmba ahorow bi na onyaa ɔdɔ kɛse maa enuanom no so. Jordan bohun dɛ, sɛ onua bi bɛyɛ asafo mu somfo a, nnyɛ dɛm aber no na ɔhyɛ ase dɛ ɔreyɛ ndzɛmba ahorow bi dze aboa enuanom. Mbom ɔsɛ dɛ ɔyɛ dɛm ansaana ɔabɛyɛ ɔsomfo na ɔno ekyir no ɔkɔ do boa enuanom.​—1 Tim. 3:8-10, 13.

13. Nna Christian dɔ Jehovah na ɔdɔ enuanom so. Ebɛn kwan do na iyi boaa no ma ɔsanee soom dɛ asafo mu panyin bio?

¹³ Sɛ mber bi a etwa mu no nna eyɛ asafo mu somfo anaa asafo mu panyin so ɛ? Ma ɔntsena w’adwen mu dɛ Jehovah no werɛ rimmfir edwuma a eyɛe dze soom wo nuanom nye ɔdɔ a edaa no edzi no. (1 Cor. 15:58) Afei so, ohu ɔdɔ a ekɔ do da no edzi kyerɛ wo nuanom no. Onua bi a wɔfrɛ no Christian n’abaw mu buu paa dɛ ho kwan a nna ɔwɔ dɛ asafo mu panyin no fii ne nsa. Naaso ɔkaa dɛ: “Meyɛɛ  dɛ, sɛ mowɔ ɔsom hokwan o, sɛ minnyi bi o, mebɛyɛ dza mubotum biara asom Jehovah, osiandɛ modɔ no.” Enyigyesɛm nye dɛ, mber bi ekyir no wɔsanee paaw no dɛ asafo mu panyin. Christian dze kaa ho dɛ: “Nna memmpɛ dɛ mebɛsan asom dɛ asafo mu panyin bio. Naaso mubohun dɛ sɛ Jehovah ehu me mbɔbɔr na ɔpɛ dɛ mesan som dɛ asafo mu panyin bio dze a, nna ɔno mebɛgye ato mu osiandɛ modɔ no na modɔ mo nuanom so.”

14. Ebɛnadze na isua fi akyerɛbaa a ɔwɔ Georgia no n’asɛm no mu?

¹⁴ Jehovah n’asomfo da ɔdɔ edzi kyerɛ afofor so. (Matt. 22:37-39) Dɛ nhwɛdo no, akyerɛbaa bi a wɔfrɛ no Elena a ɔwɔ Georgia kaa dɛ: “Ahyɛse no dze, nna ɔdɔ a mowɔ ma Jehovah ntsi na mokɔ asɛnka. Naaso aber a ɔdɔ a mowɔ ma Jehovah no yɛɛ kɛse no, ɔmaa ɔdɔ a mowɔ ma nkorɔfo no so yɛɛ kɛse. Ɔyɛ a, nna modwendwen ɔhaw ahorow a worihyia nye asɛntsir a sɛ menye hɔn bɔ ho nkɔmbɔ a ɔbɛka hɔn akoma no ho. Aber a mokɔr do yɛɛ dɛm no, ɔmaa ɔpɛ a mowɔ dɛ mobɔboa hɔn no yɛɛ kɛse.”​—Rom. 10:13-15.

15-16. Dɛ mbrɛ yehu wɔ mfonyin no mu no, sɛ yɛda ɔdɔ edzi kyerɛ nkorɔfo a, ebɛn nhyira na ofi mu ba?

