Mber a yenya dze yɛ ankorankor adzesua no suar. Naaso, ebɛnadze na ebɛyɛ na enya mfaso pii efi dɛm ber no mu? Dza odzi kan nye dɛ, ibenya abotar wɔ dza irusua no ho. Sɛ isie abotar sua adze kor yie a, ibenya do mfaso pii akyɛn dɛ edze ahoper bɛkenkan ndzɛmba pii.

Afei, fa botae ahorow bi sisi w’enyi do. (Eph. 5:15, 16) Nyansahyɛ ahorow bi nye yi:

• Kenkan Bible no da biara. (Ndw. 1:2) Ibotum dze dapɛn biara Bible akenkan a wotwa ma hɛn no ahyɛ ase.

• Dzi kan sua dza yebosua wɔ dapɛn finimfin nhyiamu ase nye Ɔweɔn-Aban no ansaana akɔ adzesua. Afei so, sɛ ekɔ a, bɔ mbɔdzen ma mbuae.​—Ndw. 22:22.

• Afei bɔ mbɔdzen dɛ ebɛkenkan magazine a yɛdze ma ɔmamfo no na hwɛ video ahorow nye nsɛm afofor a wɔdze gu jw.org do no.

• Fa asɛntsir bi si w’enyi do dɛ ebɛyɛ ho nhwehwɛmu. Ibotum ayɛ nhwehwɛmu wɔ ɔhaw bi a irihyia, asɛmbisa bi a ɔhaw wo anaa Bible mu asɛm bi a epɛ dɛ etse ase yie ho. Sɛ epɛ akwan afofor a ibotum afa do ayɛ a, kɔ “Bible Adzesua Ho Dwumadzi” ɔfa a ɔwɔ jw.org do no.