¹⁵ Ɔnnyɛ hɛn nuanom nkotsee na wonya ɔdɔ a yɛda no edzi kyerɛ hɔn no do mfaso. Aber a COVID-19 hyɛɛ ase no, onua bi a wɔfrɛ no Paolo nye ne yer boaa nkyerɛbaa pii a hɔn mfe akɔ enyim ma wohun mbrɛ wobesi dze hɔn elɛktrɔnek mfir no edzi dase. Ahyɛse no nna ɔyɛ dzen ma akyerɛbaa kor bi dɛ ɔdze  ne elɛktrɔnek efir no bedzi dase naaso ekyir yi ohun yɛ. Otumii dze too nsa frɛɛ n’ebusuafo binom dɛ wɔmbra Nkaadzi no bi. Hɔn mu eduosia tsiee dwumadzi no wɔ video kɔnferɛns do! Akyerɛbaa no nye n’ebusuafo yi nyina nyaa dwumadzi no mu kyɛfa, osiandɛ Paolo na ne yer boaa no ma ohun mbrɛ ɔdze ne elɛktrɔnek efir bedzi dwuma. Ekyir yi, akyerɛbaa no kyerɛɛw krataa kɛmaa Paolo na ɔkaa dɛ: “Yɛda wo ase paa dɛ aboa hɛn a hɛn mfe akɔ enyim yi ma yeehu mbrɛ yɛdze hɛn mfir bedzi dwuma. Iyi ama yeehu dɛ Jehovah dwen hɛnho paa, na edwumadzen a eyɛe dze boaa hɛn no so, mo werɛ rimmfir da.”

¹⁶ Nsɛm a ɔtsetse dɛm no ama Paolo esua biribi a no ho hia paa. Ɔno nye dɛ, ɔdɔ ho hia sen nyimdzee anaa adomakyɛdze bi a yɛwɔ. Ɔkaa dɛ: “Mber bi a etwa mu no, nna mosom dɛ ɔmansin do hwɛfo. Ndɛ, minyim dɛ bi a enuanom no werɛ efir ɔkasa ahorow a memae no, naaso wɔda ho ara kaa mboa a medze maa hɔn no.”

17. Sɛ yɛda ɔdɔ edzi a, woana so na onya do mfaso?

¹⁷ Sɛ yɛda ɔdɔ edzi a, hɛnankasa so tum nya do mfaso a yɛnnhwɛ kwan. Jonathan a ofi New Zealand hun dɛ asɛm yi yɛ nokwar. Memenda ewiaber ketee bi, ohun ɔkwampaafo bi a nankotsee ridzi dase wɔ kwan ho. Jonathan yɛe dɛ ɔnye no bɔkɔ asɛnka Memenda ewiaber biara. Ahyɛse no, nna onnyim mbrɛ asɛnka a ɔnye ɔkwampaafo no bɔkɔ no besi aboa nankasa. Jonathan kaa dɛ: “Dɛm aber no, nna m’enyi nngye asɛnka ho. Naaso aber a mohwɛɛ mbrɛ ɔkwampaafo no si kyerɛkyerɛ, na muhun mbrɛ no som edwuma no si tu mpon no, ɔmaa m’enyi bɛgyee asɛnka ho paa. Afei so, ɔbɛyɛɛ me nyɛnko berɛbo na ɔboaa me ma m’enyi bɛgyee asɛnka edwuma no ho, na mebɛɛn Jehovah kɛse.”

18. Ebɛnadze na Jehovah pɛ dɛ yɛyɛ?

¹⁸ Jehovah pɛ dɛ ɔdɔ a yɛwɔ ma ɔno na afofor no kɔ do ara yɛ kɛse. Dɛ mbrɛ adzesua yi aboa hɛn ma yeehu no, sɛ yebotum ama ɔdɔ a yɛwɔ ma Jehovah no ayɛ kɛse a, ɔsɛ dɛ yɛkenkan Bible no na yɛdwendwen ho na yɛbɔ no mpaa dabaa. Afei so, sɛ yɛyɛ ndzɛmba pɔtsee bi boa hɛn nuanom a, ɔma ɔdɔ a yɛwɔ ma hɔn no yɛ kɛse. Sɛ yɛkɔ do da ɔdɔ edzi a, ɔbɔboa hɛn ma yaabɛn Jehovah nye hɛn nuanom paa. Na yebenya dɛm anyɛnkofa yi do mfaso daa!